Read Akha Gʼaˬkʼehˇ 5 Bible Online

Gʼaˬkʼehˇ 5 - Akha bible

Gʼaˬkʼehˇ 5

¹Aˬnaˬniˇ hawˇ-eu Saˬpiˇla lehˇ myahˇ-euˬ nyiˬ dzeˇ zaˬ kʼawꞈ, miˇ tsaˬ tiˬ tsahˇ ahˬ-euˬ meh.

²Ehˇ kʼawꞈ, miˬ zaˬ gʼaˬ nehˬ-ehˇ bawˬ dzaˬ-awˇ, ahˬ za-euˬ pyuˇ tiˬ paˆ yuˇ taˬ yaꞈ-awˇ, tiˬ paˆ tehꞈ-ehˇ gʼaˬ kʼehˇ deuˬ-ahˇ aˬ nehˬ-iˇ-euˬ meh.

³Beˬtuˆluˆ ehˇ-eu, “Aˬnaˬniˇ-oˇ, aˬ jeˬ miˇ neh Saˬdaˬ nawˬ-ahˇ bi uˆ lahˇ-awˇ, Muiˬ-eu shawˇ-eu Yaw sahˇ Miˬyehˇ-ahˇ jaˬ myawꞈ myawꞈ-eu laꞈ kʼoeˇ, myawˬ gahˬ ahˬ za-euˬ pyuˇ tiˬ paˆ yuˇ doˆ taˬ yaꞈ teˬ.

⁴Myawˬ gahˬ kʼoeˇ maˬ ahˬ mi naˆ-ehˇ, nawˬ-euˬ maˬ ngeuˇ loˇ. Ahˬ gʼaˬ-awˇ za-euˬ pyuˇ kʼoeˇ kʼawꞈ nawˬ-euˬ maˬ ngeuˇ loˇ. Toˆ-ehˇ ngeuˇ naˇ, teu loꞈ-ehˇ jahˇ-eu gʼaˇ duˬ aˬ joˆ-ehˇ noeˬ doˆ kʼmˬ-eu nya. Nawˇ tsawˇ haˬ zaˬ-ahˇ jaˬ myawꞈ myawꞈ-euˬ maˬ ngeuˇ-a. Miˬyehˇ-ahˇ jaˬ myawꞈ myawꞈ-euˬ meh.”

⁵Dawˬ kʼoeˇ dawˬ-ahˇ Haˬnaˬniˇ ya gaˬ-euˬ nehˬ-ehˇ, coˬ dzeh-awˇ shiˇ-euˬ meh. Gaˇ kawˆ kʼoeˇ kʼaˇ ya gaˬ-euˬ tsawˇ haˬ dawˬ tawˆ luꞈ guˆ dui dui-iˇ-euˬ meh.

⁶Zaˬ guˬ deuˬ uˇ laˇ-awˇ, aˬ yawꞈ-euˬ gʼawˇ mawˇ-ahˇ mawˇ tawˆ tawˆ-awˇ baꞈ pahˬ-iˇ-euˬ meh.

⁷Naˬ liˬ smˇ laꞈ ehˇ gʼaˬ ni kaˇ-iˇ-awˇ, miˬ zaˬ gʼaˬ paˇ uˇ laˇ-euˬ meh. Pyeuꞈ dzeuˇ yaꞈ-euˬ gaˇ kawˆ kʼoeˇ miˬ zaˬ gʼaˬ tiˬ pawꞈ-iˬ maˬ siˬ nya-a.

⁸Beˬtuˆluˆ aˬ yawꞈ-ahˇ ehˇ-eu, “Naw nyaꞈ dzeˇ zaˬ neh myawˬ gahˬ ahˬ za-euˬ pyuˇ dawˬ tawˆ luꞈ heu myaˆ tehꞈ ma loˇ.” Aˬ yawꞈ ehˇ-eu, “Heu myaˆ tehꞈ ma.”

