Read Akha Luˇkaꞈ 20 Bible Online

Luˇkaꞈ 20 - Akha bible

Luˇkaꞈ 20

¹Tiˬ nah-aˬ, Yeˬsuˇ Uˬ duˬ tahˬ nymˇ nymˇ ma laꞈ kʼoeˇ mehˬ-awˇ tsoˆ-awˇ, Laˬ kʼaˬ cehˇ-eu Guiˬ lahˬ dawˬ mehˬ luꞈ ngeh, piˇ ma aˬ yuiꞈ deuˬ, Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu, aˬ yuiꞈ aˬ tsu deuˬ aˬ yawꞈ jawˇ gaˇ laˇ-awˇ ehˇ-eu,

²“Nawˇ aˬ gaˇ-euˬ baoˬ-ahˇ gʼoe-awˇ teu loꞈ-ehˇ mˇ te. Baoˬ teu aˬ suˇ gʼaˬ neh nawˬ-ahˇ biꞈ laꞈ-euˬ ta lehˇ nga maꞈ-ahˇ ehˇ nehˬ laꞈ sheˇ.”

³Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˇ gʼeh naw maꞈ-ahˇ tiˬ dawˬ naˇ haˬ la. Naw maꞈ ehˇ haw sheˇ.

⁴Yoˇhaˬ iˇ cuꞈ shawˇ-eu kʼoeˇ aˬ gaˇ-euˬ baoˬ za-awˇ mˇ ta. Miˬyehˇ neh bi mˇ taˬ loˇ. Tsawˇ haˬ neh bi mˇ taˬ loˇ.”

⁵Aˬ yawꞈ maꞈ yaw kaˬ heu loꞈ-ehˇ bawˬ dzaˬ-euˬ meh. “‘Miˬyehˇ neh bi mˇ-euˬ meh’ lehˇ aˬ dui maꞈ ehˇ naˇ, ‘Toˆ-ehˇ maˇ-iˬ naw maꞈ aˬ jeˬ miˇ neh Yoˇhaˬ-ahˇ maˬ jah te’ lehˇ aˬ yawꞈ ehˇ laˇ tehꞈ-a.

⁶‘Tsawˇ haˬ zaˬ neh bi mˇ-euˬ meh’ lehˇ paˇ ehˇ naˇ kʼawꞈ, tsawˇ haˬ dawˬ tawˆ luꞈ aˬ dui maꞈ-ahˇ kʼaˬ lo biˬ laˇ tehꞈ-a. Aˬ jeˬ miˇ neh ehˇ naˇ, Yoˇhaˬ-aˬ, Miˬyehˇ gʼaˇ duˬ ngehˬ dah-eu tsawˇ haˬ meh lehˇ aˬ yawꞈ maꞈ jah duˬ taˬ-euˬ beu tawˇ.”

⁷Kʼoeˇ miˇ neh aˬ yawꞈ maꞈ Yeˬsuˇ-ahˇ ehˇ kʼoꞈ nehˬ-eu, “Aˬ gaˇ-euˬ baoˬ neh aˬ yawꞈ iˇ cuꞈ shawˇ-eu gaˇ kawˆ nga maꞈ maˬ siˬ.”

⁸Yeˬsuˇ aˬ yawꞈ maꞈ-ahˇ ehˇ nehˬ-eu, “Toˆ-ehˇ ngeuˇ naˇ, aˬ gaˇ-euˬ baoˬ-ahˇ gʼoe-awˇ ngaˇ heu loꞈ-ehˇ mˇ luꞈ-eu gaˇ kawˆ, naw maꞈ-ahˇ ngaˇ maˬ ehˇ nehˬ.”

