Read Akha Yoˇhaˬ 11 Bible Online

Yoˇhaˬ 11 - Akha bible

Yoˇhaˬ 11

¹Beˬtaˬniˇ meuˬ-ahˇ jawˇ-eu Laˬzaˬluˇ lehˇ myahˇ-euˬ tsawˇ haˬ tiˬ gʼaˬ naˇ luꞈ-eu meh. Beˬtaˬniˇ meuˬ-aˬ, Maˬliˇ hawˇ-eu Maˬta aˬ nyaꞈ nmˇ jawˇ-eu meuˬ kʼoeˇ meuˬ meh.

²Maˬliˇ-aˬ, Sahˬpaˬ Yeˬsuˇ-euˬ aˬ kuiˇ-ahˇ tsiˇ yaw saw jeˬ shehˆ daˆ-awˇ aˬ yawꞈ-euˬ uˬ duˬ tsehˇ kahˇ neh shiˆ gui nehˬ-euˬ zaˬ miˬ zaˬ kʼoeˇ gʼaˬ meh. Naˇ luꞈ-eu Laˬzaˬluˇ-aˬ, Maˬliˇ-euˬ aˬ mahˇ aˬ da meh.

³“Sahˬpaˬ-oˇ, nawˇ gʼoeˇ dui dui-eu gʼaˬ naˇ luꞈ meh” lehˇ, Maˬliˇ hawˇ-eu Maˬta aˬ nyaꞈ nmˇ neh Yeˬsuˇ jawˇ gaˇ bi tsaꞈ gaˬ leˇ-euˬ meh.

⁴Dawˬ kʼoeˇ dawˬ-ahˇ Yeˬsuˇ ya gaˬ ngeh, heu loꞈ-ehˇ ehˇ-eu meh. “Naˇ-eu gawˇ-eu kʼoeˇ baˬ da neh, Laˬzaˬluˇ shiˇ gaˇ aˇ saˬ maˬ saˬ-aˇ. Miˬyehˇ-euˬ yaw shehꞈ kʼahˬ sehˇ bi doˆ laˇ-eu gʼaˇ duˬ kʼoeˇ loꞈ-ehˇ pyeuꞈ laˇ-awˇ, Kʼoeˇ baˬ da neh Miˬyehˇ-euˬ Zaˬmaˇ yaw shehꞈ kʼahˬ sehˇ za tehꞈ-a.”

⁵Maˬliˇ, Maˬta, Laˬzaˬluˇ aˬ ha mehˇ nmˇ-ahˇ Yeˬsuˇ gʼoeˇ dui dui-eu meh.

⁶Ehˇ kʼawꞈ, Laˬzaˬluˇ naˇ luꞈ-eu gaˇ kawˆ aˬ yawꞈ ya gaˬ gʼaˬ-euˬ kʼawꞈ, yaw kawˇ-ehˇ maˬ iˇ ni aˬ yawꞈ jawˇ luꞈ-eu jawˇ duˬ-ahˇ nyiˬ nah jawˇ-euˬ meh.

⁷Kʼoeˇ naˇ, “Aˬ dui maꞈ Yuˇdaˆ miˇ kʼahˬ-ahˇ gʼoꞈ-iˇ kaˇ-euˇ” lehˇ, zaˬ lahˇ deuˬ-ahˇ aˬ yawꞈ ehˇ nehˬ-euˬ meh.

⁸Zaˬ lahˇ deuˬ ehˇ-eu, “Saˬ laˬ-oˇ, miˇ nah huˬ nah hawˇ-eu kʼoeˇ gaˇ jawˇ-eu tsawˇ haˬ deuˬ nawˬ-ahˇ kʼaˬ lo biˬ-eu lehˇ gʼeh-eu maˬ ngeuˇ-a loˇ. Nawˇ kʼoeˇ gaˇ paˇ gʼoꞈ-iˇ-eu gʼeh te loˇ.”

⁹Yeˬsuˇ ehˇ-eu, “Tiˬ nah-euˬ tseˇ nyiꞈ naˬ liˬ jaˆ-eu maˬ ngeuˇ-a loˇ. Nah gʼahˇ paw kʼaˇ cah-eu tsawˇ haˬ miˇ tsaˬ-euˬ yaw shehꞈ bya-eu miˇ neh maˬ pehˆ toˆ-aˇ.

