Read Akha Dawˬmehˬ 22 Bible Online

Dawˬmehˬ 22 - Akha bible

Dawˬmehˬ 22

¹“Nawˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ tiˬ gʼaˬ na-euˬ mawˇ neˇ maˬ ehˇ, yawˇ maˬ ehˇ, tiˬ mawˇ na iˇ byoˆ gʼeh-eu nawˇ ya mawˇ naˇ, maˬ siˬ maˬ mawˇ-euˬ maˬ geuꞈ ni, teh kʼoꞈ gʼeh nehˬ-awˬ.

²Ehˇ kʼawꞈ, yaw sahˇ gʼaˬ gaˇ mahˇ jawˇ-eu miˇ neh, yaw sahˇ maˬ siˬ duˬ nya naˇ, nawˬ-euˬ nymˇ-ahˇ teh kʼoꞈ gʼeh-awˇ, yaw sahˇ gʼaˬ poˆ kʼoꞈ laˇ ngeh biꞈ kʼoꞈ nehˬ-awˬ.

³Yawˬ ha-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ-euˬ mahˬ tahˬ laˆ maˬ ehˇ, mehˬ tsoeˬ maˬ ehˇ, nui jeˬ aˬ geu jeˬ maˬ ehˇ, byoˆ-iˇ ngeh, nawˇ ya mawˇ naˇ, kʼoeˇ loꞈ-ehˇ jahˇ-awˬ.

⁴“Yawˬ ha-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ tiˬ gʼaˬ na-euˬ mahˬ tahˬ laˆ maˬ ehˇ, mawˇ neˇ maˬ ehˇ, coˬ dzeh taˬ-euˬ gaˇ nawˇ ya mawˇ ngeh, maˬ siˬ maˬ mawˇ-euˬ maˬ geuꞈ ni, aˬ yawꞈ nehˬ-ehˇ caw baꞈ tuˇ nehˬ-awˬ.

⁵“Zaˬ miˬ zaˬ deuˬ kʼaˬ dzeˇ zaˬ deuˬ-euˬ mehˬ tsoeˬ maˬ ya dm-a. Kʼaˬ dzeˇ zaˬ deuˬ kʼawꞈ zaˬ miˬ zaˬ deuˬ-euˬ mehˬ tsoeˬ maˬ ya dm-a. Kʼoeˇ loꞈ-ehˇ jahˇ-eu tsawˇ haˬ-ahˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ bye-eu meh.

⁶“Aˇ bawˇ kʼoeˇ taˆ jaˆ-eu aˇ jiˇ bahˬ laꞈ kʼoeˇ maˬ ehˇ, miˇ tsaˬ-ahˇ jaˆ-eu aˇ jiˇ bahˬ laꞈ kʼoeˇ maˬ ehˇ, ya uˆ uˆ luꞈ-eu aˇ jiˇ maˬ kaˬ, zaˬ ceuꞈ ahˇ taˬ-awˇ jawˇ-eu aˇ jiˇ maˬ kaˬ, nawˇ ya mawˇ ngeh, aˬ ma mawˇ maˬ ya nyehꞈ-a.

⁷Zaˬ deuˬ-ahˇ nawˇ nyehꞈ geuꞈ kʼawꞈ, aˬ ma mawˇ-ahˇ nawˇ ya pyehˬ nehˬ meh. Nawˇ ziˇ baw-awˇ, baw le za le ni kʼoeˇ loꞈ-ehˇ ya mˇ meh.

⁸“Nawˇ nymˇ yaw shuiꞈ tsoˆ ngeh, nymˇ mˬ jawˬ jawˬ-ehˇ ya taw lahˇ meh. Tsawˇ haˬ tiˬ gʼaˬ na ga sehꞈ naˇ, nawˬ-euˬ kʼoeˇ taˆ iˬ baˇ maˬ ya bi keuˆ le-eu gʼaˇ duˬ, kʼoeˇ loꞈ-ehˇ ya jahˇ meh.

⁹“Nawˬ-euˬ aˬ gaꞈ yaˇ kmˇ laꞈ kʼoeˇ nui jeˬ maˬ ya ka keuˬ-a. Ka keuˬ naˇ, aˬ gaꞈ aˇ siˬ maˬ ehˇ, nui jeˬ maˬ ehˇ, nawˇ maˬ ya pyaˆ dzaˬ-a.

