Read Akha Dawˬmehˬ 1 Bible Online

Dawˬmehˬ 1 - Akha bible

Dawˬmehˬ 1

¹Yawˇdaˬ lawˇ baˬ nahˇ ma doˆ kʼehˬ paw jaˆ-eu bawˇ tsahˬ bawˇ dahˇ laꞈ kʼoeˇ, Iˇsaˬleˬlaˆ tsawˇ haˬ deuˬ jawˇ luꞈ ngeh, aˬ yawꞈ maꞈ-ahˇ Moˇseˬ neh ehˇ nehˬ-euˬ dawˬ deuˬ, sahˬ boꞈ heu taꞈ laꞈ kʼoeˇ ahˇ-eu meh. Tiˬ paw paˆ Paˬlaˬ meuˬ hawˇ-eu, tiˬ paw paˆ Tawˇpeˬlaˇ, Laˬbaˬ, Haˬzeˬloˆ, Diˇzaˬhaˇ meuˬ heu deuˬ jaˆ luꞈ-eu yaw kaˬ-ahˇ, Suˇpaˬ meuˬ dawˬ peh Yawˇdaˬ lawˇ baˬ deh kʼawꞈ-ahˇ aˬ yawꞈ maꞈ jawˇ-euˬ meh.

²Siˇnaˆ gawˬ jawˬ-ahˇ neh Eˬdoˬ miˇ kʼahˬ gawˬ jawˬ gawˬ duˇ paw neh Kaˬdeˬshaˇbaˬneˬ meuˬ-ahˇ tseˇ tiꞈ nah ya iˇ-eu meh.

³Iˇjiˇtuˆ miˇ kʼahˬ laꞈ kʼoeˇ neh aˬ yawꞈ maꞈ doˆ le-euˬ oeˬ tseˇ kʼoꞈ tiˬ kʼoꞈ, ba la tseˇ tiꞈ siˬ tiˬ siˬ, tseˇ tiꞈ nah tiˬ nah-ahˇ, Iˇsaˬleˬlaˆ tsawˇ haˬ deuˬ-ahˇ bi ehˇ nehˬ-eu gʼaˇ duˬ, Sahˬpaˬ Miˬyehˇ neh dawˬ kʼaˇ biꞈ taˬ-euˬ jeˬ dawˬ tawˆ luꞈ, aˬ yawꞈ maꞈ-ahˇ Moˇseˬ ehˇ nehˬ-euˬ meh.

⁴Heˬshaˬboˬ meuˬ-ahˇ jawˇ-eu Aˬmoˬ tsawˇ jeuˬ-euˬ sahˬpaˬ Siˇhoˬ hawˇ-eu, Aˬshaˇtaˬyoˇ meuˬ hawˇ-eu Eˬdiˇliˇ meuˬ-ahˇ jawˇ-eu Baˬshaˬ miˇ kʼahˬ-euˬ sahˬpaˬ Awˇgaˆ aˬ nyaꞈ-ahˇ Moˇseˬ gʼaˬ leˇ gʼaˬ miˇ tsa, aˇ nah hawˇ-eu aˬ yawꞈ maꞈ-ahˇ kʼoeˇ loꞈ-ehˇ ehˇ nehˬ-euˬ meh.

⁵Yawˇdaˬ lawˇ baˬ nahˇ ma doˆ kʼehˬ paw jaˆ-eu Mawˇbaˆ miˇ kʼahˬ laꞈ kʼoeˇ Iˇsaˬleˬlaˆ tsawˇ haˬ deuˬ jawˇ luꞈ ngeh, Miˬyehˇ-euˬ zahˇ dawˬ kʼoꞈ dawˬ deuˬ hawˇ-eu mehˬ nehˬ tsoˆ nehˬ-euˬ jeˬ gaˇ kawˆ, aˬ yawꞈ maꞈ-ahˇ Moˇseˬ mehˬ duˬ nehˬ-euˬ meh. Aˬ yawꞈ ehˇ-eu,

⁶“Siˇnaˆ gawˬ jawˬ-ahˇ aˬ dui jawˇ luꞈ ngeh, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ dui-ahˇ heu loꞈ-ehˇ ehˇ-eu meh. ‘Gawˬ jawˬ heu jawˬ-ahˇ naw maꞈ jawˇ luꞈ-eu myahˇ laˇ-euˬ meh.

