Read Akha Luˇkaꞈ 15 Bible Online

Luˇkaꞈ 15 - Akha bible

Luˇkaꞈ 15

¹Tiˬ nah-aˬ, kawˬ taꞈ-eu tsawˇ haˬ deuˬ hawˇ-eu, iˬ baˇ zaˬ lehˇ sawˇ dzeh taˬ-euˬ tsawˇ haˬ deuˬ, Yeˬsuˇ dawˬ mehˬ mehˬ gaˇ naˇ haˬ-eu lehˇ, aˬ yawꞈ-euˬ dawˬ peh jiˆ uˇ laˇ luꞈ-eu meh.

²Kʼoeˇ ngeh, Paˬliˬsehˇ deuˬ hawˇ-eu Zahˇ dawˬ kʼoꞈ dawˬ mehˬ-eu saˬ laˬ deuˬ Yeˬsuˇ-ahˇ iˬ baˇ taˬ-awˇ ehˇ-eu, “Tsawˇhaˬ heu gʼaˬ iˬ baˇ zaˬ lehˇ sawˇ taˬ-euˬ deuˬ-ahˇ ha geuꞈ-eu uˬ taꞈ, tiˬ kawˆ loꞈ-ehˇ dzaˬ taꞈ dawˇ taꞈ-eu nga.”

³Kʼoeˇ ngeh, Yeˬsuˇ aˬ yawꞈ maꞈ-ahˇ yaw jeˬ maˬ jeˬ heu hmˬ ja mehˬ nehˬ-euˬ meh.

⁴“Naw maꞈ laꞈ kʼoeˇ, tsawˇ haˬ tiˬ gʼaˬ na yawˇ tiˬ yaˇ mawˇ jawˇ-awˇ, tiˬ mawˇ byoˆ-iˇ naˇ, gʼoeˬ tseˇ gʼoeˬ mawˇ-ahˇ bawˇ tsahˬ-ahˇ bi jawˇ yaꞈ-awˇ, byoˆ-iˇ-euˬ kʼoeˇ mawˇ-ahˇ maˬ mawˇ kʼoeˇ mawˇ ni maˬ poˆ loˇ.

⁵Poˆ mawˇ ngeh jawˇ, laˬ kʼaˬ cehˇ dui dui-awˇ baꞈ pu kʼoeˇ taˆ baꞈ tehꞈ-a.

⁶Iˇ kahˇ gʼoꞈ keuˆ laˇ ngeh jawˇ,aˬ yawꞈ-euˬ cawˬ deuˬ hawˇ-eu aˬ yawꞈ-euˬ dawˬ peh jawˇ-eu tsawˇ haˬ deuˬ-ahˇ kuˇ-awˇ, ‘Byoˆ-iˇ-euˬ ngaˬ-euˬ yawˇ kʼoeˇ mawˇ poˆ mawˇ kʼoꞈ-euˬ miˇ neh, ngaˬ nehˬ-ehˇ laˬ kʼaˬ caw cehˇ laˇ-awˬ’ lehˇ ehˇ nehˬ tehꞈ-a.

⁷Kʼoeˇ loꞈ-ehˇ duˇ ni, iˬ baˇ noeˬ poˆ-eu maˬ loˬ-eu yaw tsaˬ yaw dawˇ tsawˇ haˬ gʼoeˬ tseˇ gʼoeˬ gʼaˬ-ahˇ naˆ maˬ tseˇ, iˬ baˇ noeˬ poˆ-euˬ iˬ baˇ zaˬ tiˬ gʼaˬ-ahˇ mˬ kʼoeˇ taˆ laˬ kʼaˬ cehˇ dzehˬ tehꞈ-a lehˇ, naw maꞈ-ahˇ ngaˇ ehˇ-eu ma.

⁸“Zaˬ miˬ zaˬ tiˬ gʼaˬ pyuˇ maˇ byaˆ tseˇ byaˆ ahˇ-eu tiˬ byaˆ ga byoˆ naˇ, tsiˇ kʼmˬ keuˬ-awˇ nymˇ-ahˇ yaˆ pyawˇ yaˆ yaˆ-ehˇ maˬ mawˇ kʼoeˇ mawˇ ni maˬ poˆ-aˇ loˇ.

