Read Akha Yoˇhaˬ 16 Bible Online

Yoˇhaˬ 16 - Akha bible

Yoˇhaˬ 16

¹“Naw maꞈ jah-eu jeˬ-ahˇ maˬ ya byehˇ dzeh ni, ngaˇ naw maꞈ-ahˇ heu loꞈehˇ ehˇ-eu jeˬ pyeuꞈ-eu ma.

²Naw maꞈ-ahˇ Yuˇdaˆ tawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni teh dzeh nehˬ laꞈ tehꞈ-a. Naw maꞈ-ahˇ sehꞈ-eu kʼoeˇ-aˬ, Miˬyehˇ-euˬ nui kʼahˇ mˇ-eu jeˬ pyeuꞈ-eu ma lehˇ, naw maꞈ-ahˇ sehꞈ-eu tsawˇ haˬ deuˬ noe-eu aˇ nah keuˆ le tehꞈ-a.

³Aˬda-ahˇ maˬ ehˇ, ngaˬ-ahˇ maˬ ehˇ, aˬ yawꞈ maꞈ maˬ siˬ nya-eu miˇ neh, naw maꞈ-ahˇ kʼoeˇ loꞈ-ehˇ kʼehˬ nehˬ laꞈ tehꞈ-a.

⁴Ehˇ kʼawꞈ, tsawˇ haˬ kʼoeˇ deuˬ naw maꞈ-ahˇ kʼoeˇ loꞈ-ehˇ kʼehˬ nehˬ kʼaˆ nehˬ laꞈ-eu aˇ yamˬ keuˆ le ngeh, kʼoeˇ loꞈ-ehˇ keuˆ le tehꞈ-a lehˇ ngaˬ neh naw maꞈ-ahˇ ehˇ taˬ-euˬ gaˇ naw maꞈ bi noeˬ mawˇ-eu gʼaˇ duˬ, ngaˇ naw maꞈ-ahˇ naꞈ ngeh neh heu loꞈ-ehˇ ehˇ nehˬ-eu ma.” Naw maꞈ ngaˬ-euˬ zaˬ lahˇ pyeuꞈ laˇ beh beh ngeh, gaˇ kawˆ heu naw maꞈ-ahˇ ngaˇ maˬ ehˇ nehˬ-aˬ. Aˬ jeˬ miˇ neh ehˇ naˇ, naw maꞈ nehˬ-ehˇ ngaˬ-euˬ gʼawˇ mawˇ jawˇ-euˬ ma.

⁵Nymˬ-mˇ-aˬ, ngaˬ-ahˇ kʼehˇ gʼeh leꞈ-euˬ gʼaˬ jawˇ gaˇ ngaˇ gʼoꞈ leˇ-eu lehˇ gʼeh-eu ma. Ehˇ kʼawꞈ, ‘Nawˇ aˬ gaˇ iˇ-eu gʼeh te’ lehˇ, naw maꞈ tiˬ gʼaˬ-iˬ ngaˬ-ahˇ maˬ naˇ haˬ-a.

⁶Gaˇ kawˆ heu deuˬ naw maꞈ-ahˇ ngaˇ ehˇ nehˬ-euˬ miˇ neh, naw maꞈ nui ma shaˬ zahˬ mˇ luꞈ meh.

⁷Ngaˇ naw maꞈ-ahˇ maˇ jawˆ ni ehˇ-eu ma. Ngaˇ gʼoꞈ leˇ-eu-aˬ, naw maꞈ gʼaˇ duˬ muiˬ dzehˬ meh. Aˬ jeˬ miˇ neh ehˇ naˇ, ngaˇ maˬ gʼoꞈ leˇ naˇ, Caw ba-eu gʼaˬ naw maꞈ jawˇ gaˇ maˬ oe nya-a. Ngaˇ gʼoꞈ leˇ naˇ, Caw ba-eu gʼaˬ-ahˇ kʼehˇ gʼeh leꞈ ma.

⁸Aˬ yawꞈ oe ngeh, iˬ baˇ gaˇ kawˆ maˬ ehˇ, yaw tsaˬ yaw dawˇ jeˬ gaˇ kawˆ maˬ ehˇ, Miˬyehˇ yaˇ kʼaˬ daˇ-eu gaˇ kawˆ maˬ ehˇ, miˇ tsaˬ zaˬ deuˬ jah lehˬ-eu meh lehˇ aˬ yawꞈ saˇ kiˇ kamˬ tehꞈ-a.

