Read Akha Dawˬmehˬ 14 Bible Online

Dawˬmehˬ 14 - Akha bible

Dawˬmehˬ 14

¹“Naw maꞈ-aˬ, naw maꞈ-euˬ Miˬ yehˇ pyeuꞈ-eu Sahˬ paˬ Miˬ yehˇ-euˬ tsawˇ haˬ meh. Kʼoeˇ miˇ neh, aˬ cawˬ tsawˇ jeuˬ deuˬ shiˇ-euˬ tsawˇ haˬ deuˬ gʼaˇ duˬ tsawˇ ngoeˇ ngoeˇ ngeh jahˇ-eu loꞈ-ehˇ, yawˬ ha-euˬ shaˬ jiˇ-ahˇ kahˬ naˇ-awˇ, naˇ kʼawˇ kʼoeˇ taˆ uˬ duˬ tsehˇ kahˇ jehˆ dzeh-eu jeˬ naw maꞈ taˬ mˇ.

²Naw maꞈ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬ yehˇ-euˬ tsawˇ haˬ pyeuꞈ-awˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ laꞈ kʼoeˇ, aˬ yawꞈ-euˬ tsawˇ jeuˬ bi pyeuꞈ laˇ-eu lehˇ, aˬ yawꞈ neh tseˇ doˆ taˬ-euˬ meh.

³“Sahˬpaˬ Miˬyehˇ neh maˬ shawˇ-a lehˇ ehˇ taˬ-euˬ jeˬ tiˬ jeˬ-iˬ taˬ dzaˬ.

⁴Naw maꞈ dzaˬ nya-eu jeˬ zaˬ deuˬ-aˬ, mawˇ neˇ, yawˇ, ciꞈ myehꞈ,

⁵kʼaˬ tsehˆ, bawˇ tsahˬ yawˇ, yaˬ, ciˇ haˬ, heu deuˬ meh.

⁶Kuiˇ sehˬ nyiˬ paˆ baw-awˇ, dzaˇ jiˆ jiˆ-eu jeˬ zaˬ deuˬ naw maꞈ dzaˬ kʼmˬ meh.

⁷Ehˇ kʼawꞈ, kuiˇ sehˬ nyiˬ paˆ maˬ baw-ehˇ, dzaˇ jiˆ maˬ jiˆ-eu jeˬ zaˬ deuˬ naw maꞈ maˬ dzaˬ kʼmˬ-a. Law taw, lahˬ hawˇ-eu, kuiˬ siˆ zaꞈ siˆ-euˬ shaˬ jiˇ naw maꞈ maˬ dzaˬ kʼmˬ-a. Kʼoeˇ deuˬ-aˬ, dzaˇ jiˆ jiˆ kʼawꞈ, kuiˇ sehˬ nyiˬ paˆ maˬ baw-eu miˇ neh, maˬ shawˇ-eu jeˬ zaˬ lehˇ ya sawˇ meh.

⁸Aˬ zaꞈ shaˬ jiˇ maˬ dzaˬ kʼmˬ-a. Aˬ zaꞈ-aˬ, kuiˇ sehˬ nyiˬ paˆ baw kʼawꞈ, dzaˇ jiˆ maˬ jiˆ-eu miˇ neh, maˬ shawˇ-eu jeˬ zaˬ lehˇ ya sawˇ meh. Jeˬ zaˬ kʼoeˇ deuˬ-euˬ shaˬ jiˇ maˬ dzaˬ kʼmˬ-eu uˬ taꞈ, shiˇ taˬ-euˬ gaˇ kʼawꞈ, maˬ toeˬ ciˆ kʼmˬ-a.

⁹“Yehˇ ma hawˇ-eu ngaˬ gʼaw kʼaˇ tsoꞈ-eu aˬ geu jeˬ ngaˬ shaˬ maˬ kaˬ, naw maꞈ dzaˬ kʼmˬ meh.

