Read Akha Luˇkaꞈ 24 Bible Online

Luˇkaꞈ 24 - Akha bible

Luˇkaꞈ 24

¹Tiˬ jaw laꞈ kʼoeˇ aˇ dahˬ beh-eu nah[33] uˬ shawˬ yaw naꞈ-ehˇ, zaˬ miˬ zaˬ kʼoeˇ deuˬ aˬ yawꞈ maꞈ neh lehˬ hmˬ taˬ-euˬ tsiˇ yaw saw deuˬ yuˇ-awˇ, lmˬ bymˇ-ahˇ iˇ-euˬ meh.

²Kʼoeˇ ngeh, lmˬ bymˇ lo kʼahˬ-ahˇ ngawˬ tsoeˬ taˬ-euˬ kʼaˬ lo kʼoeˇ siˬ ngawˬ dzeh-awˇ jaˆ gaˇ ya mawˇ-euˬ meh.

³Ehˇ kʼawꞈ, laꞈ kʼoeˇ uˇ-iˇ haw ngeh, Sahˬpaˬ Yeˬsuˇ-euˬ gʼawˇ mawˇ maˬ jaˆ gaˇ ya mawˇ-euˬ meh.

⁴Aˬ yawꞈ maꞈ zahˬ leˇ-awˇ jawˇ ngeh, yaw shehꞈ bya-eu mehˬ tsoeˬ dm luꞈ-eu tsawˇ haˬ nyiˬ gʼaˬ aˬ yawꞈ maꞈ-euˬ dawˬ peh yawꞈ luꞈ gaˇ ya mawˇ-euˬ meh.

⁵Aˬ yawꞈ maꞈ tsawˬ guˆ-iˇ-awˇ, baˬ ba miˇ tsa tuˆ ni awˆ byaˆ gʼeh ngeh, tsawˇ haˬ kʼoeˇ nyiˬ gʼaˬ heu loꞈ-ehˇ ehˇ-eu meh. “Naw maꞈ aˬ jeˬ miˇ neh dehꞈ luꞈ-eu tsawˇ haˬ-ahˇ shiˇ-euˬ deuˬ jawˇ-eu jawˇ duˬ-ahˇ poˆ le teˬ.

⁶Aˬ yawꞈ heu gaˇ maˬ paˇ jawˇ meh. Aˬ yawꞈ gʼoꞈ dehꞈ laˇ gʼaˬ-euˬ meh. Aˬ yawꞈ Gaˬliˬlehˇ miˇ kʼahˬ-ahˇ jawˇ ngeh, naw maꞈ-ahˇ aˬ joˆ-ehˇ ehˇ nehˬ laꞈ-euˬ gaˇ paˇ noeˬ poˆ haw sheˇ.

⁷‘Tsawˇhaˬ-euˬ Zaˬmaˇ-ahˇ iˬ baˇ zaˬ deuˬ-euˬ aˬ laꞈ laꞈ kʼoeˇ a nehˬ-awˇ laꞈ yaꞈ kʼoeˇ taˆ bi taꞈ sehꞈ tehꞈ-a. Ehˇ kʼawꞈ, smˬ nah byah laˇ naˇ, Miˬyehˇ aˬ yawꞈ-ahˇ paˇ bi gʼoꞈ dehꞈ laˇ tehꞈ-a’ lehˇ ehˇ nehˬ laꞈ-euˬ maˬ ngeuˇ-a loˇ.”

⁸Kʼoeˇ ngeh, zaˬ miˬ zaˬ kʼoeˇ deuˬ aˬ yawꞈ neh ehˇ-euˬ dawˬ kʼoeˇ dawˬ-ahˇ noeˬ doˆ leˇ-euˬ meh.

⁹Kʼoeˇ naˇ, lmˬ bymˇ-ahˇ neh gʼoꞈ leˇ-awˇ, Gʼaˬ kʼehˇ tseˇ nyiꞈ gʼaˬ hawˇ-eu nui deuˬ dawˬ tawˆ luꞈ-ahˇ, gaˇ kawˆ kʼoeˇ deuˬ dzawˇ mehˬ nehˬ-euˬ meh.

