Read Akha Dawˬmehˬ 33 Bible Online

Dawˬmehˬ 33 - Akha bible

Dawˬmehˬ 33

¹Heu-aˬ, Miˬyehˇ-euˬ tsawˇ haˬ pyeuꞈ-eu Moˇseˬ maˬ shiˇ mi naˆ-ehˇ, Iˇsaˬleˬlaˆ tsawˇ haˬ deuˬ-ahˇ dawˬ ngehˬ gʼeh nehˬ-eu laꞈ kʼoeˇ biꞈ yaꞈ-euˬ guiˬ lahˬ deuˬ meh.

²Siˇnaˆ gawˬ jawˬ jawˬ ma-ahˇ neh, Sahˬpaˬ Miˬyehˇ oe gʼeh leꞈ-awˇ, Eˬdoˬ miˇ kʼahˬ-euˬ mˬ taˆ-ahˇ, nahˇ ma loꞈ-ehˇ yawˬ doˆ laˇ-awˇ, Paˬlaˬ gawˬ jawˬ uˬ du jawˇ-awˇ, yawˬ tsawˇ-ahˇ yaw shehꞈbya-euˬ meh. Mˬ taˆ gʼaˬ kʼehˇ aˇ heˇ aˇ muiˇ, aˬ yawꞈ-euˬ tiˬ jawˬ jawˇ luꞈ-awˇ, aˬ yawꞈ aꞈ laꞈ aˇ maˇ laꞈ-ahˇ, doꞈ-eu miˬ lmˇ yuˇ luꞈ-eu meh.

³Aˬ yawꞈ-euˬ tsawˇ haˬ heu deuˬ-ahˇ, Sahˬpaˬ Miˬyehˇ gaˬ-eu miˇ neh, ngehˬ gʼeh dah teˬ haw piˇ-eu meh. Aˬ kuiˇ uˬ moˆ tah uˇ leˇ-awˇ, yawꞈ-euˬ ehˇ dawˬ aˬ dui geuꞈ ma.

⁴Moˇseˬ neh aˬ dui-ahˇ biꞈ-euˬ, aˬ dui gʼaˇ duˬ poeˬ dui dui-eu, Zahˇ dawˬ kʼoꞈ dawˬ-ahˇ caw teh ma.

⁵Iˇsaˬleˬlaˆ tsawˇ jeuˬ dawˬ tawˆ, uiˬ leˇ bymˇ leˇ taˬ-euˬ kʼoeˇ taˆ, Sahˬpaˬ Miˬyehˇ dzoeˬ dzaˬ-euˬ meh.

⁶Luˇbeˬ gaˇ kawˆ Moˇseˬ ehˇ-eu, “Luˇbeˬ tsawˇ jeuˬ tsawˇ haˬ cuiˆ kʼawꞈ, maˬ shiˇ tsehˆ ni dehꞈ gʼeh luꞈ-uˇ.”

⁷Yuˇdaˆ gaˇ kawˆ Moˇseˬ ehˇ-eu, “Yuˇdaˆ tsawˇ jeuˬ-euˬ shaˇ dawˬ-ahˇ, Sahˬpaˬ Miˬyehˇ naˇ haˬ nehˬ-awˬ. Iˇsaˬleˬlaˆ tsawˇ jeuˬ deuˬ-ahˇ, aˬ yawꞈ maꞈ bi gʼoꞈ gm leˇ-awˬ. Muiˇ-eu deuˬ neh maˬ bi gʼaˬ ni, Sahˬpaˬ Miˬyehˇ caw ba nehˬ-awˬ.”

⁸Leˬbiˇ gaˇ kawˆ Moˇseˬ ehˇ-eu, “Sahˬpaˬ Miˬyehˇ nawˬ-euˬ nui noeˬ, Leˬbiˇ tsawˇ haˬ deuˬ-ahˇ gʼoe-awˇ, Uˇleˬ Duˇmeˬ[1] neh pah mehˬ-awˬ. Maˬsah lehˇ kuˇ-euˬ jawˇ duˬ-ahˇ, yawꞈ maꞈ-ahˇ nawˇ pyehˆ tseˇ haw-awˇ, Meˬliˇbaˬ lawˇ gawˆ lawˇ dzeˇ-ahˇ, yawꞈ maꞈ-ahˇ nawˇ lawˬ haw-euˬ meh.