⁹Kʼoeˇ naˇ, tsawˇ haˬ kʼoeˇ deuˬ-ahˇ yaw jeˬ ma jeˬ heu hmˬ Yeˬsuˇ ja mehˬ nehˬ-euˬ meh. “Tsawˇ haˬ tiˬ gʼaˬ aˬ gaꞈ gaꞈ yaˇ tiˬ yaˇ yaˇ-awˇ, yaˇ kmˇ mˇ-eu deuˬ-ahˇ mˇ paˆ bi paˆ yaꞈ-awˇ, yawˬ kʼahˬ yawˬ miˇ yawˬ-ahˇ gʼawˬ myahˇ ni jawˇ-iˇ-euˬ meh.

¹⁰Aˬ gaꞈ aˇ siˬ pyaˆ yamˬ tsaˬ laˇ ngeh, yaˇ kmˇ mˇ paˆ paˆ-eu deuˬ jawˇ gaˇ aˬ yawꞈ-euˬ zaˬ kʼaˆ tiˬ gʼaˬ kʼehˇ gʼeh-awˇ, aˬ yawꞈ-ahˇ oꞈ-eu aˬ gaꞈ aˇ siˬ bi pi laˬ-iˇ-euˬ meh. Ehˇ kʼawꞈ, yaˇ kmˇ mˇ paˆ paˆ-eu tsawˇ haˬ kʼoeˇ deuˬ zaˬ kʼaˆ kʼoeˇ gʼaˬ-ahˇ diˬ-awˇ, tiˬ jeˬ-iˬ maˬ biꞈ ni bi gʼoꞈ leˇ-euˬ meh.

¹¹Zaˬ kʼaˆ yawˬ gʼaˬ yawˬ paˇ pyehˬ gʼeh-euˬ meh. Kʼoeˇ gʼaˬ-ahˇ kʼawꞈ, aˬ yawꞈ maꞈ diˬ-awˇ, shaꞈ dawˇ dui dui paˬ-ehˇ jahˇ nehˬ-awˇ, yawꞈ ngehꞈ-ehˇ bi gʼoꞈ leˇ-euˬ meh.

¹²Zaˬ kʼaˆ smˇ gʼaˬ tiˬ gʼaˬ paˇ pyehˬ gʼeh-euˬ meh. Kʼoeˇ gʼaˬ-ahˇ kʼawꞈ diˬ-awˇ, yaˇ kmˇ laꞈ nyiˇ baꞈ dzeh-euˬ meh.

¹³Kʼoeˇ ngeh, aˬ gaꞈ yaˇ kmˇ-euˬ yaw sahˇ kʼoeˇ gʼaˬ ehˇ-eu, ‘Ngaˇ aˬ joˆ-ehˇ jahˇ paˬ nga. Ngaˇ gaˬ-eu ngaˬ li-ahˇ kʼehˇ gʼeh ma. Aˬ yawꞈ-ahˇ maˇ diˇ-aˬ, aˬ yawꞈ maꞈ yaw zeu baw-eu duˇ.’

¹⁴Ehˇ kʼawꞈ, yaˇ kmˇ mˇ paˆ paˆ-eu tsawˇ haˬ kʼoeˇ deuˬ aˬ yawꞈ-ahˇ mawˇ ngeh heu loꞈ-ehˇ ehˇ-eu meh. ‘Heu gʼaˬ-aˬ, aˬ gaꞈ yaˇ kmˇ yaw sahˇ-euˬ aˬ li ngaˇ. Aˬ dui maꞈ aˬ yawꞈ-ahˇ sehꞈ kaˇ-euˇ. Aˬ yawꞈ-ahˇ oꞈ-eu jeˬ biˇ a dui za tehꞈ-a’ lehˇ ehˇ-eu meh.

¹⁵Kʼoeˇ naˇ, aˬ yawꞈ maꞈ aˬ yawꞈ-ahˇ aˬ gaꞈ yaˇ kmˇ laꞈ nyiˇ biˬ doˆ-awˇ sehꞈ-euˬ meh. “Kʼoeˇ ngeh jawˇ, aˬ gaꞈ yaˇ kmˇ-euˬ yaw sahˇ kʼoeˇ gʼaˬ aˬ yawꞈ maꞈ-ahˇ aˬ joˆ-ehˇ jahˇ nehˬ nmˇ.

