Read Akha Yoˇhaˬ 7 Bible Online

Yoˇhaˬ 7 - Akha bible

Yoˇhaˬ 7

¹Kʼoeˇ naˇ, Gaˬliˬlehˇ miˇ kʼahˬ-ahˇ Yeˬsuˇ cah-euˬ meh. Yuˇdaˆ miˇ kʼahˬ-ahˇ aˬ yawꞈ maˬ cah mawꞈ-a. Aˬ jeˬ miˇ neh ehˇ naˇ, Yuˇdaˆ tsawˇ haˬ aˬ yuiꞈ aˬ tsu deuˬ aˬ yawꞈ-ahˇ sehꞈ mawꞈ-eu meh.

²Sehˬ gʼawˆ-euˬ Bawˬ-iˬ gʼeh-eu aˇ yamˬ peh laˇ-euˬ meh.

³Kʼoeˇ miˇ neh, aˬ yawꞈ-euˬ mehˇ nmˇ deuˬ aˬ yawꞈ-ahˇ ehˇ-eu, “Nawˬ-euˬ mehˬ nah caw teh-eu tsawˇ haˬ deuˬ nawˬ neh mˇ mehˬ-euˬ zahˬ leˇ paˬ-ehˇ gʼeh-eu gaˇ deuˬ-ahˇ ya mawˇ ni, heu gaˇ dzuˇ dzuˇ-ehˇ maˬ jawˇ ni Yuˇdaˆ miˇ kʼahˬ-ahˇ iˇ-awˬ.

⁴Yawˬ ha neh mˇ-euˬ jeˬ aˬ cawˬ-ahˇ bi siˬ bi mawˇ mawꞈ-eu tsawˇ haˬ-aˬ, yawˬ ha neh mˇ-euˬ jeˬ-ahˇ maˬ zaꞈ taˬ-aˇ. Nawˇ heu loꞈ-ehˇ gʼeh-eu gaˇ deuˬ mˇ luꞈ-eu-aˬ, nawˬ-euˬ gaˇ kawˆ miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ bi siˬ jiˇ-awˬ tawˇ.”

⁵Aˬ yawꞈ-euˬ uˇ pyehˆ mehˇ nmˇ deuˬ kʼawꞈ aˬ yawꞈ-ahˇ maˬ jah-a.

⁶Yeˬsuˇ aˬ yawꞈ-euˬ mehˇ nmˇ deuˬ-ahˇ ehˇ nehˬ-eu, “Ngaˬ-euˬ gʼaˇ duˬ aˇ yamˬ maˬ tsaˬ laˇ-aˬ siˬ. Nawˬ ha mehˇ nmˇ-euˬ gʼaˇ duˬ law nmˇ-aˬ, aˇ yamˬ maˬ tsaˬ laˇ-euˬ maˬ baw-a.

⁷Miˇ tsaˬ zaˬ deuˬ nawˬ ha mehˇ nmˇ-ahˇ muiˇ-eu gaˇ kawˆ maˬ jaˆ-a. Ehˇ kʼawꞈ, ngaˬ-ahˇ muiˇ meh. Aˬ jeˬ miˇ neh ehˇ naˇ, aˬ yawꞈ maꞈ-euˬ dehꞈ jeˬ dehꞈ kawˆ maˬ muiˬ gaˇ ngaˇ maˬ tsehˆ leˇ ni ehˇ luꞈ-eu miˇ neh meh.

⁸Bawˬ-iˬ gʼeh gaˇ nawˬ ha mehˇ nmˇ iˇ-awˬ. Ngaˇ maˬ iˇ. Aˬ jeˬ miˇ neh ehˇ naˇ, ngaˬ-euˬ gʼaˇ duˬ aˇ yamˬ maˬ tsaˬ laˇ-aˬ siˬ.”

⁹Yeˬsuˇ kʼoeˇ loꞈ-ehˇ ehˇ-awˇ, Gaˬliˬlehˇ miˇ kʼahˬ-ahˇ jawˇ yaꞈ-euˬ meh.

