Read Akha Gʼaˬkʼehˇ 13 Bible Online

Gʼaˬkʼehˇ 13 - Akha bible

Gʼaˬkʼehˇ 13

¹Aˬdiˇawˬ Ka li zaˬ aˇ muˇ laꞈ kʼoeˇ, Miˬyehˇ gʼaˇ duˬ ngehˬ dah-eu deuˬ hawˇ-eu mehˬ-eu tsoˆ-eu saˬ laˬ deuˬ jawˇ-eu meh. Tsawˇ haˬ kʼoeˇ deuˬ-aˬ, Baˬnaˬbaˇ, Niˇgaˬ lehˇ kuˇ-eu Suˇmoˬ, Kuˇleˬniˬ miˇ kʼahˬ-ahˇ neh laˇ-euˬ Luˇgiˇ, sahˬ paˬ Heˬloˆ[13] nehˬ-ehˇ tiˬ kawˆ loꞈ-ehˇ huiˬ laˇ-euˬ Maˬneˬ hawˇ-eu, Sawˇluˆ aˬ ha maꞈ meh.

²Aˬ yawꞈ maꞈ maˬ dzaˬ-eu zahˇ jahˇ-awˇ Sahˬpaˬ Miˬyehˇ-ahˇ uˬ duˬ tahˬ tahˬ-ehˇ jawˇ ngeh, Muiˬ-eu shawˇ-eu Yaw sahˇ Miˬyehˇ aˬ yawꞈ maꞈ-ahˇ ehˇ-eu, “Ngaˬ neh a yawꞈ nyaꞈ-ahˇ bi mˇ-eu lehˇ kuˇ-euˬ gaˇ deuˬ-ahˇ bi mˇ-eu gʼaˇ duˬ, Baˬnaˬbaˇ hawˇ-eu Sawˇluˆ aˬ ha nyaꞈ-ahˇ tseˇ doˆ-awˇ bi jawˇ-awˬ.”

³Kʼoeˇ ngeh, aˬ yawꞈ maꞈ maˬ dzaˬ-eu zahˇ jahˇ-awˇ guiˬ lahˬ shaˇ-eu laꞈ kʼoeˇ, aˬ yawꞈ nyaꞈ kʼoeˇ taˆ aˬ laꞈ baꞈ daˆ nehˬ-awˇ kʼehˇ gʼeh-euˬ meh.

⁴Muiˬ-eu shawˇ-eu Yaw sahˇ Miˬyehˇ neh kʼehˇ gʼeh-euˬ loꞈ-ehˇ Baˬnaˬbaˇ hawˇ-eu Sawˇluˆ aˬ nyaꞈ Seˬluˇgiˇ meuˬ-ahˇ iˇ-awˇ, kʼoeˇ gaˇ neh naˇ, Guˇbaˬluˇ iˇ jaw lahˇ-ahˇ lawˬ dziˬ-awˇ iˇ-euˬ meh.

⁵Aˬ yawꞈ nyaꞈ Saˬlaˬmiˇ meuˬ-ahˇ iˇ keuˆ ngeh, uˬ duˬ tahˬ nymˇ doe ni Miˬyehˇ dawˬ kawˬ mehˬ nehˬ-euˬ meh. Aˬ yawꞈ nyaꞈ-ahˇ caw ba-eu gʼaˇ duˬ, Yoˇhaˬ kʼawꞈ jawˇ-eu meh.

⁶Aˬ yawꞈ maꞈ iˇ jaw lahˇ kʼoeˇ caw caw-ehˇ iˇ-awˇ, Baˬpuˇ meuˬ-ahˇ iˇ keuˆ ngeh, Baˬyeˬsuˇ lehˇ myahˇ-euˬ maw loˬ nya-eu Yuˇdaˆ tsawˇ haˬ tiˬ gʼaˬ-ahˇ tahˬ puˬ-euˬ meh. Tsawˇ haˬ kʼoeˇ gʼaˬ aˬ yawˇ yawꞈ Miˬyehˇ gʼaˇ duˬ ngehˬ dah-eu Yuˇdaˆ tsawˇ haˬ ma lehˇ ehˇ-eu meh.

