Read Akha Yoˇhaˬ 13 Bible Online

Yoˇhaˬ 13 - Akha bible

Yoˇhaˬ 13

¹Baˬsaˬkaˬ Bawˬ-iˬ keuˆ le-eu mehˬ hu ngeh nah, aˬ yawꞈ miˇ tsaˬ heu-ahˇ gʼawˬ-iˇ-awˇ, Aˬda jawˇ gaˇ ya gʼoꞈ leˇ-eu aˇ yamˬ tsaˬ laˇ-euˬ gaˇ kawˆ Yeˬsuˇ siˬ nya-eu meh. Miˇtsaˬ kʼoeˇ taˆ jawˇ-eu aˬ yawꞈ-ahˇ jah-eu tsawˇ haˬ deuˬ-ahˇ aˬ yawꞈ gaˬ-awˇ, aˇ saˬ saˬ ngeh keuˆ ni gaˬ-euˬ meh.

²Yeˬsuˇ hawˇ-eu aˬ yawꞈ-euˬ zaˬ lahˇ deuˬ ciꞈ hawˬ dzaˬ luꞈ-eu meh. Siˇmoˬ Iˇsaˬgaˬliˬoˆ-euˬ aˬ li Yuˇdaˆ-euˬ nui ma laꞈ kʼoeˇ, Yeˬsuˇ-ahˇ ahˬ dzaˬ mawꞈ-eu nui ma Nehꞈsahˬpaˬ neh dawˆ ahˇ gʼaˬ nehˬ-euˬ meh.

³Aˬda neh Yeˬsuˇ-ahˇ baoˬ tiˬ byah ni biꞈ taˬ-euˬ gaˇ kawˆ Yeˬsuˇ siˬ nya-eu meh. Aˬ yawꞈ Aˬda jawˇ gaˇ neh oe-awˇ, Aˬda jawˇ gaˇ ya gʼoꞈ leˇ-eu gaˇ kawˆ kʼawꞈ, siˬ nya-eu meh.

⁴Kʼoeˇ miˇ neh, aˬ yawꞈ hawˬ jeh-ahˇ tuˇ-awˇ, kʼoeˇ taˆ dm luꞈ-eu pehˇ kʼahˬ pehˇ mahˇ lehˆ-awˇ, joꞈ-ahˇ paˇ jeh paꞈ-euˬ meh.

⁵Kʼoeˇ naˇ, kʼmˬ maˬ shehˇ byehˇ-ahˇ iˇ cuꞈ shehˆ ahˇ-awˇ, zaˬ lahˇ deuˬ-euˬ aˬ kuiˇ dzuiꞈ nehˬ-awˇ, joꞈ-ahˇ paꞈ taˬ-euˬ paˇ jeh neh shiˆ gui nehˬ-euˬ meh.

⁶Siˇmoˬ Beˬtuˆluˆ jawˇ gaˇ iˇ keuˆ ngeh, heu loꞈ-ehˇ ehˇ-eu meh. “Sahˬpaˬ-oˇ, nawˇ ngaˬ-euˬ aˬ kuiˇ dzuiꞈ-eu lehˇ gʼeh te loˇ.”

⁷Yeˬsuˇ ehˇ-eu, “Ngaˇ mˇ luꞈ-eu heu nawˇ nymˬ-mˇ maˬ gʼoˆ shaw-a siˬ. Ehˇ kʼawꞈ, ni shawˇ pehˬ siˬ nya laˇ tehꞈ-a.”

⁸Beˬtuˆluˆ ehˇ-eu, “Nawˬ neh ngaˬ-euˬ aˬ kuiˇ tiˬ jawˇ-iˬ maˬ bi dzuiꞈ.” Yeˬsuˇ ehˇ-eu, “Nawˬ-euˬ aˬ kuiˇ ngaˇ maˬ ya dzuiꞈ nehˬ naˇ, nawˇ ngaˬ-ahˇ maˬ paˇ taꞈ nya meh.”

