Read Akha Dawˬmehˬ 31 Bible Online

Dawˬmehˬ 31 - Akha bible

Dawˬmehˬ 31

¹Iˇsaˬleˬlaˆ tsawˇ haˬ deuˬ-ahˇ Moˇseˬ heu loꞈ-ehˇ paˇ ehˇ nehˬ-euˬ meh.

²“Nymˬ-mˇ ngaˇ tiˬ yaˇ nyiˬ tseˇ kʼoꞈ kʼawˆ laˇ-euˬ miˇ neh, naw maꞈ-ahˇ maˬ paˇ sheuˬ gʼeh nya miˇ-a. Kʼoeˇ uˬ taꞈ, ngaˇ Yawˇdaˬ lawˇ baˬ maˬ paˇ ya tsehˆ doˆ meh lehˇ Sahˬpaˬ Miˬyehˇ ngaˬ-ahˇ ehˇ taˬ-euˬ meh.

³Kʼoeˇ gaˇ jawˇ luꞈ-eu tsawˇ jeuˬ deuˬ-euˬ miˇ kʼahˬ-ahˇ naw maꞈ jawˇ leˇ nya-eu gʼaˇ duˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-euˬ mehˬ hu le-awˇ, aˬ yawꞈ maꞈ-ahˇ laˆ luˬ laˆ seˇ nehˬ tehꞈ-a. Sahˬpaˬ Miˬyehˇ neh ehˇ taˬ-euˬ jaˆ-eu loꞈ-ehˇ, naw maꞈ-euˬ kʼoeˇ taˆ Yawˇshuˆ aˬ yuiꞈ geuꞈ-awˇ, naw maꞈ-ahˇ sheuˬ gʼeh nehˬ laꞈ tehꞈ-a.

⁴Aˬmawˇliˆ tsawˇ haˬ deuˬ-euˬ sahˬ paˬ pyeuꞈ-eu Siˇhoˬ hawˇ-eu Awˇgaˆ-ahˇ aˬ yawꞈ guiˇ deuˆ gʼaˬ-awˇ, aˬ yawꞈ maꞈ-euˬ miˇ kʼahˬ-ahˇ laˆ luˬ laˆ seˇ nehˬ-euˬ loꞈ-ehˇ, tsawˇ jeuˬ kʼoeˇ deuˬ-ahˇ kʼawꞈ Sahˬpaˬ Miˬyehˇ laˆ luˬ laˆ seˇ nehˬ tehꞈ-a.

⁵Sahˬpaˬ Miˬyehˇ naw maꞈ-ahˇ tsawˇ jeuˬ kʼoeˇ deuˬ-ahˇ bi gʼaˬ leˇ-awˇ, ngaˬ neh naw maꞈ-ahˇ kʼaˇ ehˇ taˬ-euˬ loꞈ-ehˇ tiˬ pawꞈ-iˬ maˬ bi lehˬ-iˇ ni, tsawˇ jeuˬ kʼoeˇ deuˬ-ahˇ naw maꞈ ya jahˇ nehˬ tehꞈ-a.

⁶Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˬ. Aˬ yawꞈ maꞈ-ahˇ taˬ guˆ. Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ-euˬ mawˇ do naw maꞈ nehˬ-ehˇ jawˇ tehꞈ-a. Aˬ yawꞈ naw maꞈ-ahˇ byehˇ dzeh-awˇ maˬ bi jawˇ nehˬ laꞈ-aˇ.”

