Read Akha Luˇkaꞈ 4 Bible Online

Luˇkaꞈ 4 - Akha bible

Luˇkaꞈ 4

¹Yeˬsuˇ-aˬ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu laꞈ kʼoeˇ Yawˇdaˬ lawˇ baˬ-ahˇ neh gʼoꞈ laˇ-awˇ, Yaw sahˇ Miˬyehˇ neh aˬ yawꞈ-ahˇ bawˇ tsahˬ bawˇ dahˇ-ahˇ sheuˬ gʼeh-euˬ meh.

²Kʼoeˇ gaˇ, Nehꞈsahˬpaˬ aˬ yawꞈ-ahˇ muˇ juˇ juˇ gaˇ oeˬ tseˇ nah byah ni ya daˬ-euˬ meh. Aˇ yamˬ kʼoeˇ myah ni gʼeh-eu laꞈ kʼoeˇ, aˬ yawꞈ tiˬ jeˬ-iˬ maˬ dzaˬ-euˬ miˇ neh, aˇ yamˬ kʼoeˇ dzeuˇ ngeh jawˇ, hawˬ mehꞈ mehꞈ dui dui laˇ-euˬ meh.

³Kʼoeˇ ngeh, Nehꞈsahˬpaˬ aˬ yawꞈ-ahˇ ehˇ nehˬ-eu, “Nawˇ Miˬyehˇ-euˬ Zaˬmaˇ pyeuꞈ-eu ngeuˇ naˇ, Kʼaˬ lo heu deuˬ-ahˇ kaˬ muˇ pyeuꞈ laˇ-awˬ lehˇ dawˬ biꞈ-awˬ tawˇ.”

⁴Yeˬsuˇ aˬ yawꞈ-ahˇ ehˇ kʼoꞈ nehˬ-eu, “‘Dzaˬ dzaˬ dawˇ dawˇ baˬ da neh tehꞈ-ehˇ tsawˇ haˬ zaˬ yaw dehꞈ dehꞈ nya-eu maˬ ngeuˇ-a’ lehˇ, Jaˇliꞈ laꞈ kʼoeˇ ehˇ taˬ-euˬ meh.”

⁵Kʼoeˇ naˇ, Nehꞈsahˬpaˬ aˬ yawꞈ-ahˇ yaw goˇ-ahˇ sheuˬ daˆ gʼeh-awˇ, miˇ tsaˬ kʼoeˇ taˆ kʼaˇ jaˆ-eu miˇ kʼahˬ dawˬ tawˆ luꞈ-ahˇ tiˬ kʼehˇ laˇ kʼehˬ bi mawˇ-euˬ meh.

⁶Nehꞈsahˬpaˬ ehˇ-eu, “Miˇ kʼahˬ heu deuˬ-ahˇ uˆ lahˇ-eu baoˬ dawˬ tawˆ luꞈ hawˇ-eu pyuˇ shuiˇ myawˬ gahˬ dawˬ tawˆ luꞈ nawˬ-ahˇ ngaˇ biꞈ ma. Heu deuˬ dawˬ tawˆ luꞈ ngaˬ-ahˇ a nehˬ jiˇ laꞈ-euˬ miˇ neh, ngaˇ kʼaˇ biꞈ mawꞈ-eu gʼaˬ-ahˇ biꞈ nya ma.

⁷Teu miˇ neh, nawˇ ngaˬ-ahˇ uˬ duˬ tahˬ naˇ, dawˬ tawˆ luꞈ nawˬ-euˬ pyeuꞈ laˇ tehꞈ-a.”

⁸Yeˬsuˇ aˬ yawꞈ-ahˇ ehˇ kʼoꞈ nehˬ-eu, “‘Nawˬ-euˬ Miˬyehˇ pyeuꞈ-eu SahˬpaˬMiˬyehˇ-ahˇ tehꞈ-ehˇ nawˇ uˬ duˬ ya tahˬ-awˇ, aˬ yawꞈ-euˬ nui kʼahˇ tehꞈ-ehˇ ya mˇ meh’ lehˇ, Jaˇliꞈ laꞈ kʼoeˇ ehˇ taˬ-euˬ meh.”

