Read Akha Luˇkaꞈ 19 Bible Online

Luˇkaꞈ 19 - Akha bible

Luˇkaꞈ 19

¹Yeˬliˇkoˇ meuˬ-ahˇ Yeˬsuˇ le uˇ-awˇ cah gʼeh luꞈ-eu meh.

²Saˬgehˇ lehˇ myahˇ-euˬ tsawˇ haˬ tiˬ gʼaˬ kʼoeˇ gaˇ jawˇ-eu meh. Aˬ yawꞈ-aˬ, kawˬ taꞈ-eu paw yaw huiˬ keuˆ leˇ taˬ-euˬ tiˬ gʼaˬ pyeuꞈ-awˇ, smˇ muiˬ muiˬ-eu meh.

³Aˬ yawꞈ Yeˬsuˇ-ahˇ mawˇ haw mawꞈ-eu meh. Ehˇ kʼawꞈ, tsawˇ haˬ myaˬ dui dui-eu uˬ taꞈ, aˬ yawꞈ-euˬ gʼawˇ mawˇ yaw awˆ miˇ neh, maˬ haw mawˇ nya-a.

⁴Yeˬsuˇ-ahˇ aˬ yawꞈ haw mawˇ nya ni, Yeˬsuˇ iˇ-eu gaˇ ma kʼoeˇ kahˇ caw caw-ehˇ, mehˬ hu paw aˬ yawꞈ cehˆ kʼmˬ-iˇ-awˇ, siˬ guˬ maˇ sheuˇ aˇ bawˇ-ahˇ daˆ leˇ-awˇ loꞈ-euˬ meh.

⁵Yeˬsuˇ kʼoeˇ gaˇ iˇ keuˆ ngeh, aˬ yawꞈ-ahˇ gʼawˇ leuˇ haw-awˇ, “Saˬgehˇ-oˇ, yaw kawˇ-ehˇ zaꞈ ka le-awˬ. Iˬ nah nawˬ-euˬ nymˇ-ahˇ ngaˇ ya naˬ laˇ nga” lehˇ ehˇ nehˬ-euˬ mah.

⁶Kʼoeˇ ngeh, aˬ yawꞈ yaw kawˇ-ehˇ zaꞈ ka le-awˇ, Yeˬsuˇ-ahˇ laˬ kʼaˬ tiˬ cehˇ ha-euˬ meh.

⁷Kʼoeˇ gaˇ kʼaˇ mawˇ-euˬ tsawˇ haˬ dawˬ tawˆ luꞈ Yeˬsuˇ-ahˇ mahˇ mahˇ-ehˇ ehˇ-eu, “Tsawˇ haˬ teu gʼaˬ aˬ joˆ-ehˇ iˬ baˇ zaˬ-euˬ nymˇ-ahˇ daˬ yah geuꞈ-iˇ-eu nga.”

⁸Saˬgehˇ tuˇ-awˇ, Sahˬpaˬ Yeˬsuˇ-ahˇ ehˇ nehˬ-eu, “Sahˬpaˬ-oˇ, ngaˬ-euˬ pyuˇ shuiˇ myawˬ gahˬ tiˬ paˆ, shaˬ-eu zahˬ-eu tsawˇ haˬ deuˬ-ahˇ biꞈ ma. Ngaˬ neh tsawˇ haˬ tiˬ gʼaˬ na-ahˇ tiˬ jeˬ paˬ myawꞈ dzaˬ taˬ-euˬ jaˆ naˇ, oeˬ bymˇ tsoeˬ kʼoꞈ nehˬ ma.”

⁹Yeˬsuˇ aˬ yawꞈ-ahˇ ehˇ nehˬ-eu, “Iˬ nah nymˇ heu nymˇ-ahˇ ka kʼoꞈ-eu jeˬ keuˆ le-euˬ meh. Aˬ jeˬ miˇ neh ehˇ naˇ, nymˇ sahˇ gʼaˬ kʼawꞈ, Aˬbyaˬhaˬ-euˬ zaˬ meh.