¹⁰“Mawˇ neˇ hawˇ-eu mahˬ tahˬ laˆ tiˬ gaˇ paꞈ gm-awˇ deh yaˇ maˬ ya tsehˬ-a.

¹¹“Yawˇ caꞈ hm hawˇ-eu saˬ laˬ saˬ kahˇ tiˬ gaˇ zaꞈ keuˬ-awˇ, dm gʼaˬ dm lmˇ maˬ ya guꞈ dm-a.

¹²“Nawˬ-euˬ mehˬ tsoeˬ-euˬ mehˬ dzaˬ laꞈ coeˇ oeˬ coeˇ luꞈ-ahˇ, dawˬ sheuˇ ya guꞈ tsoꞈ meh.

¹³“Tsawˇ haˬ tiˬ gʼaˬ miˬ zaˬ sheuˬ-awˇ, jawˇ taꞈ gʼaˬ-awˇ neh, maˬ paˇ sheuˬ mawꞈ-ehˇ pyeuꞈ-iˇ-euˬ ehˇ-awˬ.

¹⁴Kʼoeˇ miˇ neh, zaˬ miˬ zaˬ kʼoeˇ gʼaˬ-ahˇ aˬ yawꞈ sheuˬ ngeh, miˬ shuiꞈ maˬ ngeuˇ law hawˇ ngaˬ lehˇ, maˬ tsaˬ maˬ dawˇ-eu laꞈ kʼoeˇ dehˬ lehꞈ-eu ehˇ-awˬ.

¹⁵“Kʼoeˇ loꞈ-ehˇ gʼeh-eu gaˇ kawˆ pyeuꞈ doˆ laˇ naˇ, zaˬ miˬ zaˬ kʼoeˇ gʼaˬ-euˬ aˬ ma aˬ da deuˬ, oeˇ mˇ baˇ ngeh zmˬ-euˬ shiˬ lehꞈ-eu kʼawˬ daˬ yuˇ-awˇ, meuˬ kʼoeˇ taˆ aˬ yuiꞈ aˬ tsu geuꞈ-eu deuˬ jawˇ-eu saˇ naˇ-ahˇ iˇ-awˇ, aˬ yawꞈ ha-euˬ aˬ buˇ miˬ shuiꞈ pyeuꞈ-eu gaˇ kawˆ saˇ kiˇ ya kamˬ meh.

¹⁶Zaˬ miˬ aˬ buˇ kʼoeˇ gʼaˬ-euˬ aˬ da gʼaˬ, aˬ yawꞈ maꞈ-ahˇ heu loꞈ-ehˇ ya ehˇ nehˬ meh. ‘Ngaˬ buˇ-ahˇ, tsawˇ haˬ heu gʼaˬ-ahˇ bi mˇ dzaˬ-iˇ-euˬ ma. Ehˇ kʼawꞈ, nymˬ-mˇ, ngaˬ buˇ-ahˇ aˬ yawꞈ maˬ paˇ geuꞈ mawꞈ ni pyeuꞈ laˇ taˬ-euˬ meh.

¹⁷Zaˬ miˬ zaˬ heu gʼaˬ-ahˇ aˬ yawꞈ sheuˬ ngeh, miˬ shuiꞈ maˬ ngeuˇ law hawˇ ngaˬ lehˇ, maˬ tsaˬ maˬ dawˇ-eu laꞈ kʼoeˇ dehˬ lehꞈ-eu meh. Ehˇ kʼawꞈ, ngaˬ buˇ-aˬ miˬ shuiˬ pyeuꞈ-euˬ gaˇ kawˆ saˇ kiˇ jaˆ ma. Oeˇ mˇ baˇ ngeh zmˬ-euˬ shiˬ lehꞈ-eu kʼawˬ daˬ heu hmˬ-ahˇ haw-awˬ’ lehˇ ya ehˇ meh.

¹⁸Kʼoeˇ naˇ, meuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ kʼaˬ dzeˇ zaˬ kʼoeˇ gʼaˬ-ahˇ nyehꞈ-awˇ ya diˬ meh.

