Read Akha Yoˇhaˬ 9 Bible Online

Yoˇhaˬ 9 - Akha bible

Yoˇhaˬ 9

¹Yeˬsuˇ iˇ luꞈ ngeh, dehꞈ le ngeh neh myaˆ behꞈ behꞈ-eu tsawˇ haˬ tiˬ gʼaˬ-ahˇ ya mawˇ-euˬ meh.

²Aˬ yawꞈ-euˬ zaˬ lahˇ deuˬ aˬ yawꞈ-ahˇ ehˇ-eu, “Saˬ laˬ-oˇ, aˬ yawꞈ dehꞈ le ngeh neh myaˆ behꞈ behꞈ-eu teu aˬ suˇ gʼaˬ-euˬ iˬ baˇ baˬ da neh gʼeh ta. Aˬ yawꞈ-euˬ iˬ baˇ baˬ da neh nga loˇ. Aˬ da aˬ ma-euˬ iˬ baˇ baˬ da neh nga loˇ.”

³Yeˬ suˇ ehˇ-eu, “Aˬ yawꞈ myaˆ behꞈ behꞈ-eu kʼoeˇ-aˬ, aˬ yawꞈ-euˬ iˬ baˇ baˬ da neh maˬ ngeuˇ-a. Aˬ da aˬ ma euˬ iˬ baˇ baˬ da neh kʼawꞈ maˬ ngeuˇ-a. Miˬyehˇ tehꞈ-ehˇ mˇ nya-eu zahˬ leˇ paˬ-ehˇ gʼeh-eu jeˬ-ahˇ aˬ cawˬ ya mawˇ ni aˬ yawꞈ myaˆ behꞈ behꞈ-eu jeˬ pyeuꞈ-eu meh.

⁴Uˬ ciꞈ maˬ ciꞈ le kʼoeˇ keuˆ ni, ngaˬ-ahˇ kʼehˇ gʼeh leꞈ-euˬ gʼaˬ-euˬ gaˇ-ahˇ aˬ dui ya mˇ meh. Tsawˇ haˬ tiˬ gʼaˬ-iˬ gaˇ maˬ mˇ nya-eu uˬ ciꞈ aˇ yamˬ keuˆ le luꞈ meh.

⁵Ngaˇ miˇ tsaˬ kʼoeˇ taˆ kʼaˇ jawˇ kʼoeˇ keuˆ ni, miˇ tsaˬ-euˬ yaw shehꞈ pyeuꞈ-eu ma.”

⁶Yeˬsuˇ kʼoeˇ loꞈ-ehˇ ehˇ gʼaˬ-awˇ, miˇ tsaˬ-ahˇ duˬ kʼaˬ kʼa shehˬ-awˇ shaˬ jehˆ laˆ pyeuꞈ-euˬ meh. Kʼoeˇ naˇ, tsawˇ haˬ kʼoeˇ gʼaˬ-euˬ myaˆ nuiˆ-ahˇ lehꞈ nehˬ-awˇ,

⁷“Siˇlamˬ lah-ahˇ myaˆ duꞈ puꞈ shawˇ-iˇ-awˬ” lehˇ ehˇ nehˬ-euˬ meh. (Siˇlamˬ lehˇ ehˇ-eu dawˬ tsuiꞈ-aˬ, ‘Kʼehˇ gʼeh-euˬ’ lehˇ ehˇ mawꞈ-eu meh.) Kʼoeˇ ngeh, tsawˇ haˬ kʼoeˇ gʼaˬ myaˆ duꞈ puꞈ shawˇ-iˇ-awˇ, myaˆ nuiˆ mawˇ laˇ-awˇ gʼoꞈ laˇ-euˬ meh.

⁸Aˬ yawꞈ-ahˇ nymˇ kaˬ taꞈ-eu deuˬ hawˇ-eu, yaw beh aˬ yawꞈ hawˬ shaˇ shaˇ dzaˬ ngeh mawˇ-euˬ tsawˇ haˬ deuˬ, “Tsawˇ haˬ heu gʼaˬ nuiˇ nuiˇ-ehˇ hawˬ shaˇ shaˇ dzaˬ-euˬ kʼoeˇ gʼaˬ maˬ ngeuˇ nga loˇ” lehˇ ehˇ-eu meh.