¹⁰Tsawˇhaˬ-euˬ Zaˬmaˇ-aˬ, byoˆ-iˇ-euˬ deuˬ-ahˇ poˆ mawˇ-awˇ ka kʼoꞈ-eu gʼaˇ duˬ oe-euˬ meh.”

¹¹Yeˬsuˇ kʼoeˇ loꞈ-ehˇ ehˇ gaˇ aˬ yawꞈ maꞈ naˇ haˬ luꞈ ngeh, Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ nehˬ-euˬ meh. Aˬ jeˬ miˇ neh ehˇ naˇ, aˬ yawꞈ Yeˬluˇsaˬlehˬ meuˬ-ahˇ le keuˆ-eu dawˬ peh peh laˇ-awˇ, Miˬyehˇ Miˇkʼahˬ keuˆ le shaw-iˬ meh lehˇ aˬ yawꞈ maꞈ noeˬ luꞈ-eu meh.

¹²Kʼoeˇ miˇ neh, aˬ yawꞈ heu loꞈ-ehˇ ehˇ-eu meh. “Sahˬ paˬ-euˬ aˇ jeuˬ pyeuꞈ-eu yaw huiˬ yaw mahˇ tiˬ gʼaˬ, sahˬ paˬ-euˬ aˇ yaˬ ha laˬ-iˇ-eu lehˇ, gaˇ mahˇ kaˬ-eu miˇ kʼahˬ-ahˇ iˇ-euˬ meh.

¹³Aˬ yawꞈ maˬ iˇ mi naˆ-ehˇ, aˬ yawꞈ-euˬ zaˬ kʼaˆ tseˇ gʼaˬ-ahˇ kuˇ-awˇ, tiˬ gʼaˬ-ahˇ shuiˇ maˇ byaˆ tiˬ byaˆ[27]Shuiˇ maˇ byaˆ tiˬ byaˆ’ lehˇ ehˇ gaˇ, Heˬbyehˇ dawˬ ‘pyuˇ tiˬ maˬnehˇ’ lehˇ ehˇ taˬ-euˬ meh. Kʼoeˇ-aˬ, tsawˇ haˬ tiˬgʼaˬ ba la smˇ siˬ gaˇ mˇ-euˬ gʼaˬ gaˇ poeˬ nehˬ-ehˇ di-eu meh.* biꞈ taˬ yaꞈ-awˇ ehˇ nehˬ-eu, ‘Ngaˇ gʼoꞈ keuˆ laˇ ngeh keuˆ ni, heu yuˇ-awˇ jeˬ gaꞈ gaꞈ tawˬ-awˬ.’

¹⁴Ehˇ kʼawꞈ, aˬ yawꞈ-euˬ miˇ kʼahˬ zaˬ deuˬ aˬ yawꞈ-ahˇ bye-awˇ, aˬ yawꞈ-euˬ mehˬ nah tsawˇ haˬ pyehˬ gʼeh-awˇ heu loꞈ-ehˇ bi tsaꞈ gaꞈ-iˇ-euˬ meh. ‘Tsawˇ haˬ heu gʼaˬ-ahˇ nga maꞈ kʼoeˇ taˆ sahˬ paˬ geuꞈ-awˇ maˬ bi uˆ lahˇ mawꞈ nya.’

¹⁵“Tsawˇ haˬ kʼoeˇ gʼaˬ sahˬ paˬ-euˬ aˇ yaˬ yuˇ-awˇ gʼoꞈ laˇ ngeh, aˬ yawꞈ neh shuiˇ maˇ byaˆ biꞈ taˬ yaꞈ-euˬ zaˬ kʼaˆ kʼoeˇ deuˬ aˇ myaˆ ni gaꞈ jeuˬ-euˬ gaˇ kawˆ ya siˬ ni, aˬ yawꞈ jawˇ gaˇ yaw kawˇ-ehˇ bi kuˇ laꞈ-euˬ meh.