⁷Seˬlaˬgiˇ Pawˇluˆ lehˇ myahˇ-euˬ iˇ jaw lahˇ miˇkʼahˬ kʼoeˇ kʼahˬ-ahˇ uˆ lahˇ-eu sahˬ paˬ pyeuꞈ-eu tsawˇ gahˇ ahˇ-eu tsawˇ haˬ kʼoeˇ gʼaˬ-ahˇ aˬ yawꞈ gʼoeˇ-eu meh. Sahˬ paˬ kʼoeˇ gʼaˬ Miˬyehˇ dawˬ kawˬ gaˬ mawꞈ-eu miˇ neh, Baˬnaˬbaˇ hawˇ-eu Sawˇluˆ-ahˇ kuˇ-euˬ meh.

⁸Ehˇ kʼawꞈ, Heˬlaˬsaˇ dawˬ-ahˇ neh Eˇluˇma lehˇ myahˇ-euˬ maw loˬ nya-eu kʼoeˇ gʼaˬ aˬ yawꞈ nyaꞈ-ahˇ laˆ tsoeˬ-awˇ, sahˬ paˬ kʼoeˇ gʼaˬ jah-eu tsawˇ haˬ maˬ bi pyeuꞈ laˇ ni leh jeh-eu meh.

⁹Kʼoeˇ ngeh, Pawˇluˆ lehˇ kuˇ-eu Sawˇluˆ kʼoeˇ gʼaˬ Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu laꞈ kʼoeˇ, maw loˬ nya-eu kʼoeˇ gʼaˬ-ahˇ haw tsoˆ taˬ-awˇ, heu loꞈ-ehˇ ehˇ nehˬ-euˬ meh.

¹⁰“Nehꞈsahˬpaˬ-euˬ zaˬ-oˇ, yaw muiˬ jeˬ dawˬ tawˆ luꞈ-ahˇ nawˇ muiˇ-eu meh. Nawˇ-aˬ, nui ma gʼoꞈ dui dui-awˇ, SahˬpaˬMiˬyehˇ-euˬ yaw tsaˬ yaw dawˇ jeˬ-ahˇ jaˬ myawꞈ mehˇ shuiˇ pyeuꞈ-iˇ jiˇ ni leh jeh luꞈ-eu meh.

¹¹SahˬpaˬMiˬyehˇ-euˬ aˬ laꞈ nawˬ-euˬ kʼoeˇ taˆ nymˬ-mˇ keuˆ le-awˇ, nawˇ yaw shehꞈ-ahˇ maˬ mawˇ nya ni myaˆ behꞈ behꞈ-iˇ-awˇ, tiˬ coeˬ tiˬ law ya shaˬ tehꞈ-a.” Tiˬ poˆ tehꞈ-ehˇ, zahˇ tsui ni gʼeh-eu juˬ kʼoeˬ aˬ yawꞈ-euˬ myaˆ nuiˆ-ahˇ tmˬ tsoeˬ-awˇ, aˬ yawꞈ jawˬ jawˬ-ehˇ cah cah-ehˇ, aˬ yawꞈ-euˬ aˬ laꞈ-ahˇ tsahˇ-awˇ bi sheuˬ gʼeh-eu tsawˇ haˬ-ahˇ poˆ-eu meh.

¹²Kʼoeˇ loꞈ-ehˇ pyeuꞈ laˇ-euˬ gaˇ sahˬ paˬ kʼoeˇ gʼaˬ ya mawˇ ngeh, Miˬyehˇ-ahˇ jah laˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ gaˇ kawˆ mehˬ nehˬ tsoˆ nehˬ gaˇ aˬ yawꞈ zahˬ dui dui leˇ-euˬ meh.