⁹Tiˬ paˆ na deuˬ-aˬ, “Ngeuˇ ngaˇ” lehˇ ehˇ-eu meh. Ehˇ kʼawꞈ, tiˬ paˆ na deuˬ-aˬ, “Maˬ ngeuˇ nga. Aˬ yawꞈ-ahˇ duˇ leˇ-eu yawˬ gʼaˬ yawˬ nga” lehˇ ehˇ-eu meh. Kʼoeˇ ngeh, tsawˇ haˬ kʼoeˇ gʼaˬ aˬ yawꞈ maꞈ-ahˇ, “Hawˬ shaˇ shaˇ dzaˬ-euˬ kʼoeˇ gʼaˬ ngaˇ ma” lehˇ ehˇ duˬ nehˬ-euˬ meh.

¹⁰Aˬ yawꞈ maꞈ aˬ yawꞈ-ahˇ ehˇ-eu, “Nawˇ aˬ joˆ-ehˇ jahˇ-awˇ myaˆ nuiˆ paˇ mawˇ laˇ teˬ.”

¹¹Aˬ yawꞈ ehˇ-eu, “Yeˬsuˇ lehˇ myahˇ-euˬ gʼaˬ neh shaˬ jehˆ ui cuiˆ jahˇ-awˇ, ngaˬ-euˬ myaˆ nuiˆ-ahˇ lehꞈ nehˬ laꞈ-awˇ, ‘Siˇlamˬ lah-ahˇ myaˆ duꞈ puꞈ shawˇ-iˇ-awˬ’ lehˇ ehˇ nehˬ laꞈ-euˬ meh. Ngaˇ iˇ-awˇ myaˆ duꞈ puꞈ-euˬ nehˬ-ehˇ, tiˬ poˆ tehꞈ-ehˇ myaˆ nuiˆ mawˇ laˇ-euˬ miˇ-a.”

¹²Aˬ yawꞈ maꞈ aˬ yawꞈ-ahˇ “Aˬ yawꞈ aˬ gaˇ jawˇ ta” lehˇ naˇ haˬ ngeh, “Ngaˇ maˬ siˬ” lehˇ aˬ yawꞈ ehˇ kʼoꞈ nehˬ-euˬ meh.

¹³Kʼoeˇ naˇ, yaw beh myaˆ behꞈ behꞈ-euˬ tsawˇ haˬ kʼoeˇ gʼaˬ-ahˇ, Paˬliˬsehˇ deuˬ jawˇ gaˇ aˬ yawꞈ maꞈ sheuˬ gʼeh-euˬ meh.

¹⁴Yeˬsuˇ neh shaˬ jehˆ jahˇ-awˇ aˬ yawꞈ-euˬ myaˆ nuiˆ mawˇ laˇ nya ni laˆ taˬ nehˬ-euˬ aˇ nah kʼoeˇ nah-aˬ, Jawˇ nah pyeuꞈ-eu meh.

¹⁵Aˬ joˆ-ehˇ jahˇ-awˇ myaˆ nuiˆ mawˇ laˇ-euˬ gaˇ kawˆ, tsawˇ haˬ kʼoeˇ gʼaˬ-ahˇ Paˬliˬsehˇ deuˬ paˇ naˇ haˬ-euˬ meh. Aˬ yawꞈ ehˇ-eu, “Aˬ yawꞈ ngaˬ-euˬ myaˆ nuiˆ-ahˇ shaˬ jehˆ lehꞈ nehˬ laꞈ-awˇ, ngaˇ myaˆ duꞈ puꞈ shawˇ-iˇ ngeh, myaˆ nuiˆ mawˇ laˇ-euˬ ma.”

¹⁶Paˬliˬsehˇ tsawˇ haˬ tiˬ paˆ na deuˬ ehˇ-eu, “Myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ Miˬyehˇ jawˇ gaˇ neh oe-euˬ tsawˇ haˬ maˬ ngeuˇ luꞈ-a. Aˬ jeˬ miˇ neh ehˇ naˇ, Jawˇ nah-ahˇ ya lah ya daw-eu zahˇ sahˇ kʼoꞈ-ahˇ maˬ caw teh ni, maˬ mˇ kʼmˬ-eu jeˬ aˬ yawꞈ mˇ-euˬ nga.” Ehˇ kʼawꞈ, tiˬ paˆ na deuˬ ehˇ-eu, “Iˬ baˇ zaˬ tiˬ gʼaˬ heu naˆ naˆ-ehˇ zahˬ lehˇ paˬ-ehˇ gʼeh-eu jeˬ aˬ joˆ-ehˇ mˇ nya ta.” Aˬ yawꞈ maꞈ kʼoeˇ loꞈ-ehˇ tiˬ gʼaˬ tiˬ jeˬ noeˬ-eu meh.