⁹Kʼoeˇ naˇ, Nehꞈsahˬpaˬ neh Yeˬsuˇ-ahˇ Yeˬluˇsaˬlehˬ meuˬ-ahˇ sheuˬ gʼeh-awˇ, Uˬ duˬ tahˬ nymˇ nymˇ ma-euˬ goˇ dui dui-eu kʼaˬ boeˬ kʼoeˇ taˆ sheuˬ taˬ-awˇ ehˇ nehˬ-eu, “Nawˇ Miˬyehˇ-euˬ Zaˬmaˇ pyeuꞈ-eu ngeuˇ naˇ, heu gaˇ neh tsawˬ ka haw sheˇ.

¹⁰Aˬ jeˬ miˇ neh ehˇ naˇ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. ‘Nawˬ-ahˇ bi bo saˆ-eu gʼaˇ duˬ, Miˬyehˇ aˬ yawꞈ-euˬ mˬ taˆ gʼaˬ kʼehˇ deuˬ-ahˇ kʼehˇ leꞈ tehꞈ-a.’

¹¹‘Nawˬ-euˬ aˬ kuiˇ kʼaˬ lo-ahˇ maˬ bi ga zaw ni, aˬ yawꞈ maꞈ nawˬ-ahˇ ciˬ tehꞈ-a’ lehˇ kʼawꞈ ehˇ taˬ-euˬ meh.”

¹²Yeˬsuˇ aˬ yawꞈ-ahˇ ehˇ kʼoꞈ nehˬ-eu, “‘Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ maˬ ya lawˬ haw-a’ lehˇ, Jaˇliꞈ laꞈ kʼoeˇ boꞈ taˬ-euˬ meh.”

¹³Nehꞈsahˬpaˬ neh Yeˬsuˇ-ahˇ yawˬ jeˬ na luꞈ lawˬ haw-awˇ muˇ juˇ juˇ gʼaˬ ngeh, Yeˬsuˇ-ahˇ tiˬ kʼehˬ tiˬ yamˬ byehˇ taˬ yaꞈ-awˇ doˆ-iˇ-euˬ meh.

¹⁴Kʼoeˇ naˇ, Gaˬliˬlehˇ miˇ kʼahˬ-ahˇ Yeˬsuˇ gʼoꞈ leˇ-euˬ meh. Muiˬ-eu shawˇ-eu Yaw sahˇ Miˬyehˇ-euˬ baoˬ aˬ yawꞈ kʼoeˇ taˆ jaˆ-euˬ meh. Aˬ yawꞈ-euˬ gaˇ kawˆ miˇ kʼahˬ kʼoeˇ kʼahˬ gaˬ doe-iˇ-euˬ meh.

¹⁵Kʼoeˇ naˇ, uˬ duˬ tahˬ nymˇ laꞈ kʼoeˇ aˬ yawꞈ mehˬ nehˬ tsoˆ nehˬ-awˇ, tsawˇ haˬ yawˬ gʼaˬ na luꞈ aˬ yawꞈ-ahˇ ja ceuˬ-euˬ meh.

