Read Akha Dawˬmehˬ 26 Bible Online

Dawˬmehˬ 26 - Akha bible

Dawˬmehˬ 26

¹“Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh nawˬ-ahˇ biꞈ-euˬ miˇ kʼahˬ-ahˇ nawˇ le keuˆ-awˇ, jawˇ duˬ dah leˇ gʼaˬ ngeh,

²naw maꞈ yawˬ gʼaˬ na luꞈ keuˆ beh beh le-euˬ dzaˬ la gʼo cehˇ aˇ siˬ aˇ lu yawˬ jeˬ na luꞈ kʼaˆ puˬ-ahˇ dawˆ ahˇ-awˇ, uˬ duˬ tahˬ-eu jawˇ duˬ-ahˇ ya hehˇ gʼeh meh.

³Kʼoeˇ ngeh yamˬ-ahˇ kʼoeˇ gaˇ piˇ ma geuꞈ luꞈ-eu gʼaˬ jawˇ gaˇ le-awˇ, ‘Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ biꞈ-eu gʼaˇ duˬ, ngaˬ-euˬ aˬ poeˬ aˬ bawˇ deuˬ-ahˇ saˇ jaˇ dzaˬ taˬ-eu miˇ kʼahˬ-ahˇ ngaˇ uˇ keuˆ laˇ-euˬ gaˇ kawˆ, nymˬ-mˇ ngaˇ aˬ yawꞈ mehˬ shi saˇ kiˇ kamˬ-eu ma’ lehˇ ya ehˇ meh.

⁴“Piˇ ma kʼoeˇ gʼaˬ, nawˇ ciˬ luꞈ-eu kʼaˆ puˬ kʼoeˇ yuˇ-awˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi jaˆ-eu lawˇ duˬ kʼoeˇ taˆ ciˬ daˆ tehꞈ-a.

⁵Kʼoeˇ naˇ, Sahˬpaˬ Miˬyehˇ mehˬ shi nawˇ heu loꞈ-ehˇ ya ehˇ meh. ‘Ngaˬ-euˬ aˬ poeˬ-aˬ, jawˇ duˬ maˬ baw-euˬ Aˬlamˬ tsawˇ haˬ pyeuꞈ-awˇ, aˬ yawꞈ-euˬ miˬ sawˇ zaˬ deuˬ sheuˬ-awˇ Iˇjiˇtuˆ miˇ kʼahˬ-ahˇ jawˇ-iˇ-euˬ meh. Aˬ yawꞈ kʼoeˇ gaˇ jawˇ-iˇ ngeh, tsawˇ haˬ ui cuiˆ tehꞈ kʼawꞈ, tsawˇ haˬ myaˬ laˇ-awˇ baoˬ ahˇ-eu tsawˇ jeuˬ tiˬ jeuˬ pyeuꞈ laˇ-euˬ meh.

⁶Iˇjiˇtuˆ tsawˇ haˬ deuˬ nga maꞈ-ahˇ kʼehˬ-awˇ, zaˬ kʼaˆ loꞈ-ehˇ gaˇ bi mˇ laꞈ-euˬ meh.

⁷Kʼoeˇ ngeh, nga maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuˬ-eu Sahˬpaˬ Miˬyehˇ-ahˇ, caw ba le-awˬ lehˇ nga maꞈ guˇ-euˬ ma. Nga maꞈ guˇ-eu teˇ saˇ-ahˇ aˬ yawꞈ ya gaˬ-awˇ, nga maꞈ ya daˬ luꞈ-eu jeˬ-ahˇ maˬ ehˇ, ya shaˬ ya zahˬ luꞈ gaˇ maˬ ehˇ, noeˬ dui noeˬ duiˇ taˬ-euˬ gaˇ maˬ ehˇ, aˬ yawꞈ ya mawˇ-euˬ meh.

⁸Aˬ yawꞈ-euˬ huiˬ dui dui-eu baoˬ hawˇ-eu gʼaˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ neh nga maꞈ-ahˇ ka kʼoꞈ doˆ nehˬ laꞈ-euˬ meh. Kʼaˆ jeˬ-ehˇ gʼeh-eu jeˬ hawˇ-eu zahˬ leˇ paˬ-ehˇ gʼeh-eu jeˬ aˬ yawꞈ mˇ-awˇ, guˆ dui dui laˇ paˬ-ehˇ gʼeh-eu jeˬ bi pyeuꞈ doˆ laˇ-euˬ meh.

