Read Akha Maˬkuˆ 6 Bible Online

Maˬkuˆ 6 - Akha bible

Maˬkuˆ 6

¹Yeˬsuˇ kʼoeˇ gaˇ neh doˆ le-awˇ, aˬ yawꞈ jawˇ-eu miˇ kʼahˬ-ahˇ gʼoꞈ leˇ-euˬ meh. Aˬ yawꞈ-euˬ zaˬ lahˇ deuˬ kʼawꞈ, aˬ yawꞈ mehˬ nah caw teh kʼoꞈ leꞈ-euˬ meh.

²Jawˇ nah ngeh nah, uˬ duˬ tahˬ nymˇ laꞈ kʼoeˇ aˬ yawꞈ mehˬ-euˬ tsoˆ-euˬ meh. Aˬ yawꞈ mehˬ gaˇ tsoˆ gaˇ ya gaˬ-euˬ tsawˇhaˬ gʼawˬ mya ni zahˬ dui dui leˇ-awˇ, heu loꞈ-ehˇ ehˇ-eu meh. “Tsawˇ ha heu gʼaˬ teu loꞈ-ehˇ gʼeh-eu jeˬ aˬ gaˇ laˬ-iˇ-euˬ nga. Aˬ yawꞈ-ahˇ biꞈ taˬ-euˬ zaˬ siˬ tsawˇ gahˇ teu, aˬ geu jeˬ-euˬ zaˬ siˬ tsawˇ gahˇ nga. Aˇ naˆ naˆ-ehˇ gʼeh-eu zahˬ leˇ paˬ-ehˇ gʼeh-eu jeˬ aˬ yawꞈ mˇ doˆ laꞈ nya-eu nga.

³Tsawˇ haˬ heu gʼaˬ Maˬliˇ-euˬ aˬ li laꞈ saˇ maˇ kʼoeˇ gʼaˬ maˬ ngeuˇ nga loˇ. Yaˬkoˆ, Yoˇsehˆ, Yuˇdaˆ, Siˇmoˬ aˬ ha mehˇ nmˇ-euˬ aˇ doˆ maˬ ngeuˇ nga loˇ. Aˬ yawꞈ-euˬ dmˇ ma deuˬ aˬ dui maꞈ nehˬ-ehˇ jawˇ luꞈ meh tawˇ.” Aˬ yawꞈ maꞈ aˬ yawꞈ-ahˇ myaˆ naˆ-awˇ bye-eu meh.

⁴Yeˬsuˇ aˬ yawꞈ maꞈ-ahˇ ehˇ nehˬ-eu, “Miˬyehˇ gʼaˇ duˬ ngehˬ dah-eu tsawˇ haˬ-ahˇ yawˬ gaˇ na luꞈ aˬ cawˬ taˬ huiˬ nehˬ meh. Ehˇ kʼawꞈ, aˬ yawꞈ-euˬ jawˇ kʼahˬ, aˬ yawꞈ-euˬ aˬ yuiꞈ aˬ nyiˇ deuˬ hawˇ-eu, aˬ yawꞈ-euˬ nymˇ kʼahˬ zaˬ deuˬ aˬ yawꞈ-ahˇ maˬ taˬ huiˬ-a.”

⁵Kʼoeˇ gaˇ, zahˬ leˇ paˬ-ehˇ gʼeh-eu jeˬ aˬ yawꞈ maˬ mˇ mehˬ nya-a. Naˇ-eu gawˇ-eu tawˇ haˬ heu myaˆ gʼaˬ kʼoeˇ taˆ aˬ laꞈ baꞈ daˆ nehˬ-awˇ bi taˬ leˇ-euˬ jeˬ jahˇ nehˬ nya-euˬ tehꞈ meh.

⁶Tsawˇ ha koeˇ deuˬ jah-eu nui ma maˬ ahˇ gaˇ aˬ yawꞈ zahˬ dui dui leˇ-euˬ meh. Kʼoeˇ naˇ, kʼoeˇ gaˇ jaˆ-eu pu deuˬ-ahˇ Yeˬsuˇ iˇ-awˇ mehˬ nehˬ tsoˆ nehˬ-euˬ meh.