¹⁶Kʼoeˇ naˇ, Yeˬsuˇ-aˬ, aˬ yawꞈ huiˬ laˇ-euˬ jawˇ duˬ pyeuꞈ-eu Naˬzaˬlehˇ meuˬ-ahˇ iˇ-awˇ, Jawˇ nah[4] keuˆ laˇ ngeh, aˬ myah myah kʼaˇ daˆ leˇ-euˬ loꞈ-ehˇ, uˬ duˬ tahˬ nymˇ-ahˇ daˆ leˇ-euˬ meh. Aˬ yawꞈ Jaˇliꞈ gui-eu lehˇ tuˇ laˇ ngeh,

¹⁷Miˬyehˇ gʼaˇ duˬ ngehˬ dah-eu Iˇsaˬyaˇ neh boꞈ taˬ-euˬ sahˬ boꞈ aˬ yawꞈ-ahˇ biꞈ nehˬ-euˬ meh. Aˬ yawꞈ sahˬ boꞈ kʼoeˇ yoˆ puiˇ haw ngeh, heu loꞈ-ehˇ boꞈ taˬ-euˬ tsahˇ-ahˇ puiˇ zaˬ-euˬ meh.

¹⁸“Sahˬpaˬ Miˬyehˇ-euˬ Yaw sahˇ-aˬ, ngaˬ-euˬ kʼoeˇ taˆ keuˆ le-euˬ meh. Aˬ jeˬ miˇ neh ehˇ naˇ, shaˬ-eu zahˬ-eu tsawˇ haˬ deuˬ-ahˇ, guiˬ lahˬ dawˬ bi mehˬ-eu gʼaˇ duˬ, aˬ yawꞈ ngaˬ-ahˇ tseˇ doˆ-euˬ meh. paꞈ taˬ-euˬ deuˬ-ahˇ pyehˬ nehˬ-awˇ, myaˆ behꞈ deuˬ myaˆ nuiˆ mawˇ laˇ ni, bi kʼehˬ-euˬ deuˬ ya law-iˇ ni, dawˬ tsaꞈ dawˬ dzawˇ mˇ-eu gʼaˇ duˬ, aˬ yawꞈ ngaˬ-ahˇ kʼehˇ leꞈ-euˬ meh.

¹⁹Sahˬpaˬ Miˬyehˇ gʼawˬ shaˬ gaˬ-eu, aˇ kʼoꞈ keuˆ le taˬ-euˬ gaˇ kawˆ, ngaˇ tsaꞈ gaˬ guˇ gaˬ le-euˬ ma.”

²⁰Kʼoeˇ naˇ, sahˬ boꞈ kʼoeˇ yoˆ kʼoꞈ-awˇ, uˬ duˬ tahˬ nymˇ-ahˇ sheuˬ gʼeh-eu gʼaˬ-ahˇ biꞈ kʼoꞈ nehˬ-awˇ nuiˇ-euˬ meh. Uˬ duˬ tahˬ nymˇ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, aˬ yawꞈ-ahˇ haw tsoˆ taˬ-euˬ meh.[5]

²¹Aˬ yawꞈ maꞈ-ahˇ aˬ yawꞈ ehˇ nehˬ-eu, “Naw maꞈ ya gaˬ gʼaˬ-euˬ Jaˇliꞈ aˇ deuˆ heu deuˆ iˬ nah naw maꞈ naˇ haˬ luꞈ ngeh byah laˇ-euˬ meh.”

²²Aˬ yawꞈ maꞈ dawˬ tawˆ luꞈ aˬ yawꞈ-ahˇ ja ceuˬ-eu meh. Aˬ yawꞈ-euˬ kʼaˬ meh-ahˇ ngehˬ doˆ laꞈ-euˬ muiˬ dui dui-eu dawˬ deuˬ-ahˇ aˬ yawꞈ maꞈ zahˬ leˇ-awˇ ehˇ-eu, “Tsawˇ haˬ teu gʼaˬ Yoˇsehˆ-euˬ aˬ li maˬ ngeuˇ-a loˇ.”