⁹Aˬ yawꞈ poˆ mawˇ ngeh, aˬ yawꞈ-euˬ cawˬ deuˬ hawˇ-eu aˬ yawꞈ-euˬ dawˬ peh jawˇ-eu tsawˇ haˬ deuˬ-ahˇ kuˇ uiˬ-awˇ, ‘Ngaˬ neh bi ga byoˆ-euˬ pyuˇ maˇ byaˆ kʼoeˇ byaˆ paˇ mawˇ kʼoꞈ-euˬ miˇ neh, ngaˬ nehˬ-ehˇ laˬ kʼaˬ caw cehˇ laˇ-awˬ’ lehˇ ehˇ nehˬ tehꞈ-a.

¹⁰Kʼoeˇ gaˇ duˇ ni, iˬ baˇ zaˬ tiˬ gʼaˬ iˬ baˇ noeˬ poˆ-euˬ gaˇ, Miˬyehˇ-euˬ mˬ taˆ gʼaˬ kʼehˇ deuˬ laˬ kʼaˬ cehˇ-eu meh lehˇ, naw maꞈ-ahˇ ngaˇ ehˇ-eu ma.”

¹¹Yeˬsuˇ ehˇ-eu, “Tsawˇ haˬ tiˬ gʼaˬ aˬ li nyiˬ li jawˇ-eu meh.

¹²Aˬ li aˬ nyiˇ gʼaˬ aˬ yawꞈ-euˬ aˬ da-ahˇ, ‘Aˬ da-oˇ, ngaˬ-ahˇ oꞈ-eu jeˬ biˇ nymˬ-mˇ biꞈ nehˬ laꞈ-awˬ’ lehˇ shaˇ-eu meh. Kʼoeˇ ngeh, aˬ da gʼaˬ aˬ nyaꞈ nmˇ-ahˇ jeˬ biˇ biˇ paˆ nehˬ-euˬ meh.

¹³Gʼawˬ mya nah maˬ gʼeh-ehˇ, aˬ li aˬ nyiˇ gʼaˬ aˬ yawꞈ kʼaˇ jaˆ-eu yuˇ jiˇ-awˇ, gaˇ mahˇ kaˬ-eu miˇ kʼahˬ-ahˇ doˆ-iˇ-awˇ, kʼaˇ dehꞈ mawꞈ-eu dehꞈ-awˇ, aˬ yawꞈ-euˬ pyuˇ shuiˇ myawˬ gahˬ zmˬ dzeh jiˇ-euˬ meh.

¹⁴Kʼaˇ ahˇ-eu dawˬ tawˆ luꞈ zmˬ dzeh jiˇ ngeh jawˇ, miˇ kʼahˬ kʼoeˇ kʼahˬ-ahˇ mehꞈ dui shuꞈ dui dui-eu jeˬ keuˆ le-awˇ, aˬ yawꞈ tiˬ jeˬ-iˬ maˬ jaˆ ni shaˬ dui dui-euˬ meh.

¹⁵Kʼoeˇ ngeh, miˇ kʼahˬ kʼoeˇ kʼahˬ-ahˇ jawˇ-eu tsawˇ haˬ tiˬ gʼaˬ jawˇ gaˇ jawˇ-iˇ-awˇ, tsawˇ haˬ kʼoeˇ gʼaˬ aˬ yawꞈ-ahˇ deh yaˇ-ahˇ aˬ zaꞈ bi bo-euˬ meh.

¹⁶‘Aˬ zaꞈ-ahˇ biꞈ-euˬ aˇ behˆ kʼoeˇ tiˬ dehˆ ya dzaˬ law nmˇ-aˬ’ lehˇ aˬ yawꞈ noeˬ-euˬ meh. Ehˇ kʼawꞈ, tiˬ gʼaˬ-iˬ aˬ yawꞈ-ahˇ aˇ behˆ kʼoeˇ maˬ bi dzaˬ-a.

¹⁷Aˬ li kʼoeˇ gʼaˬ aˬ yawˇ yawꞈ noeˬ gahˇ laˇ-awˇ, ‘Ngaˬ da-ahˇ gʼaˬ mahˇ mahˇ dzaˬ-eu tsawˇ haˬ deuˬ maˬ dzaˬ maˬ dawˇ jiˇ coeˇ-a. Ehˇ kʼawꞈ, ngaˇ-aˬ, heu gaˇ hawˬ dzahˬ sehꞈ shaw-iˬ miˇ-a.

