Read Akha Gʼaˬkʼehˇ 24 Bible Online

Gʼaˬkʼehˇ 24 - Akha bible

Gʼaˬkʼehˇ 24

¹Ngaˬ nah byah laˇ ngeh, Piˇ ma Yaw huiˬ gʼaˬ pyeuꞈ-eu Aˬnaˬniˇ hawˇ-eu Yuˇdaˆ tsawˇ haˬ aˬ yuiꞈ aˬ tsu deuˬ, dawˬ ngehˬ-eu bym dui dui-eu Deˬlaˬduˇluˆ lehˇ myahˇ-euˬ tsawˇ haˬ tiˬ gʼaˬ sheuˬ-awˇ Gehˇsaˬliˇ meuˬ-ahˇ iˇ-euˬ meh. Sahˬ paˬ Peˬliˇ-euˬ mehˬ shi aˬ yawꞈ maꞈ le-awˇ, Pawˇluˆ gaˇ kawˆ daˬ leˇ-euˬ meh.

²Kʼoeˇ naˇ, Pawˇluˆ-ahˇ sheuˬ uˇ laꞈ-awˇ, Deˬlaˬduˇluˆ lehˇ kuˇ-eu kʼoeˇ gʼaˬ Pawˇluˆ gaˇ kawˆ heu loꞈ-ehˇ ehˇ-eu meh. “Huiˬ-eu mahˇ-eu sahˬ paˬ-oˇ, nawˇ zaˬ siˬ tsawˇ gahˇ byah-eu laꞈ kʼoeˇ miˇ kʼahˬ-ahˇ uˆ lahˇ-eu baˬ da neh, aˇ kʼoꞈ aˇ la gʼawˬ myahˇ ni nui saˇ oꞈ-awˇ coꞈ ngehˇ ni nga maꞈ ya dehꞈ-eu uˬ taꞈ, nga maꞈ-euˬ miˇ kʼahˬ muiˬ laˇ jaˬ laˇ ni yaw shuiꞈ gʼawˬ mya jeˬ beˬ paˇ laˆ paˇ nehˬ laꞈ gaˇ ya mawˇ-euˬ ma.

³Nawˬ neh mˇ-euˬ gaˇ heu deuˬ-ahˇ, yawˬ gaˇ na luꞈ, yawˬ jawˇ na luꞈ nga maꞈ ha geuꞈ-awˇ, nawˬ-euˬ guiˬ lahˬ-ahˇ ja ceuˬ dui dui-eu ma.

⁴Ehˇ kʼawꞈ, ngaˇ dawˬ gʼawˬ mya ni ngehˬ-eu laꞈ kʼoeˇ nawˬ-euˬ aˇ yamˬ maˬ laˆ jiˇ mawꞈ nya. Teu miˇ neh, nga maꞈ-euˬ gaˇ kawˆ ngaˇ yaw nymˇ nymˇ-ehˇ ehˇ gaˇ, gʼawˬ shaˬ gaˬ-eu laꞈ kʼoeˇ tiˬ poˆ naˇ haˬ nehˬ laꞈ lehˇ nawˬ-ahˇ shaˇ-eu ma.

⁵Tsawˇ haˬ heu gʼaˬ-aˬ, guˆ laˇ paˬ-ehˇ gʼeh-eu haiˬ dui dui-eu tsawˇ haˬ tiˬ gʼaˬ pyeuꞈ-eu nga maꞈ ya mawˇ-euˬ ma. Miˇ tsaˬ kʼoeˇ taˆ kʼaˇ jawˇ-eu Yuˇdaˆ tsawˇ haˬ deuˬ suˬ saˬ laˇ ni gʼaˬ biꞈ-eu Naˬzaˬlehˇ aˇ muˇ[26] -euˬ aˬ yuiꞈ tiˬ gʼaˬ pyeuꞈ-eu meh.

⁶Kʼoeˇ uˬ taꞈ, Uˬ duˬ tahˬ nymˇ nymˇ ma-ahˇ aˬ yawꞈ laˆ jawꞈ-eu lehˇ gʼeh-eu miˇ neh, nga maꞈ aˬ yawꞈ-ahˇ nyehꞈ-euˬ ma.[27] Nga maꞈ-euˬ zahˇ dawˬ kʼoꞈ dawˬ kʼaˇ jaˆ-eu loꞈ-ehˇ aˬ yawꞈ-ahˇ nga maꞈ yaˇ kʼaˬ daˇ-eu lehˇ gʼeh-euˬ ma.

