Read Akha Yoˇhaˬ 1 Bible Online

Yoˇhaˬ 1 - Akha bible

Yoˇhaˬ 1

¹Mˬ hawˇ-eu miˇ maˬ seu le mi naˆ-ehˇ, Dawˬ jawˇ-euˬ meh. Dawˬ kʼoeˇ Miˬyehˇ nehˬ-ehˇ jawˇ-euˬ meh. Dawˬ kʼoeˇ-aˬ, Miˬyehˇ pyeuꞈ-eu meh.

²Aˇ dahˬ beh ngeh neh, Dawˬ kʼoeˇ Miˬyehˇ nehˬ-ehˇ jawˇ-euˬ meh Kʼaˇ .

³Kʼaˇ jawˇ kʼaˇ jaˆ-eu jeˬ dawˬ tawˆ luꞈ, aˬ yawꞈ-ahˇ gʼoe-awˇ beh taˬ-euˬ meh.beh taˬ-euˬ jeˬ dawˬ tawˆluꞈ, aˬ yawꞈ-ahˇ maˬ gʼoe ni beh taˬ-euˬ tiˬ jeˬ-iˬ maˬ jaˆ-a.

⁴Aˬ yawꞈ-aˬ, dehꞈ-eu jeˬ doˆ le duˬ pyeuꞈ-awˇ, dehꞈ-eu jeˬ kʼoeˇ-aˬ, tsawˇ haˬ zaˬ gʼaˇ duˬ yaw shehꞈ pyeuꞈ-eu meh.

⁵Yaw shehꞈ kʼoeˇ yaw zahˇ laꞈ kʼoeˇ bya le-awˇ, yaw zahˇ kʼoeˇ yaw shehꞈ-ahˇ maˬ gʼaˬ leˇ-a.

⁶Yoˇhaˬ lehˇ myahˇ-euˬ tsawˇ haˬ tiˬ gʼaˬ-ahˇ Miˬyehˇ kʼehˇ gʼeh leꞈ-euˬ meh.

⁷Tsawˇ haˬ dawˬ tawˆ luꞈ ya gaˬ-awˇ jah laˇ ni, yaw shehꞈ kʼoeˇ-euˬ gaˇ kawˆ aˬ yawꞈ saˇ kiˇ kamˬ le-euˬ meh.

⁸Aˬ yawꞈ-aˬ, yaw shehꞈ kʼoeˇ maˬ ngeuˇ-a. Yaw shehꞈ kʼoeˇ-euˬ gaˇ kawˆ saˇ kiˇ kamˬ le-euˬ tehꞈ meh.

⁹Yaw shehꞈ kʼoeˇ-aˬ, miˇ tsaˬ kʼoeˇ taˆ oe-awˇ, tsawˇ haˬ zaˬ dawˬ tawˆ luꞈ kʼoeˇ taˆ bya nehˬ le-euˬ maˇ maˇ ni gʼeh-eu yaw shehꞈ meh.

¹⁰Miˬyehˇ neh aˬ yawꞈ-ahˇ gʼoe-awˇ beh taˬ-euˬ miˇ tsaˬ heu kʼoeˇ taˆ, aˬ yawꞈ jawˇ luꞈ meh. Ehˇ kʼawꞈ, miˇ tsaˬ zaˬ deuˬ aˬ yawꞈ-ahˇ maˬ siˬ nya-a.

¹¹Aˬ yawꞈ-euˬ miˇ kʼahˬ-ahˇ aˬ yawꞈ oe-euˬ kʼawꞈ, aˬ yawꞈ-euˬ tsawˇ haˬ deuˬ aˬ yawꞈ-ahˇ maˬ ha geuꞈ-a.

¹²Ehˇ kʼawꞈ, tiˬ paˆ na deuˬ aˬ yawꞈ-ahˇ ha geuꞈ-awˇ jah-eu meh. Kʼoeˇ miˇ neh, Miˬyehˇ-euˬ zaˬ bi pyeuꞈ laˇ-eu a kawˬ-aˬ, aˬ yawꞈ maꞈ-ahˇ aˬ yawꞈ biꞈ-euˬ meh.

