Read Akha Luˇkaꞈ 10 Bible Online

Luˇkaꞈ 10 - Akha bible

Luˇkaꞈ 10

¹Kʼoeˇ naˇ, Sahˬpaˬ Yeˬsuˇ-aˬ, zaˬ lahˇ shiꞈ tseˇ nyiꞈ gʼaˬ[16] paˇ tseˇ doˆ-awˇ, nyiˬ gʼaˬ-euˬ tiˬ muˇ bi muˇ-awˇ, aˬ yawꞈ kʼaˇ iˇ-eu lehˇ gʼeh-eu meuˬ deuˬ hawˇ-eu pu deuˬ doe ni, aˬ yawꞈ-euˬ mehˬ hu kʼehˇ gʼeh-euˬ meh.

²Aˬ yawꞈ maꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Cehˇ yehˬ deˇ laˇ-euˬ jaˆ dui dui meh. Ehˇ kʼawꞈ, yehˬ-eu tsawˇ haˬ ui cuiˆ tehꞈ meh. Kʼoeˇ miˇ neh, cehˇ yehˬ-eu tsawˇ haˬ gʼawˬ mya ni bi oe-eu gʼaˇ duˬ, deh ma Yaw sahˇ gʼaˬ-ahˇ shaˇ-awˬ.

³Naw maꞈ doˆ-iˇ-awˬ. Kʼaˬ yehˇ yehˇ maꞈ laꞈ kʼoeˇ yawˇ zaˬ pyehˬ uˇ gʼeh-eu loꞈ-ehˇ, naw maꞈ-ahˇ ngaˇ pyehˬ uˇ gʼeh-eu ma.

⁴Pyuˇ pawˬ behˆ, pehˇ tahˬ, sehˬ nawˆ, heu deuˬ taˬ yuˇ gʼeh. Gaˇ pehˇ-ahˇ tahˬ puˬ le-eu tsawˇ haˬ deuˬ-ahˇ dawˬ cawˬ puˬ puˬ-ehˇ taˬ jawˇ.

⁵Naw maꞈ nymˇ aˬ geu nymˇ-ahˇ daˆ leˇ-eu maˬ kaˬ, ‘Nymˇ heu nymˇ kʼoeˇ taˆ nui saˇ oꞈ-eu jeˬ keuˆ le luꞈ-uˇ’ lehˇ jeˬ huˬ ehˇ-awˬ.

⁶Nui saˇ oꞈ-eu jeˬ-ahˇ za geuˇ-eu tsawˇ haˬ tiˬ gʼaˬ na kʼoeˇ gaˇ jawˇ naˇ, naw maꞈ-euˬ nui saˇ oꞈ-eu jeˬ aˬ yawꞈ kʼoeˇ taˆ jaˆ yaꞈ luꞈ-uˇ. Ehˇ kʼawꞈ, nui saˇ oꞈ-eu jeˬ-ahˇ za geuˇ-eu tsawˇ haˬ maˬ jawˇ naˇ, naw maꞈ-euˬ nui saˇ oꞈ-eu jeˬ naw maꞈ-ahˇ paˇ gʼoꞈ kʼoꞈ laˇ tehꞈ-a.

⁷Aˬ yawꞈ kʼoeˇ nymˇ-ahˇ tehꞈ-ehˇ jawˇ-awˇ, kʼaˇ bi dzaˬ kʼaˇ bi dawˇ laꞈ-eu jeˬ dzaˬ-awˬ dawˇ-awˬ. Aˬ jeˬ miˇ neh ehˇ naˇ, gaˇ mˇ-eu tsawˇ haˬ-aˬ, gʼaˬ gaˇ poeˬ za-eu tsaˬ tehꞈ-a. Nymˇ daˆ taˬ daˆ paˇ.

⁸Meuˬ aˬ geu meuˬ-ahˇ uˇ leˇ-eu maˬ kaˬ, naw maꞈ-ahˇ ha nehˬ laꞈ naˇ, kʼaˇ bi dzaˬ laꞈ-euˬ jeˬ dzaˬ-awˬ.

