Read Akha Luˇkaꞈ 1 Bible Online

Luˇkaꞈ 1 - Akha bible

Luˇkaꞈ 1

¹Nga maꞈ jawˇ gaˇ pyeuꞈ dzeuˇ yaꞈ-euˬ gaˇ kawˆ deuˬ-ahˇ, tsawˇ haˬ gʼawˬ mya gʼaˬ kʼaˇ gʼeh nya-eu loꞈ-ehˇ sahˬ boꞈ boꞈ doˆ taˬ gʼaˬ-euˬ meh.

²Gaˇ kawˆ kʼoeˇ deuˬ-ahˇ aˇ dahˬ beh ngeh neh ya mawˇ-euˬ deuˬ hawˇ-eu, guiˬ lahˬ dawˬ mehˬ-eu deuˬ neh kʼaˇ dzawˇ mehˬ-euˬ loꞈ-ehˇ aˬ yawꞈ maꞈ boꞈ-euˬ meh.

³Kʼoeˇ miˇ neh, Huiˬ-eu mahˇ-eu Tawˇpiˇlu-oˇ, ngaˇ kʼawꞈ aˇ dahˬ beh ngeh neh gaˇ kawˆ heu deuˬ-ahˇ yaw muiˬ paˬ-ehˇ pyehˆ tseˇ duˬ taˬ-euˬ miˇ neh, kʼaˇ pyeuꞈ dzeuˇ yaꞈ-euˬ jeˬ mehˬ huˬ mehˬ nahˬ tsaˬ ni nawˬ-euˬ gʼaˇ duˬ boꞈ doˆ nehˬ naˇ muiˬ-eu duˇ lehˇ noeˬ-eu ma.

⁴Nawˬ-ahˇ kʼaˇ mehˬ nehˬ-euˬ yawˬ jeˬ na luꞈ aˬ diˇ ngeuˇ meh lehˇ nawˇ siˬ duˬ jiˇ nya ni, ngaˇ heu loꞈ-ehˇ boꞈ-euˬ ma.

⁵Yuˇdaˆ miˇ kʼahˬ-ahˇ sahˬ paˬ Heˬloˆ uˆ lahˇ ngeh, Aˬbiˇyaˬ aˇ jeuˬ laꞈ kʼoeˇ, Zaˬkaˬliˇ lehˇ myahˇ-euˬ piˇ ma tiˬ gʼaˬ jawˇ-eu meh. Aˬ yawꞈ-euˬ miˬ zaˬ-aˬ, Aˬloˬ-euˬ aˇ jeuˬ pyeuꞈ-awˇ, Eˇliˇsaˬbehˆ lehˇ myahˇ-euˬ meh.

⁶Nyiˬ dzeˇ zaˬ luꞈ Miˬyehˇ mehˬ shi dawˇ coe ni dehꞈ-awˇ, SahˬpaˬMiˬyehˇ-euˬ zahˇ dawˬ kʼoꞈ dawˬ hawˇ-eu zahˇ sahˇ kʼoꞈ dawˬ tawˆ luꞈ-ahˇ caw teh-eu meh.

⁷Eˇliˇsaˬbehˆ maˬ baw aˬ ma pyeuꞈ-eu miˇ neh, aˬ nyaꞈ dzeˇ zaˬ zaˬ maˬ jawˇ-ehˇ, nyiˬ gʼaˬ luꞈ mawˬ dui dui le-euˬ meh.

⁸Tiˬ nah-aˬ, piˇ ma-euˬ gaˇ mˇ-eu gʼaˇ duˬ, Zaˬkaˬliˇ-euˬ aˇ muˇ-ahˇ doˇ laˇ-euˬ miˇ neh, Uˬ duˬ tahˬ nymˇ nymˇ ma laꞈ kʼoeˇ gaˇ mˇ luꞈ-eu meh.

⁹Piˇ ma deuˬ-euˬ zahˇ sahˇ kʼoꞈ kʼaˇ jaˆ-eu loꞈ-ehˇ shehˆ tsaˬ tsaˬ-awˇ tseˇ ngeh, lawˇ duˬ-ahˇ yaw saw jeˬ doꞈ damˬ-eu gʼaˇ duˬ aˬ yawꞈ-ahˇ doˇ leˇ-euˬ meh. Kʼoeˇ miˇ neh, SahˬpaˬMiˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ aˬ yawꞈ uˇ leˇ-euˬ meh.