⁷Kʼoeˇ naˇ, Yawˇshuˆ-ahˇ Moˇseˬ kuˇ-awˇ, Iˇsaˬleˬlaˆ tsawˇ haˬ dawˬ tawˆ luꞈ-euˬ mehˬ shi heu loꞈ-ehˇ ehˇ nehˬ-euˬ meh. “Yawˬ haˇ yawˬ ha nui jah ahˇ-eu laꞈ kʼoeˇ, kʼaˬ duˬ ni mˇ-awˬ. Nawˇ-aˬ, Iˇsaˬleˬlaˆ tsawˇ haˬ deuˬ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ neh saˇ jaˇ dzaˬ taˬ-euˬ miˇ kʼahˬ-ahˇ, aˬ yawꞈ maꞈ-ahˇ aˬ yuiꞈ geuꞈ-awˇ ya sheuˬ gʼeh-eu gʼaˬ pyeuꞈ-eu meh.

⁸Sahˬpaˬ Miˬyehˇ aˬ yawꞈ nawˬ nehˬ-ehˇ jawˇ-awˇ, nawˬ-ahˇ sheuˬ gʼeh tehꞈ-a. Aˬ yawꞈ nawˬ-ahˇ byehˇ dzeh-awˇ maˬ bi jawˇ-aˇ. Teu miˇ neh, gʼaˬ baˬ-awˇ guˆ-eu nui ma taˬ bi ahˇ.”

⁹Kʼoeˇ naˇ, Miˬyehˇ-euˬ zahˇ dawˬ kʼoꞈ dawˬ deuˬ Moˇseˬ boꞈ-awˇ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-ahˇ haw-eu pyaˆ-eu Leˬbiˇ tsawˇ haˬ piˇ ma deuˬ hawˇ-eu, Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-ahˇ biꞈ-euˬ meh.

¹⁰Aˬ yawꞈ maꞈ-ahˇ Moˇseˬ ehˇ nehˬ-eu, “Dziˇ dzoˆ ya bi buˬ-iˇ-eu aˇ kʼoꞈ pyeuꞈ-eu shiꞈ kʼoꞈ tiˬ kʼoꞈ byah laˇ-awˇ, Sehˬ gʼawˆ-euˬ Bawˬ-iˬ gʼeh ngeh, Zahˇ dawˬ kʼoꞈ dawˬ-ahˇ guˇ-awˇ ya gui meh.

¹¹Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ uˬ duˬ tahˬ-eu jawˇ duˬ-ahˇ Iˇsaˬleˬlaˆ tsawˇ haˬ deuˬ uˬ duˬ tahˬ laˇ ngeh, zahˇ dawˬ kʼoꞈ dawˬ heu gui mehˬ nehˬ-awˬ.

¹²Yawˬ gʼaˬ na luꞈ ya gaˬ-eu laꞈ kʼoeˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ yaw zeu baw-eu siˬ nya laˇ-awˇ, aˬ yawꞈ neh mehˬ nehˬ tsoˆ nehˬ-euˬ jeˬ-ahˇ saˇ jaˇ ziꞈ-eu laꞈ kʼoeˇ naˇ haˬ geuꞈ nya laˇ ni, kʼaˬ dzeˇ zaˬ deuˬ, zaˬ miˬ zaˬ deuˬ, zaˬ deuˬ hawˇ-eu naw maꞈ-euˬ meuˬ deuˬ laꞈ kʼoeˇ jawˇ luꞈ-eu boeˇ miˬ siˬ kʼaˬ dawˬ tawˆ luꞈ-ahˇ kuˇ uiˬ-awˬ.

¹³Kʼoeˇ loꞈ-ehˇ jahˇ naˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ tiˬ jawˇ-iˬ maˬ ya gaˬ haw-euˬ naw maꞈ-euˬ zaˬ deuˬ uˆ deuˬ kʼawꞈ, ya gaˬ haw tehꞈ-a. Kʼoeˇ naˇ, Yawˇdaˬ lawˇ baˬ nui baˬ paw jaˆ-eu naw maꞈ jawˇ leˇ-eu lehˇ gʼeh-eu miˇ kʼahˬ-ahˇ aˬ yawꞈ maꞈ kʼaˇ jawˇ kʼoeˇ keuˆ ni, aˬ yawꞈ-euˬ ehˇ dawˬ-ahˇ ya naˇ haˬ geuꞈ-eu gaˇ kawˆ aˬ yawꞈ maꞈ siˬ nya laˇ tehꞈ-a.”