⁹Iˬ baˇ gaˇ kawˆ aˬ yawꞈ maꞈ jah lehˬ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ ngaˬ-ahˇ maˬ jah-a.

¹⁰Yaw tsaˬ yaw dawˇ jeˬ gaˇ kawˆ aˬ yawꞈ maꞈ jah lehˬ-euˬ meh. Aˬ jeˬ miˇ neh ehˇ naˇ, ngaˇ Aˬda jawˇ gaˇ gʼoꞈ leˇ-awˇ naw maꞈ ngaˬ-ahˇ tiˬ jawˇ-iˬ maˬ paˇ ya mawˇ meh.

¹¹Yaˇ kʼaˬ daˇ-eu gaˇ kawˆ aˬ yawꞈ maꞈ jah lehˬ-euˬ meh. Aˬ jeˬ miˇ neh ehˇ naˇ, miˇ tsaˬ-ahˇ uˆ lahˇ-eu gʼaˬ yaˇ kʼaˬ daˇ-eu jeˬ-ahˇ ya daˬ gʼaˬ-euˬ meh.

¹²“Ngaˇ naw maꞈ-ahˇ ehˇ nehˬ paˬ-ehˇ gʼeh-eu gʼawˬ mya ni jaˆ te siˬ. Ehˇ kʼawꞈ, nymˬ-mˇ naw maꞈ-euˬ nui ma laꞈ kʼoeˇ maˬ gʼoˆ taˬ jiˇ coeˇ-a.

¹³Ehˇ kʼawꞈ, Miˬyehˇ gaˇ kawˆ yaw tsaˬ yaw dawˇ jeˬ pah mehˬ le-eu gʼaˬ pyeuꞈ-eu Yaw sahˇ Miˬyehˇ oe ngeh, yaw tsaˬ yaw dawˇ dawˬ tawˆ luꞈ-ahˇ naw maꞈ siˬ nya laˇ ni aˬ yawꞈ sheuˬ mehˬ laꞈ tehꞈ-a. Aˬ jeˬ miˇ neh ehˇ aˇ, aˬ yawꞈ-euˬ nui noeˬ nui loˆ maˬ ngehˬ maˬ tmˇ-ehˇ, Aˬda neh kʼaˇ ehˇ nehˬ-euˬ jeˬ naw maꞈ-ahˇ dzawˇ nehˬ-awˇ, mehˬ hu paw pyeuꞈ laˇ-eu lehˇ gʼeh-eu gaˇ kawˆ deuˬ ehˇ mehˬ laꞈ tehꞈ-a.

¹⁴Ngaˬ-euˬ yaw shehꞈ kʼahˬ sehˇ doˆ laˇ ni aˬ yawꞈ mˇ tehꞈ-a.

¹⁵Ngaˬ Da kʼaˇ jaˆ-eu jeˬ dawˬ tawˆ luꞈ ngaˬ-euˬ ma. Kʼoeˇ miˇ neh, Yaw sahˇ Miˬyehˇ-aˬ, ngaˬ neh kʼaˇ biꞈ nehˬ-euˬ dawˬ deuˬ yuˇ-awˇ, naw maꞈ-ahˇ paˇ ehˇ nehˬ le tehꞈ-a lehˇ, naw maꞈ-ahˇ ngaˇ ehˇ-eu ma.

¹⁶“Tiˬ kʼehˬ gʼeh naˇ, naw maꞈ ngaˬ-ahˇ maˬ paˇ ya mawˇ-aˇ. Tiˬ kʼehˬ paˇ gʼeh naˇ, naw maꞈ ngaˬ-ahˇ paˇ ya mawˇ tehꞈ-a.”

¹⁷Zaˬ lahˇ deuˬ yaw kaˬ ja-eu, “Aˬ jeˬ-ahˇ ehˇ mawꞈ-eu nga. Tiˬ kʼehˬ kʼehˬ gʼeh naˇ aˬ dui maꞈ aˬ yawꞈ-ahˇ maˬ paˇ ya mawˇ-ehˇ, tiˬ kʼehˬ paˇ gʼeh naˇ, aˬ dui maꞈ aˬ yawꞈ-ahˇ paˇ ya mawˇ tehꞈ-a lehˇ ehˇ-eu meh. ‘Aˬ jeˬ miˇ neh ehˇ naˇ, ngaˬ Da jawˇ gaˇ ngaˇ gʼoꞈ leˇ ma’ lehˇ kʼawꞈ paˇ ehˇ-eu meh.