¹⁰Kʼoeˇ loꞈ-ehˇ yaw saw jeˬ doꞈ damˬ luꞈ ngeh, laꞈ nyiˇ paw jawˇ yaꞈ-euˬ tsawˇ haˬ aˇ maꞈ deuˬ guiˬ lahˬ ya shaˇ-eu meh.

¹¹Kʼoeˇ ngeh, Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ aˬ yawꞈ mehˬ shi doˆ le-awˇ, yaw saw jeˬ doꞈ damˬ-eu lawˇ duˬ-euˬ aˇ maˇ paw yawꞈ luꞈ-eu meh.

¹²Mˬ taˆ gʼaˬ kʼehˇ kʼoeˇ gʼaˬ-ahˇ Zaˬkaˬliˇ ya mawˇ ngeh, tsawˬ guˆ-iˇ-euˬ meh.

¹³Ehˇ kʼawꞈ, mˬ taˆ gʼaˬ kʼehˇ kʼoeˇ gʼaˬ ehˇ-eu, “Zaˬkaˬliˇ-oˇ, taˬ guˆ. Nawˬ-euˬ guiˬ lahˬ shaˇ dawˬ-ahˇ Miˬyehˇ naˇ haˬ nehˬ laꞈ-euˬ meh. Nawˬ-euˬ nymˇ dahˬ Eˇliˇsaˬbehˆ aˬ li tiˬ li ciˬ tehꞈ-a. Aˬ li kʼoeˇ li-ahˇ Yoˇ haˬ lehˇ nawˇ ya myahˇ nehˬ meh.

¹⁴Aˬ yawꞈ dehꞈ le-euˬ gaˇ, nawˇ hawˇ-eu tsawˇ haˬ gʼawˬ mya ni laˬ kʼaˬ cehˇ tehꞈ-a.

¹⁵Aˬ jeˬ miˇ neh ehˇ naˇ, Sahˬpaˬ Miˬyehˇ mehˬ shi, aˬ yawꞈ yaw huiˬ yaw mahˇ pyeuꞈ laˇ tehꞈpa. Aˬ gaꞈ dzaˇ uiˇ hawˇ-eu yehꞈ laˇ-eu dzaˇ uiˇ deuˬ-ahˇ aˬ yawꞈ maˬ ya dawˇ-a. Aˬ ma-euˬ uˬ maˆ laꞈ kʼoeˇ neh maˬ dehꞈ doˆ le mi naˆ-ehˇ, Muiˬ-eu shawˇ-eu Yaw sahˇ Miˬyehˇ aˬ yawꞈ laꞈ kʼoeˇ tiˬ byah ni ahˇ tehꞈ-a.

¹⁶Iˇsaˬleˬlaˆ tsawˇ haˬ gʼawˬ mya ni-ahˇ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ paw aˬ yawꞈ sheuˬ pyawˇ kʼoꞈ laꞈ tehꞈ-a.

¹⁷Aˬ da hawˇ-eu zaˬ deuˬ tsaˬ leˇ tsahˇ leˇ nya ni maˬ ehˇ, naˬ lehˬ lehˬ-eu tsawˇ haˬ deuˬ yaw tsaˬ yaw dawˇ tsawˇ haˬ-euˬ nui noeˬ mehˬ nah caw teh laˇ ni maˬ ehˇ, Sahˬpaˬ Miˬyehˇ-euˬ tsawˇ jeuˬ-ahˇ Sahˬpaˬ Miˬyehˇ gʼaˇ duˬ bi lehˬ hmˬ dah taˬ-eu gʼaˇ duˬ maˬ ehˇ, Eˇliˇyaˆ-euˬ nui ma hawˇ-eu baoˬ aˬ yawꞈ pi-awˇ, Sahˬpaˬ-euˬ mehˬ hu aˬ yawꞈ iˇ tehꞈ-a.”

¹⁸Mˬ taˆ gʼaˬ kʼehˇ kʼoeˇ gʼaˬ-ahˇ Zaˬkaˬliˇ ehˇ nehˬ-eu, “Kʼoeˇ loꞈ-ehˇ pyeuꞈ laˇ-euˬ ngaˇ lehˇ, ngaˇ aˬ joˆ-ehˇ siˬ nya nmˇ. Nga nyaꞈ dzeˇ zaˬ nyiˬ gʼaˬ luꞈ mawˬ dui dui laˇ-euˬ ma.”