⁹Aˬ yawꞈ nga maꞈ-ahˇ heu gaˇ sheuˬ keuˆ laꞈ-awˇ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ heu kʼahˬ biꞈ laꞈ-euˬ meh.

¹⁰Kʼoeˇ miˇ neh, Sahˬpaˬ Miˬyehˇ neh ngaˬ-ahˇ biꞈ laꞈ-euˬ dzaˬ la gʼo cehˇ hawˇ-eu aˇ siˬ aˇ lu deuˬ laꞈ kʼoeˇ, keuˆ beh beh le-euˬ deuˬ aˬ yawꞈ jawˇ gaˇ ngaˇ yuˇ laꞈ-euˬ ma’ lehˇ, nawˇ ya ehˇ meh. “Kʼoeˇ naˇ, Sahˬpaˬ Miˬyehˇ mehˬ shi kʼaˆ puˬ ciˬ taˬ-awˇ uˬ duˬ ya tahˬ meh.

¹¹Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh, nawˇ hawˇ-eu nawˬ-euˬ miˬ sawˇ zaˬ deuˬ-ahˇ biꞈ nehˬ laꞈ-euˬ muiˬ-eu jeˬ gʼaˇ duˬ, aˬ yawꞈ-euˬ guiˬ lahˬ-ahˇ ja ceuˬ-awˬ. Nawˬ nehˬ-ehˇ jawˇ luꞈ-eu Leˬbiˇ tsawˇ haˬ deuˬ hawˇ-eu aˬ cawˬ tsawˇ jeuˬ deuˬ kʼawꞈ, bawˬ-iˬ gʼeh gaˇ laˬ kʼaˬ bi cehˇ laˇ-awˬ.

¹²“Naw maꞈ-euˬ meuˬ deuˬ laꞈ kʼoeˇ jawˇ-eu Leˬbiˇ tsawˇ haˬ deuˬ, boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu, miˬ coeˬ miˬ ma deuˬ dzaˬ loꞈ dawˇ loꞈ ni, smˇ kʼoꞈ tiˬ poˆ aˬ yawꞈ maꞈ-ahˇ naw maꞈ-euˬ dzaˬ la gʼo cehˇ aˇ siˬ aˇ lu tseˇ bymˇ tiˬ bymˇ biꞈ-awˬ. Nawˇ kʼoeˇ loꞈ-ehˇ mˇ gʼaˬ ngeh,

¹³Sahˬpaˬ Miˬyehˇ-ahˇ heu loꞈ-ehˇ ehˇ nehˬ-awˬ. ‘Nawˇ ngaˬ-ahˇ dawˬ biꞈ taˬ-euˬ loꞈ-ehˇ, muiˬ-eu shawˇ-eu tseˇ bymˇ tiˬ bymˇ ngaˬ-euˬ nymˇ-ahˇ tiˬ pawꞈ-iˬ maˬ bi dzeˇ yaꞈ ni, Leˬbiˇ tsawˇ haˬ deuˬ, boeˇ miˬ siˬ kʼaˬ deuˬ, muˇ coe aˬ nmˇ deuˬ hawˇ-eu miˬ coeˬ miˬ ma deuˬ-ahˇ ngaˇ biꞈ-eu ma. Tseˇ bymˇ tiˬ bymˇ-ahˇ taꞈ leˇ-awˇ, nawˬ neh biꞈ taˬ-euˬ zahˇ dawˬ kʼoꞈ dawˬ tiˬ dawˬ-iˬ maˬ byehˇ ni mˇ luꞈ ma.

