Read Akha Gʼaˬkʼehˇ 28 Bible Online

Gʼaˬkʼehˇ 28 - Akha bible

Gʼaˬkʼehˇ 28

¹Nga maꞈ buˬ-iˇ law-iˇ-awˇ dahˇ taˆ le doˆ gʼaˬ ngeh, iˇ jaw lahˇ kʼoeˇ lahˇ Meˬleˬdeˬ lehˇ kuˇ-eu gaˇ kawˆ ya siˬ-euˬ ma.

²Iˇ jaw lahˇ kʼoeˇ lahˇ-ahˇ jawˇ-eu tsawˇ haˬ deuˬ nga maꞈ-ahˇ gʼawˬ shaˬ gaˬ dui dui-eu meh. Uˬ yehˇ ga doˆ le-awˇ, yaw tsehꞈ tsehꞈ-eu miˇ neh, aˬ yawꞈ maꞈ miˬ dzaˬ baw doꞈ-awˇ nga maꞈ-ahˇ ha nehˬ laꞈ-euˬ meh.

³Pawˇluˆ gʼeh, miˬ dzaˬ kawˬ pyaˇ ya uiˬ-awˇ, miˬ dzaˬ jehˆ bymˇ kʼoeˇ taˆ baꞈ doꞈ-euˬ meh. Miˬ dzaˬ yaw lahˇ lahˇ-eu miˇ neh, doꞈ kʼaˆ dui dui-eu aˇ lawˇ tiˬ mawˇ doˆ laˇ-awˇ, Pawˇluˆ-euˬ aˬ laꞈ-ahˇ kawꞈ tsoˆ taˬ-euˬ meh.

⁴Iˇ jaw lahˇ kʼoeˇ lahˇ-ahˇ jawˇ-eu tsawˇ haˬ kʼoeˇ deuˬ Pawˇluˆ-euˬ aˬ laꞈ-ahˇ aˇ lawˇ kʼoeˇ mawˇ ga gʼeu gaˇ mawˇ ngeh, tiˬ gʼaˬ tiˇ gʼaˬ ehˇ-eu, “Tsawˇ haˬ teu gʼaˬ aˬ cawˬ-ahˇ sehꞈ-euˬ tsawˇ haˬ ngaˇ. Iˬ ma laˆ shaˆ laꞈ kʼoeˇ maˬ shiˇ ni ya dzeuˇ-iˇ-euˬ kʼawꞈ, yaw tsaˬ yaw dawˇ jeˬ aˬ yawꞈ-ahˇ maˬ paˇ bi dehꞈ-eu yaw duˬ baw ngaˇ ehˇ lawˬ.”

⁵Ehˇ kʼawꞈ, Pawˇluˆ tiˬ jeˬ-iˬ maˬ gʼeh ni, aˇ lawˇ kʼoeˇ mawˇ-ahˇ miˬ dzaˬ-ahˇ juiꞈ ahˇ-euˬ meh.

⁶Pawˇluˆ-euˬ gʼawˇ mawˇ puˬ laˇ-euˬ loˇ, maˬ ngeuˇ naˇ ja pyuˬ ni coˬ lah-awˇ shiˇ-eu loˇ lehˇ pyeuꞈ laˇ gaˇ aˬ yawꞈ maꞈ haw tsoˆ taˬ-euˬ meh. Ehˇ kʼawꞈ, aˬ yawꞈ maꞈ gʼawˬ myahˇ ni loꞈ keuˆ laꞈ kʼawꞈ tiˬ jeˬ-iˬ maˬ gʼeh gaˇ ya mawˇ ngeh, aˬ yawꞈ maꞈ yawˬ jeˬ yawˬ-ehˇ noeˬ laˇ-awˇ, “Tsawˇ haˬ teu gʼaˬ miˬ yehˇ ngaˇ” lehˇ ehˇ-eu meh.

⁷Kʼoeˇ gaˇ neh gʼawˬ mahˇ ni maˬ kaˬ-ehˇ, iˇ jaw lahˇ kʼoeˇ lahˇ-ahˇ aˬ yuiꞈ geuꞈ luꞈ-eu Buˬbaˬliˇ lehˇ myahˇ-euˬ gʼaˬ-euˬ deh yaˇ miˇ tsaˬ gʼawˬ loe ni jaˆ-eu meh. Aˬ yawꞈ nga maꞈ-ahˇ yaw muiˬ paˬ-ehˇ ha le-awˇ, smˬ nah keuˆ ni aˬ yawꞈ-euˬ nymˇ-ahˇ daˬ yah geuꞈ-euˬ ma.