¹⁹Mˬ taˆ gʼaˬ kʼehˇ kʼoeˇ gʼaˬ ehˇ-eu, “Ngaˇ-aˬ, Miˬyehˇ-euˬ mehˬ shi yawꞈ-awˇ myawˬ kʼehˇ gʼoˆ luꞈ-eu Gaˬbeˬlaˇ ma. Aˬ yawꞈ ngaˬ-ahˇ kʼehˇ gʼeh leꞈ-awˇ, laˬ kʼaˬ cehˇ dui dui laˇ paˬ-ehˇ gʼeh-eu gaˇ kawˆ heu nawˬ-ahˇ bi tsaꞈ gaˬ le-euˬ meh.

²⁰Aˇ yamˬ tsaˬ laˇ ngeh maˇ maˇ ni pyeuꞈ laˇ-eu gaˇ kawˆ heu-ahˇ ngaˇ tsaꞈ gaˬ le-eu kʼawꞈ, nawˇ maˬ jah-eu miˇ neh, ngaˬ neh ehˇ-euˬ loꞈ-ehˇ maˬ pyeuꞈ laˇ kʼoeˇ keuˆ ni, nawˇ dawˬ maˬ ngehˬ nya ni ciˬ cuˇ ya jawˇ tehꞈ-a.”

²¹Kʼoeˇ ngeh, laꞈ nyiˇ paw Zaˬkaˬliˇ-ahˇ dawˬ luꞈ-eu tsawˇ haˬ deuˬ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ kʼoeˇ myah myah-ehˇ ga-iˇ-euˬ gaˇ zahˬ leˇ-euˬ meh.

²²Aˬ yawꞈ gʼoꞈ doˆ le ngeh, aˬ yawꞈ maꞈ-ahˇ dawˬ maˬ ngehˬ cawˬ nya-ehˇ pyeuꞈ-iˇ-euˬ miˇ neh, Uˬ duˬ tahˬ nymˇ nymˇ ma laꞈ kʼoeˇ, yaw sahˇ laꞈ kʼoeˇ pah mehˬ le-euˬ tiˬ jeˬ paˬ-ahˇ aˬ yawꞈ ya mawˇ-euˬ ngaˇ lehˇ aˬ yawꞈ maꞈ siˬ nya-euˬ meh. Aˬ yawꞈ dawˬ maˬ ngehˬ nya-eu miˇ neh, aˬ yawꞈ maꞈ-ahˇ laꞈ dzawˇ dzawˇ nehˬ-euˬ meh.

²³Uˬ duˬ tahˬ nymˇ nymˇ ma laꞈ kʼoeˇ aˬ yawꞈ gaˇ ya mˇ-eu aˇ yamˬ dzeuˇ ngeh, iˇ kahˇ-ahˇ gʼoꞈ-iˇ-euˬ meh.

²⁴Aˇ yamˬ ui cuiˆ myahˇ laˇ ngeh, aˬ yawꞈ-euˬ nymˇ dahˬ Eˇliˇsaˬbehˆ aˬ nyiˇ pi leˇ-awˇ, ba la ngaˬ siˬ byah ni laꞈ nyiˇ maˬ doˆ-iˇ ni jawˇ-euˬ meh.

²⁵Aˬ yawꞈ ehˇ-eu, “Nymˬ-mˇ poˆ jawˇ-aˬ, tsawˇ haˬ mehˬ shi ngaˇ daˬ maˬ paˇ ya ga ni, Sahˬpaˬ Miˬyehˇ ngaˬ-ahˇ caw ba nehˬ laꞈ-euˬ meh.”

²⁶Eˇliˇsaˬbehˆ aˬ nyiˇ pi leˇ-euˬ ba la koꞈ siˬ byah laˇ ngeh, mˬ taˆ gʼaˬ kʼehˇ Gaˬbeˬlaˇ-ahˇ Miˬyehˇ kʼehˇ gʼeh-awˇ, Gaˬliˬlehˇ miˇ kʼahˬ Naˬzaˬlehˇ meuˬ-ahˇ bi iˇ-euˬ meh.