¹³Aˬ yawꞈ maꞈ Miˬyehˇ-euˬ zaˬ pyeuꞈ laˇ-eu kʼoeˇ-aˬ, miˇ tsaˬ zaˬ deuˬ aˬ da o neh dehꞈ le-awˇ aˬ da-euˬ zaˬ deuˬ pyeuꞈ gaˇ maˬ duˇ-a. Miˬyehˇ neh aˬ yawꞈ maꞈ-ahˇ aˬ yawꞈ-euˬ zaˬ bi pyeuꞈ laˇ-euˬ tiˬ jeˬ meh.

¹⁴Dawˬ kʼoeˇ tsawˇ haˬ zaˬ pyeuꞈ le-awˇ, gʼawˬ shaˬ gaˬ-eu jeˬ hawˇ-eu saˇ jaˇ ziꞈ-eu jeˬ tiˬ byah ni ahˇ-eu laꞈ kʼoeˇ, aˬ dui nehˬ-ehˇ jawˇ-euˬ meh. Aˬda-euˬ Zaˬmaˇ tiˬ gʼaˬ tehꞈ-euˬ yaw shehꞈ kʼahˬ sehˇ-ahˇ aˬ dui mawˇ-euˬ ma.

¹⁵Aˬ yawꞈ-euˬ gaˇ kawˆ Yoˇhaˬ saˇ kiˇ kamˬ-awˇ ehˇ-eu, “‘Ngaˬ-euˬ mehˬ nah oe luꞈ-eu gʼaˬ ngaˇ naˆ maˬ tseˇ huiˬ-eu mahˇ-eu meh. Aˬ jeˬ miˇ neh ehˇ naˇ, ngaˇ maˬ dehꞈ le mi naˆ-ehˇ aˬ yawꞈ jawˇ luꞈ-eu meh’ lehˇ ngaˬ neh ehˇ-euˬ kʼoeˇ-aˬ, aˬ yawꞈ-ahˇ ehˇ-euˬ jeˬ pyeuꞈ-eu ma.”

¹⁶Aˬ yawꞈ laꞈ kʼoeˇ gʼawˬ shaˬ gaˬ-eu jeˬ tiˬ byah ni ahˇ-awˇ, aˬ dui-ahˇ guiˬ lahˬ tiˬ jeˬ saˇ-iˬ tiˬ jeˬ biꞈ laꞈ luꞈ-eu meh.

¹⁷Miˬyehˇ aˬ dui-ahˇ Zahˇ dawˬ kʼoꞈ dawˬ biꞈ laꞈ ngeh, Moˇseˬ-ahˇ gʼoe-awˇ biꞈ laꞈ-euˬ meh. Ehˇ kʼawꞈ, Miˬyehˇ aˬ dui-ahˇ gʼawˬ shaˬ gaˬ-eu jeˬ hawˇ-eu saˇ jaˇ ziꞈ-eu jeˬ pah mehˬ laꞈ ngeh, Yeˬsuˇ-ahˇ gʼoe-awˇ pah mehˬ laꞈ-euˬ meh.

¹⁸Tsawˇ haˬ tiˬ gʼaˬ-iˬ Miˬyehˇ-ahˇ maˬ mawˇ haw-aˬ. Aˬda-euˬ bawˇ kʼahˇ-ahˇ nuiˇ-eu Zaˬmaˇ tiˬ gʼaˬ tehꞈ neh, Miˬyehˇ aˬ suˇ gʼaˬ pyeuꞈ-eu gaˇ kawˆ pah mehˬ le-euˬ meh.

¹⁹Yeˬluˇsaˬlehˬ meuˬ-ahˇ jawˇ-eu Yuˇdaˆ tsawˇ haˬ aˬ yuiꞈ aˬ tsu deuˬ neh, piˇ ma deuˬ hawˇ-eu Leˬbiˇ tsawˇ haˬ[1] deuˬ-ahˇ Yoˇhaˬ jawˇ gaˇ kʼehˇ gʼeh-awˇ, “Nawˇ aˬ suˇ gʼaˬ te” lehˇ bi naˇ haˬ-iˇ-euˬ meh.