¹³Pawˇluˆ hawˇ-eu aˬ yawꞈ-euˬ cawˬ deuˬ lawˬ dziˬ-awˇ, Baˬpuˇ meuˬ-ahˇ neh Baˬpuˇliˇ miˇ kʼahˬ Beˬlaˬgeˬ meuˬ-ahˇ iˇ-euˬ meh. Kʼoeˇ gaˇ, Maˬkuˆ lehˇ kʼawꞈ kuˇ-eu Yoˇhaˬ kʼoeˇ gʼaˬ aˬ yawꞈ nyaꞈ-ahˇ gʼawˬ-iˇ-awˇ, Yeˬluˇsaˬlehˬ meuˬ-ahˇ gʼoꞈ leˇ-euˬ meh.

¹⁴Beˬlaˬgeˬ meuˬ-ahˇ neh tiˬ poˆ paˇ luˆ-iˇ-awˇ, Biˇsiˇdiˇ miˇ kʼahˬ Aˬdiˇawˬ meuˬ-ahˇ iˇ keuˆ-euˬ meh. Kʼoeˇ gaˇ, Jawˇ nah keuˆ laˇ ngeh, aˬ yawꞈ nyaꞈ uˬ duˬ tahˬ nymˇ-ahˇ daˆ leˇ-awˇ nuiˇ-euˬ meh.

¹⁵Moˇseˬ-euˬ Zahˇ dawˬ kʼoꞈ dawˬ sahˬ boꞈ hawˇ-eu Miˬyehˇ gʼaˇ duˬ ngehˬ dah-eu deuˬ neh boꞈ-euˬ sahˬ boꞈ deuˬ-ahˇ gui gʼaˬ ngeh, uˬ duˬ tahˬ nymˇ-ahˇ aˬ yuiꞈ geuꞈ-eu deuˬ aˬ yawꞈ nyaꞈ-ahˇ heu loꞈ-ehˇ bi tsaꞈ gaˬ-iˇ-euˬ meh. “Tsawˇ haˬ heu deuˬ-ahˇ gʼaˬ biꞈ mawꞈ-eu jeˬ jaˆ naˇ, naw nyaꞈ-ahˇ dawˬ ngehˬ-eu aˇ yamˬ biꞈ mawꞈ miˇ-a.”

¹⁶Kʼoeˇ ngeh, Pawˇluˆ tsawˬ tuˇ laˇ-awˇ, laꞈ dzawˇ dzawˇ dzawˇ-ehˇ, heu loꞈ-ehˇ dawˬ ngehˬ ngehˬ-euˬ meh. “Aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ hawˇ-eu, Miˬyehˇ-ahˇ uˬ duˬ kʼaˇ tahˬ-eu tsawˇ jeuˬ deuˬ-oˇ, ngaˇ ehˇ gaˇ tiˬ poˆ naˇ haˬ sheˇ.

¹⁷Iˇsaˬleˬlaˆ tsawˇ jeuˬ-euˬ Miˬyehˇ-aˬ, aˬ dui-euˬ aˬ poeˬ aˬ bawˇ deuˬ-ahˇ tseˇ doˆ-awˇ, Iˇjiˇtuˆ miˇ kʼahˬ laꞈ kʼoeˇ boeˇ miˬ shiˬ kʼaˬ geuꞈ-awˇ ya dehꞈ luꞈ ngeh, huiˬ-eu tsawˇ jeuˬ bi pyeuꞈ laˇ-euˬ meh. Miˬyehˇ-aˬ, huiˬ dui dui-eu aˬ yawꞈ-euˬ baoˬ-ahˇ gʼoe-awˇ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ meh.

¹⁸Kʼoeˇ naˇ, oeˬ tseˇ kʼoꞈ keuˆ ni bawˇ tsahˬ bawˇ dahˇ laꞈ kʼoeˇ aˬ yawꞈ maꞈ-ahˇ jeuˬ jeuˬ-ehˇ shaˬ-euˬ meh.

