Read Akha Gʼaˬkʼehˇ 20 Bible Online

Gʼaˬkʼehˇ 20 - Akha bible

Gʼaˬkʼehˇ 20

¹Kʼoeˇ ngeh poˆ uiˬ laˇ-euˬ kʼoeˇ coꞈ-iˇ ngeh, jah-eu tsawˇ haˬ deuˬ-ahˇ Pawˇluˆ kuˇ uiˬ-awˇ, gʼaˬ biꞈ-eu laꞈ kʼoeˇ gʼoꞈ dawˬ tsaꞈ yaꞈ-awˇ, Maˬgeˬdawˇniˆ miˇ kʼahˬ-ahˇ iˇ-euˬ meh.

²Miˇ kʼahˬ kʼoeˇ kʼahˬ doe ni aˬ yawꞈ iˇ gʼeh ngeh, dawˬ mehˬ mehˬ mehˬ-ehˇ gʼaˬ biꞈ yaꞈ-awˇ, Aˬgaˬyaˇ miˇ kʼahˬ-ahˇ iˇ keuˆ-euˬ meh.

³Kʼoeˇ gaˇ ba la smˇ siˬ byah ni aˬ yawꞈ jawˇ-euˬ meh. Suˇliˆ miˇ kʼahˬ-ahˇ gʼoꞈ leˇ-eu lehˇ lehˬ hmˬ luꞈ ngeh, Yuˇdaˆ tsawˇ haˬ deuˬ aˬ yawꞈ-ahˇ sehꞈ-eu lehˇ nawˬ jawˬ luꞈ-eu gaˇ kawˆ siˬ leˇ-awˇ, Maˬgeˬdawˇniˆ miˇ kʼahˬ paw neh gʼoꞈ leˇ-eu gʼaˇ duˬ noeˬ tsehˆ-euˬ meh.

⁴Beˬliˇ meuˬ-ahˇ jawˇ-eu Buˇluˆ-euˬ aˬ li Soˇbaˬdaˬluˇ, Teˇsaˬloˇni meuˬ-ahˇ jawˇ-eu Aˬliˬdaˬguˇ hawˇ-eu Seˬguˬduˇ, Deˬbeˬ meuˬ-ahˇ jawˇ-eu Gaˬyuˇ, Aˬshaˆ miˇ kʼahˬ-ahˇ jawˇ-eu Duˇjiˇ hawˇ-eu Daˬloˇbeˬ aˬ ha maꞈ hawˇ-eu Tiˆmoˇseˬ kʼawꞈ, Pawˇluˆ nehˬ-ehˇ iˇ-euˬ meh.

⁵Tsawˇ haˬ kʼoeˇ deuˬ jeˬ hu doˆ-iˇ-awˇ, nga maꞈ-ahˇ Daˬloˇ meuˬ-ahˇ dawˬ-euˬ meh.

⁶Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ jahˇ gʼaˬ miˇ tsa, Piˇliˇpiˆ meuˬ-ahˇ neh nga maꞈ saˇ baoˬ dziˬ-awˇ doˆ-iˇ-euˬ ma. Ngaˬ nah byah laˇ ngeh Daˬloˇ meuˬ-ahˇ aˬ yawꞈ maꞈ jawˇ gaˇ iˇ keuˆ-awˇ, kʼoeˇ gaˇ ngaˬ nah paˇ jawˇ-euˬ ma.

⁷Tiˬ jaw laꞈ kʼoeˇ aˇ dahˬ beh-eu nah[23] ngeh nah uˬ ciꞈ paw, dzaˬ taꞈ dawˇ taꞈ-eu gʼaˇ duˬ nga maꞈ uiˬ leˇ-euˬ ma. Pawˇluˆ-aˬ, yawˬ nah yawˬ doˆ-iˇ-eu lehˇ gʼeh-eu miˇ neh, kʼoeˇ ngeh miˇ uˬ ciꞈ sehˇ gʼahˇ keuˆ ni dawˬ mehˬ mehˬ-euˬ meh.