¹⁷Kʼoeˇ naˇ, Paˬliˬsehˇ kʼoeˇ deuˬ tsawˇ haˬ kʼoeˇ gʼaˬ-ahˇ heu loꞈ-ehˇ paˇ naˇ haˬ-euˬ meh. “Nawˬ-euˬ myaˆ nuiˆ mawˇ laˇ ni aˬ yawꞈ neh jahˇ nehˬ laꞈ-euˬ meh lehˇ nawˇ ehˇ-eu-aˬ, aˬ yawꞈ-ahˇ nawˇ aˬ joˆ-ehˇ noeˬ-eu nya.” Tsawˇ haˬ kʼoeˇ gʼaˬ ehˇ-eu, “Aˬ yawꞈ-aˬ, Miˬyehˇ gʼaˇ duˬ ngehˬ dah-eu tsawˇ haˬ meh.”

¹⁸Yuˇdaˆ tsawˇ haˬ aˬ yuiꞈ aˬ tsu deuˬ-aˬ, tsawˇhaˬ kʼoeˇ gʼaˬ-euˬ aˬ da aˬ ma-ahˇ kuˇ-awˇ maˬ naˇ haˬ duˬ kʼoeˇ keuˆ ni, yaw beh aˬ yawꞈ myaˆ behꞈ behꞈ-awˇ nymˬ-mˇ mawˇ laˇ-euˬ meh lehˇ ehˇ gaˇ maˬ jah-a.

¹⁹Aˬ yawꞈ maꞈ aˬ yawꞈ nyaꞈ-ahˇ naˇ haˬ-eu, “Aˬ yawꞈ naw nyaꞈ-euˬ zaˬ ngeuˇ ma loˇ. Aˬ yawꞈ dehꞈ le ngeh neh myaˆ behꞈ behꞈ-eu meh lehˇ naw nyaꞈ ehˇ-eu meh. Toˆ-ehˇ ngeuˇ naˇ, nymˬ-mˇ aˬ yawꞈ aˬ joˆ-ehˇ myaˆ nuiˆ paˇ mawˇ laˇ nya taˬ.”

²⁰Aˬ yawꞈ-euˬ aˬ da aˬ ma ehˇ-eu, “Nga nyaꞈ-euˬ zaˬ ma. Dehꞈ le ngeh neh myaˆ behꞈ meh lehˇ nga nyaꞈ siˬ duˬ-eu ma.

²¹Ehˇ kʼawꞈ, nymˬ-mˇ aˬ yawꞈ aˬ joˆ-ehˇ jahˇ-awˇ myaˆ nuiˆ paˇ mawˇ laˇ-euˬ gaˇ kawˆ hawˇ-eu, aˬ suˇ gʼaˬ neh myaˆ nuiˆ laˆ dahˇ nehˬ-euˬ gaˇ kawˆ nga nyaꞈ maˬ siˬ nya nya. Aˬ yawꞈ-ahˇ naˇ haˬ-awˬ. Aˬ yawꞈ huiˬ laˇ-euˬ meh. Aˬ yawˇ yawꞈ ja mehˬ nehˬ laꞈ nya tehꞈ-a.”

²²Aˬ da aˬ ma kʼoeˇ nyiˬ gʼaˬ Yuˇdaˆ tsawˇ haˬ aˬ yuiꞈ aˬ tsu deuˬ-ahˇ guˆ-eu miˇ neh kʼoeˇ loꞈ-ehˇ ehˇ-eu meh. Aˬ jeˬ miˇ neh ehˇ naˇ, Yeˬsuˇ-ahˇ Meˬsiˇya meh lehˇ kʼaˇ jah-eu tsawˇ haˬ deuˬ-ahˇ, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni teh dzeh-eu gʼaˇ duˬ, Yuˇdaˆ tsawˇ haˬ aˬ yuiꞈ aˬ tsu deuˬ neh bawˬ tsehˆ taˬ-euˬ meh.