⁷Lehˬ hmˬ-awˇ mehˬ hu paw doˆ-iˇ-awˬ. Aˬmoˬ miˇ kʼahˬ gawˬ jawˬ gawˬ duˇ hawˇ-eu, kʼoeˇ-euˬ tahˬ gʼoꞈ tahˬ jawˇ jaˆ-eu gahˬ kaˬ pyeuꞈ-eu Yawˇdaˬ lawˇ baˬ deh kʼawꞈ-ahˇ maˬ ehˇ, gawˬ jawˬ gawˬ duˇ hawˇ-eu deh ga deuˬ-ahˇ maˬ ehˇ, laꞈ oˆ paw pyawˬ-ahˇ jaˆ-eu gahˬ kaˬ-ahˇ maˬ ehˇ, Gʼahˇ ceh-euˬ iˬ ma laˆ shaˆ lawˇ deh-ahˇ keuˆ ni maˬ ehˇ, naw maꞈ iˇ-awˬ. Kaˬnaˬ miˇ kʼahˬ-ahˇ maˬ ehˇ, Kaˬnaˬ miˇ kʼahˬ le dzeuˇ-awˇ jaˆ-eu Leˬbaˬnoˬ miˇ kʼahˬ gawˬ jawˬ deuˬ hawˇ-eu Uˇpaˬlaˇ lawˇ baˬ baˬ ma-ahˇ keuˆ ni maˬ ehˇ, iˇ gʼeh-awˬ.

⁸Miˇ kʼahˬ heu dawˬ tawˆ luꞈ, naw maꞈ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ hawˇ-eu Yaˬkoˆ-ahˇ maˬ ehˇ, aˬ yawꞈ maꞈ-euˬ zaˬ deuˬ uˆ deuˬ-ahˇ maˬ ehˇ, biꞈ ma lehˇ Sahˬpaˬ Miˬyehˇ pyeuꞈ-eu ngaˇ saˇ jaˇ dzaˬ taˬ-euˬ ma. Naw maꞈ iˇ-awˇ kʼoeˇ gaˇ jawˇ-iˇ-awˬ’ lehˇ ehˇ-eu meh.”

⁹Iˇsaˬleˬlaˆ tsawˇ haˬ deuˬ-ahˇ Moˇseˬ ehˇ nehˬ-eu, “Aˬ dui maꞈ Siˇnaˆ gawˬ jawˬ-ahˇ jawˇ ngeh neh, naw maꞈ-ahˇ ngaˇ heu loꞈ-ehˇ ehˇ nehˬ-euˬ ma. Naw maꞈ kʼoeˇ taˆ aˬ yuiꞈ geuꞈ-eu gaˇ heu-ahˇ ngaˇ maˬ gʼaˬ leˇ nya.

¹⁰Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, naw maꞈ-ahˇ mˬ kʼoeˇ taˆ tsehˬ-eu aˬ guiˇ loꞈ-ehˇ bi myaˬ bi behˇ laˇ taˬ-euˬ meh.

¹¹Naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahꞈpaˬ Miˬyehˇ saˇ jaˇ dzaˬ taˬ-euˬ loꞈ-ehˇ, naw maꞈ-ahˇ heu myaˆ maˬ tseˇ tiˬ heˇ bymˇ paˇ bi myaˬ paˇ bi behˇ laˇ-awˇ, bi baw bi za le luꞈ-uˇ.

¹²Ehˇ kʼawꞈ, naw maꞈ yaw kaˬ dawˬ ja doˆ laˇ ngeh, jahˇ tsaˬ nehˬ-eu huiˬ-eu gaˇ heu hmˬ-ahˇ ngaˇ tiˬ gʼaˬ tehꞈ-ehˇ aˬ joˆ-ehˇ mˇ gʼaˬ coeˇ nmˇ.