⁹Kʼoeˇ gaˇ jawˇ-eu naˇ-eu gawˇ-eu tsawˇ haˬ deuˬ-ahˇ laˆ taˬ nehˬ-awˇ, ‘Miˬyehˇ Miˇkʼahˬ naw maꞈ jawˇ gaˇ keuˆ le-eu dawˬ peh peh laˇ-euˬ meh’ lehˇ ehˇ nehˬ-awˬ.

¹⁰Ehˇ kʼawꞈ, naw maꞈ meuˬ aˬ geu meuˬ-ahˇ uˇ leˇ-eu maˬ kaˬ, naw maꞈ-ahˇ maˬ ha nehˬ laꞈ naˇ, meuˬ-euˬ gaˇ ma doe ni iˇ-awˇ,

¹¹‘Nga maꞈ heu gaˇ laˇ keuˆ yaꞈ-euˬ saˇ kiˇ pyeuꞈ ni, nga maꞈ-euˬ aˬ kuiˇ pehˬ zaˬ-ahˇ lehꞈ laˇ-euˬ naw maꞈ-euˬ meuˬ-ahˇ jaˆ-eu kʼaˬ lehˇ-ahˇ keuˆ ni, heu gaˇ sawˆ kʼaˇ nehˬ yaꞈ ma de.[17] Ehˇ kʼawꞈ, Miˬyehˇ Miˇkʼahˬ naw maꞈ jawˇ gaˇ keuˆ le-eu dawˬ peh peh laˇ-euˬ meh lehˇ siˬ nya-awˬ’ lehˇ ehˇ nehˬ-awˬ.

¹²Yaˇ kʼaˬ daˇ-eu Aˇ nah keuˆ le ngeh, Sawˇdoˬ meuˬ-ahˇ kʼehˬ nehˬ-euˬ naˆ maˬ tseˇ, meuˬ kʼoeˇ meuˬ-ahˇ Miˬyehˇ kʼehˬ nehˬ tehꞈ-a.

¹³“Kawˇlaˬseˬ meuˬ-oˇ, nawˇ ya noeˬ shaˬ dui dui tehꞈ-a. Behˬdzeˇdaˬ meuˬ-oˇ, nawˇ jiˇ ya noeˬ shaˬ dui dui tehꞈ-a. Naw nyaꞈ-ahˇ mˇ mehˬ nehˬ-euˬ zahˬ dui dui leˇ paˬ-ehˇ gʼeh-eu gaˇ kawˆ kʼoeˇ deuˬ, Duˇlu meuˬ hawˇ-eu Siˇdoˬ meuˬ-ahˇ mˇ mehˬ nehˬ-euˬ law nmˇ-aˬ, aˬ yawꞈ maꞈ aˬ myah ba neh iˬ baˇ noeˬ poˆ-awˇ, guˬ daˇ pehˇ zeuˇ mehˬ tsoeˬ dm-awˇ, uˬ duˬ-ahˇ kʼaˬ lehˇ tawˆ daˆ tawˆ daˆ-ehˇ nuiˇ luꞈ-eu maˬ siˬ.

¹⁴Ehˇ kʼawꞈ, Yaˇ kʼaˬ daˇ-eu Aˇ nah keuˆ le ngeh, Duˇlu meuˬ hawˇ-eu Siˇdoˬ meuˬ naˆ maˬ tseˇ, naw nyaꞈ nyiꞈ meuˬ-ahˇ Miˬyehˇ kʼehˬ nehˬ laꞈ tehꞈ-a.

¹⁵Gaˬbeˬneˬoˬ meuˬ-oˇ, nawˇ toe. Mˬ-ahˇ tuˆ ni bi ciˬ huiˬ bi ciˬ mahˇ mawꞈ-eu nya loˇ. Nawˬ-ahˇ shiˬ buiˇ lah ma-ahˇ biˬ ahˇ nehˬ laꞈ tehꞈ-a.”