⁸Nga maꞈ uiˬ leˇ taˬ-euˬ kʼoeˇ taˆ tiˆ aˇ lawˆ kʼoeˇ lawˆ-ahˇ, tsiˇ kʼmˬ gʼawˬ mya ni doꞈ bya taˬ-euˬ meh.

⁹Uˇduˇkuˇ lehˇ myahˇ-euˬ zaˬ guˬ tiˬ gʼaˬ laˇ gʼoˆ zaˬ-ahˇ nuiˇ luꞈ-eu meh. Pawˇluˆ dawˬ mehˬ gʼawˬ myahˇ ni mehˬ-euˬ miˇ neh aˬ yawꞈ yuꞈ yoeˇ ngeuˇ laˇ-awˇ, nymˇ kʼoeˇ nymˇ-euˬ smˬ tiˆ tiˬ tiˆ-ahˇ neh ga ka-euˬ meh. Aˬ yawꞈ maꞈ aˬ yawꞈ-ahˇ ciˬ-iˇ ngeh, shiˇ tsehˆ taˬ-euˬ meh.

¹⁰Ehˇ kʼawꞈ, Pawˇluˆ zaꞈ ka-iˇ-awˇ, zaˬ guˬ kʼoeˇ gʼaˬ-ahˇ awˆ kʼoꞈ-awˇ ciˬ-awˇ, “Taˬ noeˬ shaˬ. Aˬ yawꞈ dehꞈ luꞈ meh” lehˇ ehˇ nehˬ-euˬ meh.

¹¹Kʼoeˇ naˇ, kʼoeˇ taˆ tiˆ-ahˇ aˬ yawꞈ paˇ gʼoꞈ daˆ leˇ-awˇ, kaˬ muˇ ngawˬ pyehˬ-awˇ jah-eu tsawˇ haˬ deuˬ nehˬ-ehˇ dzaˬ-euˬ meh. Uˬ shawˬ paw nahˇ ma doˆ laˇ ngeh keuˆ ni, uˬ ciꞈ miˇ lah-ehˇ aˬ yawꞈ maꞈ nehˬ-ehˇ aˬ yawꞈ dawˬ ja ja-euˬ meh. Kʼoeˇ naˇ, meuˬ kʼoeˇ meuˬ-ahˇ neh aˬ yawꞈ doˆ-iˇ-euˬ meh.

¹²Aˬ yawꞈ maꞈ aˬ li kʼoeˇ li-ahˇ yaw dehꞈ-ehˇ iˇ kahˇ-ahˇ sheuˬ kʼoꞈ ha-iˇ-awˇ, ui cuiˆ tehꞈ-ehˇ laˬ kʼaˬ cehˇ-eu maˬ ngeuˇ-a.

¹³Pawˇluˆ neh nga maꞈ-ahˇ ehˇ nehˬ laꞈ-euˬ loꞈ-ehˇ, nga maꞈ saˇ baoˬ dziˬ-awˇ Aˬtsoˆ meuˬ-ahˇ iˇ tawˬ-euˬ ma. Aˬ yawꞈ gʼaˬ-aˬ, kʼoeˇ gaˇ keuˆ ni kuiˇ zoˬ cah-eu lehˇ lehˬ hmˬ taˬ-euˬ meh.

¹⁴Aˬtsoˆ meuˬ-aˇ paˇ tahˬ dzoeˇ ngeh, tiˬ kawˆ loꞈ-ehˇ saˇ baoˬ dziˬ-awˇ Meˬduˇleˬ meuˬ-ahˇ iˇ-euˬ ma.

¹⁵Kʼoeˇ gaˇ neh saˇ baoˬ paˇ dziˬ gʼeh-awˇ, yawˬ nah yawˬ Ciˇoˬ iˇ jaw lahˇ dawˬ peh iˇ keuˆ-euˬ ma. Yawˬ nah yawˬ-ahˇ Saˬmoˇ iˇ jaw lahˇ-ahˇ iˇ keuˆ-awˇ, dzaiˇ yawˬ nah yawˬ-ahˇ Meˬleˬduˇ meuˬ-ahˇ iˇ keuˆ-euˬ ma.