¹⁹Kaˬnaˬ miˇ kʼahˬ laꞈ kʼoeˇ jawˇ-euˬ tsawˇ jeuˬ shiꞈ jeuˬ-ahˇ aˬ yawꞈ laˆ cawˆ nehˬ-awˇ, aˬ yawꞈ-euˬ tsawˇ haˬ deuˬ-ahˇ miˇ kʼahˬ kʼoeˇ kʼahˬ biꞈ-euˬ meh.

²⁰Kʼoeˇ loꞈ-ehˇ pyeuꞈ laˇ ngeh keuˆ ni, oeˬ yaˇ ngaˬ tseˇ kʼoꞈ ga-euˬ meh. “Kʼoeˇ naˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Saˬmeuˬlaˆ-euˬ ziˇ maˬ keuˆ laˇ nmˇ kaˬ, yaˇ kʼaˬ daˇ-eu tsawˇ haˬ deuˬ biꞈ nehˬ-awˇ, aˬ yawꞈ maꞈ-ahˇ bi uˆ lahˇ-euˬ meh.

²¹Kʼoeˇ naˇ, aˬ yawꞈ maꞈ sahˬ paˬ shaˇ ngeh, Miˬyehˇ neh a yawꞈ maꞈ-ahˇ Beˬyaˬmiˬ tsawˇ jeuˬ Giˇshaˆ-euˬ aˬ li Sawˇluˆ biꞈ nehˬ-awˇ, aˬ yawꞈ maꞈ kʼoeˇ taˆ sahˬ paˬ geuꞈ-awˇ oeˬ tseˇ kʼoꞈ bi uˆ lahˇ-euˬ meh.

²²Aˬ yawꞈ-ahˇ paˇ yuˇ dzeh ngeh jawˇ, Daˬbiˇ-ahˇ sahˬ paˬ paˇ bi geuꞈ-euˬ meh. ‘Yeˬshehˇ-euˬ aˬ li Daˬbiˇ-aˬ, ngaˇ kʼaˇ bi mˇ mawꞈ-eu jeˬ mˇ-eu, ngaˇ geuꞈ mawꞈ-eu tsawˇ haˬ pyeuꞈ gaˇ ngaˇ ya mawˇ-euˬ ma’ lehˇ, Daˬbiˇ gaˇ kawˆ Miˬyeh neh ehˇ taˬ-euˬ jaˆ-eu meh.

²³Daˬbiˇ-euˬ tsuiꞈ toeˬ gui ka leꞈ gaˇ taꞈ-eu Yeˬsuˇ kʼoeˇ gʼaˬ, Miˬyehˇ neh saˇ jaˇ dzaˬ taˬ-euˬ jaˆ-eu loꞈ-ehˇ, Iˇsaˬleˬlaˆ tsawˇ jeuˬ-ahˇ Miˬyehˇ neh biꞈ leꞈ-euˬ ka kʼoꞈ-eu gʼaˬ pyeuꞈ-eu meh.

²⁴Yeˬsuˇ gaˇ mˇ dahˬ maˬ beh mi naˆ-ehˇ, Iˇsaˬleˬlaˆ tsawˇ haˬ dawˬ tawˆ luꞈ iˬ baˇ noeˬ poˆ-awˇ iˇ cuꞈ shawˇ-eu gʼaˇ duˬ, Yoˇhaˬ dawˬ mehˬ mehˬ-euˬ meh.

²⁵Yoˇhaˬ-aˬ, aˬ yawꞈ ya mˇ-eu saˬ saˬ naˬ gaˇ aˇ saˬ saˬ-eu dawˬ peh peh laˇ ngeh, heu loꞈ-ehˇ ehˇ-eu meh. ‘Ngaˇ aˬ suˇ gʼaˬ nga lehˇ naw maꞈ noeˬ te. Naw maꞈ noeˬ tmˬ luꞈ-eu kʼoeˇ gʼaˬ ngaˇ maˬ ngeuˇ. Aˬ yawꞈ-aˬ, ngaˬ-euˬ jeˬ nah oe luꞈ meh. Ngaˇ-aˬ, aˬ yawꞈ-euˬ sehˬ nawˆ aˇ caˆ puiˇ nehˬ-eu tehꞈ-ehˇ kʼawꞈ mˇ-eu maˬ geuˇ nya.’