²⁷Sahˬ paˬ Daˬbiˇ-euˬ tsuiꞈ-ahˇ taꞈ-eu Yoˇsehˆ lehˇ myahˇ-euˬ gʼaˬ-ahˇ dahˬ dzaˬ-iˇ-eu lehˇ saˇ jaˇ dzaˬ taˬ-euˬ miˬ shuiꞈ/f 1.7 *ʼMiˬ shuiꞈʼ lehˇ ehˇ-eu-aˬ, kʼaˬ miˬ tiˬ jawˇ-iˬ maˬ sheu haw-euˬ shawˇ jehˆ ni gʼeh-eu miˬ daꞈ-ahˇ ehˇ mawꞈ-eu meh.* tiˬ gʼaˬ-ahˇ, aˬ yawꞈ dawˬ tsaꞈ tsaꞈ le-euˬ meh. Miˬ shuiꞈ kʼoeˇ gʼaˬ-euˬ tsawˇ myahˇ-aˬ, Maˬliˇ meh.

²⁸Mˬ taˆ gʼaˬ kʼehˇ kʼoeˇ gʼaˬ aˬ yawꞈ jawˇ gaˇ oe-awˇ ehˇ-eu, “Nui saˇ oꞈ luꞈ-uˇ. Sahˬpaˬ Miˬyehˇ nawˬ nehˬ-ehˇ jawˇ-awˇ, huiˬ dui dui-eu guiˬ lahˬ biꞈ luꞈ meh.”

²⁹Maˬliˇ-aˬ, mˬ taˆ gʼaˬ kʼehˇ kʼoeˇ gʼaˬ neh ehˇ nehˬ le-euˬ dawˬ kʼoeˇ dawˬ baˬ da neh nui ma suˬ saˬ dui dui-awˇ, aˬ jeˬ-ahˇ ehˇ mawꞈ-eu nga lehˇ shaˇ noeˬ luꞈ-eu meh.

³⁰Mˬ taˆ gʼaˬ kʼehˇ kʼoeˇ gʼaˬ aˬ yawꞈ-ahˇ ehˇ-eu, “Maˬliˇ-oˇ, taˬ guˆ. Miˬyehˇ nawˬ-ahˇ gʼawˬ shaˬ gaˬ luꞈ meh.

³¹Nawˇ aˬ nyiˇ pi-awˇ, aˬ li tiˬ li ya ciˬ meh. Aˬ yawꞈ-ahˇ nawˇ Yeˬsuˇ lehˇ ya myahˇ nehˬ meh.

³²Aˬ yawꞈ huiˬ dui mahˇ dui dui-awˇ, huiˬ-eu mahˇ-eu Miˬyehˇ-euˬ Zaˬmaˇ lehˇ aˬ cawˬ kuˇ tehꞈ-a. SahˬpaˬMiˬyehˇ pyeuꞈ-eu Miˬyehˇ, aˬ yawꞈ-euˬ aˬ poeˬ Daˬbiˇ-euˬ dzoeˬ dzaˬ nuiˇ mahˬ aˬ yawꞈ-ahˇ biꞈ tehꞈ-a.

³³Yaˬkoˆ-euˬ zaˬ deuˬ uˆ deuˬ kʼoeˇ taˆ aˬ yawꞈ sahˬ paˬ geuꞈ-awˇ, Aˬ yawꞈ uˆ lahˇ-eu miˇ kʼahˬ kʼoeˇ, mˬ maˬ maˬ byaˆ zaˇ ziˇ aˇ saˬ saˬ-eu maˬ baw-a.”

³⁴Mˬ taˆ gʼaˬ kʼehˇ kʼoeˇ gʼaˬ-ahˇ Maˬliˇ ehˇ nehˬ-eu, “Ngaˇ-aˬ, miˬ shuiꞈ tiˬ gʼaˬ ma. Teu loꞈ-ehˇ aˬ joˆ-ehˇ pyeuꞈ laˇ nya nmˇ.”

³⁵Mˬ taˆ gʼaˬ kʼehˇ ehˇ-eu, “Muiˬ-eu shawˇ-eu Yaw sahˇ Miˬyehˇ nawˬ-euˬ kʼoeˇ taˆ zaꞈ le-awˇ, Huiˬ dui Mahˇ dui dui-eu Miˬyehˇ-euˬ baoˬ nawˬ-ahˇ joe shmˇ le tehꞈ-a. Kʼoeˇ miˇ neh, dehꞈ le-euˬ muiˬ-eu shawˇ-eu aˬ li kʼoeˇ gʼaˬ-ahˇ, Miˬyehˇ-euˬ Zaˬmaˇ lehˇ kuˇ tehꞈ-a.