¹⁴Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˇ gʼawˬ myahˇ ni maˬ paˇ ya dehꞈ meh. Yawˇshuˆ-ahˇ ngaˇ dawˬ mehˬ dawˬ tsoˆ tsoˆ nehˬ-eu gʼaˇ duˬ, ngaˇ jawˇ-eu Sehˬ gʼawˆ-ahˇ sheuˬ laꞈ-awˬ.” Kʼoeˇ naˇ, Moˇseˬ hawˇ-eu Yawˇshuˆ aˬ nyaꞈ Sehˬ gʼawˆ-ahˇ le-euˬ meh.

¹⁵Mˬ dmˇ kʼawˇ zeuˇ Sehˬ gʼawˆ gʼoˆ kʼehˬ-ahˇ yawꞈ le-awˇ, kʼoeˇ-euˬ laꞈ kʼoeˇ, Sahˬpaˬ Miˬyehˇ aˬ yawꞈ nyaꞈ-ahˇ tahˬ puˬ le-euˬ meh.

¹⁶Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Gʼawˬ myahˇ maˬ gʼeh-ehˇ nawˇ ziˇ jiˇ le tehꞈ-a. Nawˇ shiˇ dzeuˇ ngeh, tsawˇ haˬ heu deuˬ ngaˬ-ahˇ saˇ jaˇ maˬ ziꞈ ni pyeuꞈ-iˇ-awˇ, ngaˬ neh aˬ yawꞈ maꞈ nehˬ-ehˇ dzaˬ taˬ-euˬ dawˬ ma saˇ jaˇ-ahˇ aˬ yawꞈ maꞈ puiˬ tehꞈ-a. Aˬ yawꞈ maꞈ ngaˬ-ahˇ byehˇ dzeh-awˇ, aˬ yawꞈ maꞈ jawˇ leˇ-eu lehˇ gʼeh-eu miˇ kʼahˬ laꞈ kʼoeˇ, lawˇ ciꞈ zaˬ deuˬ-euˬ miˬyehˇ deuˬ-ahˇ aˬ yawꞈ maꞈ uˬ duˬ tahˬ tehꞈ-a.

¹⁷Kʼoeˇ loꞈ-ehˇ pyeuꞈ laˇ ngeh, aˬ yawꞈ maꞈ-ahˇ ngaˇ nui ma pehˇ ma. A yawꞈ maꞈ-ahˇ ngaˇ byehˇ dzeh nehˬ-awˇ, aˬ yawꞈ maꞈ ya luˬ ya seˇ-iˇ tehꞈ-a. Guˆ laˇ paˬ-ehˇ gʼeh-eu luˬ-iˇ seˇ-iˇ-eu gʼawˬ mya jeˬ aˬ yawꞈ maꞈ kʼoeˇ taˆ keuˆ le tehꞈ-a. Kʼoeˇ ngeh, aˬ yawꞈ maꞈ-euˬ Miˬyehˇ pyeuꞈ-eu ngaˇ, aˬ yawꞈ maꞈ nehˬ-ehˇ maˬ paˇ jawˇ-eu miˇ neh kʼoeˇ loꞈ-ehˇ gʼeh-eu jeˬ keuˆ le-eu nga lehˇ, aˬ yawꞈ maꞈ ya siˬ duˬ tehꞈ-a.

¹⁸Aˬ yawꞈ maꞈ-ahˇ ngaˇ maˬ caw ba nehˬ ni jawˇ ma. Aˬ jeˬ miˇ neh ehˇ naˇ, aˬ yawꞈ maꞈ maˬ muiˬ maˬ jaˬ-eu jeˬ mˇ-awˇ, miˬ yehˇ nui deuˬ-ahˇ uˬ duˬ tahˬ-euˬ meh.