²⁶“Aˬbyaˬhaˬ-euˬ zaˬ deuˬ uˆ deuˬ pyeuꞈ-eu ngaˬ-euˬ aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ hawˇ-eu, Miˬyehˇ-ahˇ uˬ duˬ kʼaˇ tahˬ-eu aˬ cawˬ tsawˇ jeuˬ deuˬ-oˇ, ka kʼoꞈ-eu gaˇ kawˆ guiˬ lahˬ dawˬ heu-aˬ, aˬ dui-euˬ gʼaˇ duˬ meh.

²⁷Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ hawˇ-eu aˬ yawꞈ maꞈ-euˬ aˬ yuiꞈ aˬ tsu deuˬ-aˬ, aˬ yawꞈ Ka kʼoꞈ-eu gʼaˬ pyeuꞈ-eu gaˇ kawˆ siˬ nya-eu maˬ ngeuˇ-a. Jawˇ nah aˬ yawꞈ nah yawꞈ gui luꞈ-eu Miˬyehˇ gʼaˇ duˬ ngehˬ dah-eu deuˬ-euˬ dawˬ-ahˇ kʼawꞈ, aˬ yawꞈ maꞈ maˬ siˬ nya-a. Ehˇ kʼawꞈ, aˬ yawꞈ maꞈ Yeˬsuˇ-ahˇ muiˇ-eu laꞈ kʼoeˇ, Miˬyehˇ gʼaˇ duˬ ngehˬ dah-eu deuˬ neh ehˇ taˬ-euˬ dawˬ byah laˇ ni jahˇ-euˬ meh.

²⁸Aˬ yawꞈ-ahˇ sehꞈ-eu lehˇ yaˇ kʼaˬ bi daˇ paˬ-ehˇ huiˬ-eu yaw lehˬ maˬ poˆ doˆ nya kʼawꞈ, aˬ yawꞈ-ahˇ sehꞈ-eu gʼaˇ duˬ sahˬ paˬ Piˇlaˆ-ahˇ aˬ yawꞈ maꞈ shaˇ-euˬ meh.

²⁹Aˬ yawꞈ-euˬ gaˇ kawˆ Jaˇliꞈ laꞈ kʼoeˇ kʼaˇ ehˇ taˬ-euˬ loꞈ-ehˇ aˬ yawꞈ maꞈ mˇ byah gʼaˬ jiˇ ngeh, aˬ yawꞈ-ahˇ laꞈ yaꞈ kʼoeˇ taˆ neh baꞈ ka-awˇ, lmˬ bymˇ laꞈ kʼoeˇ baꞈ pahˬ-iˇ-euˬ meh.

³⁰Ehˇ kʼawꞈ, Miˬyehˇ neh aˬ yawꞈ-ahˇ paˇ bi gʼoꞈ dehꞈ laˇ-euˬ meh.

³¹Kʼoeˇ naˇ, Gaˬliˬlehˇ miˇ kʼahˬ-ahˇ neh Yeˬluˇsaˬlehˬ meuˬ-ahˇ keuˆ ni aˬ yawꞈ nehˬ-ehˇ kʼaˇ cah-euˬ tsawˇ haˬ deuˬ-ahˇ, aˬ yawꞈ-euˬ gʼawˇ mawˇ gʼawˬ mya nah bi mawˇ-euˬ meh. Tsawˇ haˬ kʼoeˇ deuˬ iˬ nah Iˇsaˬleˬlaˆ tsawˇ haˬ deuˬ-ahˇ saˇ kiˇ kamˬ luꞈ meh.

