Read Akha Yoˇhaˬ 19 Bible Online

Yoˇhaˬ 19 - Akha bible

Yoˇhaˬ 19

¹Kʼoeˇ naˇ, sahˬ paˬ Piˇlaˆ neh Yeˬsuˇ-ahˇ bi sheuˬ doˆ gʼeh-awˇ, yahˬ caˆ neh bi juiꞈ-euˬ meh.

²Yehˇ kʼoeˇ deuˬ aˬ gah ciˇ ni neh sahˬ paˬ-euˬ uˬ kʼoˆ loꞈ-ehˇ daˇ kʼahˇ kʼahˇ-awˇ, aˬ yawꞈ-euˬ uˬ duˬ-ahˇ nyehꞈ kʼoˆ nehˬ-euˬ meh. Kʼoeˇ naˇ, neˇ naˆ naˆ-eu pehˇ kʼahˬ pehˇ mahˇ nyehꞈ dm nehˬ-euˬ meh.

³Aˬ yawꞈ maꞈ aˬ yawꞈ dawˬ peh le-awˇ, “Yuˇdaˆ tsawˇ haˬ-euˬ Sahˬ paˬ ziˇ baw ziˇ za luꞈ-uˇ” lehˇ ehˇ-awˇ, baˬ ba-ahˇ tehˆ nehˬ-euˬ meh.

⁴Sahˬpaˬ Piˇlaˆ tiˬ poˆ paˇ iˇ doˆ-awˇ, tsawˇ haˬ aˇ maꞈ-ahˇ heu loꞈ-ehˇ ehˇ nehˬ-euˬ meh, “Naˇ haˬ sheˇ. Tsawˇ haˬ heu gʼaˬ-euˬ yaw lehˬ ngaˇ maˬ poˆ mawˇ nya-euˬ naw maꞈ ya siˬ duˬ ni, aˬ yawꞈ-ahˇ naw maꞈ jawˇ gaˇ sheuˬ doˆ nehˬ leꞈ ma.”

⁵Kʼoeˇ ngeh, Yeˬsuˇ doˆ le-euˬ meh. Aˬ gah neh jahˇ taˬ-euˬ sah paˬ-euˬ uˬ kʼoˆ kʼoˆ luꞈ-awˇ, neˇ naˆ naˆ-eu pehˇ kʼahˬ pehˇ mahˇ dm luꞈ-eu meh. Sahˬ paˬ Piˇlaˆ ehˇ-eu, “Hehˬ. Tsawˇ haˬ heu gʼaˬ sheuˬ doˆ ha le-euˬ ma.”

⁶Piˇ ma aˬ yuiꞈ deuˬ hawˇ-eu Yuˇdaˆ tsawˇ haˬ deuˬ aˬ yawꞈ-ahˇ ya mawˇ ngeh, “Laꞈ yaꞈ kʼoeˇ taˆ taꞈ sehꞈ-awˬ. Laꞈ yaꞈ kʼoeˇ taˆ taꞈ sehꞈ-awˬ” lehˇ guˇ-eu meh. Sahˬ paˬ Piˇlaˆ aˬ yawꞈ maꞈ-ahˇ ehˇ nehˬ-eu, “Toˆ-ehˇ ngeuˇ naˇ, naw maꞈ aˬ yawꞈ-ahˇ sheuˬ gʼeh-awˇ laꞈ yaꞈ kʼoeˇ taˆ taꞈ sehꞈ-iˇ-awˬ. Ngaˇ aˬ yawꞈ-euˬ yaw lehˬ maˬ poˆ mawˇ nya nya.”

⁷Tsawˇ haˬ aˇ maꞈ ehˇ-eu, “Nga maꞈ-euˬ zahˇ dawˬ kʼoꞈ dawˬ tiˬ dawˬ-ahˇ gʼoe-awˇ ya ehˇ naˇ, yawˬ haˇ yawˬ ha Miˬyehˇ-euˬ Zaˬmaˇ ma lehˇ ehˇ-eu baˬ da neh aˬ yawꞈ shiˇ-eu tsaˬ meh.”

⁸Dawˬ kʼoeˇ dawˬ-ahˇ sahˬ paˬ Piˇlaˆ ya gaˬ ngeh, paˇ guˆ dzehˬ laˇ-euˬ meh.

