Read Akha Gʼaˬkʼehˇ 22 Bible Online

Gʼaˬkʼehˇ 22 - Akha bible

Gʼaˬkʼehˇ 22

¹“Aˬ yuiꞈ aˬ nyiˇ deuˬ-oˇ, ngaˬ-euˬ gaˇ kawˆ naw maꞈ-ahˇ ngaˇ ngehˬ kʼoꞈ gaˇ tiˬ poˆ naˇ haˬ sheˇ” lehˇ ehˇ nehˬ-euˬ meh.

²Aˬ yawꞈ Heˬbyehˇ dawˬ ngehˬ gaˇ aˬ yawꞈ maꞈ ya gaˬ ngeh, yaw beh naˆ maˬ tseˇ ciˬ cuˇ ni paˇ pyeuꞈ-iˇ-euˬ meh. Kʼoeˇ ngeh, Pawˇluˆ heu loꞈ-ehˇ ehˇ-eu meh.

³“Ngaˇ-aˬ, Giˇliˇciˆ miˇ kʼahˬ Daˬsuˆ meuˬ-ahˇ dehꞈ le-euˬ Yuˇdaˆ tsawˇ haˬ tiˬ gʼaˬ pyeuꞈ-awˇ, Yeˬluˇsaˬlehˬ meuˬ laꞈ kʼoeˇ Gaˬmaˬleˬlaˇ jawˇ gaˇ tsawˇ gahˇ dzaw huiˬ laꞈ-euˬ tsawˇ haˬ ma. Aˬ dui-euˬ aˬ poeˬ aˬ bawˇ deuˬ-euˬ Zahˇ dawˬ kʼoꞈ dawˬ deuˬ-ahˇ ngaˇ yaw muiˬ paˬ-ehˇ dzaw duˬ-awˇ, iˬ nah heu gaˇ uiˬ laˇ taˬ-euˬ naw maꞈ loꞈ-ehˇ Miˬyehˇ-ahˇ nui ma keuˆ dui dui-eu tsawˇ haˬ tiˬ gʼaˬ ma.

⁴Gaˇma[24] heu kahˇ mehˬ nah caw teh-eu tsawˇ haˬ deuˬ-ahˇ shiˇ gaˇ keuˆ ni ngaˇ kʼehˬ nehˬ kʼaˆ nehˬ-euˬ ma. Kʼaˬ dzeˇ zaˬ hawˇ-eu zaˬ miˬ zaˬ deuˬ-ahˇ nyehꞈ-awˇ tawˬ-ahˇ dawˆ nehˬ-euˬ ma.

⁵Ngaˇ ehˇ luꞈ-eu gaˇ kawˆ heu aˬ diˇ ngeuˇ meh lehˇ, Piˇ ma Yaw huiˬ gʼaˬ hawˇ-eu meuˬ-euˬ Baꞈdzah[25] aˬ yuiꞈ aˬ tsu dawˬ tawˆ luꞈ siˬ duˬ mawˇ duˬ taˬ-euˬ meh. Daˬmaˬsehˇ meuˬ-ahˇ jawˇ-eu aˬ yuiꞈ aˬ nyiˇ Yuˇdaˆ tsawˇ haˬ deuˬ jawˇ gaˇ boꞈ nehˬ-euˬ sahˬ boꞈ, aˬ yawꞈ maꞈ ngaˬ-ahˇ biꞈ laꞈ-euˬ meh. Kʼoeˇ miˇ neh, kʼoeˇ gaˇ jawˇ-eu jah-eu tsawˇ haˬ kʼoeˇ deuˬ-ahˇ paꞈ-awˇ, Yeˬluˇsaˬlehˬ meuˬ-ahˇ tsahˇ ka leꞈ-awˇ kʼehˬ nehˬ-eu gʼaˇ duˬ, Daˬmaˬsehˇ meuˬ-ahˇ ngaˇ le-euˬ ma.

⁶“Ngaˇ Daˬmaˬsehˇ meuˬ dawˬ peh le keuˆ ngeh, nah loˆ ceh laˇ-euˬ kʼoeˇ yamˬ-ahˇ ja pyuˬ ni mˬ kʼoeˇ taˆ neh kʼaˆ dui dui-eu yaw sehꞈ ngaˬ-euˬ tiˬ jawˬ bya le-euˬ meh.

⁷Ngaˇ miˇ tsa coˬ lah gʼeh-euˬ ma. Kʼoeˇ ngeh ‘Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ kʼehˬ te’ lehˇ ehˇ-eu teˇ saˇ ngaˇ ya gaˬ-euˬ ma.

