Read Akha Maˬkuˆ 2 Bible Online

Maˬkuˆ 2 - Akha bible

Maˬkuˆ 2

¹Heu myaˆ nah byah laˇ ngeh, Gaˬbeˬneˬoˬ meuˬ-ahˇ Yeˬsuˇ paˇ gʼoꞈ-iˇ-awˇ, aˬ yawꞈ iˇ kahˇ-ahˇ jawˇ luꞈ-eu gaˇ kawˆ gaˬ byah-iˇ-euˬ meh.

²Tsawˇ haˬ gʼawˬ mya ni uiˬ laˇ-euˬ miˇ neh, nymˇ laꞈ kʼoeˇ maˬ deˇ leˇ-eu uˬ taꞈ, laꞈ nyiˇ paw kʼawꞈ jawˇ kʼaˇ maˬ za-a. Tsawˇ haˬ kʼoeˇ deuˬ-ahˇ Yeˬsuˇ dawˬ mehˬ mehˬ nehˬ luꞈ-eu meh.

³Kʼoeˇ ngeh, tsawˇ haˬ oeˬ gʼaˬ kuiˇ shiˇ laꞈ shiˇ shiˇ-euˬ tsawˇ haˬ tiˬ gʼaˬ-ahˇ Yeˬsuˇ jawˇ gaˇ baꞈ ha laˇ-euˬ meh.

⁴Tsawˇ haˬ tiˬ teuˇ jawˇ-eu miˇ neh, Yeˬsuˇ jawˇ gaˇ maˬ baꞈ keuˆ gʼeh nya-ehˇ, Yeˬsuˇ-euˬ uˬ duˬ uˬ taˆ nyiˬ paˆ-ehˇ, nymˇ mˬ laˆ pehꞈ-euˬ meh. Nymˇ mˬ laˆ pehꞈ gʼaˬ ngeh, kuiˇ shiˇ laꞈ shiˇ shiˇ-eu tsawˇ haˬ kʼoeˇ gʼaˬ-ahˇ gawˬ pu kʼoeˇ taˆ bi yuꞈ-awˇ, maˇ pehꞈ kʼoeˇ tsahˇ-ahˇ neh aˬ za za-ehˇ pyehˬ ka-euˬ meh.

⁵Aˬ yawꞈ maꞈ kʼoeˇ naˆ naˆ-ehˇ jah gaˇ Yeˬsuˇ ya mawˇ ngeh, kuiˇ shiˇ laꞈ shiˇ shiˇ-euˬ kʼoeˇ gʼaˬ-ahˇ, “Ngaˬ li-oˇ, nawˬ-euˬ iˬ baˇ pyehˬ nehˬ gʼaˬ-euˬ ma” lehˇ ehˇ nehˬ-euˬ meh.

⁶Kʼoeˇ gaˇ nuiˇ luꞈ-eu Zahˇ dawˬ kʼoꞈ dawˬ mehˬ-eu saˬ laˬ tiˬ paˆ na deuˬ, yawˬ haˇ yaw ha heu loꞈ-ehˇ shaˇ noeˬ luꞈ-eu meh.

⁷“Tsawˇ haˬ heu gʼaˬ aˬ joˆ-ehˇ teu loꞈ-ehˇ ehˇ peuˬ-eu nga. Teu-aˬ, Miˬyehˇ-ahˇ yehˬ bawˬ sehˇ lu-ehˇ ehˇ gaˇ duˇ-eu meh. Miˬyehˇ maˬ ngeuˇ naˇ, aˬ suˇ gʼaˬ iˬ baˇ pyehˬ nehˬ nya ta.”

⁸Aˬ yawꞈ maꞈ kʼoeˇ loꞈ-ehˇ shaˇ noeˬ luꞈ-eu gaˇ kawˆ Yeˬsuˇ tiˬ poˆ tehꞈ-ehˇ siˬ nya-awˇ, heu loꞈ-ehˇ ehˇ nehˬ-euˬ meh. “Naw maꞈ-euˬ nui ma laꞈ kʼoeˇ aˬ jeˬ miˇ neh teu loꞈ-ehˇ noeˬ luꞈ te. Kuiˇ shiˇ laꞈ shiˇ shiˇ-eu tsawˇ haˬ heu gʼaˬ-ahˇ aˬ joˆ-ehˇ ehˇ nehˬ-eu awˬ dzehˬ ta.