¹⁸‘Tiˬ kʼehˬ gʼeh naˇ’ lehˇ ehˇ-eu teu aˬ jeˬ-ahˇ ehˇ-eu nga. Aˬ yawꞈ aˬ jeˬ ehˇ mawꞈ-eu maˬ gʼoˆ shaw nya nya.”

¹⁹Aˬ yawꞈ maꞈ aˬ yawꞈ-ahˇ aˬ joˆ-ehˇ naˇ haˬ mawꞈ-eu Yeˬsuˇ siˬ nya-eu miˇ neh, heu loꞈ-ehˇ ehˇ kʼoꞈ nehˬ-euˬ meh. “Tiˬ kʼehˬ gʼeh naˇ naw maꞈ ngaˬ-ahˇ maˬ paˇ ya mawˇ-ehˇ, tiˬ kʼehˬ paˇ gʼeh naˇ, naw maꞈ ngaˬ-ahˇ paˇ ya mawˇ tehꞈ-a lehˇ ngaˇ ehˇ-eu ma. Ngaˇ aˬ jeˬ-ahˇ ehˇ mawꞈ-eu nga lehˇ naw maꞈ yaw kaˬ ja naˇ haˬ luꞈ-eu maˬ ngeuˇ loˇ.

²⁰Ngaˇ naw maꞈ-ahˇ dawˇ coe ni ehˇ-eu ma. Naw maꞈ myaˆ biˇ doˆ le-eu uˬ taꞈ, tsawˇ ngoeˇ kʼawꞈ ya ngoeˇ tehꞈ-a. Ehˇ kʼawꞈ, miˇ kʼahˬ zaˬ deuˬ laˬ kʼaˬ cehˇ tehꞈ-a. Naw maꞈ nui ma shaˬ zahˬ ya mˇ tehꞈ-a. Ehˇ kʼawꞈ, naw maꞈ neh noeˬ shaˬ-euˬ jeˬ kʼoeˇ, laˬ kʼaˬ cehˇ-eu jeˬ paˇ pyeuꞈ laˇ tehꞈ-a.

²¹Zaˬ miˬ zaˬ tiˬ gʼaˬ zaˬ baw-eu lehˇ gʼeh ngeh, shaˬ zahˬ ya mˇ-eu aˇ yamˬ keuˆ le-euˬ miˇ neh noeˬ shaˬ-eu meh. Ehˇ kʼawꞈ, zaˬ ciˬ doˆ leꞈ gʼaˬ ngeh, shaˬ zahˬ naꞈ-eu jeˬ-ahˇ ngehˇ jiˇ-eu meh. Aˬ jeˬ miˇ neh ehˇ naˇ, zaˬ tiˬ gʼaˬ miˇ tsaˬ kʼoeˇ taˆ dehꞈ doˆ le-euˬ miˇ neh, aˬ yawꞈ laˬ kʼaꞈ cehˇ-eu meh.

²²Naw maꞈ kʼawꞈ, kʼoeˇ gaˇ duˇ-eu meh. Nymˬ-mˇ naw maꞈ ya noeˬ shaˬ-eu meh. Ehˇ kʼawꞈ, naw maꞈ-ahˇ ngaˇ paˇ haw mawˇ le ngeh, naw maꞈ laˬ kʼaˬ cehˇ dui dui tehꞈ-a. Kʼoeˇ ngeh jawˇ, naw maꞈ laˬ kʼaˬ cehˇ-eu jeˬ-ahˇ tiˬ gʼaˬ-iˬ maˬ paˇ lu doˆ geuꞈ gʼeh nya-aˇ.

²³“Aˇ nah kʼoeˇ nah keuˆ le ngeh, naw maꞈ ngaˬ-ahˇ tiˬ jeˬ-iˬ maˬ paˇ shaˇ-aˇ. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Ngaˬ-euˬ tsawˇ myahˇ laꞈ kʼoeˇ naw maꞈ kʼaˇ shaˇ-eu jeˬ-ahˇ, Aˬda biꞈ nehˬ laꞈ tehꞈ-a.