¹⁰Ehˇ kʼawꞈ, uˬ ciꞈ paw cah naˇ, aˬ yawꞈ laꞈ kʼoeˇ yaw shehꞈ maˬ ahˇ-eu miˇ neh pehˆ toˆ tehꞈ-a.”

¹¹Yeˬsuˇ kʼoeˇ loꞈ-ehˇ ehˇ gʼaˬ miˇ tsa tiˬ poˆ paˇ ehˇ-eu, “Aˬ dui-euˬ cawˬ Laˬzaˬluˇ yuꞈ kʼaˆ taˬ-euˬ meh. Ngaˇ iˇ-awˇ laˆ noeˬ nehˬ-iˇ ma.”

¹²Zaˬ lahˇ deuˬ ehˇ-eu, “Sahˬpaˬ-oˇ, aˬ yawꞈ yuꞈ kʼaˆ-euˬ tehꞈ ngeuˇ naˇ, maˬ gaˇ laˇ tehꞈ-a.”

¹³Yeˬsuˇ ehˇ mawꞈ-eu-aˬ, Laˬzaˬluˇ shiˇ-euˬ meh lehˇ ehˇ mawꞈ-eu meh. Ehˇ kʼawꞈ, zaˬ lahˇ deuˬ-aˬ, aˬ yawꞈ maˇ maˇ ni yuꞈ kʼaˆ taˬ-eu meh lehˇ gʼoˆ shaw-euˬ meh.

¹⁴Kʼoeˇ miˇ neh, Yeˬsuˇ aˬ yawꞈ maꞈ-ahˇ dawˇ coe ni ehˇ nehˬ-eu, “Laˬzaˬluˇ shiˇ-euˬ meh.

¹⁵Ngaˇ Laˬzaˬluˇ nehˬ-ehˇ maˬ jawˇ zaˬ-euˬ miˇ neh, naw maꞈ gʼaˇ duˬ laˬ kʼaˬ cehˇ miˇ-a. Aˬ jeˬ miˇ neh ehˇ naˇ, gaˇ kawˆ heu hmˬ baˬ da neh naw maꞈ ngaˬ-ahˇ jah laˇ tehꞈ-a. Aˬ dui maꞈ aˬ yawꞈ jawˇ gaˇ iˇ kaˇ-euˇ.”

¹⁶‘Nyiˬ gʼaˬ dehꞈ le-euˬ’ lehˇ kuˇ-eu Toˇmaˆ gʼaˬ, aˬ yawꞈ-euˬ cawˬ zaˬ lahˇ deuˬ-ahˇ, “Aˬ dui maꞈ gʼeh saˬ laˬ nehˬ-ehˇ tiˬ kawˆ loꞈ-ehˇ iˇ-awˇ, aˬ yawꞈ nehˬ-ehˇ tiˬ gaˇ shiˇ ma.”

¹⁷Yeˬsuˇ oe keuˆ ngeh, Laˬzaˬluˇ-ahˇ baꞈ pahˬ dzeuˇ-euˬ oeˬ nah byah laˇ-euˬ gaˇ ya mawˇ-euˬ meh.

¹⁸Beˬtaˬniˇ meuˬ-aˬ, Yeˬluˇsaˬlehˬ meuˬ-ahˇ neh nyiˬ laˇ kaˬ-eu meh.

¹⁹Miˇ kʼahˬ kʼoeˇ kʼahˬ-ahˇ jawˇ-eu tsawˇ haˬ gʼawˬ mya ni, Maˬliˇ hawˇ-eu Maˬta aˬ mahˇ aˬ da bi shiˇ-euˬ miˇ neh, gʼaˬ biꞈ nehˬ-eu lehˇ uiˬ le taˬ-euˬ meh.

²⁰Yeˬsuˇ oe-euˬ gaˇ kawˆ ya gaˬ ngeh, Maˬta iˇ doˆ-awˇ ha-iˇ-euˬ meh. Ehˇ kʼawꞈ, Maˬ liˇ gʼaˬ iˇ kahˇ-ahˇ jawˇ yaꞈ-euˬ meh.