⁹‘Nawˬ-euˬ iˬ baˇ pyehˬ nehˬ gʼaˬ-euˬ meh’ lehˇ ehˇ-eu awˬ dzehˬ ta loˇ. ‘Tuˇ-awˇ, nawˬ-euˬ gawˬ pu baꞈ-awˇ cah-awˬ’ lehˇ ehˇ nehˬ-eu awˬ dzehˬ ta loˇ.

¹⁰Tsawˇhaˬ-euˬ Zaˬmaˇ-aˬ, miˇ tsaˬ heu kʼoeˇ taˆ iˬ baˇ pyehˬ nehˬ-eu baoˬ jaˆ-eu gaˇ kawˆ, ngaˇ naw maꞈ-ahˇ bi siˬ bi mawˇ ma.” Kʼoeˇ naˇ, kuiˇ shiˇ laꞈ shiˇ shiˇ-eu tsawˇ haˬ kʼoeˇ gʼaˬ-ahˇ aˬ yawꞈ ehˇ nehˬ-eu,

¹¹“Tuˇ-awˇ, nawˬ-euˬ gawˬ pu baꞈ-awˇ gʼoꞈ-iˇ-awˬ lehˇ nawˬ-ahˇ ngaˇ ehˇ-eu ma.”

¹²Aˬ yawꞈ maꞈ dawˬ tawˆ luꞈ haw luꞈ ngeh, tsawˇ haˬ kʼoeˇ gʼaˬ tuˇ laˇ-awˇ, aˬ yawꞈ-euˬ gawˬ pu yaw kawˇ-ehˇ baꞈ-awˇ doˆ-iˇ-euˬ meh. Aˬ yawꞈ maꞈ dawˬ tawˆ luꞈ zahˬ dui dui leˇ-awˇ, Miˬ yehˇ-ahˇ ja ceuˬ-eu laꞈ kʼoeˇ ehˇ-eu, “Heu loꞈ-ehˇ gʼeh-eu jeˬ tiˬ jawˇ-iˬ maˬ mawˇ haw-aˬ.”

¹³Gaˬliˬlehˇ lah lah dzeˇ Yeˬsuˇ tiˬ poˆ paˇ iˇ-euˬ meh. Tsawˇ haˬ aˇ maꞈ maꞈ ma aˬ yawꞈ jawˇ gaˇ uiˬ laˇ-awˇ, aˬ yawꞈ mehˬ nehˬ tsoˆ nehˬ-euˬ meh.

¹⁴Aˬ yawꞈ mehˬ hu paw cah gʼeh luꞈ geh, Aˬlaˬpehˇ-euˬ aˬ li Leˬbiˇ lehˇ myahˇ-euˬ kawˬ taꞈ-eu tsawˇ haˬ tiˬ gʼaˬ, saˇ naˇ laꞈ kʼoeˇ nuiˇ luꞈ gaˇ mawˇ-euˬ meh. “Ngaˬ-euˬ mehˬ nah caw teh laˇ-awˬ” lehˇ Yeˬsuˇ ehˇ ngeh, Leˬbiˇ tsawˬ tuˇ laˇ-awˇ, Yeˬsuˇ-euˬ mehˬ nah caw teh gʼeh-euˬ meh.

¹⁵Kʼoeˇ naˇ, Leˬbiˇ-euˬ nymˇ-ahˇ Yeˬsuˇ hawˬ dzaˬ-euˬ meh. Kawˬ taꞈ-eu tsawˇ haˬ deuˬ hawˇ-eu iˬ baˇ zaˬ deuˬ gʼawˬ mya ni, Yeˬsuˇ mehˬ nah caw teh luꞈ-eu meh. Aˬ yawꞈ maꞈ gʼawˬ mya ni, Yeˬsuˇ hawˇ-eu aˬ yawꞈ-euˬ zaˬ lahˇ deuˬ nehˬ-ehˇ hawˬ jawˬ jawˬ-awˇ dzaˬ-euˬ meh.

