Read Akha Gʼaˬkʼehˇ 8 Bible Online

Gʼaˬkʼehˇ 8 - Akha bible

Gʼaˬkʼehˇ 8

¹Aˬ yawꞈ-ahˇ kʼoeˇ loꞈ-ehˇ sehꞈ gaˇ, Sawˇluˆ kʼawꞈ nui ma tsaˬ-euˬ meh. Kʼoeˇ ngeh nah, Yeˬluˇsaˬlehˬ meuˬ-ahˇ jawˇ-eu Ka li zaˬ aˇ muˇ, kʼehˬ-eu kʼaˆ-eu jeˬ-ahˇ yaw kʼaˆ-ehˇ ya daˬ-euˬ meh. Gʼaˬ kʼehˇ deuˬ maˬ ngeuˇ naˇ, jah-eu tsawˇ haˬ dawˬ tawˆ luꞈ Yuˇdaˆ miˇ kʼahˬ hawˇ-eu Saˬmaˬliˇ miˇ kʼahˬ doe ni cehˆ byaˆ jiˇ-euˬ meh.

²Miˬyehˇ-ahˇ jah-eu gʼaˬ kʼaˆ-eu deuˬ Saˬteˬpaˬ-ahˇ duˬ pahˬ-iˇ-awˇ, tsawˇ ngoeˇ yaw kʼaˆ-ehˇ ngoeˇ-euˬ meh.

³Ehˇ kʼawꞈ, Sawˇluˆ-aˬ, Ka li zaˬ aˇ muˇ-ahˇ laˆ byoˆ-eu lehˇ leh jeh-euˬ meh. Aˬ yawꞈ tiˬ nymˇ saˇ-iˬ tiˬ nymˇ iˇ iˇ-ehˇ, jah-eu tsawˇ haˬ kʼaˇ ngeuˇ-eu deuˬ-ahˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, nyehꞈ-awˇ tawˬ-ahˇ dawˆ-euˬ meh.

⁴Cehˆ byaˆ taˬ-euˬ jah-eu tsawˇ haˬ kʼoeˇ deuˬ, yawˬ gaˇ na luꞈ guiˬ lahˬ dawˬ mehˬ mehˬ-ehˇ cah-euˬ meh.

⁵Piˇliˇpuˆ kʼawꞈ, Saˬmaˬliˇ miˇ kʼahˬ meuˬ tiˬ meuˬ-ahˇ le-awˇ, kʼoeˇ gaˇ jawˇ-eu tsawˇ haˬ deuˬ-ahˇ Ka li gaˇ kawˆ dawˬ mehˬ mehˬ-euˬ meh.

⁶Piˇliˇpuˆ dawˬ mehˬ mehˬ gaˇ ya gaˬ-awˇ zahˬ leˇ paˬ-ehˇ gʼeh-eu jeˬ mˇ mehˬ gaˇ ya mawˇ ngeh, tsawˇ haˬ aˇ maꞈ deuˬ aˬ yawꞈ dawˬ mehˬ mehˬ gaˇ nui ma keuˆ-awˇ, yaw muiˬ paˬ-ehˇ naˇ haˬ-euˬ meh.

⁷Tsawˇ haˬ gʼawˬ mya gʼaˬ laꞈ kʼoeˇ uˇ-eu nehꞈ yaw jawꞈ deuˬ guˇ guˇ-ehˇ doˆ-iˇ-awˇ, kuiˇ shiˇ laꞈ shiˇ shiˇ-eu tsawˇ haˬ gʼawˬ mya ni taˬ leˇ-euˬ meh.

⁸Kʼoeˇ miˇ neh, meuˬ kʼoeˇ meuˬ laꞈ kʼoeˇ jawˇ-eu tsawˇ haˬ deuˬ laˬ kʼaˬ cehˇ dui dui-eu meh.

⁹Siˇmoˬ lehˇ myahˇ-euˬ tsawˇ haˬ tiˬ gʼaˬ kʼoeˇ gaˇ jawˇ-eu meh. Aˬ yawꞈ mah loˬ loˬ mehˬ nehˬ-awˇ, kʼoeˇ gaˇ jawˇ-eu tsawˇ haˬ deuˬ-ahˇ laˆ zahˬ nehˬ-euˬ aˇ yamˬ ui cuiˆ myahˇ laˇ-euˬ meh. Aˬ yawꞈ-aˬ, huiˬ-eu tsawˇ haˬ tiˬ gʼaˬ ma lehˇ yawˬ haˇ yawˬ ha ehˇ-eu meh.

