Read Akha Dawˬmehˬ 29 Bible Online

Dawˬmehˬ 29 - Akha bible

Dawˬmehˬ 29

¹Heu-aˬ, Sahˬpaˬ Miˬyehˇ neh Moˇseˬ-ahˇ dawˬ biꞈ-awˇ, Iˇsaˬleˬlaˆ tsawˇ haˬ deuˬ nehˬ-ehˇ bi dzaˬ-euˬ dawˬ ma saˇ jaˇ dawˬ deuˬ pyeuꞈ-eu meh. Dawˬ ma saˇ jaˇ dawˬ heu deuˬ-aˬ, Siˇnaˆ gawˬ jawˬ-ahˇ Sahˬpaˬ Miˬyehˇ aˬ yawꞈ maꞈ nehˬ-ehˇ dawˬ ma saˇ jaˇ mˇ gʼaˬ miˇ tsa, yawˬ poˆ yawˬ paˇ biꞈ lahˬ-euˬ dawˬ deuˬ meh.

²Iˇsaˬleˬlaˆ tsawˇ haˬ dawˬ tawˆ luꞈ-ahˇ Moˇseˬ kuˇ uiˬ-awˇ, heu loꞈ-ehˇ ehˇ nehˬ-euˬ meh. “Iˇjiˇtuˆ sahˬ paˬ-ahˇ maˬ ehˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ, aˬ yawꞈ-euˬ miˇ kʼahˬ kʼahˬ lah ni-ahˇ maˬ ehˇ, Sahˬpaˬ Miˬyehˇ neh jahˇ nehˬ-euˬ jeˬ-ahˇ naw maꞈ-euˬ mawˇ do ya mawˇ duˬ gʼaˬ-euˬ meh.

³Guˆ laˇ paˬ-ehˇ gʼeh-eu kʼehˬ-eu kʼaˆ-eu jeˬ maˬ ehˇ, kʼaˆ jeˬ-ehˇ gʼeh-eu jeˬ maˬ ehˇ, yaw kʼaˆ-ehˇ zahˬ leˇ paˬ-ehˇ gʼeh-eu jeˬ maˬ ehˇ, Sahˬpaˬ Miˬyehˇ mˇ-euˬ gaˇ naw maꞈ ya mawˇ-euˬ meh.

⁴Ehˇ kʼawꞈ, noeˬ siˬ noeˬ mawˇ nya-eu nui ma, haw mawˇ nya-eu myaˆ nuiˆ hawˇ-eu, gaˬ nya-eu naˬ bawˇ heu deuˬ, Sahˬpaˬ Miˬyehˇ naw maꞈ-ahˇ maˬ biꞈ-aˬ siˬ.

⁵Oeˬ tseˇ kʼoꞈ keuˆ ni bawˇ tsahˬ bawˇ dahˇ laꞈ kʼoeˇ Sahˬpaˬ Miˬyehˇ naw maꞈ-ahˇ sheuˬ gʼeh-euˬ meh. Ehˇ kʼawꞈ, naw maꞈ-euˬ mehˬ tsoeˬ maˬ cehˇ-iˇ-ehˇ, naw maꞈ-euˬ sehˬ nawˆ maˬ pyaˬ-iˇ-aˬ.

⁶Naw maꞈ dzaˬ-eu gʼaˇ duˬ kaˬ muˇ maˬ jaˆ-ehˇ, naw maꞈ dawˇ-eu gʼaˇ duˬ aˬ gaꞈ dzaˇ uiˇ maˬ jaˆ-a. Ehˇ kʼawꞈ, Sahˬpaˬ Miˬyehˇ aˬ yawꞈ naw maꞈ-euˬ Miˬyehˇ pyeuꞈ-eu gaˇ kawˆ naw maꞈ-ahˇ mehˬ nehˬ tsoˆ nehˬ-eu gʼaˇ duˬ, naw maꞈ kʼaˇ loˬ-eu jeˬ Sahˬpaˬ Miˬyehˇ naw maꞈ-ahˇ biꞈ nehˬ-euˬ meh.

⁷Kʼoeˇ naˇ, jawˇ duˬ heu tsahˇ-ahˇ aˬ dui laˇ keuˆ ngeh, Heˬshaˬboˬ meuˬ-ahˇ jawˇ-eu sahˬ paˬ Siˇhoˬ hawˇ-eu Baˬshaˬ meuˬ-ahˇ jawˇ-eu sahˬ paˬ Awˇgaˆ aˬ nyaꞈ, aˬ dui maꞈ-ahˇ guiˇ deuˆ le-euˬ meh. Ehˇ kʼawꞈ, aˬ yawꞈ nyaꞈ-ahˇ aˬ dui deuˆ gʼaˬ ma.

