Read Akha Yoˇhaˬ 10 Bible Online

Yoˇhaˬ 10 - Akha bible

Yoˇhaˬ 10

¹Yeˬsuˇ ehˇ-eu, “Ngaˇ naw maꞈ-ahˇ maˇ jawˆ ni ehˇ-eu ma. Yawˇ yawˇ kuˆ laꞈ kʼoeˇ gʼoˆ kʼehˬ-ahˇ neh maˬ uˇ laˇ-ehˇ, yawˬ gaˇ yawˬ neh daˆ uˇ laˇ-eu tsawˇ haˬ-aˬ, smˇ kʼoeˬ tahˇ joe meh.

²Ehˇ kʼawꞈ, gʼoˆ kʼehˬ-ahˇ neh uˇ laˇ-eu tsawˇ haˬ-aˬ, yawˇ bo-eu yaw sahˇ meh.

³Gʼoˆ kʼehˬ-ahˇ loꞈ-eu gʼaˬ aˬ yawꞈ-ahˇ laˇ gʼoˆ pah nehˬ-awˇ, yawˇ deuˬ aˬ yawꞈ-euˬ teˇ saˇ ya gaˬ-awˇ, aˬ yawꞈ-euˬ yawˇ deuˬ-ahˇ aˬ yawꞈ tsawˇ myahˇ kuˇ kuˇ-ehˇ laꞈ nyiˇ sheuˬ doˆ gʼeh-eu meh.

⁴Yawˇ deuˬ-ahˇ laꞈ nyiˇ sheuˬ doˆ jiˇ ngeh, aˬ yawꞈ mehˬ hu paw cah-awˇ, yawˇ deuˬ aˬ yawꞈ-euˬ mehˬ nah caw teh-eu meh. Aˬ jeˬ miˇ neh ehˇ naˇ, aˬ yawꞈ-euˬ teˇ saˇ-ahˇ yawˇ deuˬ siˬ nya-eu meh.

⁵Aˬ cawˬ-euˬ mehˬ nah yawˇ kʼoeˇ deuˬ maˬ iˇ ni cehˆ-eu meh. Aˬ jeˬ miˇ neh ehˇ naˇ, aˬ cawˬ-euˬ teˇ saˇ-ahˇ aˬ yawꞈ maꞈ maˬ siˬ nya-a.”

⁶Yeˬsuˇ aˬ yawꞈ maꞈ-ahˇ yaw jeˬ ma jeˬ heu hmˬ ja mehˬ-euˬ kʼawꞈ, aˬ yawꞈ maꞈ dawˬ tsuiꞈ maˬ gʼoˆ shaw nya-a.

⁷Kʼoeˇ miˇ neh, Yeˬsuˇ aˬ yawꞈ maꞈ-ahˇ paˇ ehˇ nehˬ-eu, “Ngaˇ-aˬ, yawˇ deuˬ gʼaˇ duˬ gʼoˆ kʼehˬ pyeuꞈ-eu ma.

⁸Ngaˬ-euˬ mehˬ hu kʼaˇ oe-euˬ deuˬ-aˬ, smˇ kʼoeˬ tahˇ joe tehꞈ meh. Ehˇ kʼawꞈ, aˬ yawꞈ maꞈ-euˬ ehˇ dawˬ-ahˇ yawˇ deuˬ maˬ naˇ haˬ-a.

⁹Ngaˇ-aˬ, gʼoˆ kʼehˬ ma. Ngaˬ-ahˇ neh kʼaˇ uˇ laˇ-eu tsawˇ haˬ-aˬ, ka kʼoꞈ-eu jeˬ za tehꞈ-a. Aˬ yawꞈ iˇ doˆ laˇ doˆ-ehˇ cah-awˇ, gaˆ dzaˬ duˬ ya mawˇ tehꞈ-a.

¹⁰Smˇ kʼoeˬ tahˇ joe-aˬ, kʼoeˬ-eu, sehꞈ-eu, laˆ cawˆ-eu gʼaˇ duˬ oe-eu tehꞈ meh. Ngaˇ-aˬ, naw maꞈ dehꞈ-eu saꞈ laˇ za nya ni oe-euˬ ma. Dehꞈ-eu saꞈ laˇ kʼoeˇ-ahˇ naw maꞈ tiˬ byah tiˬ loꞈ za ni oe-euˬ ma.

¹¹“Ngaˇ-aˬ, muiˬ-eu yawˇ bo-eu yaw sahˇ ma. Yawˇ deuˬ-euˬ gʼaˇ duˬ ngaˇ shiˇ dah peuˬ ma.