¹⁰Yeˬsuˇ-euˬ mehˇ nmˇ deuˬ Sehˬ gʼawˆ-euˬ bawˬ-iˬ-ahˇ iˇ dzeuˇ ngeh, Yeˬsuˇ jiˇ iˇ-euˬ meh. Ehˇ kʼawꞈ, aˬ yawꞈ bya cehˆ ni maˬ iˇ-ehˇ, ciˬ cuˇ ni iˇ kʼoeˬ-euˬ meh.

¹¹Yuˇdaˆ tsawˇ haˬ aˬ yuiꞈ aˬ tsu deuˬ, “Aˬ yawꞈ aˬ gaˇ jawˇ ta” lehˇ naˇ haˬ naˇ haˬ-ehˇ, Bawˬ-iˬ laꞈ kʼoeˇ Yeˬsuˇ-ahˇ poˆ luꞈ-eu meh.

¹²Tsawˇ haˬ aˇ maꞈ laꞈ kʼoeˇ, aˬ yawꞈ-euˬ gaˇ kawˆ gʼawˬ mya jeˬ ja kʼoeˬ luꞈ-eu meh. Tiˬ paˆ na deuˬ-aˬ, aˬ yawꞈ muiˬ-eu gaˇ kawˆ ja-eu meh. Tiˬ paˆ na deuˬ-aˬ, kʼoeˇ loꞈ-ehˇ maˬ ja ni, aˬ yawꞈ aˬ cawˬ-ahˇ gaˇ ma sheuˬ bahˬ-eu tsawˇ haˬ meh lehˇ ja-eu meh.

¹³Ehˇ kʼawꞈ, Yuˇdaˆ tsawˇ haˬ aˬ yuiꞈ aˬ tsu deuˬ-ahˇ gaˬ leˇ gaˇ guˆ-eu miˇ neh, tiˬ gʼaˬ-iˬ bya cehˆ ni maˬ ja doˆ peuˬ-a.

¹⁴Bawˬ-iˬ gʼeh-eu aˇ nah aˇ yamˬ tiˬ paˆ jiˇ leˇ ngeh, Yeˬsuˇ Uˬ duˬ tahˬ nymˇ nymˇ ma-ahˇ le-awˇ mehˬ nehˬ tsoˆ nehˬ leˇ-euˬ meh.

¹⁵Yuˇdaˆ tsawˇ haˬ aˬ yuiꞈ aˬ tsu deuˬ zahˬ leˇ-awˇ ehˇ-eu, “Tsawˇ haˬ heu gʼaˬ tiˬ jeˬ-iˬ maˬ ya dzaw haw-euˬ gaˇ, aˇ naˆ naˆ-ehˇ siˬ nya-eu nga teu.”

¹⁶Yeˬsuˇ ehˇ-eu, “Ngaˇ mehˬ-eu heu-aˬ, ngaˬ-euˬ dawˬ maˬ ngeuˇ. Ngaˬ-ahˇ kʼehˇ gʼeh leꞈ-euˬ Miˬyehˇ-euˬ dawˬ meh.

¹⁷Miˬyehˇ-euˬ nui kʼahˇ mˇ mawꞈ-eu tsawˇ haˬ aˬ geu gʼaˬ maˬ kaˬ, ngaˇ mehˬ-eu dawˬ heu Miˬyehˇ-euˬ dawˬ nga loˇ, ngaˬ-euˬ baoˬ-ahˇ gʼoe-awˇ mehˬ-eu tsoˆ-eu dawˬ nga loˇ lehˇ, tseˇ paˆ geuꞈ nya tehꞈ-a.

¹⁸Yawˬ ha-euˬ nui noeˬ ngehˬ-eu tmˇ-eu tsawˇ haˬ-aˬ, yawˬ ha yaw shehꞈ kʼahˬ sehˇ za ni mˇ-eu tehꞈ-a. Ehˇ kʼawꞈ, yawˬ ha-ahˇ kʼehˇ gʼeh leꞈ-euˬ Miˬyehˇ-euˬ yaw shehꞈ kʼahˬ sehˇ bi doˆ laˇ mawꞈ-eu gʼaˬ-aˬ, yaw sui yaw dawˇ jeˬ ahˇ-awˇ, yaw lehˬ tiˬ pawꞈ-iˬ maˬ ahˇ-a.