⁹Ehˇ kʼawꞈ, Beˬtuˆluˆ ehˇ-eu, “Aˬ jeˬ miˇ neh naw nyaꞈ dzeˇ zaˬ nui ma tiˬ siˬ tehꞈ-ehˇ taˬ-awˇ SahˬpaˬMiˬyehˇ-euˬ Yaw sahˇ-ahˇ lawˬ haw te. Nawˬ-euˬ kʼaˬ dzeˇ zaˬ-ahˇ baꞈ pahˬ-iˇ-euˬ tsawˇ haˬ deuˬ nymˬ-mˇ gʼoˆ kʼehˬ-ahˇ gʼoꞈ uˇ laˇ luꞈ meh. Aˬ yawꞈ maꞈ nawˬ-ahˇ paˇ ya baꞈ doˆ gʼeh tehꞈ-a.”

¹⁰Kʼoeˇ ngeh, aˬ yawꞈ ja pyuˬ ni coˬ lah-awˇ shiˇ-euˬ meh. Zaˬ guˬ kʼoeˇdeuˬ gʼoꞈ uˇ laˇ ngeh, aˬ yawꞈ shiˇ taˬ-awˇ ga gaˇ ya mawˇ-euˬ meh. Aˬ yawꞈ maꞈ aˬ yawꞈ-ahˇ baꞈ doˆ gʼeh-awˇ, aˬ yawꞈ-euˬ kʼaˬ dzeˇ zaˬ gaˇ dzeˇ baꞈ pahˬ nehˬ-euˬ meh.

¹¹Ka li zaˬ aˇ muˇ muˇ lah ni maˬ ehˇ, gaˇ kawˆ kʼoeˇ kʼaˇ ya gaˬ-euˬ tsawˇ haˬ dawˬ tawˆ luꞈ maˬ ehˇ, guˆ dui dui-iˇ-euˬ meh.

¹²Zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu gʼawˬ mya jeˬ, tsawˇ haˬ gʼawˬ mya ni-ahˇ gʼaˬ kʼehˇ deuˬ mˇ mehˬ-euˬ meh. Jah-eu tsawˇ haˬ dawˬ tawˆ luꞈ, Sawˇlaˬmoˬ-euˬ Guiˇ ga ceuˬ lehˇ kuˇ-eu jawˇ duˬ-ahˇ uiˬ leˇ-euˬ meh.

¹³Aˬ cawˬ aˬ yawꞈ maꞈ-ahˇ yaw kʼaˆ-ehˇ ja ceuˬ-awˇ taˬ huiˬ kʼawꞈ, tsawˇ haˬ tiˬ gʼaˬ-iˬ aˬ yawꞈ maꞈ-euˬ aˇ muˇ-ahˇ maˬ gawꞈ leˇ peuˬ-a.

¹⁴Ehˇ kʼawꞈ, Sahˬpaˬ Yeˬsuˇ-ahˇ jah-eu kʼaˬ jeˇ zaˬ deuˬ hawˇ-eu zaˬ miˬ zaˬ deuˬ, aˇ muˇ laꞈ kʼoeˇ ngehˬ jawˇ ngehˬ lahˬ laˇ luꞈ-eu meh.

¹⁵Gʼaˬ kʼehˇ deuˬ-euˬ mˇ myawˬ shaˇ kawˆ-ahˇ aˬ cawˬ ya mawˇ ngeh, naˇ-eu gawˇ-eu tsawˇ haˬ deuˬ-ahˇ gaˇ ma-ahˇ baꞈ doˆ leꞈ-awˇ, gawˬ pu hawˇ-eu yuꞈ zaˇ kʼoeˇ taˆ bi jawˇ-awˇ, Beˬtuˆluˆ oe tsehˆ ngeh, aˬ yawꞈ-euˬ gʼawˇ mawˇ-euˬ naˇ shmˇ bi zaw le-eu gʼaˇ duˬ loꞈ luꞈ-eu meh.