³⁶Maˬ baw aˬ ma lehˇ sawˇ taˬ-euˬ nawˬ-euˬ nawˬ-euˬ aˇ jeuˬ aˇ ca Eˇliˇsaˬbehˆ-ahˇ haw sheˇ. Teu naˆ ni mawˬ laˇ-euˬ kʼawꞈ, aˬ nyiˇ pi luꞈ-eu ba la koꞈ siˬ byah laˇ-euˬ meh.

³⁷Miˬyehˇ maˬ jahˇ nya-eu tiˬ jeˬ-iˬ maˬ jaˆ-a.”

³⁸Maˬliˇ ehˇ-eu, “Ngaˇ-aˬ, SahˬpaˬMiˬyehˇ-euˬ zaˬ kʼaˆ ma. Nawˬ neh ehˇ-euˬ jeˬ ngaˬ-euˬ kʼoeˇ taˆ pyeuꞈ le luꞈ-uˇ.” Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ doˆ-iˇ-euˬ meh.

³⁹Kʼoeˇ naˇ, Maˬliˇ lehˬ hmˬ-awˇ, Yuˇdaˆ miˇ kʼahˬ daˇ taˆ paw jaˆ-eu meuˬ tiˬ meuˬ-ahˇ yaw kawˇ-ehˇ le-euˬ meh.

⁴⁰Zaˬkaˬliˇ-euˬ nymˇ-ahˇ aˬ yawꞈ uˇ leˇ-awˇ, Eˇliˇsaˬbehˆ-ahˇ dawˬ cawˬ puˬ nehˬ-euˬ meh.

⁴¹Maˬliˇ dawˬ cawˬ puˬ nehˬ gaˇ Eˇliˇsaˬbehˆ ya gaˬ ngeh, aˬ yawꞈ-euˬ uˬ maˆ laꞈ kʼoeˇ pi luꞈ-eu zaˬ kʼoeˇ gʼaˬ luˆ laˇ-awˇ, Eˇliˇsaˬbehˆ -ahˇ Muiˬ-eu Shawˇ-eu Yaw sahˇ Miˬyehˇ uˇ le-euˬ meh.

⁴²Aˬ yawꞈ yaw kʼaˆ-ehˇ guˇ-awˇ ehˇ-eu, “Nawˇ-aˬ, zaˬ miˬ zaˬ dawˬ tawˆ luꞈ laꞈ kʼoeˇ aˬ cawˬ naˆ maˬ tseˇ guiˬ lahˬ huiˬ-eu gʼaˬ meh. Nawˬ-euˬ uˬ maˆ laꞈ kʼoeˇ pi luꞈ-eu zaˬ kʼawꞈ, guiˬ lahˬ huiˬ dui dui meh.

⁴³Ngaˬ-euˬ Sahˬpaˬ-euˬ aˬ ma ngaˇ jawˇ gaˇ dawˬ deh gʼa laˇ-euˬ heu, ngaˇ aˇ naˆ ni guiˬ lahˬ huiˬ-eu nga.

⁴⁴Nawˇ dawˬ cawˬ puˬ-eu teˇ saˇ ngaˬ-euˬ naˬ bawˇ-ahˇ gaˬ keuˆ laˇ-euˬ nehˬ-ehˇ, uˬ maˆ laꞈ kʼoeˇ pi luꞈ-eu ngaˬ-euˬ zaˬ laˬ kʼaˬ cehˇ-eu tsawˬ tsawˬ-ehˇ teuˆ-eu miˇ-a.

⁴⁵Sahˬpaˬ Miˬyehˇ neh kʼaˇ ehˇ nehˬ laꞈ-euˬ jeˬ aˬ diˇ aˬ maˇ pyeuꞈ laˇ tehꞈ-a lehˇ jah-eu zaˬ miˬ zaˬ-aˬ, guiˬ lahˬ huiˬ dui dui meh.”

⁴⁶Maˬliˇ ehˇ-eu, “Ngaˬ-euˬ nui ma saꞈ laˇ laꞈ kʼoeˇ, SahˬpaˬMiˬyehˇ-ahˇ ja ceuˬ ma.

⁴⁷Ngaˬ-ahˇ Ka kʼoꞈ-eu gʼaˬ pyeuꞈ-eu, ngaˬ-euˬ Miˬyehˇ baˬ da baˇ neh, ngaˬ-euˬ saꞈ laˇ laˬ kʼaˬ cehˇ nya.

