Read Akha Dawˬmehˬ 13 Bible Online

Dawˬmehˬ 13 - Akha bible

Dawˬmehˬ 13

¹“Miˬyehˇ gʼaˇ duˬ ngehˬ dah-eu tsawˇ haˬ hawˇ-eu yuꞈ maˆ dawˬ tsuiꞈ yuˇ doˆ-eu tsawˇ haˬ doˆ laˇ-awˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ mˇ-eu laꞈ kʼoeˇ,

²naw maꞈ tiˬ jawˇ-iˬ uˬ duˬ maˬ tahˬ haw-euˬ miˬ yehˇ deuˬ-euˬ zaˬ kʼaˆ geuꞈ-awˇ, kʼoeˇ deuˬ-ahˇ uˬ duˬ tahˬ-eu gʼaˇ duˬ naw maꞈ-ahˇ sheuˬ gʼeh ngeh, aˬ yawꞈ ehˇ-eu loꞈ-ehˇ kʼaˆ jeˬ-ehˇ gʼeh-eu jeˬ aˬ diˇ aˬ maˇ pyeuꞈ doˆ laˇ kʼawꞈ,

³aˬ yawꞈ ehˇ gaˇ taˬ naˇ haˬ. Naw maꞈ-euˬ nui ma dawˬ tawˆ luꞈ Sahˬpaˬ Miˬyehˇ-ahˇ gaˬ nga loˇ lehˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ-ahˇ zmˬ-awˇ, naw maꞈ-ahˇ lawˬ haw-eu jeˬ pyeuꞈ-eu meh.

⁴Sahˬpaˬ Miˬyehˇ-euˬ mehˬ nah caw teh-awˇ, aˬ yawꞈ-ahˇ guˆ-awˬ. Aˬ yawꞈ-euˬ ehˇ dawˬ naˇ haˬ-awˇ, aˬ yawꞈ-euˬ zahˇ dawˬ kʼoꞈ dawˬ laꞈ kʼoeˇ ziꞈ-awˬ.

⁵Ehˇ kʼawꞈ, naw maꞈ aˬ cawˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ sheuˬ doˆ nehˬ laꞈ-euˬ Sahˬpaˬ Miˬyehˇ-ahˇ puiˬ kaˇ-euˇ lehˇ, naw maꞈ-ahˇ kʼaˇ ehˇ-eu yuꞈ maˆ dawˬ tsuiꞈ yuˇ doˆ-eu tsawˇ haˬ -ahˇ maˬ ehˇ, Miˬyehˇ gʼaˇ duˬ ngehˬ dah-eu tsawˇ haˬ-ahˇ maˬ ehˇ, sehꞈ-awˬ. Kʼoeˇ loꞈ-ehˇ gʼeh-eu tsawˇ haˬ-aˬ, maˬ muiˬ maˬ jaˬ-eu tsawˇ haˬ pyeuꞈ-awˇ, Sahˬpaˬ Miˬyehˇ neh naw maꞈ-ahˇ bi cah-euˬ gaˇ ma-ahˇ maˬ cah ni, naw maꞈ-ahˇ sheuˬ doˆ gʼeh-eu lehˇ leh jeh-eu meh. Maˬ muiˬ maˬ jaˬ-eu jeˬ laꞈ kʼoeˇ naw maꞈ ya buˬ-iˇ ni, kʼoeˇ loꞈ-ehˇ gʼeh-eu tsawˇ haˬ-ahˇ sehꞈ dzeh-awˬ.

⁶“Nawˇ hawˇ-eu nawˬ-euˬ aˬ poeˬ aˬ bawˇ deuˬ tiˬ jawˇ-iˬ uˬ duˬ maˬ tahˬ haw-euˬ miˬ yehˇ nui deuˬ-ahˇ nawˇ uˬ duˬ tahˬ ni, nawˬ-euˬ aˬ buˇ aˬ li, nawˇ gaˬ-eu nawˬ-euˬ miˬ zaˬ hawˇ-eu, nawˬ-ahˇ gʼoeˇ dui dui-eu nawˬ-euˬ cawˬ deuˬ kʼawꞈ, nawˬ-ahˇ ciˬ cuˇ ni gʼaˬ kʼoeˬ biꞈ nehˬ laꞈ tehꞈ-a.

⁷Naw maꞈ-euˬ dawˬ peh jawˇ-eu tsawˇ jeuˬ deuˬ-euˬ miˬ yehˇ deuˬ-ahˇ maˬ ngeuˇ naˇ, gaˇ mahˇ kaˬ gaˇ jawˇ-eu deuˬ-euˬ miˬ yehˇ deuˬ-ahˇ uˬ duˬ tahˬ ni, aˬ yawꞈ maꞈ tiˬ gʼaˬ na nawˬ-ahˇ gʼaˬ biꞈ-eu baw tehꞈ-a.

⁸Aˬ yawꞈ muˇ juˇ juˇ-eu mehˬ nah naw maꞈ maˬ ya caw teh-a. Aˬ yawꞈ-euˬ dawˬ-ahˇ keuˆ ni, tiˬ pawꞈ-iˬ taˬ naˇ haˬ. Aˬ yawꞈ-ahˇ gʼawˬ shaˬ maˬ ya gaˬ-eu uˬ taꞈ, maˬ ya sheuˬ zaꞈ-a.

