Read Akha Dawˬmehˬ 11 Bible Online

Dawˬmehˬ 11 - Akha bible

Dawˬmehˬ 11

¹“Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˇ, aˬ yawꞈ-euˬ zahˇ dawˬ kʼoꞈ dawˬ deuˬ-ahˇ aˬ myah luꞈ naˇ haˬ geuꞈ-awˬ.

²Aˬ yawꞈ nehˬ-ehˇ naw maꞈ ya puˬ ya mawˇ haw-euˬ jeˬ laꞈ kʼoeˇ, aˬ yawꞈ-euˬ gaˇ kawˆ naw maꞈ ya siˬ-euˬ jeˬ-ahˇ iˬ nah noeˬ keuˆ-awˬ. Kʼoeˇ deuˬ-ahˇ ya puˬ ya mawˇ haw-euˬ tsawˇ haˬ deuˬ-aˬ, naw maꞈ-euˬ zaˬ deuˬ maˬ ngeuˇ-a. Naw maꞈ meh. Sahˬpaˬ Miˬyehˇ huiˬ dui mahˇ dui dui-eu gaˇ kawˆ maˬ ehˇ, aˬ yawꞈ-euˬ baoˬ maˬ ehˇ, aˬ yawꞈ gʼaˬ kʼaˆ dui dui-eu gaˇ kawˆ maˬ ehˇ, naw maꞈ ya mawˇ-euˬ meh.

³Aˬ yawꞈ neh mˇ-euˬ zahˬ leˇ paˬ-ehˇ gʼeh-eu jeˬ-ahˇ kʼawꞈ, naw maꞈ ya mawˇ-euˬ meh. Iˇjiˇtuˆ sahˬpaˬ hawˇ-eu aˬ yawꞈ-euˬ miˇ kʼahˬ kʼahˬ lah ni kʼoeˇ taˆ mˇ nehˬ-euˬ jeˬ-ahˇ kʼawꞈ, naw maꞈ ya mawˇ-euˬ meh.

⁴Iˇjiˇtuˆ guiˇ maꞈ deuˬ naw maꞈ mehˬ nah teh ngeh, aˬ yawꞈ maꞈ-euˬ mahˬ deuˬ hawˇ-eu mahˬ laˆ lawˬ deuˬ nehˬ-ehˇ tiˬ kawˆ loꞈ-ehˇ, geuꞈ-eu jeˬ maˬ ahˇ gaˇ keuˆ ni aˬ yawꞈ maꞈ-ahˇ Sahˬpaˬ Miˬyehˇ laˆ luˬ laˆ seˇ nehˬ-euˬ gaˇ naw maꞈ ya mawˇ-euˬ meh.

⁵Naw maꞈ heu gaˇ maˬ laˇ keuˆ mi naˆ-ehˇ, bawˇ tsahˬ bawˇ dahˇ laꞈ kʼoeˇ naw maꞈ gʼaˇ duˬ Sahˬpaˬ Miˬyehˇ neh mˇ-euˬ jeˬ gaˇ kawˆ naw maꞈ siˬ nya meh.

⁶Luˇbeˬ tsawˇ jeuˬ Eˇliˇbaˆ-euˬ aˬ li Daˬtaˬ hawˇ-eu Aˬbiˇlamˬ aˬ nyaꞈ-ahˇ aˬ yawꞈ neh jahˇ nehˬ-euˬ jeˬ-ahˇ noeˬ keuˆ-awˬ. Tsawˇ haˬ yawˬ gʼaˬ na luꞈ-euˬ mehˬ shi miˇ tsaˬ tsawˬ nga laˇ-awˇ, aˬ yawꞈ nyaꞈ-ahˇ maˬ ehˇ, aˬ yawꞈ nyaꞈ-euˬ miˬ sawˇ zaˬ deuˬ-ahˇ maˬ ehˇ, aˬ yawꞈ nyaꞈ-euˬ sehˬ gʼawˆ-ahˇ maˬ ehˇ, aˬ yawꞈ nyaꞈ-euˬ zaˬ kʼaˆ hawˇ-eu jeˬ zaˬ deuˬ-ahˇ maˬ ehˇ, myoꞈ ahˇ jiˇ-euˬ meh.