¹⁶Aˬshaˆ miˇ kʼahˬ-ahˇ aˇ yamˬ maˬ bi jiˇ-eu gʼaˇ duˬ, nyi naˬ nyi naˬ-ehˇ maˬ jawˇ ni Eˇpeˇsu meuˬ-ahˇ saˇ baoˬ dziˬ-awˇ iˇ-eu lehˇ Pawˇluˆ noeˬ tsehˆ-euˬ meh. Gʼeh nya naˇ, Beˬdeˬgoˇdeˬ bawˬ-iˬ gʼeh ngeh nah Yeˬluˇsaˬlehˬ meuˬ-ahˇ ya jawˇ ni, aˬ yawꞈ yaw kawˇ-ehˇ iˇ mawꞈ-eu meh.

¹⁷Pawˇluˆ Meˬleˬduˇ meuˬ-ahˇ jawˇ luꞈ ngeh, Eˇpeˇsu Ka li zaˬ aˇ muˇ-euˬ aˬ yuiꞈ aˬ tsu deuˬ aˬ yawꞈ-ahˇ tahˬ puˬ le-eu gʼaˇ duˬ bi kuˇ leˇ-euˬ meh.

¹⁸Aˬ yawꞈ maꞈ oe keuˆ ngeh, heu lo-ehˇ ehˇ nehˬ-euˬ meh. “Aˬshaˆ miˇ kʼahˬ-ahˇ laˇ keuˆ ngeh tiˬ nah neh, naw maꞈ nehˬ-ehˇ ngaˇ aˬ joˆ-ehˇ dehꞈ yaꞈ jawˇ yaꞈ-euˬ naw maꞈ siˬ nya meh.

¹⁹Yuˇdaˆ tsawˇ haˬ deuˬ ngaˬ-ahˇ sehꞈ-eu lehˇ nawˬ jawˬ-eu miˇ neh shaˬ dui dui-euˬ aˇ yamˬ kʼoeˇ yamˬ-ahˇ, nui nahˬ nui yu ahˇ-awˇ myaˆ biˇ doˆ-eu laꞈ kʼoeˇ Sahˬpaˬ Miˬyehˇ-euˬ zaˬ kʼaˆ geuꞈ-awˇ gaˇ mˇ yaꞈ-euˬ ma.

²⁰Miˇ kʼahˬ zaˬ mehˬ shi maˬ ehˇ, nymˇ jiˇ laꞈ kʼoeˇ maˬ ehˇ, naw maꞈ-ahˇ ngaˇ dawˬ mehˬ mehˬ ngeh, naw maꞈ gʼaˇ duˬ gaˇ dahˇ tsoeˬ-eu jeˬ tiˬ jeˬ-iˬ maˬ zaꞈ taˬ ni mehˬ nehˬ-euˬ naw maꞈ siˬ nya meh.

²¹Yawˬ ha-euˬ iˬ baˇ noeˬ poˆ-awˇ Miˬyehˇ jawˇ paw gʼoꞈ laˇ-eu laꞈ kʼoeˇ aˬ dui-euˬ Sahˬpaˬ Yeˬsuˇ-ahˇ ya jah meh lehˇ, Yuˇdaˆ tsawˇ haˬ-ahˇ maˬ ehˇ, aˬ cawˬ tsawˇ jeuˬ-ahˇ maˬ ehˇ, tiˬ kawˆ loꞈ-ehˇ ngaˇ mehˬ-euˬ ma.

²²Nymˬ-mˇ, Muiˬ-eu shawˇ-eu Yaw sahˇ Miˬyehˇ-euˬ ehˇ dawˬ naˇ haˬ-eu laꞈ kʼoeˇ Yeˬluˇsaˬlehˬ meuˬ-ahˇ iˇ luꞈ-eu ma. Kʼoeˇ gaˇ, ngaˬ-euˬ kʼoeˇ taˆ aˬ joˆ-ehˇ gʼeh-eu jeˬ keuˆ le-eu lehˇ gʼeh-eu maˬ siˬ.