¹⁰Meuˬ laꞈ kʼoeˇ kʼaˇ jawˇ-eu huiˬ zaˬ nyiˇ zaˬ dawˬ tawˆ luꞈ, “Tsawˇ haˬ heu gʼaˬ-aˬ, ‘Huiˬ dui dui-eu Baoˬ’ lehˇ kuˇ-eu Miˬyehˇ kʼoeˇ gʼaˬ-euˬ baoˬ pyeuꞈ-eu ngaˇ” lehˇ ehˇ-awˇ, aˬ yawꞈ-euˬ ehˇ dawˬ naˇ haˬ-euˬ meh.

¹¹Aˬ yawꞈ mah loˬ loˬ-eu laꞈ kʼoeˇ, aˬ yawꞈ maꞈ-ahˇ bi zahˬ leˇ-euˬ myahˇ laˇ-euˬ miˇ neh, aˬ yawꞈ-euˬ ehˇ dawˬ-ahˇ naˇ haˬ-euˬ meh.

¹²Ehˇ kʼawꞈ, Miˬyehˇ Miˇkʼahˬ gaˇ kawˆ hawˇ-eu Yeˬsuˇ Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ-ahˇ Piˇliˇpuˆ mehˬ gaˇ aˬ yawꞈ maꞈ jah laˇ-awˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, iˇ cuꞈ shawˇ-euˬ meh.

¹³Siˇmoˬ kʼoeˇ gʼaˬ kʼawꞈ jah laˇ-awˇ, iˇ cuꞈ shawˇ-awˇ Piˇliˇpuˆ-ahˇ maˬ gʼawˬ-iˇ ni jawˇ-euˬ meh. Kʼaˆ jeˬ-ehˇ gʼeh-eu jeˬ hawˇ-eu zahˬ leˇpaˬ-ehˇ gʼeh-eu jeˬ mˇ gaˇ aˬ yawꞈ ya mawˇ ngeh, zahˬ dui dui leˇ-euˬ meh.

¹⁴Saˬmaˬliˇ miˇ kʼahˬ-ahˇ jawˇ-eu tsawˇ haˬ deuˬ Miˬyehˇ dawˬ kawˬ-ahˇ ha geuꞈ-euˬ gaˇ kawˆ, Yeˬluˇsaˬlehˬ meuˬ-ahˇ jawˇ-eu gʼaˬ kʼehˇ deuˬ ya gaˬ ngeh, Beˬtuˆluˆ hawˇ-eu Yoˇhaˬ-ahˇ kʼoeˇ gaˇ bi le-euˬ meh.

¹⁵Aˬ yawꞈ nyaꞈ le keuˆ ngeh, jah-eu tsawˇ haˬ kʼoeˇ deuˬ Muiˬ-eu shawˇ-eu Yaw sahˇ Miˬyehˇ za ni guiˬ lahˬ shaˇ nehˬ-euˬ meh.

¹⁶Aˬ jeˬ miˇ neh ehˇ naˇ, aˬ yawꞈ maꞈ kʼoeˇ taˆ Muiˬ-eu shawˇ-eu Yaw sahˇ Miˬyehˇ maˬ zaꞈ le dah-ehˇ, Sahˬpaˬ Yeˬsuˇ-euˬ tsawˇ myahˇ uˬ moˆ iˇ cuꞈ shawˇ-awˇ jawˇ tawˬ luꞈ-eu meh.

¹⁷Beˬtuˆluˆ hawˇ-eu Yoˇhaˬ aˬ nyaꞈ aˬ yawꞈ maꞈ kʼoeˇ taˆ aˬ laꞈ baꞈ daˆ ngeh, aˬ yawꞈ maꞈ Muiˬ-eu shawˇ-eu Yaw sahˇ Miˬyehˇ za-euˬ meh.

¹⁸Jah-eu tsawˇ haˬ deuˬ kʼoeˇ taˆ gʼaˬ kʼehˇ kʼoeˇ nyiˬ gʼaˬ aˬ laꞈ baꞈ daˆ nehˬ ngeh, Yaw sahˇ Miˬyehˇ za gaˇ Siˇmoˬ ya mawˇ-euˬ meh. Kʼoeˇ ngeh, Beˬtuˆluˆ hawˇ-eu Yoˇhaˬ aˬ nyaꞈ-ahˇ aˬ yawꞈ pyuˇ naˇ haˬ biꞈ-awˇ heu loꞈ-ehˇ ehˇ-eu meh.

¹⁹“Ngaˬ neh aˬ laꞈ kʼaˇ baꞈ daˆ nehˬ-euˬ tsawˇ haˬ deuˬ Muiˬ-eu shawˇ-eu Yaw sahˇ Miˬyehˇ za nya ni, ngaˬ-ahˇ kʼawꞈ baoˬ teu jeˬ biꞈ nehˬ laꞈ sheˇ.”