¹⁶Kʼoeˇ naˇ, zaˬ lahˇ deuˬ-ahˇ Yeˬsuˇ ehˇ nehˬ-eu, “Naw maꞈ neh mehˬ-euˬ dawˬ-ahˇ naˇ haˬ geuꞈ-eu tsawˇ haˬ-aˬ, ngaˬ-euˬ dawˬ-ahˇ naˇ haˬ geuꞈ gaˇ duˇ-eu meh. Naw maꞈ neh mehˬ-euˬ dawˬ-ahˇ maˬ naˇ haˬ geuꞈ-eu tsawˇ haˬ-aˬ, ngaˬ-euˬ dawˬ-ahˇ maˬ naˇ haˬ geuꞈ gaˇ duˇ-eu meh. Ngaˬ-euˬ dawˬ-ahˇ maˬ naˇ haˬ geuꞈ-eu tsawˇ haˬ-aˬ, ngaˬ-ahˇ kʼehˇ gʼeh leꞈ-euˬ gʼa-euˬ dawˬ-ahˇ maˬ naˇ haˬ geuꞈ gaˇ duˇ-eu meh.”

¹⁷Zaˬ lahˇ shiꞈ tseˇ nyiꞈ gʼaˬ[18] laˬ kʼaˬ tiˬ cehˇ gʼoꞈ keuˆ laˇ-awˇ ehˇ-eu, “Sahˬpaˬ-oˇ, nga maꞈ nawˬ-euˬ tsawˇ myahˇ-ahˇ gʼoe-awˇ dawˬ biꞈ nehˬ naˇ, nehꞈ deuˬ kʼawꞈ naˇ haˬ-eu meh.”

¹⁸Yeˬsuˇ aˬ yawꞈ maꞈ-ahˇ ehˇ kʼoꞈ nehˬ-eu, “Mˬ myawꞈ myawꞈ-eu loꞈ-ehˇ, Saˬdaˬ mˬ-ahˇ neh ga ka le gaˇ ngaˇ mawˇ-euˬ ma.

¹⁹Naˇ haˬ sheˇ. Doꞈ kʼaˆ-eu aˇ lawˇ hawˇ-eu boeˬ kaˬ laˬ ma-ahˇ nawˬ tehˬ nya-eu uˬ taꞈ, muiˇ-eu deuˬ-euˬ baoˬ-ahˇ gʼaˬ leˇ nya ni, ngaˇ naw maꞈ-ahˇ baoˬ biꞈ-eu ma. Naw maꞈ-ahˇ laˆ coeˬ laˆ ciˆ nya-eu tiˬ jeˬ-iˬ maˬ jaˆ-a.

²⁰Ehˇ kʼawꞈ, nehꞈ deuˬ naw maꞈ-euˬ dawˬ-ahˇ naˇ haˬ gaˇ laˬ kʼaˬ taˬ cehˇ. Mˬ kʼoeˇ taˆ naw maꞈ-euˬ tsawˇ myahˇ boꞈ ahˇ taˬ-euˬ gaˇ laˬ kʼaˬ cehˇ-awˬ.”

²¹Kʼoeˇ ngeh, Muiˬ-eu shawˇ-eu Yaw sahˇ Miˬyehˇ laꞈ kʼoeˇ Yeˬsuˇ laˬ kʼaˬ cehˇ-awˇ, heu loꞈ-ehˇ ehˇ-eu meh. “Mˬ sahˇ Sahˬpaˬ miˇ sahˇ Sahˬma pyeuꞈ-eu Aˬda-oˇ, nawˬ-euˬ guiˬ lahˬ-ahˇ ngaˇ ja ceuˬ-eu ma. Aˬ jeˬ miˇ neh ehˇ naˇ, zaˬ siˬ tsawˇ gahˇ ahˇ-eu tsawˇ haˬ deuˬ hawˇ-eu, siˬ-eu nya-eu tsawˇ haˬ deuˬ-ahˇ, gaˇ kawˆ heu deuˬ nawˇ zaꞈ taˬ-awˇ, maˬ siˬ maˬ nya-eu tsawˇ haˬ deuˬ-ahˇ nawˇ pah mehˬ nehˬ-euˬ meh. Nawˬ-euˬ gʼawˬ shaˬ gaˬ-eu jeˬ baˬ da neh, nawˇ kʼoeˇ loꞈ-ehˇ jahˇ nehˬ laꞈ mawꞈ-eu jeˬ pyeuꞈ-eu meh.