³²Laˬ kʼaˬ cehˇ-eu guiˬ lahˬ dawˬ heu, naw maꞈ jawˇ gaˇ nga nyaꞈ hehˇ laꞈ-euˬ jeˬ pyeuꞈ-eu ma. Aˬ dui-euˬ aˬ poeˬ aˬ bawˇ deuˬ-ahˇ Miˬyehˇ neh saˇ jaˇ dzaˬ taˬ-euˬ jeˬ,

³³Yeˬsuˇ-ahˇ paˇ bi gʼoꞈ dehꞈ laˇ-eu laꞈ kʼoeˇ aˬ yawꞈ maꞈ-euˬ zaˬ deuˬ pyeuꞈ-eu aˬ dui-euˬ ziˇ-ahˇ bi byah laˇ-euˬ meh. Ja ceuˬ-eu sahˬ boꞈ nyiˬ bymˇ tiˬ bymˇ laꞈ kʼoeˇ, ‘Nawˇ ngaˬ-euˬ zaˬ maˇ ma. Iˬ nah nawˬ-euˬ Aˬda, ngaˇ pyeuꞈ laˇ gʼaˬ-euˬ ma’ lehˇ boꞈ taˬ-euˬ meh.

³⁴Kʼoeˇ naˇ, lmˬ bymˇ laꞈ kʼoeˇ maˬ bi buꞈ-iˇ ni, shiˇ gʼaˬ-euˬ gaˇ aˬ yawꞈ-ahˇ paˇ bi gʼoꞈ dehꞈ laˇ-euˬ gaˇ kawˆ, Miˬyehˇ neh ehˇ taˬ-euˬ heu loꞈ-ehˇ jaˆ-eu meh. ‘Daˬbiˇ-ahˇ ngaˇ saˇ jaˇ dzaˬ-euˬ, yaw duˬ baw-eu guiˬ lahˬ yaw shawˇ, naw maꞈ-ahˇ ngaˇ biꞈ ma.’

³⁵Ja ceuˬ-eu sahˬ boꞈ yawˬ tsahˇ yawˬ laꞈ kʼoeˇ, ‘Nawˬ-euˬ Muiˬ-eu shawˇ-eu Gʼaˬ-ahˇ, lmˬ bymˇ-ahˇ maˬ bi buꞈ-iˇ-aˇ’ lehˇ ehˇ taˬ-euˬ jaˆ-eu meh.

³⁶Daˬbiˇ-aˬ, aˬ yawꞈ-euˬ tiˬ ziˇ Miˬyehˇ-euˬ nui kʼahˇ mˇ-awˇ, aˬ yawꞈ shiˇ ngeh, aˬ yawꞈ-euˬ aˬ poeˬ aˬ bawˇ deuˬ nehˬ-ehˇ bi baꞈ pahˬ-awˇ, aˬ yawꞈ-euˬ gʼawˇ mawˇ lmˬ bymˇ laꞈ kʼoeˇ buꞈ-iˇ-euˬ meh.

³⁷Ehˇ kʼawꞈ, shiˇ gʼaˬ-euˬ gaˇ Miˬyehˇ neh paˇ bi gʼoꞈ dehꞈ laˇ-euˬ gʼaˬ-aˬ, kʼoeˇ loꞈ-ehˇ maˬ ngeuˇ-a.

³⁸Kʼoeˇ miˇ neh, aˬ yuiꞈ aˬ nyiˇ deuˬ-oˇ, naw maꞈ heu loꞈ-ehˇ siˬ duˬ-awˬ. Yeˬsuˇ baˬ da neh iˬ baˇ pyehˬ nehˬ-eu jeˬ-ahˇ za-eu gaˇ kawˆ naw maꞈ-ahˇ bya cehˆ ni bi gaˬ keuˆ le-awˇ,

³⁹Moˇseˬ-euˬ Zahˇ dawˬ kʼoꞈ dawˬ neh maˬ bi buˬ-iˇ nya-eu yawˬ jeˬ na luꞈ laꞈ kʼoeˇ, jah-eu tsawˇ haˬ deuˬ Yeˬsuˇ baˬ da neh buˬ-iˇ nya meh.