²¹Maˬta Yeˬsuˇ-ahˇ ehˇ nehˬ-eu, “Sahˬpaˬ-oˇ, nawˇ heu gaˇ jawˇ zaˬ-euˬ law nmˇ-aˬ, ngaˬ-euˬ aˬ mahˇ aˬ da maˬ shiˇ-aˇ.

²²Ehˇ kʼawꞈ, nymˬ-mˇ kʼawꞈ ni, nawˇ kʼaˇ shaˇ-eu jeˬ Miˬyehˇ nawˬ-ahˇ mˇ nehˬ laꞈ tehꞈ-a lehˇ ngaˇ siˬ nya ma.”

²³Yeˬsuˇ ehˇ-eu, “Nawˬ-euˬ aˬ mahˇ aˬ da paˇ gʼoꞈ dehꞈ laˇ tehꞈ-a.”

²⁴Maˬta ehˇ-eu, “Miˇ tsaˬ heu aˇ saˬ saˬ ngeh nah aˬ yawꞈ paˇ gʼoꞈ dehꞈ laˇ tehꞈ-a lehˇ ngaˇ siˬ nya ma.”

²⁵Yeˬsuˇ ehˇ-eu, “Ngaˇ-aˬ, gʼoꞈ dehꞈ laˇ-eu jeˬ hawˇ-eu saꞈ laˇ dehꞈ-eu jeˬ pyeuꞈ-eu ma. Ngaˬ-ahˇ kʼaˇ jah-eu tsawˇ haˬ-aˬ, shiˇ-euˬ kʼawꞈ, dehꞈ tehꞈ-a.

²⁶Dehꞈ luꞈ-awˇ ngaˬ-ahˇ jah-eu tsawˇ haˬ-aˬ, tiˬ jawˇ-iˬ maˬ paˇ shiˇ-aˇ. Ngaˇ ehˇ gaˇ nawˇ jah ma loˇ.”

²⁷Maˬta ehˇ-eu, “Sahˬpaˬ-oˇ, ngaˇ jah ma. Nawˇ-aˬ, miˇ tsaˬ kʼoeˇ taˆ oe meh lehˇ ehˇ taˬ-euˬ Miˬyehˇ-euˬ Zaˬmaˇ Meˬsiˇya meh lehˇ ngaˇ jah ma.”

²⁸Maˬta kʼoeˇ loꞈ-ehˇ ehˇ gʼaˬ ngeh, Maˬliˇ jawˇ gaˇ gʼoꞈ-iˇ-awˇ, “Saˬ laˬ oe keuˆ-awˇ nawˬ-ahˇ kuˇ luꞈ meh” lehˇ ehˇ nehˬ-iˇ-euˬ meh.

²⁹Dawˬ kʼoeˇ dawˬ-ahˇ Maˬliˇ ya gaˬ ngeh, yaw kawˇ-ehˇ tsawˬ tuˇ-awˇ, Yeˬsuˇ-ahˇ ha laˬ-iˇ-euˬ meh.

³⁰Yeˬsuˇ pu-ahˇ maˬ oe keuˆ ni, Maˬta-ahˇ tahˬ puˬ-euˬ kʼoeˇ tsahˇ-ahˇ jawˇ luꞈ-eu meh.

³¹Maˬliˇ-euˬ nymˇ-ahˇ oe-awˇ gʼaˬ biꞈ le-euˬ tsawˇ haˬ kʼoeˇ deuˬ kʼawꞈ, Maˬliˇ tehˬ law tehˬ tsaˇ-ehˇ iˇ doˆ gʼeh gaˇ ya mawˇ ngeh, caw teh gʼeh-euˬ meh. Aˬ yawꞈ lmˬ bymˇ-ahˇ iˇ-awˇ, tsawˇ ngoeˇ ngoeˇ-iˇ-eu gʼeh-eu nga lehˇ aˬ yawꞈ maꞈ noeˬ-euˬ meh.

³²Maˬliˇ Yeˬsuˇ jawˇ gaˇ iˇ keuˆ-awˇ, aˬ yawꞈ-ahˇ ya tahˬ puˬ-euˬ nehˬ- ehˇ tiˬ poˆ tehꞈ-ehˇ, “Sahˬpaˬ-oˇ, nawˇ heu gaˇ jawˇ-euˬ law nmˇ-aˬ, ngaˬ-euˬ aˬ mahˇ aˬ da maˬ shiˇ-aˇ” lehˇ ehˇ nehˬ-euˬ meh.