²²“Yawˬ jeˬ naˬ luꞈ ngaˬ Da neh ngaˬ-ahˇ a nehˬ jiˇ laꞈ-euˬ meh. Zaˬmaˇ-aˬ, aˬ suˇ gʼaˬ-a lehˇ, Aˬda maˬ ngeuˇ naˇ tiˬ gʼaˬ-iˬ maˬ siˬ nya-a. Kʼoeˇ loꞈ-ehˇ duˇ ni, Aˬda-aˬ, aˬ suˇ gʼaˬ-a lehˇ, Zaˬmaˇ hawˇ-eu Zaˬmaˇ neh tseˇ doˆ-awˇ pah mehˬ nehˬ-euˬ deuˬ maˬ ngeuˇ naˇ, tiˬ gʼaˬ-iˬ maˬ siˬ nya-a.”

²³Kʼoeˇ naˇ, Yeˬsuˇ zaˬ lahˇ deuˬ jawˇ paw ciˬ pyawˇ-awˇ, aˬ yawꞈ maꞈ-ahˇ tehꞈ-ehˇ ciˬ cuˇ ni heu loꞈ-ehˇ ehˇ kʼoeˬ nehˬ-euˬ meh. “Naw maꞈ neh ya mawˇ-euˬ heu deuˬ-ahˇ ya mawˇ-eu myaˆ nuiˆ-aˬ, guiˬ lahˬ huiˬ dui dui-eu myaˆ nuiˆ meh.

²⁴Ngaˇ naw maꞈ-ahˇ ehˇ nehˬ nyaˇ. Miˬyehˇ gʼaˇ duˬ ngehˬ dah-eu tsawˇ haˬ gʼawˬ mya gʼaˬ hawˇ-eu miˇ kʼahˬ sahˬ paˬ gʼawˬ mya gʼaˬ, naw maꞈ neh ya mawˇ-euˬ jeˬ mawˇ mawꞈ dui dui-eu meh. Ehˇ kʼawꞈ, aˬ yawꞈ maꞈ maˬ ya mawˇ-aˬ. Naw maꞈ neh ya gaˬ-euˬ jeˬ-ahˇ kʼawꞈ, gaꞈ mawꞈ dui dui-eu meh. Ehˇ kʼawꞈ, maˬ ya gaˬ-aˬ.”

²⁵Kʼoeˇ naˇ, Zahˇ dawˬ kʼoꞈ dawˬ mehˬ-eu saˬ laˬ tiˬ gʼaˬ tuˇ laˇ-awˇ, aˬ yawꞈ-ahˇ lawˬ haw mawꞈ-eu miˇ neh, heu loꞈ-ehˇ ehˬ-eu meh. “Saˬ laˬ-oˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za nya ni, ngaˇ aˬ jeˬ ya mˇ ta.”

²⁶Aˬ yawꞈ-ahˇ Yeˬsuˇ ehˇ nehˬ-eu, “Zahˇ dawˬ kʼoꞈ dawˬ laꞈ kʼoeˇ aˬ joˆ-ehˇ ehˇ taˬ ta. Nawˇ aˬ joˆ-ehˇ gui mawˇ teˬ.”

²⁷Aˬ yawꞈ ehˇ-eu, “‘Nawˬ-euˬ nui ma dawˬ tawˆ luꞈ, nawˬ-euˬ saꞈ laˇ dawˬ tawˆ luꞈ, nawˬ-euˬ gʼaˬ dawˬ tawˆ luꞈ, nawˬ-euˬ Miˬyehˇ pyeuꞈ-eu SahˬpaˬMiˬyehˇ-ahˇ gaˬ-awˬ’ lehˇ boꞈ taˬ-awˇ, ‘Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ’ lehˇ boꞈ taˬ-euˬ meh.”