²⁴Iˬ nah keuˆ ni, ngaˬ-euˬ tsawˇ myahˇ laꞈ kʼoeˇ naw maꞈ tiˬ jeˬ-iˬ maˬ shaˇ-aˬ siˬ. Naw maꞈ laˬ kʼaˬ cehˇ-eu jeˬ tiˬ byah tiˬ loꞈ za ni shaˇ-awˬ. Shaˇ naˇ za tehꞈ-a.”

²⁵“Ngaˇ yaw jeˬ ma jeˬ ja ja-ehˇ, gaˇ kawˆ heu deuˬ naw maꞈ-ahˇ mehˬ nehˬ-euˬ ma. Ehˇ kʼawꞈ, ngaˇ yaw jeˬ ma jeˬ maˬ paˇ ja ni, Aˬda gaˇ kawˆ naw maꞈ-ahˇ dawˇ coe ni ya ehˇ nehˬ-eu aˇ nah keuˆ le tehꞈ-a.

²⁶Aˇ nah kʼoeˇ nah keuˆ le ngeh, naw maꞈ ngaˬ-euˬ tsawˇ myahˇ laꞈ kʼoeˇ Aˬda-ahˇ shaˇ tehꞈ-a. Naw maꞈ-euˬ dah zaˇ ngaˇ aˬ yawꞈ-ahˇ shaˇ-eu maˬ paˇ loˬ meh.

²⁷Naw maꞈ ngaˬ-ahˇ gaˬ-awˇ, Miˬyehˇ jawˇ gaˇ neh oe-euˬ meh lehˇ jah-eu miˇ neh, Aˬda naw maꞈ-ahˇ gaˬ-eu meh.

²⁸Ngaˇ Aˬda jawˇ gaˇ neh oe-awˇ, miˇ tsaˬ kʼoeˇ taˆ oe-euˬ ma. Nymˬ-mˇ ngaˇ miˇ tsaˬ heu-ahˇ byehˇ yaꞈ-awˇ, Aˬda jawˇ gaˇ gʼoꞈ leˇ ma.”

²⁹Kʼoeˇ ngeh, zaˬ lahˇ deuˬ Yeˬsuˇ-ahˇ ehˇ-eu, “Nymˬ-mˇ poˆ jawˇ-aˬ, nawˇ yaw jeˬ ma jeˬ maˬ paˇ ja mehˬ ni dawˇ coe ni ngehˬ-eu tmˇ-eu meh.

³⁰Tsawˇ haˬ tiˬ gʼaˬ dawˬ maˬ ngehˬ doˆ laˇ mi naˆ-ehˇ, aˬ yawꞈ-euˬ nui ma laꞈ kʼoeˇ kʼaˇ noeˬ luꞈ-eu yawˬ jeˬ na luꞈ nawˇ siˬ nya meh lehˇ, nymˬ-mˇ nga maꞈ siˬ duˬ-eu ma.”

³¹Aˬ yawꞈ maꞈ-ahˇ Yeˬsuˇ ehˇ nehˬ-eu, “Naw maꞈ nymˬ-mˇ jah duˬ gʼaˬ maˬ loˇ.

³²Naw maꞈ dawˬ tawˆ luꞈ bi teh byaˆ jiˇ-awˇ, yawˬ ha-euˬ nymˇ-ahˇ yawˬ ha cehˆ gʼoꞈ jiˇ-awˇ, ngaˬ-ahˇ tehꞈ-ehˇ byehˇ dzeh yaꞈ-eu aˇ yamˬ keuˆ le luꞈ meh. Aˇ yamˬ kʼoeˇ aˬ diˇ keuˆ le taˬ-euˬ meh. Ehˇ kʼawꞈ, ngaˇ-aˬ, tiˬ gʼaˬ tehꞈ maˬ ngeuˇ. Aˬ jeˬ miˇ neh ehˇ naˇ, Aˬda ngaˬ nehˬ-ehˇ jawˇ ma.

³³Ngaˬ-euˬ laꞈ kʼoeˇ naw maꞈ nui saˇ oꞈ-eu jeˬ za nya ni, naw naw maꞈ-ahˇ heu loꞈ-ehˇ ehˇ-eu ma. Miˇ tsaˬ heu kʼoeˇ taˆ, kʼehˬ-eu kʼaˆ-eu jeˬ-ahˇ naw maꞈ ya daˬ tehꞈ-a. Ehˇ kʼawꞈ, tiˬ pawꞈ-iˬ taˬ guˆ. Miˇ tsaˬ heu-ahˇ ngaˇ gʼaˬ leˇ-euˬ ma.”