²³Kʼoeˇ naˇ, aˬ yawꞈ maꞈ-ahˇ Yeˬsuˇ heu loꞈ-ehˇ ehˇ nehˬ-euˬ meh. “‘Saˬ laˬ gʼoˬ-oˇ, yawˬ ha-euˬ naˇ gawˇ jeˬ huˬ laˆ taˬ-awˬ’ lehˇ ehˇ-eu dawˬ daˬ loꞈ-ehˇ, naw maꞈ ngaˬ-ahˇ ehˇ mawꞈ tehꞈ-a lehˇ ngaˇ siˬ nya ma. Gaˬbeˬneˬoˬ meuˬ-ahˇ ngaˬ neh mˇ mehˬ yaꞈ-euˬ jeˬ, heu gaˇ jiˇ mˇ mehˬ haw sheˇ lehˇ naw maꞈ ehˇ mawꞈ tehꞈ-a.

²⁴Ngaˇ naw maꞈ-ahˇ dawˇ coe ni ehˇ nehˬ nyaˇ. Miˬyehˇ gʼaˇ duˬ ngehˬ dah-eu tsawˇ haˬ-ahˇ, aˬ yawꞈ-euˬ jawˇ kʼahˬ laꞈ kʼoeˇ aˬ cawˬ maˬ taˬ huiˬ nehˬ-a.

²⁵Ngaˇ maˇ jawˆ ni ehˇ nehˬ nyaˇ. Smˇ kʼoꞈ uˬ taꞈ tiˬ paˆ keuˆ ni uˬ yehˇ maˬ yehˇ le ni jaˆ-euˬ miˇ neh, miˇ kʼahˬ kʼahˬ lah ni mehꞈ dui shuꞈ dui dui-eu jeˬ keuˆ le-euˬ Eˇliˇyaˆ-euˬ ziˇ kʼoeˇ ziˇ-ahˇ, Iˇsaˬleˬlaˆ miˇ kʼahˬ laꞈ kʼoeˇ miˬ coeˬ miˬ ma gʼawˬ mya ni jawˇ-euˬ meh.

²⁶Ehˇ kʼawꞈ, Eˇliˇyaˆ-ahˇ nui gʼaˬ jawˇ gaˇ maˬ kʼehˇ gʼeh-ehˇ, Siˇdoˬ miˇ kʼahˬ Zaˬleˇpaˇ meuˬ-ahˇ jawˇ-eu miˬ coeˬ miˬ ma tiˬ gʼaˬ jawˇ gaˇ tehꞈ-ehˇ kʼehˇ gʼeh-euˬ meh.

²⁷Eˇliˇshehˇ-euˬ ziˇ-ahˇ kʼawꞈ, Iˇsaˬleˬlaˆ miˇ kʼahˬ laꞈ kʼoeˇ coiˬ doi naˇ-eu tsawˇ haˬ gʼawˬ mya ni jawˇ-eu meh. Ehˇ kʼawꞈ, nui gʼaˬ-ahˇ maˬ bi muiˬ maˬ bi shawˇ laˇ-ehˇ[6] Suˇliˆ tsawˇ jeuˬ Neˬmaˬ tiˬ gʼaˬ-ahˇ tehꞈ-ehˇ bi muiˬ bi shawˇ laˇ-euˬ meh.”

²⁸Aˬ yawꞈ kʼoeˇ loꞈ-ehˇ ehˇ gaˇ, uˬ duˬ tahˬ nymˇ laꞈ kʼoeˇ jawˇ-eu tsawˇ haˬ deuˬ nui ma pehˇ dui dui-euˬ meh.

²⁹Aˬ yawꞈ maꞈ tsawˬ tuˇ laˇ-awˇ, Yeˬsuˇ-ahˇ meuˬ meuˬ dzeˇ gʼeu doˆ gʼeh-awˇ, aˬ yawꞈ maꞈ-euˬ meuˬ jaˆ-eu gawˬ jawˬ kʼoeˇ jawˬ-euˬ uˬ du tsahˇ daˆ gʼeh-euˬ meh. Aˬ yawꞈ maꞈ aˬ yawꞈ-ahˇ lo guˇ-ahˇ biˬ ka nehˬ-eu lehˇ gʼeh-eu meh.

