Read Akha Dawˬmehˬ 9 Bible Online

Dawˬmehˬ 9 - Akha bible

Dawˬmehˬ 9

¹“Iˇsaˬleˬlaˆ tsawˇ haˬ deuˬ-oˇ, naˇ haˬ sheˇ. Iˬ nah naw maꞈ Yawˇdaˬ lawˇ baˬ tsehˆ-awˇ, naw maꞈ myaˆ maˬ tseˇ myaˬ dzehˬ-awˇ baoˬ huiˬ dzehˬ-eu tsawˇ jeuˬ deuˬ-euˬ miˇ kʼahˬ-ahˇ deuˆ geuꞈ leˇ-eu aˇ yamˬ peh laˇ-euˬ meh.

²Aˬ yawꞈ maꞈ-euˬ meuˬ deuˬ huiˬ dui dui-awˇ, meuˬ meuˬ lahˇ kʼawꞈ mˬ-ahˇ tuˆ-eu meh.

³Aˬ yawꞈ maꞈ tsawˇ haˬ goˇ dui dui-awˇ, gʼaˬ kʼawꞈ kʼaˆ dui dui-eu meh. Aˬ yawꞈ maꞈ-aˬ, huiˬ dui goˇ dui dui-eu tsawˇ haˬ pyeuꞈ-awˇ, aˬ yawꞈ maꞈ-euˬ mehˬ shi aˬ suˇ gʼaˬ yawꞈ leˇ peuˬ ta lehˇ aˬ cawˬ ehˇ-eu naw maꞈ ya gaˬ haw-euˬ meh. Ehˇ kʼawꞈ, miˬ dzaˬ puiˆ daˆ leꞈ-eu loꞈ-ehˇ, tsawˇ haˬ kʼoeˇ deuˬ-ahˇ naw maꞈ yaw kawˇ kawˇ-ehˇ teh doˆ-awˇ laˆ luˬ laˆ seˇ nehˬ nya ni, naw maꞈ le gʼeh leꞈ-eu nehˬ-ehˇ, aˬ yawꞈ maꞈ-ahˇ Sahˬpaˬ Miˬyehˇ deuˆ gʼaˬ tehꞈ-a.

⁴“Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ gʼaˇ duˬ tsawˇ haˬ kʼoeˇ deuˬ-ahˇ teh doˆ gʼaˬ ngeh, miˇ kʼahˬ kʼoeˇ kʼahˬ naw maꞈ za geuˇ-eu miˇ neh, naw maꞈ-ahˇ aˬ yawꞈ sheuˬ uˇ nehˬ laꞈ-euˬ meh lehˇ naw maꞈ yawˬ haˇ yawˬ ha taˬ ehˇ. Kʼoeˇ loꞈ-ehˇ maˬ ngeuˇ-a. Tsawˇ haˬ kʼoeˇ deuˬ maˬ muiˬ maˬ jaˬ-eu miˇ neh, naw maꞈ gʼaˇ duˬ Sahˬpaˬ Miˬyehˇ aˬ yawꞈ maꞈ-ahˇ teh doˆ-euˬ jeˬ pyeuꞈ-eu meh.

⁵Naw maꞈ muiˬ-eu jaˬ-eu tsawˇ haˬ pyeuꞈ-awˇ, yaw tsaˬ yaw dawˇ jeˬ mˇ-eu miˇ neh, aˬ yawꞈ maꞈ-euˬ miˇ kʼahˬ kʼoeˇ, Sahˬpaˬ Miˬyehˇ naw maꞈ-ahˇ biꞈ-eu maˬ ngeuˇ-a. Tsawˇ haˬ kʼoeˇ deuˬ maˬ muiˬ maˬ jaˬ-eu tsawˇ haˬ pyeuꞈ-eu miˇ neh maˬ ehˇ, naw maꞈ-euˬ aˬ poeˬ aˬ bawˇ deuˬ pyeuꞈ-eu Aˬbyaˬhaˬ, Iˇtsaˆ, Yaˬkoˆ, aˬ ha maꞈ-ahˇ aˬ yawꞈ neh dzaˬ taˬ-euˬ saˇ jaˇ bi ziꞈ mawꞈ-eu miˇ neh maˬ ehˇ, tsawˇ haˬ kʼoeˇ deuˬ-ahˇ aˬ yawꞈ teh doˆ-euˬ jeˬ pyeuꞈ-eu meh.