¹⁶Yeˬluˇsaˬlehˬ meuˬ-euˬ tahˬ gʼoꞈ tahˬ jawˇ jaˆ-eu meuˬ deuˬ-ahˇ jawˇ-eu tsawˇ haˬ deuˬ neh naˇ-eu tsawˇ haˬ deuˬ hawˇ-eu nehꞈ yaw jawꞈ uˇ-eu tsawˇ haˬ deuˬ sheuˬ laꞈ-awˇ, baˬ maꞈ puˇ jeˬ-ehˇ laˇ-euˬ meh. Aˬ yawꞈ maꞈ dawˬ tawˆ luꞈ naˇ gawˇ taˬ leˇ jiˇ-euˬ meh.

¹⁷Kʼoeˇ ngeh, Piˇ ma Yaw huiˬ gʼaˬ hawˇ-eu aˬ yawꞈ-euˬ tsawˇ haˬ dawˬ tawˆ luꞈ maˬ ehˇ, Saˬduˬgehˇ aˇ muˇ laꞈ kʼoeˇ uˇ-eu tsawˇ haˬ deuˬ maˬ ehˇ, gʼaˬ kʼehˇ deuˬ-ahˇ myaˆ naˆ dui dui laˇ-awˇ, yaw doeˇ jahˇ-eu gʼaˇ duˬ noeˬ tsehˆ-euˬ meh.

¹⁸Aˬ yawꞈ maꞈ gʼaˬ kʼehˇ deuˬ-ahˇ nyehꞈ-awˇ, miˇ kʼahˬ zaˬ-euˬ tawˬ-ahˇ dawˆ-euˬ meh.

¹⁹Ehˇ kʼawꞈ, kʼoeˇ ngeh miˇ Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ gʼaˬ paꞈ kuˆ laˇ gʼoˆ pah le-awˇ, gʼaˬ kʼehˇ deuˬ-ahˇ sheuˬ doˆ nehˬ-awˇ, heu loꞈ-ehˇ ehˇ nehˬ-euˬ meh.

²⁰“Uˬ duˬ tahˬ nymˇ nymˇ ma laꞈ kʼoeˇ yawꞈ leˇ-awˇ, yaw shuiꞈ dehꞈ paˇ-euˬ gaˇ kawˆ heu tiˬ byah tiˬ loꞈ ja mehˬ leˇ-awˬ.”

²¹Dawˬ kʼoeˇ dawˬ-ahˇ gʼaˬ kʼehˇ deuˬ naˇ haˬ-awˇ, uˬ bya bya laˇ ngeh Uˬ duˬ tahˬ nymˇ nymˇ ma laꞈ kʼoeˇ uˇ leˇ-awˇ, gaˇ kawˆ kʼoeˇ mehˬ nehˬ tsoˆ nehˬ-euˬ meh. Piˇ ma Yaw huiˬ gʼaˬ hawˇ-eu aˬ yawꞈ-euˬ tsawˇ haˬ deuˬ neh, Yuˇdaˆ tsawˇ haˬ tsawˇ mawˬ tsawˇ kʼaˆ dawˬ tawˆ luꞈ kuˇ ymˬ jiˇ-awˇ, Baꞈ dzah dzah ma dzah-euˬ meh. Kʼoeˇ naˇ, gʼaˬ kʼehˇ deuˬ-ahˇ aˬ yawꞈ maꞈ-euˬ mehˬ shi bi sheuˬ laꞈ-eu gʼaˇ duˬ dawˬ biꞈ-euˬ meh.

²²Ehˇ kʼawꞈ, miˇ kʼahˬ gaˇ mˇ-eu yaw huiˬ yaw mahˇ deuˬ oe keuˆ ngeh, gʼaˬ kʼehˇ deuˬ tawˬ-ahˇ maˬ paˇ jawˇ-euˬ gaˇ ya mawˇ-awˇ, Baꞈ dzah-ahˇ paˇ gʼoꞈ leˇ-awˇ, heu loꞈ-ehˇ tsaꞈ gaˬ leˇ-euˬ meh.