³⁰Ehˇ kʼawꞈ, tsawˇ haˬ aˇ maꞈ-euˬ gʼahˇ ceh aˬ yawꞈ iˇ paˆ doˆ gʼeh-euˬ meh.

³¹Kʼoeˇ naˇ, Gaˬliˬlehˇ miˇ kʼahˬ Gaˬbeˬneˬoˬ meuˬ-ahˇ Yeˬsuˇ iˇ-euˬ meh. Jawˇ nah ngeh nah kʼoeˇ gaˇ mehˬ nehˬ tsoˆ nehˬ-euˬ meh.

³²Aˬ yawꞈ mehˬ nehˬ tsoˆ nehˬ gaˇ aˬ yawꞈ maꞈ zahˬ dui dui leˇ-euˬ meh. Aˬ jeˬ miˇ neh ehˇ naˇ, baoˬ ahˇ-eu laꞈ kʼoeˇ aˬ yawꞈ mehˬ nehˬ tsoˆ nehˬ-euˬ meh.

³³Uˬ duˬ tahˬ nymˇ kʼoeˇ nymˇ laꞈ kʼoeˇ, nehꞈ yaw jawꞈ uˇ-eu tsawˇ haˬ tiˬ gʼaˬ jawˇ-eu meh. Aˬ yawꞈ yaw kʼaˆ-ehˇ guˇ-awˇ, heu loꞈ-ehˇ ehˇ-eu meh.

³⁴“Aˬ huˇ. Naˬzaˬlehˇ meuˬ-ahˇ jawˇ-eu Yeˬsuˇ-oˇ, nawˇ nga maꞈ-ahˇ aˬ jeˬ taꞈ te. Nga maꞈ-ahˇ laˆ cawˆ le-eu lehˇ heu gaˇ oe teˬ loˇ. Nawˬ-ahˇ ngaˇ siˬ nya ma. Nawˇ-aˬ, Miˬyehˇ-euˬ muiˬ-eu shawˇ-eu gʼaˬ meh.”

³⁵Nehꞈ kʼoeˇ mawˇ-ahˇ Yeˬsuˇ dawˬ biꞈ-awˇ ehˇ-eu, “Ciˬ cuˇ ni jawˇ-awˇ tsawˇ haˬ teu gʼaˬ-euˬ laꞈ kʼoeˇ neh doˆ le-awˬ.” Nehꞈ kʼoeˇ mawˇ tsawˇ haˬ kʼoeˇ gʼaˬ-ahˇ aˬ yawꞈ maꞈ-euˬ mehˬ shi bi coˬ dzeh-awˇ, maˬ laˆ tahˬ maˬ laˆ naˇ nehˬ ni doˆ-iˇ-euˬ meh.

³⁶Tsawˇ haˬ kʼoeˇ deuˬ zahˬ leˇ jiˇ-awˇ, tiˬ gʼaˬ tiˇ gʼaˬ ehˇ-eu, “Dawˬ teu dawˬ aˬ joˆ-ehˇ gʼeh-eu dawˬ nga. Aˬ yawꞈ dawˬ ngehˬ-awˇ nehꞈ yaw jawꞈ-ahˇ dawˬ biꞈ ngeh, nehꞈ doˆ-iˇ-eu nga laˬ.”

³⁷Kʼoeˇ naˇ, Yeˬsuˇ-euˬ gaˇ kawˆ miˇ kʼahˬ kʼoeˇ kʼahˬ gaˬ doe-iˇ-euˬ meh.

³⁸Yeˬsuˇ uˬ duˬ tahˬ nymˇ-ahˇ neh doˆ-iˇ-awˇ, Siˇmoˬ-euˬ nymˇ-ahˇ iˇ-euˬ meh. Siˇmoˬ-euˬ tsawˇ mawˬ zaˬ miˬ zaˬ gʼaˬ pyaˬ dui dui-eu meh.Aˬ yawꞈ-ahˇ tiˬ poˆ haw nehˬ-eu gʼaˇ duˬ, aˬ yawꞈ maꞈ Yeˬsuˇ-ahˇ shaˇ-eu meh.