⁷Gʼaˬ kʼehˇ tseˇ nyiꞈ gʼa-ahˇ aˬ yawꞈ kuˇ uiˬ-awˇ, nyiˬ gʼaˬ-euˬ tiˬ muˇ muˇ muˇ-ehˇ bi iˇ-euˬ meh. Nehꞈ yaw jawꞈ-ahˇ teh doˆ nya-eu baoˬ aˬ yawꞈ maꞈ-ahˇ biꞈ nehˬ-euˬ meh.

⁸Aˬ yawꞈ maꞈ gaˇ ma doˆ-iˇ ngeh, gawˬ yoeˬ maˬ ngeuˇ naˇ nui jeˬ tiˬ jeˬ-iˬ maˬ yuˇ ni iˇ-eu gʼaˇ duˬ, aˬ yawꞈ dawˬ biꞈ-euˬ meh. Kaˬ muˇ maˬ hehˇ gʼeh-ehˇ, pehˇ tahˬ maˬ pi-eu uˬ taꞈ, joꞈ paꞈ-ahˇ pyuˇ maˬ dawˆ ahˇ ni,

⁹sehˬ nawˆ tehꞈ-ehˇ nawˬ-awˇ, pehˇ kʼahˬ dzeˇ paˇ maˬ yuˇ ni iˇ-eu gʼaˇ duˬ, aˬ yawꞈ dawˬ biꞈ-euˬ meh.

¹⁰Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ nymˇ tiˬ nymˇ-ahˇ nymˇ daˆ daˆ leˇ shaw naˇ, jawˇ duˬ kʼoeˇ tsahˇ-ahˇ kʼaˇ jawˇ kʼoeˇ keuˆ ni, nymˇ daˆ taˬ daˆ paˇ.

¹¹Naw maꞈ-ahˇ maˬ ha geuꞈ-ehˇ, naw maꞈ mehˬ gaˇ maˬ naˇ haˬ mawꞈ-eu jawˇ duˬ-ahˇ naw maꞈ iˇ zaˬ naˇ, naw maꞈ doˆ-iˇ ngeh, aˬ kuiˇ pehˬ zaˬ-ahˇ lehꞈ-eu kʼaˬ lehˇ sawˆ kʼaˇ nehˬ yaꞈ-awˬ. Kʼoeˇ-aˬ, aˬ yawꞈ maꞈ-euˬ yaw lehˬ siˬ leˇ ni mˇ-eu saˇ kiˇ meh.”

¹²Kʼoeˇnaˇ, tsawˇ haˬ zaˬ deuˬ iˬ baˇ bi noeˬ poˆ-eu gʼaˇ duˬ, aˬ yawꞈ maꞈ iˇ-awˇ dawˬ mehˬ mehˬ-iˇ-euˬ meh.

¹³Aˬ yawꞈ maꞈ nehꞈ gʼawˬ mya ni teh doˆ-awˇ, naˇ-eu tsawˇ haˬ gʼawˬ mya ni-ahˇ tsiˇ lehꞈ-awˇ laˆ taˬ nehˬ-euˬ meh.

¹⁴Gaˇ kawˆ kʼoeˇ deuˬ dawˬ tawˆ luꞈ sahˬ paˬ Heˬloˆ ya gaˬ-euˬ meh. Aˬ jeˬ miˇ neh ehˇ naˇ, Yeˬsuˇ-euˬ gaˇ kawˆ yawˬ gaˇ na luꞈ gaˬ doe-iˇ luꞈ-eu meh. “Iˇ cuꞈ shawˇ-eu Yoˇhaˬ gʼoꞈ dehꞈ laˇ-euˬ ngaˇ. Kʼoeˇ miˇ neh, zahˬ leˇ paˬ-ehˇ gʼeh-eu gaˇ heu deuˬ mˇ nya-eu baoˬ aˬ yawꞈ jaˆ-eu ngaˇ” lehˇ, tsawˇ haˬ tiˬ paˆ na deuˬ ehˇ-eu meh.

¹⁵Tiˬ paˆ na deuˬ-aˬ, aˬ yawꞈ-ahˇ Eˇliˇyaˆ nga lehˇ ehˇ-awˇ, tiˬ paˆ na deuˬ-aˬ, “Aˇ hu ba Miˬyehˇ gʼaˇ duˬ ngehˬ dah-euˬ tsawˇ haˬ deuˬ-ahˇ duˇ-eu Miˬyehˇ gʼaˇ duˬ ngehˬ dah-eu tsawˇ haˬ ngaˇ” lehˇ ehˇ-eu meh.