²⁸Yeˬsuˇ ehˇ-eu, “Nawˇ ehˇ-eu tsaˬ meh. Kʼoeˇ loꞈ-ehˇ mˇ-awˬ. Mˬ maˬ maˬ byaˆ zaˇ ziˇ dehꞈ-eu jeˬ-ahˇ nawˇ za tehꞈ-a.”

²⁹Ehˇ kʼawꞈ, Zahˇ dawˬ kʼoꞈ dawˬ mehˬ-eu saˬ laˬ kʼoeˇ gʼaˬ, yawˬ ha yaw tsaˬ geuꞈ mawꞈ-eu miˇ neh, heu loꞈ-ehˇ ehˇ-eu meh. “Yawˬ ha dawˬ peh jawˇ-eu tsawˇ haˬ lehˇ ehˇ-eu aˬ suˇ gʼaˬ-ahˇ ehˇ ta.”

³⁰Yeˬsuˇ ehˇ kʼoꞈ nehˬ-eu, “Tiˬ poˆ-aˬ, tsawˇ haˬ tiˬ gʼaˬ Yeˬluˇsaˬlehˬ meuˬ-ahˇ neh Yeˬliˇkoˇ meuˬ-ahˇ iˇ luꞈ ngeh, tahˇ joe tahˬ puˬ-awˇ, aˬ yawꞈ kʼaˇ ahˇ-eu jeˬ dawˬ tawˆ luꞈ bi yuˇ jiˇ-euˬ uˬ taꞈ, shiˇ taw tehˬ ni bi diˬ-awˇ bi ga yaꞈ-euˬ meh.

³¹Piˇ ma tiˬ gʼaˬ gaˇ ma kʼoeˇ kahˇ-ahˇ iˇ zaˬ-euˬ meh. Ehˇ kʼawꞈ, tsawˇ haˬ kʼoeˇ gʼaˬ ga gaˇ aˬ yawꞈ ya mawˇ ngeh, gaˇ jaw jaw-awˇ iˇ dzeuˇ gʼeh-euˬ meh.

³²Kʼoeˇ loꞈ-ehˇ duˇ ni, Leˬbiˇ tsawˇ haˬ tiˬ gʼaˬ paˇ oe-awˇ, tsawˇ haˬ kʼoeˇ gʼaˬ ga gaˇ ya mawˇ ngeh, gaˇ jaw jaw-awˇ iˇ dzeuˇ gʼeh-euˬ meh.

³³Ehˇ kʼawꞈ, Saˬmaˬliˆ tsawˇ haˬ tiˬ gʼaˬ gaˇ ma kʼoeˇ kahˇ oe-awˇ, kʼoeˇ tsahˇ-ahˇ oe keuˆ ngeh, tsawˇ haˬ kʼoeˇ gʼaˬ ga gaˇ ya mawˇ-awˇ, gʼawˬ shaˬ haw gaˬ-euˬ meh.

³⁴Tsawˇ haˬ kʼoeˇ gʼaˬ ga gaˇ aˬ yawꞈ iˇ-awˇ, diˬ leuꞈ diˬ kʼaw taˬ-euˬ maˇ kʼehˬ maˇ naˇ-ahˇ aˬ gaꞈ dzaˇ uiˇ hawˇ-eu tsiˇ shehˆ lehꞈ nehˬ-awˇ, saˬ paˇ neh lahˇ cuꞈ nehˬ-euˬ meh. Kʼoeˇ naˇ, aˬ yawꞈ neh dziˬ leꞈ-euˬ mahˬ tahˬ laˆ kʼoeˇ taˆ ciˬ dziˬ-awˇ, daˬ yah yaꞈ duˬ nymˇ laꞈ kʼoeˇ ciˬ ahˇ-awˇ, yaw muiˬ paˬ-ehˇ bo saˆ nehˬ-euˬ meh.