⁸‘Sahˬpaˬ-oˇ, nawˇ aˬ suˇ gʼaˬ te’ lehˇ ngaˇ naˇ haˬ ngeh, ‘Ngaˇ-aˬ, nawˇ kʼehˬ luꞈ-eu Naˬzaˬlehˇ tsawˇ haˬ Yeˬsuˇ ma’ lehˇ aˬ yawꞈ ngaˬ-ahˇ ehˇ-eu meh.

⁹Ngaˬ nehˬ-ehˇ le-euˬ tsawˇ haˬ deuˬ yaw shehꞈ kʼoeˇ-ahˇ ya mawˇ-euˬ meh. Ehˇ kʼawꞈ, ngaˬ-ahˇ dawˬ ngehˬ cawˬ le-euˬ gʼaˬ-euˬ teˇ saˇ-ahˇ aˬ yawꞈ maꞈ maˬ ya gaˬ-aˬ.

¹⁰‘Sahˬpaˬ-oˇ, ngaˇ aˬ joˆ-ehˇ ya jahˇ nmˇ’ lehˇ naˇ haˬ ngeh, ‘Tuˇ-awˇ Daˬmaˬsehˇ meuˬ-ahˇ le-awˬ. Miˬyehˇ neh nawˬ-ahˇ kʼaˇ bi mˇ-eu lehˇ lehˬ hmˬ taˬ-euˬ yawˬ jeˬ na luꞈ, kʼoeˇ gaˇ nawˬ-ahˇ ehˇ nehˬ laꞈ tehꞈ-a’ lehˇ Sahˬpaˬ Yeˬsuˇ ehˇ-eu meh.

¹¹Yaw shehꞈ kʼoeˇ baˬ da neh ngaˬ-euˬ myaˆ nuiˆ maˬ mawˇ nya-ehˇ pyeuꞈ-iˇ-awˇ, ngaˬ-euˬ cawˬ kʼoeˇ deuˬ neh aˬ laꞈ-ahˇ bi tsahˇ-awˇ Daˬmaˬsehˇ meuˬ-ahˇ le uˇ-euˬ ma.

¹²“Meuˬ kʼoeˇ meuˬ laꞈ kʼoeˇ Aˬnaˬniˇ lehˇ myahˇ-euˬ tsawˇ haˬ tiˬ gʼaˬ jawˇ-eu meh. Aˬ yawꞈ-aˬ, guiˬ lahˬ saꞈ laˇ paw gʼaˬ kʼaˆ dui dui-awˇ, aˬ dui-euˬ Zahˇ dawˬ kʼoꞈ dawˬ-ahˇ yaw muiˬ-ehˇ caw teh-eu miˇ neh, kʼoeˇ gaˇ jawˇ-eu Yuˇdaˆ tsawˇ haˬ deuˬ aˬ yawꞈ-ahˇ yaw zeu baw dui dui-eu meh.

¹³Aˬ yawꞈ ngaˇ jawˇ gaˇ laˇ-awˇ, ngaˬ-euˬ dawˬ peh yawꞈ-awˇ, ‘Aˬ nyiˇ Sawˇluˆ-oˇ, myaˆ nuiˆ mawˇ laˇ-awˬ’ lehˇ ehˇ ngeh, ja pyuˬ ni myaˆ nuiˆ paˇ mawˇ laˇ-awˇ, aˬ yawꞈ-ahˇ haw-euˬ ma.

¹⁴Aˬ yawꞈ ehˇ-eu, ‘Miˬyehˇ-euˬ nui kʼahˇ-ahˇ nawˇ siˬ nya laˇ ni maˬ ehˇ, aˬ yawꞈ-euˬ tsaˬ-eu dawˇ-eu Zaˬkʼaˆ-ahˇ ya mawˇ ni maˬ ehˇ, aˬ yawꞈ-euˬ kʼaˬ meh dawˬ ngehˬ gaˇ ya gaˬ ni maˬ ehˇ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ nawˬ-ahˇ tseˇ doˆ-euˬ meh.

¹⁵Aˬ jeˬ miˇ neh ehˇ naˇ, nawˬ neh kʼaˇ ya gaˬ kʼaˇ ya mawˇ-euˬ jeˬ tsawˇ haˬ yawˬ gʼaˬ na luꞈ-ahˇ dzawˇ mehˬ nehˬ-eu laꞈ kʼoeˇ, aˬ yawꞈ gʼaˇ duˬ nawˇ saˇ kiˇ ya kamˬ tehꞈ-a.

¹⁶Nymˬ-mˇ nyi naˬ nyi naˬ-ehˇ taˬ paˇ jawˇ. Tuˇ-awˇ iˇ cuꞈ shawˇ-awˇ, aˬ yawꞈ-ahˇ guiˬ lahˬ shaˇ-eu laꞈ kʼoeˇ nawˬ-euˬ iˬ baˇ tsiˬ shawˇ-awˬ.’