²³Kʼoeˇ miˇ neh, “Aˬ yawꞈ huiˬ laˇ-euˬ meh. Aˬ yawꞈ-ahˇ naˇ haˬ-awˬ” lehˇ, aˬ yawꞈ nyaꞈ ehˇ-eu meh.

²⁴Dehꞈ le ngeh neh myaˆ behꞈ behꞈ-euˬ tsawˇ haˬ kʼoeˇ gʼaˬ-ahˇ aˬ yawꞈ maꞈ tiˬ poˆ paˇ kuˇ-awˇ ehˇ nehˬ-eu, “Nawˇ dawˇ coe ni ehˇ ma lehˇ Miˬyehˇ mehˬ shi kamˬ-awˬ. Nawˬ-ahˇ myaˆ nuiˆ mawˇ laˇ ni jahˇ nehˬ-euˬ kʼoeˇ gʼaˬ iˬ baˇ zaˬ meh lehˇ nga maꞈ siˬ nya ma.”

²⁵Tsawˇ haˬ kʼoeˇ gʼaˬ ehˇ-eu, “Aˬ yawꞈ iˬ baˇ zaˬ ngeuˇ-eu maˬ ngeuˇ-eu kʼoeˇ law nmˇ-aˬ ngaˇ maˬ siˬ. Ngaˇ siˬ nya-eu-aˬ, yaw beh ngaˇ myaˆ behꞈ behꞈ-euˬ kʼawꞈ, nymˬ-mˇ myaˆ nuiˆ mawˇ laˇ-euˬ heu tiˬ hmˬ tehꞈ ma.”

²⁶Aˬ yawꞈ maꞈ ehˇ-eu, “Aˬ yawꞈ nawˬ-ahˇ aˬ jeˬ jahˇ nehˬ laꞈ taˬ. Nawˇ myaˆ behꞈ behꞈ-eu mawˇ nya laˇ ni aˬ joˆ-ehˇ laˆ taˬ nehˬ laꞈ taˬ.”

²⁷Tsawˇ haˬ kʼoeˇ gʼaˬ ehˇ-eu, “Ngaˇ naw maꞈ-ahˇ ehˇ nehˬ gʼa-euˬ ma tawˇ. Aˬ jeˬ miˇ neh paˇ gaˬ poˆ mawꞈ-eu nya. Naw maꞈ jiˇ aˬ yawꞈ-euˬ zaˬ lahˇ geuꞈ mawꞈ-eu nya loˇ.”

²⁸Kʼoeˇ ngeh, aˬ yawꞈ maꞈ aˬ yawꞈ-ahˇ yaˬ kʼehˇ yaˬ-awˇ ehˇ-eu, “Nawˇ-aˬ, tsawˇ haˬ kʼoeˇ gʼaˬ-euˬ zaˬ lahˇ ngaˇ. Nga maꞈ-aˬ, Moˇseˬ-euˬ zaˬ lahˇ ma.

²⁹Moˇseˬ-ahˇ Miˬyehˇ dawˬ ngehˬ cawˬ-euˬ nga maꞈ siˬ nya ma. Ehˇ kʼawꞈ, tsawˇ haˬ kʼoeˇ gʼaˬ aˬ gaˇ neh doˆ le-euˬ jiˇ nga maꞈ maˬ siˬ.”

³⁰Myaˆ nuiˆ mawˇ laˇ-euˬ tsawˇ haˬ kʼoeˇ gʼaˬ ehˇ-eu, “Naw maꞈ ngehˬ-eu dawˬ teu dawˬ-ahˇ ngaˇ zahˬ dui dui leˇ nya. Aˬ yawꞈ ngaˬ-ahˇ myaˆ nuiˆ bi mawˇ laˇ ngeh keuˆ ni, aˬ yawꞈ aˬ gaˇ neh oe-euˬ naw maꞈ maˬ siˬ nya nya lehˇ la.

³¹Iˬ baˇ zaˬ-euˬ shaˇ dawˬ-ahˇ Miˬyehˇ maˬ naˇ haˬ-a lehˇ aˬ dui siˬ nya ma. Ehˇ kʼawꞈ, aˬ yawꞈ-ahˇ yaw zeu baw-awˇ, aˬ yawꞈ-euˬ nui kʼahˇ mˇ-eu deuˬ-euˬ shaˇ dawˬ-ahˇ naˇ haˬ nehˬ meh.