⁷Sahˬpaˬ Miˬyehˇ neh mˇ-euˬ huiˬ-eu gaˇ heu deuˬ dawˬ tawˆ luꞈ-ahˇ, naw maꞈ ya mawˇ-euˬ meh.

⁸“Iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ. Kʼoeˇ loꞈ-ehˇ jahˇ naˇ, naw maꞈ lawˇ baˬ tsehˆ doˆ nya-awˇ, naw maꞈ jawˇ leˇ-eu lehˇ gʼeh-eu miˇ kʼahˬ naw maꞈ za tehꞈ-a.

⁹Naw maꞈ-euˬ aˬ poeˬ aˬ bawˇ deuˬ hawˇ-eu aˬ yawꞈ maꞈ-euˬ zaˬ deuˬ uˆ deuˬ-ahˇ biꞈ ma lehˇ Sahˬpaˬ Miˬyehˇ neh saˇ jaˇ dzaˬ taˬ-euˬ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ gʼawˬ myahˇ ni ya dehꞈ ya jawˇ tehꞈ-a.

¹⁰Naw maꞈ jawˇ leˇ-eu lehˇ gʼeh-eu miˇ kʼahˬ kʼoeˇ kʼahˬ-aˬ, naw maꞈ neh jawˇ yaꞈ-euˬ Iˇjiˇtuˆ miˇ kʼahˬ-ahˇ maˬ duˇ-a.

¹¹Iˇjiˇtuˆ miˇ kʼahˬ laꞈ kʼoeˇ naw maꞈ siˬ yoeˬ sehˬ ngeh, leh jeh-awˇ iˇ cuꞈ ya shehˬ-eu meh. Ehˇ kʼawꞈ, naw maꞈ jawˇ leˇ-eu lehˇ gʼeh -eu miˇ kʼahˬ-aˬ, gawˬ jawˬ gʼaˬ lawˬ baw baw-ehˇ, uˬ yehˇ jaˆ-eu miˇ kʼahˬ pyeuꞈ-eu meh.

¹²Miˇ kʼahˬ heu kʼahˬ-ahˇ naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ bo saˆ-awˇ, kʼoꞈ kʼoꞈ lah ni haw luꞈ pyaˆ luꞈ-eu meh.

¹³“Kʼoeˇ miˇ neh, iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ-awˬ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˇ, naw maꞈ-euˬ nui ma dawˬ tawˆ luꞈ aˬ yawꞈ-euˬ gaˇ mˇ-awˬ.

¹⁴Naw maꞈ kʼoeˇ loꞈ-ehˇ mˇ naˇ, dzaˬ la gʼo cehˇ, aˬ gaꞈ dzaˇ uiˇ hawˇ-eu, saˬ loˬ tsiˇ za le ni, yehˇ gʼahˇ ahˇ dahˬ beh ngeh maˬ ehˇ, yehˇ gʼahˇ jiˇ le ngeh maˬ ehˇ, kʼaˇ loˬ-eu loꞈ-ehˇ, miˇ kʼahˬ kʼoeˇ kʼahˬ laꞈ kʼoeˇ uˬ yehˇ bi yehˇ le tehꞈ-a.

¹⁵Naw maꞈ-euˬ jeˬ zaˬ deuˬ gʼaˇ duˬ yaˇ moꞈ jaˆ-awˇ, naw maꞈ kʼaˇ dzaˬ mawꞈ-eu jeˬ jaˆ tehꞈ-a.

¹⁶Sahˬpaˬ Miˬyehˇ-ahˇ byehˇ dzeh-awˇ, miˬ yehˇ nui deuˬ-ahˇ uˬ duˬ tahˬ-eu gʼaˇ duˬ mehˇ shuiˇ shuiˇ gaˇ maˬ ya caw teh ni, naw maꞈ yaw kʼaˆ kʼaˆ-ehˇ yahˇ-awˬ.