⁶Naw maꞈ za geuˇ-eu miˇ neh baw le za le-eu miˇ kʼahˬ kʼoeˇ kʼahˬ naw maꞈ-ahˇ aˬ yawꞈ biꞈ laꞈ-eu maˬ ngeuˇ-a lehˇ siˬ duˬ-awˬ. Aˬ jeˬ miˇ neh ehˇ naˇ, naw maꞈ-aˬ, nui ma gʼahˇ-eu tsawˇ jeuˬ pyeuꞈ-eu meh.

⁷“Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ nui ma bi pehˇ ni, bawˇ tsahˬ bawˇ dahˇ laꞈ kʼoeˇ naw maꞈ aˬ joˆ-ehˇ jahˇ-euˬ gaˇ kawˆ-ahˇ tiˬ jawˇ-iˬ taˬ ngehˇ. Iˇjiˇtuˆ miˇ kʼahˬ laꞈ kʼoeˇ neh doˆ le-euˬ tiˬ nah neh aˇ dahˬ beh-awˇ, heu gaˇ laˇ keuˆ ngeh keuˆ ni, Sahˬpaˬ Miˬyehˇ-ahˇ naw maꞈ puiˬ-euˬ meh.

⁸Siˇnaˆ gawˬ jawˬ-ahˇ jawˇ ngeh kʼawꞈ, naw maꞈ-ahˇ bi laˆ luˬ bi laˆ seˇ gaˇ keuˆ ni Sahˬpaˬ Miˬyehˇ nui ma pehˇ laˇ ni naw maꞈ mˇ-euˬ meh.

⁹Sahˬpaˬ Miˬyehˇ neh naw maꞈ nehˬ-ehˇ dzaˬ-euˬ dawˬ ma saˇ jaˇ boꞈ taˬ-euˬ kʼaˬ lo teˇ byaꞈ laˬ leˇ-eu gʼaˇ duˬ, Siˇnaˆ gawˬ jawˬ-ahˇ ngaˇ daˆ leˇ-euˬ ma. Oeˬ tseˇ nah oeˬ tseˇ miˇ keuˆ ni, tiˬ jeˬ-iˬ maˬ dzaˬ maˬ dawˇ-ehˇ, kʼoeˇ gaˇ ngaˇ jawˇ-euˬ ma.

¹⁰Kʼoeˇ ngeh, naw maꞈ gawˬ jawˬ-ahˇ uiˬ leˇ-awˇ jawˇ ngeh nah, miˬ dzaˬ laꞈ kʼoeˇ aˬ yawꞈ naw maꞈ-ahˇ ngehˬ cawˬ-euˬ dawˬ deuˬ-ahˇ, aˬ yawꞈ-euˬ aˬ laꞈ neh boꞈ doˆ taˬ-euˬ kʼaˬ lo teˇ byaꞈ kʼoeˇ nyiˬ byaꞈ, Sahˬpaˬ Miˬyehˇ ngaˬ-ahˇ biꞈ laꞈ-euˬ meh.

¹¹Oeˬ tseˇ nah oeˬ tseˇ miˇ byah laˇ gʼaˬ miˇ tsa, dawˬ ma saˇ jaˇ boꞈ taˬ-euˬ kʼaˬ lo teˇ byaꞈ kʼoeˇ nyiˬ byaꞈ, Sahˬpaˬ Miˬyehˇ ngaˬ-ahˇ biꞈ laꞈ-euˬ meh.

¹²“Kʼoeˇ naˇ, Sahˬpaˬ Miˬyehˇ ngaˬ-ahˇ ehˇ-eu, ‘Gawˬ jawˬ dawˬ dahˬ-ahˇ yaw kawˇ-ehˇ zaꞈ ka-iˇ-awˬ. Aˬ jeˬ miˇ neh ehˇ naˇ, Iˇjiˇtuˆ miˇ kʼahˬ laꞈ kʼoeˇ neh nawˬ neh sheuˬ doˆ laꞈ-euˬ nawˬ-euˬ tsawˇ haˬ deuˬ maˬ muiˬ maˬ shawˇ-ehˇ pyeuꞈ-iˇ-awˇ, maˬ muiˬ maˬ jaˬ-euˬ jeˬ mˇ luꞈ meh.

¹³Ngaˬ neh dawˬ biꞈ-awˇ bi mˇ-euˬ jeˬ-ahˇ aˬ yawꞈ maꞈ byehˇ dzeh-awˇ, yawˬ ha gʼaˇ duˬ tahˬ pahˬ aˬ ma mawˇ kawˇ tehˆ-euˬ meh’ lehˇ ehˇ-eu meh.