¹⁰Zaˬ miˬ zaˬ kʼoeˇ deuˬ-aˬ, Maˬliˇ Maˬgaˬdaˬlaˇ, Yoˇaˬnaˆ, Yaˬkoˆ-euˬ aˬ ma Maˬliˇ aˬ ha maꞈ meh. Aˬ yawꞈ maꞈ hawˇ-eu aˬ yawꞈ maꞈ nehˬ-ehˇ jawˇ-eu zaˬ miˬ zaˬ nui deuˬ neh, Gʼaˬ kʼehˇ deuˬ-ahˇ gaˇ kawˆ kʼoeˇ deuˬ dzawˇ nehˬ-euˬ meh.

¹¹Ehˇ kʼawꞈ, maˬ ngeuˇ gaˇ ehˇ-eu nga lehˇ noeˬ-awˇ, Gʼaˬ kʼehˇdeuˬ maˬ jah-a.

¹²Ehˇ kʼawꞈ, Beˬtuˆluˆ tsawˬ tuˇ-awˇ, lmˬ bymˇ-ahˇ cehˆ gʼeh-euˬ meh. Aˬ yawꞈ awˆ kʼoꞈ-awˇ haw ngeh, mawˇ tawˆ saˬ paˇ tehꞈ-ehˇ jaˆ yaꞈ-euˬ gaˇ ya mawˇ-euˬ meh. Aˬ yawꞈ zahˬ leˇ-awˇ gʼoꞈ-iˇ-euˬ meh.[34]

¹³Aˬ yawꞈ kʼoeˇ ngeh nah-ahˇ, Yeˬsuˇ mehˬ nah caw teh-euˬ tsawˇ haˬ nyiˬ gʼaˬ, Yeˬluˇsaˬlehˬ meuˬ-ahˇ neh shiꞈ laˇ byah ni kaˬ-eu Eˇmawꞈ pu-ahˇ iˇ-euˬ meh.

¹⁴Aˬ yawꞈ nyaꞈ Yeˬsuˇ-ahˇ taꞈ sehꞈ-euˬ gaˇ kawˆ kʼoeˇ deuˬ ja ja-ehˇ iˇ luꞈ-eu meh.

¹⁵Kʼoeˇ loꞈ-ehˇ ja ja-ehˇ iˇ luꞈ ngeh, Yeˬsuˇ aˬ yawꞈ nyaꞈ jawˇ gaˇ oe-awˇ, tiˬ kawˆ loꞈ-ehˇ iˇ-euˬ meh.

¹⁶Ehˇ kʼawꞈ, aˬ yawꞈ nyaꞈ-euˬ myaˆ nuiˆ dehˬ kaˬ taˬ-euˬ loꞈ-ehˇ pyeuꞈ-awˇ, aˬ yawꞈ-ahˇ maˬ haw siˬ nya-a.

¹⁷“Naw nyaꞈ aˬ jeˬ gaˇ kawˆ ja ja-ehˇ cah te” lehˇ Yeˬsuˇ ehˇ nehˬ-euˬ meh. Aˬ yawꞈ nyaꞈ naˬ leˇ-awˇ, myaˆ pyawˬ nyoeˬ kʼeuˇ ni yawꞈ luꞈ-eu meh.

¹⁸Kʼoeˇ naˇ, aˬ yawꞈ nyaꞈ laꞈ kʼoeˇ, Gaˬloˇpaˇ lehˇ myahˇ-euˬ gʼaˬ Yeˬsuˇ-ahˇ ehˇ-eu, “Yeˬluˇsaˬlehˬ meuˬ-ahˇ le-awˇ, nymˬ-mˇ heu myaˆ nah-ahˇ kʼoeˇ gaˇ aˬ jeˬ pyeuꞈ yaꞈ-euˬ gaˇ kawˆ maˬ siˬ nya-eu, nawˇ maˬ ngeuˇ aˬ suˇ gʼaˬ jawˇ nga jeˇ.”