¹⁰Ehˇ kʼawꞈ, yehˇ ma hawˇ-eu ngaˬ gʼaw maˬ tsoꞈ-eu iˇ cuꞈ laꞈ kʼoeˇ kʼaˇ dehꞈ kʼaˇ jawˇ-eu aˬ geu jeˬ maˬ kaˬ, naw maꞈ maˬ dzaˬ kʼmˬ-a. Kʼoeˇ loꞈ-ehˇ gʼeh-eu deuˬ-aˬ, maˬ shawˇ-a lehˇ ya siˬ nya meh.

¹¹“Shawˇ-eu aˇ jiˇ aˬ geu jeˬ maˬ kaˬ, naw maꞈ dzaˬ kʼmˬ meh.

¹²Ehˇ kʼawꞈ, kʼaˬ dzeˇ dzeˇ ma, kʼaˬ dzeˇ jeˬ shiˇ, kʼaˬ dzeˇ bu, kʼaˬ dzeˇ pyawˆ, hawˬ bu byaˆ, awꞈ-aꞈ, law taw aˇ jiˇ, dzeˇ ngawˇ, iˬ ma laˆ shaˆ uiˇ dzoeˬ, bo-mˬ bo lo, dui-mˬ dui bui lui, uiˇ jawˇ lawˇ si, bawˇ tsahˬ jehˆ kʼaˬ, uiˇ za naˆ, shaˬ jiˇ yaw buꞈ dzaˬ-eu aˇ jiˇ deuˬ, uiˇ za shuiˇ, uiˇ dzoeˬ, ho piˬ doiˬ doiˬ, boeˇ kʼaˬ, heu deuˬ-aˬ, naw maꞈ maˬ dzaˬ kʼmˬ-eu aˇ jiˇ deuˬ meh.

¹⁹“Aˬ dahˇ kʼaˇ tsoꞈ-eu aˇ mawˇ deuˬ-aˬ, maˬ shawˇ-eu jeˬ pyeuꞈ-eu miˇ neh, maˬ dzaˬ kʼmˬ-a.

²⁰Shawˇ-eu aˇ mawˇ deuˬ naw maꞈ dzaˬ kʼmˬ meh.

²¹“Aˬ yawˇ yawꞈ shiˇ-euˬ jeˬ zaˬ deuˬ naw maꞈ maˬ dzaˬ kʼmˬ-a. Naw maꞈ nehˬ-ehˇ jawˇ luꞈ-eu boeˇ miˬ siˬ kʼaˬ deuˬ-ahˇ bi dzaˬ nya meh. Maˬ ngeuˇ naˇ, boeˇ miˬ siˬ kʼaˬ nui deuˬ-ahˇ ahˬ nehˬ nya meh. Ehˇ kʼawꞈ, naw maꞈ-aˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taꞈ-awˇ, aˬ yawꞈ-euˬ tsawˇ jeuˬ pyeuꞈ-eu meh. “Yawˇ zaˬ hawˇ-eu ciꞈ myehꞈ ciꞈ zaˬ-ahˇ, aˬ ma mawˇ-euˬ aˬ coeˇ nehˬ-ehˇ maˬ ya caꞈ keuˬ-a.

²²“Aˬ yawꞈ kʼoꞈ yawꞈ naw maꞈ neh kʼaˇ mˇ za-euˬ jeˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ yuˇ doˆ taˬ-awˬ.