²⁰Ehˇ kʼawꞈ, aˬ yawꞈ-ahˇ Beˬtuˆluˆ heu loꞈ-ehˇ ehˇ kʼoꞈ nehˬ-euˬ meh. “Miˬyehˇ neh biꞈ-euˬ laꞈ sawˬ-ahˇ pyuˇ neh zeuˇ tsehˆ nya meh lehˇ nawˇ noeˬ-eu miˇ neh, nawˇ hawˇ-eu nawˬ-euˬ pyuˇ, shiˬ buiˇ lah ma-ahˇ ga puꞈ-iˇ luꞈ-uˇ.

²¹Miˬyehˇ-euˬ mehˬ shi nawˬ-euˬ nui ma maˬ dawˇ-eu miˇ neh, nga maꞈ neh mˇ-euˬ gaˇ heu-ahˇ nawˇ maˬ taꞈ laˇ nya-a.

²²Haiˬ dui dui-eu nawˬ-euˬ nui noeˬ teu hmˬ noeˬ paˇ-awˬ. Kʼoeˇ loꞈ-ehˇ noeˬ-eu jeˬ-ahˇ iˬ baˇ pyehˬ nehˬ laꞈ ni, SahˬpaˬMiˬyehˇ-ahˇ guiˬ lahˬ shaˇ-awˬ.

²³Aˬ jeˬ miˇ neh lehˇ ehˇ naˇ, kʼaˬ jawꞈ ni gʼeh-eu myaˆ naˆ-eu jeˬ nawˬ-euˬ laꞈ kʼoeˇ tiˬ byah ni ahˇ-awˇ, iˬ baˇ neh nawˬ-ahˇ paꞈ tawꞈ taˬ-euˬ ngaˇ mawˇ luꞈ ma.”

²⁴Beˬtuˆluˆ hawˇ-eu Yoˇhaˬ aˬ nyaꞈ-ahˇ Siˇmoˬ ehˇ nehˬ-eu, “Naw nyaꞈ neh kʼaˇ ehˇ-euˬ jeˬ, ngaˬ-euˬ kʼoeˇ taˆ tiˬ jeˬ-iˬ maˬ bi keuˆ le-eu gʼaˇ duˬ, Sahˬpaˬ Miˬyehˇ-ahˇ guiˬ lahˬ shaˇ nehˬ laꞈ-awˬ.”

²⁵Beˬtuˆluˆ hawˇ-eu Yoˇhaˬ aˬ nyaꞈ-aˬ, saˇ kiˇ kamˬ-eu jeˬ mˇ gʼaˬ-awˇ, Sahˬpaˬ Miˬyehˇ-euˬ dawˬ mehˬ nehˬ gʼaˬ ngeh, Yeˬluˇsaˬlehˬ meuˬ-ahˇ gʼoꞈ-iˇ-euˬ meh. Gaˇ pehˇ gʼoꞈ-iˇ luꞈ ngeh, Saˬmaˬliˇ miˇ kʼahˬ laꞈ kʼoeˇ jaˆ-eu pu gʼawˬ mya pu-ahˇ, Laˬ kʼaˬ cehˇ-eu Guiˬ lahˬ dawˬ mehˬ nehˬ yaꞈ-euˬ meh.

²⁶SahˬpaˬMiˬyehˇ-euˬ mˬ taˆ gʼaˬ kʼehˇ tiˬ gʼaˬ Piˇliˇpuˆ-ahˇ ehˇ-eu, “Lehˬ hmˬ-awˇ, laꞈ oˆ paw pyawˬ-ahˇ jaˆ-eu Yeˬluˇsaˬlehˬ meuˬ-ahˇ neh Gaˬzaˬ meuˬ-ahˇ iˇ-eu gaˇ ma kʼoeˇ kahˇ-ahˇ iˇ-awˬ.” (Gaˇ ma kʼoeˇ kahˇ nymˬ-mˇ maˬ paˇ cah ni byehˇ-euˬ meh.)

²⁷Kʼoeˇ ngeh, Piˇliˇpuˆ lehˬ hmˬ dah-awˇ iˇ-euˬ meh. Iˬdiˬyoˇbyaˇ sahˬ paˬ ma-euˬ pyuˇ shuiˇ myawˬ gahˬ deuˬ-ahˇ jeˬ hmˬ bo saˆ-eu yaw huiˬ yaw mahˇ tiˬ gʼaˬ, Yeˬluˇsaˬlehˬ meuˬ-ahˇ uˬ duˬ tahˬ leˇ-euˬ gʼoꞈ le luꞈ-eu meh.