¹⁷Naw maꞈ kʼoeˇ loꞈ-ehˇ mˇ naˇ, Sahˬpaˬ Miˬyehˇ naw maꞈ-ahˇ nui ma pehˇ laˇ-awˇ, uˬ yehˇ maˬ bi yehˇ le-eu miˇ neh, naw maꞈ-euˬ miˇ tsaˬ gui-iˇ-awˇ, maˬ ka dzaˬ maˬ ka dawˇ nya ni pyeuꞈ-iˇ tehꞈ-a. Kʼoeˇ ngeh, aˬ yawꞈ naw maꞈ-ahˇ muiˬ-eu miˇ kʼahˬ biꞈ laꞈ-euˬ kʼawꞈ, gʼawˬ myahˇ maˬ gʼeh-ehˇ naw maꞈ ya luˬ ya seˇ-iˇ tehꞈ-a.

¹⁸“Zahˇ dawˬ kʼoꞈ dawˬ heu deuˬ-ahˇ maˬ ya ngehˇ leˇ ni, naw maꞈ-euˬ nui ma laꞈ kʼoeˇ yaw muiˬ paˬ-ehˇ juiˇ taˬ-awˬ. Aˬ myah luꞈ noeˬ keuˆ-eu gʼaˇ duˬ, zahˇ dawˬ kʼoꞈ dawˬ heu deuˬ naw maꞈ-euˬ laꞈ du-ahˇ paꞈ-awˇ, naˇ kʼawˇ-ahˇ geuꞈ taˬ gʼeh-awˬ.

¹⁹Naw maꞈ-euˬ zaˬ deuˬ-ahˇ zahˇ dawˬ kʼoꞈ dawˬ kʼoeˇ deuˬ mehˬ nehˬ tsoˆ nehˬ-awˬ. Naw maꞈ iˇ kahˇ jawˇ ngeh maˬ ehˇ, gaˇ mahˇ kaˬ gaˇ iˇ ngeh maˬ ehˇ, gʼaˬ naˬ naˬ ngeh maˬ ehˇ, gaˇ mˇ ngeh maˬ ehˇ, zahˇ dawˬ kʼoꞈ dawˬ gaˇ kawˆ ja uˇ ja uˇ-ehˇ jawˇ-awˬ.

²⁰Naw maꞈ-euˬ laˇ gʼoˆ bahˬ hawˇ-eu kmˇ cehˇ gʼoˆ shoˆ bahˬ-ahˇ, zahˇ dawˬ kʼoꞈ dawˬ kʼoeˇ deuˬ boꞈ taˬ-awˬ.

²¹Kʼoeˇ loꞈ-ehˇ jahˇ naˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-euˬ aˬ poeˬ aˬ bawˇ deuˬ-ahˇ saˇ jaˇ dzaˬ taˬ-euˬ miˇ kʼahˬ kʼoeˇ kʼahˬ laꞈ kʼoeˇ, naw maꞈ hawˇ-eu naw maꞈ-euˬ zaˬ deuˬ gʼawˬ myahˇ ni ya jawˇ tehꞈ-a. Mˬ hawˇ-eu miˇ kʼaˇ jaˆ kʼoeˇ keuˆ ni, kʼoeˇ gaˇ naw maꞈ ya jawˇ tehꞈ-a.

²²“Ngaˬ neh naw maꞈ-ahˇ kʼaˇ biꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ, saˇ jaˇ ziꞈ-eu laꞈ kʼoeˇ caw teh-awˬ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˬ-awˇ, aˬ yawꞈ neh dawˬ kʼaˇ biꞈ taˬ-euˬ yawˬ jeˬ na luꞈ mˇ-eu laꞈ kʼoeˇ, aˬ yawꞈ-ahˇ saˇ jaˇ ziꞈ-awˬ.

²³Naw maꞈ le gʼeh leꞈ-eu nehˬ-ehˇ, tsawˇ jeuˬ kʼoeˇ deuˬ dawˬ tawˆ luꞈ-ahˇ aˬ yawꞈ teh doˆ-awˇ, naw maꞈ myaˆ maˬ tseˇ myaˬ dzehˬ-awˇ gʼaˬ kʼaˆ dzehˬ-eu tsawˇ jeuˬ kʼoeˇ deuˬ jawˇ-eu miˇ kʼahˬ kʼoeˇ kʼahˬ, naw maꞈ za tehꞈ-a.