¹⁶Gaˇ kawˆ kʼoeˇ sahˬ paˬ Heˬloˆ ya gaˬ ngeh, “Aˬ yawꞈ-aˬ, Iˇ cuꞈ shawˇ-eu Yoˇhaˬ kʼoeˇ gʼaˬ ngaˇ. Aˬ yawꞈ-euˬ uˬ duˬ ngaˬ neh toˆ tsehˆ-euˬ kʼawꞈ, paˇ gʼoꞈ dehꞈ laˇ-euˬ ngaˇ” lehˇ ehˇ-eu meh.

¹⁷Heˬloˆ-aˬ, yawˬ ha-euˬ mehˇ nmˇ tsi tsi ni gʼeh-eu Piˇliˇpuˆ-euˬ miˬ zaˬ Heˬloˇdiˇ-ahˇ sheuˬ-euˬ meh. Zaˬ miˬ zaˬ kʼoeˇ gʼaˬ baˬ da neh, Yoˇhaˬ-ahˇ paꞈ-awˇ tawˬ-ahˇ bi dawˆ-eu gʼaˇ duˬ, Heˬloˆ neh dawˬ biꞈ-euˬ meh.

¹⁸Aˬ jeˬ miˇ neh ehˇ naˇ, yawˬ ha-euˬ mehˇ nmˇ tsi tsi ni gʼeh-eu gʼaˬ-euˬ miˬ zaˬ-ahˇ sheuˬ-eu maˬ tsaˬ-a lehˇ, Yoˇhaˬ neh Heˬloˆ-ahˇ ehˇ nehˬ-euˬ meh.

¹⁹Kʼoeˇ miˇ neh, Yoˇhaˬ-ahˇ Heˬloˇdiˇ muiˇ dui dui-awˇ, sehꞈ mawꞈ-eu meh. Ehˇ kʼawꞈ, Heˬloˆ-ahˇ maˬ laˆ tawˆ nya-eu miˇ neh, maˬ sehꞈ nya-ehˇ jawˇ-euˬ meh.

²⁰Heˬloˆ-aˬ, Yoˇhaˬ-ahˇ guˆ-eu meh. Aˬ jeˬ miˇ neh ehˇ naˇ, Yoˇhaˬ-aˬ, muiˬ-eu shawˇ-eu yaw tsaˬ yaw dawˇ tsawˇ haˬ tiˬ gʼaˬ pyeuꞈ-eu meh lehˇ, aˬ yawꞈ siˬ nya-eu meh. Kʼoeˇ miˇ neh, maˬ bi ca laˇ ni haw piˇ nehˬ luꞈ-eu meh. Yoˇhaˬ-euˬ dawˬ kʼaˇ ya gaˬ ngeh aˬ yawꞈ nui ma maˬ saˇ kʼawꞈ, Yoˇhaˬ mehˬ-euˬ dawˬ-ahˇ aˬ yawꞈ naˇ haˬ mawꞈ-eu nui ma ahˇ-eu meh.

²¹Aˇ saˬ saˬ laˇ ngeh, Heˬloˇdiˇ Yoˇhaˬ-ahˇ sehꞈ-eu yehꞈ laˇ-euˬ meh. Kʼoeˇ-aˬ, Heˬloˆ dehꞈ le-euˬ aˇ nah-ahˇ noeˬ keuˆ-eu bawˬ-iˬ jahˇ ngeh nah meh. Kʼoeˇ ngeh nah, sahˬ paˬ sahˬ ma geuꞈ luꞈ-eu yaw huiˬ yaw mahˇ deuˬ, guiˇ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu, Gaˬliˬlehˇ miˇ kʼahˬ laꞈ kʼoeˇ myaˆ pyawˬ naˇ mehˇ jaˆ-eu aˬ yuiꞈ aˬ tsu deuˬ-ahˇ hawˬ byawˇ lawˇ nehˬ-euˬ meh.