⁸Aˬ yawꞈ nyaꞈ-euˬ miˇ kʼahˬ aˬ dui yuˇ-awˇ, Luˇbeˬ tsawˇ jeuˬ, Gaˆ tsawˇ jeuˬ hawˇ-eu Maˬnaˇseˬ tsawˇ jeuˬ tiˬ paˆ-ahˇ biꞈ nehˬ-euˬ ma.

⁹Naw maꞈ kʼaˇ mˇ kʼaˇ shaˇ-eu jeˬ laꞈ kʼoeˇ, baw le za le ni, dawˬ ma saˇ jaˇ dawˬ heu deuˬ-ahˇ saˇ jaˇ ziꞈ-eu laꞈ kʼoeˇ naˇ haˬ geuꞈ-awˬ.

¹⁰“Iˬ nah naw maꞈ dawˬ tawˆ luꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi yawꞈ luꞈ-eu meh. Naw maꞈ-euˬ aˬ yuiꞈ aˬ tsu deuˬ hawˇ-eu yaw huiˬ yaw mahˇ deuˬ maˬ ehˇ, kʼaˬ dzeˇ zaˬ deuˬ maˬ ehˇ,

¹¹zaˬ miˬ zaˬ deuˬ maˬ ehˇ, zaˬ deuˬ maˬ ehˇ, naw maꞈ nehˬ-ehˇ jawˇ-eu laꞈ kʼoeˇ naw maꞈ-ahˇ miˬ dzaˬ kʼehꞈ nehˬ-awˇ iˇ cuꞈ kʼawꞈ nehˬ-eu boeˇ miˬ shiˬ kʼaˬ deuˬ maˬ ehˇ, dawˬ tawˆ luꞈ yawꞈ luꞈ-eu meh.

¹²Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh naw maꞈ nehˬ-ehˇ mˇ-euˬ dawˬ ma saˇ jaˇ heu hmˬ laꞈ kʼoeˇ naw maꞈ uˇ leˇ-awˇ, heu gaˇ taꞈ leˇ-eu laꞈ kʼoeˇ naw maꞈ ya mˇ paˬ-ehˇ gʼeh-eu gaˇ deuˬ-ahˇ ha geuꞈ-eu gʼaˇ duˬ, iˬ nah naw maꞈ heu gaˇ yawꞈ luꞈ-eu jeˬ pyeuꞈ-eu meh.

¹³Naw maꞈ hawˇ-eu naw maꞈ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ hawˇ-eu Yaˬkoˆ-ahˇ Sahˬpaˬ Miˬyehˇ saˇ jaˇ dzaˬ taˬ-euˬ loꞈ-ehˇ, naw maꞈ aˬ yawꞈ-euˬ tsawˇ haˬ pyeuꞈ-awˇ, aˬ yawꞈ naw maꞈ-euˬ Miˬyehˇ pyeuꞈ-eu gaˇ kawˆ nymˬ-mˇ uˬ duˬ duˬ laˇ ni, naw maꞈ heu gaˇ yawꞈ luꞈ-eu jeˬ pyeuꞈ-eu meh.

¹⁴Sahˬ paˬ miˬyehˇ mˇ-euˬ dawˬ ma saˇ jaˇ heu hmˬ naw maꞈ-ahˇ tehꞈ-ehˇ taꞈ-eu maˬ ngeuˇ-a.

¹⁵Heu gaˇ, aˬ yawꞈ-euˬ mehˬ shi yawꞈ luꞈ-eu aˬ dui dawˬ tawˆ luꞈ hawˇ-eu, iˬ nah maˬ dehꞈ le dah-euˬ aˬ dui-euˬ zaˬ deuˬ uˆ deuˬ-ahˇ kʼawꞈ, aˬ yawꞈ dawˬ ma saˇ jaˇ dzaˬ luꞈ-eu meh.

¹⁶“Iˇjiˇtuˆ miˇ kʼahˬ laꞈ kʼoeˇ ya dehꞈ ya jawˇ-eu hawˇ-eu, aˬ cawˬ miˇ kʼahˬ doe doe-ehˇ cah cah-ehˇ ya dehꞈ ya jawˇ-eu aˬ joˆ-ehˇ gʼeh-eu naw maꞈ siˬ nya-eu meh.

¹⁷Daˇ kawˬ, kʼaˬ lo, pyuˇ hawˇ-eu shuiˇ heu deuˬ neh jahˇ taˬ-euˬ maˬ haw nahˇ paˬ-ehˇ gʼeh-eu aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-ahˇ naw maꞈ ya mawˇ haw-euˬ meh.