⁹Siˇmoˬ Beˬtuˆluˆ ehˇ-eu, “Sahˬpaˬ-oˇ, toˆ-ehˇ jeˬ maˬ-iˬ, ngaˬ-euˬ aˬ kuiˇ tehꞈ-ehˇ maˬ ngeuˇ ni, aˬ laꞈ hawˇ-eu uˬ duˬ jiˇ dzuiꞈ nehˬ laꞈ-awˬ.”

¹⁰Yeˬsuˇ ehˇ-eu, “Iˇ cuꞈ dzuiꞈ gʼaˬ-euˬ tsawˇ haˬ-aˬ, yaw shawˇ miˇ neh, aˬ kuiˇ maˬ ngeuˇ naˇ dzuiꞈ-eu maˬ paˇ loˬ meh. Naw maꞈ laꞈ kʼoeˇ tiˬ gʼaˬ maˬ ngeuˇ naˇ dawˬ tawˆ luꞈ yaw shawˇ meh.”

¹¹Aˬ geu gʼaˬ aˬ yawꞈ-ahˇ ahˬ dzaˬ-eu lehˇ gʼeh-eu gaˇ kawˆ Yeˬsuˇ siˬ duˬ taˬ-euˬ miˇ neh, “Naw maꞈ laꞈ kʼoeˇ tiˬ gʼaˬ maˬ ngeuˇ naˇ dawˬ tawˆ luꞈ yaw shawˇ meh” lehˇ ehˇ-eu jeˬ pyeuꞈ-eu meh.

¹²Yeˬsuˇ aˬ yawꞈ maꞈ-ahˇ aˬ kuiˇ dzuiꞈ nehˬ jiˇ gʼaˬ ngeh, pehˇ kʼahˬ pehˇ mahˇ paˇ dm-awˇ, aˬ yawꞈ-euˬ nuiˇ duˬ-ahˇ hawˬ jawˬ paˇ jawˬ leˇ-awˇ, heu loꞈ-ehˇ ehˇ-eu meh. “Naw maꞈ-ahˇ ngaˬ neh mˇ nehˬ-euˬ heu naw maꞈ gʼoˆ shaw ma loˇ.”

¹³Naw maꞈ ngaˬ-ahˇ ‘Saˬ laˬ-oˇ’, ‘Sahˬpaˬ-oˇ’ lehˇ kuˇ-eu meh. Naw maꞈ kʼoeˇ loꞈ-ehˇ kuˇ-eu tsaˬ meh. Aˬ jeˬ miˇ neh ehˇ naˇ, ngaˇ-aˬ, naw maꞈ kuˇ-eu loꞈ-ehˇ naw maꞈ-euˬ saˬ laˬ hawˇ-eu Sahˬpaˬ pyeuꞈ-eu ma.

¹⁴Naw maꞈ-euˬ Sahˬpaˬ hawˇ-eu naw maꞈ-euˬ saˬ laˬ pyeuꞈ-eu ngaˇ-aˬ, naw maꞈ-euˬ aˬ kuiˇ dzuiꞈ nehˬ gʼaˬ-euˬ ma. Kʼoeˇ miˇ neh, naw maꞈ kʼawꞈ tiˬ gʼaˬ tiˇ gʼaˬ aˬ kuiˇ dzuiꞈ nehˬ-eu tsaˬ meh.

¹⁵Naw maꞈ ngaˬ-ahˇ dzaw geuꞈ-awˇ mˇ nya ni, ngaˇ naw maꞈ-ahˇ mˇ mehˬ nehˬ gʼaˬ-euˬ ma.