²⁰Yoˇhaˬ tiˬ jeˬ-iˬ maˬ zaꞈ taˬ ni, bya cehˆ ni ehˇ nehˬ-eu, “Ngaˇ Ka li maˬ ngeuˇ.”

²¹Aˬ yawꞈ maꞈ ehˇ-eu, “Toˆ-ehˇ ngeuˇ naˇ, nawˇ aˬ suˇ gʼaˬ te. Eˇliˇyaˆ te loˇ.” Yoˇhaˬ ehˇ-eu, “Maˬ ngeuˇ.” Aˬ yawꞈ maꞈ ehˇ-eu, “Miˬyehˇ gʼaˇ duˬ ngehˬ dah-eu tsawˇ haˬ te loˇ.” Yoˇhaˬ ehˇ-eu, “Maˬ ngeuˇ.”

²²Aˬ yawꞈ maꞈ ehˇ-eu, “Toˆ-ehˇ ngeuˇ naˇ, nawˇ aˬ suˇ gʼaˬ pyeuꞈ-eu gaˇ kawˆ nga maꞈ-ahˇ tiˬ poˆ ehˇ nehˬ laꞈ sheˇ. Nga maꞈ-ahˇ kʼehˇ gʼeh leꞈ-euˬ tsawˇ haˬ deuˬ-ahˇ nga maꞈ ya dzawˇ poˆ nehˬ leˇ meh. Nawˇ yawˬ haˇ yawˬ ha aˬ suˇ gʼaˬ te lehˇ ehˇ nmˇ.”

²³Yoˇhaˬ ehˇ-eu, “‘SahˬpaˬMiˬyehˇ oe-eu gʼaˇ duˬ gaˇ ma shaˇ dahˇ-awˬ’ lehˇ, bawˇ tsahˬ bawˇ dahˇ laꞈ kʼoeˇ tsawˇ haˬ tiˬ gʼaˬ guˇ tehꞈ-a lehˇ, Miˬyehˇ gʼaˇ duˬ ngehˬ dah-eu Iˇsaˬyaˆ neh ehˇ-euˬ kʼoeˇ ngaˇ ma.”

²⁴Tsawˇ haˬ kʼoeˇ deuˬ-aˬ, Paˬliˬsehˇ deuˬ neh kʼehˇ leꞈ-euˬ tsawˇ haˬ pyeuꞈ-eu meh.

²⁵Aˬ yawꞈ maꞈ Yoˇhaˬ-ahˇ naˇ haˬ-eu, “Nawˇ-aˬ, Ka li kʼawꞈ maˬ ngeuˇ, Eˇliˇyaˆ kʼawꞈ maꞈ ngeuˇ, Miˬyehˇ gʼaˇ duˬ ngehˬ dah-eu tsawˇ haˬ kʼawꞈ maˬ ngeuˇ lehˇ ehˇ-eu jeˬ maˇ-iˬ, aˬ jeˬ miˇ neh aˬ cawˬ-ahˇ iˇ cuꞈ shawˇ nehˬ te.”

²⁶Yoˇhaˬ ehˇ-eu,“Ngaˇ-aˬ, iˇ cuꞈ neh iˇ cuꞈ shawˇ nehˬ-eu ma. Ehˇ kʼawꞈ, naw maꞈ maˬ siˬ nya-eu tsawˇ haˬ tiˬ gʼaˬ naw maꞈ nehˬ-ehˇ jawˇ luꞈ meh.

²⁷Aˬ yawꞈ ngaˬ-euˬ mehˬ nah oe luꞈ meh. Ngaˇ-aˬ, aˬ yawꞈ-euˬ sehˬ nawˆ aˇ caˆ puiˇ nehˬ-eu tehꞈ-ehˇ kʼawꞈ maˬ geuˇ nya.”