³⁵Yawˬ nah yawˬ aˬ yawꞈ pyuˇ maˇ byaˆ nyiˬ byaˆ yuˇ doˆ-awˇ, daˬ yah yaꞈ-eu nymˇ kʼoeˇ nymˇ-ahˇ haw-eu gʼaˬ-ahˇ biꞈ-awˇ, heu loꞈ-ehˇ ehˇ nehˬ yaꞈ-euˬ meh. ‘Tsawˇ haˬ heu gʼaˬ-ahˇ yaw muiˬ paˬ-ehˇ tiˬ poˆ bo saˆ nehˬ laꞈ sheˇ. Heu myaˆ maˬ tseˇ zmˬ jiˇ naˇ, ngaˇ paˇ gʼoꞈ le ngeh nawˬ-ahˇ tsoeˬ kʼoꞈ nehˬ ma.’

³⁶“Tsawˇ haˬ kʼoeˇ smˇ gʼaˬ laꞈ kʼoeˇ, tahˇ joe bi joe-euˬ gʼaˬ-euˬ dawˬ peh jawˇ-eu tsawˇ haˬ lehˇ, aˬ geu gʼaˬ-ahˇ nawˇ kuˇ nmˇ.”

³⁷Zahˇ dawˬ kʼoꞈ dawˬ mehˬ-eu saˬ laˬ kʼoeˇ gʼaˬ ehˇ-eu, “Aˬ yawꞈ-ahˇ gʼawˬ shaˬ gaˬ nehˬ-euˬ kʼoeˇ gʼaˬ-ahˇ kuˇ-eu tsaˬ tehꞈ-a.” Yeˬsuˇ aˬ yawꞈ-ahˇ ehˇ nehˬ-eu, “Nawˇ gʼeh kʼoeˇ loꞈ-ehˇ mˇ-iˇ-awˬ.”

³⁸Yeˬsuˇ hawˇ-eu aˬ yawꞈ-euˬ zaˬ lahˇ deuˬ mehˬ hu paw le luꞈ ngeh, pu tiˬ pu-ahˇ uˇ leˇ-awˇ, Maˬta lehˇ myahˇ-euˬ zaˬ miˬ zaˬ tiˬ gʼaˬ Yeˬsuˇ-ahˇ aˬ yawꞈ-euˬ nymˇ laꞈ kʼoeˇ ha ahˇ-euˬ meh.

³⁹Maˬta-euˬ aˬ nyiˇ Maˬliˇ lehˇ myahˇ-euˬ zaˬ miˬ zaˬ tiˬ gʼaˬ jawˇ-eu meh. Maˬliˇ-aˬ, Sahˬpaˬ Yeˬsuˇ-euˬ aˬ kuiˇ dawˬ peh nuiˇ-awˇ, Yeˬsuˇ mehˬ nehˬ tsoˆ nehˬ gaˇ naˇ haˬ luꞈ-eu meh.

⁴⁰Ehˇ kʼawꞈ, Maˬta-aˬ, dzaˬ dzaˬ dawˇ dawˇ laˆ saˆ-eu tehˬ gʼa luꞈ-eu baˬ da neh, nui ma maˬ saˇ-ehˇ, Yeˬsuˇ jawˇ gaˇ iˇ-awˇ ehˇ-eu, “Sahˬpaˬ-oˇ, ngaˬ-euˬ aˬ nyiˇ teu gʼaˬ ngaˬ-ahˇ tehꞈ-ehˇ byehˇ dzeh-awˇ dzaˬ dzaˬ dawˇ dawˇ bi laˆ saˆ laꞈ-euˬ gaˇ nawˇ tiˬ jeˬ-iˬ maˬ ehˇ te loˇ. Ngaˬ-ahˇ caw mˇ nehˬ le-awˬ lehˇ tiˬ poˆ ehˇ nehˬ-iˬ sheˇ.”

⁴¹Ehˇ kʼawꞈ, Yeˬsuˇ ehˇ-eu, “Maˬta-oˇ, Maˬta-oˇ. Nawˇ-aˬ, gʼawˬ mya jeˬ tehˬ gʼa-awˇ kʼahˬ lahˇ luꞈ-eu nga.

⁴²Ehˇ kʼawꞈ, Maˬliˇ neh tseˇ geuꞈ-euˬ jeˬ tsaˬ dui dui meh. Kʼoeˇ jeˬ-ahˇ aˬ cawˬ maˬ lu doˆ geuꞈ nya-a.”