²²Heˬloˇdiˇ-euˬ aˬ buˇ uˇ laˇ-awˇ gaˇ nyeh nyeh mehˬ gaˇ, Heˬloˆ hawˇ-eu aˬ yawꞈ-euˬ daˬ yah kʼoeˇ deuˬ nui kʼahˇ shiˇ dui dui-eu meh. Kʼoeˇ miˇ neh, aˬ buˇ kʼoeˇ buˇ-ahˇ sahˬ paˬ Heˬloˆ ehˇ nehˬ-eu, “Nawˇ kʼaˇ shaˇ mawꞈ-eu jeˬ shaˇ-awˬ. Ngaˇ nawˬ-ahˇ biꞈ ma.”

²³Aˬ yawꞈ kamˬ-awˇ ehˇ-eu, “Nawˇ kʼaˇ shaˇ-eu jeˬ biꞈ ma lehˇ ngaˇ kamˬ-eu ma. Ngaˬ-euˬ miˇ kʼahˬ tiˬ paˆ paˆ nehˬ laꞈ lehˇ shaˇ kʼawꞈ, ngaˇ paˆ nehˬ ma.”

²⁴Kʼoeˇ ngeh, a buˇ kʼoeˇ buˇ doˆ-iˇ-awˇ, “Ngaˇ aˬ geu jeˬ ya shaˇ nmˇ” lehˇ, aˬ yawꞈ-euˬ aˬ ma-ahˇ naˇ haˬ-euˬ meh. Aˬ ma gʼaˬ ehˇ-eu, “Iˇ cuꞈ shawˇ-eu Yoˇhaˬ-euˬ uˬ duˬ shaˇ-awˬ.”

²⁵Aˬ buˇ kʼoeˇ buˇ sahˬ paˬ Heˬloˆ jawˇ gaˇ yaw kawˇ-ehˇ paˇ gʼoꞈ leˇ-awˇ ehˇ-eu, “Iˇ cuꞈ shawˇ-eu Yoˇhaˬ-euˬ uˬ duˬ, kʼmˬ maˬ sehˇ byehˇ-ahˇ dawˆ ahˇ-awˇ, nymˬ-mˇ heu gaˇ biꞈ laꞈ gaˇ geuꞈ mawꞈ-eu ma.”

²⁶Dawˬ kʼoeˇ dawˬ baˬ da neh sahˬ paˬ Heˬloˆ noeˬ shaˬ dui dui-eu meh. Ehˇ kʼawꞈ, daˬ yah kʼoeˇ myaˆ ni gʼeh-eu mehˬ shi aˬ yawꞈ kamˬ tsehˆ gʼaˬ-euˬ miˇ neh, aˬ buˇ kʼoeˇ buˇ kʼaˇ ehˇ-eu loꞈ-ehˇ maˬ jahˇ nehˬ-ehˇ maˬ gʼeh nya-a.

²⁷Kʼoeˇ miˇ neh, kʼoeˇ gaˇ loꞈ luꞈ-eu yehˇ tiˬ gʼaˬ-ahˇ yaw kawˇ-ehˇ kʼehˇ gʼeh-awˇ, Yoˇhaˬ-euˬ uˬ duˬ yuˇ laꞈ-eu gʼaˇ duˬ dawˬ biꞈ-euˬ meh. Yehˇ kʼoeˇ gʼaˬ tawˬ-ahˇ iˇ-awˇ, Yoˇhaˬ-euˬ uˬ duˬ coeˇ tsehˆ-euˬ meh.

²⁸Kʼoeˇ naˇ, kʼmˬ maˬ sehˇ byehˇ-ahˇ dawˆ ahˇ-awˇ, aˬ buˇ kʼoeˇ buˇ-ahˇ ciˬ nehˬ laˇ-awˇ, aˬ buˇ kʼoeˇ neh aˬ ma gʼaˬ-ahˇ paˇ ciˬ ha nehˬ-iˇ-euˬ meh.

²⁹Yoˇhaˬ-euˬ zaˬ lahˇ deuˬ gaˇ kawˆ kʼoeˇ ya gaˬ ngeh, aˬ yawꞈ-euˬ gʼawˇ mawˇ baꞈ kʼoꞈ laˬ le-awˇ, lmˬ bymˇ-ahˇ baꞈ pahˬ nehˬ-euˬ meh.