²³“Nga maꞈ tawˬ-ahˇ iˇ keuˆ ngeh, gʼoˆ kʼehˬ ziꞈ dah ni tawꞈ tehˬ taˬ-awˇ, loꞈ-eu tsawˇ haˬ deuˬ kʼawꞈ yaw muiˬ paˬ-ehˇ loꞈ luꞈ gaˇ ya mawˇ-euˬ ma. Ehˇ kʼawꞈ, nga maꞈ gʼoˆ kʼehˬ kʼoeˇ pah haw ngeh, laꞈ kʼoeˇ tiˬ gʼaˬ-iˬ maˬ jawˇ-a.”

²⁴Piˇ ma aˬ yuiꞈ deuˬ hawˇ-eu, Uˬ duˬ tahˬ nymˇ nymˇ ma-ahˇ loꞈ piˇ-eu deuˬ kʼoeˇ taˆ uˆ lahˇ-eu yaw huiˬ yaw mahˇ gʼaˬ gaˇ kawˆ kʼoeˇ ya gaˬ ngeh, gʼaˬ kʼehˇ deuˬ aˬ joˆ-ehˇ jahˇ-euˬ gaˇ kawˆ noeˬ maˬ doˆ-ehˇ pyeuꞈ-iˇ-euˬ meh.

²⁵Kʼoeˇ ngeh, tsawˇ haˬ tiˬ gʼaˬ uˇ laˇ-awˇ ehˇ-eu, “Naˇ haˬ sheˇ. Naw maꞈ neh paꞈ kuˆ-ahˇ dawˆ-euˬ tsawˇ haˬ kʼoeˇ deuˬ Uˬ duˬ tahˬ nymˇ nymˇ ma laꞈ kʼoeˇ mehˬ luꞈ tsoˆ luꞈ meh.”

²⁶Yaw huiˬ yaw mahˇ kʼoeˇ gʼaˬ aˬ yawꞈ-euˬ tsawˇ haˬ deuˬ sheuˬ-awˇ, gʼaˬ kʼehˇ deuˬ-ahˇ sheuˬ laˬ-iˇ-euˬ meh. Tsawˇ haˬ aˇ maꞈ kʼoeˇ deuˬ aˬ yawꞈ maꞈ-ahˇ kʼaˬ lo biˬ laˇ gaˇ guˆ-eu miˇ neh, gʼaˬ kʼehˇ deuˬ-ahˇ yehˬ bawˬ sehˇ lu-ehˇ maˬ jahˇ ni sheuˬ laꞈ-euˬ meh.

²⁷Gʼaˬ kʼehˇ deuˬ-ahˇ sheuˬ uˇ laꞈ-awˇ, Baꞈ dzah-euˬ mehˬ shi bi yawꞈ-awˇ, Piˇ ma Yaw huiˬ gʼaˬ aˬ yawꞈ maꞈ-ahˇ naˇ haˬ-eu laꞈ kʼoeˇ, heu loꞈ-ehˇ ehˇ-eu meh.

²⁸“Tsawˇ haˬ kʼoeˇ gʼaˬ-euˬ tsawˇ myahˇ uˬ moˆ mehˬ-eu tsoˆ-eu jeˬ taˬ mˇ lehˇ, nga maꞈ neh naw maꞈ-ahˇ yaw kʼaˆ kʼaˆ-ehˇ ehˇ taˬ-euˬ jaˆ-eu maˬ ngeuˇ-a loˇ. Ehˇ kʼawꞈ, Yeˬluˇsaˬlehˬ meuˬ meuˬ lah-ehˇ gaˬ byah jiˇ ni naw maꞈ mehˬ-awˇ tsoˆ-awˇ, tsawˇ haˬ kʼoeˇ gʼaˬ shiˇ-euˬ gaˇ kawˆ nga maꞈ kʼoeˇ taˆ keuˆ le ni naw maꞈ jahˇ-euˬ meh.”

²⁹Kʼoeˇ ngeh, Beˬtuˆluˆ hawˇ-eu gʼaˬ kʼehˇ deuˬ heu loꞈ-ehˇ ehˇ kʼoꞈ nehˬ-euˬ meh. “Tsawˇ haˬ-euˬ dawˬ-ahˇ naˇ haˬ-eu naˆ maˬ tseˇ, Miˬyehˇ-euˬ dawˬ-ahˇ nga maꞈ ya naˇ haˬ meh.