¹⁹Kʼaˬ dzeˇ zaˬ kʼoeˇ gʼaˬ-ahˇ pyuˇ maˇ byaˆ tiˬ yaˇ byaˆ aˬ yawꞈ maꞈ guiˇ oꞈ tiꞈ-awˇ, zaˬ miˬ aˬ buˇ kʼoeˇ gʼaˬ-euˬ aˬ da-ahˇ ya biꞈ meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ zaˬ miˬ zaˬ tiˬ gʼaˬ kʼoeˇ taˆ shaꞈ dawˇ-eu jeˬ keuˆ le ni aˬ yawꞈ jahˇ-euˬ meh. Kʼoeˇ uˬ taꞈ, zaˬ miˬ zaˬ kʼoeˇ gʼaˬ-ahˇ aˬ yawꞈ paˇ ya sheuˬ kʼoꞈ-awˇ, maˬ shiˇ tiˬ ziˇ maˬ ya gʼawˬ-iˇ-a.

²⁰“Ehˇ kʼawꞈ, kʼaˬ dzeˇ zaˬ gʼaˬ neh ehˇ-euˬ loꞈ-ehˇ tsaˬ-awˇ, zaˬ miˬ aˬ buˇ kʼoeˇ gʼaˬ miˬ shuiꞈ pyeuꞈ-eu gaˇ kawˆ saˇ kiˇ maˬ jaˆ naˇ,

²¹zaˬ miˬ aˬ buˇ kʼoeˇ gʼaˬ-ahˇ aˬ yawꞈ aˬ da-euˬ nymˇ gʼoˆ kʼehˬ-ahˇ aˬ yawꞈ maꞈ sheuˬ gʼeh-awˇ, zaˬ miˬ aˬ buˇ kʼoeˇ gʼaˬ jawˇ-eu meuˬ-ahˇ jawˇ-eu tsawˇ haˬ deuˬ neh kʼaˬ lo ya bi biˬ sehꞈ meh. Zaˬ miˬ aˬ buˇ kʼoeˇ gʼaˬ-aˬ, maˬ mˇ dzaˬ-iˇ mi naˆ-ehˇ, yawˬ ha aˬ da-euˬ nymˇ-ahˇ jawˇ ngeh neh kʼaˬ dzeˇ zaˬ nehˬ-ehˇ yuꞈ taꞈ-eu laꞈ kʼoeˇ, aˬ dui-euˬ tsawˇ jeuˬ laꞈ kʼoeˇ shaꞈ dawˇ-eu jeˬ doˆ laˇ ni mˇ-euˬ meh. Kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ maˬ ya doˆ laˇ ni, naw maꞈ kʼoeˇ loꞈ-ehˇ ya mˇ meh.

²²“Tsawˇ haˬ tiˬ gʼaˬ aˬ cawˬ-euˬ miˬ zaˬ nehˬ-ehˇ joe luꞈ-eu ya mawˇ naˇ, nyiˬ gʼaˬ luꞈ-ahˇ ya sehꞈ meh. Kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ maˬ ya bi doˆ laˇ ni, naw maꞈ kʼoeˇ loꞈ-ehˇ ya jahˇ meh.

²³“Tsawˇ haˬ tiˬ gʼaˬ aˬ cawˬ-ahˇ ngehˬ cawˬ tsehˆ taˬ-euˬ zaˬ miˬ aˬ buˇ tiˬ gʼaˬ nehˬ-ehˇ meuˬ laꞈ kʼoeˇ yuꞈ taꞈ luꞈ gaˇ bi nyehꞈ-euˬ ehˇ-awˬ.

²⁴Kʼoeˇ loꞈ-ehˇ pyeuꞈ laˇ naˇ, aˬ yawꞈ nyaꞈ nyiˬ gʼaˬ luꞈ-ahˇ meuˬ laꞈ nyiˇ sheuˬ doˆ gʼeh-awˇ, kʼaˬ lo neh ya biˬ sehꞈ meh. Zaˬ miˬ aˬ buˇ kʼoeˇ gʼaˬ ya shiˇ-eu tsaˬ meh. Aˬ jeˬ miˇ neh ehˇ naˇ, aˬ cawˬ-ahˇ guˇ gaˬ nya-eu meuˬ laꞈ kʼoeˇ kʼoeˇ loꞈ-ehˇ pyeuꞈ laˇ-euˬ kʼawꞈ, caw ba le-awˬ lehˇ aˬ yawꞈ maˬ guˇ-a. Kʼaˬ dzeˇ zaˬ kʼoeˇ gʼaˬ ya shiˇ-eu kʼawꞈ tsaˬ meh. Aˬ jeˬ miˇ neh ehˇ naˇ, aˬ cawˬ-ahˇ ngehˬ cawˬ tsehˆ taˬ-euˬ zaˬ miˬ aˬ buˇ nehˬ-ehˇ aˬ yawꞈ yuꞈ taꞈ-euˬ meh. Kʼoeˇ loꞈ-ehˇ gʼeh-eu maˬ muiˬ maˬ jaˬ-eu jeˬ maˬ ya doˆ laˇ ni, naw maꞈ kʼoeˇ loꞈ-ehˇ ya mˇ meh.