²⁸Yoˇhaˬ iˇ cuꞈ shawˇ nehˬ luꞈ-eu jawˇ duˬ pyeuꞈ-eu Yawˇdaˬ lawˇ baˬ-euˬ nahˇ ma doˆ kʼehˬ paw dzeˇ jaˆ-eu Beˬtaˬniˇ pu-ahˇ, Yoˇhaˬ-ahˇ aˬ yawꞈ maꞈ kʼoeˇ loꞈ-ehˇ naˇ haˬ-euˬ meh.

²⁹Yawˬ nah yawˬ, Yeˬsuˇ oe luꞈ gaˇ Yoˇhaˬ mawˇ-awˇ ehˇ-eu, “Miˇ tsaˬ zaˬ-euˬ iˬ baˇ-ahˇ pi dzeh le-euˬ Miˬyehˇ-euˬ yawˇ zaˬ-ahˇ haw sheˇ.

³⁰‘Tsawˇ haˬ tiˬ gʼaˬ ngaˬ-euˬ mehˬ nah oe luꞈ meh. Aˬ yawꞈ-aˬ, ngaˇ naˆ maˬ tseˇ huiˬ dzehˬ-eu meh. Aˬ jeˬ miˇ neh ehˇ naˇ, ngaˇ maˬ dehꞈ le mi naˆ-ehˇ aˬ yawꞈ jawˇ luꞈ meh’ lehˇ ngaˬ neh ehˇ-euˬ kʼoeˇ, aˬ yawꞈ-ahˇ ehˇ-euˬ jeˬ pyeuꞈ-eu ma.

³¹Aˬ yawꞈ aˬ suˇ gʼaˬ-a lehˇ ngaˇ maˬ siˬ nya-aˬ. Iˇsaˬleˬlaˆ tsawˇ haˬ deuˬ aˬ yawꞈ-ahˇ siˬ duˬ laˇ nya ni, ngaˇ iˇ cuꞈ neh iˇ cuꞈ shawˇ nehˬ le-euˬ ma.”

³²Kʼoeˇ naˇ, Yoˇhaˬ heu loꞈ-ehˇ saˇ kiˇ kamˬ-eu meh. “Yaw sahˇ Miˬyehˇ kʼaˬ kʼoeˬ loꞈ-ehˇ mˬ kʼoeˇ taˆ neh zaꞈ le-awˇ, aˬ yawꞈ kʼoeˇ taˆ jawˇ luꞈ-eu ngaˇ mawˇ-euˬ ma.

³³Ngaˇ aˬ yawꞈ-ahˇ maˬ siˬ nya-aˬ siˬ. Ehˇ kʼawꞈ, iˇ cuꞈ neh iˇ cuꞈ bi shawˇ nehˬ le-eu lehˇ ngaˬ-ahˇ kʼehˇ gʼeh leꞈ-euˬ Miˬyehˇ ehˇ-eu, ‘Yaw sahˇ Miˬyehˇ tsawˇ haˬ tiˬ gʼaˬ kʼoeˇ taˆ zaꞈ le-awˇ jawˇ gaˇ nawˇ ya mawˇ tehꞈ-a. Aˬ yawꞈ-aˬ, Yaw sahˇ Miˬyehˇ neh iˇ cuꞈ shawˇ nehˬ-euˬ gʼaˬ meh’ lehˇ ehˇ-eu meh.

³⁴Kʼoeˇ loꞈ-ehˇ pyeuꞈ laˇ-euˬ gaˇ ngaˇ ya mawˇ gʼaˬ-euˬ miˇ neh, aˬ yawꞈ Miˬyehˇ-euˬ Zaˬmaˇ meh lehˇ saˇ kiˇ kamˬ-eu ma.”

³⁵Yawˬ nah yawˬ keuˆ laˇ ngeh, Yoˇhaˬ hawˇ-eu aˬ yawꞈ-euˬ zaˬ lahˇ nyiˬ gʼaˬ kʼoeˇ gaˇ paˇ yawꞈ luꞈ-eu meh.

³⁶Yeˬsuˇ oe luꞈ gaˇ aˬ yawꞈ ya mawˇ ngeh, “Miˬyehˇ-euˬ Yawˇ zaˬ-ahˇ haw sheˇ” lehˇ ehˇ-eu meh.