¹⁸Ngaˇ tsawˬ tuˇ-awˇ ngaˬ da jawˇ gaˇ gʼoꞈ leˇ-awˇ, “Aˬ da-oˇ, Miˬyehˇ mehˬ shi hawˇ-eu nawˬ-euˬ mehˬ shi ngaˇ iˬ baˇ mˇ-euˬ ma.

¹⁹Ngaˬ-ahˇ nawˬ li lehˇ bi kuˇ-eu maˬ paˇ geuˇ miˇ-a. Nawˬ-ahˇ gʼaˬ mahˇ mahˇ dzaˬ-eu tsawˇ haˬ tiˬ gʼaˬ loꞈ-ehˇ sawˇ nehˬ laꞈ-awˬ” lehˇ ehˇ nehˬ leˇ ma’ lehˇ, yawˬ haˇ yawˬ ha ehˇ-eu meh.

²⁰Kʼoeˇ naˇ, aˬ yawꞈ tsawˬ tuˇ laˇ-awˇ, aˬ yawꞈ-euˬ aˬ da jawˇ gaˇ gʼoꞈ leˇ-euˬ meh. “Aˬ yawꞈ gaˇ mahˇ kaˬ gaˇ gʼoꞈ laˇ luꞈ ngeh neh, aˬ yawꞈ-euˬ aˬ da aˬ yawꞈ-ahˇ haw mawˇ-awˇ, gʼawˬ shaˬ gaˬ dui dui-eu miˇ neh cehˆ coeˬ coeˬ gʼeh-awˇ, aˬ yawꞈ-ahˇ byaˇ cuꞈ-awˇ ha-eu laꞈ kʼoeˇ, mehˬ cuˇ cuˇ nehˬ-euˬ meh.

²¹Aˬ li kʼoeˇ gʼaˬ aˬ da-ahˇ ehˇ nehˬ-eu, ‘Aˬ da-oˇ, Miˬyehˇ mehˬ shi hawˇ-eu nawˬ-euˬ mehˬ shi ngaˇ iˬ baˇ mˇ-euˬ ma. Ngaˬ-ahˇ nawˬ li lehˇ bi kuˇ-eu maˬ paˇ geuˇ miˇ-a.’

²²Ehˇ kʼawꞈ, aˬ da gʼaˬ aˬ yawꞈ-euˬ zaˬ kʼaˆ deuˬ-ahˇ kuˇ-awˇ ehˇ-eu, ‘Aˬ cawˬ naˆ maˬ tseˇ muiˬ dzehˬ-eu pehˇ kʼahˬ pehˇ mahˇ yuˇ leꞈ-awˇ ngaˬ li-ahˇ yaw kawˇ-ehˇ bi dm sheˇ. Laꞈ behˬ gʼeh bi behˬ-awˇ, sehˬ nawˆ gʼeh bi nawˆ-awˬ.

²³Kʼoeˇ naˇ, aˬ cawˬ naˆ maˬ tseˇ tsuˇ-eu mawˇ neˇ mawˇ gaw zaˬ tsahˇ leꞈ-awˇ sehꞈ-awˬ. Aˬ dui maꞈ laˬ kʼaˬ tiˬ cehˇ dzaˬ taꞈ dawˇ taꞈ kaˇ-euˇ.

²⁴Aˬ jeˬ miˇ neh ehˇ naˇ, ngaˬ li heu gʼaˬ shiˇ-euˬ kʼawꞈ, nymˬ-mˇ paˇ gʼoꞈ dehꞈ laˇ-euˬ meh. Aˬ yawꞈ byoˆ-iˇ-euˬ kʼawꞈ, nymˬ-mˇ paˇ mawˇ kʼoꞈ-euˬ ma.’ Kʼoeˇ naˇ, aˬ yawꞈ maꞈ laˬ kʼaˬ tiˬ cehˇ dzaˬ taꞈ dawˇ taꞈ-euˬ meh.

²⁵“Kʼoeˇ ngeh, aˬ li aˬ yuiꞈ gʼaˬ yaˇ ngeh iˇ-euˬ meh. Aˬ yawꞈ gʼoꞈ laˇ-awˇ, nymˇ dzeˇ gʼoꞈ keuˆ laˇ ngeh, caˇ dawˬ caˇ caˇ-ehˇ gaˇ nyeh nyeh-eu teˇ saˇ ya gaˬ-euˬ meh.