²³Meuˬ yawˬ meuˬ na luꞈ laꞈ kʼoeˇ, tawˬ-ahˇ bi nyehꞈ uˇ-eu jeˬ hawˇ-eu, ya shaˬ ya zahˬ dui dui-eu jeˬ ngaˬ-ahˇ loꞈ luꞈ meh lehˇ, Muiˬ-eu shawˇ-eu Yaw sahˇ Miˬyehˇ ngaˬ-ahˇ ehˇ nehˬ laꞈ-euˬ kʼoeˇ maˬ ngeuˇ naˇ, nui jeˬ ngaˇ maˬ siˬ nya nya.

²⁴Ehˇ kʼawꞈ, ngaˬ-euˬ gʼawˇ mawˇ heu-aˬ, tiˬ jeˬ-iˬ maˬ poeˬ maˬ lawˬ-a lehˇ ngaˇ noeˬ jiˇ taˬ-euˬ ma. Ngaˇ ya mˇ-eu saˬ saˬ naˬ gaˇ heu mˇ jiˇ-awˇ, Sahˬpaˬ Yeˬsuˇ neh ngaˬ-ahˇ biꞈ taˬ-euˬ Miˬyehˇ gʼawˬ shaˬ gaˬ-eu jeˬ gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ-eu gaˇ heu mˇ luiˆ yaꞈ nya ni noeˬ tsoˆ taˬ-euˬ ma.

²⁵“Naw maꞈ dawˬ tawˆ luꞈ jawˇ gaˇ ngaˇ cah doe-awˇ, Miˬyehˇ Miˇkʼahˬ gaˇ kawˆ mehˬ yaꞈ-euˬ ma. Aˬ kaˇ naˇ, naw maꞈ ngaˬ-ahˇ tiˬ jawˇ-iˬ maˬ paˇ ya mawˇ-aˇ lehˇ ngaˇ siˬ duˬ-eu ma.

²⁶Kʼoeˇ miˇ neh, naw maꞈ tiˬ gʼaˬ na dehꞈ-eu saꞈ laˇ smˬ-iˇ naˇ ngaˬ-euˬ baˬ da neh maˬ ngeuˇ lehˇ, naꞈ suiˇ ni gʼeh-eu dawˬ iˬ nah ngaˇ ngehˬ-eu ma.

²⁷Aˬ jeˬ miˇ neh ehˇ naˇ, Miˬyehˇ-euˬ nui noeˬ dawˬ tawˆ luꞈ, naw maꞈ-ahˇ ngaˇ maˬ zaꞈ taˬ ni ja mehˬ jiˇ gʼaˬ-euˬ ma.

²⁸Kʼoeˇ miˇ neh, naw maꞈ-euˬ gʼawˇ mawˇ yaw muiˬ paˬ-ehˇ yahˇ-awˇ dehꞈ-eu uˬ taꞈ, Muiˬ-eu shawˇ-eu Yaw sahˇ Miˬyehˇ neh naw maꞈ-ahˇ a nehˬ-awˇ bi haw bi pyaˆ-euˬ yawˇ yawˇ maꞈ-ahˇ yaw muiˬ paˬ-ehˇ bo saˆ haw piˇ-awˬ. Miˬyehˇ neh aˬ yawꞈ-euˬ Zaˬmaˇ bi shiˇ dah-awˇ zeuˇ tsehˆ taˬ-euˬ aˬ yawꞈ-euˬ Ka li zaˬ aˇ muˇ-ahˇ yawˇ bo-eu loꞈ-ehˇ bo-awˬ.

²⁹Ngaˇ doˆ-iˇ dzeuˇ naˇ guˆ laˇ paˬ-ehˇ gʼeh-eu kʼaˬ yehˇ deuˬ oe-awˇ, yawˇ yawˇ maꞈ-ahˇ gʼawˬ shaˬ maˬ gaˬ ni laˆ cawˆ le tehꞈ-a lehˇ ngaˇ siˬ nya ma.

³⁰Naw maꞈ-euˬ laꞈ kʼoeˇ tsawˇ haˬ tiˬ paˆ na deuˬ doˆ laˇ-awˇ, jah-eu tsawˇ haˬ deuˬ-ahˇ mehˇ shuiˇ shuiˇ-eu laꞈ kʼoeˇ aˬ yawꞈ maꞈ jawˇ paw sheuˬ pyawˇ gʼeh tehꞈ-a.

