Read Akha Dawˬmehˬ 5 Bible Online

Dawˬmehˬ 5 - Akha bible

Dawˬmehˬ 5

¹Iˇsaˬleˬlaˆ tsawˇ haˬ dawˬ tawˆ luꞈ-ahˇ Moˇseˬ kuˇ uiˬ-awˇ ehˇ nehˬ-eu, “Iˇsaˬleˬlaˆ tsawˇ haˬ deuˬ-oˇ, iˬ nah ngaˇ naw maꞈ-ahˇ biꞈ-euˬ zahˇ dawˬ kʼoꞈ dawˬ heu deuˬ dawˬ tawˆ luꞈ-ahˇ naˇ haˬ-awˇ dzaw geuꞈ-eu laꞈ kʼoeˇ, yaw muiˬ paˬ-ehˇ caw teh-awˬ.

²Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ, Siˇnaˆ gawˬ jawˬ kʼoeˇ taˆ dawˬ ma saˇ jaˇ dzaˬ-euˬ meh.

³Aˬ duiˬ-euˬ aˬ poeˬ aˬ bawˇ deuˬ nehˬ-ehˇ tehꞈ maˬ ngeuˇ ni, iˬ nah dehꞈ luꞈ-eu aˬ dui maꞈ dawˬ tawˆ luꞈ nehˬ-ehˇ, dawˬ ma saˇ jaˇ heu hmˬ aˬ yawꞈ dzaˬ-euˬ jeˬ pyeuꞈ-eu meh.

⁴Gawˬ jawˬ kʼoeˇ jawˬ kʼoeˇ taˆ, miˬ dzaˬ laꞈ kʼoeˇ Sahˬpaˬ Miˬyehˇ naw maꞈ-ahˇ myaˆ pyawˬ ciˬ daˬ-awˇ dawˬ ngehˬ cawˬ-euˬ meh.

⁵Kʼoeˇ ngeh, Sahˬpaˬ Miˬyehˇ neh ehˇ-euˬ jeˬ naw maꞈ-ahˇ ehˇ nehˬ-eu gʼaˇ duˬ, aˬ yawꞈ hawˇ-eu naw maꞈ-euˬ yaw kaˬ-ahˇ ngaˇ yawꞈ-euˬ ma. Aˬ jeˬ miˇ neh ehˇ naˇ, naw maꞈ miˬ dzaˬ-ahˇ guˆ-eu miˇ neh gawˬ jawˬ-ahˇ maˬ le daˆ peuˬ-a. Sahˬpaˬ Miˬyehˇ ehˇ-eu,

⁶“Ngaˇ-aˬ, naw maꞈ aˬ cawˬ zaˬ kʼaˆ ya geuꞈ luꞈ-eu Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ ka kʼoꞈ-euˬ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ma.

⁷“Ngaˬ-euˬ mehˬ shi miˬ yehˇ nui gʼaˬ nawˇ maˬ ya bi jawˇ-a.

⁸“Mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, miˇ tsaˬ dawˬ dah iˇ cuꞈ laꞈ kʼoeˇ maˬ ehˇ, kʼaˇ jawˇ kʼaˇ jaˆ-eu jeˬ-ahˇ duˇ-eu tahˬ pahˬ aˬ ma mawˇ kawˇ nawˇ maˬ ya tehˆ-a.

⁹Tahˬ pahˬ aˬ ma mawˇ kawˇ mehˬ shi nawˇ awˆ byaˆ-awˇ uˬ duˬ maˬ ya tahˬ-a. Aˬ jeˬ miˇ neh ehˇ naˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ-aˬ, myaˆ naˆ-eu Miˬyehˇ pyeuꞈ-eu ma. Ngaˬ-ahˇ bye-eu tsawˇ haˬ deuˬ-ahˇ ngaˇ kʼehˬ-awˇ, aˬ yawꞈ maꞈ-euˬ zaˬ ziˇ smˬ ziˇ oeˬ ziˇ keuˆ ni ngaˇ kʼehˬ ma.

¹⁰Ehˇ kʼawꞈ, ngaˬ-ahˇ gaˬ-awˇ, ngaˬ-euˬ zahˇ dawˬ kʼoꞈ dawˬ mehˬ nah caw teh-eu tsawˇ haˬ deuˬ-ahˇ, aˬ yawꞈ maꞈ-euˬ zaˬ ziˇ aˇ heˇ aˇ muiˇ ziˇ keuˆ ni, ngaˬ-euˬ gʼoeˇ-eu gaˬ-eu jeˬ ngaˇ bi mawˇ ma.