²⁴Naw maꞈ kʼaˇ cah tsehˆ-euˬ miˇ kʼahˬ naw maꞈ za tehꞈ-a. Naw maꞈ-euˬ miˇ kʼahˬ-aˬ, laꞈ oˆ paw pyawˬ-ahˇ jaˆ-eu Leˬbaˬnoˬ gawˬ jawˬ deuˬ-ahˇ keuˆ ni maˬ ehˇ, nahˇ ma doˆ kʼehˬ paw pyawˬ-ahˇ jaˆ-eu Uˇpaˬlaˇ lawˇ baˬ-ahˇ neh nahˇ ma ga kʼehˬ paw pyawˬ-ahˇ jaˆ-eu Gʼahˇ ceh-euˬ Iˬ ma laˆ shaˆ-ahˇ keuˆ ni maˬ ehˇ, jeˇ tehꞈ-a.

²⁵Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, miˇ kʼahˬ kʼoeˇ kʼahˬ laꞈ kʼoeˇ naw maꞈ kʼaˇ iˇ gaˇ aˬ cawˬ naw maꞈ-ahˇ guˆ ni aˬ yawꞈ jahˇ-awˇ, naw maꞈ-euˬ mehˬ shi yawꞈ-awˇ laˆ tsoeˬ peuˬ-eu tiˬ gʼaˬ-iˬ maˬ jawˇ-ehˇ pyeuꞈ-iˇ tehꞈ-a.

²⁶“Guiˬ lahˬ hawˇ-eu yaˬ kʼehˇ yaˬ-eu heu nyiˬ jeˬ naw maꞈ-ahˇ ngaˇ iˬ nah bi tseˇ geuꞈ-eu ma.

²⁷Iˬ nah ngaˇ naw maꞈ-ahˇ biꞈ-eu naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ heu deuˬ-ahˇ naw maꞈ naˇ haˬ geuꞈ naˇ, guiˬ lahˬ za tehꞈ-a.

²⁸Ehˇ kʼawꞈ, zahˇ dawˬ kʼoꞈ dawˬ heu deuˬ-ahˇ maˬ naˇ haˬ geuꞈ ni byehˇ dzeh yaꞈ-awˇ, naw maꞈ tiˬ jawˇ-iˬ uˬ duˬ maˬ tahˬ haw-euˬ miˬ yehˇ nui deuˬ-ahˇ uˬ duˬ tahˬ naˇ, yaˬ kʼehˇ yaˬ-eu jeˬ-ahˇ naw maꞈ za tehꞈ-a.

²⁹Naw maꞈ ya jawˇ leˇ-eu miˇ kʼahˬ-ahˇ, Sahˬpaˬ Miˬyehˇ naw maꞈ-ahˇ sheuˬ keuˆ gʼeh ngeh, Geˬlaˬzmˬ gawˬ jawˬ kʼoeˇ taˆ guiˬ lahˬ biꞈ-eu dawˬ naw maꞈ ya guˇ-awˇ, Eˇbaˬlaˇ gawˬ jawˬ kʼoeˇ taˆ yaˬ kʼehˇ yaˬ-eu dawˬ naw maꞈ ya guˇ meh.

³⁰(Gawˬ jawˬ heu nyiˬ jawˬ-aˬ, Yawˇdaˬ lawˇ baˬ nahˇ ma doˆ kʼehˬ paw jaˆ-eu Yawˇdaˬ deh kʼawꞈ-ahˇ jawˇ-eu Kaˬnaˬ tsawˇ jeuˬ-euˬ miˇ kʼahˬ laꞈ kʼoeˇ jaˆ-eu meh. Kʼoeˇ-aˬ, muiˬ-eu shawˇ-eu Mawˇleh aˇ bawˇ bawˇ yaˇ nehˬ-ehˇ aˇ dzehˬ-ehˇ maˬ kaˬ ni, Giˇlaˇgaˬlaˇ meuˬ-euˬ dawˬ peh, laꞈ taˆ paw jeˬ-ehˇ jaˆ-eu meh.)

³¹Naw maꞈ Yawˇdaˬ lawˇ baˬ tsehˆ doˆ-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ miˇ kʼahˬ-ahˇ ya jawˇ leˇ-eu aˇ yamˬ dawˬ peh peh laˇ taˬ-euˬ meh. Naw maꞈ kʼoeˇ gaˇ le keuˆ-awˇ, jawˇ duˬ dah leˇ gʼaˬ ngeh,

³²iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ maˬ ngehˇ ni naˇ haˬ geuꞈ-awˬ.