⁷Ehˇ kʼawꞈ, guiˇ maꞈ kʼoeˇ taˆ uˆ lahˇ-eu Luˇsiˆ oe-awˇ, aˬ yawꞈ-ahˇ nga maꞈ-euˬ aˬ laꞈ laꞈ kʼoeˇ neh lu doˆ-awˇ sheuˬ kʼoꞈ gʼeh-euˬ meh.

⁸Kʼoeˇ naˇ, aˬ yawꞈ-ahˇ yaˇ kʼaˬ ja mawꞈ-eu deuˬ nawˇ jawˇ gaˇ ya iˇ meh lehˇ Luˇsiˆ dawˬ biꞈ-euˬ meh.* Tsawˇ haˬ heu gʼaˬ-ahˇ nawˇ naˇ haˬ naˇ, nga maꞈ aˬ yawꞈ-ahˇ iˬ baˇ kʼaˇ taˬ-eu yawˬ jeˬ na luꞈ nawˇ ya siˬ duˬ tehꞈ-a.”

⁹Kʼoeˇ loꞈ-ehˇ ehˇ gaˇ Yuˇdaˆ tsawˇ haˬ dawˬ tawˆ luꞈ tsaˬ meh lehˇ ehˇ-eu meh.

¹⁰Kʼoeˇ naˇ, Pawˇluˆ dawˬ ngehˬ-eu gʼaˇ duˬ sahˬ paˬ Peˬliˇ laꞈ dzawˇ dzawˇ nehˬ ngeh, Pawˇluˆ heu loꞈ-ehˇ ehˇ-eu meh. “Nawˇ-aˬ, miˇ kʼahˬ heu kʼahˬ kʼoeˇ taˆ yaˇ kʼaˬ daˇ-eu gʼaˬ geuꞈ luꞈ-eu gʼawˬ mya kʼoꞈ byah laˇ-euˬ meh. Kʼoeˇ miˇ neh, nawˬ-euˬ mehˬ shi ngaˬ-euˬ gaˇ kawˆ ya dzawˇ mehˬ-eu nui kʼahˇ shiˇ dui dui nya.

¹¹Ngaˇ Yeˬluˇsaˬlehˬ meuˬ-ahˇ uˬ duˬ tahˬ leˇ-euˬ tseˇ nyiꞈ nah maˬ byah laˇ-aˬ siˬ lehˇ nawˇ siˬ nya tehꞈ-a.

¹²Uˬ duˬ tahˬ nymˇ nymˇ ma laꞈ kʼoeˇ maˬ ehˇ, uˬ duˬ tahˬ nymˇ nui deuˬ laꞈ kʼoeˇ maˬ ehˇ, meuˬ laꞈ kʼoeˇ tiˬ gaˇ na maˬ ehˇ, ngaˇ aˬ cawˬ nehˬ-ehˇ tsawˇ pyehˇ pyehˇ gaˇ Yuˇdaˆ tsawˇ haˬ deuˬ neh mawˇ taˬ-euˬ maˬ jaˆ-a. Aˬ cawˬ luiˬ gʼa laˇ ni ngaˇ jahˇ gaˇ aˬ yawꞈ maꞈ neh mawˇ taˬ-euˬ kʼawꞈ maˬ jaˆ-a.

¹³Aˬ yawꞈ maꞈ nymˬ-mˇ ngaˬ-euˬ yaw lehˬ poˆ-awˇ ehˇ luꞈ-eu gaˇ kawˆ teu deuˬ kʼawꞈ, nawˬ-ahˇ saˇ kiˇ tiˬ jeˬ-iˬ maˬ mehˬ duˬ nya-a.