⁹Aˬ yawꞈ-ahˇ sehꞈ-awˬ. Aˬ yawꞈ-ahˇ kʼaˬ lo biˬ dawꞈ dawꞈ-awˇ, yawˬ gʼaˬ na luꞈ ga uiˬ-awˇ bi biꞈ sehꞈ-awˬ.

¹⁰Aˬ jeˬ miˇ neh ehˇ naˇ, naw maꞈ aˬ cawˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ka kʼoꞈ doˆ nehˬ laꞈ-euˬ naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ gaˇ mahˇ kaˬ-iˇ ni, naw maꞈ-ahˇ sheuˬ gʼawˬ-eu lehˇ aˬ yawꞈ leh jeh-eu meh.

¹¹Pyeuꞈ laˇ-euˬ gaˇ kawˆ kʼoeˇ Iˇsaˬleˬlaˆ tsawˇ haˬ dawˬ tawˆ luꞈ ya gaˬ-awˇ guˆ-eu laꞈ kʼoeˇ, kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ-ahˇ, tsawˇ haˬ tiˬ gʼaˬ-iˬ maˬ paˇ mˇ peuˬ ni pyeuꞈ-iˇ tehꞈ-a.

¹²“Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ-ahˇ biꞈ-euˬ meuˬ deuˬ laꞈ kʼoeˇ naw maꞈ jawˇ luꞈ ngeh, naw maꞈ tsawˇ jeuˬ laꞈ kʼoeˇ gaˇ dahˇ maˬ tsoeˬ-eu tsawˇ haˬ tiˬ paˆ na deuˬ-aˬ, aˬ yawꞈ maꞈ-euˬ meuˬ-ahˇ jawˇ-eu tsawˇ haˬ deuˬ-ahˇ, naw maꞈ tiˬ jawˇ-iˬ uˬ duˬ maˬ tahˬ haw-euˬ miˬ yehˇ deuˬ-ahˇ uˬ duˬ tahˬ ni gaˇ ma sheuˬ bahˬ nehˬ-euˬ gaˇ kawˆ, naw maꞈ ya gaˬ tehꞈ-a.

¹⁴Kʼoeˇ loꞈ-ehˇ ja-eu ya gaˬ ngeh, yaw muiˬ paˬ-ehˇ pyehˆ tseˇ haw-awˇ, kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ aˬ diˇ aˬ maˇ pyeuꞈ doˆ laˇ-euˬ ya mawˇ naˇ,

¹⁵meuˬ kʼoeˇ deuˬ laꞈ kʼoeˇ jawˇ-eu tsawˇ haˬ dawˬ tawˆ luꞈ hawˇ-eu, aˬ yawꞈ maꞈ-euˬ jeˬ zaˬ dawˬ tawˆ luꞈ-ahˇ sehꞈ-awˬ. Meuˬ kʼoeˇ meuˬ-ahˇ geuꞈ-eu jeˬ maˬ ahˇ gaˇ keuˆ ni laˆ luˬ laˆ seˇ nehˬ-awˬ.

¹⁶Tsawˇ haˬ kʼoeˇ deuˬ-euˬ myawˬ gahˬ dawˬ tawˆ luꞈ, meuˬ gʼahˇ lahˇ ceh jaˆ-eu deh ga-ahˇ baꞈ bymˇ-awˇ, meuˬ kʼoeˇ meuˬ hawˇ-eu kʼoeˇ gaˇ kʼaˇ jaˆ-eu jeˬ dawˬ tawˆ luꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ lawˇ-eu jeˬ loꞈ-ehˇ dzah puiˆ dzeh-awˬ. Laˆ luˬ laˆ seˇ nehˬ-euˬ meuˬ kʼoeˇ meuˬ-ahˇ, tiˬ jawˇ-iˬ maˬ paˇ tsoˆ muiˬ ni, mˬ maˬ maˬ byaˆ zaˇ ziˇ kʼoeˇ loꞈ-ehˇ ya bi jaˆ meh.

¹⁷Sahˬpaˬ Miˬyehˇ nui ma pehˇ-eu shuꞈ-iˇ-awˇ, naw maꞈ-ahˇ gʼawˬ shaˬ gaˬ ni, bi laˆ luˬ bi laˆ seˇ-eu gʼaˇ duˬ yaˬ kʼehˇ yaˬ nehˬ taˬ-euˬ myawˬ kʼoeˇ deuˬ, naw maꞈ gʼaˇ duˬ maˬ ya yuˇ geuꞈ-a. Iˬ nah naw maꞈ-ahˇ biꞈ-euˬ aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naw maꞈ naˇ haˬ geuꞈ-awˇ, aˬ yawꞈ neh kʼaˇ bi mˇ-euˬ jeˬ-ahˇ naw maꞈ mˇ naˇ, naw maꞈ-euˬ aˬ poeˬ aˬ bawˇ deuˬ-ahˇ aˬ yawꞈ neh saˇ jaˇ dzaˬ taˬ-euˬ loꞈ-ehˇ,

¹⁸aˬ yawꞈ naw maꞈ-ahˇ gʼawˬ shaˬ gaˬ-eu laꞈ kʼoeˇ, myaˬ dui behˇ dui dui-eu tsawˇ jeuˬ bi pyeuꞈ laˇ tehꞈ-a.