¹⁹Yeˬ suˇ ehˇ-eu, “Aˬ jeˬ gaˇ kawˆ-a.” Aˬ yawꞈ nyaꞈ ehˇ-eu. “Naˬzaˬlehˇ tsawˇ haˬ Yeˬsuˇ-euˬ gaˇ kawˆ tawˇ. Aˬ yawꞈ-aˬ, Miˬyehˇ hawˇ-eu tsawˇ haˬ dawˬ tawˆ luꞈ-euˬ mehˬ shi, mˇ-eu shaˇ-eu ngehˬ-eu tmˇ-eu baoˬ huiˬ dui dui-eu, Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ meh.

²⁰Aˬ yawꞈ-ahˇ sehꞈ-eu lehˇ yaˇ kʼaˬ bi daˇ tsehˆ-eu gʼaˇ duˬ, nga maꞈ-euˬ piˇ ma aˬ yuiꞈ deuˬ hawˇ-eu sahˬ paˬ sahˬ ma deuˬ neh a dzeh nehˬ-awˇ, laꞈ yaꞈ kʼoeˇ taˆ bi taꞈ sehꞈ-euˬ meh.

²¹Aˬ yawꞈ Iˇsaˬleˬlaˆ tsawˇ jeuˬ-ahˇ ka kʼoꞈ tehꞈ-a lehˇ nga maꞈ jah-euˬ ma. Kʼoeˇ uˬ taꞈ, kʼoeˇ loꞈ-ehˇ pyeuꞈ dzeuˇ yaꞈ-euˬ smˬ nah byah laˇ-euˬ meh.

²²Kʼoeˇ naˇ, nga maꞈ-euˬ aˇ muˇ-ahˇ taꞈ-eu zaˬ miˬ zaˬ tiˬ deuˬ nga maꞈ zahˬ leˇ paˬ-ehˇ paˇ ja-eu meh. Uˬ shawˬ yaw naꞈ-ehˇ aˬ yawꞈ maꞈ lmˬ bymˇ-ahˇ iˇ-euˬ nga.

²³Ehˇ kʼawꞈ, Yeˬsuˇ-euˬ gʼawˇ mawˇ maˬ jaˆ gaˇ mawˇ yaꞈ-awˇ, kʼoeˇ naˇ, yaw sahˇ laꞈ kʼoeˇ mˬ taˆ gʼaˬ kʼehˇ-ahˇ aˬ yawꞈ maꞈ paˇ mawˇ-awˇ, Yeˬsuˇ dehꞈ luꞈ meh lehˇ, mˬ taˆ gʼaˬ kʼehˇ neh aˬ yawꞈ maꞈ-ahˇ ehˇ nehˬ laꞈ-euˬ meh lehˇ ja-eu meh.

²⁴Nga maꞈ-euˬ tsawˇ haˬ tiˬ paˆ na deuˬ lmˬ bymˇ-ahˇ iˇ haw ngeh, zaˬ miˬ zaˬ kʼoeˇ deuˬ neh kʼaˇ ehˇ-euˬ loꞈ-ehˇ jaˆ-awˇ, aˬ yawꞈ-ahˇ maˬ ya mawˇ-aˬ jeˇ.”

²⁵Kʼoeˇ ngeh jawˇ, aˬ yawꞈ nyaꞈ-ahˇ Yeˬsuˇ ehˇ nehˬ-eu, “Dawˇ ga-oˇ, Miˬyehˇ gʼaˇ duˬ ngehˬ dah-eu tsawˇ haˬ deuˬ neh kʼaˇ ehˇ taˬ-euˬ dawˬ tawˆ luꞈ-ahˇ jah tuˆ leꞈ-eu gʼaˇ duˬ, aˇ naˆ naˆ-ehˇ ga-eu nya.

²⁶Ka li aˬ yawꞈ yaw shehꞈ kʼahˬ sehˇ laꞈ kʼoeˇ uˇ leˇ nya ni, kʼoeˇ deuˬ-ahˇ jeˬ huˬ ya daˬ-eu maˬ ngeuˇ-a loˇ.”