⁸Buˬbaˬliˇ-euˬ aˬ da-aˬ, pyaˬ-awˇ uˬ maˆ uˬ neˇ iˇ iˇ-ehˇ yuꞈ zaˇ kʼoeˇ taˆ ga-eu meh. Pawˇluˆ-aˬ, aˬ yawꞈ yuꞈ-eu kuˆ lawˆ-ahˇ uˇ leˇ-awˇ, guiˬ lahˬ shaˇ nehˬ-eu laꞈ kʼoeˇ, aˬ yawꞈ-euˬ kʼoeˇ taˆ aˬ laꞈ baꞈ daˆ-awˇ naˇ gawˇ laˆ taˬ nehˬ-euˬ meh.

⁹Kʼoeˇ loꞈ-ehˇ pyeuꞈ laˇ-euˬ gaˇ ya mawˇ ngeh, iˇ jaw lahˇ kʼoeˇ lahˇ laꞈ kʼoeˇ kʼaˇ jawˇ-eu naˇ-eu tsawˇ haˬ dawˬ tawˆ luꞈ oe-awˇ, naˇ gawˇ bi laˆ taˬ jiˇ-euˬ meh.

¹⁰Kʼoeˇ ngeh, aˬ yawꞈ maꞈ nga maꞈ-ahˇ laꞈ sawˬ gʼawˬ mya ni biꞈ laˬ-euˬ meh. Nga maꞈ saˇ baoˬ dziˬ-awˇ paˇ doˆ-iˇ ngeh kʼawꞈ, gaˇ pehˇ-ahˇ kʼaˇ loˬ-eu yawˬ jeˬ na luꞈ shaˇ dawˆ nehˬ laꞈ-euˬ meh.

¹¹Ba la smˇ siˬ byah laˇ ngeh, “miˬ yehˇ nyiˬ gʼaˬ” lehˇ myahˇ-euˬ saˇ baoˬ dziˬ-awˇ doˆ-iˇ-euˬ ma. Saˇ baoˬ kʼoeˇ laˇ-aˬ, Aˬleˬsaˬduˇ meuˬ-ahˇ-euˬ saˇ baoˬ pyeuꞈ-awˇ, tsahˬ gaˆ yamˬ-ahˇ iˇ jaw lahˇ kʼoeˇ lahˇ-ahˇ naˬ luꞈ-eu meh.

¹²Suˇlaˬguˇ meuˬ-ahˇ nga maꞈ iˇ keuˆ ngeh, smˬ nah naˬ-euˬ ma.

¹³Kʼoeˇ gaˇ neh paˇ doˆ-iˇ-awˇ, Leˬjiˬoˬ meuˬ-ahˇ iˇ keuˆ-euˬ ma. Yawˬ nah yawˬ, laꞈ oˆ paw pyawˬ-ahˇ-euˬ jaˬ lehˇ baw daˆ laꞈ-eu miˇ neh, nyiˬ nah laꞈ kʼoeˇ Bawˇdaˬyawˇliˇ meuˬ-ahˇ nga maꞈ iˇ keuˆ-euˬ ma.

¹⁴Meuˬ kʼoeˇ meuˬ laꞈ kʼoeˇ, jah-eu tsawˇ haˬ ti deuˬ-ahˇ nga maꞈ mawˇ-awˇ, aˬ yawꞈ maꞈ nehˬ-ehˇ jawˇ nah tiˬ jaw jawˇ nehˬ laꞈ lehˇ nga maꞈ-ahˇ shaˇ-eu meh. Kʼoeˇ naˇ, Loˇmaˆ meuˬ-ahˇ nga maꞈ le keuˆ-euˬ ma.

¹⁵Loˇmaˆ meuˬ-ahˇ jawˇ-eu jah-eu tsawˇ haˬ deuˬ nga maꞈ gaˇ kawˆ ya gaˬ-awˇ, Aˬbiˇ-euˬ Lehˆ lehˇ kuˇ-eu meuˬ hawˇ-eu Saˆlaˬ Smˇlaˬ lehˇ kuˇ-eu meuˬ-ahˇ keuˆ ni oe-awˇ, nga maꞈ-ahˇ tahˬ puˬ le-euˬ meh. Aˬ yawꞈ maꞈ-ahˇ Pawˇluˆ ya mawˇ ngeh, nui ma gʼaˬ tiˬ tiˆ paˇ ahˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh.

¹⁶Loˇmaˆ meuˬ-ahˇ le keuˆ ngeh, Pawˇluˆ-ahˇ yehˇ tiˬ gʼaˬ tehꞈ-ehˇ bi loꞈ-awˇ, aˬ yawˇ yawꞈ jawˇ-eu aˬ kawˬ-aˬ biꞈ nehˬ-euˬ meh.