¹⁶Yaw beh gʼaˬ aˬ yawꞈ-euˬ mehˬ shi laˇ-awˇ ehˇ-eu, ‘Sahˬ paˬ-oˇ, nawˬ-euˬ shuiˇ maˇ byaˆ kʼoeˇ byaˆ neh, shuiˇ maˇ byaˆ tseˇ byaˆ ngaˇ gaꞈ jeuˬ taˬ-euˬ ma.’

¹⁷Aˬ yawꞈ ehˇ kʼoꞈ nehˬ-eu, ‘Muiˬ-eu zaˬ kʼaˆ-oˇ. Muiˬ ngaˇ. Gaˇ yaw nyiˇ laꞈ kʼoeˇ nawˇ saˇ jaˇ ziꞈ-eu baˬ da neh, meuˬ tseˇ meuˬ-ahˇ uˆ lahˇ-eu baoˬ, ngaˇ nawˬ-ahˇ biꞈ-eu ma.’

¹⁸Nyiˬ gʼaˬ tiˬ gʼaˬ laˇ-awˇ ehˇ-eu, ‘Sahˬ paˬ-oˇ, nawˬ-euˬ shuiˇ maˇ byaˆ kʼoeˇ byaˆ neh, shuiˇ maˇ byaˆ ngaˬ byaˆ ngaˇ gaꞈ jeuˬ taˬ-euˬ ma.’

¹⁹Aˬ yawꞈ ehˇ kʼoꞈ nehˬ-eu, ‘Meuˬ ngaˬ meuˬ-ahˇ uˆ lahˇ-eu baoˬ, ngaˇ nawˬ-ahˇ biꞈ-eu ma.’

²⁰Tiˬ gʼaˬ paˇ laˇ-awˇ ehˇ-eu, ‘Sahˬ paˬ-oˇ, nawˬ-euˬ shuiˇ maˇ byaˆ hehˬ. Nawˬ-euˬ shuiˇ maˇ byaˆ-ahˇ paˇ jeh neh toeˆ cuꞈ-awˇ bi jaˆ-euˬ ma.

²¹Aˬ jeˬ miˇ neh ehˇ naˇ, nawˇ yaw yaꞈ miˇ neh nawˬ-ahˇ ngaˇ guˆ-eu ma. Nawˬ neh maˬ yuˇ taˬ-euˬ gaˇ nawˇ yuˇ geuꞈ-awˇ, nawˬ neh maˬ sehˬ-euˬ gaˇ nawˇ yehˬ dzaˬ-eu meh.’

²²“Aˬ yawꞈ ehˇ kʼoꞈ nehˬ-eu, ‘Haiˬ dui dui-eu zaˬ kʼaˆ-oˇ, nawˬ-euˬ kʼaˬ meh-ahˇ doˆ le-euˬ dawˬ neh, nawˬ-ahˇ ngaˇ yaˇ kʼaˬ daˇ ma. Ngaˬ neh maˬ yuˇ taˬ-euˬ gaˇ ngaˇ yuˇ geuꞈ-awˇ, ngaˬ neh maˬ sehˬ-euˬ gaˇ ngaˇ yehˬ dzaˬ-euˬ nawˇ siˬ duˬ-eu nga laˬ.

²³Toˆ-ehˇ ngeuˇ-eu maˇ-iˬ, aˬ jeˬ miˇ neh ngaˬ-euˬ pyuˇ-ahˇ pyuˇ cehˇ jiˇ laꞈ kʼoeˇ maˬ dawˆ ahˇ-iˇ teˬ. Dawˆ ahˇ-iˇ law nmˇ-aˬ, ngaˇ gʼoꞈ keuˆ laˇ ngeh, ngaˬ-euˬ pyuˇ uˬ taꞈ, jiˇ jeuˬ kʼawꞈ ngaˇ paˇ za tehꞈ-a.’