²⁷Kʼoeˇ naˇ, aˬ yawꞈ nyaꞈ-ahˇ Yeˬsuˇ ja shaw nehˬ-euˬ meh. Jaˇliꞈ laꞈ kʼoeˇ aˬ yawꞈ-euˬ gaˇ kawˆ kʼaˇ ehˇ taˬ-euˬ yawˬ jeˬ na luꞈ, Moˇseˬ neh boꞈ-euˬ sahˬ boꞈ deuˬ-ahˇ neh dahˬ beh-awˇ, Miˬyehˇ gʼaˇ duˬ ngeh dah-eu deuˬ neh boꞈ-euˬ sahˬ boꞈ deuˬ-ahˇ keuˆ ni, aˬ yawꞈ nyaꞈ gʼoˆ shaw nya ni Yeˬsuˇ ja mehˬ nehˬ-euˬ meh.

²⁸Aˬ yawꞈ maꞈ iˇ luꞈ-eu pu kʼoeˇ pu-euˬ pu dzeˇ iˇ keuˆ ngeh, Yeˬsuˇ-aˬ, mehˬ hu paw paˇ iˇ-eu lehˇ gʼeh-eu meh.

²⁹Ehˇ kʼawꞈ, aˬ yawꞈ nyaꞈ aˬ yawꞈ-ahˇ gʼeu tehˬ-awˇ, “Nga nyaꞈ nehˬ-ehˇ jawˇ yaꞈ-awˬ. Uˬ ciꞈ ciꞈ le-awˇ zahˇ le shaw-iˬ ngaˇ.” lehˇ ehˇ-eu meh. Kʼoeˇ miˇ neh, aˬ yawꞈ nyaꞈ nehˬ-ehˇ iˇ kahˇ laꞈ kʼoeˇ uˇ leˇ-awˇ yaꞈ-euˬ meh.

³⁰Aˬ yawꞈ nyaꞈ nehˬ-ehˇ hawˬ jawˬ jawˬ leˇ ngeh, aˬ yawꞈ kaˬ muˇ yuˇ-awˇ dawˬ ngehˬ gʼeh nehˬ-euˬ meh. Kʼoeˇ naˇ, ngawˬ pyehˬ-awˇ aˬ yawꞈ nyaꞈ-ahˇ biˇ nehˬ-euˬ meh.

³¹Kʼoeˇ ngeh, aˬ yawꞈ nyaꞈ-euˬ myaˆ nuiˆ pah laˇ-awˇ, aˬ yawꞈ-ahˇ haw siˬ-euˬ meh. Ehˇ kʼawꞈ, aˬ yawꞈ-ahˇ maˬ paˇ ya mawˇ ni byoˆ-iˇ-euˬ meh.

³²Aˬ yawꞈ nyaꞈ yaw kaˬ ehˇ-eu, “Gaˇ pehˇ-ahˇ aˬ yawꞈ aˇ nyaꞈ-ahˇ dawˬ ngehˬ cawˬ laˇ-awˇ Jaˇliꞈ gaˇ kawˆ ja mehˬ nehˬ laꞈ ngeh, nui ma laꞈ kʼoeˇ miˬ dzaˬ doꞈ-eu loꞈ-ehˇ gʼeh law miˇ-a ehˇ lawˬ.”

³³Aˬ yawꞈ nyaꞈ tiˬ poˆ tehꞈ-ehˇ tsawˬ tuˇ-awˇ, Yeˬluˇsaˬlehˬ meuˬ-ahˇ gʼoꞈ leˇ-euˬ meh. Zaˬ lahˇ tseˇ nyiꞈ gʼaˬ hawˇ-eu nui deuˬ uiˬ leˇ taˬ-awˇ jawˇ gaˇ aˬ yawꞈ nyaꞈ ya mawˇ-euˬ meh.