¹⁹Moˇseˬ neh naw maꞈ-ahˇ Zahˇ dawˬ kʼoꞈ dawˬ biꞈ yaꞈ-euˬ maˬ ngeuˇ-a loˇ. Ehˇ kʼawꞈ, naw maꞈ tiˬ gʼaˬ-iˬ Zahˇ dawˬ kʼoꞈ dawˬ-ahˇ maˬ caw teh-a. Aˬ jeˬ miˇ neh naw maꞈ ngaˬ-ahˇ sehꞈ-eu lehˇ leh jeh te.”

²⁰Tsawˇ haˬ aˇ maꞈ ehˇ-eu, “Nawˇ nehꞈ uˇ-eu ngaˇ. Aˬ suˇ gʼaˬ nawˬ-ahˇ sehꞈ-eu gʼeh nga lehˇ ehˇ te.”

²¹Yeˬsuˇ ehˇ-eu, “Ngaˇ zahˬ leˇ paˬ-ehˇ gʼeh-eu jeˬ mˇ mehˬ ngeh, naw maꞈ zahˬ leˇ-eu meh.

²²(Baˆ kʼoˆ mehˬ dzaˬ yehˬ-eu zahˇ-ahˇ Moˇsehˬ neh mˇ dahˬ beh-euˬ maˬ ngeuˇ-ehˇ, aˬ yawꞈ-euˬ mehˬ hu dehꞈ dzeuˇ yaꞈ-euˬ naw maꞈ-euˬ aˬ poeˬ aˬ bawˇ deuˬ neh mˇ dahˬ beh-euˬ kʼawꞈ,) naw maꞈ-euˬ aˬ li deuˬ-ahˇ baˆ kʼoˆ mehˬ dzaˬ yehˬ-eu gʼaˇ duˬ Moˇseˬ neh dawˬ biꞈ taˬ yaꞈ-euˬ miˇ neh, Jawˇ nah ngeh nah naw maꞈ-euˬ aˬ li deuˬ-ahˇ naw maꞈ baˆ kʼoˆ mehˬ dzaˬ yehˬ-eu meh.

²³Jawˇ nah ngeh nah aˬ li tiˬ li-ahˇ baˆ kʼoˆ mehˬ dzaˬ yehˬ-euˬ kʼoeˇ Zahˇ dawˬ kʼoꞈ dawˬ-ahˇ maˬ bahˬ-a lehˇ ngeuˇ naˇ, Jawˇ nah ngeh nah tsawˇ haˬ tiˬ gʼaˬ-euˬ gʼawˇ mawˇ mawˇ lah-ehˇ muiˬ laˇ ni ngaˬ neh laˆ taˬ nehˬ-euˬ gaˇ, naw maꞈ aˬ jeˬ miˇ neh nui ma pehˇ te.

²⁴Kʼoeˇ taˆ paw tehꞈ-ehˇ haw-awˇ daˇ-eu jeˬ-ahˇ byehˇ-awˇ, maˇ maˇ ni kʼaˇ ngeuˇ-eu loꞈ-ehˇ daˇ-awˬ.”

²⁵Yeˬluˇsaˬlehˬ meuˬ-ahˇ jawˇ-eu tsawˇ haˬ tiˬ paˆ na deuˬ ehˇ-eu, “Aˬ yuiꞈ aˬ tsu deuˬ sehꞈ-eu lehˇ poˆ luꞈ-eu kʼoeˇ heu gʼaˬ-ahˇ poˆ-eu maˬ ngeuˇ-a loˇ.

²⁶Haw sheˇ. Aˬ yawꞈ tsawˇ haˬ heu myaˆ ni gʼeh-eu mehˬ shi bya cehˆ ni dawˬ ngehˬ kʼawꞈ, aˬ yawꞈ maꞈ aˬ yawꞈ-ahˇ tiˬ jeˬ-iˬ maˬ ehˇ nehˬ nga tawˇ. Aˬ yawꞈ Meˬsiˇya pyeuꞈ-eu ngaˇ lehˇ aˬ yuiꞈ aˬ tsu deuˬ siˬ duˬ-eu miˇ neh nga loˇ.