¹³Tsawˇ jeuˬ aˬ yawꞈ jeuˬ yawꞈ laꞈ kʼoeˇ zaˬ siˬ tsawˇ gahˇ ahˇ-awˇ noeˬ siˬ noeˬ mawˇ nya-eu uˬ taꞈ, mˇ haw shaˇ haw-euˬ tsawˇ haˬ heu myaˆ gʼaˬ tseˇ doˆ-awˬ. Naw maꞈ kʼoeˇ taˆ aˬ yawꞈ maꞈ-ahˇ aˬ yuiꞈ bi geuꞈ ma lehˇ ngaˇ ehˇ-euˬ ma.

¹⁴Kʼoeˇ ngeh, kʼoeˇ loꞈ-ehˇ mˇ-eu tsaˬ tehꞈ-a lehˇ naw maꞈ ehˇ-eu meh.

¹⁵Kʼoeˇ miˇ neh, naw maꞈ neh tseˇ doˆ-euˬ zaˬ siˬ tsawˇ gahˇ ahˇ-awˇ mˇ haw shaˇ haw-euˬ aˬ yuiꞈ aˬ tsu deuˬ-ahˇ, naw maꞈ kʼoeˇ taˆ aˬ yuiꞈ bi geuꞈ-euˬ ma. Tiˬ paˆ na deuˬ-ahˇ tiˬ heˇ gʼaˬ kʼoeˇ taˆ maˬ ehˇ, tiˬ paˆ na deuˬ-ahˇ tiˬ yaˇ gʼaˬ kʼoeˇ taˆ maˬ ehˇ, tiˬ paˆ na deuˬ-ahˇ ngaˬ tseˇ gʼaˬ kʼoeˇ taˆ maˬ ehˇ, tiˬ paˆ na deuˬ-ahˇ tseˇ gʼaˬ kʼoeˇ taˆ maˬ ehˇ, aˬ yuiꞈ bi geuꞈ-euˬ ma. Yaw huiˬ yaw mahˇ geuꞈ-eu tsawˇ haˬ deuˬ kʼawꞈ, Iˇsaˬleˬlaˆ tsawˇ jeuˬ dawˬ tawˆ luꞈ laꞈ kʼoeˇ, ngaˇ tseˇ doˆ taˬ-euˬ ma.

¹⁶“Kʼoeˇ ngeh, aˬ yawꞈ maꞈ-ahˇ ngaˇ heu loꞈ-ehˇ mehˬ nehˬ tsoˆ nehˬ-euˬ ma. Naw maꞈ-euˬ tsawˇ haˬ deuˬ laꞈ kʼoeˇ dawˬ ja kʼaˇ doˆ laˇ ngeh, yaw muiˬ paˬ-ehˇ naˇ haˬ-awˇ, naw maꞈ-euˬ tsawˇ haˬ yaw kaˬ-ahˇ tehꞈ-ehˇ dawˬ ja doˆ laˇ-euˬ maˬ kaˬ, naw maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ nehˬ-ehˇ dawˬ ja doˆ laˇ-euˬ maˬ kaˬ, yaw tsaˬ yaw dawˇ laꞈ kʼoeˇ yaˇ kʼaˬ daˇ nehˬ-awˬ.

¹⁷Yaˇ kʼaˬ daˇ ngeh, myaˆ pyawˬ huiˬ nyiˇ taˬ tseˇ. Aˬ joˆ-ehˇ gʼeh-eu tsawˇ haˬ-ahˇ maˬ kaˬ, daˇ nehˬ-awˬ. Tsawˇ haˬ tiˬ gʼaˬ-ahˇ-iˬ taˬ guˆ. Aˬ jeˬ miˇ neh ehˇ naˇ, naw maꞈ neh yaˇ kʼaˬ daˇ-euˬ kʼoeˇ-aˬ, Miˬyehˇ neh daˇ-euˬ jeˬ pyeuꞈ-eu meh. Naw maꞈ gʼaˇ duˬ aˇ dzehˬ-ehˇ shaˬ-eu gaˇ doˆ laˇ naˇ, ngaˇ jawˇ gaˇ laˇ-awˬ. Ngaˇ jahˇ jiˇ nehˬ ma.

¹⁸Naw maꞈ kʼaˇ ya mˇ kʼaˇ ya shaˇ-eu jeˬ dawˬ tawˆ luꞈ kʼawꞈ, kʼoeˇ ngeh neh ngaˇ naw maꞈ-ahˇ mehˬ nehˬ tsoˆ nehˬ-euˬ ma.