⁴⁸Aˬ jeˬ miˇ neh cehˇ te ehˇ naˇ, teˬ-eu nyiˇ-eu tsawˇ haˬ pyeuꞈ-eu, ngaˇ loꞈ-ehˇ gʼeh-eu tsawˇ haˬ-ahˇ, aˬ yawꞈ noeˬ keuˆ nehˬ laꞈ-euˬ meh.

⁴⁹Iˬ nah neh naˇ aˬ cawˬ ngaˬ-ahˇ, laˬ kʼaˬ cehˇ-eu gʼaˬ lehˇ kuˇ meh. Aˬ jeˬ miˇ neh kuˇ ta ehˇ naˇ, Baoˬ huiˬ-eu Miˬyehˇ neh ngaˬ-ahˇ, huiˬ-eu jeˬ mˇ nehˬ laꞈ-euˬ meh. Aˬ yawꞈ tsawˇ myahˇ muiˬ meh shawˇ meh;

⁵⁰Aˬ yawꞈ-ahˇ taˬ huiˬ-eu deuˬ-ahˇ, aˬ yawꞈ-euˬ gʼawˬ shaˬ gaˬ-eu jeˬ, mˬ maˬ maˬ byaˆ zaˇ ziˇ gmˬ meh.

⁵¹Baoˬ huiˬ-eu laꞈ du cawˬ doˆ-awˇ, nui ma huiˬ-eu deuˬ-euˬ bawˬ toˆ, dawˬ tawˆ luꞈ byaˆ dzeh nehˬ-eu meh.

⁵²Dzoeˬ dzaˬ sahˬ paˬ yaw gʼeh deuˬ-ahˇ, nuiˇ mahˬ-ahˇ neh gʼeu ka nehˬ-awˇ, nui nahˬ nui yu ahˇ-eu deuˬ-ahˇ, yaw goˇ-ahˇ ciˬ daˆ nehˬ-eu meh.

⁵³Mehꞈ-eu shuꞈ-eu tsawˇ haˬ deuˬ-ahˇ, dzaˇ kuiˇ dzaˇ myehˇ tiˬ dehˆ biꞈ-awˇ, smˇ muiˬ smˇ baw aˬ da deuˬ-ahˇ, yawꞈ ngehꞈ-ehˇ teh dzeh nehˬ-eu meh.

⁵⁴Poeˬ piˬ deuˬ-ahˇ dzaˬ taˬ yaꞈ-euˬ, saˇ jaˇ dawˬ-ahˇ aˬ yawꞈ ziꞈ-awˇ, zaˬ kʼaˆ Iˇsaˬleˬlaˆ jawˇ gaˇ, oe keuˆ-awˇ caw ba le-euˬ meh.

⁵⁵Aˬbyaˬhaˬ-euˬ kʼoeˇ taˆ hawˇ-eu, zaˬ deuˬ uˆ deuˬ dawˬ tawˆ kʼoeˇ taˆ, aˬ yawꞈ gʼawˬ shaˬ gaˬ nehˬ-eu jeˬ, mˬ maˬ maˬ byaˆ zaˇ ziˇ ziꞈ meh.”

⁵⁶Maˬliˇ-aˬ, Eˇliˇsaˬbehˆ nehˬ-ehˇ ba la smˇ siˬ jawˇ-awˇ gʼoꞈ-iˇ-euˬ meh.

⁵⁷Eˇliˇsaˬbehˆ zaˬ ciˬ deˇ le-awˇ, aˬ li tiˬ li ciˬ-euˬ meh.

⁵⁸Aˬ yawꞈ-euˬ dawˬ peh jawˇ-eu tsawˇ haˬ deuˬ hawˇ-eu, aˬ yawꞈ-euˬ aˬ yuiꞈ aˬ nyiˇ deuˬ, SahˬpaˬMiˬyehˇ neh aˬ yawꞈ-ahˇ gʼawˬ shaˬ gaˬ dui dui neh-euˬ gaˇ kawˆ ya gaˬ ngeh, aˬ yawꞈ nehˬ-ehˇ laˬ kʼaˬ caw cehˇ-euˬ meh.

⁵⁹Zaˬ nahˬ ciˬ-euˬ nah jawˇ byah laˇ ngeh, baˆ kʼoˆ mehˬ dzaˬ yehˬ nehˬ-eu lehˇ aˬ yawꞈ maˬ oe-awˇ, aˬ da-euˬ tsuiꞈ-ahˇ taꞈ leˇ ni, aˬ da-euˬ tsawˇ myahˇ biꞈ-awˇ, Zaˬkaˬliˇ lehˇ myahˇ nehˬ-eu lehˇ gʼeh-eu meh.