²⁷Aˬ diˇ ehˇ naˇ, Meˬsiˇya oe ngeh, aˬ geu gaˇ neh oe-euˬ tsawˇ haˬ tiˬ gʼaˬ-iˬ maˬ ya siˬ-aˇ. Ehˇ kʼawꞈ, tsawˇ haˬ heu gʼaˬ aˬ gaˇ neh oe-euˬ aˬ dui maꞈ siˬ nya ma.”

²⁸Yeˬsuˇ Uˬ duˬ tahˬ nymˇ nymˇ ma laꞈ kʼoeˇ mehˬ nehˬ tsoˆ nehˬ luꞈ ngeh, teˇ saˇ yaw kʼaˆ-ehˇ heu loꞈ-ehˇ ehˇ-eu meh. “Ngaˇ aˬ suˇ gʼaˬ pyeuꞈ-awˇ aˬ gaˇ neh oe-euˬ naw maꞈ siˬ duˬ ma loˇ. Ngaˇ ngaˬ-euˬ nui noeˬ oe-euˬ maˬ ngeuˇ. Ngaˬ-ahˇ kʼehˇ gʼeh leꞈ-euˬ gʼaˬ-aˬ, yaw tsawˬ yaw dawˇ meh. Naw maꞈ aˬ yawꞈ-ahˇ maˬ siˬ nya-a.

²⁹Ehˇ kʼawꞈ, ngaˇ aˬ yawꞈ-ahˇ siˬ nya ma. Aˬ jeˬ miˇ neh ehˇ naˇ, ngaˇ aˬ yawꞈ jawˇ gaˇ neh oe-awˇ, aˬ yawꞈ neh ngaˬ-ahˇ kʼehˇ gʼeh leꞈ-euˬ meh.”

³⁰Kʼoeˇ ngeh, aˬ yawꞈ maꞈ aˬ yawꞈ-ahˇ nyehꞈ-eu lehˇ gʼeh-eu meh. Ehˇ kʼawꞈ, aˬ yawꞈ-euˬ aˇ yamˬ maˬ keuˆ le dah-euˬ miˇ neh aˬ yawꞈ-ahˇ tiˬ gʼaˬ-iˬ maˬ nyehꞈ nya-a.

³¹Ehˇ kʼawꞈ, tsawˇ haˬ aˇ maꞈ laꞈ kʼoeˇ gʼawˬ mya ni aˬ yawꞈ-ahˇ jah laˇ-awˇ, heu loꞈ-ehˇ ehˇ-eu meh. “Meˬsiˇya oe ngeh, tsawˇ haˬ heu gʼaˬ naˆ maˬ tseˇ zahˬ leˇ paˬ-ehˇ gʼeh-eu jeˬ mˇ mehˬ laꞈ nya tehꞈ-a lehˇ duˇ te loˇ.”

³²Tsawˇ haˬ aˇ maꞈ kʼoeˇ loꞈ-ehˇ ja kʼoeˬ luꞈ gaˇ Paˬliˬsehˇ deuˬ ya gaˬ-euˬ meh. Kʼoeˇ miˇ neh, piˇ ma aˬ yuiꞈ deuˬ hawˇ-eu Paˬliˬsehˇ deuˬ bawˬ dzaˬ-awˇ, Yeˬsuˇ-ahˇ bi nyehꞈ-eu gʼaˇ duˬ kʼehˇ gʼeh-euˬ meh.

³³Yeˬsuˇ ehˇ-eu, “Ngaˇ naw maꞈ nehˬ-ehˇ tiˬ kʼehˬ jawˇ gʼaˬ naˇ, ngaˬ-ahˇ kʼehˇ gʼeh leꞈ-euˬ gʼaˬ jawˇ gaˇ gʼoꞈ leˇ ma.

³⁴Naw maꞈ ngaˬ-ahˇ poˆ tehꞈ-a. Ehˇ kʼawꞈ, maˬ poˆ mawˇ nya-aˇ. Aˬ jeˬ miˇ neh ehˇ naˇ, ngaˇ jawˇ gaˇ naw maꞈ maˬ laˇ keuˆ nya-a.”