¹⁹“Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh dawˬ kʼaˇ biꞈ-euˬ loꞈ-ehˇ aˬ dui mˇ-euˬ ma. Siˇnaˆ gawˬ jawˬ-ahˇ neh aˬ dui maꞈ doˆ le-awˇ, Aˬmoˬ miˇ kʼahˬ gawˬ jawˬ gawˬ duˇ-ahˇ keuˆ ni, guˆ laˇ paˬ-ehˇ gʼeh-eu jeˇ dui dui-eu bawˇ tsahˬ bawˇ dahˇ laꞈ kʼoeˇ aˬ dui maꞈ cah-awˇ, Kaˬdeˬshaˇbaˬneˬ-ahˇ aˬ dui maꞈ laˇ keuˆ-euˬ ma.

²⁰Kʼoeˇ ngeh, naw maꞈ-ahˇ ngaˇ heu loꞈ-ehˇ ehˇ-euˬ ma. Aˬ dui maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh aˬ dui-ahˇ biꞈ laꞈ-euˬ Aˬmoˬ miˇ kʼahˬ gawˬ jawˬ gawˬ duˇ-ahˇ naw maꞈ laˇ keuˆ gʼaˬ-euˬ meh.

²¹Haw yawˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-euˬ mehˬ shi miˇ kʼahˬ heu kʼahˬ bi jaˆ taˬ-euˬ ngaˇ. Naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ ehˇ taˬ-euˬ loꞈ-ehˇ, miˇ kʼahˬ heu kʼahˬ-ahˇ jawˇ leˇ-awˬ. Nyi naˬ nyi naˬ-ehˇ taˬ paˇ jawˇ. Maˬ guˆ ni le-awˬ lehˇ naw maꞈ-ahˇ ngaˇ ehˇ-euˬ ma.

²²“Ehˇ kʼawꞈ, naw maꞈ ngaˇ jawˇ gaˇ laˇ-awˇ, ‘Gaˇ ma aˬ geu kahˇ le-eu tsaˬ dzehˬ-eu hawˇ-eu, kʼoeˇ gaˇ jaˆ-eu meuˬ deuˬ aˬ joˆ-ehˇ gʼeh-eu gaˇ kawˆ bi kʼoeˬ sho haw leˇ-awˇ, aˬ dui-ahˇ paˇ bi tsaꞈ gaˬ le-eu gʼaˇ duˬ, tsawˇ haˬ jeˬ hu pyehˬ gʼeh haw kaˇ-euˇ’ lehˇ, ngaˬ-ahˇ ehˇ laˇ-euˬ meh.

²³“Kʼoeˇ loꞈ-ehˇ jahˇ-eu tsaˬ-eu ngeuˇ nga lehˇ ngaˇ noeˬ-awˇ, tsawˇ jeuˬ tiˬ jeuˬ-euˬ tiˬ gʼaˬ tseˇ doˆ-awˇ, dawˬ tawˆ luꞈ tseˇ nyiꞈ gʼaˬ tseˇ doˆ-euˬ ma.

²⁴Eˇshaˬkawˇlaˆ deh kʼawꞈ-ahˇ keuˆ ni, gawˬ jawˬ gawˬ duˇ kʼoeˇ deuˬ laꞈ kʼoeˇ aˬ yawꞈ maꞈ le uˇ-awˇ, kʼoeˬ sho haw leˇ-euˬ meh.

²⁵Kʼoeˇ gaˇ siˬ-eu aˇ siˬ aˇ lu tiˬ paˆ na deuˬ aˬ yawꞈ maꞈ yuˇ kʼoꞈ leꞈ-awˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ dui-ahˇ biꞈ-eu lehˇ gʼeh-eu miˇ kʼahˬ-aˬ, miˇ tsaˬ miˇ muiˬ muiˬ dui dui-eu miˇ kʼahˬ pyeuꞈ-eu gaˇ kawˆ tsaꞈ gaˬ le-euˬ meh.

²⁶“Ehˇ kʼawꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ naw maꞈ puiˬ-awˇ, miˇ kʼahˬ kʼoeˇ kʼahˬ-ahˇ naw maꞈ maˬ uˇ leˇni jawˇ-euˬ meh.