⁴⁰Teu miˇ neh, Miˬyehˇ gʼaˇ duˬ ngehˬ dah-eu deuˬ neh heu loꞈ-ehˇ ehˇ taˬ-euˬ kʼoeˇ, naw maꞈ kʼoeˇ taˆ maˬ bi keuˆ le-eu gʼaˇ duˬ yahˇ-awˬ.

⁴¹‘Dawˬ doeˇ ngehˬ-eu deuˬ haw taˬ-awˬ. Zahˬ dui dui leˇ-awˇ shiˇ tsehˆ-awˬ. Aˬ jeˬ miˇ neh ehˇ naˇ, iˬ nah ngaˇ mˇ-eu gʼeh-eu heu, aˬ cawˬ naw maꞈ-ahˇ ehˇ-euˬ kʼawꞈ, naw maꞈ ngeuˇ meh lehˇ maˬ duˇ-a’ lehˇ ehˇ taˬ-euˬ meh.”

⁴²Pawˇluˆ hawˇ-eu Baˬnaˬbaˇ aˬ nyaꞈ uˬ duˬ tahˬ nymˇ-ahˇ neh gʼoꞈ le luꞈ ngeh, Jawˇ nah-ahˇ tiˬ poˆ paˇ laˇ-awˇ gaˇ kawˆ kʼoeˇ deuˬ ja mehˬ laˇ-eu gʼaˇ duˬ, tsawˇ haˬ kʼoeˇ deuˬ aˬ yawꞈ nyaꞈ-ahˇ shaˇ-eu meh.

⁴³Aˬ yawꞈ maꞈ uˬ duˬ tahˬ nymˇ-ahˇ daˆ laˇ-euˬ gʼoꞈ ka-iˇ ngeh, Yuˇdaˆ tsawˇ haˬ gʼawˬ mya ni hawˇ-eu Yuˇdaˆ tsawˇ haˬ pyeuꞈ laˇ-euˬ aˬ cawˬ tsawˇ jeuˬ gʼawˬ mya ni, Pawˇluˆ hawˇ-eu Baˬnaˬbaˇ aˬ nyaꞈ-euˬ mehˬ nah caw teh laˇ-euˬ meh. Aˬ yawꞈ nyaꞈ aˬ yawꞈ maꞈ-ahˇ dawˬ ngehˬ cawˬ-awˇ, Miˬyehˇ gʼawˬ shaˬ gaˬ-eu jeˬ laꞈ kʼoeˇ ziꞈ dah ni dehꞈ daˆ leꞈ-eu gʼaˇ duˬ gʼaˬ biꞈ-euˬ meh.

⁴⁴Jawˇ nah paˇ keuˆ laˇ ngeh, meuˬ laꞈ kʼoeˇ jawˇ-eu tsawˇ haˬ yawˬ gʼaˬ na luꞈ ehˇ gʼaˬ ni Miˬyehˇ dawˬ kawˬ naˇ haˬ laˇ-euˬ meh.

⁴⁵Tsawˇ haˬ aˇ maꞈ myaˬ dui dui gaˇ Yuˇdaˆ tsawˇ haˬ deuˬ ya mawˇ ngeh, myaˆ naˆ-awˇ, Pawˇluˆ ehˇ gaˇ tsawˇ pyehˇ pyehˇ pyehˇ-ehˇ, Pawˇluˆ-ahˇ yaˬ kʼehˇ yaˬ-euˬ meh.