⁹Aˬ da aˬ ma-ahˇ naˆ maˬ tseˇ, nawˬ-ahˇ yawꞈ maꞈ saˇ jaˇ ziꞈ-awˇ, mehˇ nmˇ hawˇ-eu zaˬ-ahˇ maˬ tseˇ, nawˬ-ahˇ nui ma taꞈ dzehˬ-eu meh. Nawˬ-euˬ dawˬ ma saˇ jaˇ laꞈ kʼoeˇ, maˬ poˆ maˬ paˇ ni ziꞈ-eu meh.

¹⁰Nawˬ-euˬ Zahˇ dawˬ kʼoꞈ dawˬ mehˬ nah, nawˬ-euˬ zaˬ deuˬ bi caw teh ni, yawꞈ maꞈ mehˬnehˬ tsoˆnehˬ tehꞈ-a. Yawꞈ maꞈ nawˬ-euˬ lawˇ duˬ kʼoeˇ taˆ, lawˇ-eu shehˇ-eu jeˬ mˇ tehꞈ-a.

¹¹Yawꞈ maꞈ tsawˇ jeuˬ gʼaˬ kʼaˆ laˇ ni, Sahˬpaˬ Miˬyehˇ caw ba nehˬ-awˬ. Yawꞈ maꞈ mˇ gaˇ nui ma tsaˬ-awˇ, muiˇ-eu deuˬ-ahˇ laˆ cawˆ nehˬ-awˇ, maˬ tuˇ laˇ coeˇ ni kʼehˬ nehˬ-awˬ.”

¹²Beˬyaˬmiˬ-euˬ gaˇ kawˆ ehˇ-eu, “Sahˬpaˬ Miˬyehˇ gaˬ-eu tsawˇ jeuˬ, aˬ yawꞈ neh haw piˇ-euˬ tsawˇ jeuˬ, aˬ yawꞈ maꞈ gʼahˇ ceh jawˇ-eu meh.”

¹³Yoˇsehˆ gaˇ kawˆ Moˇseˬ ehˇ-eu, “Yoˇsehˆ tsawˇ jeuˬ-euˬ miˇ kʼahˬ-ahˇ, Sahˬpaˬ Miˬyehˇ guiˬ lahˬ biꞈ-awˬ. Kʼoeˇ taˆ uˬ yehˇ bi ga le-awˇ, laꞈ oˆ iˇ cuꞈ bi doˆ laˇ-awˬ.

¹⁴Nahˇ tsaˇ lawꞈ awꞈ taˬ-euˬ aˇ siˬ, aˬ yawꞈ maꞈ miˇ kʼahˬ-ahˇ byah-awˇ, yehˇ gʼahˇ jawˇ la maˬ tsehˆ leˇ ni, aˇ siˬ aˇ lu keuˆ le luꞈ-uˇ.

¹⁵Mˬ ga miˇ seu ngeh neh jaˆ-euˬ, gawˬ jawˬ gawˬ duˇ kʼoeˇ deuˬ tiˬ gʼoeˬ, aˇ siˬ aˇ lu loˆ le luꞈ-uˇ.

¹⁶Miˬ dzaˬ doꞈ-eu baw duˆ laꞈ kʼoeˇ, dawˬ ngehˬ-euˬ Sahˬpaˬ Miˬyehˇ neh, sehˬ-euˬ lawˇ-euˬ muiˬ-eu guiˬ lahˬ, yawꞈ maꞈ miˇ kʼahˬ-ahˇ byah luꞈ-uˇ. Mehˇ nmˇ dawˬ tawˆ luꞈ-euˬ kʼoeˇ taˆ, aˬ yawꞈ aˬ yuiꞈ geuꞈ-euˬ miˇ neh, Yoˇsehˆ tsawˇ jeuˬ heu jeuˬ kʼoeˇ taˆ, guiˬ lahˬ kʼoeˇ deuˬ keuˆ le luꞈ-uˇ.