³⁰Naw maꞈ neh laꞈ yaꞈ kʼoeˇ taˆ taꞈ tehˬ-awˇ bi shiˇ-euˬ Yeˬsuˇ-ahˇ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ neh paˇ bi gʼoꞈ dehꞈ laˇ-euˬ meh.

³¹Iˇsaˬleˬlaˆ tsawˇ haˬ deuˬ iˬ baˇ noeˬ poˆ-awˇ, iˬ baˇ pyehˬ nehˬ-eu jeˬ-ahˇ za nya ni, Miˬyehˇ-euˬ aˇ maˇ paw aˬ yawꞈ-ahˇ ciˬ huiˬ keuˆ nehˬ-awˇ, Sheuˬ gʼeh-eu gʼaˬ hawˇ-eu Ka kʼoꞈ-eu gʼaˬ bi pyeuꞈ laˇ-euˬ meh.

³²Nga maꞈ-aˬ, gaˇ kawˆ heu-euˬ saˇ kiˇ pyeuꞈ-eu ma. Kʼoeˇ loꞈ-ehˇ duˇ ni, Miˬyehˇ-euˬ ehˇ dawˬ naˇ haˬ geuꞈ-eu deuˬ-ahˇ Miˬyehˇ neh biꞈ-euˬ Muiˬ-eu shawˇ-eu Yaw sahˇ Miˬyehˇ kʼawꞈ, gaˇ kawˆ heu-euˬ saˇ kiˇ pyeuꞈ-eu meh.”

³³Baꞈ dzah-ahˇ uˇ-eu tsawˇ haˬ deuˬ dawˬ kʼoeˇ dawˬ-ahˇ ya gaˬ ngeh, nui ma pehˇ dui dui laˇ-awˇ, gʼaˬ kʼehˇ deuˬ-ahˇ sehꞈ mawꞈ-eu meh.

³⁴Ehˇ kʼawꞈ, aˬ yawꞈ maꞈ laꞈ kʼoeˇ aˬ cawˬ yaw zeu baw dui dui-eu Zahˇ dawˬ kʼoꞈ dawˬ mehˬ-eu saˬ laˬ pyeuꞈ-eu Gaˬmaˬleˬlaˇ lehˇ myahˇ-euˬ Paˬliˬsehˇ tiˬ gʼaˬ Baꞈ dzah laꞈ kʼoeˇ tuˇ laˇ-awˇ, gʼaˬ kʼehˇ deuˬ-ahˇ laꞈ nyiˇ tiˬ kʼehˬ bi sheuˬ doˆ gʼeh-eu gʼaˇ duˬ dawˬ biꞈ-euˬ meh.

³⁵Kʼoeˇ naˇ, Baꞈ dzah-ahˇ aˬ yawꞈ heu loꞈ-ehˇ ehˇ nehˬ-euˬ meh. “Aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-oˇ, tsawˇ haˬ heu deuˬ-ahˇ aˬ joˆ-ehˇ jahˇ nehˬ nmˇ lehˇ ehˇ-eu gaˇ kawˆ heu, yaw kʼaˆ kʼaˆ-ehˇ shaˇ noeˬ-awˬ.

³⁶Aˇ hu Tuˇdaˆ lehˇ kuˇ-euˬ tiˬ gʼaˬ doˆ le-euˬ naw maꞈ siˬ luꞈ meh. Aˬ yawˇ yawꞈ yaw huiˬ tiˬ gʼaˬ ma lehˇ ehˇ-awˇ, tsawˇ haˬ oeˬ yaˇ gʼaˬ byah ni aˬ yawꞈ nehˬ-ehˇ gm leˇ-euˬ meh. Ehˇ kʼawꞈ, aˬ yawꞈ-ahˇ sehꞈ ngeh, aˬ yawꞈ mehˬ nah caw teh-euˬ deuˬ cehˆ piˬ cehˆ byoˆ jiˇ-awˇ, gaˇ kawˆ kʼoeˇ hmˬ coꞈ-iˇ-euˬ meh.