²⁷Iˬ baˇ taˬ-eu dawˬ ngehˬ-eu laꞈ kʼoeˇ naw maꞈ ehˇ-eu, ‘Sahˬpaˬ Miˬyehˇ aˬ dui-ahˇ bye-eu miˇ neh, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ-awˇ, Aˬmoˬ tsawˇ haˬ heu deuˬ neh bi sehꞈ-eu lehˇ, aˬ dui-ahˇ heu gaˇ sheuˬ laꞈ-euˬ ngaˇ.

²⁸Aˬ jeˬ miˇ neh kʼoeˇ gaˇ le-eu ehˇ te. Nga maꞈ guˆ dui dui nya. Kʼoeˇ gaˇ jawˇ-eu tsawˇ haˬ deuˬ-aˬ, aˬ dui maꞈ naˆ maˬ tseˇ goˇ dzehˬ-awˇ, gʼaˬ kʼaˆ dzehˬ-eu uˬ taꞈ, mˬ-ahˇ tuˆ ni meuˬ meuˬ lahˇ gawˬ taˬ-euˬ meuˬ deuˬ laꞈ kʼoeˇ jawˇ-eu meh lehˇ, aˬ dui maꞈ neh bi kʼoeˬ sho haw leˇ-euˬ tsawˇ haˬ deuˬ tsaꞈ gaˬ le-euˬ maˬ ngeuˇ-a loˇ. Huiˬ dui goˇ dui dui-eu tsawˇ haˬ deuˬ-ahˇ aˬ yawꞈ maꞈ mawˇ yaꞈ-euˬ ma lehˇ ehˇ-eu maˬ ngeuˇ-a loˇ’ lehˇ naw maꞈ ehˇ-eu meh.

²⁹“Ehˇ kʼawꞈ, ngaˇ heu loꞈ-ehˇ ehˇ-euˬ ma.

³⁰‘Tsawˇ haˬ kʼoeˇ deuˬ-ahˇ taˬ guˆ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ sheuˬ gʼeh-awˇ, Iˇjiˇtuˆ miˇ kʼahˬ laꞈ kʼoeˇ aˬ yawꞈ neh mˇ-euˬ gaˇ naw maꞈ ya mawˇ-euˬ loꞈ-ehˇ, tsawˇ haˬ kʼoeˇ deuˬ-ahˇ kʼawꞈ, naw maꞈ gʼaˇ duˬ aˬ yawꞈ guiˇ deuˆ tehꞈ-a.

³¹Kʼoeˇ uˬ taꞈ, bawˇ tsahˬ bawˇ dahˇ laꞈ kʼoeˇ aˬ yawꞈ neh mˇ-euˬ gaˇ deuˬ-ahˇ kʼawꞈ, naw maꞈ ya mawˇ-euˬ meh. Aˬ da tiˬ gʼaˬ yawˬ ha-euˬ aˬ li-ahˇ ciˬ gʼeh-eu loꞈ-ehˇ, gaˇ pehˇ kahˇ li-ehˇ, heu gaˇ keuˆ ni naw maꞈ-ahˇ aˬ yawꞈ sheuˬ keuˆ laꞈ-euˬ meh’ lehˇ ngaˇ naw maꞈ-ahˇ ehˇ-euˬ maˬ ngeuˇ-a loˇ.

³²Ngaˇ kʼoeˇ loꞈ-ehˇ ehˇ-euˬ kʼawꞈ, Sahˬpaˬ Miˬyehˇ-ahˇ naw maꞈ maˬ jah-a.

³³Naw maꞈ bi jawˇ naˬ-eu gʼaˇ duˬ jawˇ zaˇ shaˇ-eu lehˇ, naw maꞈ-euˬ mehˬ hu, aˬ myah luꞈ aˬ yawꞈ iˇ luꞈ-eu kʼawꞈ, aˬ yawꞈ-ahˇ naw maꞈ maˬ jah-a. Naw maꞈ-ahˇ gaˇ ma mehˬ-eu gʼaˇ duˬ, uˬ ciꞈ paw miˬ dzaˬ kʼawˇ zeuˇ laꞈ kʼoeˇ maˬ ehˇ, nah gʼahˇ paw mˬ dmˇ kʼawˇ zeuˇ laꞈ kʼoeˇ maˬ ehˇ, naw maꞈ-euˬ mehˬ shi aˬ yawꞈ iˇ luꞈ-eu meh.