⁴⁶Ehˇ kʼawꞈ, Pawˇluˆ hawˇ-eu Baˬnaˬbaˇ aˬ nyaꞈ kʼaˬ duˬ ni ngehˬ-eu laꞈ kʼoeˇ, “Miˬyehˇ-euˬ dawˬ kawˬ heu naw maꞈ-ahˇ jeˬ huˬ ya ja mehˬ-eu ngeuˇ meh. Ehˇ kʼawꞈ, naw maꞈ maˬ naˇ haˬ geuꞈ-ehˇ, mˬ maˬ maˬ byaˆ zaˇ ziˇ dehꞈ-eu jeˬ-ahˇ za-eu geuˇ miˇ-a lehˇ maˬ shaˇ noeˬ-eu miˇ neh, naw maꞈ-ahˇ byehˇ-awˇ aˬ cawˬ tsawˇ jeuˬ-ahˇ mehˬ-iˇ-eu ma.

⁴⁷Aˬ jeˬ miˇ neh ehˇ naˇ, SahˬpaˬMiˬyehˇ neh nga maꞈ-ahˇ biꞈ taˬ-euˬ dawˬ-aˬ, heu loꞈ-ehˇ meh. ‘Mˬ dzeˇ miˇ dzeˇ tuˆ gaˇ keuˆ ni, ka kʼoꞈ-eu jeˬ za-eu gʼaˇ duˬ, aˬ cawˬ tsawˇ jeuˬ-ahˇ bya nehˬ ni, nawˬ-ahˇ yaw shehꞈ bi pyeuꞈ-eu ma”’

⁴⁸Aˬ cawˬ tsawˇ jeuˬ kʼoeˇ deuˬ dawˬ kʼoeˇ dawˬ-ahˇ ya gaˬ ngeh, Laˬ kʼaˬ cehˇ-awˇ Miˬyehˇ-euˬ dawˬ kawˬ-ahˇ ja ceuˬ-euˬ meh. Mˬ maˬ maˬ byaˆ zaˇ ziˇ dehꞈ-eu jeˬ za ni tseˇ doˆ taˬ-euˬ tsawˇ haˬ deuˬ, jah-eu tsawˇ haˬ pyeuꞈ laˇ-euˬ meh.

⁴⁹Miˇ kʼahˬ kʼoeˇ kʼahˬ-ahˇ Sahˬpaˬ Miˬyehˇ-euˬ dawˬ yawˬ gaˇ na luꞈ gaˬ doe-iˇ-euˬ meh.

⁵⁰Ehˇ kʼawꞈ, meuˬ laꞈ kʼoeˇ aˬ yuiꞈ aˬ tsu geuꞈ luꞈ-eu deuˬ hawˇ-eu, Miˬyehˇ-ahˇ uˬ duˬ tahˬ-eu myaˆ pyawˬ naˇ mehˇ jaˆ-eu aˬ cawˬ tsawˇ jeuˬ zaˬ miˬ zaˬ deuˬ, Pawˇluˆ hawˇ-eu Baˬnaˬbaˇ-ahˇ nui ma pehˇ ni Yuˇdaˆ tsawˇ haˬ deuˬ kawˆ-awˇ, aˬ yawꞈ nyaꞈ-ahˇ bi kʼehˬ-awˇ, miˇ kʼahˬ kʼoeˇ kʼahˬ-ahˇ neh bi teh dzeh-euˬ meh.

⁵¹Gʼaˬ kʼehˇ kʼoeˇ nyiˬ gʼaˬ-aˬ, aˬ yawꞈ nyaꞈ-euˬ aˬ kuiˇ pehˬ zaˬ-ahˇ lehꞈ-eu kʼaˬ lehˇ aˬ yawꞈ maꞈ-ahˇ sawˆ kʼaˇ nehˬ yaꞈ-awˇ[14] Iˇgawˇniˇ meuˬ-ahˇ le-euˬ meh.

⁵²Aˬdiˇawˬ meuˬ-ahˇ jawˇ-eu jah-eu tsawˇ haˬ kʼoeˇ deuˬ-aˬ, laˬ kʼaˬ cehˇ-eu jeˬ hawˇ-eu Muiˬ-eu shawˇ-eu Yaw sahˇ Miˬyehˇ tiˬ byah ni ahˇ luꞈ-eu meh.