¹⁶Aˬ yawꞈ oe-awˇ, aˬ gaꞈ yaˇ kmˇ mˇ paˆ paˆ-eu tsawˇ haˬ kʼoeˇ deuˬ-ahˇ sehꞈ-awˇ, yawˬ deuˬ yawˬ-ahˇ aˬ gaꞈ yaˇ kmˇ kʼoeˇ kmˇ a nehˬ-awˇ paˇ bi mˇ tehꞈ-a.” Yeˬsuˇ kʼoeˇ loꞈ-ehˇ ehˇ gaˇ tsawˇ haˬ kʼoeˇ deuˬ ya gaˬ ngeh, “Kʼoeˇ loꞈ-ehˇ maˬ pyeuꞈ laˇ kʼmˬ-aˇ’ lehˇ ehˇ-eu meh.

¹⁷Yeˬsuˇ aˬ yawꞈ maꞈ-ahˇ haw-awˇ ehˇ-eu, “Toˆ-ehˇ maˇ-iˬ, Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ kʼoeˇ, aˬ jeˬ-ahˇ ehˇ mawꞈ ta. ‘Nymˇ gawˬ-eu deuˬ maˬ geuꞈ nahˇ-ehˇ, baꞈ dzeh taˬ-euˬ kʼaˬ lo kʼoeˇ siˬ, kʼaˬ lo dawˬ tawˆ maˬ tseˇ poeˬ-eu, laꞈ coeˇ lo ziꞈ[28] pyeuꞈ laˇ-euˬ meh.’

¹⁸Kʼaˬ lo kʼoeˇ siˬ kʼoeˇ taˆ kʼaˇ ga daˆ-eu tsawˇ haˬ kʼehꞈ-iˇ kʼoeˆ-iˇ tehꞈ-a. Kʼaˬ lo kʼoeˇ siˬ neh kʼaˇ bi ga daˆ-euˬ tsawˇ haˬ pyehˆ-iˇ tehꞈ-a.”

¹⁹Zahˇ dawˬ kʼoꞈ dawˬ mehˬ-eu saˬ laˬ deuˬ hawˇ-eu piˇ ma aˬ yuiꞈ deuˬ, Yeˬsuˇ-ahˇ tiˬ poˆ tehꞈ-ehˇ nyehꞈ-eu lehˇ gʼeh-eu meh. Aˬ jeˬ miˇ neh ehˇ naˇ, aˬ yawꞈ yaw jeˬ ma jeˬ ja-eu kʼoeˇ aˬ yawꞈ maꞈ-ahˇ ehˇ mawꞈ-eu meh lehˇ, aˬ yawꞈ maꞈ gʼoˆ siˬ-euˬ meh. Ehˇ kʼawꞈ, tsawˇ haˬ aˇ maꞈ-ahˇ aˬ yawꞈ maꞈ guˆ-eu miˇ neh maˬ nyehꞈ peuˬ-a.

²⁰Kʼoeˇ miˇ neh, aˬ myah yehꞈ laˇ nga lehˇ aˬ yawꞈ maꞈ jawˬ luꞈ-eu meh. Kʼoeˬ sho-eu tsawˇ haˬ kʼehˇ-awˇ, tsawˇ haˬ yaw muiˬ bi geuꞈ-awˇ bi iˇ-euˬ meh. Yeˬsuˇ dawˬ ngehˬ bahˬ gaˇ nyehꞈ-awˇ, miˇ kʼahˬ kʼoeˇ kʼahˬ-ahˇ uˆ lahˇ-eu Loˇmaˆ sahˬ paˬ-euˬ laꞈ-ahˇ bi a nehˬ-eu gʼaˇ duˬ, aˬ yawꞈ maꞈ-ahˇ kʼehˇ gʼeh-euˬ meh.