¹⁴Ehˇ kʼawꞈ, nawˬ-euˬ mehˬ shi ngaˇ dawˇ coe ni heu loꞈ-ehˇ ja doˆ-eu ma. Aˬ yawꞈ maꞈ maˬ tsaˬ-a lehˇ ehˇ-eu Gaˇma[28] kʼoeˇ kahˇ-ahˇ ngaˇ caw teh-eu laꞈ kʼoeˇ, nga maꞈ-euˬ aˬ poeˬ aˬ bawˇ deuˬ-euˬ Miˬyehˇ-ahˇ ngaˇ uˬ duˬ tahˬ luꞈ-eu ma. Ehˇ kʼawꞈ, Moˇseˬ-euˬ Zahˇ dawˬ kʼoꞈ dawˬ hawˇ-eu Miˬyehˇ gʼaˇ duˬ ngehˬ dah-eu deuˬ-euˬ sahˬ boꞈ laꞈ kʼoeˇ kʼaˇ boꞈ taˬ-euˬ yawˬ jeˬ na luꞈ-ahˇ kʼawꞈ ngaˇ jah luꞈ ma.

¹⁵Tsawˇ muiˬ tsawˇ doeˇ dawˬ tawˆ luꞈ-ahˇ shiˇ-euˬ gaˇ paˇ bi gʼoꞈ dehꞈ laˇ tehꞈ-a lehˇ tsawˇ haˬ heu deuˬ Miˬyehˇ laꞈ kʼoeˇ noeˬ tmˬ-eu loꞈ-ehˇ, ngaˇ kʼawꞈ noeˬ tmˬ-eu ma.

¹⁶Miˬyehˇ mehˬ shi maˬ ehˇ, tsawˇ haˬ zaˬ mehˬ shi maˬ ehˇ, ngaˬ-euˬ nui ma aˬ myah luꞈ shawˇ jehˆ ni jaˆ ni leh jeh luꞈ-eu ma.

¹⁷“Ngaˇ Yeˬluˇsaˬlehˬ meuˬ-ahˇ maˬ iˇ-ehˇ jawˇ-eu gʼawˬ mya kʼoꞈ byah laˇ-euˬ miˇ neh, ngaˬ-euˬ tsawˇ haˬ deuˬ jawˇ gaˇ pyuˇ shuiˇ ui cuiˆ sha ha nehˬiˇ-awˇ, lawˇ-eu shehˇ-eu jeˬ mˇ-iˇ-eu gʼaˇ duˬ, kʼoeˇ gaˇ iˇ-euˬ ma.

¹⁸Ngaˇ kʼoeˇ loꞈ-ehˇ mˇ luꞈ-awˇ, gʼawˇ mawˇ shawˇ-eu zahˇ jahˇ gʼaˬ ngeh, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ ngaˬ-ahˇ mawˇ-euˬ meh. Ngaˬ nehˬ-ehˇ tsawˇ haˬ aˇ maꞈ maˬ jawˇ-euˬ uˬ taꞈ, lawꞈ gʼa-eu jeˬ kʼawꞈ maˬ jaˆ-aˬ.

¹⁹Ehˇ kʼawꞈ, Aˬshaˆ miˇ kʼahˬ-ahˇ jawˇ-eu Yuˇdaˆ tsawˇ haˬ tiˬ deuˬ kʼoeˇ gaˇ jawˇ-eu meh. Aˬ yawꞈ maꞈ kʼawꞈ ngaˬ-ahˇ iˬ baˇ taˬ kʼaˇ za naˇ, nawˬ-euˬ mehˬ shi oe-awˇ ja-eu tsaˬ tehꞈ-a.

²⁰Maˬ ngeuˇ naˇ, Baꞈdzah mehˬ shi ngaˇ yawꞈ leˇ ngeh, ngaˬ-euˬ yaw lehˬ aˬ geu jeˬ mawˇ taˬ-euˬ jaˆ te lehˇ, heu gaˇ oe taˬ-euˬ tsawˇ haˬ teu deuˬ-ahˇ bi ehˇ haw sheˇ.

²¹Aˬ yawꞈ maꞈ-euˬ mehˬ shi ngaˇ yawꞈ ngeh ngaˬ neh guˇ guˇ-ehˇ ehˇ-euˬ gaˇ kawˆ kʼoeˇ hmˬ-ahˇ toeˬ ceh kʼaˇ za-eu tehꞈ meh. ‘Shiˇ-euˬ tsawˇ haˬ deuˬ paˇ gʼoꞈ dehꞈ laˇ tehꞈ-a lehˇ ngaˇ jah-eu tiˬ jeˬ baˬ da neh, iˬ nah naw maꞈ neh nyehꞈ-awˇ heuꞈ loꞈ-ehˇ bi naˇ haˬ gaˇ ya daˬ luꞈ-eu ma’ lehˇ ehˇ-euˬ kʼoeˇ dawˬ-ahˇ toeˬ ceh kʼaˇ za-eu tehꞈ meh.”