³⁴“Naw maꞈ iˬ baˇ taˬ-eu dawˬ ngehˬ gaˇ Sahˬpaˬ Miˬyehˇ ya gaˬ ngeh, nui ma pehˇ laˇ-awˇ heu loꞈ-ehˇ ehˇ-eu meh.

³⁵‘Maˬ muiˬ maˬ jaˬ-eu ziˇ heu ziˇ laꞈ kʼoeˇ kʼaˇ dehꞈ luꞈ-eu naw maꞈ deuˬ, naw maꞈ-euˬ aˬ poeˬ aˬ bawˇ deuˬ-ahˇ biꞈ ma lehˇ ngaˬ neh saˇ jaˇ dzaˬ taˬ-euˬ, miˇ tsaˬ miˇ muiˬ muiˬ dui dui-awˇ bawˬ le za le-eu miˇ kʼahˬ kʼoeˇ kʼahˬ laꞈ kʼoeˇ, tiˬ gʼaˬ-iˬ maˬ ya le uˇ-a.

³⁶Yeˬpuˬnehˇ-euˬ aˬ li Gaˬlehˆ tiˬ gʼaˬ tehꞈ-ehˇ ya le uˇ meh. Aˬ yawꞈ ngaˬ-ahˇ saˇ jaˇ ziꞈ-eu miˇ neh, aˬ yawꞈ neh kʼoeˬ sho haw leˇ-euˬ miˇ kʼahˬ kʼoeˇ kʼahˬ, aˬ yawꞈ hawˇ-eu aˬ yawꞈ-euˬ zaˬ deuˬ uˆ deuˬ-ahˇ ngaˇ biꞈ ma’ lehˇ ehˇ-eu meh.

³⁷Naw maꞈ baˬ da neh, ngaˬ-ahˇ kʼawꞈ Sahˬpaˬ Miˬyehˇ nui ma pehˇ-awˇ, heu loꞈ-ehˇ ehˇ-eu meh. ‘Moˇseˬ nawˇ kʼawꞈ miˇ kʼahˬ kʼoeˇ kʼahˬ-ahˇ maˬ ya uˇ leˇ-a.

³⁸Ehˇ kʼawꞈ, nawˬ-ahˇ caw ba-eu gʼaˬ pyeuꞈ-eu Nuˬ-euˬ aˬ li Yawˇshuˆ-ahˇ gʼaˬ yaw kʼaˆ-ehˇ biꞈ-awˬ. Aˬ jeˬ miˇ neh ehˇ naˇ, Iˇsaˬleˬlaˆ tsawˇ haˬ deuˬ-ahˇ, miˇ kʼahˬ kʼoeˇ kʼahˬ laꞈ kʼoeˇ aˬ yawꞈ ya sheuˬ uˇ gʼeh tehꞈ-a’ lehˇ ehˇ-eu meh.

³⁹“Kʼoeˇ naˇ, aˬ dui dawˬ tawˆ luꞈ-ahˇ Sahˬpaˬ Miˬyehˇ heu loꞈ-ehˇ ehˇ-eu meh. ‘Naw maꞈ-ahˇ muiˇ-eu deuˬ neh bi nyehꞈ geuꞈ tehꞈ-a lehˇ naw maꞈ ehˇ-eu yaw muiˬ yaw doeˇ maˬ tseˇ paˆ nya laˇ-euˬ naw maꞈ-euˬ zaˬ deuˬ, miˇ kʼahˬ kʼoeˇ kʼahˬ laꞈ kʼoeˇ ya uˇ leˇ tehꞈ-a. Miˇ kʼahˬ kʼoeˇ kʼahˬ aˬ yawꞈ maꞈ-ahˇ ngaˇ biꞈ-awˇ, aˬ yawꞈ maꞈ kʼoeˇ gaˇ ya jawˇ tehꞈ-a.