¹⁷“Yeˬluˇsaˬlehˬ meuˬ-ahˇ ngaˇ gʼoꞈ le-awˇ, Uˬ duˬ tahˬ nymˇ nymˇ ma laꞈ kʼoeˇ guiˬ lahˬ shaˇ luꞈ ngeh, yaw sahˇ laꞈ kʼoeˇ heu loꞈ-ehˇ ya mawˇ-euˬ ma.

¹⁸Sahˬpaˬ Yeˬsuˇ-ahˇ ngaˇ ya mawˇ-euˬ ma. Aˬ yawꞈ ngaˬ-ahˇ ehˇ-eu, ‘Yaw kawˇ-ehˇ lehˬ hmˬ-awˇ Yeˬluˇsaˬlehˬ meuˬ-ahˇ neh doˆ-iˇ-awˬ. Aˬ jeˬ miˇ neh ehˇ naˇ, heu gaˇ jawˇ-eu tsawˇ haˬ deuˬ-aˬ, nawˇ ngaˬ-euˬ gaˇ kawˆ saˇ kiˇ kamˬ gaˇ maˬ ha geuꞈ-aˇ.’

¹⁹Kʼoeˇ ngeh, ngaˇ heu loꞈ-ehˇ ehˇ-euˬ ma. ‘Sahˬpaˬ-oˇ, uˬ duˬ tahˬ nymˇ kʼaˇ jaˆ gaˇ ngaˇ iˇ-awˇ, nawˬ-ahˇ jah-eu tsawˇ haˬ deuˬ-ahˇ nyehꞈ nyehꞈ-ehˇ diˬ-euˬ gaˇ kawˆ aˬ yawꞈ maꞈ yaw muiˬ paˬ-ehˇ siˬ nya meh.

²⁰Kʼoeˇ uˬ taꞈ, nawˬ-euˬ gʼaˇ duˬ saˇ kiˇ kamˬ-eu gʼaˬ pyeuꞈ-eu Saˬteˬpaˬ-ahˇ sehꞈ ngeh, ngaˇ kʼawꞈ kʼoeˇ gaˇ jawˇ-euˬ ma. A yawꞈ-ahˇ sehꞈ gaˇ ngaˇ gʼaˬ baꞈ baꞈ-awˇ, aˬ yawꞈ-ahˇ diˬ sehꞈ leˇ-euˬ deuˬ mehˬ tsoeˬ lehˆ taˬ yaꞈ-euˬ gaˇ ngaˇ loꞈ yaꞈ-euˬ ma.’

²¹Aˬ yawꞈ ngaˬ-ahˇ ehˇ-eu, ‘Iˇ-awˬ. Gaˇ mahˇ kaˬ gaˇ jawˇ-eu aˬ cawˬ tsawˇ jeuˬ tsawˇ ca deuˬ jawˇ gaˇ ngaˇ nawˬ-ahˇ kʼehˇ gʼeh-eu ma.”’

²²Dawˬ kʼoeˇ dawˬ ngehˬ laˇ gaˇ keuˆ ni, Pawˇluˆ ehˇ gaˇ aˬ yawꞈ maꞈ ciˬ cuˇ ni naˇ haˬ luꞈ-eu meh. Ehˇ kʼawꞈ, dawˬ kʼoeˇ dawˬ-ahˇ ya gaˬ ngeh, aˬ yawꞈ maꞈ yaw kʼaˆ-ehˇ guˇ-awˇ ehˇ-eu, “Tsawˇ haˬ teu gʼaˬ-ahˇ taˬ paˇ bi dehꞈ. Sehꞈ-awˬ. Yaw dehꞈ bi dehꞈ-eu maˬ paˇ geuˇ ngaˇ.”

²³Mehˬ tsoeˬ dzeh diˇ-eu deuˬ dzeh diˇ-awˇ, kʼaˬ lehˇ byaˆ diˇ-eu deuˬ byaˆ diˇ byaˆ diˇ-ehˇ kʼoeˇ loꞈ-ehˇ guˇ-eu meh.

²⁴Loˇmaˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ, Pawˇluˆ-ahˇ taˆ laꞈ kʼoeˇ sheuˬ ahˇ gʼeh-eu gʼaˇ duˬ aˬ yawꞈ-euˬ tsawˇ haˬ deuˬ-ahˇ dawˬ biꞈ-awˇ, aˬ jeˬ miˇ neh Yuˇdaˆ tsawˇ haˬ deuˬ aˬ yawꞈ-ahˇ kʼoeˇ loꞈ-ehˇ guˇ-eu gaˇ kawˆ siˬ duˬ laˇ ni, Pawˇluˆ-ahˇ yahˬ caˆ neh juiꞈ-awˇ pyehˆ tseˇ naˇ haˬ-eu gʼaˇ duˬ ehˇ nehˬ-euˬ meh.