²³Kʼoeˇ naˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh aˬ yawꞈ-ahˇ uˬ duˬ bi tahˬ-eu lehˇ tseˇ doˆ taˬ-euˬ jawˇ duˬ-ahˇ le-awˇ, naw maꞈ-euˬ dzaˬ la gʼo cehˇ, aˬ gaꞈ dzaˇ uiˇ hawˇ-eu saˬ loˬ tsiˇ, mawˇ neˇ hawˇ-eu yawˇ, heu deuˬ laꞈ kʼoeˇ yuˇ doˆ taˬ-euˬ tseˇ bymˇ tiˬ bymˇ-ahˇ, kʼoeˇ gaˇ, aˬ yawꞈ-euˬ mehˬ shi dzaˬ-awˬ dawˇ-awˬ. Naw maꞈ-euˬ Miˬyehˇ pyeuꞈ-euˬ Sahˬpaˬ Miˬyehˇ-ahˇ aˬ myah luꞈ yaw zeu baw nya laˇ ni, kʼoeˇ loꞈ-ehˇ mˇ-awˬ.

²⁴Sahˬpaˬ Miˬyehˇ neh naw maꞈ-ahˇ guiˬ lahˬ biꞈ laꞈ-awˇ mˇ za-euˬ deuˬ laꞈ kʼoeˇ, tseˇ bymˇ tiˬ bymˇ yuˇ gʼeh-eu gʼaˇ duˬ, uˬ duˬ tahˬ-eu jawˇ duˬ kʼoeˇ naw maꞈ jawˇ gaˇ neh gaˇ mahˇ kaˬ gaˇ jaˆ naˇ, heu loꞈ-ehˇ jahˇ-awˬ.

²⁵Naw maꞈ neh mˇ za-eu jeˬ ahˬ-awˇ, uˬ duˬ tahˬ-eu jawˇ duˬ-ahˇ pyuˇ yuˇ gʼeh-awˬ.

²⁶Mawˇ neˇ shaˬ jiˇ maˬ ehˇ, yawˇ shaˬ jiˇ maˬ ehˇ, aˬ gaꞈ dzaˇ uiˇ maˬ ehˇ, jiˇ baˬ maˬ ehˇ, Sahˬpaˬ Miˬyehˇ mehˬ shi pyuˇ kʼoeˇ neh naw maꞈ kʼaˇ dzaˬ mawꞈ-eu jeˬ zeuˇ dzaˬ-awˇ, naw maꞈ-euˬ miˬ sawˇ zaˬ deuˬ nehˬ-ehˇ tiˬ kawˆ loꞈ-ehˇ dzaˬ-awˇ dawˇ-awˇ laˬ kʼaˬ cehˇ-awˬ.

²⁷“Naw maꞈ-euˬ meuˬ deuˬ-ahˇ jawˇ-eu Leˬbiˇ tsawˇ haˬ deuˬ-ahˇ taˬ ngehˇ. Aˬ yawꞈ maꞈ-aˬ, yawˬ ha-ahˇ oꞈ-eu jeˬ biˇ maˬ jaˆ-a.

²⁸Smˇ kʼoꞈ doˆ le ngeh tiˬ poˆ, naw maꞈ neh kʼaˇ mˇ za-euˬ dzaˬ la gʼo cehˇ dawˬ tawˆ luꞈ laꞈ kʼoeˇ tseˇ bymˇ tiˬ bymˇ yuˇ laꞈ-awˇ, naw maꞈ-euˬ meuˬ deuˬ laꞈ kʼoeˇ jeˬ hmˬ taˬ-awˬ.

²⁹Dzaˬ dzaˬ dawˇ dawˇ kʼoeˇ deuˬ-aˬ, naw maꞈ-euˬ meuˬ deuˬ-ahˇ jawˇ luꞈ-eu jeˬ biˇ maˬ baw-eu Leˬbiˇ tsawˇ haˬ deuˬ, boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu miˬ coeˬ miˬ ma deuˬ gʼaˇ duˬ meh. Aˬ yawꞈ maꞈ kʼaˇ loˬ-eu loꞈ-ehˇ, kʼoeˇ gaˇ yuˇ laꞈ tehꞈ-a. Naw maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ guiˬ lahˬ biꞈ laꞈ ni, naw maꞈ kʼoeˇ loꞈ-ehˇ mˇ-awˬ.