³⁰Gʼaˬ kʼehˇ deuˬ Yeˬsuˇ jawˇ gaˇ paˇ gʼoꞈ laˇ-awˇ, aˬ yawꞈ maꞈ neh mˇ yaꞈ shaˇ yaꞈ-euˬ gaˇ kawˆ hawˇ-eu, mehˬ yaꞈ tsoˆ yaꞈ-euˬ gaˇ kawˆ dawˬ tawˆ luꞈ, aˬ yawꞈ-ahˇ dzawˇ nehˬ-euˬ meh.

³¹Tsawˇ haˬ laˇ-eu maˬ tsehˆ leˇ-eu miˇ neh, Yeˬsuˇ hawˇ-eu aˬ yawꞈ-euˬ gʼaˬ kʼehˇ deuˬ hawˬ dzaˬ-eu maˬ dah-a. Kʼoeˇ miˇ neh, gʼaˬ kʼehˇ deuˬ-ahˇ Yeˬsuˇ ehˇ nehˬ-eu, “Aˬ dui maꞈ tehꞈ-ehˇ ciˬ cuˇ ni gʼeh-eu jawˇ duˬ-ahˇ iˇ-awˇ, gʼaˬ naˬ naˬ-iˇ kaˇ-euˇ.”

³²Kʼoeˇ ngeh, aˬ yawꞈ maꞈ tehꞈ-ehˇ lawˬ dziˬ-awˇ, ciˬ cuˇ ni gʼeh-eu jawˇ duˬ-ahˇ doˆ-iˇ-euˬ meh.

³³Aˬ yawꞈ maꞈ doˇ-iˇ luꞈ gaˇ tsawˇ haˬ gʼawˬ mya ni mawˇ-awˇ, aˬ yawꞈ maꞈ-ahˇ haw siˬ-euˬ meh. Kʼoeˇ miˇ neh, meuˬ yawˬ meuˬ na luꞈ-ahˇ jawˇ-eu tsawˇ haˬ deuˬ, aˬ yawꞈ maꞈ-euˬ mehˬ hu dahˇ taˆ paw neh cehˆ-awˇ, Yeˬsuˇ hawˇ-eu gʼaˬ kʼehˇ deuˬ-euˬ jeˬ hu cehˆ keuˆ-awˇ jawˇ-eu meh.

³⁴Yeˬsuˇ lawˬ laꞈ nyiˇ doˆ le-awˇ, tsawˇ haˬ aˇ maꞈ maꞈ ma-ahˇ ya mawˇ ngeh, gʼawˬ shaˬ haw gaˬ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ-aˬ, yawˇ bo-eu gʼaˬ maˬ jawˇ-eu yawˇ yawˇ maꞈ-ahˇ duˇ-eu meh. Kʼoeˇ ngeh, aˬ yawꞈ maꞈ-ahˇ gʼawˬ mya jeˬ mehˬ nehˬ tsoˆ nehˬ-euˬ meh.

³⁵Uˬ ciꞈ uˬ taw taw le ngeh, gʼaˬ kʼehˇ deuˬ aˬ yawꞈ jawˇ gaˇ laˇ-awˇ ehˇ-eu, “Uˬ ciꞈ ciꞈ le shaw-iˬ ngaˇ. Kʼoeˇ uˬ taꞈ, jawˇ duˬ heu tsahˇ-aˬ, pu-ahˇ gaˇ mahˇ kaˬ-eu jawˇ duˬ tiˬ tsahˇ meh.

³⁶Tsawˇ haˬ heu deuˬ-ahˇ pyehˬ nehˬ-awˇ, dawˬ peh jaˆ-eu pu doe ni, dzaˬ dzaˬ dawˇ dawˇ bi poˆ zeuˇ dzaˬ-iˇ-eu maˬ tsaˬ-a loˇ.”

³⁷Yeˬsuˇ ehˇ-eu, “Naw maꞈ aˬ yawꞈ maꞈ-ahˇ tiˬ jeˬ paˬ bi dzaˬ-awˬ.” Aˬ yawꞈ maꞈ ehˇ-eu, “Tsawˇ haˬ heu deuˬ-ahˇ bi dzaˬ-eu gʼaˇ duˬ, pyuˇ mehˇ byaˆ nyiˬ yaˇ byaˆ poeˬ kaˬ muˇ zeuˇ laˬ-iˇ-awˬ loˇ.”