¹⁷Yoˇsehˆ mawˇ neˇ-euˬ gʼaˬ tsoꞈ-awˇ, nehꞈ nyoˬ uˬ coeˇ tsoꞈ gaˇ duˇ meh. Aˬ yawꞈ-euˬ uˬ coeˇ kʼoeˇ deuˬ-aˬ, Maˬnaˇseˬ-euˬ tiˬ heˇ hawˇ-eu, Eˇpaˬleˬ-euˬ tiˬ muiˇ coeˇ meh. Miˇ kʼahˬ tsawˇ jeuˬ dawˬ tawˆ luꞈ-ahˇ, uˬ coeˇ kʼoeˇ neh aˬ yawꞈ tahˬ-awˇ, mˬ dzeˇ miˇ dzeˇ teh dzeh-eu meh.”

¹⁸Zeˬbuˬluˬ hawˇ-eu Iˇsaˬkaˬ, heu nyiˬ jeuˬ-euˬ gaˇ kawˆ ehˇ-eu, “Laˆ shaˆ kʼoeˇ taˆ jeˬ gaꞈ gaꞈ-eu, Zeˬbuˬluˬ dehꞈ dzaˬ laˇ luꞈ-uˇ. Iˇsaˬkaˬ-euˬ nymˇ jiˇ laꞈ kʼoeˇ, pyuˇ shuiˇ myawˬ gahˬ byah laˇ luꞈ-uˇ.

¹⁹Aˬ nyaꞈ nmˇ-euˬ gawˬ jawˬ kʼoeˇ taˆ, aˬ cawˬ tsawˇ jeuˬ deuˬ kuˇ daˆ-awˇ, yaw tsaˬ yaw dawˇ jeˬ lawˇ luꞈ-uˇ. Iˬ ma laˆ shaˆ gʼahˇ ceh hawˇ-eu, laˆ shaˆ lawˇ dzeˇ kʼaˇ shuiꞈ deh-ahˇ, yawꞈ maꞈ pyuˇ shuiˇ poˆ za-euˬ meh.”

²⁰Gaˆ-euˬ gaˇ kawˆ Moˇseˬ ehˇ-eu, “Yawꞈ maꞈ miˇ kʼahˬ bi jeˇ laˇ ni, Miˬyehˇ mˇ-euˬ gaˇ ja ceuˬ-awˬ. Aˬ laꞈ kawꞈ tsehˆ dzeh nehˬ-eu lehˇ, uˬ duˬ gʼeu yawˆ dzeh nehˬ-eu lehˇ, aˇ laˬ jaˬ shiˇ loꞈ-eu loꞈ-ehˇ, Gaˆ tsawˇ haˬ deuˬ loꞈ luꞈ-eu meh.

²¹Aˬ yuiꞈ-euˬ gʼaˇ duˬ bi jaˆ-euˬ, muiˬ dui dui-eu miˇ kʼahˬ pehˇ tsahˇ, aˬ yawꞈ gʼaˇ duˬ tsaˬ geuꞈ-euˬ meh. Iˇsaˬleˬlaˆ aˬ yuiꞈ aˬ tsu, uiˬ le jiˇ-awˇ baꞈ dzah dzah ngeh, Sahˬpaˬ Miˬyehˇ-euˬ Zahˇ dawˬ-ahˇ, aˬ yawꞈ maꞈ naˇ haˬ geuꞈ-euˬ meh.”

²²Daˬ-euˬ gaˇ kawˆ Moˇseˬ ehˇ-eu, “Daˬ-aˬ aˇ laˬ jaˬ shiˇ zaˬ meh. Baˬshaˬ-ahˇ tsawˬ doˆ laꞈ-euˬ meh.”

