Read Akha Yoˇhaˬ 15 Bible Online

Yoˇhaˬ 15 - Akha bible

Yoˇhaˬ 15

¹Ngaˇ-aˬ, maˇ maˇ ni gʼeh-eu aˬ gaꞈ baw duˆ ma. Ngaˬ Da-aˬ, aˬ gaꞈ yaˇ kmˇ-ahˇ bo saˆ-eu gʼaˬ meh.

²Aˇ siˬ maˬ siˬ le-eu ngaˬ-euˬ uˬ laꞈ deuˬ-ahˇ aˬ yawꞈ deuˆ cuˬ dzeh jiˇ-eu meh. Ehˇ kʼawꞈ, aˇ siˬ siˬ le-eu uˬ laꞈ deuˬ-ahˇ-aˬ, bi siˬ dzehˬ le-eu gʼaˇ duˬ, uˬ pyaˬ daw nehˬ-eu meh.

³Ngaˬ neh mehˬ nehˬ tsoˆ nehˬ-euˬ dawˬ deuˬ baˬ da neh, naw maꞈ muiˬ laˇ shawˇ laˇ gʼaˬ-euˬ meh.

⁴Ngaˇ naw maꞈ-ahˇ tsoꞈ tsaꞈ taˬ-euˬ loꞈ-ehˇ, naw maꞈ ngaˬ-ahˇ tsoꞈ tsaꞈ-awˬ. Uˬ laꞈ-aˬ, baw duˆ-ahˇ maˬ tsoꞈ tsaꞈ naˇ aˇ siˬ maˬ siˬ le nya-eu loꞈ-ehˇ, naw maꞈ kʼawꞈ, ngaˬ-ahˇ maˬ tsoꞈ tsaꞈ naˇ, aˇ siˬ maˬ siˬ le nya-a.

⁵“Ngaˇ-aˬ, aˬ gaꞈ baw duˆ ma. Naw maꞈ-aˬ, uˬ pyaˬ uˬ laꞈ meh. Ngaˬ-ahˇ tsoꞈ tsaꞈ-awˇ, ngaˇ kʼawꞈ aˬ yawꞈ-ahˇ tsoꞈ tsaꞈ-eu tsawˇ haˬ-aˬ, aˇ siˬ gʼawˬ mya ni siˬ le-eu meh. Ngaˬ-ahˇ maˬ tsoꞈ tsaꞈ naˇ, naw maꞈ tiˬ jeˬ-iˬ maˬ jahˇ nya-a.

⁶Ngaˬ-ahˇ maˬ kʼaˇ tsoꞈ tsaꞈ-eu tsawˇ haˬ-aˬ, uˬ laꞈ bi deuˆ tsehˆ dzeh-awˇ koˆ-iˇ gaˇ duˇ tehꞈ-a. Kʼoeˇ loꞈ-ehˇ gʼeh-eu uˬ laꞈ deuˬ-ahˇ gʼoˆ uiˬ-awˇ, miˬ dzaˬ jehˆ bymˇ-ahˇ baꞈ ahˇ-awˇ bi puiˆ dzaˬ jiˇ tehꞈ-a.

⁷Naw maꞈ ngaˬ-ahˇ tsoꞈ tsaꞈ-awˇ, ngaˬ-euˬ dawˬ naw maꞈ-ahˇ tsoꞈ tsaꞈ taˬ naˇ, naw maꞈ kʼaˇ shaˇ mawꞈ-eu jeˬ shaˇ-awˬ. Kʼaˇ shaˇ-eu jeˬ za tehꞈ-a.

⁸Naw maꞈ aˇ siˬ siˬ dui dui le gaˇ haw-awˇ, ngaˬ Da-euˬ yaw shehꞈ kʼahˬ sehˇ-ahˇ aˬ cawˬ ya mawˇ tehꞈ-a. Kʼoeˇ ngeh jawˇ, naw maꞈ ngaˬ-euˬ zaˬ lahˇ pyeuꞈ laˇ-euˬ meh lehˇ ehˇ nya meh.

⁹Aˬda ngaˬ-ahˇ gaˬ-eu loꞈ-ehˇ, naw maꞈ-ahˇ ngaˇ gaˬ-eu ma. Ngaˬ-euˬ gʼoeˇ-eu gaˬ-eu jeˬ laꞈ kʼoeˇ jawˇ-awˬ.

¹⁰Ngaˬ Da-euˬ dawˬ-ahˇ ngaˇ naˇ haˬ geuꞈ-awˇ, ngaˬ Da-euˬ gʼoeˇ-eu gaˬ-eu jeˬ laꞈ kʼoeˇ ngaˇ jawˇ-eu loꞈ-ehˇ, naw maꞈ ngaˬ-euˬ dawˬ-ahˇ naˇ haˬ geuꞈ naˇ, ngaˬ-euˬ gʼoeˇ-eu gaˬ-eu jeˬ laꞈ kʼoeˇ naw maꞈ jawˇ tehꞈ-a.