¹¹“Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ-ahˇ nawˇ yehˬ bawˬ sehˇ lu-ehˇ maˬ ya kuˇ niˇ gʼa-a. Aˬ jeˬ miˇ neh ehˇ naˇ, nawˬ-euˬ Miˬyehˇ Sahˬpaˬ Miˬyehˇ pyeuꞈ-eu ngaˇ-aˬ, ngaˬ-euˬ tsawˇ myahˇ-ahˇ yehˬ bawˬ sehˇ lu-ehˇ kuˇ niˇ gʼa-eu tsawˇ haˬ-ahˇ kʼehˬ nehˬ kʼaˆ nehˬ ma.

¹²“Nawˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ nawˬ-ahˇ dawˬ biꞈ taˬ-euˬ loꞈ-ehˇ, jawˇ nah ngeh nah-aˬ, muiˬ-eu shawˇ-eu aˇ nah pyeuꞈ-eu nawˇ noeˬ keuˆ-awˇ, ya lah ya daw meh.

¹³Nawˬ-euˬ gaˇ mˇ-eu gʼaˇ duˬ aˇ yamˬ koꞈ nah jaˆ meh.

¹⁴Ehˇ kʼawꞈ, shiꞈ nah tiˬ nah-aˬ, ngaˬ-ahˇ damˬ nehˬ taˬ-euˬ gʼaˬ naˬ naˬ-eu aˇ nah pyeuꞈ-eu meh. Aˇ nah kʼoeˇ nah laꞈ kʼoeˇ, nawˇ maˬ ehˇ, nawˬ-euˬ zaˬ deuˬ maˬ ehˇ, nawˬ-euˬ zaˬ kʼaˆ deuˬ maˬ ehˇ, nawˬ-euˬ jeˬ zaˬ deuˬ maˬ ehˇ, nawˬ-euˬ miˇ kʼahˬ laꞈ kʼoeˇ jawˇ luꞈ-eu boeˇ miˬ siˬ kʼaˬ deuˬ maˬ ehˇ, tiˬ gʼaˬ-iˬ gaˇ maˬ ya mˇ-a. Nawˇ gʼaˬ naˬ naˬ-eu loꞈ-ehˇ, nawˬ-euˬ zaˬ kʼaˆ deuˬ-ahˇ kʼawꞈ gʼaˬ naˬ ya bi naˬ meh.

¹⁵Naw maꞈ Iˇjiˇtuˆ miˇ kʼahˬ laꞈ kʼoeˇ aˬ cawˬ zaˬ kʼaˆ geuꞈ-awˇ, naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ gʼaˬ, ngaˬ-euˬ huiˬ-eu baoˬ hawˇ-eu gʼaˬ-ahˇ gʼoe-awˇ, naw maꞈ-ahˇ ka kʼoꞈ le-euˬ gaˇ noeˬ keuˆ-awˬ. Kʼoeˇ miˇ neh, jawˇ nah-ahˇ lah daw-awˬ lehˇ naw maꞈ-ahˇ ngaˇ dawˬ biꞈ-eu ma.

¹⁶“Nawˇ yaw muiˬ paˬ-ehˇ ya dehꞈ ya jawˇ daˆ leꞈ-eu gʼaˇ duˬ maˬ ehˇ, ngaˇ nawˬ-ahˇ biꞈ-euˬ miˇ kʼahˬ laꞈ kʼoeˇ nawˇ ziˇ baw ni maˬ ehˇ, nawˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ nawˬ-ahˇ dawˬ biꞈ taˬ-euˬ loꞈ-ehˇ, nawˬ-euˬ aˬ da aˬ ma-ahˇ nawˇ yaw zeu ya baw meh.

¹⁷“Aˬ cawˬ-ahˇ nawˇ maˬ ya sehꞈ-a.

¹⁸“Aˬ cawˬ-euˬ miˬ zaˬ yo zaˬ-ahˇ nawˇ maˬ ya bahˬ-a.

¹⁹“Aˬ cawˬ-euˬ myawˬ nawˇ maˬ ya kʼoeˬ-a.

²⁰“Aˬ cawˬ gʼaˇ duˬ maˬ tsaˬ maˬ dawˇ-eu saˇ kiˇ nawˇ maˬ ya kamˬ-a.