⁹Aˬ yawꞈ hawˇ nymˇ laꞈ kʼoeˇ paˇ gʼoꞈ kʼoꞈ-iˇ-awˇ, “Nawˇ aˬ gaˇ neh oe teˬ” lehˇ, Yeˬsuˇ-ahˇ naˇ haˬ-euˬ meh. Ehˇ kʼawꞈ, Yeˬ suˇ dawˬ maˬ tmˇ-a.

¹⁰Sahˬ paˬ Piˇlaˆ aˬ yawꞈ-ahˇ ehˇ nehˬ-eu, “Aˬ jeˬ miˇ neh nawˇ ngaˬ-ahˇ dawˬ maˬ ngehˬ cawˬ te. Nawˬ-ahˇ pyehˬ nehˬ-eu gʼaˇ duˬ maˬ ehˇ, laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ maˬ ehˇ, ngaˬ-euˬ aˬ laꞈ laꞈ kʼoeˇ jaˆ ma.”

¹¹Yeˬsuˇ ehˇ-eu, “Miˬyehˇ neh nawˬ-ahˇ baoˬ biꞈ taˬ-euˬ miˇ neh, nawˇ ngaˬ-euˬ kʼoeˇ taˆ baoˬ jaˆ-eu meh. Kʼoeˇ miˇ neh, ngaˬ-ahˇ nawˬ-euˬ aˬ laꞈ laꞈ kʼoeˇ a nehˬ laˇ-euˬ gʼaˬ-aˬ, nawˇ naˆ maˬ tseˇ iˬ baˇ huiˬ dzehˬ meh.”

¹²Dawˬ kʼoeˇ dawˬ-ahˇ sahˬ paˬ Piˇlaˆ ya gaˬ ngeh, Yeˬsuˇ-ahˇ pyehˬ nehˬ-eu gaˇ ma poˆ-euˬ meh. Ehˇ kʼawꞈ, tsawˇ haˬ aˇ maꞈ guˇ-awˇ ehˇ-eu, “Nawˇ aˬ yawꞈ-ahˇ pyehˬ nehˬ te lehˇ ngeuˇ naˇ, nawˇ sahˬ paˬ Gehˇsaˬ-euˬ cawˬ maˬ paˇ ngeuˇ meh. Yawˬ haˇ yawˬ ha sahˬ paˬ ma lehˇ ehˇ-eu tsawˇ haˬ-aˬ, sahˬ paˬ Gehˇsaˬ-ahˇ puiˬ-eu tsawˇ haˬ meh.”

¹³Dawˬ kʼoeˇ dawˬ-ahˇ sahˬ paˬ Piˇlaˆ ya gaˬ ngeh, Yeˬsuˇ-ahˇ laꞈ nyiˇ sheuˬ doˆ leꞈ-awˇ, “Kʼaˬ lo kʼawˬ taˬ-euˬ jawˇ duˬ” lehˇ kuˇ gaˇ jaˆ-eu yaˇ kʼaˬ daˇ-eu nuiˇ mahˬ-ahˇ nuiˇ le-euˬ meh. Kʼaˬ lo kʼawˬ taˬ-euˬ jawˇ duˬ-ahˇ, Heˬbyeˇ dawˬ “Gaˬbaˬdaˬ” lehˇ ehˇ-eu meh.

¹⁴Kʼoeˇ ngeh nah-aˬ, Baˬsaˬkaˬ Bawˬ-iˬ gʼeh-eu gʼaˇ duˬ lehˬ hmˬ-eu aˇ nah pyeuꞈ-awˇ, nah loˆ ceh laˇ mawꞈ laˇ-euˬ meh, Tsawˇ haˬ kʼoeˇ deuˬ-ahˇ Sahˬ paˬ Piˇlaˆ ehˇ nehˬ-eu, “Naw maꞈ-euˬ sahˬ paˬ-ahˇ haw sheˇ.”

¹⁵Aˬ yawꞈ maꞈ guˇ-eu, “Aˬ yawꞈ-ahˇ sehꞈ-awˬ. Aˬ yawˬ-ahˇ sehˬ-awˬ. Laꞈ yaꞈ kʼoeˇ taˆ taꞈ sehꞈ-awˬ.” Sahˬ paˬ Piˇlaꞈ aˬ yawꞈ maꞈ-ahˇ ehˇ nehˬ-eu, “Naw maꞈ-euˬ sahˬ paˬ-ahˇ laꞈ yaꞈ kʼoeˇ taˆ taꞈ sehꞈ-awˬ loˇ.” Piˇ ma aˬ yuiꞈ deuˬ ehˇ-eu, “Nga maꞈ-euˬ sahˬ paˬ-aˬ sahˬ paˬ Gehˇsaˬ tiˬ gʼaˬ tehꞈ ma.”