¹¹Ngaˬ-euˬ laˬ kʼaˬ cehˇ-eu jeˬ naw maꞈ laꞈ kʼoeˇ ahˇ-awˇ, naw maꞈ laˬ kʼaˬ cehˇ-eu jeˬ byah laˇ ni, naw maꞈ-ahˇ ngaˇ heu loꞈ-ehˇ ehˇ nehˬ-euˬ jeˬ pyeuꞈ-eu ma.

¹²Naw maꞈ-ahˇ dawˬ heu dawˬ biꞈ-eu ma. Ngaˇ naw maꞈ-ahˇ gaˬ-eu loꞈ-ehˇ, naw maꞈ tiˬ gʼaˬ tiˇ gʼaˬ gaˬ-awˬ.

¹³Yawˬ ha-euˬ cawˬ gʼaˇ duˬ shiˇ dah nehˬ-eu naˆ maˬ tseˇ huiˬ dzehˬ-eu gʼoeˇ-eu gaˬ-eu jeˬ maˬ paˇ jaˆ meh.

¹⁴Ngaˬ neh dawˬ biꞈ taˬ-euˬ loꞈ-ehˇ naw maꞈ mˇ naˇ, naw maꞈ ngaˬ-euˬ cawˬ ma.

¹⁵Aˬ kaˇ naˇ, ngaˇ naw maꞈ-ahˇ zaˬ kʼaˆ lehˇ maˬ paˇ kuˇ ma. Aˬ jeˬ miˇ neh ehˇ naˇ, zaˬ kʼaˆ-aˬ, yawˬ ha-euˬ baw leˬ aˬ jeˬ mˇ luꞈ-eu gaˇ kawˆ maˬ siˬ nya-a. Ngaˇ naw maꞈ-ahˇ ngaˬ-euˬ cawˬ lehˇ kuˇ ma. Aˬ jeˬ miˇ neh ehˇ naˇ, ngaˬ Da neh kʼaˇ ehˇ nehˬ laꞈ-euˬ jeˬ naw maꞈ-ahˇ ngaˇ dzawˇ nehˬ gʼaˬ jiˇ-euˬ ma.

¹⁶Naw maꞈ neh ngaˬ-ahˇ tseˇ geuꞈ-euˬ maˬ ngeuˇ-a. Ngaˬ neh naw maꞈ-ahˇ tseˇ doˆ-euˬ ma. Naw maꞈ iˇ-awˇ ziꞈ-eu gmˬ-eu aˇ siˬ gʼawˬ mya ni siˬ le-eu gʼaˇ duˬ tseˇ doˆ-euˬ ma. Kʼoeˇ ngeh jawˇ, ngaˬ-euˬ tsawˇ myahˇ laꞈ kʼoeˇ naw maꞈ kʼaˇ shaˇ-eu jeˬ, Aˬda naw maꞈ-ahˇ biꞈ nehˬ laꞈ tehꞈ-a.

¹⁷Ngaˇ naw maꞈ-ahˇ biꞈ-euˬ dawˬ-aˬ, heu loꞈ-ehˇ ma. Naw maꞈ tiˬ gʼaˬ tiˇ gʼaˬ gaˬ-awˬ.

¹⁸“Miˇ tsaˬ zaˬ naw maꞈ-ahˇ muiˇ laˇ ngeh, naw maꞈ-ahˇ maˬ muiˇ mi naˆ-ehˇ ngaˬ-ahˇ jeˬ huˬ muiˇ-euˬ meh lehˇ siˬ nya-awˬ.

¹⁹Naw maꞈ miˇ tsaˬ heu-ahˇ taꞈ naˇ, miˇ tsaˬ heu naw maꞈ-ahˇ aˬ yawꞈ-euˬ zaˬ loꞈ-ehˇ gaˬ tehꞈ-a. Ehˇ kʼawꞈ, miˇ tsaˬ heu-euˬ laꞈ kʼoeˇ neh naw maꞈ-ahˇ ngaˇ tseˇ doˆ gʼaˬ-euˬ ma. Miˇ tsaˬ heu-ahˇ naw maꞈ maˬ paˇ taꞈ meh. Kʼoeˇ miˇ neh, miˇ tsaˬ zaˬ deuˬ naw maꞈ-ahˇ muiˇ-eu meh.