⁶⁰Ehˇ kʼawꞈ, aˬ ma gʼaˬ ehˇ-eu, “Teu loꞈ-ehˇ maˬ ya myahˇ-a. Aˬ yawꞈ-ahˇ Yoˇhaˬ lehˇ ya myahˇ nehˬ meh.”

⁶¹Aˬ yawꞈ maꞈ aˬ yawꞈ-ahˇ ehˇ-eu, “Naw pehˬ-euˬ aˇ jeuˬ aˇ ca laꞈ kʼoeˇ Yoˇhaˬ lehˇ myahˇ-euˬ tiˬ gʼaˬ-iˬ maˬ jawˇ-a tawˇ.”

⁶²Kʼoeˇ naˇ, aˬ da gʼaˬ-ahˇ aˬ yawꞈ maꞈ laꞈ dzawˇ dzawˇ nehˬ-awˇ, zaˬ kʼoeˇ gʼaˬ-ahˇ aˬ joˆ-ehˇ bi myahˇ nehˬ mawꞈ-eu gaˇ kawˆ naˇ haˬ-euˬ meh.

⁶³Sahˬ boꞈ boˬ-eu teˇ byaꞈ tiˬ byaꞈ Zaˬkaˬliˇ shaˇ-awˇ, “Aˬyawꞈ-euˬ tsawˇ myahˇ Yoˇhaˬ meh” lehˇ boꞈ nehˬ-euˬ meh. Kʼoeˇ ngeh, aˬ yawꞈ maꞈ dawˬ tawˆ luꞈ zahˬ dui dui leˇ-euˬ meh.

⁶⁴Tiˬ poˆ tehꞈ-ehˇ Zaˬkaˬliˇ-euˬ kʼaˬ meh pah laˇ-awˇ, mehˬ laˇ juˆ laˇ-euˬ miˇ neh, dawˬ ngehˬ doˆ nya laˇ-awˇ, Miˬyehˇ-ahˇ ja ceuˬ-euˬ meh.

⁶⁵Tahꞈ gʼoꞈ tahˬ jawˇ jawˇ-eu tsawˇ haˬ deuˬ guˆ-iˇ-euˬ meh. Gaˇ kawˆ kʼoeˇ Yuˇdaˆ miˇ kʼahˬ dahˇ taˆ doe ni gaˬ byah jiˇ-euˬ meh.

⁶⁶Kʼaˇ ya gaˬ-euˬ tsawˇ haˬ yawˬ gʼaˬ na luꞈ, nui ma laꞈ kʼoeˇ shaˇ noeˬ shaˇ noeˬ-ehˇ, “Zaˬ kʼoeˇ gʼaˬ aˬ joˆ-ehˇ gʼeh-eu tsawˇ haˬ pyeuꞈ laˇ-eu lehˇ gʼeh-eu maˬ siˬ miˇ-a” lehˇ ehˇ-eu meh. Aˬ jeˬ miˇ neh ehˇ naˇ, SahˬpaˬMiˬyehˇ-euˬ baoˬ aˬ yawꞈ kʼoeˇ taˆ jaˆ-eu yaw duˬ baw-eu meh.

⁶⁷Yoˇhaˬ-euˬ aˬ da Zaˬkaˬliˇ-ahˇ Muiˬ-eu Shawˇ-eu Yaw sahˇ Miˬyehˇ uˇ le-awˇ, Miˬyehˇ gʼaˇ duˬ heu loꞈ-ehˇ ngehˬ dah-eu meh.

⁶⁸“Aˬ yawꞈ-euˬ tsawˇ haˬ deuˬ shaˬ gaˇ, ka kʼoꞈ doˆ nehˬ le-euˬ miˇ neh, Iˇsaˬleˬlaˆ Miˬyehˇ pyeuꞈ-eu, SahˬpaˬMiˬyehˇ-ahˇ ja ceuˬ ma.

⁶⁹Yawꞈ-euˬ zaˬ kʼaˆ Daˬbiˇ o neh, baoˬ huiˬ-eu Ka kʼoꞈ-eu yaw sahˇ, aˬ dui-ahˇ biꞈ nehˬ leꞈ-euˬ meh.