¹⁸Iˬ nah heu gaˇ yawꞈ luꞈ-eu kʼaˬ dzeˇ zaˬ hawˇ-eu zaˬ miˬ zaˬ aˬ geu gʼaˬ maˬ kaˬ, nymˇ jiˇ aˬ geu jiˇ maˬ kaˬ, tsawˇ jeuˬ aˬ geu jeuˬ maˬ kaˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-awˇ, aˬ cawˬ tsawˇ jeuˬ-euˬ miˬyehˇ deuˬ-ahˇ uˬ duˬ maˬ ya tahˬ ni, yaw kʼaˆ kʼaˆ-ehˇ yahˇ-awˬ. Kʼoeˇ loꞈ-ehˇ mˇ-eu jeˬ-aˬ, kʼaˬ jehꞈ ni gʼeh-awˇ doꞈ kʼaˆ dui dui-eu aˇ bawˇ bi bawˇ laˇ-eu duˬ ciˇ-ahˇ duˇ-eu meh.

¹⁹Iˬ nah heu gaˇ yawꞈ luꞈ-eu tsawˇ haˬ deuˬ laꞈ kʼoeˇ, dawˬ ma saˇ jaˇ heu-ahˇ ya gaˬ gʼaˬ-euˬ kʼawꞈ, nui ma gʼahˇ-eu laꞈ kʼoeˇ, yawˬ ha kʼaˇ dehꞈ mawꞈ-eu loꞈ-ehˇ dehꞈ kʼawꞈ yaw muiˬ paˬ-ehˇ ya dehꞈ dzaˬ tehꞈ-a lehˇ tsawˇ haˬ tiˬ gʼaˬ-iˬ maˬ ya noeˬ ni yaw kʼaˆ kʼaˆ-ehˇ yahˇ-awˬ. Kʼoeˇ loꞈ-ehˇ noeˬ-eu jeˬ-aˬ, naw maꞈ dawˬ tawˆ luꞈ-ahˇ yaw muiˬ yaw doeˇ maˬ tseˇ ni, laˆ luˬ laˆ seˇ-eu jeˬ bi keuˆ le tehꞈ-a.

²⁰Kʼoeˇ loꞈ-ehˇ gʼeh-eu tsawˇ haˬ-ahˇ Sahˬpaˬ Miˬyehˇ iˬ baˇ maˬ pyehˬ nehˬ-ehˇ, Sahˬpaˬ Miˬyehˇ-euˬ nui ma pehˇ-eu miˬ dzaˬ aˬ yawꞈ-ahˇ zaw leˇ-awˇ, geuꞈ-eu jeˬ maˬ ahˇ gaˇ keuˆ ni aˬ yawꞈ-ahˇ laˆ luˬ laˆ seˇ nehˬ ngeh keuˆ ni, sahˬ boꞈ heu taꞈ laꞈ kʼoeˇ kʼaˇ boꞈ taˬ-euˬ luˬ-iˇ seˇ-iˇ-eu jeˬ aˬ yawꞈ kʼoeˇ taˆ keuˆ le tehꞈ-a.

²¹Sahˬpaˬ Miˬyehˇ neh mehˬ nehˬ tsoˆ nehˬ-euˬ dawˬ deuˬ boꞈ ahˇ taˬ-euˬ sahˬ boꞈ heu taꞈ laꞈ kʼoeˇ ahˇ-eu, dawˬ ma saˇ jaˇ laꞈ kʼoeˇ kʼaˇ boꞈ taˬ-euˬ yaˬ kʼehˇ yaˬ-eu jeˬ dawˬ tawˆ luꞈ aˬ yawꞈ kʼoeˇ taˆ bi keuˆ le-eu laꞈ kʼoeˇ, aˬ yawꞈ-ahˇ bi luˬ bi seˇ-iˇ tehꞈ-a. Iˇsaˬleˬlaˆ tsawˇ jeuˬ heu myaˆ ni gʼeh-eu haw taˬ-awˇ bi dzaw geuꞈ-eu gʼaˇ duˬ, aˬ yawꞈ maꞈ-euˬ mehˬ shi aˬ yawꞈ-ahˇ Sahˬpaˬ Miˬyehˇ kʼoeˇ loꞈ-ehˇ kʼehˬ nehˬ tehꞈ-a.

²²“Aˬ kaˇ kaˇ ziˇ, naw maꞈ-euˬ zaˬ deuˬ uˆ deuˬ hawˇ-eu gaˇ mahˇ kaˬ-eu miˇ kʼahˬ deuˬ-ahˇ jawˇ-eu tsawˇ haˬ deuˬ, luˬ-iˇ seˇ-iˇ-eu jeˬ hawˇ-eu shaˬ-eu zahˬ-eu jeˬ naw maꞈ miˇ kʼahˬ kʼoeˇ taˆ Sahˬpaˬ Miˬyehˇ bi keuˆ le gaˇ ya mawˇ tehꞈ-a.