³³Maˬ liˇ ngoeˇ luꞈ-awˇ, Maˬliˇ nehˬ-ehˇ laˇ-euˬ tsawˇ haˬ deuˬ kʼawꞈ ngoeˇ luꞈ gaˇ Yeˬsuˇ ya mawˇ ngeh, aˬ yawꞈ-euˬ nui ma-ahˇ zaw dui dui leˇ-euˬ meh.

³⁴“Naw maꞈ aˬ yawꞈ-ahˇ aˬ gaˇ baꞈ pahˬ teˬ” lehˇ, aˬ yawꞈ maꞈ-ahˇ aˬ yawꞈ naˇ haˬ ngeh, “Sahˬpaˬ-oˇ, oe-awˇ haw le-awˬ” lehˇ aˬ yawꞈ maꞈ ehˇ-eu meh.

³⁵Yeˬsuˇ myaˆ biˇ doˆ le-euˬ meh.

³⁶Kʼoeˇ ngeh, “Aˬ yawꞈ Laˬzaˬluˇ-ahˇ aˇ naˆ ni gaˬ gaˇ haw sheˇ” lehˇ, tsawˇ haˬ kʼoeˇ deuˬ ehˇ-eu meh.

³⁷Ehˇ kʼawꞈ, tiˬ paˆ na deuˬ ehˇ-eu, “Myaˆ behꞈ-ahˇ myaˆ nuiˆ mawˇ nya laˇ ni aˬ yawꞈ jahˇ nehˬ-euˬ maˬ ngeuˇ-a loˇ. Laˬzaˬluˇ maˬ bi shiˇ ni aˬ yawꞈ maˬ jahˇ nehˬ nya taˬ loˇ.”

³⁸Yeˬsuˇ nui ma-ahˇ paˇ zaw dui dui leˇ-awˇ, lmˬ bymˇ-ahˇ iˇ-euˬ meh. Lmˬ bymˇ kʼoeˇ-aˬ, lo kʼahˬ pyeuꞈ-awˇ, mehˬ kʼehˬ-ahˇ kʼaˬ lo ngawˬ tsoeˬ taˬ-euˬ meh.

³⁹“Kʼaˬ lo ngawˬ dzeh-awˬ” lehˇ, Yeˬsuˇ dawˬ biꞈ-euˬ meh. Shiˇ-euˬ gʼaˬ-euˬ dmˇ ma pyeuꞈ-eu Maˬta ehˇ-eu, “Sahˬpaˬ-oˇ, yaw buꞈ behꞈ laꞈ-iˇ-euˬ tehꞈ-a. Aˬ yawꞈ-ahˇ baꞈ pahˬ-euˬ oeˬ nah byah laˬ-euˬ meh.”

⁴⁰Yeˬsuˇ aˬ yawꞈ-ahˇ ehˇ nehˬ-eu, “Nawˇ jah naˇ, Miˬyehˇ-euˬ yaw shehꞈ kʼahˬ sehˇ-ahˇ ya mawˇ tehꞈ-a lehˇ, ngaˇ nawˬ-ahˇ ehˇ-euˬ maˬ ngeuˇ-a loˇ.”

⁴¹Kʼoeˇ ngeh, aˬ yawꞈ maꞈ kʼaˬ lo ngawˬ dzeh-euˬ meh. Yeˬsuˇ mˬ paw gʼawˇ leuˇ-awˇ ehˇ-eu, “Aˬda-oˇ, ngaˬ-euˬ shaˇ dawˬ-ahˇ nawˇ naˇ haˬ nehˬ laꞈ-eu miˇ neh nawˬ-euˬ guiˬ lahˬ-ahˇ ja ceuˬ-eu ma.

⁴²Nawˇ ngaˬ-euˬ shaˇ dawˬ-ahˇ aˬ myah luꞈ naˇ haˬ nehˬ laꞈ meh lehˇ ngaˇ siˬ nya ma. Ehˇ kʼawꞈ, ngaˇ shaˇ-eu heu-aˬ, heu gaˇ jawˇ-eu tsawˇ haˬ deuˬ gʼaˇ duˬ ma. Ngaˬ-ahˇ nawˬ neh kʼehˇ gʼeh leꞈ-euˬ meh lehˇ aˬ yawꞈ maꞈ jah laˇ ni shaˇ-eu ma.”