³⁴“Sahˬpaˬ Yeˬsuˇ gʼoꞈ dehꞈ laˇ-euˬ yaw duˬ baw meh. Aˬ yawꞈ-euˬ gʼawˇ mawˇ Siˇmoˬ-ahˇ bi mawˇ le-euˬ meh” lehˇ, aˬ yawꞈ maꞈ ehˇ luꞈ-eu meh.

³⁵Kʼoeˇ ngeh, gaˇ pehˇ-ahˇ pyeuꞈ laˇ-euˬ gaˇ kawˆ maˬ ehˇ, kaˬ muˇ ngawˬ pyehˬ ngeh hawˇ-eu aˬ yawꞈ nyaꞈ aˬ yawꞈ-ahˇ haw siˬ-euˬ gaˇ kawˆ maˬ ehˇ, aˬ yawꞈ maꞈ-ahˇ aˬ yawꞈ nyaꞈ dzawˇ mehˬ nehˬ-euˬ meh.

³⁶Aˬ yawꞈ maꞈ kʼoeˇ loꞈ-ehˇ ja luꞈ ngeh, Yeˬsuˇ aˬ yawꞈ maꞈ-euˬ gʼahˇ ceh yawꞈ le-awˇ, “Naw maꞈ kʼoeˇ taˆ nui saˇ oꞈ-eu jeˬ jaˆ luꞈ-uˇ” lehˇ ehˇ-eu meh.[35]

³⁷Ehˇ kʼawꞈ, aˬ yawꞈ maꞈ zahˬ leˇ-awˇ, tsawˬ guˆ-iˇ-eu laꞈ kʼoeˇ, yaw sahˇ mawˇ le-euˬ nga lehˇ noeˬ-euˬ meh.

³⁸Kʼoeˇ ngeh, aˬ yawꞈ maꞈ-ahˇ aˬ yawꞈ ehˇ nehˬ-eu, “Aˬ jeˬ miˇ neh naw maꞈ nui ma suˬ saˬ-awˇ tsawˬ toeˬ tsawˬ daˆ-ehˇ noeˬ luꞈ te.

³⁹Ngaˬ-euˬ aˬ kuiˇ aˬ laꞈ-ahˇ haw sheˇ. Maˇ maˇ ni ngaˇ ma. Ngaˬ-ahˇ toeˬ haw sawˆ haw-awˇ, haw duˬ sheˇ. Yaw sahˇ ngeuˇ lawˬ naˇ, heu loꞈ-ehˇ shaˬ yoeˬ hawˇ-eu shaˬ jiˇ maˬ baw-aˇ.”

⁴⁰Aˬ yawꞈ kʼoeˇ loꞈ-ehˇ ehˇ gʼaˬ-awˇ, aˬ yawꞈ maꞈ-ahˇ aˬ yawꞈ-euˬ aˬ kuiˇ aˬ laꞈ bi haw-euˬ meh.[36]

⁴¹Aˬ yawꞈ maꞈ zahˬ leˇ-awˇ laˬ kʼaˬ cehˇ dui dui kʼawꞈ, maˬ jah duˬ nya-ehˇ shaˬ luꞈ-eu meh. Kʼoeˇ miˇ neh, “Dzaˬ-eu tiˬ jeˬ paˬ maˬ jaˆ loˇ” lehˇ, aˬ yawꞈ maꞈ-ahˇ aˬ yawꞈ naˇ haˬ-euˬ meh.

⁴²Aˬyawꞈ maꞈ aˬ yawꞈ-ahˇ ngaˬ sha tehˬ ba-euˬ biꞈ nehˬ-euˬ meh.

⁴³Aˬ yawꞈ yuˇ-awˇ, aˬ yawꞈ maꞈ-euˬ mehˬ shi dzaˬ-euˬ meh.