¹⁶Ngaˇ naw maꞈ-ahˇ maˇ jawˆ ni ehˇ nehˬ nyaˇ. Zaˬ kʼaˆ-aˬ baw leˬ naˆ maˬ tseˇ maˬ huiˬ dzehˬ-aˇ. Myawˬ kʼehˇ gʼoˆ le-euˬ gʼaˬ-aˬ, aˬ yawꞈ-ahˇ kʼehˇ gʼeh leꞈ-euˬ gʼaˬ naˆ maˬ tseˇ maˬ huiˬ dzehˬ-aˇ.

¹⁷Nymˬ-mˇ, gaˇ kawˆ heu deuˬ naw maꞈ ya siˬ gʼaˬ jiˇ-euˬ meh. Siˬ nya-eu loꞈ-ehˇ mˇ naˇ, naw maꞈ aˇ naˆ ni guiˬ lahˬ huiˬ-eu nga.

¹⁸“Naw maꞈ dawˬ tawˆ luꞈ gaˇ kawˆ ngaˇ ehˇ luꞈ-eu maˬ ngeuˇ. Ngaˬ neh tseˇ doˆ-euˬ tsawˇ haˬ deuˬ ngaˇ siˬ nya ma. Ehˇ kʼawꞈ, Jaˇliꞈ laꞈ kʼoeˇ ehˇ taˬ-euˬ, ‘Ngaˬ nehˬ-ehˇ gʼawˬ nyoeˇ kʼmˬ maˬ taꞈ-eu gʼaˬ ngaˬ-ahˇ puiˬ-eu meh’ lehˇ ehˇ-eu dawˬ kʼoeˇ dawˬ maˬ byah laˇ-ehˇ maˬ gʼeh nya-a.

¹⁹Aˬ diˇ aˬ maˇ pyeuꞈ laˇ ngeh jawˇ, ngaˬ neh ehˇ-euˬ loꞈ-ehˇ ngaˇ-aˬ ngaˇ law hawˇ nga lehˇ naw maꞈ siˬ nya ni, maˬ pyeuꞈ laˇ mi naˆ-ehˇ naw maꞈ-ahˇ ehˇ kʼmˬ taˬ-eu ma.”

²⁰Ngaˇ naw maꞈ-ahˇ maˇ jawˆ ni ehˇ nehˬ nyaˇ. Ngaˬ neh kʼehˇ gʼeh-euˬ tsawˇ haˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ ha geuꞈ gaˇ duˇ-awˇ, ngaˬ-ahˇ kʼaˇ ha geuꞈ-eu tsawˇ haˬ-aˬ, ngaˬ-ahˇ kʼehˇ gʼeh leꞈ-euˬ gʼaˬ-ahˇ ha geuꞈ gaˇ duˇ-eu meh.”

²¹Yeˬsuˇ kʼoeˇ loꞈ-ehˇ ehˇ gʼaˬ ngeh jawˇ, aˬ yawꞈ-euˬ nui ma shaˬ zahˬ mˇ dui dui-eu laꞈ kʼoeˇ, heu loꞈ-ehˇ bya cehˆ ni ehˇ doˆ nehˬ-euˬ meh. “Ngaˇ naw maꞈ-ahˇ maˇ jawˆ ni ehˇ-eu ma. Naw maꞈ laꞈ kʼoeˇ tiˬ gʼaˬ ngaˬ-ahˇ ahˬ dzaˬ tehꞈ-a.”

²²Zaˬ lahˇ deuˬ tiˬ gʼaˬ tiˇ gʼaˬ haw haw-ehˇ, aˬ yawꞈ aˬ suˇ gʼaˬ-ahˇ ehˇ mawꞈ-eu maˬ siˬ lehˇ zahˬ leˇ-euˬ meh.

²³Yeˬsuˇ gaˬ-euˬ zaˬ lahˇ tiˬ gʼaˬ Yeˬsuˇ-euˬ dawˬ peh nuiˇ luꞈ-eu meh.