²³Naw maꞈ-euˬ miˇ kʼahˬ kʼahˬ lah ni, miˬ dzaˇ dzaˇ shuiˇ hawˇ-eu saˬ deuꞈ tehꞈ-ehˇ byah jiˇ-awˇ, gaˇ dahˇ maˬ tsoeˬ ni pyeuꞈ-iˇ tehꞈ-a. Tiˬ jeˬ-iˬ maˬ ka dzaˬ nya-eu uˬ taꞈ, yaˇ moꞈ kʼawꞈ maˬ dehꞈ ni pyeuꞈ-iˇ tehꞈ-a. Naw maꞈ-euˬ miˇ kʼahˬ-aˬ, Sahˬpaˬ Miˬyehˇ nui ma pehˇ dui dui-eu laꞈ kʼoeˇ laˆ luˬ laˆ seˇ nehˬ-euˬ Sawˇdoˬ meuˬ, Gawˇmawˇlaˆ meuˬ, Aˬdaˬmaˬ meuˬ hawˇ-eu, Zeˬbaiˬ meuˬ heu deuˬ loꞈ-ehˇ pyeuꞈ-iˇ tehꞈ-a.

²⁴‘Aˬ jeˬ miˇ neh aˬ yawꞈ maꞈ-euˬ miˇ kʼahˬ-ahˇ Sahˬpaˬ Miˬyehˇ kʼoeˇ loꞈ-ehˇ jahˇ nehˬ ta. Aˬ jeˬ miˇ neh aˬ yawꞈ teu naˆ naˆ-ehˇ nui ma pehˇ ta’ lehˇ, miˇ tsaˬ zaˬ dawˬ tawˆ luꞈ naˇ haˬ laˇ gaˇ keuˆ tehꞈ-a.

²⁵Kʼoeˇ ngeh, ‘Sahˬpaˬ Miˬyehˇ-euˬ tsawˇ haˬ deuˬ-ahˇ aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ ngeh, aˬ yawꞈ neh dzaˬ taˬ-euˬ dawˬ ma saˇ jaˇ-ahˇ aˬ yawꞈ maꞈ puiˬ-euˬ miˇ neh meh’ lehˇ ya ehˇ kʼoꞈ nehˬ tehꞈ-a.

²⁶‘Dzeuˇ laˇ ngeh tiˬ jawˇ-iˬ uˬ duˬ maˬ tahˬ haw-euˬ miˬ yehˇ deuˬ-ahˇ aˬ yawꞈ maꞈ uˬ duˬ tahˬ-euˬ meh. Miˬyehˇ kʼoeˇ deuˬ-ahˇ uˬ duˬ maˬ ya tahˬ-a lehˇ Sahˬpaˬ Miˬyehˇ neh ehˇ taˬ-euˬ daw-ahˇ leuˇ-awˇ, aˬ yawꞈ maꞈ uˬ duˬ tahˬ-euˬ meh.

²⁷Kʼoeˇ miˇ neh, aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ laˇ-awˇ, sahˬ boꞈ heu taꞈ laꞈ kʼoeˇ kʼaˇ boꞈ taˬ-euˬ luˬ-iˇ seˇ-iˇ-eu jeˬ aˬ yawꞈ maꞈ-euˬ miˇ kʼahˬ kʼoeˇ taˆ bi keuˆ le-euˬ meh.

²⁸Sahˬpaˬ Miˬyehˇ nui ma pehˇ dui dui laˇ-euˬ laꞈ kʼoeˇ, aˇ bawˇ duˬ ciˇ gʼawˇ lehˆ-eu loꞈ-ehˇ, aˬ yawꞈ maꞈ-euˬ miˇ kʼahˬ laꞈ kʼoeˇ aˬ yawꞈ maꞈ-ahˇ gʼawˇ lehˆ doˆ-awˇ, boeˇ miˬ siˬ kʼaˬ deuˬ-euˬ miˇ kʼahˬ-ahˇ biˬ ahˇ nehˬ-awˇ, iˬ nah aˬ yawꞈ maꞈ kʼoeˇ gaˇ dehꞈ luꞈ-eu meh’ lehˇ ya ehˇ kʼoꞈ gaˇ keuˆ tehꞈ-a.

²⁹“Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh zaꞈ taˬ-euˬ jeˬ jaˆ-eu meh. Ehˇ kʼawꞈ, aˬ yawꞈ-euˬ Zahˇ dawˬ kʼoꞈ dawˬ deuˬ aˬ dui-ahˇ pah mehˬ laꞈ-euˬ loꞈ-ehˇ, aˬ dui hawˇ-eu aˬ dui-euˬ zaˬ deuˬ mˬ maˬ maˬ byaˆ zaˇ ziˇ ya naˇ haˬ geuꞈ tehꞈ-a.