Read Akha Dawˬmehˬ 25 Bible Online

Dawˬmehˬ 25 - Akha bible

Dawˬmehˬ 25

¹“Iˇsaˬleˬlaˆ tsawˇ haˬ nyiˬ gʼaˬ yaw kaˬ dawˬ ja doˆ laˇ-euˬ miˇ neh, yaˇ kʼaˬ daˇ duˬ-ahˇ le-awˇ bi laˆ tsaˬ leˇ ngeh, tiˬ gʼaˬ-aˬ iˬ baˇ ahˇ-awˇ, yawˬ gʼaˬ yawˬ iˬ baˇ maˬ ahˇ-a lehˇ bi daˇ tsehˆ-euˬ ehˇ-awˬ.

²Iˬ baˇ ahˇ-eu kʼoeˇ gʼaˬ-ahˇ ya diˬ meh lehˇ daˇ tsehˆ nehˬ-euˬ ngeuˇ naˇ, yaˇ kʼaˬ daˇ-eu gʼaˬ tsawˇ haˬ kʼoeˇ gʼaˬ-ahˇ moꞈ tsahˬ-ehˇ bi yuꞈ-awˇ, aˬ yawꞈ-euˬ mehˬ shi ya bi diˬ meh. Aˬ yawꞈ neh mˇ lehˬ-euˬ iˬ baˇ-ahˇ haw-awˇ, aˇ myaˆ laꞈ ya diˬ-euˬ ya daˇ tsehˆ nehˬ meh.

³Oeˬ tseˇ laꞈ keuˆ ni aˬ yawꞈ-ahˇ diˬ nya meh. Ehˇ kʼawꞈ, kʼoeˇ uˬ taꞈ-ehˇ maˬ ya diˬ dzehˬ-a. Oeˬ tseˇ laꞈ diˬ dzehˬ nehˬ naˇ, aˬ cawˬ heu myaˆ ni gʼeh-eu mehˬ shi aˬ yawꞈ gʼaˇ duˬ shaꞈ dawˇ-eu jeˬ doˆ laˇ ni mˇ nehˬ gaˇ duˇ-eu meh.

⁴“Cehˇ nawˬ luꞈ-eu mawˇ neˇ-ahˇ mehˬ tsahˬ maˬ ya tsahˬ-a.

⁵“Mehˇ nmˇ nyiˬ gʼaˬ tiˬ nymˇ dahˬ laꞈ kʼoeˇ jawˇ-awˇ, tiˬ gʼaˬ shiˇ-euˬ ehˇ-awˬ. Shiˇ-euˬ gʼaˬ aˬ li maˬ jawˇ naˇ, aˬ yawꞈ-euˬ miˬ zaˬ pyeuꞈ-eu miˬ coeˬ miˬ ma kʼoeˇ gʼaˬ, aˬ yawꞈ pehˬ-ahˇ aˬ yuiꞈ aˬ nyiˇ maˬ taꞈ-eu tsawˇ haˬ-ahˇ maˬ ya mˇ dzaˬ-iˇ-a. Shiˇ-euˬ gʼaˬ-euˬ mehˇ nmˇ gʼaˬ, zaˬ miˬ zaˬ kʼoeˇ gʼaˬ-ahˇ ya sheuˬ meh.

⁶Iˇsaˬleˬlaˆ tsawˇ jeuˬ laꞈ kʼoeˇ, shiˇ-euˬ gʼaˬ-euˬ aˇ jeuˬ aˇ ca maˬ ya byoˆ-iˇ ni, aˬ yawꞈ nyaꞈ sheuˬ dahˬ dzaˬ-awˇ dehꞈ le-euˬ aˬ li aˬ yuiꞈ gʼaˬ-ahˇ, shiˇ-euˬ gʼaˬ-euˬ aˬ li lehˇ ya sawˇ meh.

⁷Ehˇ kʼawꞈ, shiˇ-euˬ gʼaˬ-euˬ mehˇ nmˇ gʼaˬ aˬ yawꞈ-euˬ aˬ tsu-ahˇ maˬ sheuˬ mawꞈ naˇ, aˬ tsu gʼaˬ, meuˬ kʼoeˇ taˆ aˬ yuiꞈ aˬ tsu geuꞈ-eu deuˬ-euˬ mehˬ shi yawꞈ leˇ-awˇ, heu loꞈ-ehˇ ya ehˇ leˇ meh. ‘Ngaˬ-euˬ kʼaˬ dzeˇ zaˬ-euˬ mehˇ nmˇ-aˬ, aˬ yawꞈ ya mˇ paˬ-ehˇ gʼeh-eu jeˬ maˬ mˇ ni jawˇ-eu meh. Iˇsaˬleˬlaˆ tsawˇ jeuˬ laꞈ kʼoeˇ aˬ yawꞈ-euˬ mehˇ nmˇ-euˬ aˇ jeuˬ aˇ ca maˬ ya byoˆ-iˇ ni aˬ yawꞈ mˇ paˬ-ehˇ gʼeh-eu kʼawꞈ, maˬ mˇ ni jawˇ-eu meh’ lehˇ ya ehˇ leˇ meh.