¹²Maˇ maˇ ni yawˇ bo-eu tsawˇ haˬ maˬ ngeuˇ-ehˇ, aˇ poeˬ biꞈ-awˇ bi bo-euˬ deuˬ-aˬ, kʼaˬ yehˇ oe gaˇ ya mawˇ ngeh, yawˇ deuˬ-ahˇ byehˇ dzeh yaꞈ-awˇ cehˆ-eu meh. Kʼoeˇ ngeh, kʼaˬ yehˇ kʼoeˇ yawˇ deuˬ-ahˇ kawꞈ kawꞈ-ehˇ teh byaˆ-eu meh.

¹³Aˬ yawꞈ-aˬ, aˇ poeˬ biꞈ-awˇ bi bo-euˬ tsawˇ haˬ pyeuꞈ-eu miˇ neh, yawˇ deuˬ-ahˇ kʼahˇ maˬ kʼoꞈ ni byehˇ dzeh-awˇ cehˆ-eu meh.

¹⁴Ngaˇ-aˬ, muiˬ-eu yawˇ bo-eu yaw sahˇ ma. Aˬda ngaˬ-ahˇ siˬ nya-awˇ, ngaˇ kʼawꞈ Aˬda-ahˇ siˬ nya gaˇ duˇ ni, ngaˬ-euˬ yawˇ deuˬ-ahˇ ngaˇ siˬ nya-awˇ, ngaˬ-euˬ yawˇ deuˬ kʼawꞈ ngaˬ-ahˇ siˬ nya-eu meh. Aˬ yawꞈ maꞈ gʼaˇ duˬ ngaˇ shiˇ dah peuˬ-eu ma.

¹⁵

¹⁶Yawˇ yawˇ kuˆ heu kuˆ-ahˇ maˬ uˇ-eu ngaˬ-euˬ yawˇ deuˬ jawˇ te siˬ. Yawˇ kʼoeˇ deuˬ-ahˇ kʼawꞈ ngaˇ ya sheuˬ uˇ laꞈ-a siˬ. Aˬ yawꞈ maꞈ ngaˬ-euˬ dawˬ-ahˇ naˇ haˬ tehꞈ-a. Kʼoeˇ ngeh jawˇ, yawˇ dawˬ tawˆ luꞈ yawˇ yawˇ maꞈ tiꞈ maꞈ tehꞈ-ehˇ pyeuꞈ laˇ-awˇ, yawˇ bo-eu yaw sahˇ tiˬ sahˇ tehꞈ-ehˇ bo tehꞈ-a.

¹⁷“Ngaˇ tiˬ poˆ paˇ ya dehꞈ ni ngaˬ-euˬ gʼawˇ mawˇ shiˇ dah peuˬ-eu miˇ neh, Aˬda ngaˬ-ahˇ gaˬ-euˬ meh.

¹⁸Tsawˇ haˬ tiˬ gʼaˬ-iˬ ngaˬ-euˬ saꞈ laˇ-ahˇ maˬ sehꞈ doˆ geuꞈ-aˬ. Ngaˬ neh nui ma keuˆ-awˇ shiˇ dah-euˬ jeˬ pyeuꞈ-eu ma. Shiˇ mawꞈ-eu maˬ ehˇ, dehꞈ mawꞈ-eu maˬ ehˇ, ngaˇ naꞈ-i jaˆ-eu ma. Ngaˇ kʼoeˇ loꞈ-ehˇ jahˇ-eu gʼaˇ duˬ, ngaˬ Da neh dawˬ biꞈ taˬ-euˬ meh.”

¹⁹Yeˬsuˇ kʼoeˇ loꞈ-ehˇ ehˇ-eu miˇ neh, tsawˇ haˬ kʼoeˇ deuˬ tiˬ gʼaˬ tiˬ jeˬ noeˬ-eu meh.

²⁰Aˬ yawꞈ maꞈ myaˬ tiˬ paˆ ehˇ-eu, “Tsawˇ haˬ teu gʼaˬ nehꞈ uˇ-awˇ uˬ tsehˆ-euˬ ngaˇ. Aˬ jeˬ miˇ neh aˬ yawꞈ ehˇ gaˇ naw maꞈ naˇ haˬ te.”

²¹Ehˇ kʼawꞈ, yawˬ deuˬ yawˬ ehˇ-eu, “Nehꞈ uˇ-eu tsawˇ haˬ tiˬ gʼaˬ teu loꞈ-ehˇ gʼeh-eu dawˬ aˬ joˆ-ehˇ ngehˬ nya ta. Myaˆ behꞈ behꞈ-eu tsawˇ haˬ myaˆ nuiˆ mawˇ laˇ nya ni nehꞈ jahˇ nya ta loˇ.”

²²Tsahˬ gaˆ ahˇ le-awˇ, Yeˬluˇsaˬlehˬ meuˬ-ahˇ Uˬ duˬ tahˬ nymˇ nymˇ ma A nehˬ-eu Bawˬ-iˬ gʼeh luꞈ-eu aˇ yamˬ pyeuꞈ-eu meh.