²¹“Aˬ cawˬ-euˬ miˬ zaˬ-ahˇ nawˇ mehˇ juiˇ maˬ ya juiˇ-a. Aˬ cawˬ-euˬ nymˇ-ahˇ maˬ ehˇ, miˇ tsaˬ-ahˇ maˬ ehˇ, zaˬ kʼaˆ deuˬ-ahˇ maˬ ehˇ, mawˇ neˇ deuˬ-ahˇ maˬ ehˇ, mahˬ tahˬ laˆ deuˬ-ahˇ maˬ ehˇ, aˬ cawˬ kʼaˇ jaˆ-eu jeˬ-ahˇ maˬ ehˇ, nawˇ mehˇ juiˇ maˬ ya juiˇ-a.’

²²“Heu-aˬ, gawˬ jawˬ dawˬ peh naw maꞈ uiˬ leˇ-awˇ jawˇ ngeh, naw maꞈ dawˬ tawˆ luꞈ-ahˇ Sahˬpaˬ Miˬyehˇ neh biꞈ-euˬ zahˇ dawˬ kʼoꞈ dawˬ deuˬ meh. Miˬ dzaˬ laꞈ kʼoeˇ hawˇ-eu zahˇ tsui ni gʼeh-eu mˬ dmˇ laꞈ kʼoeˇ, aˬ yawꞈ-euˬ baoˬ huiˬ-eu teˇ saˇ dawˬ ngehˬ doˆ laˇ ngeh, zahˇ dawˬ kʼoꞈ dawˬ heu deuˬ tehꞈ-ehˇ biꞈ laꞈ-euˬ meh. Kʼoeˇ naˇ, kʼaˬ lo teˇ byaꞈ nyiˬ byaꞈ kʼoeˇ taˆ zahˇ dawˬ kʼoꞈ dawˬ heu deuˬ aˬ yawꞈ boꞈ-awˇ, ngaˬ-ahˇ biꞈ laꞈ-euˬ meh.

²³“Gawˬ jawˬ jawˬ lah ni miˬ dzaˬ doꞈ luꞈ-awˇ, zahˇ tsui ni gʼeh-eu laꞈ kʼoeˇ dawˬ ngehˬ doˆ laˇ-eu teˇ saˇ-ahˇ naw maꞈ ya gaˬ ngeh, naw maꞈ-euˬ aˬ yuiꞈ aˬ tsu deuˬ hawˇ-eu naw maꞈ tsawˇ jeuˬ deuˬ kʼoeˇ taˆ aˬ yuiꞈ geuꞈ-eu deuˬ, ngaˇ jawˇ gaˇ laˇ-euˬ meh.

²⁴Aˬyawꞈ maꞈ ehˇ-eu,‘Miˬ dzaˬ laꞈ kʼoeˇ aˬ yawꞈ dawˬ ngehˬ gaˇ aˬ dui ya gaˬ-eu laꞈ kʼoeˇ, aˬ yawꞈ-euˬ yaw shehꞈ kʼahˬ sehˇ hawˇ-eu aˬ yawꞈ aˇ naˆ ni huiˬ-eu gaˇ kawˆ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ aˬ dui-ahˇ bi siˬ bi mawˇ laꞈ-euˬ meh. Tsawˇ haˬ tiˬ gʼaˬ-ahˇ Sahˬpaˬ Miˬyehˇ dawˬ ngehˬ cawˬ-euˬ kʼawꞈ, tsawˇ haˬ kʼoeˇ gʼaˬ maˬ ya shiˇ-ehˇ yaw dehꞈ dehꞈ nya-eu gaˇ kawˆ, iˬ nah aˬ dui maꞈ ya mawˇ-euˬ ma.

²⁵Ehˇ kʼawꞈ, guˆ laˇ paˬ-ehˇ gʼeh-eu miˬ dzaˬ kʼoeˇ laˆ cawˆ laˇ gaˇ guˆ-eu miˇ neh, nyiˬ poˆ maˬ paˇ naˇ haˬ peuˬ miˇ-a. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ dawˬ ngehˬ gaˇ tiˬ poˆ paˇ ya gaˬ lawˬ naˇ, maˇ maˇ ni ya shiˇ-eu miˇ-a.

²⁶Dehꞈ luꞈ-eu Miˬyehˇ miˬ dzaˬ laꞈ kʼoeˇ dawˬ ngehˬ gaˇ ya gaˬ gʼaˬ-awˇ, maˬ shiˇ ni dehꞈ-eu tsawˇ haˬ zaˬ jawˇ meh loˇ.