²¹Aˬ yawꞈ maꞈ Yeˬsuˇ-ahˇ ehˇ-eu, “Saˬ laˬ-oˇ, nawˇ dawˇ coe ni ngehˬ-awˇ tmˇ-awˇ, dawˇ coe ni mehˬ-eu tsoˆ-eu tsawˇ haˬ meh lehˇ nga maꞈ siˬ nya ma. Nawˇ tsawˇ haˬ zaˬ-euˬ myaˆ pyawˬ-ahˇ maˬ haw ni, Miˬyehˇ-euˬ nui kʼahˇ dawˇ coe ni mehˬ-eu meh.

²²Loˇmaˆ sahˬ paˬ-ahˇ kawˬ doˆ nehˬ-eu, aˬ dui-euˬ Zahˇ dawˬ kʼoꞈ dawˬ-ahˇ bahˬ meh loˇ, maˬ bahˬ-a loˇ lehˇ tiˬ poˆ ehˇ nehˬ laꞈ sheˇ.”

²³Ehˇ kʼawꞈ, aˬ yawꞈ maꞈ tsawˇ gahˇ gahˇ gaˇ Yeˬsuˇ haw siˬ-awˇ, heu loꞈ-ehˇ ehˇ nehˬ-euˬ meh.

²⁴“Ngaˬ-ahˇ pyuˇ maˇ byaˆ tiˬ byaˆ bi haw laꞈ sheˇ. Heu gaˇ ahˇ-eu heu aˬ suˇ gʼaˬ-euˬ aˇ baˇ hawˇ-eu tsawˇ myahˇ nga.” Aˬ yawꞈ maꞈ ehˇ-eu, “Loˇmaˆ sahˬ paˬ-euˬ aˇ baˇ meh.”

²⁵Yeˬsuˇ aˬ yawꞈ maꞈ-ahˇ ehˇ nehˬ-eu, “Toˆ-ehˇ ngeuˇ naˇ, Loˇmaˆ sahˬ paˬ-euˬ myawˬ Loˇmaˆ sahˬ paˬ-ahˇ biꞈ-awˇ, Miˬyehˇ-euˬ myawˬ Miˬyehˇ-ahˇ biꞈ-awˬ.”

²⁶Tsawˇ haˬ aˇ maꞈ mehˬ shi Yeˬsuˇ dawˬ ngehˬ bahˬ ni aˬ yawꞈ maꞈ maˬ jahˇ nya-eu miˇ neh, Yeˬsuˇ-ahˇ aˬ yawꞈ maꞈ maˬ nyehꞈ nya-a. Ehˇ kʼawꞈ, Yeˬsuˇ neh ehˇ-euˬ dawˬ-ahˇ zahˬ leˇ-awˇ, ciˬ cuˇ ni jawˇ-euˬ meh.

²⁷Shiˇ-euˬ tsawˇ haˬ maˬ gʼoꞈ dehꞈ laˇ nya-aˇ lehˇ ehˇ-eu Saˬduˬgehˇ deuˬ Yeˬsuˇ jawˇ gaˇ laˇ-awˇ,

²⁸heu loꞈ-ehˇ naˇ haˬ-euˬ meh. “Saˬ laˬ-oˇ, Moˇseˬ neh nga maꞈ gʼaˇ duˬ boꞈ taˬ yaꞈ-euˬ zahˇ dawˬ kʼoꞈ dawˬ heu loꞈ-ehˇ jaˆ-eu meh. ‘Tsawˇ haˬ tiˬ gʼaˬ miˬ zaˬ sheuˬ-awˇ, zaˬ maˬ jawˇ le mi naˆ-ehˇ shiˇ naˇ, aˬ yawꞈ-euˬ tsuiꞈ maˬ ya bi dahˬ-iˇ ni zaˬ bi jawˇ le-eu gʼaˇ duˬ, aˬ yawꞈ-euˬ miˬ zaˬ-ahˇ aˬ yawꞈ-euˬ aˬ nyiˇ paˇ ya bi sheuˬ meh.’