³⁷Zaˬ lahˇ kʼoeˇ nyiˬ gʼaˬ Yoˇhaˬ kʼoeˇ loꞈ-ehˇ ehˇ gaˇ gaˬ-awˇ, Yeˬsuˇ-euˬ mehˬ nah iˇ-euˬ meh.

³⁸Yeˬsuˇ nahˇ gʼoꞈ gʼoꞈ haw-awˇ, aˬ yawꞈ nyaꞈ aˬ yawꞈ-euˬ mehˬ nah oe luꞈ gaˇ ya mawˇ ngeh, “Naw nyaꞈ aˬ jeˬ shaˇ caw te” lehˇ naˇ haˬ-euˬ meh. “Laˬ biˇ-oˇ, nawˇ aˬ gaˇ jawˇ te” lehˇ aˬ yawꞈ nyaꞈ aˬ yawꞈ-ahˇ ehˇ-eu meh. (ʼLaˬ biˇʼ lehˇ ehˇ-eu-aˬ, ʼsaˬ laˬʼ lehˇ ehˇ mawꞈ-eu meh.)

³⁹“Laˇ-awˇ haw laˇ-awˬ” lehˇ, aˬ yawꞈ nyaꞈ-ahˇ Yeˬsuˇ ehˇ nehˬ-euˬ meh.) Kʼoeˇ naˇ aˬ yawꞈ nyaꞈ aˬ yawꞈ-euˬ mehˬ nah caw teh gʼeh-awˇ, aˬ yawꞈ-euˬ jawˇ duˬ-ahˇ ya mawˇ-awˇ, kʼoeˇ ngeh nah kʼoeˇ gaˇ jawˇ ciꞈ-euˬ meh.

⁴⁰Tiˬ gʼaˬ-aˬ, Siˇmoˬ Beˬtuˆluˆ-euˬ mehˇ nmˇ Aˬdehˬlehˬ meh.

⁴¹Aˬ yawꞈ-euˬ mehˇ nmˇ Siˇmoˬ-ahˇ aˬ yawꞈ yaw kawˇ-ehˇ poˆ mawˇ-awˇ, “Nga nyaꞈ Meˬsiˇyaˆ-ahˇ ya mawˇ gʼaˬ-euˬ ma” lehˇ ehˇ nehˬ-euˬ meh. (ʼMeˬsiˇyaˆʼ hawˇ-eu ʼKa liʼ lehˇ ehˇ-eu tsawˇ myahˇ heu nyiˬ myahˇ dawˬ tsuiꞈ tiˬ kawˆ meh.)

⁴²Kʼoeˇ naˇ, Siˇmoˬ-ahˇ Yeˬsuˇ jawˇ gaˇ aˬ yawꞈ sheuˬ gʼeh-euˬ meh. Yeˬsuˇ Siˇmoˬ-ahˇ haw-awˇ ehˇ-eu, “Nawˬ-euˬ tsawˇ myahˇ-aˬ, Yoˇhaˬ-euˬ aˬ li Siˇmoˬ meh. Ehˇ kʼawꞈ, nawˬ-ahˇ Geˬpaˇ lehˇ kuˇ tehꞈ-a.” lehˇ ehˇ nehˬ-euˬ meh. (ʼGeˬpaˇʼ hawˇ-eu ʼBeˬtuˆluˆʼ lehˇ ehˇ-eu tsawˇ myahˇ heu nyiˬ myahˇ dawˬ tsuiꞈ duˇ leˇ-awˇ, ʼKʼaˬ loʼ lehˇ ehˇ mawꞈ-eu meh.

⁴³Yawˬ nah yawˬ Gaˬliˬlehˇ miˇ kʼahˬ-ahˇ iˇ-eu lehˇ Yeˬsuˇ noeˬ tsehˆ-euˬ meh. Piˇliˇpuˆ-ahˇ aˬ yawꞈ mawˇ-awˇ,“Ngaˬ nehˬ-ehˇ oe-awˬ” lehˇ ehˇ nehˬ-euˬ meh.