¹⁶Aˬ caw neh iˬ baˇ zaˬ lehˇ myahˇ-awˇ bi sawˇ dzeh taˬ-euˬ tsawˇ haˬ deuˬ hawˇ-eu kawˬ taꞈ-eu tsawˇ haˬ deuˬ nehˬ-ehˇ Yeˬsuˇ hawˬ dzaˬ taꞈ gaˇ, Zahˇ dawˬ kʼoꞈ dawˬ mehˬ-eu saˬ laˬ deuˬ pyeuꞈ-eu Paˬliˬsehˇ deuˬ ya mawˇ ngeh, “Aˬ jeˬ miˇ neh kʼoeˇ loꞈ-ehˇ gʼeh-eu tsawˇ haˬ deuˬ nehˬ-ehˇ aˬ yawꞈ dzaˬ taꞈ dawˇ taꞈ ta” lehˇ, Yeˬsuˇ-euˬ zaˬ lahˇ deuˬ-ahˇ aˬ yawꞈ maꞈ naˇ haˬ-euˬ meh.

¹⁷Aˬ yawꞈ maꞈ kʼoeˇ loꞈ-ehˇ ehˇ gaˇ Yeˬsuˇ ya gaˬ-awˇ, heu loꞈ-ehˇ ehˇ kʼoꞈ nehˬ-euˬ meh. “Jawˇ saˇ doˆ luꞈ-eu deuˬ naˇ gawˇ laˆ saˆ-eu tsawˇ haˬ-ahˇ maˬ loˬ-a. Jawˇ saˇ maˬ doˆ-eu deuˬ tehꞈ-ehˇ loˬ-eu meh. Aˬ cawˬ yaw zeu baw-eu tsawˇ haˬ deuˬ-ahˇ kuˇ-eu lehˇ ngaˇ oe-euˬ maˬ ngeuˇ. Iˬ baˇ zaˬ deuˬ-ahˇ kuˇ-eu lehˇ ngaˇ oe-euˬ ma.”

¹⁸Tiˬ poˆ-aˬ, Iˇ cuꞈ shawˇ-eu Yoˇhaˬ-euˬ zahˬ lahˇ deuˬ hawˇ-eu Paˬliˬsehˇ deuˬ maˬ dzaˬ-eu zahˇ jahˇ-euˬ meh. Tsawˇ haˬ tiˬ paˆ na deuˬ Yeˬsuˇ jawˇ gaˇ laˇ-awˇ ehˇ-eu, “Iˇ cuꞈ shawˇ-eu Yoˇhaˬ-euˬ zaˬ lahˇ deuˬ hawˇ-eu, Paˬliˬsehˇ deuˬ-euˬ zaˬ lahˇ deuˬ maˬ dzaˬ-eu zahˇ jahˇ kʼawꞈ, aˬ jeˬ miˇ neh nawˬ-euˬ zaˬ lahˇ deuˬ kʼoeˇ loꞈ-ehˇ maˬ jahˇ ta.”

¹⁹Yeˬsuˇ ehˇ-eu, “Oeˇ mˇ baˇ gaˇ laˇ-euˬ tsawˇ haˬ deuˬ maˬ dzaˬ-eu zahˇ jahˇ tehꞈ-a loˇ. Maˬ jahˇ-aˇ. Miˬ zaˬ sheuˬ-eu gʼaˬ aˬ yawꞈ maꞈ nehˬ-ehˇ kʼaˇ jawˇ kʼoeˇ keuˆ ni, maˬ dzaˬ-eu zahˇ maˬ jahˇ-aˇ.

²⁰Ehˇ kʼawꞈ, miˬ zaˬ sheuˬ-eu gʼaˬ-ahˇ aˬ yawꞈ maꞈ nehˬ-ehˇ maˬ bi jawˇ ni bi sheuˬ byoˆ gʼeh-eu tiˬ nah keuˆ le tehꞈ-a. Kʼoeˇ ngeh jawˇ, aˬ yawꞈ maꞈ maˬ dzaˬ-eu zahˇ jahˇ tehꞈ-a.

²¹“Tsawˇ haˬ tiˬ gʼaˬ-iˬ mehˬ tsoeˬ yaw cehˇ-ahˇ saˬ paˇ yaw shuiꞈ neh pehˇ tsahˇ maˬ doꞈ-aˇ. Kʼoeˇ loꞈ-ehˇ doꞈ naˇ, pehˇ tsahˇ yaw shuiꞈ kʼoeˇ baˬ da neh mehˬ tsoeˬ yaw cehˇ kʼoeˇ kahˇ paˇ pyaˬ dzehˬ-iˇ-awˇ, yaw beh naˆ maˬ tseˇ maˇ kʼehˬ jeˇ dzehˬ laˇ tehꞈ-a.