²⁰‘Baw leˬ naˆ maˬ tseˇ huiˬ dzehˬ-eu zaˬ kʼaˆ maˬ jawˇ-a’ lehˇ ngaˬ neh naw maꞈ-ahˇ ehˇ nehˬ-euˬ dawˬ-ahˇ taˬ ngehˇ. Aˬ yawꞈ maꞈ ngaˬ-ahˇ kʼehˬ nehˬ kʼaˆ nehˬ laꞈ-euˬ-aˬ, naw maꞈ-ahˇ kʼawꞈ kʼehˬ nehˬ kʼaˆ nehˬ laꞈ tehꞈ-a. Aˬ yawꞈ maꞈ ngaˬ neh mehˬ nehˬ tsoˆ nehˬ-euˬ dawˬ-ahˇ naˇ haˬ geuꞈ naˇ, naw maꞈ neh mehˬ nehˬ tsoˆ nehˬ-euˬ dawˬ-ahˇ kʼawꞈ naˆ haˬ geuꞈ tehꞈ -a.

²¹Ehˇ kʼawꞈ, naw maꞈ ngaˬ-euˬ tsawˇ haˬ pyeuꞈ-eu miˇ neh, aˬ yawꞈ maꞈ naw maꞈ-ahˇ kʼehˬ nehˬ kʼaˆ nehˬ laꞈ tehꞈ-a. Aˬ jeˬ miˇ neh ehˇ naˇ, ngaˬ-ahˇ aˬ suˇ gʼaˬ neh kʼehˇ gʼeh leꞈ-euˬ aˬ yawꞈ maꞈ maˬ siˬ nya-a.

²²Ngaˇ oe-awˇ aˬ yawꞈ maꞈ-ahˇ maˬ ehˇ mehˬ le law nmˇ-aˬ, aˬ yawꞈ maꞈ iˬ baˇ maˬ ahˇ lehˇ ehˇ nya tehꞈ-a. Ehˇ kʼawꞈ, nymˬ-mˇ poˆ jawˇ-aˬ, aˬ yawꞈ maꞈ neh mˇ-euˬ jeˬ iˬ baˇ ahˇ tehꞈ-a lehˇ aˬ yawꞈ maꞈ maˬ duˇ-aˬ lehˇ maˬ paˇ pyehˇ nya meh.

²³Ngaˬ-ahˇ muiˇ-eu tsawˇ haˬ-aˬ, ngaˬ Da-ahˇ kʼawꞈ muiˇ gaˇ duˇ-eu meh.

²⁴Tsawˇ haˬ tiˬ gʼaˬ-iˬ maˬ mˇ haw-euˬ gaˇ heu deuˬ aˬ yawꞈ maꞈ jawˇ gaˇ ngaˇ maˬ mˇ-euˬ law nmˇ-aˬ, aˬ yawꞈ maꞈ iˬ baˇ maˬ ahˇ-aˇ. Ehˇ kʼawꞈ, ngaˬ neh mˇ-euˬ gaˇ-ahˇ aˬ yawꞈ maꞈ ya mawˇ-awˇ, ngaˬ-ahˇ maˬ ehˇ, ngaˬ Da-ahˇ maˬ ehˇ, aˬ yawꞈ maꞈ muiˇ-eu meh.

²⁵Aˬ yawꞈ maꞈ-euˬ Zahˇ dawˬ kʼoꞈ dawˬ laꞈ kʼoeˇ, ‘Gaˇ kawˆ tiˬ jeˬ-iˬ maˬ jaˆ gaˇ aˬ yawꞈ maꞈ ngaˬ-ahˇ muiˇ-eu meh’ lehˇ ehˇ taˬ-euˬ jaˆ-eu miˇ neh, kʼoeˇ loꞈ-ehˇ maˬ pyeuꞈ laˇ-ehˇ maˬ gʼeh nya-a.

²⁶“Caw ba-eu gʼaˬ oe tehꞈ-a. Aˬ yawꞈ-aˬ, Miˬyehˇ gaˇ kawˆ yaw tsaˬ yaw dawˇ jeˬ bi siˬ bi mawˇ le-euˬ gʼaˬ pyeuꞈ-eu, Aˬda jawˇ gaˇ neh oe-euˬ Yaw sahˇ Miˬyehˇ meh. Aˬda jawˇ gaˇ neh aˬ yawꞈ-ahˇ ngaˇ bi oe-awˇ, ngaˬ-euˬ gaˇ kawˆ aˬ yawꞈ saˇ kiˇ kamˬ tehꞈ-a.

²⁷Naw maꞈ kʼawꞈ, aˇ dahˬ beh ngeh neh ngaˬ nehˬ-ehˇ jawˇ-euˬ miˇ neh, ngaˬ-euˬ gʼaˇ duˬ saˇ kiˇ kamˬ tehꞈ-a.