⁷⁰Aˇ hu tsawˇ muiˬ tsawˇ shawˇ pyeuꞈ-eu, Miˬyehˇ gʼaˇ duˬ ngehˬ dah nehˬ-eu, ngehˬ zaˬ tmˇ zaˬ[1] deuˬ-ahˇ gʼoe-awˇ, aˬ dui-ahˇ bye-awˇ kʼehˬ laꞈ-euˬ, muiˇ-eu deuˬ dawˬ tawˆ-euˬ laꞈ-ahˇ, aˬ dui-ahˇ ka kʼoꞈ nehˬ ma lehˇ, aˬ yawꞈ saˇ jaˇ dzaˬ taˬ-euˬ meh.

⁷¹

⁷²Aˬ dui-euˬ poeˬ piˬ kʼoeˇ deuˬ-ahˇ, aˬ yawꞈ gʼawˬ shaˬ gaˬ-eu laꞈ kʼoeˇ, muiˬ-eu shawˇ-eu dawˬ ma saˇ jaˇ, noeˬ keuˆ ma lehˇ yawꞈ ehˇ-eu meh.

⁷³Aˬ dui yaw dehꞈ dehꞈ-eu tiˬ ziˇ, aˬ yawꞈ mehˬ shi muiˬ-eu shawˇ-eu, yaw tsaˬ yaw dawˇ tsawˇ haˬ pyeuꞈ-awˇ, guˆ-eu gaˆ-eu jeˬ maˬ jaˆ ni, yawꞈ-euˬ gaˇ ya mˇ-eu gʼaˇ duˬ, muiˇ-eu deuˬ-euˬ aˬ laꞈ laꞈ kʼoeˇ, aˬ dui-ahˇ ka kʼoꞈ nehˬ ma lehˇ, Aˬ da yaw dzahˇ Aˬbyaˬhaˬ-ahˇ, aˬ yawꞈ saˇ jaˇ dzaˬ taˬ-euˬ meh.

⁷⁴

⁷⁵

⁷⁶Ngaˬ-euˬ aˬ li pyeuꞈ-eu nawˬ-ahˇ, Huiˬ dui Mahˇ dui dui-eu gʼaˬ-euˬ ngehˬ zaˬ tmˇ zaˬ[2] lehˇ kuˇ tehꞈ-a. Sahˬpaˬ iˇ-eu gaˇ ma mehˬ hu, nawˇ jeˬ huˬ ya iˇ huˬ taˬ-awˇ, gaˇ ma shaˇ dahˇ nehˬ-eu laꞈ kʼoeˇ,

⁷⁷iˬ baˇ pyehˬ nehˬ-eu jeˬ baˬ da, ka kʼoꞈ-eu jeˬ za nya meh lehˇ, Miˬyehˇ-euˬ tsawˇ haˬ kʼoeˇ deuˬ-ahˇ, nawˇ ya dzawˇ mehˬ nehˬ-iˇ tehꞈ-a.

⁷⁸Aˬ dui Miˬyehˇ nui nahˬ ahˇ-awˇ, gʼawˬ shaˬ gaˬ nya dui dui-eu meh. Ka kʼoꞈ-eu jeˬ aˬ dui kʼoeˇ taˆ, uˬ bya bya shawˇ laˇ-eu loꞈ-ehˇ,

⁷⁹shiˇ-eu naˇ shmˇ yaw zahˇ uˬ moˆ, kʼaˇ dehꞈ kʼaˇ jawˇ-eu deuˬ kʼoeˇ taˆ, mˬ taˆ neh bya ka leꞈ tehꞈ-a. Nui saˇ oꞈ-eu gaˇ ma kʼoeˇ taˆ, kuiˇ toꞈ paˇ ciˬ kʼoꞈ daˆ nya ni, aˬ dui ahˇ sheuˬ gʼeh laꞈ tehꞈ-a.”

⁸⁰Aˬ li kʼoeˇ li huiˬ laˇ-awˇ, nui ma gʼawˇ mawˇ nyiˬ jeˬ luꞈ huiˬ laˇ mahˇ laˇ luꞈ-eu meh. Iˇsaˬleˬlaˆ tsawˇ haˬ deuˬ mehˬ shi aˬ yawꞈ maˬ doˆ laˇ kʼoeˇ keuˆ ni, bawˇ tsahˬ bawˇ dahˇ-ahˇ jawˇ-euˬ meh.