⁴⁰Ehˇ kʼawꞈ, naw maꞈ deuˬ-aˬ, mehˬ nah paw paˇ zeuˆ pyawˇ-awˇ, Aˬgaˬbaˬ Iˬ ma laˆ shaˆ lahˇ gʼoꞈ-ahˇ dahˇ ka gʼeh-euˬ gaˇ ma caw caw-ehˇ, bawˇ tsahˬ bawˇ dahˇ paw paˇ gʼoꞈ-iˇ-awˬ’ lehˇ ehˇ-eu meh.

⁴¹“Kʼoeˇ ngeh, naw maꞈ ngaˬ-ahˇ ehˇ-eu, ‘Moˇseˬ-oˇ, Sahˬpaˬ Miˬyehˇ-ahˇ nga maꞈ mˇ lehˬ gʼaˬ law hawˇ miˇ-a. Ehˇ kʼawꞈ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh dawˬ biꞈ taˬ-euˬ loꞈ-ehˇ, nymˬ-mˇ nga maꞈ le-awˇ guiˇ deuˆ leˇ ma’ lehˇ ehˇ-eu meh. Kʼoeˇ naˇ, gawˬ jawˬ gawˬ duˇ miˇ kʼahˬ-ahˇ deuˆ geuꞈ-eu yaw awˬ tehꞈ-a lehˇ naw maꞈ noeˬ-awˇ, naw maꞈ yawˬ gʼaˬ na luꞈ guiˇ deuˆ-eu gʼaˇ duˬ aˇ kʼaˆ laˆ dawˆ-euˬ meh.

⁴²“Ehˇ kʼawꞈ, Sahˬpaˬ Miˬyehˇ ngaˬ-ahˇ ehˇ-eu, ‘Guiˇ taˬ deuˆ leˇ lehˇ aˬ yawꞈ maꞈ-ahˇ ehˇ nehˬ-awˬ. Aˬ jeˬ miˇ neh ehˇ naˇ, aˬ yawꞈ maꞈ nehˬ-ehˇ ngaˇ maˬ jawˇ-eu miˇ neh, aˬ yawꞈ maꞈ-ahˇ muiˇ-eu deuˬ neh bi deuˆ gʼaˬ tehꞈ-a’ lehˇ ehˇ-eu meh.

⁴³Sahˬpaˬ Miˬyehˇ neh kʼaˇ ehˇ-euˬ loꞈ-ehˇ, naw maꞈ-ahˇ ngaˇ dzawˇ nehˬ-euˬ kʼawꞈ, naw maꞈ maˬ naˇ haˬ geuꞈ-a. Naw maꞈ Sahˬpaˬ Miˬyehˇ-euˬ ehˇ dawˬ-ahˇ puiˬ-awˇ, nui ma huiˬ-eu laꞈ kʼoeˇ, gawˬ jawˬ gawˬ duˇ-ahˇ guiˇ deuˆ leˇ-eu lehˇ le-euˬ meh.

⁴⁴Kʼoeˇ ngeh, gawˬ jawˬ gawˬ duˇ-ahˇ jawˇ-eu Aˬmoˬ tsawˇ haˬ deuˬ naw maꞈ-ahˇ guiˇ deuˆ le-eu lehˇ, byaˬ byaˬ maꞈ loꞈ-ehˇ yoeˇ gʼeh leꞈ-euˬ meh. Hawˇ maˬ meuˬ-ahˇ keuˆ ni naw maꞈ-ahˇ aˬ yawꞈ maꞈ teh-awˇ, Eˬdoˬ miˇ kʼahˬ gawˬ jawˬ gawˬ duˇ-ahˇ, naw maꞈ-ahˇ guiˇ deuˆ gʼaˬ-euˬ meh.

⁴⁵Kʼoeˇ ngeh, ‘Caw ba nehˬ laꞈ-awˬ’ lehˇ Sahˬpaˬ Miˬyehˇ-ahˇ naw maꞈ guˇ-awˇ shaˇ-euˬ meh. Ehˇ kʼawꞈ, naw maꞈ guˇ gaˇ aˬ yawꞈ maˬ naˇ haˬ ni, maˬ gaˬ-euˬ geuꞈ-awˇ jawˇ-euˬ meh.

⁴⁶Kʼoeˇ naˇ, Kaˬdeˬshaˇ-ahˇ aˬ dui gʼawˬ myahˇ ni jawˇ-euˬ ma.