²³Uˬ duˬ tahˬ nymˇ nymˇ ma-euˬ lahˇ laꞈ kʼoeˇ jaˆ-eu Sawˇlaˬmoˬ-euˬ sehˬ gʼawˆ laꞈ kʼoeˇ Yeˬsuˇ cah luꞈ-eu meh.

²⁴Kʼoeˇ ngeh, Yuˇdaˆ tsawˇ haˬ deuˬ aˬ yawꞈ jawˇ gaˇ uiˬ le-awˇ ehˇ-eu , “Nawˇ nga maꞈ-ahˇ kʼaˇ ngeuˇ-eu loꞈ-ehˇ maˬ ehˇ mehˬ nehˬ laꞈ ni, aˇ myah keuˆ ni nyi naˬ-eu gʼeh te. Nga maꞈ-ahˇ dawˇ coe ni ehˇ nehˬ laꞈ sheˇ. Nawˇ Meˬsiˇya ngeuˇ ma loˇ.”

²⁵Yeˬsuˇ ehˇ-eu, “Ngaˇ naw maꞈ-ahˇ ehˇ nehˬ gʼaˬ dzeuˇ-euˬ ma. Ehˇ kʼawꞈ, naw maꞈ ngaˬ-ahˇ maˬ jah-a. Ngaˬ Da-euˬ baoˬ-ahˇ gʼoe-awˇ ngaˬ neh mˇ-euˬ gaˇ deuˬ, ngaˬ-euˬ gʼaˇ duˬ saˇ kiˇ kamˬ luꞈ meh.

²⁶Ehˇ kʼawꞈ, naw maꞈ maˬ jah-a. Aˬ jeˬ miˇ neh ehˇ naˇ, naw maꞈ ngaˬ-euˬ yawˇ maˬ ngeuˇ-a.

²⁷Ngaˬ-euˬ yawˇ deuˬ ngaˬ-euˬ dawˬ naˇ haˬ-eu meh. Aˬ yawꞈ maꞈ-ahˇ ngaˇ siˬ nya-awˇ, aˬ yawꞈ maꞈ ngaˬ-euˬ mehˬ nah caw teh-eu meh.

²⁸Aˬ yawꞈ maꞈ-ahˇ mˬ maˬ maˬ byaˆ zaˇ ziˇ dehꞈ-eu jeˬ ngaˇ biꞈ-awˇ, aˬ yawꞈ maꞈ ti jawˇ-iˬ maˬ paˇ shiˇ meh. Tsawˇ haˬ tiˬ gʼaˬ-iˬ aˬ yawꞈ maꞈ-ahˇ ngaˬ-euˬ aˬ laꞈ laꞈ kʼoeˇ neh maˬ ceh doˆ geuꞈ nya-a.

²⁹Yawˇ kʼoeˇ deuˬ ngaˬ-ahˇ biꞈ laꞈ-euˬ gʼaˬ pyeuꞈ-eu ngaˬ Da-aˬ, dawˬ tawˆ kʼoeˇ taˆ huiˬ-eu gʼaˬ meh. Ngaˬ Da neh haw lahˇ taˬ-euˬ uˬ moˆ aˬ yawꞈ maꞈ-ahˇ tiˬ gʼaˬ-iˬ maˬ ceh doˆ geuꞈ gʼeh nya-a.

³⁰Aˬda hawˇ-eu ngaˇ-aˬ, aˬ yawꞈ tiˬ gʼaˬ ma.”

³¹Kʼoeˇ ngeh, tsawˇ haˬ kʼoeˇ deuˬ kʼaˬ lo gʼoˆ-awˇ aˬ yawꞈ-ahˇ biˬ-eu lehˇ gʼeh-eu meh.

³²Aˬ yawꞈ maꞈ-ahˇ Yeˬsuˇ ehˇ nehˬ-eu, “Aˬda neh bi mˇ laꞈ-euˬ muiˬ-eu gaˇ gʼawˬ mya jeˬ naw maꞈ mehˬ shi ngaˇ mˇ gʼaˬ-euˬ ma. Gaˇ kʼoeˇ deuˬ laꞈ kʼoeˇ aˬ geu hmˬ-ahˇ dehˬ lehꞈ-awˇ naw maꞈ ngaˬ-ahˇ kʼaˬ lo biˬ-eu gʼeh te.”