³⁸Yeˬsuˇ aˬ yawꞈ maꞈ-ahˇ ehˇ nehˬ-eu, “Naw maꞈ kaˬ muˇ aˇ myaˆ yaˆ ahˇ te. Tiˬ poˆ haw-iˇ sheˇ.” Aˬ yawꞈ maꞈ poˆ haw-iˇ-awˇ ehˇ-eu, “Kaˬ muˇ ngaˬ yaˆ hawˇ-eu ngaˬ shaˬ nyiˬ mawˇ ahˇ-eu tehꞈ nga.”

³⁹Tsawˇ haˬ kʼoeˇ deuˬ dawˬ tawˆ luꞈ-ahˇ daˬ zawˬ deh kʼoeˇ taˆ aˇ muˇ biˇ-awˇ bi nuiˇ-eu gʼaˇ duˬ, gʼaˬ kʼehˇ deuˬ-ahˇ Yeˬsuˇ dawˬ biꞈ-euˬ meh.

⁴⁰Kʼoeˇ ngeh, tsawˇ haˬ kʼoeˇ deuˬ tiˬ yaˇ gʼaˬ aˇ muˇ, ngaˬ tseˇ gʼaˬ aˇ muˇ lehˇ muˇ muˇ-ehˇ nuiˇ-euˬ meh.

⁴¹Kʼoeˇ naˇ, kaˬ muˇ kʼoeˇ ngaˬ siˬ hawˇ-eu ngaˬ shaˬ kʼoeˇ nyiˬ mawˇ-ahˇ Yeˬsuˇ yuˇ-awˇ, mˬ paw gʼawˇ leuˇ-awˇ Miˬyehˇ-euˬ guiˬ lahˬ-ahˇ ja ceuˬ-euˬ meh. Aˬ yawꞈ kaˬ muˇ ngawˬ pyehˬ-awˇ, gʼaˬ kʼehˇ deuˬ-ahˇ biꞈ nehˬ-awˇ, tsawˇ haˬ aˇ maꞈ-ahˇ bi biˇ nehˬ-euˬ meh. Ngaˬ shaˬ kʼoeˇ nyiˬ mawˇ kʼawꞈ, tsawˇ haˬ dawˬ tawˆ luꞈ-ahˇ aˬ yawꞈ bi biˇ oꞈ nehˬ-euˬ meh.

⁴²Tsawˇ haˬ yawˬ gʼaˬ na luꞈ tiˬ dehˆ ya dzaˬ-euˬ meh.

⁴³Maˬ dzaˬ jiˇ coeˇ-ehˇ dzehˬ laˇ taˬ-euˬ kaˬ muˇ hawˇ-eu ngaˬ shaˬ kʼoeˇ deuˬ-ahˇ gʼaˬ kʼehˇ deuˬ gʼoˆ uiˬ ngeh, kʼaˆ puˬ tseˇ nyiꞈ puˬ byah laˇ-euˬ meh.

⁴⁴Dzaˬ-euˬ tsawˇ haˬ dawˬ tawˆ luꞈ, ngaˬ heˇ gʼaˬ byah-eu meh.

⁴⁵Yeˬsuˇ tsawˇ haˬ aˇ maꞈ-ahˇ bi gʼoꞈ-iˇ luꞈ ngeh, aˬ yawꞈ-euˬ zaˬ lahˇ deuˬ-ahˇ tiˬ poˆ tehˬ-ehˇ lawˬ laꞈ kʼoeˇ bi uˇ-iˇ-awˇ, lah nui baˬ-ahˇ jaˆ-eu Behˬdzeˇdaˬ meuˬ-ahˇ bi iˇ tawˬ-euˬ meh.

⁴⁶Aˬ yawꞈ tsawˇ haˬ aˇ maꞈ-ahˇ gʼawˬ-iˇ gʼaˬ-awˇ, gawˬ jawˬ-ahˇ guiˬ lahˬ shaˇ leˇ-eu lehˇ le-euˬ meh.

⁴⁷Uˬ ciꞈ ciꞈ le ngeh, lawˬ kʼoeˇ laˇ lah gʼahˇ ceh iˇ keuˆ-awˇ, Yeˬsuˇ tiˬ gʼaˬ tehꞈ-ehˇ dahˇ taˆ jawˇ yaꞈ-euˬ meh.