¹⁴“Sahˬpaˬ Miˬyehˇ ngaˬ-ahˇ paˇ ehˇ-eu, ‘Tsawˇ haˬ heu deuˬ nui ma aˇ naˆ ni gʼahˇ-eu ngaˇ siˬ duˬ-euˬ ma. Aˬ yawꞈ maꞈ-ahˇ laˆ tsoeˬ-eu lehˇ taˬ leh jeh. Tsawˇ haˬ tiˬ gʼaˬ-iˬ aˬ yawꞈ maꞈ-ahˇ maˬ paˇ noeˬ mawˇ coeˇ-ehˇ ngehˇ byoˆ jiˇ gaˇ keuˆ ni, aˬ yawꞈ maꞈ-ahˇ ngaˇ laˆ luˬ laˆ seˇ nehˬ-eu lehˇ gʼeh-eu ma. Kʼoeˇ naˇ, aˬ yawꞈ maꞈ myaˆ maˬ tseˇ myaˬ dzehˬ-awˇ, baoˬ huiˬ dzehˬ-eu tsawˇ jeuˬ tiˬ jeuˬ-euˬ aˬ da, nawˬ-ahˇ ngaˇ paˇ bi pyeuꞈ laˇ ma’ lehˇ ehˇ-eu meh.

¹⁵“Kʼoeˇ naˇ, dawˬ ma saˇ jaˇ boꞈ taˬ-euˬ kʼaˬ lo teˇ byaꞈ kʼoeˇ nyiˬ byaꞈ baꞈ-awˇ, gawˬ jawˬ dawˬ dahˬ-ahˇ ngaˇ gʼoꞈ ka le-euˬ ma.

¹⁶Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh biꞈ taˬ-euˬ zahˇ dawˬ kʼoꞈ dawˬ deuˬ-ahˇ naw maꞈ maˬ naˇ haˬ geuꞈ-ehˇ, yawˬ ha gʼaˇ duˬ tahˬ pahˬ aˬ ma mawˇ kawˇ tehˆ-eu laꞈ kʼoeˇ, aˬ yawꞈ-ahˇ mˇ bahˬ-euˬ gaˇ ngaˇ ya mawˇ-euˬ ma.

¹⁷Kʼoeˇ miˇ neh, naw maꞈ-euˬ mehˬ shi, kʼaˬ lo teˇ byaꞈ kʼoeˇ ngaˇ ka paˆ dzeh-euˬ ma.

¹⁸Kʼoeˇ naˇ, oeˬ tseˇ nah oeˬ tseˇ miˇ keuˆ ni, Sahˬpaˬ Miˬyehˇ-euˬ mehˬ shi ngaˇ awˆ byaˆ-awˇ, maˬ dzaˬ maˬ dawˇ ni jawˇ-euˬ ma. Naw maꞈ Sahˬpaˬ Miˬyehˇ-ahˇ mˇ bahˬ-awˇ, aˬ yawꞈ nui ma pehˇ ni jahˇ-euˬ baˬ da neh, ngaˇ kʼoeˇ loꞈ-ehˇ jawˇ-euˬ ma.

¹⁹Sahˬpaˬ Miˬyehˇ nui ma pehˇ-eu jeˬ-ahˇ ngaˇ guˆ dui dui-euˬ ma. Aˬ jeˬ miˇ neh ehˇ naˇ, naw maꞈ-ahˇ laˆ luˬ laˆ seˇ nehˬ paˬ-ehˇ aˬ yawꞈ nui ma pehˇ laˇ taˬ-euˬ meh. Ehˇ kʼawꞈ, ngaˬ-euˬ shaˇ dawˬ-ahˇ aˬ yawꞈ tiˬ poˆ paˇ naˇ haˬ nehˬ laꞈ-euˬ meh.

²⁰Aˬloˬ-ahˇ gʼeh, sehꞈ paˬ-ehˇ Sahˬpaˬ Miˬyehˇ nui ma pehˇ laˇ taˬ-euˬ meh. Kʼoeˇ miˇ neh, Aˬloˬ gʼaˇ duˬ kʼawꞈ, kʼoeˇ ngeh jawˇ ngaˇ guiˬ lahˬ shaˇ nehˬ-euˬ ma.

²¹Naw maꞈ neh mˇ-euˬ iˬ baˇ pyeuꞈ-eu mawˇ neˇ mawˇ kawˇ kʼoeˇ ngaˇ yuˇ-awˇ, miˬ dzaˬ-ahˇ dawˆ puiˆ-euˬ ma. Kʼoeˇ naˇ, lehˬ meuˇ-awˇ gawˬ jawˬ-ahˇ neh yoeˇ ka leꞈ-euˬ lawˇ gawˆ-ahˇ dawˆ bu-euˬ ma.