³⁵Yuˇdaˆ tsawˇ haˬ aˬ yuiꞈ aˬ tsu deuˬ yaw kaˬ heu loꞈ-ehˇ ja-eu meh. “Aˬ dui maꞈ aˬ yawꞈ-ahˇ maˬ poˆ mawˇ nya paˬ-ehˇ aˬ yawꞈ aˬ gaˇ iˇ-eu lehˇ nga. Heˬlaˬsaˇ tsawˇ haˬ-euˬ meuˬ deuˬ-ahˇ jawˇ-iˇ-euˬ aˬ dui-euˬ tsawˇ jeuˬ jawˇ gaˇ iˇ-awˇ, Heˬlaˬsaˇ tsawˇ haˬ deuˬ-ahˇ mehˬ-iˇ tsoˆ-iˇ-eu lehˇ nga loˇ.

³⁶Aˬ dui maꞈ aˬ yawꞈ-ahˇ poˆ kʼawꞈ maˬ poˆ mawˇ nya-ehˇ, aˬ yawꞈ jawˇ gaˇ aˬ dui maꞈ maˬ le keuˆ nya-aˇ lehˇ aˬ yawꞈ ehˇ-eu kʼoeˇ aˬ jeˬ ehˇ mawˬ-eu nga.”

³⁷Sehˬ gʼawˆ-euˬ Bawˬ-iˬ gʼeh-eu aˇ saˬ saˬ-eu aˇ nah pyeuꞈ-eu huiˬ dui dui-eu aˇ nah kʼoeˇ nah-ahˇ, Yeˬsuˇ tuˇ -awˇ, teˇ saˇ yaw kʼaˆ kʼaˆ-ehˇ -ehˇ-eu, “Iˇ cuꞈ kʼaˇ mehꞈ-eu tsawˇ haˬ ngaˇ jawˇ gaˇ laˇ-awˇ dawˇ laˇ-awˬ.

³⁸Jaˇliꞈ laꞈ kʼoeˇ ehˇ taˬ-euˬ loꞈ-ehˇ, ‘Ngaˬ-ahˇ kʼaˇ jah-eu tsawˇ haˬ-euˬ nui ma laꞈ kʼoeˇ dehꞈ-eu saꞈ laˇ biꞈ-eu iˇ cuꞈ lawˇ gawˆ yoeˇ doˆ le tehꞈ-a.”’

³⁹Yeˬsuˇ kʼoeˇ loꞈ-ehˇ ehˇ-eu-aˬ, aˬ yawꞈ-ahˇ kʼaˇ jah-eu tsawˇ haˬ deuˬ Yaw sahˇ Miˬyehˇ za gaˇ ehˇ mawꞈ-eu meh. Aˇ yamˬ kʼoeˇ yamˬ-ahˇ keuˆ ni Yaw sahˇ Miˬyehˇ maˬ biꞈ leꞈ-aˬ siˬ. Aˬ jeˬ miˇ neh ehˇ naˇ, Yeˬsuˇ-ahˇ yaw shehꞈ kʼahˬ sehˇ laꞈ kʼoeˇ maˬ ciˬ daˆ kʼoꞈ leꞈ-aˬ siˬ.

⁴⁰Yeˬsuˇ kʼoeˇ loꞈ-ehˇ ehˇ gaˇ ya gaˬ ngeh, tsawˇ haˬ aˇ maꞈ laꞈ kʼoeˇ tiˬ paˆ na deuˬ ehˇ-eu, “Tsawˇ haˬ teu gʼaˬ aˬ diˇ aˬ maˇ Miˬyehˇ gʼaˇ duˬ ngeh dah-eu tsawˇ naˬ ngaˇ.”

⁴¹Yawˬ deuˬ yawˬ ehˇ-eu, “Aˬ yawꞈ Meˬsiˇya ngaˇ.” Ehˇ kʼawꞈ, tiˬ deuˬ paˇ ehˇ-eu, “Meˬsiˇya Gaˬliˬlehˇ miˇ kʼahˬ-ahˇ neh maˬ oe-aˇ.

⁴²Meˬsiˇya-aˬ, Daˬbiˇ-euˬ zaˬ deuˬ uˆ deuˬ laꞈ kʼoeˇ doˆ le-ꞈ awˇ, Daˬbiˇ-euˬ meuˬ pyeuꞈ-eu Behˬlehˬhehˬ meuˬ-ahˇ dehꞈ le tehꞈ-a lehˇ, Jaˇliꞈ laꞈ kʼoeˇ ehˇ taˬ-euˬ maˬ ngeuˇ-a loˇ.”