⁴⁸Aˬ yawꞈ-euˬ zaˬ lahˇ deuˬ jaˬ lehˇ-ahˇ ciˬ daˬ-awˇ lawˬ ya heu-eu baˬ da neh, gʼaˬ doeˇ doeˇ dui dui gaˇ aˬ yawꞈ ya mawˇ-euˬ meh. Ya poeˇ doeˇ taw paw naˬ liˬ smˇ laꞈ dzehˬ-iˇ ngeh, aˬ yawꞈ iˇ cuꞈ kʼoeˇ taˆ gaˇ ma cah cah-ehˇ, aˬ yawꞈ maꞈ jawˇ gaˇ oe-euˬ meh. Aˬ yawꞈ maꞈ-ahˇ aˬ yawꞈ iˇ dzeuˇ-eu lehˇ gʼeh-eu meh.

⁴⁹Ehˇ kʼawꞈ, aˬ yawꞈ iˇ cuꞈ kʼoeˇ taˆ cah luꞈ gaˇ aˬ yawꞈ maꞈ mawˇ-awˇ, shaˆ shiˇ nehꞈ nga lehˇ noeˬ-awˇ guˇ-euˬ meh.

⁵⁰Aˬ yawꞈ maꞈ yawˬ gʼaˬ na luꞈ aˬ yawꞈ-ahˇ mawˇ-awˇ, guˆ dui dui-iˇ-euˬ meh. “Taˬ guˆ. Nui ma taˬ baˬ. Ngaˇ ma” lehˇ, aˬ yawꞈ maꞈ-ahˇ Yeˬsuˇ ehˇ nehˬ-euˬ meh.

⁵¹Kʼoeˇ naˇ, aˬ yawꞈ maꞈ dziˬ luꞈ-eu lawˬ laꞈ kʼoeˇ aˬ yawꞈ uˇ-iˇ ngeh, jaˬ lehˇ baw-eu naˬ leˇ-euˬ meh. Zaˬ lahˇ deuˬ zahˬ dui dui leˇ-euˬ meh.

⁵²Aˬ jeˬ miˇ neh ehˇ naˇ, tsawˇ haˬ ngaˬ heˇ gʼaˬ-ahˇ bi dzaˬ-euˬ gaˇ kawˆ kʼoeˇ aˬ yawꞈ maꞈ noeˬ maˬ doˆ-a. Aˬ yawꞈ maꞈ-euˬ nui ma kaꞈ duiˬ ni gʼeh-eu meh.

⁵³Aˬ yawꞈ maꞈ lah tsehˆ doˆ-awˇ, Geˬneˬsaˬlehˇ miˇ kʼahˬ-ahˇ iˇ keuˆ ngeh, lawˬ paꞈ tawꞈ yaꞈ-euˬ meh.

⁵⁴Aˬ yawꞈ maꞈ lawˬ laꞈ nyiˇ doˆ-iˇ-euˬ nehˬ-ehˇ, Yeˬsuˇ-ahˇ aˬ cawˬ tiˬ poˆ tehꞈ-ehˇ haw siˬ-euˬ meh.

⁵⁵Aˬ yawꞈ maꞈ miˇ kʼahˬ kʼoeˇ kʼahˬ coeˬ doe-awˇ, naˇ-eu tsawˇ haˬ deuˬ-ahˇ seuˆ yoꞈ kʼoeˇ taˆ bi yuꞈ-awˇ, Yeˬsuˇ jawˇ meh lehˇ kʼaˇ ya gaˬ gaˇ baꞈ ha laˇ-euˬ meh.

⁵⁶Pu doe ni, meuˬ doe ni, yaˇ kʼahˬ yaˇ lahˬ doe ni, Yeˬsuˇ kʼaˇ iˇ kʼaˇ laˇ doˆ gaˇ, lehˆ lehˆ tsmˇ tsawˇ haˬ uiˬ leˇ duˬ-ahˇ, naˇ-eu tsawˇ haˬ baꞈ taˬ-awˇ, Yeˬsuˇ-euˬ pehˇ kʼahˬ pehˇ dahˬ-ahˇ tehꞈ-ehˇ kʼawꞈ bi toeˬ ciˆ laꞈ-eu gʼaˇ duˬ, aˬ yawꞈ maꞈ shaˇ-euˬ meh. Kʼaˇ toeˬ ciˆ-euˬ deuˬ naˇ gawˇ taˬ leˇ jiˇ-euˬ meh.