³⁹Aˬ yawꞈ-euˬ dawˬ peh Yeˬsuˇ yawꞈ leˇ-awˇ, naˇ gawˇ-ahˇ dehˬ ngeh, pyaˬ-eu taˬ leˇ-awˇ, tiˬ poˆ tehꞈ-ehˇ tsawˬ tuˇ laˇ-awˇ, aˬ yawꞈ maꞈ-ahˇ hawˬ byawˇ laˆ dawˆ nehˬ-euˬ meh.

⁴⁰Nahˇ ma ga ahˇ gʼaˬ ngeh, naˇ gawˇ gʼawˬ mya jeˬ naˇ-eu tsawˇ haˬ gʼawˬ mya ni-ahˇ, Yeˬsuˇ jawˇ gaˇ sheuˬ ha laˇ-euˬ meh. Yawˬ gʼaˬ na luꞈ kʼoeˇ taˆ aˬ yawꞈ aˬ laꞈ baꞈ daˆ nehˬ-awˇ, dawˬ tawˆ luꞈ-ahˇ laˆ taˬ nehˬ-euˬ meh.

⁴¹Tsawˇ haˬ gʼawˬ mya gʼaˬ laꞈ kʼoeˇ uˇ-eu nehꞈ deuˬ kʼawꞈ, “Nawˇ-aˬ, Miˬyehˇ-euˬ Zaˬmaˇ meh” lehˇ guˇ guˇ-ehˇ doˆ-iˇ jiˇ-euˬ meh. Nehꞈ kʼoeˇ deuˬ dawˬ maˬ bi ngehˬ doˆ laˬ ni, Yeˬsuˇ yaw kʼaˆ kʼaˆ-ehˇ dehˬ-euˬ meh. Aˬ jeˬ miˇ neh ehˇ naˇ, aˬ yawꞈ Ka li pyeuꞈ-eu gaˇ kawˆ aˬ yawꞈ maꞈ siˬ nya-eu meh.

⁴²Uˬ bya bya laˇ ngeh, Yeˬsuˇ meuˬ-ahˇ neh doˆ-iˇ-awˇ, ciˬ cuˇ ni gʼeh-eu jawˇ duˬ-ahˇ iˇ-euˬ meh. Tsawˇ haˬ aˇ maꞈ aˬ yawꞈ-ahˇ poˆ mawˇ le-awˇ, tiˬ gaˇ-iˬ maˬ paˇ bi iˇ ni aˬ yawꞈ maꞈ nehˬ-ehˇ tehꞈ-ehˇ bi jawˇ-eu gʼaˇ duˬ leh jeh-euˬ meh.

⁴³Ehˇ kʼawꞈ, aˬ yawꞈ maꞈ-ahˇ aˬ yawꞈ ehˇ nehˬ-eu, “Miˬyehˇ Miˇkʼahˬ gaˇ kawˆ Laˬ kʼaˬ cehˇ-eu Guiˬ lahˬ dawˬ heu, meuˬ nui deuˬ-ahˇ kʼawꞈ ngaˇ ya mehˬ-iˇ-a siˬ. Aˬ jeˬ miˇ neh ehˇ naˇ, Kʼoeˇ loꞈ-ehˇ bi mehˬ-iˇ-eu lehˇ Miˬyehˇ ngaˬ-ahˇ kʼehˇ gʼeh leꞈ-euˬ meh.”

⁴⁴Kʼoeˇ naˇ, Yuˇdaˆ miˇ kʼahˬ doe ni, uˬ duˬ tahˬ nymˇ laꞈ kʼoeˇ aˬ yawꞈ dawˬ mehˬ mehˬ-euˬ meh.