¹⁴Tsawˇ ngoeˇ ngoeˇ luꞈ-eu aˇ yamˬ laꞈ kʼoeˇ, tseˇ bymˇ tiˬ bymˇ ngaˇ maˬ dzaˬ haw-aˬ. Ngaˇ maˬ shawˇ-eu tsawˇ haˬ pyeuꞈ luꞈ ngeh, ngaˬ-euˬ nymˇ laꞈ nyiˇ paw tseˇ bymˇ tiˬ bymˇ maˬ yuˇ doˆ gʼeh haw-aˬ. Tseˇ bymˇ tiˬ bymˇ yuˇ-awˇ, shiˇ-euˬ tsawˇ haˬ gʼaˇ duˬ ngaˇ maˬ lawˇ haw-aˬ. Sahˬpaˬ Miˬyehˇ-oˇ, nawˬ-euˬ ehˇ dawˬ-ahˇ ngaˇ naˇ haˬ-euˬ ma. Tseˇ bymˇ tiˬ bymˇ-ahˇ taꞈ leˇ-awˇ, nawˬ neh dawˬ kʼaˇ biꞈ taˬ-eu loꞈ-ehˇ, yawˬ jeˬ na luꞈ ngaˇ mˇ-euˬ ma.

¹⁵Mˬ kʼoeˇ taˆ nawˬ-euˬ muiˬ-eu shawˇ-eu jawˇ duˬ-ahˇ neh haw ka gʼeh leꞈ-awˇ, nawˬ-euˬ Iˇsaˬleˬlaˆ tsawˇ jeuˬ-ahˇ guiˬ lahˬ biꞈ laꞈ-awˬ. Nga maꞈ-euˬ aˬ poeˬ aˬ bawˇ deuˬ-ahˇ nawˬ neh saˇ jaˇ dzaˬ taˬ-euˬ jaˆ-eu loꞈ-ehˇ, nawˬ neh nga maꞈ-ahˇ biꞈ laꞈ-euˬ miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ heu kʼahˬ laꞈ kʼoeˇ, nga maꞈ-ahˇ guiˬ lahˬ biꞈ laꞈ-awˬ’ lehˇ nawˇ ya ehˇ meh.

¹⁶“Aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ lehˇ, Sahˬpaˬ Miˬyehˇ nawˬ-ahˇ iˬ nah dawˬ biꞈ-euˬ meh. Kʼoeˇ miˇ neh, nawˬ-euˬ nui ma dawˬ tawˆ luꞈ, zahˇ sahˇ kʼoꞈ kʼoeˇ deuˬ-ahˇ saˇ jaˇ ziꞈ-eu laꞈ kʼoeˇ, naˇ haˬ geuꞈ-awˬ.

¹⁷“Sahˬpaˬ Miˬyehˇ-aˬ, nawˬ-euˬ Miˬyehˇ ma lehˇ nawˇ ehˇ tsehˆ-eu laꞈ kʼoeˇ, aˬ yawꞈ-euˬ ehˇ dawˬ-ahˇ naˇ haˬ-awˇ, aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ caw teh-eu uˬ taꞈ, aˬ yawꞈ neh dawˬ kʼaˇ biꞈ taˬ-eu loꞈ-ehˇ dawˬ tawˆ luꞈ mˇ ma lehˇ nawˇ saˇ jaˇ dzaˬ gʼaˬ taˬ-euˬ meh.

¹⁸Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, aˬ yawꞈ-euˬ tsawˇ jeuˬ loꞈ-ehˇ naw maꞈ-ahˇ iˬ nah aˬ yawꞈ ha geuꞈ-awˇ, aˬ yawꞈ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ lehˇ, aˬ yawꞈ naw maꞈ-ahˇ dawˬ biꞈ taˬ-euˬ meh.

¹⁹Aˬ yawꞈ neh beh taˬ-euˬ tsawˇ jeuˬ heu myaˆ ni gʼeh-eu laꞈ kʼoeˇ, naw maꞈ-ahˇ huiˬ dzehˬ-eu tsawˇ jeuˬ bi pyeuꞈ laˇ-awˇ, aˬ yawꞈ-euˬ tsawˇ myahˇ-ahˇ naw maꞈ ja ceuˬ-awˇ ya taˬ huiˬ ya taˬ mahˇ tehꞈ-a. Aˬ yawꞈ neh saˇ jaˇ dzaˬ taˬ-euˬ loꞈ-ehˇ, naw maꞈ aˬ yawꞈ-euˬ tsawˇ jeuˬ ya pyeuꞈ laˇ tehꞈ-a.”