²⁴Siˇmoˬ Beˬtuˆluˆ neh zaˬ lahˇ kʼoeˇ gʼaˬ-ahˇ laꞈ dzawˇ dzawˇ nehˬ-awˇ, “Aˬ suˇ gʼaˬ-ahˇ ehˇ mawꞈ te lehˇ aˬ yawꞈ-ahˇ tiˬ poˆ naˇ haˬ-iˬ sheˇ” lehˇ ehˇ nehˬ-euˬ meh.

²⁵Zaˬ lahˇ kʼoeˇ gʼaˬ Yeˬsuˇ dawˬ peh jiˆ tuˆ leˇ-awˇ, “Sahˬpaˬ-oˇ, aˬ suˇ gʼaˬ-ahˇ ehˇ mawꞈ te” lehˇ naˇ haˬ-euˬ meh.

²⁶Yeˬsuˇ ehˇ-eu, “Ngaˇ kaˬ muˇ yuˇ-awˇ gʼawˬ nyoeˇ-ahˇ tahˬ lehꞈ-awˇ biꞈ nehˬ ma. Ngaˬ neh biꞈ nehˬ-euˬ kʼoeˇ gʼaˬ-aˬ, ngaˇ ehˇ-eu kʼoeˇ gʼaˬ meh.” Kʼoeˇ naˇ, aˬ yawꞈ kaˬ muˇ yuˇ-awˇ gʼawˬ nyoeˇ-ahˇ tahˬ lehꞈ-awˇ, Siˇmoˬ Iˇsaˬgaˬliˬoˆ-euˬ aˬ li Yuˇdaˆ-ahˇ biꞈ-euˬ meh.

²⁷Kaˬ muˇ kʼoeˇ-ahˇ Yuˇdaˆ yuˇ-eu nehˬ-ehˇ, Saˬdaˬ aˬ yawꞈ-euˬ laꞈ kʼoeˇ uˇ leˇ-euˬ meh. “Nawˇ mˇ-eu lehˇ gʼeh-eu jeˬ-ahˇ yaw kawˇ-ehˇ mˇ-awˬ” lehˇ, aˬ yawꞈ-ahˇ Yeˬsuˇ ehˇ nehˬ-euˬ meh.

²⁸Aˬ jeˬ miˇ neh Yeˬsuˇ aˬ yawꞈ-ahˇ kʼoeˇ loꞈ-eh ehˇ nehˬ-eu gaˇ kawˆ, hawˬ jawˬ jawˬ luꞈ-eu tsawˇ haˬ nui deuˬ maˬ siˬ nya-a.

²⁹Yuˇdaˆ-aˬ, pyuˇ pawˬ behˆ tawˬ-eu pyuˇ jeˬ hmˬ-eu gʼaˬ pyeuꞈ-eu miˇ neh, Yeˬsuˇ aˬ yawꞈ-ahˇ kʼehˇ-awˇ, Bawˬ-iˬ gʼeh gaˇ zmˬ-eu jeˬ maˬ ngeuˇ naˇ, shaˬ zaˬ zahˬ zaˬ-ahˇ biꞈ-eu tiˬ jeˬ paˬ bi zeuˇ-iˇ-eu lehˇ ehˇ-eu paˬ lehˇ, zaˬ lahˇ tiˬ paˆ na deuˬ noeˬ-euˬ meh.

³⁰Yuˇdaˆ-aˬ, kaˬ muˇ kʼoeˇ jehꞈ yuˇ-awˇ doˆ-iˇ-euˬ meh. Kʼoeˇ ngeh, sehˇ gʼahˇ ceh laˇ taˬ-euˬ meh.

³¹Yuˇdaˆ doˆ-iˇ dzeuˇ ngeh, Yeˬsuˇ heu loꞈ-ehˇ ehˇ-eu meh. “Nymˬ-mˇ poˆ jawˇ-aˬ, Tsawˇhaˬ-euˬ Zaˬmaˇ-euˬ yaw shehꞈ kʼahˬ sehˇ-ahˇ ya mawˇ tehꞈ-a. Zaˬmaˇ-euˬ laꞈ kʼoeˇ, Miˬyehˇ-euˬ yaw shehꞈ kʼahˬ sehˇ-ahˇ ya mawˇ tehꞈ-a.