²⁹Mehˇ nmˇ shiꞈ gʼaˬ jawˇ-eu meh. Aˬ yuiꞈ yuiꞈ saˬ gʼaˬ miˬ zaˬ sheuˬ-awˇ, zaˬ maˬ jawˇ le mi naˆ-ehˇ shiˇ-euˬ meh.

³⁰Kʼoeˇ naˇ, aˬ nyiˇ nyiˬ gʼaˬ tiˬ gʼaˬ paˇ sheuˬ-euˬ meh.

³¹Kʼoeˇ naˇ, aˬ nyiˇ smˇ gʼaˬ tiˬ gʼaˬ paˇ sheuˬ-euˬ meh. Shiꞈ mehˇ nmˇ luꞈ zaˬ miˬ zaˬ kʼoeˇ gʼaˬ-ahˇ sheuˬ-awˇ, zaˬ maˬ jawˇ le ni shiˇ jiˇ-euˬ meh.

³²Aˇ saˬ saˬ laˇ ngeh, zaˬ miˬ zaˬ kʼoeˇ gʼaˬ kʼawꞈ shiˇ-euˬ meh.

³³Shiˇ-euˬ tsawˇ haˬ deuˬ paˇ gʼoꞈ dehꞈ laˇ ngeh nah, zaˬ miˬ zaˬ kʼoeˇ gʼaˬ aˬ geu gʼaˬ-euˬ miˬ zaˬ ya geuꞈ nmˇ. Shiꞈ mehˇ nmˇ luꞈ aˬ yawꞈ-ahˇ sheuˬ-euˬ meh.”

³⁴Aˬ yawꞈ maꞈ-ahˇ Yeˬsuˇ ehˇ nehˬ-eu, “Heu ziˇ-euˬ tsawˇ haˬ deuˬ-aˬ, sheuˬ dahˬ dzaˬ taꞈ-eu meh.

³⁵Ehˇ kʼawꞈ, gʼoꞈ dehꞈ laˇ-eu geuˇ-awˇ, aˬ kaˇ kaˇ ziˇ laꞈ kʼoeˇ ya dehꞈ ya jawˇ-eu tsawˇ haˬ deuˬ-aˬ, sheuˬ dahˬ dzaˬ taꞈ-eu maˬ paˇ baw meh.

³⁶Aˬ yawꞈ maꞈ-aˬ, mˬ taˆ gʼaˬ kʼehˇ loꞈ-ehˇ pyeuꞈ laˇ-awˇ, tiˬ jawˇ-iˬ maˬ shiˇ-a. Aˬ yawꞈ maꞈ shiˇ gʼaˬ-awˇ paˇ gʼoꞈ dehꞈ laˇ-euˬ miˇ neh, Miˬyehˇ-euˬ zaˬ deuˬ pyeuꞈ laˇ-euˬ meh.

³⁷Shiˇ-euˬ tsawˇ haˬ deuˬ aˬ diˇ ya gʼoꞈ dehꞈ laˇ meh. Miˬ dzaˬ doꞈ-eu baw duˆ gaˇ kawˆ boꞈ taˬ-euˬ kʼoeˇ tsahˇ-ahˇ, Moˇseˬ neh SahˬpaˬMiˬyehˇ-ahˇ, ‘Aˬbyaˬhaˬ-euˬ Miˬyehˇ, Iˇtsaˆ-euˬ Miˬyehˇ, Yaˬkoˆ-euˬ Miˬyehˇ’ lehˇ kuˇ-euˬ gaˇ kawˆ boꞈ taˬ-euˬ meh.

³⁸Aˬ yawꞈ-aˬ, shiˇ-euˬ tsawˇ haˬ deuˬ-euˬ Miˬyehˇ maˬ ngeuˇ-a. Dehꞈ luꞈ-eu tsawˇ haˬ deuˬ-euˬ Miˬyehˇ meh. Aˬ jeˬ miˇ neh ehˇ naˇ, aˬ yawꞈ mehˬ shi dawˬ tawˆ luꞈ yaw dehꞈ meh.”