²⁴“ Kʼoeˇ naˇ, kʼoeˇ gaˇ yawꞈ luꞈ-eu tsawˇ haˬ deuˬ-ahˇ aˬ yawꞈ ehˇ nehˬ-eu, ‘Aˬ yawꞈ jawˇ gaˇ jaˆ-eu shuiˇ maˇ byaˆ kʼoeˇ byaˆ yuˇ kʼoꞈ-awˇ, shuiˇ maˇ byaˆ tseˇ byaˆ ahˇ-eu gʼaˬ-ahˇ biꞈ nehˬ-awˬ.’

²⁵Ehˇ kʼawꞈ, aˬ yawꞈ maꞈ ehˇ-eu, ‘Sahˬ paˬ-oˇ, aˬ yawꞈ shuiˇ maˇ byaˆ tseˇ byaˆ ahˇ-eu beu tawˇ.’

²⁶Aˬ yawꞈ ehˇ-eu, ‘Ngaˇ naw maꞈ-ahˇ ehˇ nehˬ nyaˇ. Jaˆ-eu tsawˇ haˬ yawˬ gʼaˬ na luꞈ-ahˇ paˇ biꞈ lahˬ nehˬ tehꞈ-a. Maˬ jaˆ-eu tsawˇ haˬ-aˬ, maˬ jaˆ kʼaˇ jaˆ-eu dawˬ tawˆ luꞈ bi yuˇ jiˇ tehꞈ-a.

²⁷Ngaˇ uˆ lahˇ-eu uˬ moˆ maˬ jawˇ mawꞈ-eu ngaˬ-ahˇ muiˇ-eu tsawˇ haˬ deuˬ-ahˇ-aˬ, heu gaˇ sheuˬ laꞈ-awˇ, ngaˬ-euˬ mehˬ shi sehꞈ dzeh-awˬ.”’

²⁸Yeˬsuˇ kʼoeˇ loꞈ-ehˇ ehˇ gʼaˬ ngeh, aˬ yawꞈ maꞈ-euˬ mehˬ hu Yeˬluˇsaˬlehˬ meuˬ-ahˇ aˬ yawꞈ le tawˬ-euˬ meh.

²⁹Saˬloˬ gawˬ jawˬ-ahˇ jaˆ-eu Behˬpaˇgeˬ pu hawˇ-eu Beˬtaˬniˇ pu dawˬ peh aˬ yawꞈ le keuˆ ngeh, aˬ yawꞈ-euˬ zaˬ lahˇ nyiˬ gʼaˬ-ahˇ mehˬ hu paw pyehˬ gʼeh-euˬ meh.

³⁰Zaˬ lahˇ kʼoeˇ nyiˬ gʼaˬ-ahˇ heu loꞈ-ehˇ mehˬ nehˬ-awˇ bi le-euˬ meh. “Naw nyaꞈ-euˬ mehˬ hu jaˆ-eu pu kʼoeˇ pu-ahˇ le-awˬ. Naw nyaꞈ pu-ahˇ uˇ leˇ-eu nehˬ-ehˇ, tsawˇ haˬ tiˬ gʼaˬ-iˬ maˬ dziˬ haw-euˬ mahˬ tahˬ laˆ zaˬ tiˬ mawˇ paꞈ tawꞈ taˬ-awˇ jawˇ gaˇ ya mawˇ tehꞈ-a. Aˇ caˆ tseuˆ puiˇ-awˇ heu gaˇ tsahˇ kʼoꞈ leꞈ-awˬ.

³¹Tsawˇ haˬ tiˬ gʼaˬ na, ‘Aˬ jeˬ miˇ neh mahˬ tahˬ laˆ aˇ caˆ tseuˆ puiˇ te’ lehˇ ehˇ laˇ naˇ, ‘Sahˬpaˬ loˬ-eu meh’ lehˇ ehˇ nehˬ-awˬ.”

³²Aˬ yawꞈ nyaꞈ le ngeh, yawˬ jeˬ na luꞈ Yeˬsuˇ neh kʼaˇ ehˇ-euˬ loꞈ-ehˇ jaˆ gaˇ ya mawˇ-euˬ meh.