²²Kʼoeˇ ngeh, Gaˇma kʼoeˇ kahˇ gaˇ kawˆ siˬ nya taˬ-euˬ Peˬliˇ-aˬ, “Guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ pyeuꞈ-eu Luˇsiˆ oe keuˆ ngeh, naw maꞈ-euˬ gaˇ kawˆ heu hmˬ ngaˇ daˇ tsehˆ nehˬ ma” lehˇ ehˇ-awˇ, gaˇ kawˆ kʼoeˇ hmˬ piˬ tehˬ-euˬ meh.

²³Kʼoeˇ naˇ, Pawˇluˆ-ahˇ yaw muiˬ paˬ-ehˇ haw lahˇ-eu gʼaˇ duˬ, yehˇ tiˬ yaˇ gʼaˬ kʼoeˇ taˆ aˬ yuiꞈ geuꞈ-eu gʼaˬ-ahˇ aˬ yawꞈ dawˬ biꞈ-euˬ meh. Ehˇ kʼawꞈ, aˇ dzehˬ-ehˇ maˬ ka lahˇ ni bi jawˇ-eu uˬ taꞈ, aˬ yawꞈ loˬ-eu jeˬ-ahˇ aˬ yawꞈ-euˬ cawˬ deuˬ caw ba nehˬ le gaˇ taˬ laˆ tsoeˬ lehˇ ehˇ nehˬ taˬ-euˬ meh.

²⁴Smˬ nah oeˬ nah byah laˇ ngeh, Peˬliˇ hawˇ-eu Duˇsiˇleˬ aˬ nyaꞈ dzeˇ zaˬ oe-euˬ meh. Duˇsiˇleˬ-aˬ, Yuˇdaˆ tsawˇ jeuˬ pyeuꞈ-eu meh. Pawˇluˆ-ahˇ bi kuˇ laˬ-iˇ-awˇ, Yeˬsuˇ Ka li-ahˇ jah-eu gaˇ kawˆ bi ja mehˬ-euˬ meh.

²⁵Ehˇ kʼawꞈ, yaw tsaˬ yaw dawˇ jeˬ gaˇ kawˆ, yawˬ ha-euˬ nui ma-ahˇ nyehꞈ tehˬ gʼaˬ-eu gaˇ kawˆ, Yaˇ kʼaˬ daˇ-eu Aˇ nah keuˆ le luꞈ-eu gaˇ kawˆ heu deuˬ-ahˇ Pawˆluˆ ja keuˆ ngeh, Peˬliˇ noeˬ guˆ laˇ-awˇ ehˇ-eu, “Nawˇ gʼoꞈ-iˇ-awˬ. Aˬ kaˇ dah ngeh nawˬ-ahˇ ngaˇ paˇ bi kuˇ le ma.”

²⁶Peˬliˇ-aˬ, Pawˇluˆ aˬ yawꞈ-ahˇ pyuˇ biꞈ nehˬ gaˇ kʼawꞈ noeˬ tmˬ-eu meh. Kʼoeˇ miˇ neh, Pawˇluˆ-ahˇ tiˬ kʼehˬ maˬ taˬ ni kuˇ kuˇ-ehˇ dawˬ ja ja cawˬ-euˬ meh.

²⁷Nyiˬ kʼoꞈ byah laˇ ngeh, Peˬliˇ-euˬ jawˇ duˬ-ahˇ Bawˇgiˇ Beˬtuˇ sahˬ paˬ paˇ geuꞈ le-euˬ meh. Peˬliˇ-aˬ, Yuˇdaˆ tsawˇ haˬ mehˬ shi tsawˇ myahˇ za mawꞈ-eu miˇneh Pawˇluˆ-ahˇ tawˬ-ahˇ bi uˇ yaꞈ-euˬ meh.