²⁵Ehˇ kʼawꞈ, aˬ yawꞈ-ahˇ yahˬ caˆ neh juiꞈ-eu lehˇ paꞈ tawꞈ gʼaˬ ngeh, yehˇ kʼoeˇ deuˬ kʼoeˇ taˆ aˬ yuiꞈ geuꞈ-eu gʼaˬ-ahˇ Pawˇluˆ ehˇ nehˬ-eu, “Loˇmaˆ miˇ kʼahˬ zaˬ tiˬ gʼaˬ-ahˇ yaˇ kʼaˬ maˬ daˇ tsehˆ ni teu loꞈ-ehˇ juiꞈ-eu aˬ kawˬ-aˬ jaˆ ta loˇ.”

²⁶Yehˇ deuˬ kʼoeˇ taˆ aˬ yuiꞈ geuꞈ luꞈ-eu kʼoeˇ gʼaˬ dawˬ kʼoeˇ dawˬ-ahˇ ya gaˬ ngeh, guiˇ maꞈ-ahˇ uˆ lahˇ-eu yaw huiˬ yaw mahˇ jawˇ gaˇ le-awˇ ehˇ nehˬ-eu, “Nawˇ aˬ joˆ-ehˇ jahˇ-eu gʼeh te. Tsawˇ haˬ kʼoeˇ gʼaˬ Loˇmaˆ miˇ kʼahˬ zaˬ law hawˇ ngaˬ tawˇ.”

²⁷Kʼoeˇ ngeh, yaw huiˬ yaw mahˇ kʼoeˇ gʼaˬ Pawˇluˆ jawˇ gaˇ iˇ-awˇ, “Nawˇ Loˇmaˆ miˇ kʼahˬ zaˬ te loˇ” lehˇ naˇ haˬ ngeh, “Ngeuˇ ma” lehˇ Pawˇluˆ ehˇ kʼoꞈ nehˬ-euˬ meh.

²⁸Yaw huiˬ yaw mahˇ kʼoeˇ gʼaˬ ehˇ-eu, “Ngaˇ-aˬ, pyuˇ gʼawˬ mya ni biꞈ-awˇ Loˇmaˆ miˇ kʼahˬ zaˬ pyeuꞈ laˇ-euˬ ma.” Pawˇluˆ ehˇ-eu, “Ngaˇ law nmˇ-aˬ, dehꞈ le ngeh neh Loˇmaˆ miˇ kʼahˬ zaˬ ma.”

²⁹Kʼoeˇ ngeh jawˇ, Pawˇluˆ-ahˇ yahˬ caˆ neh juiꞈ-awˇ naˇ haˬ-eu lehˇ gʼeh-eu tsawˇ haˬ kʼoeˇ deuˬ tiˬ poˆ tehꞈ-ehˇ naˇ kʼah paw jiˆ kʼoꞈ le-euˬ meh. Yaw huiˬ yaw mahˇ kʼoeˇ gʼaˬ-aˬ, aˬ yawꞈ neh shmˇ caˆ paꞈ taˬ-euˬ Pawˇluˆ kʼoeˇ gʼaˬ Loˇmaˆ miˇ kʼahˬ zaˬ pyeuꞈ-eu siˬ duˬ leˇ ngeh, tsawˬ guˆ-iˇ-euˬ meh.

³⁰Yuˇdaˆ tsawˇ haˬ deuˬ Pawˇluˆ-ahˇ aˬ joˆ-ehˇ iˬ baˇ taˬ luꞈ-eu gaˇ kawˆ, Loˇmaˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ siˬ duˬ mawꞈ-eu meh. Kʼoeˇ miˇ neh, yawˬ nah yawˬ Pawˇluˆ-ahˇ paꞈ taˬ-euˬ shmˇ caˆ bi puiˇ-awˇ, piˇ ma aˬ yuiꞈ deuˬ hawˇ-eu Baꞈ dzah-ahˇ uˇ-eu tsawˇ haˬ dawˬ tawˆ luꞈ uiˬ laˇ-eu gʼaˇ duˬ dawˬ biꞈ-euˬ meh. Kʼoeˇ naˇ, Pawˇluˆ-ahˇ sheuˬ laꞈ-awˇ, aˬ yawꞈ maꞈ-euˬ mehˬ shi bi yawꞈ-euˬ meh.