¹⁷Smˬ nah byah laˇ ngeh, kʼoeˇ gaˇ jawˇ-eu Yuˇdaˆ tsawˇ haˬ aˬ yuiꞈ aˬ tsu deuˬ-ahˇ Pawˇluˆ kuˇ uiˬ-euˬ meh. Aˬ yawꞈ maꞈ uiˬ laˇ ngeh, Pawˇluˆ heu loꞈ-ehˇ ehˇ nehˬ-euˬ meh. “Aˬ yuiꞈ aˬ nyiˇ Iˇsaˬleˬlaˇ tsawˇ haˬ deuˬ-oˇ, aˬ duiˬ-euˬ tsawˇ jeuˬ-ahˇ maˬ ehˇ, aˬ dui-euˬ aˬ poeˬ aˬ bawˇ ziˇ neh tawˬ ka leꞈ-euˬ zahˇ sahˇ kʼoꞈ deuˬ-ahˇ maˬ ehˇ, ngaˬ neh mˇ bahˬ-euˬ tiˬ jeˬ-iˬ maˬ jaˆ gaˇ, Yeˬluˇsaˬlehˬ meuˬ-ahˇ ngaˬ-ahˇ paꞈ-awˇ, Loˇmaˆ tsawˇ haˬ deuˬ-euˬ aˬ laꞈ laꞈ kʼoeˇ a ahˇ nehˬ laꞈ-euˬ meh.

¹⁸Loˇmaˆ tsawˇ haˬ deuˬ tehꞈ law nmˇ-aˬ, ngaˬ-ahˇ pyehˆ tseˇ-awˇ naˇ haˬ gʼaˬ ngeh, ya shiˇ gaˇ keuˆ ni mˇ lehˬ taˬ-euˬ tiˬ jeˬ-iˬ maˬ jaˆ-eu miˇ neh, ngaˬ-ahˇ pyehˬ nehˬ mawꞈ-eu meh.

¹⁹Ehˇ kʼawꞈ, ngaˬ-ahˇ pyehˬ nehˬ-eu gʼaˇ duˬ Yuˇdaˆ tsawˇ haˬ deuˬ nui ma maˬ tsaˬ-eu miˇ neh, ngaˬ-euˬ tsawˇ jeuˬ-ahˇ ngaˇ iˬ baˇ tiˬ jeˬ-iˬ taˬ kʼaˇ maˬ za kʼawꞈ, sahˬ paˬ Gehˇsaˬ neh ngaˬ-ahˇ yaˇ kʼaˬ bi daˇ laꞈ lehˇ maˬ shaˇ-ehˇ maˬ gʼeh nya ni suꞈ laˇ taˬ-euˬ meh.

²⁰Kʼoeˇ miˇ neh, naw maꞈ-ahˇ ngaˇ tahˬ puˬ-awˇ ja cawˬ mawꞈ-eu ma. Dawˇ coe ni ya ehˇ naˇ, Iˇsaˬleˬlaˇ tsawˇ haˬ deuˬ noeˬ tmˬ luꞈ-eu gʼaˬ-euˬ gʼaˇ duˬ ngaˇ heu loꞈ-ehˇ shmˇ caˆ daˬ-awˇ jawˇ luꞈ-eu ma.”

²¹Aˬ yawꞈ maꞈ ehˇ-eu, “Nawˬ-euˬ gaˇ kawˆ-ahˇ taꞈ leˇ-awˇ Yuˇdaˆ miˇ kʼahˬ-ahˇ neh boꞈ laꞈ-euˬ sahˬ boꞈ tiˬ taꞈ-iˬ nga maꞈ maˬ za-aˬ. Kʼoeˇ gaˇ neh laˇ-euˬ nga maꞈ-euˬ tsawˇ haˬ deuˬ kʼawꞈ, nawˬ-euˬ gaˇ kawˆ yaw doeˇ tiˬ gʼaˬ-iˬ maˬ ja-a.

²²Ehˇ kʼawꞈ, iˬ nah nawˇ uˇ luꞈ-eu aˇ muˇ heu muˇ-ahˇ, yawˬ gaˇ na luꞈ aˬ cawˬ ja doeˇ-awˇ iˬ baˇ taˬ luꞈ-eu nga maꞈ ya siˬ duˬ taˬ-euˬ ma. Kʼoeˇ miˇ neh, nawˬ neh noeˬ taˬ-euˬ gaˇ kawˆ ja gaˇ nga maꞈ naˇ haˬ mawꞈ miˇ-a.”