⁸Kʼoeˇ naˇ, meuˬ kʼoeˇ taˆ aˬ yuiꞈ aˬ tsu geuꞈ-eu deuˬ aˬ yawꞈ-ahˇ ya naˇ haˬ meh. Aˬ yawꞈ-euˬ aˬ tsu-ahˇ aˬ yawꞈ maˬ sheuˬ lehˇ ehˇ naˇ,

⁹meuˬ kʼoeˇ taˆ aˬ yuiꞈ aˬ tsu geuꞈ-eu deuˬ mehˬ shi, aˬ tsu gʼaˬ aˬ yawꞈ dawˬ peh le-awˇ, aˬ yawꞈ-euˬ sehˬ nawˆ tiˬ pyawˬ gʼeu lehˆ nehˬ-awˇ, myaˆ pyawˬ-ahˇ duˬ kʼaˬ kʼa shehˬ nehˬ-awˇ, ‘Yawˬ ha-euˬ mehˇ nmˇ-euˬ aˇ jeuˬ aˇ ca maˬ ya byoˆ-iˇ ni maˬ mˇ mawꞈ-eu gʼaˬ-ahˇ heu loꞈ-ehˇ jahˇ nehˬ nyaˇ’ lehˇ ya ehˇ meh.

¹⁰Aˬ yawꞈ-euˬ aˇ jeuˬ kʼawꞈ, Iˇsaˬleˬlaˆ tsawˇ jeuˬ laꞈ kʼoeˇ sehˬ nawˆ bi gʼeu lehˆ-euˬ aˇ jeuˬ lehˇ tsawˇ myahˇ doˆ tehꞈ-a.

¹¹“Kʼaˬ dzeˇ zaˬ nyiˬ gʼaˬ ceh dzaˬ-awˇ dawꞈ luꞈ ngeh, tiˬ gʼaˬ-euˬ miˬ zaˬ neh yawˬ ha-euˬ kʼaˬ dzeˇ zaˬ-ahˇ caw ba le-awˇ, yawˬ gʼaˬ yawˬ-euˬ uˬ kʼawˇ-ahˇ tsuˆ tehˬ-awˇ gʼeu naˇ,

¹²zaˬ miˬ zaˬ kʼoeˇ gʼaˬ-ahˇ gʼawˬ shaˬ maˬ gaˬ ni, aˬ yawꞈ-euˬ aˬ laꞈ ya deuˆ tsehˆ meh.

¹³Lu jawꞈ-i hawˇ-eu paˆ yawˬ zmˬ ngeh, tsawˇ gahˇ maˬ ya gahˇ dzaˬ-a.

¹⁵Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ biꞈ-eu lehˇ gʼeh-eu miˇ kʼahˬ-ahˇ nawˇ ziˇ baw ni, tsaˬ-eu lu jawꞈ-i hawˇ-eu paˆ yawˬ nawˇ ya zmˬ meh.

¹⁶Tsawˇ gahˇ gahˇ dzaˬ-eu tsawˇ haˬ-ahˇ Sahˬpaˬ Miˬyehˇ bye-eu meh.

¹⁷“Nawˇ Iˇjiˇtuˆ miˇ kʼahˬ laꞈ kʼoeˇ neh doˆ le ngeh, Aˬmaˬlehˇ tsawˇ haˬ deuˬ neh nawˬ-ahˇ jahˇ nehˬ laꞈ-euˬ jeˬ-ahˇ taˬ ngehˇ.

¹⁸Aˬ yawꞈ maꞈ Miˬyehˇ-ahˇ maˬ guˆ-a. Kʼoeˇ miˇ neh, nawˇ gaˇ ma cah doeˇ-awˇ nui ma cawˆ luꞈ ngeh, aˬ yawꞈ maꞈ nawˬ-ahˇ guiˇ deuˆ le-awˇ, nawˬ-euˬ mehˬ nah cah luꞈ-eu deuˬ dawˬ tawˆ luꞈ-ahˇ sehꞈ-euˬ meh.

¹⁹Miˇ kʼahˬ kʼoeˇ kʼahˬ Sahˬpaˬ Miˬyehˇ nawˬ-ahˇ biꞈ nehˬ laꞈ gʼaˬ-awˇ, nawˇ jawˇ-eu jawˬ jawˬ-ehˇ jawˇ luꞈ-eu nawˬ-ahˇ muiˇ-eu deuˬ-ahˇ nawˇ guˆ kʼaˇ maˬ za ni dehꞈ ziꞈ laˇ ngeh, Aˬmaˬlehˇ tsawˇ haˬ deuˬ-ahˇ maˬ ngehˇ ni sehꞈ jiˇ nehˬ-awˬ. Tsawˇ haˬ dawˬ tawˆ luꞈ aˬ yawꞈ maꞈ-ahˇ ya ngehˇ jiˇ ni, kʼoeˇ loꞈ-ehˇ jahˇ kʼoꞈ nehˬ-awˬ. Aˬ yawꞈ maꞈ-ahˇ maˬ sehꞈ ni taˬ byehˇ.