³¹Kʼoeˇ miˇ neh, smˇ kʼoꞈ byah ni naw maꞈ yawˬ gʼaˬ na luꞈ-ahˇ ngaˇ myaˆ biˇ doˆ-eu laꞈ kʼoeˇ mehˬ nehˬ-euˬ gaˇ maˬ ngehˇ ni, yahˇ yahˇ-ehˇ dehꞈ-awˬ.

³²“Nymˬ-mˇ, Miˬyehˇ-euˬ aˬ laꞈ laꞈ kʼoeˇ hawˇ-eu aˬ yawꞈ-euˬ gʼawˬ shaˬ gaˬ-eu jeˬ laꞈ kʼoeˇ naw maꞈ-ahˇ ngaˇ a nehˬ yaꞈ-eu ma. Guiˬ lahˬ yaw dzahˇ biꞈ-eu dawˬ kʼoeˇ-aˬ, naw maꞈ-ahˇ bi huiˬ bi mahˇ laˇ nya-awˇ, Miˬyehˇ neh aˬ yawꞈ-euˬ tsawˇ haˬ dawˬ tawˆ luꞈ gʼaˇ duˬ lehˬ hmˬ taˬ-euˬ guiˬ lahˬ biꞈ nya-eu meh.

³³Aˬ cawˬ-euˬ pyuˇ-ahˇ maˬ ehˇ, shuiˇ-ahˇ maˬ ehˇ, dm gʼaˬ dm lmˇ-ahˇ maˬ ehˇ, mehˇ juiˇ juiˇ-eu nui ma ngaˇ maˬ ahˇ.

³⁴Ngaˇ hawˇ-eu ngaˬ-euˬ cawˬ deuˬ kʼaˇ loˬ-eu jeˬ za nya ni, ngaˬ-euˬ aˬ laꞈ heu neh gaˇ mˇ-awˇ pyuˇ poˆ-euˬ naw maꞈ siˬ nya meh.

³⁵‘Za-eu naˆ maˬ tseˇ biꞈ-eu guiˬ lahˬ huiˬ dzehˬ meh’ lehˇ Sahˬpaˬ Yeˬsuˇ neh ehˇ-euˬ dawˬ kʼoeˇ dawˬ-ahˇ noeˬ keuˆ-eu laꞈ kʼoeˇ, kʼoeˇ loꞈ-ehˇ gaˇ yaw kʼaˆ-ehˇ mˇ-awˇ gʼaˬ baˬ-eu deuˬ-ahˇ ya caw ba meh lehˇ, yawˬ jeˬ na luꞈ laꞈ kʼoeˇ naw maꞈ-ahˇ ngaˇ mˇ mehˬ shaˇ mehˬ mehˬ-euˬ ma.”

³⁶Pawˇluˆ kʼoeˇ loꞈ-ehˇ ngehˬ gʼaˬ tmˇ gʼaˬ ngeh, aˬ yawꞈ maꞈ nehˬ-ehˇ pawˬ tsuiꞈ pawˬ dmˬ dmˬ-awˇ guiˬ lahˬ shaˇ-euˬ meh.

³⁷Aˬ yawꞈ maꞈ ngoeˇ ngoeˇ-ehˇ, Pawˇluˆ-ahˇ byaˇ tehˬ-awˇ mehˬ cuˇ cuˇ nehˬ-euˬ meh.

³⁸Aˬ yawꞈ maꞈ aˬ yawꞈ-ahˇ maˬ paˇ ya mawˇ-aˇ lehˇ Pawˇluˆ neh ehˇ-euˬ dawˬ kʼoeˇ dawˬ baˬ aˬ yawꞈ maꞈ-euˬ nui ma-ahˇ yaw kʼaˆ-ehˇ zaw leˇ-awˇ, noeˬ shaˬ dui dui-eu meh. Kʼoeˇ naˇ, aˬ yawꞈ maꞈ Pawˇluˆ-ahˇ saˇ baoˬ naˬ duˬ-ahˇ keuˆ ni sheuˬ ha keuˆ-iˇ-euˬ meh.