²⁵“Tsawˇ haˬ tiˬ gʼaˬ na, aˬ cawˬ-ahˇ ngehˬ cawˬ tsehˆ taˬ-euˬ zaˬ miˬ aˬ buˇ tiˬ gʼaˬ-ahˇ, bawˇ tsahˬ-ahˇ tahˬ puˬ-awˇ, dawꞈ-awˇ yehˬ bawˬ sehˇ lu-ehˇ gʼeh nehˬ-euˬ ehˇ-awˬ. Kʼoeˇ loꞈ-ehˇ pyeuꞈ laˇ naˇ, kʼaˬ dzeˇ zaˬ gʼaˬ-ahˇ tehꞈ-ehˇ ya sehꞈ meh.

²⁶Zaˬ miˬ aˬ buˇ kʼoeˇ gʼaˬ-ahˇ tiˬ jeˬ-iˬ maˬ ya jahˇ-a. Aˬ jeˬ miˇ neh ehˇ naˇ, ya shiˇ gaˇ keuˆ ni aˬ yawꞈ neh mˇ lehˬ taˬ-euˬ jeˬ maˬ jaˆ-a. Gaˇ kawˆ heu hmˬ-aˬ, tsawˇ haˬ tiˬ gʼaˬ neh yawˬ gʼaˬ yawˬ-ahˇ dawꞈ-awˇ sehꞈ-euˬ gaˇ kawˆ-ahˇ duˇ-eu meh.

²⁷Kʼaˬ dzeˇ zaˬ kʼoeˇ gʼaˬ bawˇ tsahˬ-ahˇ aˬ yawꞈ-ahˇ yehˬ bawˬ sehˇ lu-ehˇ jahˇ-euˬ miˇ neh, caw ba le-awˬ lehˇ aˬ yawꞈ guˇ kʼawꞈ, caw ba nehˬ-eu gʼaˬ maˬ jawˇ-a.

²⁸“Tsawˇ haˬ tiˬ gʼaˬ na, ngehˬ cawˬ taˬ-euˬ maˬ jaˆ-eu zaˬ miˬ aˬ buˇ tiˬ gʼaˬ-ahˇ dawꞈ-awˇ yehˬ bawˬ sehˇ lu-ehˇ jahˇ luꞈ gaˇ aˬ cawˬ neh bi nyehꞈ-euˬ ehˇ-awˬ.

²⁹Tsawˇ haˬ kʼoeˇ gʼaˬ zaˬ miˬ aˬ buˇ-euˬ aˬ da-ahˇ zaˬ miˬ laˬ poeˬ pyuˇ maˇ byaˆ ngaˬ tseˇ byaˆ ya biꞈ-awˇ, zaˬ miˬ aˬ buˇ kʼoeˇ gʼaˬ-ahˇ ya sheuˬ meh. Aˬ jeˬ miˇ neh ehˇ naˇ, zaˬ miˬ aˬ buˇ kʼoeˇ gʼaˬ-ahˇ aˬ yawꞈ yehˬ bawˬ sehˇ lu-ehˇ jahˇ nehˬ-euˬ meh. Zaˬ miˬ aˬ buˇ kʼoeˇ gʼaˬ-ahˇ maˬ shiˇ tiˬ ziˇ aˬ yawꞈ maˬ gʼawˬ-iˇ ni ya dahˬ dzaˬ meh.

³⁰“Yawˬ ha aˬ da-euˬ miˬ zaˬ tiˬ gʼaˬ na nehˬ-ehˇ yuꞈ taꞈ-eu laꞈ kʼoeˇ, yawˬ ha aˬ da-euˬ kʼoeˇ taˆ shaꞈ dawˇ-eu jeˬ keuˆ le ni tsawˇ haˬ tiˬ gʼaˬ-iˬ maˬ mˇ kʼmˬ-a.