³²Tsawˇhaˬ-euˬ Zaˬmaˇ laꞈ kʼoeˇ Miˬyehˇ-euˬ yaw shehꞈ kʼahˬ sehˇ ya mawˇ-eu jeˬ ngeuˇ naˇ, Miˬyehˇ-euˬ laꞈ kʼoeˇ Tsawˇhaˬ-euˬ Zaˬmaˇ-euˬ yaw shehꞈ kʼahˬ sehˇ pah mehˬ le tehꞈ-a. Miˬyehˇ yaw kawˇ-ehˇ pah mehˬ le tehꞈ-a.

³³Ngaˇ gaˬ-eu ngaˬ-euˬ zaˬ deuˬ-oˇ, ngaˇ naw maꞈ nehˬ-ehˇ gʼawˬ myahˇ ni maˬ paˇ ya jawˇ meh. Naw maꞈ ngaˬ-ahˇ poˆ tehꞈ-a. Yuˇdaˆ tsawˇ haˬ aˬ yuiꞈ aˬ tsu deuˬ-ahˇ ngaˬ neh ehˇ nehˬ-euˬ dawˬ ngaˇ naw maꞈ-ahˇ paˇ ehˇ nehˬ nyaˇ. ‘Ngaˇ le-eu lehˇ gʼeh-eu jawˇ duˬ-ahˇ naw maꞈ maˬ le nya-a.’

³⁴Nymˬ-mˇ ngaˇ naw maꞈ-ahˇ zahˇ dawˬ kʼoꞈ dawˬ yaw shuiꞈ biꞈ yaꞈ-eu ma. Tiˬ gʼaˬ tiˇ gʼaˬ gaˬ-awˬ. Ngaˇ naw maꞈ-ahˇ gaˬ gaˇ duˇ ni, naw maꞈ tiˬ gʼaˬ tiˇ gʼaˬ ya gaˬ meh.

³⁵Naw maꞈ tiˬ gʼaˬ tiˇ gʼaˬ gaˬ-eu jeˬ ahˇ naˇ, naw maꞈ ngaˬ-euˬ zaˬ lahˇ ngaˇ lehˇ tsawˇ haˬ dawˬ tawˆ luꞈ siˬ nya tehꞈ-a.”

³⁶Siˇmoˬ Beˬtuˆluˆ ehˇ-eu, “Sahˬpaˬ-oˇ nawˇ aˬ gaˇ le-eu lehˇ gʼeh te.” Yeˬsuˇ ehˇ-eu, “Ngaˇ le-eu lehˇ gʼeh gaˇ nawˇ nymˬ-mˇ mi naˆ-ehˇ maˬ caw teh laˇ nya-a siˬ. Ehˇ kʼawꞈ, aˬ kaˇ caw teh laˇ nya tehꞈ-a.”

³⁷Beˬtuˆluˆ ehˇ-eu, “Sahˬpaˬ-oˇ, aˬ jeˬ miˇ neh ngaˇ nawˬ-euˬ mehˬ nah nymˬ-mˇ mi naˆ-ehˇ maˬ caw teh laˇ nya ta. Ngaˇ nawˬ-euˬ gʼaˇ duˬ shiˇ dah peuˬ ma.”

³⁸Yeˬsuˇ ehˇ-eu, “Nawˇ ngaˬ-euˬ gʼaˇ duˬ aˬ diˇ aˬ maˇ shiˇ dah peuˬ ma loˇ. Ngaˇ nawˬ-ahˇ maˇ jawˆ ni ehˇ-eu ma. Ya poeˇ maˬ doeˇ laˇ mi naˆ-ehˇ, ngaˬ-ahˇ maˬ siˬ lehˇ smˬ poˆ keuˆ ni nawˇ pyehˇ tehꞈ-a.”