³³Aˬ yawꞈ maꞈ ehˇ-eu, “Muiˬ-eu gaˇ mˇ-euˬ miˇ neh nawˬ-ahˇ nga maꞈ kʼaˬ lo biˬ-eu lehˇ gʼeh-eu maˬ ngeuˇ. Nawˇ Miˬyehˇ-ahˇ yehˬ bawˬ sehˇ lu-ehˇ ehˇ-eu miˇ neh biˬ-eu lehˇ gʼeh-eu ma. Nawˇ tsawˇ haˬ zaˬ pyeuꞈ kʼawꞈ, yawˬ haˇ yawˬ ha Miˬyehˇ tsaˬ geuꞈ-eu beu tawˇ.”

³⁴Yeˬsuˇ ehˇ-eu, “Naw maꞈ-euˬ Zahˇ dawˬ kʼoꞈ dawˬ laꞈ kʼoeˇ, ‘Naw maꞈ miˬyehˇ meh’ lehˇ Miˬyehˇ neh ehˇ-euˬ dawˬ tiˬ dawˬ boꞈ ahˇ taˬ-euˬ maˬ ngeuˇ-a loˇ.

³⁵Jaˇliꞈ laꞈ kʼoeˇ kʼaˇ ehˇ taˬ-euˬ dawˬ mˬ maˬ maˬ byaˆ zaˇ ziˇ tsaˬ meh lehˇ aˬ dui siˬ duˬ-eu ma. Miˬyehˇ neh aˬ yawꞈ-euˬ dawˬ bi gaˬ-iˇ-euˬ tsawˇ haˬ kʼoeˇ deuˬ-ahˇ miˬyehˇ lehˇ kuˇ nehˬ-euˬ meh.

³⁶Ngaˬ-ahˇ maˇ diˇ-aˬ, Aˬda neh tseˇ doˆ-awˇ miˇ tsaˬ kʼoeˇ taˆ kʼehˇ gʼeh leꞈ-euˬ meh. Toˆ-ehˇ ngeuˇ naˇ, ngaˇ-aˬ, Miˬyehˇ-euˬ Zaˬmaˇ ma lehˇ yawˬ haˇ yawˬ ha ehˇ gaˇ, ngaˇ Miˬyehˇ-ahˇ yehˬ bawˬ sehˇ lu-ehˇ ehˇ-eu nga lehˇ naw maꞈ aˬ joˆ-ehˇ ehˇ nya te.

³⁷Ngaˬ Da neh bi mˇ-euˬ jeˬ-ahˇ ngaˇ mˇ luꞈ-eu maˬ ngeuˇ nga lehˇ duˬ naˇ, ngaˬ-ahˇ taˬ jah.

³⁸Ehˇ kʼawꞈ, ngaˬ Da neh bi mˇ-euˬ gaˇ deuˬ-ahˇ ngaˇ mˇ luꞈ-eu yaw duˬ baw naˇ, naw maꞈ ngaˬ-euˬ mawˇ do-ahˇ maˬ jah kʼawꞈ, ngaˬ neh mˇ-euˬ gaˇ deuˬ-ahˇ jah-eu tsaˬ tehꞈ-a. Aˬda ngaˬ-euˬ laꞈ kʼoeˇ jawˇ-awˇ, ngaˇ Aˬda-euˬ laꞈ kʼoeˇ jawˇ-eu gaˇ kawˆ naw maꞈ siˬ duˬ nya ni kʼoeˇ loꞈ-ehˇ jah-eu tsaˬ tehꞈ-a.”

³⁹Kʼoeˇ ngeh, aˬ yawꞈ maꞈ Yeˬsuˇ-ahˇ nyehꞈ-eu lehˇ paˇ leh jeh-eu meh. Ehˇ kʼawꞈ, aˬ yawꞈ maꞈ neh maˬ bi nyehꞈ mi ni law-iˇ-euˬ meh.

⁴⁰Kʼoeˇ naˇ, Yawˇdaˬ lawˇ baˬ nui baˬ paw Yoˇhaˬ iˇ cuꞈ shawˇ nehˬ luꞈ-eu jawˇ duˬ-ahˇ Yeˬsuˇ paˇ gʼoꞈ-iˇ-awˇ jawˇ-euˬ meh.

⁴¹Tsawˇ haˬ gʼawˬ mya ni aˬ yawꞈ jawˇ gaˇ oe-euˬ meh. Aˬ yawꞈ maꞈ ehˇ-eu, “Yoˇhaˬ-aˬ, zahˬ leˇ paˬ-ehˇ gʼeh-eu jeˬ maˬ mˇ-aˬ. Ehˇ kʼawꞈ, tsawˇ haˬ heu gʼaˬ gaˇ kawˆ aˬ yawꞈ neh kʼaˇ ehˇ-euˬ yawˬ jeˬ na luꞈ tsaˬ law hawˇ nga.”

⁴²Kʼoeˇ gaˇ, tsawˇ haˬ gʼawˬ mya ni aˬ yawꞈ-ahˇ jah laˇ-euˬ meh.