²⁷Moˇseˬ-oˇ, nawˇ gʼoꞈ leˇ-awˇ aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ kʼaˇ ehˇ-eu jeˬ-ahˇ naˇ haˬ leˇ-awˬ. Kʼoeˇ naˇ, nga maꞈ jawˇ gaˇ paˇ gʼoꞈ le-awˇ, aˬ yawꞈ neh nawˬ-ahˇ kʼaˇ ehˇ nehˬ laꞈ-euˬ jeˬ paˇ dzawˇ mehˬ le-awˬ. Nga maꞈ naˇ haˬ geuꞈ-awˇ mˇ gʼeh ma’ lehˇ ehˇ-eu meh.

²⁸“Kʼoeˇ loꞈ-ehˇ ehˇ gaˇ Sahˬpaˬ Miˬyehˇ ya gaˬ ngeh aˬ yawꞈ ngaˬ-ahˇ ehˇ-eu, ‘Tsawˇ haˬ heu deuˬ ehˇ-eu ngaˇ ya gaˬ gʼaˬ-euˬ ma. Aˬ yawꞈ maꞈ ehˇ-eu tsaˬ meh.

²⁹Aˬ yawꞈ maꞈ aˬ myah luꞈ kʼoeˇ loꞈ-ehˇ tehꞈ-ehˇ nui ma taˬ-awˇ, aˬ myah luꞈ ngaˬ-ahˇ taˬ huiˬ taˬ mahˇ-eu laꞈ kʼoeˇ, ngaˬ-euˬ zahˇ dawˬ kʼoꞈ dawˬ deuˬ-ahˇ naˇ haˬ geuꞈ naˇ, aˬ yawꞈ maꞈ hawˇ-eu aˬ yawꞈ maꞈ-euˬ zaˬ deuˬ uˆ deuˬ mˬ maˬ maˬ byaˆ zaˇ ziˇ yaw muiˬ paˬ-ehˇ ya dehꞈ dzaˬ tehꞈ-a.

³⁰Aˬ yawꞈ maꞈ jawˇ gaˇ iˇ-awˇ, gʼoꞈ-iˇ-awˬ lehˇ ehˇ nehˬ-iˇ-awˬ.

³¹Ehˇ kʼawꞈ, Moˇseˬ nawˇ-aˬ, ngaˬ nehˬ-ehˇ heu gaˇ jawˇ yaꞈ-awˬ. Ngaˬ-euˬ zahˇ dawˬ kʼoꞈ dawˬ dawˬ tawˆ luꞈ nawˬ-ahˇ ngaˇ biꞈ ma. Aˬ yawꞈ maꞈ-ahˇ ngaˬ neh biꞈ-euˬ miˇ kʼahˬ laꞈ kʼoeˇ, zahˇ dawˬ kʼoꞈ dawˬ kʼoeˇ deuˬ-ahˇ aˬ yawꞈ maꞈ bi caw teh-eu gʼaˇ duˬ, zahˇ dawˬ kʼoꞈ dawˬ kʼoeˇ deuˬ aˬ yawꞈ maꞈ-ahˇ mehˬ nehˬ-awˬ’ lehˇ ehˇ-eu meh.

³²“Iˇsaˬleˬlaˆ tsawˇ haˬ deuˬ-oˇ, Sahˬpaˬ Miˬyehˇ neh dawˬ kʼaˇ biꞈ taˬ-euˬ loꞈ-ehˇ, yawˬ jeˬ na luꞈ maˬ ngehˇ ni mˇ-awˬ. Aˬ yawꞈ-euˬ zahˇ dawˬ kʼoꞈ dawˬ-ahˇ maˬ naˇ haˬ geuꞈ ni tiˬ dawˬ-iˬ taˬ byehˇ.

³³Naw maꞈ yaw muiˬ paˬ-ehˇ ya dehꞈ dzaˬ-awˇ, naw maꞈ jawˇ leˇ-eu lehˇ gʼeh-eu miˇ kʼahˬ laꞈ kʼoeˇ yaw muiˬ paˬ-ehˇ ya dehꞈ ya jawˇ ni, zahˇ dawˬ kʼoꞈ dawˬ dawˬ tawˆ luꞈ-ahˇ naˇ haˬ geuꞈ-awˬ.