³⁷Kʼoeˇ naˇ, miˇ kʼahˬ zaˬ-euˬ tsawˇ myahˇ yuˇ ngeh, Gaˬliˬlehˇ miˇ kʼahˬ-ahˇ jawˇ-eu Yuˇdaˆ lehˇ kuˇ-eu tsawˇ haˬ tiˬ gʼaˬ paˇ doˆ le-euˬ meh. Aˬ yawꞈ-euˬ mehˬ nah caw teh-eu tsawˇ haˬ kʼawꞈ tiˬ maꞈ jawˇ-eu meh. Ehˇ kʼawꞈ, aˬ yawꞈ gʼeh bi sehꞈ-awˇ, aˬ yawꞈ mehˬ nah caw tehˬ-euˬ tsawˇ haˬ deuˬ cehˆ piˬ cehˆ byoˆ jiˇ-euˬ meh.

³⁸Kʼoeˇ miˇ neh, gaˇ kawˆ heu hmˬ-ahˇ taꞈ leˇ-awˇ, naw maꞈ-ahˇ ngaˇ heu loꞈ-ehˇ ehˇ mawꞈ miˇ-a. Tsawˇ haˬ heu deuˬ-ahˇ do maˬ yuˇ ni bi jawˇ-awˬ. Aˬ yawꞈ maꞈ neh mˇ-euˬ gaˇ heu, tsawˇ haˬ zaˬ neh noeˬ doˆ-awˇ mˇ-euˬ jeˬ ngeuˇ naˇ, aˬ yawˇ yawꞈ piˬ-iˇ byoˆ-iˇ tehꞈ-a.

³⁹Ehˇ kʼawꞈ, Miˬyehˇ neh bi mˇ-euˬ jeˬ ngeuˇ lawˬ naˇ, naw maꞈ maˬ zuiˆ gʼaˬ nya-aˇ. Nymˬ-mˇ Miˬyehˇ-ahˇ guiˇ deuˆ cawˬ shaˇ gaˇ duˇ tehꞈ-a.” Baꞈ dzah aˇ muˇ kʼoeˇ, Gaˬmaˬleˬlaˇ-euˬ ehˇ dawˬ geuꞈ-euˬ meh.

⁴⁰Gʼaˬ kʼehˇ deuˬ-ahˇ laꞈ kʼoeˇ paˇ kuˇ ahˇ-awˇ, yahˬ caˆ neh juiꞈ-awˇ, Yeˬsuˇ-euˬ tsawˇ myahˇ uˬ moˆ maˬ ngehˬ maˬ tmˇ-eu gʼaˇ duˬ yaw kʼaˆ kʼaˆ-ehˇ mehˬ-awˇ pyehˬ nehˬ-euˬ meh.

⁴¹Gʼaˬ kʼehˇ deuˬ Baꞈ dzah-ahˇ neh gʼoꞈ doˆ le ngeh, laˬ kʼaˬ cehˇ-eu meh. Aˬ jeˬ miˇ neh ehˇ naˇ, Yeˬsuˇ gʼaˇ duˬ shaꞈ dawˇ-eu jeˬ-ahˇ daˬ geuˇ-eu tsawˇ haˬ lehˇ, aˬ yawꞈ maꞈ-ahˇ Miˬyehˇ sawˇ nehˬ-euˬ aˬ yawꞈ maꞈ siˬ nya-eu meh.

⁴²Kʼoeˇ naˇ, Uˬ duˬ tahˬ nymˇ nymˇ ma laꞈ kʼoeˇ maˬ ehˇ, nymˇ doe ni maˬ ehˇ, Yeˬsuˇ Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ-eu hawˇ-eu mehˬ nehˬ tsoˆ nehˬ-eu jeˬ, yawˬ nah na luꞈ maˬ tsehˆ leˇ ni mˇ daˆ leꞈ-euˬ meh.