²³Kʼoeˇ naˇ, aˬ yawꞈ maꞈ aˇ nah tiˬ nah laˆ duˬ-awˇ, aˇ nah kʼoeˇ nah keuˆ laˇ ngeh, tsawˇ haˬ gʼawˬ mya ni Pawˇluˆ jawˇ gaˇ uiˬ laˇ-euˬ meh. Uˬ shawˬ paw neh uˬ ciꞈ paw keuˆ ni, Pawˇluˆ neh aˬ yawꞈ maꞈ-ahˇ Miˬyehˇ Miˇkʼahˬ gaˇ kawˆ ja mehˬ-awˇ, Moˇseˬ-euˬ Zahˇ dawˬ kʼoꞈ dawˬ hawˇ-eu Miˬyehˇ gʼaˇ duˬ ngehˬ dah-eu deuˬ neh boꞈ taˬ-euˬ gaˇ kawˆ-ahˇ gʼoe gʼoe-ehˇ, Yeˬsuˇ-euˬ gaˇ kawˆ-ahˇ jah laˇ ni leh jeh-awˇ mehˬ nehˬ-euˬ meh.

²⁴Tiˬ paˆ na deuˬ aˬ yawꞈ mehˬ gaˇ jah laˇ-euˬ meh. Ehˇ kʼawꞈ, tiˬ paˆ na deuˬ maˬ jah-a.

²⁵Pawˇluˆ neh ngehˬ-euˬ dawˬ baˬ da neh, aˬ yawꞈ maꞈ tiˬ gʼaˬ tiˇ gʼaˬ maˬ tsaˬ leˇ ni gʼoꞈ-iˇ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ-ahˇ Pawˇluˆ neh ehˇ nehˬ-euˬ kʼoeˇ-aˬ, heu loꞈ-ehˇ meh. “Miˬyehˇ gʼaˇ duˬ ngehˬ dah-eu Iˇsaˬyaˇ-ahˇ gʼoe-awˇ, naw maꞈ-euˬ aˬ poeˬ aˬ bawˇ deuˬ-ahˇ Muiˬ-eu shawˇ-eu Yaw sahˇ Miˬyehˇ neh ehˇ nehˬ-euˬ dawˬ heu dawˬ aˇ naˆ ni tsaˬ-eu nga.

²⁶Aˬ yawꞈ ehˇ-eu, ‘Tsawˇ haˬ heu deuˬ jawˇ gaˇ iˇ-awˇ, heu loꞈ-ehˇ ehˇ nehˬ-awˬ. Gaˬ dehˆ-euˬ kʼawꞈ maˬ gʼoˆ shaw-ehˇ, haw dehˆ-euˬ kʼawꞈ maˬ mawˇ leˇ-aˇ.

²⁷Aˬ jeˬ miˇ neh ehˇ naˇ, yawꞈ maꞈ nui ma gʼahˇ-awˇ, naˬ bawˇ paꞈ tsoeˬ tsoeˬ-awˇ, myaˆ nuiˆ miˆ tehˬ-euˬ meh. Kʼoeˇ loꞈ-ehˇ maˬ gʼeh law nmˇ-aˬ, myaˆ nuiˆ-ahˇ mawˇ leˇ-awˇ, naˬ bawˇ-ahˇ gaˬ leˇ-awˇ, nui ma-ahˇ noeˬ leˇ-awˇ, ngaˇ jawˇ gaˇ gʼoꞈ laˇ ngeh, naˇ gawˇ yaˇ taˬ nehˬ ma.”’

²⁸Kʼoeˇ naˇ, Pawˇluˆ aˇ saˬ saˬ-eu dawˬ ngehˬ-eu, “Naw maꞈ heu loꞈ-ehˇ siˬ nya-awˬ. Miˬyehˇ-euˬ ka kʼoꞈ-eu guiˬ lahˬ dawˬ heu-ahˇ, aˬ cawˬ tsawˇ jeuˬ deuˬ-ahˇ bi mehˬ-iˇ-euˬ meh. Aˬ yawꞈ maꞈ naˇ haˬ geuꞈ tehꞈ-a lehˇ siˬ nya-awˬ.”[34]

³⁰Pawˇluˆ-aˬ, aˬ yawꞈ neh ngaˬ taˬ-euˬ nymˇ-ahˇ nyiˬ kʼoꞈ byah ni jawˇ-awˇ, aˬ yawꞈ jawˇ gaˇ kʼaˇ laˇ-eu tsawˇ haˬ deuˬ-ahˇ yaw muiˬ paˬ-ehˇ ha-euˬ meh.

³¹Miˬyehˇ Miˇkʼahˬ gaˇ kawˆ dawˬ mehˬ mehˬ-awˇ, Sahˬpaˬ Yeˬsuˇ Ka li gaˇ kawˆ mehˬ nehˬ tsoˆ nehˬ-euˬ meh. Laˆ tsoeˬ-eu tiˬ jeˬ-iˬ maˬ jaˆ ni, kʼaˬ duˬ ni kʼoeˇ loꞈ-ehˇ mˇ-euˬ meh.