³⁹Zahˇ dawˬ kʼoꞈ dawˬ mehˬ-eu saˬ laˬ tiˬ paˆ na deuˬ ehˇ-eu, “Saˬ laˬ-oˇ, nawˬ neh ehˇ-euˬ tsaˬ dui dui miˇ-a.”

⁴⁰Kʼoeˇ naˇ, aˬ yawꞈ maꞈ aˬ yawꞈ-ahˇ tiˬ jeˬ-iˬ maˬ naˇ haˬ peuˬ-a.

⁴¹Yeˬ suˇ aˬ yawꞈ maꞈ-ahˇ ehˇ nehˬ-eu, “Ka li-aˬ, Daˬbiˇ-euˬ zaˬ meh lehˇ aˬ yawꞈ maꞈ aˬ joˆ-ehˇ ehˇ nya ta.

⁴²Aˬ jeˬ miˇ neh ehˇ naˇ, Daˬbiˇ aˬ yawꞈ neh Ja ceuˬ-eu sahˬ boꞈ laꞈ kʼoeˇ heu loꞈ-ehˇ ehˇ taˬ-euˬ meh. ‘Nawˬ-ahˇ muiˇ-eu tsawˇ haˬ deuˬ-ahˇ, nawˬ-euˬ aˬ kuiˇ pehˬ zaˬ uˬ moˆ, ngaˇ maˬ nyehꞈ uiˬ jiˇ kʼoeˇ keuˆ ni, ngaˬ-euˬ aˇ maˇ paw nuiˇ-awˬ lehˇ, ngaˬ-euˬ sahˬ paˬ kuˇ hawˇ kamˇ-ahˇ SahˬpaˬMiˬyehˇ ehˇ nehˬ-euˬ meh.’

⁴³

⁴⁴Daˬbiˇ-euˬ mawˇ do kʼawꞈ, aˬ yawꞈ-ahˇ sahˬ paˬ lehˇ kuˇ-eu meh. Toˆ-ehˇ ngeuˇ naˇ, Ka li-aˬ, Daˬbiˇ-euˬ zaˬ aˬ joˆ-ehˇ pyeuꞈ nya ta.”

⁴⁵Tsawˇ haˬ dawˬ tawˆ luꞈ naˇ haˬ luꞈ gaˇ, Yeˬsuˇ aˬ yawꞈ-euˬ zaˬ lahˇ deuˬ-ahˇ heu loꞈ-ehˇ ehˇ nehˬ-euˬ meh.

⁴⁶“Pehˇ kʼahˬ pehˇ mahˇ dm dm-ehˇ cah-awˇ, lehˆ lehˆ kawˆ doe ni aˬ cawˬ yaw zeu baw nehˬ-eu jeˬ-ahˇ geuꞈ mawꞈ-eu Zahˇ dawˬ kʼoꞈ dawˬ mehˬ-eu saˬ laˬ deuˬ-ahˇ yahˇ-awˬ. Aˬ yawꞈ maˬ-aˬ, uˬ duˬ tahˬ nymˇ laꞈ kʼoeˇ hawˇ-eu bawˬ-iˬ gʼeh gaˇ, aˬ cawˬ taꞈ-ehˇ muiˬ dzehˬ-eu nuiˇ duˬ deuˬ-ahˇ nuiˇ mawꞈ-eu meh.

⁴⁷Miˬ coeˬ miˬ ma deuˬ-euˬ nymˇ-ahˇ aˬ yawꞈ maꞈ kʼaˆ dzaˬ-awˇ, aˬ cawˬ bi mawˇ-eu gʼaˇ duˬ guiˬ lahˬ gʼawˬ myahˇ ni shaˇ-eu meh. Doeˇ dui dui-eu kʼehˬ-eu kʼaˆ-eu jeˬ-ahˇ aˬ yawꞈ maꞈ ya daˬ tehꞈ-a.”