¹⁶Kʼoeˇ naˇ, Yeˬsuˇ-ahˇ laꞈ yaꞈ kʼoeˇ taˆ bi taꞈ sehꞈ-eu gʼaˇ duˬ, sahˬ paˬ Piˇlaˆ neh aˬ yawꞈ maꞈ-euˬ aˬ laꞈ laꞈ kʼoeˇ a kʼoꞈ nehˬ-euˬ meh. Kʼoeˇ naˇ, yehˇ deuˬ neh Yeˬsuˇ-ahˇ sheuˬ doˆ gʼeh-euˬ meh.

¹⁷Aˬ yawꞈ-aˬ yawˬ ha-euˬ laꞈ yaꞈ baꞈ-awˇ Uˬ duˬ kʼmˬ lehˇ kuˇ-eu jawˇ duˬ-ahˇ le keuˆ-euˬ meh. Jawˇ duˬ kʼoeˇ tsahˇ-ahˇ, Heˬbyehˇ dawˬ Gawˇlaˬgawˇda lehˇ kuˇ-eu meh.

¹⁸Kʼoeˇ gaˇ, aˬ yawꞈ maꞈ aˬ yawꞈ-ahˇ laꞈ yaꞈ kʼoeˇ taˆ taꞈ tehˬ-euˬ meh. Tsawˇ haˬ nyiˬ gʼaˬ-ahˇ kʼawꞈ, aˬ yawꞈ-euˬ gaˇ dzeˇ tiˬ paw tiˬ gʼaˬ-ehˇ taꞈ tehˬ taˬ-awˇ, aˬ yawꞈ-ahˇ gʼahˇ ceh taꞈ tehˬ taˬ-euˬ meh.

¹⁹Sahˬ paˬ Piˇlaˆ neh sahˬ boꞈ boꞈ-awˇ, laꞈ yaꞈ kʼoeˇ taˆ bi taꞈ myahˬ-euˬ meh. “Heu-aˬ, Yuˇdaˆ tsawˇ haˬ-euˬ Sahˬpaˬ pyeuꞈ-eu Naˬzaˬlehˇ meuˬ-ahˇ jawˇ-eu Yeˬsuˇ meh” lehˇ boꞈ taˬ-euˬ meh.

²⁰Yeˬsuˇ-ahˇ laꞈ yaꞈ kʼoeˇ taˆ taꞈ tehˬ taˬ-euˬ jawˇ duˬ kʼoeˇ-aˬ, meuˬ-ahˇ neh yaw kʼaˆ-ehˇ maˬ kaˬ-eu miˇ neh, tsawˇ haˬ gʼawˬ mya ni sahˬ boꞈ boꞈ myahˬ taˬ-euˬ gaˇ ya gui-euˬ meh. Sahˬ boꞈ kʼoeˇ-aˬ, Heˬbyehˇ dawˬ, Laˬteˬ dawˬ, Heˬlaˬsaˇ dawˬ, heu smˇ jeˬ luꞈ boꞈ taˬ-euˬ meh.

²¹Piˇ ma aˬ yuiꞈ deuˬ sahˬ paˬ Piˇlaˆ-ahˇ ehˇ nehˬ-eu, “‘Yuˇdaˆ tsawˇ haˬ-euˬ sahˬ paˬ’ lehˇ maˬ boꞈ ni, ‘Tsawˇ haˬ heu gʼaˬ yawˬ haˇ yawˬ ha Yuˇdaˆ tsawˇ haˬ-euˬ sahˬ paˬ ma lehˇ tsaˬ geuꞈ-euˬ meh’ lehˇ boꞈ-eu tsaˬ dzehˬ tehꞈ-a.”

²²Sahˬ paˬ Piˇlaˆ ehˇ-eu, “Ngaˬ neh boꞈ gʼaˬ-euˬ jeˬ-aˬ, kʼaˇ boꞈ taˬ-euˬ loꞈ-ehˇ ya bi jaˆ meh.”