⁴⁴Kʼoeˇ naˇ, aˬ yawꞈ maꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ maˬ ehˇ, Miˬyehˇ gʼaˇ duˬ ngehˬ dah-eu deuˬ neh boꞈ taˬ-euˬ sahˬ boꞈ deuˬ laꞈ kʼoeˇ maˬ ehˇ, Ja ceuˬ-eu sahˬ boꞈ laꞈ kʼoeˇ maˬ ehˇ, ngaˬ-euˬ gaˇ kawˆ boꞈ taˬ-euˬ yawˬ jeˬ na luꞈ, heu loꞈ-ehˇ pyeuꞈ laˇ-awˇ ya byah laˇ meh lehˇ, ngaˇ naw maꞈ nehˬ-ehˇ jawˇ ngeh neh naw maꞈ-ahˇ ehˇ nehˬ-euˬ ma.”

⁴⁵Kʼoeˇ ngeh, Jaˇ liꞈ-ahˇ gʼoˆ shaw nya ni, aˬ yawꞈ maꞈ-euˬ nui ma-ahˇ aˬ yawꞈ pah nehˬ-euˬ meh.

⁴⁶Kʼoeˇ naˇ, aˬ yawꞈ maꞈ-ahˇ heu loꞈ-ehˇ ehˇ nehˬ-euˬ meh. “Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ meh. Ka li-aˬ, sehꞈ gaˇ ya daˬ-awˇ, smˬ nah byah laˇ naˇ, Miˬyehˇ neh paˇ bi gʼoꞈ dehꞈ laˇ tehꞈ-a.

⁴⁷Kʼoeˇ naˇ, Yeˬluˇsaˬlehˬ meuˬ-ahˇ neh dahˬ beh-awˇ, tsawˇ jeuˬ dawˬ tawˆ luꞈ-ahˇ iˬ baˇ noeˬ poˆ-eu gaˇ kawˆ hawˇ-eu, Miˬyehˇ iˬ baˇ pyehˬ nehˬ-eu gaˇ kawˆ, aˬ yawꞈ-euˬ tsawˇ myahˇ uˬ moˆ ya mehˬ nehˬ-iˇ meh lehˇ boꞈ taˬ-euˬ meh.

⁴⁸Naw maꞈ-aˬ, gaˇ kawˆ heu gʼaˇ duˬ saˇ kiˇ ya kamˬ-eu tsawˇ haˬ deuˬ meh.

⁴⁹Ngaˬ Da neh ngaˬ-ahˇ biꞈ taˬ-euˬ saˇ jaˇ dawˬ, naw maꞈ-ahˇ ngaˇ paˇ biꞈ-eu ma. Ehˇ kʼawꞈ, mˬ taˆ-euˬ baoˬ naw maꞈ kʼoeˇ taˆ maˬ keuˆ le kʼoeˇ keuˆ ni, meuˬ laꞈ kʼoeˇ naw maꞈ ya dawˬ tawˬ meh.”

⁵⁰Kʼoeˇ naˇ, Yeˬsuˇ neh aˬ yawꞈ maꞈ-ahˇ Beˬtaˬniˇ pu dawˬ peh keuˆ ni sheuˬ keuˆ gʼeh-awˇ, aˬ laꞈ baꞈ diˇ-awˇ aˬ yawꞈ maꞈ-ahˇ dawˬ ngehˬ gʼeh nehˬ-euˬ meh.

⁵¹Aˬ yawꞈ dawˬ ngehˬ gʼeh nehˬ gʼaˬ ngeh, aˬ yawꞈ maꞈ-ahˇ gʼawˬ-iˇ-awˇ, mˬ kʼoeˇ taˆ bi sheuˬ daˆ kʼoꞈ leꞈ-euˬ meh.[37]

⁵²Aˬ yawꞈ maꞈ aˬ yawꞈ-ahˇ uˬ duˬ tahˬ yaꞈ-awˇ, Yeˬluˇsaˬlehˬ meuˬ-ahˇ laˬ kʼaˬ tiˬ cehˇ gʼoꞈ leˇ-euˬ meh.

⁵³Kʼoeˇ naˇ, aˬ yawꞈ maꞈ Uˬ duˬ tahˬ nymˇ nymˇ ma laꞈ kʼoeˇ tehꞈ-ehˇ Miˬyehˇ-ahˇ ja ceuˬ ja ceuˬ-ehˇ jawˇ-euˬ meh.