¹⁹“Caˇ dawˬ heu bymˇ nymˬ-mˇ boꞈ-awˬ. Iˇsaˬleˬlaˆ tsawˇ haˬ deuˬ-euˬ mehˬ shi saˇ kiˇ pyeuꞈ ni, caˇ dawˬ heu bymˇ aˬ yawꞈ maꞈ-ahˇ mehˬ nehˬ-awˬ.

²⁰Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ ngaˬ neh saˇ jaˇ dzaˬ taˬ-euˬ loꞈ-ehˇ, miˇ tsaˬ miˇ muiˬ muiˬ dui dui-awˇ baw le za le-eu miˇ kʼahˬ-ahˇ aˬ yawꞈ maꞈ-ahˇ ngaˇ sheuˬ uˇ gʼeh ma. Kʼoeˇ gaˇ, aˬ yawꞈ maꞈ kʼaˇ dzaˬ mawꞈ-eu jeˬ tiˬ byah ni jaˆ-awˇ, yaw saˇ saˇ-ehˇ ya dehꞈ ya jawˇ tehꞈ-a. Ehˇ kʼawꞈ, aˬ yawꞈ maꞈ mehˬ shiˬ yawˬ paw yawˬ ciˬ pyawˇ-awˇ, miˬyehˇ nui deuˬ-ahˇ uˬ duˬ tahˬ tehꞈ-a. Aˬ yawꞈ maꞈ ngaˬ-ahˇ byehˇ dzeh-awˇ, ngaˬ-euˬ dawˬ ma saˇ jaˇ-ahˇ puiˬ tehꞈ-a.

²¹Kʼoeˇ ngeh, guˆ laˇ paˬ-ehˇ gʼeh-eu luˬ-iˇ seˇ-iˇ-eu gʼawˬ mya jeˬ, aˬ yawꞈ maꞈ kʼoeˇ taˆ keuˆ le tehꞈ-a. Ehˇ kʼawˬ, caˇ dawˬ heu bymˇ-ahˇ aˬ myah luꞈ ya caˇ-awˇ, caˇ dawˬ heu aˬ yawꞈ maꞈ gʼaˇ duˬ saˇ kiˇ pyeuꞈ tehꞈ-a. Aˬ yawꞈ maꞈ-ahˇ biꞈ ma lehˇ ngaˬ neh saˇ jaˇ dzaˬ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ maˬ sheuˬ uˇ gʼeh mi naˆ-ehˇ kʼawꞈ, nymˬ-mˇ aˬ yawꞈ maꞈ-euˬ nui ma laꞈ kʼoeˇ aˬ joˆ-ehˇ noeˬ luꞈ-eu ngaˇ siˬ nya ma.”

²²Kʼoeˇ ngeh nah aˬ yawꞈ nah-ahˇ, caˇ dawˬ kʼoeˇ bymˇ Moˇseˬ boꞈ-awˇ, Iˇsaˬleˬlaˆ tsawˇ haˬ deuˬ-ahˇ mehˬ nehˬ-euˬ meh.

²³Kʼoeˇ naˇ, Nuˬ-eu aˬ li Yawˇshuˆ-ahˇ Sahˬpaˬ Miˬyehˇ dawˬ ngehˬ-awˇ ehˇ nehˬ-eu, “Yaw haˇ yawˬ ha nui jah ahˇ-awˇ, nui ma kʼaˬ duˬ ni taˬ-awˬ. Ngaˬ neh saˇ jaˇ dzaˬ taˬ-euˬ miˇ kʼahˬ laꞈ kʼoeˇ Iˇsaˬleˬlaˆ tsawˇ haˬ deuˬ-ahˇ nawˇ ya sheuˬ uˇ gʼeh tehꞈ-a. Nawˬ nehˬ-ehˇ ngaˇ jawˇ ma.”