⁴⁴(Piˇliˇpuˆ-aˬ, Aˬdehˬlehˬ hawˇ-eu Beˬtuˆluˆ aˬ nyaꞈ nmˇ jawˇ-eu Behˬdzeˇdaˬ meuˬ-ahˇ jawˇ-eu meh.)

⁴⁵Naˬdaˬneˬlaˇ-ahˇ Piˇluˇpuˆ mawˇ-awˇ ehˇ nehˬ-eu, “Moˇseˬ neh boꞈ-euˬ Zahˇ dawˬ kʼoꞈ dawˬ laꞈ kʼoeˇ hawˇ-eu Miˬyehˇ gʼaˇ duˬ ngehˬ dah-eu deuˬ-euˬ sahˬ boꞈ laꞈ kʼoeˇ ehˇ taˬ-euˬ kʼoeˇ gʼaˬ-ahˇ nga maꞈ mawˇ-euˬ ma. Aˬ yawꞈ-aˬ, Naˬzaˬlehˇ meuˬ-ahˇ jawˇ-eu Yoˇsehˆ-euˬ aˬ li meh.”

⁴⁶Naˬdaˬneˬlaˇ ehˇ-eu, “Naˬzaˬlehˇ meuˬ-ahˇ gaˇ dahˇ tsoeˬ-eu jeˬ mˇ doˆ laꞈ nya-eu tsawˇ haˬ jawˇ tehꞈ-a loˇ.” Piˇliˇpuˆ ehˇ-eu, “Haw laˇ-awˬ tawˇ.”

⁴⁷Naˬdaˬneˬlaˇ aˬ yawꞈ jawˇ gaˇ laˇ luꞈ-eu ya mawˇ ngeh, Yeˬsuˇ ehˇ-eu, “Maˇ maˇ ni gʼeh-eu Iˇsaˬleˬlaˆ tsawˇ haˬ laˇ ngaˇ. Aˬ yawꞈ laꞈ kʼoeˇ jaˬ myawꞈ myawꞈ-eu jeˬ tiˬ pawꞈ-iˬ maˬ ahˇ-a.”

⁴⁸Naˬdaˬneˬlaˇ ehˇ-eu, “Nawˇ ngaˬ-ahˇ aˬ joˆ-ehˇ siˬ nya te.” Yeˬsuˇ ehˇ-eu, “Piˇliˇpuˆ nawˬ-ahˇ maˬ kuˇ le mi naˆ-ehˇ, nawˇ siˬ guˬ aˇ bawˇ dawˬ pehˬ-ahˇ nuiˇ luꞈ ngeh neh nawˬ-ahˇ ngaˇ mawˇ-euˬ ma.”

⁴⁹Naˬdaˬneˬlaˇ ehˇ-eu, “Saˬ laˬ-oˇ, nawˇ-aˬ, Miˬyehˇ-euˬ Zaˬ maˇ ngaˇ. Iˇsaˬleˬlaˆ tsawˇ jeuˬ-euˬ Sahˬ paˬ ngaˇ.”

⁵⁰Yeˬsuˇ ehˇ-eu, “Nawˇ siˬ guˬ aˇ bawˇ dawˬ pehˬ-ahˇ jawˇ ngeh neh nawˬ-ahˇ ngaˇ mawˇ-euˬ ma lehˇ ngaˇ ehˇ-eu miˇ neh jah te loˇ. Heu naˆ maˬ tseˇ huiˬ-eu gaˇ kawˆ deuˬ-ahˇ nawˇ ya mawˇ tehꞈ-a.”

⁵¹Kʼoeˇ naˇ, aˬ ha maꞈ-ahˇ aˬ yawꞈ ehˇ nehˬ-eu, “Ngaˇ naw maꞈ-ahˇ maˇ jawˆ ni ehˇ nehˬ nyaˇ. Mˬ pah le-awˇ, Miˬyehˇ-euˬ mˬ taˆ gʼaˬ kʼehˇ deuˬ Tsawˇ haˬ-euˬ Zaˬ maˇ kʼoeˇ taˆ tsawˬ toeˬ tsawˬ daˆ-ehˇ yaˇ gaˇ gaˇ tawꞈ le gaˇ naw maꞈ ya mawˇ tehꞈ-a.”