²³Naˬtaˬliˇ-euˬ gaˇ kawˆ ehˇ-eu, “Sahˬpaˬ Miˬyehˇ haw cawˬ-eu jeˬ, muiˬ dui dui-eu guiˬ lahˬ yaw dzahˇ, Naˬtaˬliˇ kʼoeˇ taˆ byah kʼaˇ meh. Aˬ yawꞈ maꞈ miˇ kʼahˬ laꞈ oˆ dzaˬ, Gaˬliˬlehˇ lah-ahˇ keuˆ ni meh.”

²⁴Aˬsaˬ gaˇ kawˆ Moˇseˬ ehˇ-eu, “Iˇsaˬleˬlaˆ tsawˇ jeuˬ laꞈ kʼoeˇ, Aˬshaˬ guiˬ lahˬ za dzehˬ-euˬ meh. Mehˇ nmˇ mehˬ shi myaˆ pyawˬ jaˆ-awˇ, yawꞈ-euˬ miˇ kʼahˬ saˬ loˬ loˬ yaˇ, baw dui za dui dui le luꞈ-uˇ.

²⁵Aˬ yawꞈ-euˬ meuˬ deuˬ-euˬ lahˇ kʼehˬ, shmˇ laˇ gʼoˆ ziꞈ dah ni piˬ-awˇ, guˆ kʼaˇ maˬ za ni jawˇ luꞈ-uˇ.”

²⁶Iˇsaˬleˬlaˆ tsawˇ haˬ deuˬ-oˇ, mˬ taˆ mˬ dmˇ mahˬ dziˬ dziˬ-awˇ, caw ba-eu lehˇ ga keuˆ le-eu, naw maꞈ-euˬ Miˬyehˇ-ahˇ duˇ-eu, Miˬyehˇ nui gʼaˬ aˬ gaˇ jawˇ ta.

²⁷Miˬyehˇ naw maꞈ-ahˇ aˬ myah luꞈ, ceh piˇ loꞈ piˇ bo saˆ luꞈ meh. Yawꞈ-euˬ yaˇ ziˇ ziꞈ-eu aˬ laꞈ, naw maꞈ-ahˇ caw ba luꞈ-eu meh. Naw maꞈ le-eu gaˇ ma mehˬ shi, muiˇ-eu deuˬ-ahˇ teh dzeh jiˇ-awˇ, dawˬ tawˆ luꞈ-ahˇ laˆ cawˆ-awˬ lehˇ, naw maꞈ-ahˇ aˬ yawꞈ ehˇ-eu meh.

²⁸Kʼoeˇ miˇ neh, Yaˬkoˆ-euˬ zaˬ deuˬ, dzaˬ la gʼo cehˇ aˬ gaꞈ dzaˇ uiˇ, dzaˬ ngeh maˬ jiˇ dawˇ ngeh maˬ shuꞈ, uˬ yehˇ loꞈ-ehˇ ceuˬ ga muiˬ-eu, miˇ kʼahˬ-ahˇ naw maꞈ ya jawˇ-awˇ, nui saˇ oꞈ-eu laꞈ kʼoeˇ dehꞈ-awˬ.

²⁹Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ neh ka kʼoꞈ-euˬ, naw maꞈ loꞈ-ehˇ gʼeh-eu tsawˇ jeuˬ, miˇ tsaˬ kʼoeˇ taˆ aˬ gaˇ jawˇ ta. Naw maꞈ-ahˇ ceh piˇ loꞈ piˇ-awˇ, aˬ cawˬ-ahˇ bi gʼaˬ leˇ-eu lehˇ, Sahˬpaˬ Miˬyehˇ aˬ yawꞈ mawˇ do, naw maꞈ-euˬ dehˬ daˬ duˬ pyeuꞈ-awˇ, naw maꞈ-euˬ mi cehˇ pyeuꞈ-eu meh. Muiˇ-eu deuˬ naw maꞈ-euˬ mehˬ shi, gʼawˬ shaˬ gaˬ ni tahˬ shaˇ laˇ gaˇ, naw maꞈ tsawˬ nawˬ ya nawˬ tehꞈ-a.