³³Aˬ yawꞈ nyaꞈ mahˬ tahˬ laˆ aˇ caˆ tseuˆ puiˇ ngeh, “Naw nyaꞈ aˬ jeˬ miˇ neh mahˬ tahˬ laˆ aˇ caˆ tseuˆ puiˇ te” lehˇ, yaw sahˇ gʼaˬ ehˇ-eu meh.

³⁴“Sahˬpaˬ loˬeu meh” lehˇ, aˬ yawꞈ nyaꞈ ehˇ kʼoꞈ nehˬ-euˬ meh.

³⁵Kʼoeˇ naˇ, mahˬ tahˬ laˆ zaˬ kʼoeˇ mawˇ-ahˇ Yeˬsuˇ jawˇ gaˇ tsahˇ kʼoꞈ leꞈ-awˇ, aˬ yawꞈ maꞈ-euˬ mehˬ tsoeˬ mahˬ tahˬ laˆ kʼoeˇ taˆ lehˆ kʼawˬ-awˇ, Yeˬsuˇ bi dziˬ-euˬ meh.

³⁶Aˬ yawꞈ mahˬ tahˬ laˆ dziˬ-awˇ le luꞈ ngeh, aˬ yawꞈ maꞈ-euˬ mehˬ tsoeˬ lehˆ-awˇ gaˇ ma-ahˇ kʼawˬ nehˬ-euˬ meh.

³⁷Yeˬluˇsaˬlehˬ meuˬ dawˬ peh le keuˆ-awˇ, Saˬloˬ gawˬ jawˬ iˇ ka ngeh, zaˬ lahˇ deuˬ baˬ maꞈ maꞈ lah-ehˇ laˬ kʼaˬ cehˇ dui dui-awˇ, aˬ yawꞈ maꞈ neh ya mawˇ-euˬ huiˬ dui dui-eu gaˇ kʼoeˇ deuˬ gʼaˇ duˬ, yaw kʼaˆ-ehˇ guˇ guˇ-ehˇ Miˬyehˇ-ahˇ ja ceuˬ-euˬ meh.

³⁸“Sahˬpaˬ Miˬyehˇ-euˬ tsawˇ myahˇ uˬ moˆ oe-euˬ sahˬ paˬ guiˬ lahˬ huiˬ luꞈ-uˇ. Mˬ kʼoeˇ taˆ nui saˇ oꞈ-eu jeˬ jaˆ-awˇ, yaw goˇ jawˇ-eu Miˬyehˇ yaw shehꞈ kʼahˬ sehˇ huiˬ luꞈ-uˇ.”

³⁹Kʼoeˇ ngeh, tsawˇ haˬ aˇ maꞈ laꞈ kʼoeˇ ahˇ-eu Paˬliˬsehˇ tiˬ paˆ na deuˬ Yeˬsuˇ-ahˇ ehˇ-eu, “Saˬ laˬ-oˇ, nawˬ-euˬ zaˬ lahˇ deuˬ-ahˇ yaw kʼaˆ-ehˇ taˬ guˇ lehˇ dehˬ-awˬ.”

⁴⁰Yeˬsuˇ ehˇ-eu, “Ngaˇ naw maꞈ-ahˇ ehˇ nehˬ nyaˇ. Tsawˇ haˬ heu deuˬ maˬ guˇ-ehˇ naˬ leˇ naˇ, kʼaˬ lo deuˬ guˇ laˇ tehꞈ-a.”