²⁴Miˬyehˇ-euˬ zahˇ dawˬ kʼoꞈ dawˬ-ahˇ, sahˬ boꞈ tiˬ taꞈ laꞈ kʼoeˇ Moˇseˬ boꞈ-euˬ meh. Dawˬ tiˬ dawˬ tehꞈ-ehˇ kʼawꞈ maˬ ya ngehˇ yaꞈ-eu gʼaˇ duˬ, yahˇ dui dui-eu laꞈ kʼoeˇ boꞈ-euˬ meh.

²⁵Aˬ yawꞈ boꞈ gʼaˬ ngeh, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-ahˇ haw-eu pyaˆ-eu Leˬbiˇ tsawˇ haˬ piˇ ma deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh.

²⁶“Miˬyehˇ-euˬ tsawˇ haˬ deuˬ-euˬ mehˬ shi saˇ kiˇ bi pyeuꞈ-eu gʼaˇ duˬ, Miˬyehˇ-euˬ zahˇ dawˬ kʼoꞈ dawˬ boꞈ taˬ-euˬ sahˬ boꞈ heu taꞈ-ahˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ dawˬ peh bi jaˆ-awˬ.

²⁷Aˬ yawꞈ maꞈ nui ma aˇ naˆ ni gʼahˇ-awˇ, puiˬ mawꞈ-eu nui ma aˇ naˆ ni ahˇ-eu ngaˇ siˬ nya ma. Ngaˇ yaw dehꞈ dehꞈ luꞈ-eu aˇ yamˬ laꞈ kʼoeˇ, aˬ yawꞈ maꞈ Sahˬpaˬ Miˬyehˇ-ahˇ puiˬ-euˬ meh. Ngaˇ shiˇ dzeuˇ naˇ, kʼoeˇ naˆ maˬ tseˇ aˬ yawꞈ maꞈ paˇ puiˬ tehꞈ-a.

²⁸Gaˇ kawˆ heu deuˬ ngaˇ dzawˇ mehˬ nehˬ nya ni, naw maꞈ-euˬ tsawˇ jeuˬ aˬ yawꞈ jeuˬ yawꞈ-euˬ aˬ yuiꞈ aˬ tsu deuˬ hawˇ-eu yaw huiˬ yaw mahˇ deuˬ-ahˇ kuˇ uiˬ-awˬ. Aˬ yawꞈ maꞈ-euˬ mehˬ shi saˇ kiˇ bi geuꞈ-eu gʼaˇ duˬ, mˬ hawˇ-eu miˇ-ahˇ ngaˇ kuˇ-eu ma.

²⁹Ngaˇ shiˇ dzeuˇ ngeh jawˇ, tsawˇ haˬ heu deuˬ yaw haiˬ jeˬ mˇ-awˇ, ngaˬ neh aˬ yawꞈ maꞈ-ahˇ mehˬ nehˬ tsoˆ nehˬ-euˬ jeˬ-ahˇ byehˇ dzeh tehꞈ-a. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, luˬ-iˇ seˇ-iˇ-eu jeˬ aˬ yawꞈ maꞈ ya tahˬ puˬ tehꞈ-a. Aˬ jeˬ miˇ neh ehˇ naˇ, Sahˬpaˬ Miˬyehˇ neh laˆ tsoeˬ taˬ-euˬ jeˬ aˬ yawꞈ maꞈ mˇ-eu laꞈ kʼoeˇ, aˬ yawꞈ nui ma pehˇ ni aˬ yawꞈ maꞈ jahˇ tehꞈ-a.”

³⁰Kʼoeˇ naˇ, Iˇsaˬleˬlaˆ tsawˇ haˬ deuˬ naˇ haˬ luꞈ ngeh, caˇ dawˬ heu bymˇ bymˇ lah ni Moˇseˬ caˇ mehˬ nehˬ-euˬ meh.