³²Mˬ beh miˇ beh ngeh neh iˬ nah keuˆ ni, myaˆ behꞈ behꞈ-eu tsawˇ haˬ-ahˇ myaˆ nuiˆ mawˇ laˇ ni jahˇ nehˬ nya-eu tsawˇ haˬ tiˬ gʼaˬ-iˬ maˬ gaˬ haw-aˬ siˬ.

³³Tsawˇ haˬ kʼoeˇ gʼaˬ Miˬyehˇ jawˇ gaˇ neh oe-euˬ maˬ ngeuˇ law nmˇ-aˬ, tiˬ jeˬ-iˬ maˬ jahˇ nya-aˇ.”

³⁴Aˬ yawꞈ maꞈ aˬ yawꞈ-ahˇ ehˇ-eu, “Nawˇ loꞈ-ehˇ gʼeh-eu iˬ baˇ laꞈ kʼoeˇ dehꞈ le-awˇ huiˬ laˇ-euˬ tsawˇ haˬ tiˬ gʼaˬ nga maꞈ-ahˇ paˇ mehˬ paˇ tsoˆ-eu gʼeh te loˇ.” Kʼoeˇ naˇ, aˬ yawꞈ-ahˇ Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni teh dzeh nehˬ-euˬ meh.

³⁵Tsawˇ haˬ kʼoeˇ gʼaˬ-ahˇ teh dzeh nehˬ-euˬ gaˇ kawˆ Yeˬsuˇ ya gaˬ ngeh, aˬ yawꞈ-ahˇ poˆ mawˇ-awˇ, “Tsawˇ haˬ-euˬ Zaˬmaˇ-ahˇ nawˇ jah ma loˇ” lehˇ naˇ haˬ-euˬ meh.

³⁶Tsawˇ haˬ kʼoeˇ gʼaˬ ehˇ-eu, “Saˬ laˬ-oˇ, aˬ yawꞈ-ahˇ ngaˇ jah nya ni aˬ yawꞈ aˬ suˇ gʼaˬ-a lehˇ tiˬ poˆ ehˇ nehˬ laꞈ-awˬ.”

³⁷Yeˬsuˇ aˬ yawꞈ-ahˇ ehˇ nehˬ-eu, “Nawˇ aˬ yawꞈ-ahˇ tahˬ puˬ gʼaˬ-euˬ meh. Nymˬ-mˇ nawˬ-ahˇ ngehˬ cawˬ luꞈ-eu gʼaˬ aˬ yawꞈ meh.”

³⁸Kʼoeˇ ngeh jawˇ, tsawˇ haˬ kʼoeˇ gʼaˬ “Sahˬ paˬ-oˇ, ngaˇ jah ma” lehˇ ehˇ-awˇ, Yeˬsuˇ-euˬ mehˬ shi pawˬ tsuiꞈ pawˬ dmˬ dmˬ-euˬ meh.

³⁹Yeˬsuˇ ehˇ-eu, “Myaˆ behꞈ deuˬ-ahˇ myaˆ nuiˆ bi mawˇ laˇ-awˇ, myaˆ nuiˆ mawˇ luꞈ-eu deuˬ myaˆ behꞈ bi behꞈ-iˇ ni yaˇ kʼaˬ daˇ-eu gʼaˇ duˬ, miˇ tsaˬ heu kʼoeˇ taˆ ngaˇ oe-euˬ ma.”

⁴⁰Kʼoeˇ gaˇ jawˇ-eu Paˬliˬsehˇ tiˬ paˆ na deuˬ aˬ yawꞈ kʼoeˇ loꞈ-ehˇ ehˇ gaˇ ya gaˬ ngeh, “Nga maꞈ-ahˇ myaˆ behꞈ nga lehˇ nawˇ ehˇ mawꞈ-eu maˬ ngeuˇ-eu paˬ” lehˇ ehˇ-eu meh.

⁴¹Yeˬsuˇ ehˇ-eu, “Naw maꞈ myaˆ behꞈ law nmˇ-aˬ, iˬ baˇ maˬ ahˇ-aˇ. Ehˇ kʼawꞈ, naw maꞈ myaˆ nuiˇ mawˇ nya ma lehˇ yawˬ haˇ yawˬ ha ehˇ-eu miˇ neh, iˬ baˇ ahˇ-eu meh.”