⁴³Tsawˇ haˬ aˇ maꞈ kʼoeˇ maꞈ, Yeˬsuˇ gaˇ kawˆ tiˬ gʼaˬ tiˬ jeˬ kʼoeˇ loꞈ-ehˇ noeˬ-eu meh.

⁴⁴Tiˬ paˆ na deuˬ aˬ yawꞈ-ahˇ nyehꞈ mawꞈ-eu meh. Ehˇ kʼawꞈ, a yawꞈ-ahˇ tiˬ gʼaˬ-iˬ maˬ nyehꞈ nya-a.

⁴⁵Yehˇ kʼoeˇ deuˬ gʼoꞈ keuˆ leˇ ngeh, piˇ ma aˬ yuiꞈ deuˬ hawˇ-eu Paˬliˬsehˇ deuˬ ehˇ-eu, “Aˬ jeˬ miˇ neh naw maꞈ aˬ yawꞈ-ahˇ maˬ nyehꞈ laꞈ teˬ.”

⁴⁶Yehˇ kʼoeˇ deuˬ ehˇ-eu, “Tsawˇ haˬ tiˬ gʼaˬ-iˬ tsawˇ haˬ heu gʼaˬ loꞈ-ehˇ dawˬ ngehˬ-eu maˬ gaˬ haw-aˬ.”

⁴⁷Paˬliˬsehˇ deuˬ ehˇ-eu, “Naw maꞈ gʼeh aˬ yawꞈ neh paˇ bi laˆ jah teˬ loˇ.

⁴⁸Aˬ yuiꞈ aˬ tsu deuˬ hawˇ-eu Paˬliˬsehˇ deuˬ laꞈ kʼoeˇ aˬ yawꞈ-ahˇ jah-eu tsawˇ haˬ tiˬ gʼaˬ na mawˇ haw teˬ loˇ.

⁴⁹Haw taˬ-awˬ. Tsawˇ haˬ aˇ maꞈ kʼoeˇ maꞈ Moˇseˬ-euˬ Zahˇ dawˬ kʼoꞈ dawˬ maˬ siˬ nya-eu miˇ neh Miˬyehˇ neh yaˬ kʼehˇ bi yaˬ tehꞈ-a.”

⁵⁰Yaw beh Yeˬsuˇ jawˇ gaˇ iˇ-euˬ Niˇgawˇdeˬ lehˇ myahˇ-euˬ kʼoeˇ gʼaˬ kʼawꞈ, Paˬliˬsehˇ kʼoeˇ deuˬ laꞈ kʼoeˇ ahˇ-eu meh.

⁵¹Aˬ yawꞈ ehˇ-eu, “Aˬ dui-euˬ Zahˇ dawˬ kʼoꞈ dawˬ-ahˇ tsaˬ ni ya ehˇ naˇ, tsawˇ haˬ tiˬ gʼaˬ-ahˇ, aˬ yawꞈ neh ngehˬ-euˬ dawˬ maˬ ya gaˬ duˬ-ehˇ, aˬ yawꞈ neh mˇ-euˬ gaˇ deuˬ-ahˇ maˬ ya siˬ duˬ kʼoeˇ keuˆ ni, aˬ yawꞈ-ahˇ yaˇ kʼaˬ maˬ daˇ nya-aˇ.”

⁵²Aˬ yawꞈ maꞈ aˬ yawꞈ-ahˇ ehˇ-eu, “Nawˇ gʼeh Gaˬliˬlehˇ miˇ kʼahˬ-ahˇ neh oe-euˬ tsawˇ haˬ te loˇ. Jaˇliꞈ-ahˇ gui duˬ haw sheˇ. Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ-iˬ Gaˬliˬlehˇ miˇ kʼahˬ-ahˇ neh maˬ doˆ le haw-euˬ nawˇ ya siˬ duˬ tehꞈ-a.”

⁵³Kʼoeˇ loꞈ-ehˇ ehˇ gʼaˬ ngeh jawˇ, aˬ yawꞈ maꞈ yawˬ gʼaˬ na luꞈ gʼoꞈ-iˇ jiˇ-euˬ meh.