⁴¹Aˬ yawꞈ meuˬ dawˬ peh le keuˆ-awˇ, meuˬ-ahˇ ya mawˇ ngeh, meuˬ-euˬ gʼaˇ duˬ tsawˇ ngoeˇ ngoeˇ-awˇ,

⁴²heu loꞈ-ehˇ ehˇ-eu meh. “Yeˬluˇsaˬlehˬ meuˬ-oˇ, nawˬ-ahˇ nui saˇ oꞈ-eu jeˬ biꞈ nya-eu aˬ jeˬ-a lehˇ iˬ nah nawˇ siˬ nya law nmˇ-aˬ, muiˬ dui dui meh. Ehˇ kʼawꞈ, kʼoeˇ jeˬ-ahˇ nymˬ-mˇ nawˇ maˬ mawˇ-a.

⁴³Nawˬ-ahˇ muiˇ-eu deuˬ nawˬ-euˬ tiˬ jawˬ taˆ ciˬ goˇ-awˇ loꞈ jawˬ-eu laꞈ kʼoeˇ, yawˬ paw na luꞈ tah uˇ le-eu aˇ nah keuˆ le tehꞈ-a.

⁴⁴Nawˇ hawˇ-eu nawˬ-euˬ meuˬ lahˇ laꞈ kʼoeˇ jawˇ-eu tsawˇ haˬ deuˬ-ahˇ, geuꞈ-eu jeˬ maˬ ahˇ-ehˇ pyeuꞈ-iˇ ngeh keuˆ ni a yawꞈ maꞈ laˆ cawˆ jiˇ tehꞈ-a. Kʼaˬ lo tsaˬ byaˆ deuˬ tiˬ siˬ kʼoeˇ taˆ tiˬ siˬ maˬ jaˆ coeˇ gaˇ keuˆ ni aˬ yawꞈ maꞈ jahˇ tehꞈ-a. Aˬ jeˬ miˇ neh ehˇ naˇ, Miˬyehˇ nawˬ-ahˇ ka kʼoꞈ le-eu lehˇ oe yaꞈ-euˬ aˇ yamˬ-ahˇ nawˇ maˬ siˬ nya-aˬ.”

⁴⁵Kʼoeˇ naˇ, Uˬ duˬ tahˬ nymˇ nymˇ ma-ahˇ Yeˬsuˇ uˇ leˇ-awˇ, myawˬ ahˬ-eu tsawˇ haˬ deuˬ-ahˇ teh doˆ-euˬ meh.

⁴⁶Aˬ yawꞈ maꞈ-ahˇ aˬ yawꞈ ehˇ nehˬ-eu, “‘Ngaˬ-euˬ Uˬ duˬ tahˬ nymˇ nymˇ ma-ahˇ guiˬ lahˇ shaˇ-eu nymˇ lehˇ kuˇ tehꞈ-a’ lehˇ, Miˬyehˇ neh ehˇ taˬ-euˬ dawˬ Jaˇliꞈ laꞈ kʼoeˇ boꞈ taˬ-euˬ meh. Ehˇ kʼawꞈ, smˇ kʼoeˬ tahˇ joe deuˬ-euˬ baˇ shmˇ duˬ pyeuꞈ-iˇ ni naw maꞈ jahˇ luꞈ-eu ngaˇ.”

⁴⁷Yawˬ nah na luꞈ, Uˬ duˬ tahˬ nymˇ nymˇ ma laꞈ kʼoeˇ Yeˬsuˇ mehˬ nehˬ tsoˆ nehˬ-euˬ meh. Piˇ ma aˬ yuiꞈ deuˬ, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu, miˇ kʼahˬ zaˬ-euˬ aˬ yuiꞈ aˬ tsu deuˬ, aˬ yawꞈ-ahˇ sehꞈ mawꞈ-eu meh.

⁴⁸Ehˇ kʼawꞈ, aˬ yawꞈ maꞈ tiˬ jeˬ-iˬ maˬ gʼeh nya-a. Aˬ jeˬ miˇ neh ehˇ naˇ, tsawˇ haˬ dawˬ tawˆ luꞈ aˬ yawꞈ-euˬ dawˬ-ahˇ naˇ haˬ mawꞈ dui dui-awˇ, tiˬ dawˬ-iˬ maˬ bi ga ka yaꞈ mawꞈ-a.