²³Yehˇ kʼoeˇ deuˬ Yeˬsuˇ-ahˇ laꞈ yaꞈ kʼoeˇ taˆ taꞈ tehˬ gʼaˬ ngeh, aˬ yawꞈ-euˬ mehˬ tsoeˬ-ahˇ oeˬ bymˇ bymˇ-awˇ, tiˬ gʼaˬ tiˬ bymˇ geuꞈ-euˬ meh. Laꞈ kʼoeˇ dm ahˇ-eu pehˇ kʼahˬ pehˇ mahˇ kʼoeˇ kahˇ kʼawꞈ, aˬ yawꞈ maꞈ yuˇ geuꞈ-euˬ meh. Pehˇ kʼahˬ kʼoeˇ kahˇ-aˬ, saˬ paˇ tiˬ dzeh tehꞈ-ehˇ zaꞈ taˬ-euˬ, paˇ kʼawˇ maˬ baw-eu pehˇ kʼahˬ pyeuꞈ-eu meh.

²⁴Yehˇ kʼoeˇ deuˬ tiˬ gʼaˬ tiˇ gʼaˬ ehˇ-eu, “Pehˇ kʼahˬ heu kahˇ maˬ cehˬ paˆ ni, aˬ geu gʼaˬ geuꞈ-eu tsaˬ nga lehˇ, pyuˇ maˇ byaˆ dzeh diˇ-awˇ tsaˬ geuꞈ kaˇ-euˇ.” Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jeˬ byah laˇ ni, kʼoeˇ loꞈ-ehˇ pyeuꞈ laˇ-euˬ meh. “Ngaˬ-euˬ dm gʼaˬ dm lmˇ deuˬ-ahˇ, aˬ yawꞈ maꞈ yaw kaˬ biˇ geuꞈ-awˇ, laꞈ kʼoeˇ dm-eu pehˇ kʼahˬ pehˇ mahˇ, pehꞈ sa dzeh-awˇ tsaˬ geuꞈ-euˬ meh” Yehˇ kʼoeˇ deuˬ mehˬ tsoeˬ biˇ geuꞈ-euˬ kʼoeˇ-aˬ, Jaˇliꞈ laꞈ kʼoeˇ ehˇ taˬ-euˬ gaˇ tsaˬ-eu meh.

²⁵Yeˬsuˇ-euˬ laꞈ yaꞈ dawˬ peh tehˬ ni yawꞈ luꞈ-eu tsawˇ haˬ deuˬ-aˬ, Yeˬsuˇ-euˬ aˬ ma, Yeˬsuˇ-euˬ aˬ mui, Gaˬlawˇpaˇ-euˬ nymˇ dahˬ pyeuꞈ-eu Maˬliˇ hawˇ-eu, Maˬgaˬdaˬlaˇ meuˬ-ahˇ jawˇ-eu Maˬliˇ, aˬ ha oeˬ gʼaˬ meh.

²⁶Yeˬsuˇ-aˬ, aˬ yawꞈ-euˬ aˬ ma hawˇ-eu aˬ yawꞈ gaˬ dui dui-eu zaˬ lahˇ kʼoeˇ gʼaˬ kʼoeˇ gaˇ yawꞈ luꞈ gaˇ ya mawˇ ngeh, “Aˬ ma-oˇ, aˬ yawꞈ-ahˇ nawˬ li loꞈ-ehˇ sawˇ-awˬ” lehˇ ehˇ nehˬ-euˬ meh.

²⁷Kʼoeˇ naˇ, zaˬ lahˇ kʼoeˇ gʼaˬ-ahˇ kʼawꞈ, “Aˬ yawꞈ-ahˇ nawˬ ma loꞈ-ehˇ sawˇ-awˬ” lehˇ ehˇ nehˬ-euˬ meh. Kʼoeˇ ngeh nah neh naˇ, zaˬ lahˇ kʼoeˇ gʼaˬ Yeˬsuˇ-euˬ aˬ ma-ahˇ sheuˬ kʼoꞈ gʼeh-awˇ, aˬ yawꞈ-euˬ nymˇ-ahˇ bi jawˇ-euˬ meh.

²⁸Nymˬ-mˇ poˆ jawˇ, yawˬ jeˬ na luꞈ byah laˇ gʼaˬ-euˬ gaˇ kawˆ Yeˬsuˇ siˬ nya-euˬ meh. Jaˇliꞈ laꞈ kʼoeˇ ehˇ taˬ-euˬ loꞈ-ehˇ byah laˇ ni, “Iˇ cuꞈ mehꞈ nya” lehˇ Yeˬsuˇ ehˇ-eu meh.