⁴³Aˬ yawꞈ kʼoeˇ loꞈ-ehˇ ehˇ gʼaˬ ngeh, “Laˬzaˬluˇ-oˇ, doˆ le-awˬ” lehˇ yaw kʼaˆ-ehˇ guˇ-euˬ meh.

⁴⁴Kʼoeˇ ngeh, Laˬzaˬluˇ doˆ le-euˬ meh. Aˬ kuiˇ aˬ laꞈ-ahˇ mawˇ tawˆ tawˆ taˬ-awˇ, myaˆ pyawˬ-ahˇ paˇ jeh lahˇ cuꞈ taˬ-euˬ meh. “Aˬ yawꞈ-ahˇ mawˇ tawˆ puiˇ dzeh nehˬ-awˬ” lehˇ, aˬ yawꞈ maꞈ-ahˇ Yeˬsuˇ ehˇ nehˬ-euˬ meh.

⁴⁵Maˬliˇ jawˇ gaˇ oe-euˬ tsawˇ haˬ gʼawˬ mya ni Yeˬsuˇ kʼoeˇ loꞈ-ehˇ mˇ-euˬ gaˇ ya mawˇ-awˇ, aˬ yawꞈ-ahˇ jah laˇ-euˬ meh.

⁴⁶Ehˇ kʼawꞈ, tiˬ paˆ na deuˬ Paˬliˬsehˇ deuˬ jawˇ gaˇ gʼoꞈ-iˇ-awˇ, Yeˬsuˇ neh mˇ-euˬ gaˇ kawˆ dzawˇ mehˬ-euˬ meh.

⁴⁷Kʼoeˇ ngeh, Paˬliˬsehˇ deuˬ hawˇ-eu piˇ ma aˬ yuiꞈ deuˬ Baꞈdzah[4] aˇ muˇ-ahˇ tahˬ puˬ-awˇ, heu loꞈ-ehˇ ehˇ-eu meh. “Aˬ dui aˬ joˆ-ehˇ jahˇ nmˇ. Tsawˇ haˬ kʼoeˇ gʼaˬ zahˬ leˇ paˬ-ehˇ gʼeh-eu gʼawˬ mya jeˬ mˇ luꞈ meh.

⁴⁸Aˬ yawꞈ-ahˇ kʼoeˇ loꞈ-ehˇ tehꞈ-ehˇ mˇ mˇ-ehˇ bi jawˇ naˇ, tsawˇ haˬ yawˬ gʼaˬ na luꞈ aˬ yawꞈ-ahˇ jah leˇ jiˇ-eu ngaˇ. Kʼoeˇ loꞈ-ehˇ pyeuꞈ laˇ naˇ, Loˇmaˆ tsawˇ haˬ deuˬ oe-awˇ, aˬ dui-euˬ Uˬ duˬ tahˬ nymˇ nymˇ ma hawˇ-eu aˬ dui-euˬ tsawˇ jeuˬ-ahˇ laˆ cawˆ le-eu ngaˇ.”

⁴⁹Aˬ yawꞈ maꞈ laꞈ kʼoeˇ, Gaˬyaˬpaˇ lehˇ kuˇ-eu, kʼoeˇ ngeh kʼoꞈ-ahˇ Piˇ ma Yaw huiˬ gʼaˬ geuꞈ luꞈ-eu gʼaˬ ehˇ-eu, “Naw maꞈ aˬ jeˬ dawˇ ga ga te.

⁵⁰Tsawˇ jeuˬ tiˬ jeuˬ jeuˬ lah-ehˇ bi laˆ cawˆ-eu naˆ maˬ tseˇ, tsawˇ haˬ tiˬ gʼaˬ bi shiˇ dah-eu muiˬ dzehˬ meh lehˇ naw maꞈ maˬ gʼoˆ shaw nya te loˇ.”