²⁶Kʼoeˇ miˇ neh, zaˬ kʼaˆ tiˬ gʼaˬ-ahˇ aˬ yawꞈ kuˇ-awˇ, ‘Aˬ jeˬ gʼeh luꞈ ta’ lehˇ naˇ haˬ-euˬ meh.

²⁷Zaˬ kʼaˆ kʼoeˇ gʼaˬ aˬ yawꞈ-ahˇ ehˇ-eu, ‘Nawˬ-euˬ aˬ nyiˇ gʼoꞈ laˇ-euˬ meh. Aˬ yawꞈ tiˬ jeˬ-iˬ maˬ gʼeh ni gʼoꞈ keuˆ laˇ-euˬ miˇ neh, nawˬ da laˬ kʼaˬ cehˇ-awˇ cu tsuˇ taˬ-euˬ mawˇ neˇ mawˇ gawˬ zaˬ kʼoeˇ mawˇ sehꞈ-euˬ meh.’

²⁸Dawˬ kʼoeˇ dawˬ-ahˇ ya gaˬ ngeh, aˬ li aˬ yuiꞈ kʼoeˇ gʼaˬ nui ma pehˇ dui dui laˇ-awˇ, iˇ kahˇ laꞈ kʼoeˇ maˬ gʼoꞈ uˇ leˇ-a. Aˬ da gʼaˬ doˆ le-awˇ, iˇ kahˇ laꞈ kʼoeˇ gʼoꞈ uˇ laˇ-awˬ lehˇ gʼaˇ duˬ shaˇ dui dui-euˬ meh.

²⁹Ehˇ kʼawꞈ, aˬ yawꞈ-euˬ aˬ da-ahˇ aˬ yawꞈ ehˇ nehˬ-eu, ‘Heu myaˆ kʼoꞈ heu myaˆ la nawˬ-ahˇ ngaˇ zaˬ kʼaˆ loꞈ-ehˇ mˇ cu-euˬ uˬ taꞈ, nawˬ-euˬ ehˇ dawˬ maˬ naˇ haˬ-euˬ tiˬ poˆ-iˬ maˬ jaˆ haw-aˬ. Ehˇ kʼawꞈ, ngaˬ-euˬ cawˬ deuˬ nehˬ-ehˇ dzaˬ taꞈ dawˇ taꞈ-eu gʼaˇ duˬ, ciꞈ myehꞈ ciꞈ zaˬ tiˬ mawˇ tehꞈ-ehˇ kʼawꞈ nawˇ ngaˬ-ahˇ tiˬ jawˇ-iˬ maˬ biꞈ laꞈ haw-aˬ.

³⁰Ehˇ kʼawꞈ, nawˬ-euˬ pyuˇ shuiˇ myawˬ gahˬ deuˬ-ahˇ, meh maˬ laˇ nehˬ-ehˇ byawˬ gʼa byawˬ gʼa-ehˇ zmˬ dzeh jiˇ-euˬ nawˬ li heu li gʼoꞈ laˇ-euˬ gaˇ, cu tsuˇ taˬ-euˬ mawˇ neˇ mawˇ gaw zaˬ kʼoeˇ mawˇ sehꞈ nehˬ-euˬ nga laˬ.’

³¹Aˬ da gʼaˬ ehˇ-eu, ‘Aˬ li-oˇ, nawˇ-aˬ, aˬ myah luꞈ ngaˬ nehˬ-ehˇ jawˇ-awˇ, ngaˇ kʼaˇ jaˆ-eu jeˬ dawˬ tawˆ luꞈ nawˬ-euˬ tehꞈ meh.

³²Laˬ kʼaˬ tiˬ cehˇ dzaˬ taꞈ dawˇ taꞈ-eu heu-aˬ, jahˇ paˬ-ehˇ gʼeh-eu tiˬ jeˬ meh. Aˬ jeˬ miˇ neh ehˇ naˇ, nawˬ-euˬ aˬ nyiˇ heu gʼaˬ shiˇ-euˬ kʼawꞈ, nymˬ-mˇ paˇ gʼoꞈ dehꞈ laˇ-euˬ meh. Aˬ yawꞈ byoˆ-iˇ-euˬ kʼawꞈ, nymˬ-mˇ paˇ mawˇ kʼoꞈ-euˬ ma.”’