²²Kʼoeˇ gaˇ duˇ ni, tsawˇ haˬ tiˬ gʼaˬ-iˬ aˬ gaꞈ dzaˇ uiˇ shehˆ ahˇ-eu shaˬ kʼoˆ iˇ puˬ yaw oeˇ laꞈ kʼoeˇ, aˬ gaꞈ dzaˇ uiˇ yaw shuiꞈ maˬ shehˆ ahˇ-aˇ. Kʼoeˇ loꞈ-ehˇ jahˇ naˇ, aˬ gaꞈ dzaˇ uiˇ kʼoeˇ shaˬ kʼoˆ iˇ puˬ-ahˇ dzaˬ pehꞈ-awˇ, aˬ gaꞈ dzaˇ uiˇ kʼaˇ-iˇ-eu uˬ taꞈ, shaˬ kʼoˆ iˇ puˬ cawˆ-iˇ tehꞈ-a. Aˬ gaꞈ dzaˇ uiˇ yaw shuiꞈ-ahˇ, shaˬ kʼoˆ iˇ puˬ yaw shuiꞈ laꞈ kʼoeˇ ya shehˆ ahˇ-eu meh.”

²³Jawˇ nah ngeh nah Yeˬsuˇ cehˇ yaˇ-ahˇ iˇ paˆ gʼeh ngeh, aˬ yawꞈ-euˬ mehˬ nah caw teh luꞈ-eu zaˬ lahˇ deuˬ cehˇ nmˇ tseuˆ tseuˆ-ehˇ cah-eu meh.

²⁴Paˬliˬsehˇ deuˬ Yeˬsuˇ-ahˇ ehˇ-eu, “Haw sheˇ. Aˬ jeˬ miˇ neh Jawˇ nah ngeh nah maˬ mˇ kʼmˬ-eu jeˬ aˬ yawꞈ maꞈ mˇ ta.”

²⁵Yeˬsuˇ ehˇ-eu, “Daˬbiˇ hawˇ-eu aˬ yawꞈ-euˬ tsawˇ haˬ deuˬ hawˬ mehꞈ mehꞈ dui dui laˇ-awˇ, tiˬ jeˬ paˬ maˬ dzaˬ-ehˇ maˬ gʼeh nya ni pyeuꞈ laˇ ngeh, aˬ joˆ-ehˇ jahˇ-euˬ gaˇ kawˆ naw maꞈ maˬ ya gui haw-aˬ loˇ.

²⁶Miˬyehˇ-euˬ nymˇ laꞈ kʼoeˇ aˬ yawꞈ uˇ leˇ-awˇ, Miˬyehˇ-ahˇ lawˇ nehˬ taˬ-euˬ kaˬ muˇ dzaˬ-euˬ meh. Aˬbyaˬdaˬ Piˇ ma Yaw huiˬ gʼaˬ geuꞈ ngeh ziˇ-ahˇ, kʼoeˇ loꞈ-ehˇ pyeuꞈ yaꞈ-euˬ meh. Aˬ dui-euˬ Zahˇ dawˬ kʼoꞈ dawˬ laꞈ kʼoeˇ, piˇ ma deuˬ tehꞈ-ehˇ kʼoeˇ loꞈ-ehˇ gʼeh-eu dzaˇ deuˬ dzaˬ kʼmˬ-eu meh. Ehˇ kʼawꞈ, Daˬbiˇ aˬ yawꞈ dzaˬ-euˬ u taꞈ, aˬ yawꞈ-euˬ tsawˇ haˬ deuˬ-ahˇ kʼawꞈ biꞈ nehˬ-awˇ bi dzaˬ-euˬ meh.”

²⁷Yeˬsuˇ aˬ yawꞈ maꞈ-ahˇ ehˇ nehˬ-eu, “Jawˇ nah-aˬ, tawˇ haˬ zaˬ gʼaˇ duˬ muiˬ ni beh taˬ-euˬ jeˬ pyeuꞈ-eu meh. Jawˇ nah gʼaˇ duˬ tsawˇ haˬ zaˬ-ahˇ beh taˬ-euˬ maˬ ngeuˇ-a.

²⁸Tsawˇhaˬ-euˬ Zaˬmaˇ-aˬ, Jawˇ nah-ahˇ uˆ lahˇ-eu Sahˬpaˬ kʼawꞈ ngeuˇ meh.”