⁵¹Maˇ maˇ ni ehˇ leꞈ naˇ, aˬ yawꞈ kʼoeˇ loꞈ-ehˇ ehˇ-eu-aˬ, aˬ yawˇ yawꞈ noeˬ doˆ-awˇ ehˇ-eu maˬ ngeuˇ-a. Ehˇ kʼawꞈ, kʼoeˇ ngeh kʼoꞈ-ahˇ Piˇ ma Yaw huiˬ gʼaˬ geuꞈ luꞈ-eu miˇ neh, Yuˇdaˆ tsawˇ jeuˬ gʼaˇ duˬ Yeˬsuˇ shiˇ dah tehꞈ-a lehˇ, Miˬyehˇ-euˬ dawˬ ngehˬ dah-eu jeˬ pyeuꞈ-eu meh.

⁵²Aˬ yawꞈ maꞈ gʼaˇ duˬ tehꞈ-ehˇ maˬ ngeuˇ ni, miˇ tsaˬ doe ni bi teh byaˆ taˬ-euˬ Miˬyehˇ-euˬ tsawˇ haˬ deuˬ tiˬ maꞈ tiˬ muˇ tehꞈ-ehˇ paˇ bi pyeuꞈ laˇ-eu gʼaˇ duˬ aˬ yawꞈ ya shiˇ dah-eu gaˇ kawˆ ngehˬ dah-eu jeˬ kʼawꞈ pyeuꞈ-eu meh.

⁵³Kʼoeˇ ngeh nah neh dahˬ beh-awˇ, Yuˇdaˆ tsawˇ haˬ aˬ yuiꞈ aˬ tsu deuˬ Yeˬsuˇ-ahˇ sehꞈ-eu gʼaˇ duˬ lehˬ hmˬ-euˬ meh.

⁵⁴Kʼoeˇ miˇ neh, Yeˬsuˇ Yuˇdaˆ miˇ kʼahˬ laꞈ kʼoeˇ aˬ cawˬ mawˇ gaˇ maˬ cah ni pyeuꞈ-iˇ-awˇ, kʼaˇ shuiꞈ deh ga bawˇ tsahˬ bawˇ dahˇ dawˬ peh jaˆ-eu Eˇpaˬleˬ meuˬ-ahˇ iˇ-awˇ, zaˬ lahˇ deuˬ nehˬ-ehˇ kʼoeˇ gaˇ jawˇ-euˬ meh.

⁵⁵Baˬsaˬkaˬ Bawˬ-iˬ gʼeh-eu aˇ yamˬ peh laˇ-euˬ miˇ neh, bawˬ-iˬ maˬ gʼeh mi naˆ-ehˇ gʼawˇ mawˇ shawˇ-eu zahˇ jahˇ leˇ-eu gʼaˇ duˬ, dahˇ taˆ jawˇ-eu tsawˇ haˬ gʼawˬ mya ni Yeˬluˇsaˬlehˬ meuˬ-ahˇ le luꞈ-eu meh.

⁵⁶Aˬ yawꞈ maꞈ Yeˬsuˇ-ahˇ poˆ luꞈ-awˇ, Uˬ duˬ tahˬ nymˇ nymˇ ma laꞈ kʼoeˇ uiˬ leˇ-awˇ jawˇ ngeh, tiˬ gʼaˬ tiˇ gʼaˬ heu loꞈ-ehˇ ehˇ-eu meh. “Naw maꞈ-ahˇ aˬ joˆ-ehˇ noeˬ-eu nya. Aˬ yawꞈ bawˬ-iˬ gʼeh gaˇ maˬ laˇ-eu yaw duˬ baw tehꞈ-a. Maˬ ngeuˇ-aˇ loˇ.”

⁵⁷Yeˬsuˇ jawˇ-eu kʼaˇ mawˇ-euˬ tsawˇ haˬ ya tsaꞈ gaˬ laˇ meh lehˇ, piˇ ma aˬ yuiꞈ deuˬ hawˇ-eu Paˬliˬsehˇ deuˬ neh dawˬ biꞈ taˬ-euˬ meh. Aˬ yawꞈ maꞈ Yeˬsuˇ-ahˇ nyehꞈ mi nya ni kʼoeˇ loꞈ-ehˇ dawˬ biꞈ-euˬ jeˬ pyeuꞈ-eu meh.