²⁹Aˬ gaꞈ dzaˇ uiˇ uiˇ cehˇ tiˬ byah ni dahˬ-eu ciˬ cuˇ cuˇ zaˬ tiˬ siˬ kʼoeˇ gaˇ jaˆ-eu meh. Boeˇ baˆ laꞈ daˬ-ahˇ duˇ-eu laˆ shaˆ iˇ jaˬ caˆ luˆ tiˬ luˆ-ahˇ kʼoeˇ gaˇ dawˆ duiˆ-awˇ, hiˇ soˆ kahˬ zaˬ uˬ du gʼoˆ tehˬ-awˇ, aˬ yawꞈ-euˬ mehˬ luˬ-ahˇ cawˬ miˇ nehˬ-euˬ meh.

³⁰Yeˬsuˇ aˬ gaꞈ dzaˇ uiˇ kʼoeˇ cuˆ dawˇ gʼaˬ-awˇ, “Gaˇ mˇ jiˇ-euˬ ma” lehˇ ehˇ-eu meh. Kʼoeˇ naˇ, uˬ duˬ ga moꞈ le-awˇ, saꞈ tsehˆ leˇ-euˬ meh.

³¹Kʼoeˇ naˇ, laꞈ yaꞈ kʼoeˇ taˆ bi taꞈ tehˬ-euˬ tsawˇ haˬ kʼoeˇ deuˬ-euˬ aˬ kuiˇ deh kʼehꞈ-awˇ, laꞈ yaꞈ kʼoeˇ taˆ neh baꞈ ka leꞈ-eu gʼaˇ duˬ, Yuˇdaˆ tsawˇ haˬ aˬ yuiꞈ aˬ tsu deuˬ sahˬ paˬ Piˇlaˆ-ahˇ shaˇ-euˬ meh. Kʼoeˇ ngeh nah-aˬ, Jawˇ nah gʼaˇ duˬ lehˬ hmˬ dah-eu aˇ nah pyeuꞈ-awˇ, shiˇ taˬ-euˬ gʼawˇ mawˇ kʼoeˇ deuˬ-ahˇ Jawˇ nah ngeh nah keuˆ ni laꞈ yaꞈ kʼoeˇ taˆ maˬ bi jaˆ mawꞈ-eu miˇ neh, aˬ yawꞈ maꞈ kʼoeˇ loꞈ-ehˇ shaˇ-eu meh. Kʼoeˇ uˬ taꞈ, jawˇ nah kʼoeˇ ngeh nah-aˬ, muiˬ dzehˬ shawˇ dzehˬ-eu Jawˇ nah tiˬ nah pyeuꞈ-eu miˇ neh meh.

³²Kʼoeˇ miˇ neh, yehˇ kʼoeˇ deuˬ le-awˇ, Yeˬsuˇ nehˬ-ehˇ laꞈ yaꞈ kʼoeˇ taˆ bi taꞈ tehˬ-euˬ tsawˇ haˬ kʼoeˇ nyiˬ gʼaˬ-euˬ aˬ kuiˇ deh kʼehꞈ-euˬ meh.

³³Yehˇ kʼoeˬ deuˬ Yeˬsuˇ-euˬ dawˬ peh le keuˆ ngeh, Yeˬsuˇ shiˇ tsehˆ-euˬ gaˇ ya mawˇ-awˇ, aˬ kuiˇ maˬ deh kʼehꞈ nehˬ ni byehˇ-euˬ meh.

³⁴ehˇ kʼawꞈ, yehˇ tiˬ gʼaˬ neh Yeˬsuˇ-euˬ byaˇ gʼaˇ-ahˇ gahˬ tsawˆ-awˇ, shiˬ hawˇ-eu iˇ cuꞈ tiˬ poˆ tehꞈ-ehˇ yoeˇ doˆ le-euˬ meh.

³⁵(Pyeuꞈ laˇ-euˬ gaˇ kawˆ kʼoeˇ-ahˇ mawˇ duˬ-euˬ kʼoeˇ gʼaˬ, naw maꞈ kʼawꞈ jah laˇ nya ni dzawˇ duˬ-eu meh. Aˬ yawꞈ ehˇ-eu maˇ maˇ ni ngeuˇ-awˇ, aˬ yawꞈ dawˇ coe ni ehˇ-eu ma lehˇ aˬ yawˇ yawꞈ siˬ duˬ-eu meh.)