²²“Taˬbeˬlaˬ, Maˬsah, Giˇbyoˆhaˬtaˬbaˬ lehˇ kuˇ-eu jawˇ duˬ kʼoeˇ deuˬ-ahˇ jawˇ ngeh kʼawꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ nui ma pehˇ ni naw maꞈ mˇ-euˬ meh.

²³Kʼoeˇ naˇ, aˬ yawꞈ neh naw maꞈ-ahˇ biꞈ-euˬ miˇ kʼahˬ-ahˇ jawˇ leˇ-awˬ lehˇ, Kaˬdeˬshaˇ Baˬneˬ lehˇ kuˇ-eu jawˇ duˬ-ahˇ neh naw maꞈ-ahˇ bi le ngeh kʼawꞈ, naw maꞈ aˬ yawꞈ-ahˇ puiˬ-euˬ meh.

²⁴Aˬ yawꞈ-ahˇ naw maꞈ maˬ jah-ehˇ, aˬ yawꞈ-euˬ ehˇ dawˬ-ahˇ naw maꞈ maˬ naˇ haˬ-aˬ. Naw maꞈ-ahˇ ngaˇ siˬ nya ngeh tiˬ nah neh, Sahˬpaˬ Miˬyehˇ-ahˇ naw maꞈ puiˬ luꞈ-eu meh.

²⁵“Kʼoeˇ miˇ neh, oeˬ tseˇ nah oeˬ tseˇ miˇ keuˆ ni, Sahˬpaˬ Miˬyehˇ mehˬ shi moꞈ tsahˬ-ehˇ awˆ byaˆ-awˇ ngaˇ jawˇ-euˬ ma. Aˬ jeˬ miˇ neh ehˇ naˇ, naw maꞈ-ahˇ laˆ luˬ laˆ seˇ nehˬ-eu gʼaˇ duˬ aˬ yawꞈ noeˬ tsehˆ taˬ-euˬ ngaˇ siˬ duˬ-eu ma.

²⁶Kʼoeˇ ngeh, ngaˇ heu loꞈ-ehˇ guiˬ lahˬ shaˇ-euˬ ma. ‘Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, nawˬ-euˬ huiˬ dui dui-eu baoˬ hawˇ-eu gʼaˬ-ahˇ gʼoe-awˇ, Iˇjiˇtuˆ miˇ kʼahˬ-ahˇ neh nawˬ neh ka kʼoꞈ doˆ laꞈ-euˬ tsawˇ jeuˬ pyeuꞈ-eu nawˬ-euˬ tsawˇ jeuˬ-ahˇ taˬ laˆ luˬ taˬ laˆ seˇ nehˬ laꞈ.

²⁷Nawˬ-euˬ zaˬ kʼaˆ Aˬbyaˬhaˬ, Iˇtsaˆ hawˇ-eu Yaˬkoˆ-ahˇ noeˬ keuˆ-awˇ, tsawˇ haˬ heu deuˬ-euˬ nui ma gʼahˇ-eu jeˬ, maˬ muiˬ maˬ jaˬ-eu jeˬ hawˇ-eu, aˬ yawꞈ maꞈ-euˬ iˬ baˇ-ahˇ, do taˬ yuˇ nehˬ laꞈ.

²⁸Kʼoeˇ loꞈ-ehˇ maˬ ngeuˇ naˇ, nawˬ-euˬ tsawˇ haˬ deuˬ-ahˇ, nawˬ neh saˇ jaˇ dzaˬ taˬ-euˬ miˇ kʼahˬ-ahˇ nawˇ maˬ sheuˬ uˇ gʼeh nehˬ nya nga lehˇ, Iˇjiˇtuˆ tsawˇ haˬ deuˬ ehˇ tehꞈ-a. Nawˬ-euˬ tsawˇ haˬ deuˬ-ahˇ nawˇ bye-eu miˇ neh, bawˇ tsahˬ bawˇ dahˇ-ahˇ sheuˬ gʼeh-awˇ sehꞈ-euˬ ngaˇ lehˇ, aˬ yawꞈ maꞈ ehˇ tehꞈ-a.

²⁹Yaw muiˬ paˬ-ehˇ ehˇ leꞈ naˇ, tsawˇ haˬ heu deuˬ-ahˇ nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ nawˇ tseˇ doˆ-awˇ, huiˬ dui dui-eu nawˬ-euˬ baoˬ-ahˇ gʼoe-eu laꞈ kʼoeˇ, nawˬ-euˬ aˬ laꞈ cawˬ ja-awˇ, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ laꞈ-euˬ meh’ lehˇ shaˇ-euˬ ma.