³⁶“Aˬ yawꞈ-euˬ shaˬ yoeˬ tiˬ kahˬ-iˬ ma ya kʼehꞈ-iˇ-aˇ” lehˇ Jaˇliꞈ laꞈ kʼoeˇ ehˇ taˬ-euˬ dawˬ kʼoeˇ dawˬ byah laˇ ni, kʼoeˇ loꞈ-ehˇ pyeuꞈ laˇ-euˬ meh.

³⁷Jaˇliꞈ laꞈ kʼoeˇ tiˬ tsahˇ paˇ ehˇ taˬ-euˬ, “Aˬ yawꞈ maꞈ neh gahˬ tsawˆ byoe-euˬ tsawˇ haˬ kʼoeˇ gʼaˬ-ahˇ aˬ cawˬ haw tehꞈ-a.”

³⁸Kʼoeˇ naˇ, Aˬliˇmaꞈtehˬ meuˬ-ahˇ jawˇ-eu Yoˇsehˆ kʼoeˇ gʼaˬ, Yeˬsuˇ-euˬ gʼawˇ mawˇ baꞈ kʼoꞈ gʼeh-eu gʼaˇ duˬ, sahˬ paˬ Piˇlaˆ-ahˇ shaˇ leˇ-euˬ meh. Yoˇsehˆ kʼoeˇ gʼaˬ-aˬ, Yuˇdaˆ tsawˇ haˬ aˬ yuiꞈ aˬ tsu deuˬ-ahˇ guˆ-eu miˇ neh, Yeˬsuˇ-euˬ zaˬ lahˇ ciˬ cuˇ ni geuꞈ kʼoeˬ taˬ-euˬ tsawˇ haˬ meh. Yeˬsuˇ-euˬ gʼawˇ mawˇ baꞈ kʼoꞈ gʼeh-eu gʼaˇ duˬ sahˬ paˬ Piˇlaˆ neh aˬ yawꞈ-ahˇ aˬ kawˬ-aˬ biꞈ-euˬ miˇ neh, aˬ yawꞈ le-awˇ, baꞈ kʼoꞈ laˬ leˇ-euˬ meh.

³⁹Yaw beh Yeˬsuˇ-ahˇ uˬ ciꞈ tiˬ miˇ tahˬ puˬ leˇ haw-euˬ Niˇgawˇdeˬ kʼoeˇ gʼaˬ kʼawꞈ, muˇlaˬ hawˇ-eu aˇjawˬ keuˬ-awˇ jahˇ taˬ-euˬ mawˇ tawˆ tawˆ gaˇ zmˬ-eu tsiˇ yaw saw jeˬ nyiˬ tseˇ jawꞈ-i ehˇ gʼaˬ ni yuˇ-awˇ, Yoˇsehˆ nehˬ-ehˇ iˇ-euˬ meh.

⁴⁰Aˬ yawꞈ nyaꞈ Yeˬsuˇ-euˬ gʼawˇ mawˇ baꞈ-awˇ, tsiˇ yaw saw jeˬ kʼoeˇ byaˆ shehˬ byaˆ shehˬ-ehˇ, Yuˇdaˆ tsawˇ haˬ mawˇ tawˆ tawˆ-eu zahˇ sahˇ kʼoꞈ jaˆ-eu loꞈ-ehˇ, shawˇ jehˆ ni gʼeh-eu saˬ paˇ neh mawˇ tawˆ tawˆ-euˬ meh.

⁴¹Yeˬsuˇ-ahˇ laꞈ yaꞈ kʼoeˇ taˆ taꞈ sehꞈ-euˬ jawˇ duˬ dawˬ peh yaˇ kmˇ tiˬ kmˇ jaˆ-eu meh. Yaˇ kmˇ kʼoeˇ kmˇ laꞈ kʼoeˇ, tsawˇ haˬ tiˬ gʼaˬ-iˬ maˬ baꞈ pahˬ haw-euˬ lmˬ bymˇ lo kʼahˬ yaw shuiꞈ tiˬ kʼahˬ jaˆ-eu meh.

⁴²Jawˇ nah tah tehˬ le taˬ-euˬ uˬ taꞈ, lmˬ bymˇ kʼoeˇ hmˬ kʼawꞈ dawˬ peh jaˆ-eu miˇ neh, aˬ yawꞈ nyaꞈ Yeˬsuˇ-ahˇ kʼoeˇ gaˇ baꞈ pahˬ-euˬ meh.