²⁸Aˬ yawꞈ-aˬ, mahˬ laˆ lawˬ-ahˇ dziˬ-awˇ, Miˬyehˇ gʼaˇ duˬ ngehˬ dah-eu Iˇsaˬyaˇ neh boꞈ taˬ-euˬ sahˬ boꞈ gui gui-ehˇ gʼoꞈ le luꞈ-eu meh.

²⁹“Mahˬ laˆ lawˬ kʼoeˇ laˇ-euˬ dawˬ peh tehˬ ni iˇ-awˬ” lehˇ, Muiˬ-eu shawˇ-eu Yaw sahˇ Miˬyehˇ Piˇliˇpuˆ-ahˇ ehˇ nehˬ-euˬ meh.

³⁰Piˇliˇpuˆ cehˆ keuˆ gʼeh ngeh, yaw huiˬ yaw mahˇ kʼoeˇ gʼaˬ Miˬyehˇ gʼaˇ duˬ ngehˬ dah-eu Iˇsaˬyaˇ neh boꞈ taˬ-euˬ sahˬ boꞈ-ahˇ gui luꞈ gaˇ ya gaˬ-awˇ, “Nawˇ gui luꞈ-eu gaˇ kawˆ teu gʼoˆ shaw laˇ miˇ-a loˇ” lehˇ naˇ haˬ-euˬ meh.

³¹Yaw huiˬ yaw mahˇ kʼoeˇ gʼaˬ ehˇ-eu, “Dawˬ tsuiꞈ ehˇ mehˬ nehˬ laꞈ-eu gʼaˬ maˬ jawˇ gaˇ, ngaˇ aˬ joˆ-ehˇ jahˇ-awˇ gʼoˆ shaw nya nmˇ.” kʼoeˇ naˇ, Piˇliˇpuˆ-ahˇ mahˬ laˆ lawˬ kʼoeˇ taˆ kuˇ daˆ-awˇ, aˬ yawꞈ nehˬ-ehˇ bi dziˬ-euˬ meh.

³²Aˬ yawꞈ gui luꞈ-eu Jaˇliꞈ aˇ deuˆ kʼoeˇ deuˆ-aˬ, heu loꞈ-ehˇ meh. “Diˬ sehꞈ-eu lehˇ bi tsahˇ gʼeh-euˬ, yawˇ-ahˇ aˬ yawꞈ duˇ leˇ-eu meh. Caꞈ hm bi tehˬ luꞈ-eu yawˇ zaˬ, ciˬ cuˇ ni awˆ daˬ-eu loꞈ-ehˇ, aˬ yawꞈ dawˬ maˬ ngehˬ doˆ laˇ-a.

³³Yaw tsaˬ yaw dawˇ jeˬ maˬ geuꞈ ni, aˬ yawꞈ shaꞈ dawˇ ni jahˇ-euˬ meh. Aꞈ yawꞈ miˇ kʼoeˇ taˆ ya dehꞈ-eu, aˇ nah aˇ yamˬ li-iˇ jiˇ-awˇ, tsuiꞈ dahˬ dahˬ shaw-euˬ baˬ da neh, tsuiꞈ toeˬ maˬ paˇ gui ka nya meh.”

³⁴Yaw huiˬ yaw mahˇ kʼoeˇ gʼaˬ Piˇliˇpuˆ-ahˇ naˇ haˬ-eu, “Miˬyehˇ gʼaˇ duˬ ngehˬ dah-eu heu gʼaˬ aˬ suˇ gʼaˬ-euˬ gaˇ kawˆ ehˇ-eu nga. Aˬ yawꞈ-euˬ gaˇ kawˆ ehˇ-euˬ nga loˇ. Aˬ cawˬ-euˬ gaˇ kawˆ ehˇ-euˬ nga loˇ. Ngaˬ-ahˇ tiˬ poˆ ehˇ nehˬ laꞈ sheˇ.”

³⁵Kʼoeˇ ngeh, Piˇliˇpuˆ-aˬ, Jaˇliꞈ kʼoeˇ deuˆ-ahˇ neh aˇ dahˬ beh-awˇ, Yeˬsuˇ gaˇ kawˆ Laˬ kʼaˬ cehˇ-eu Guiˬ lahˬ dawˬ ja mehˬ-euˬ meh.

³⁶Aˬ yawꞈ nyaꞈ gaˇ ma kahˇ li iˇ gʼeh-awˇ, iˇ cuꞈ jaˆ-eu jawˇ duˬ tiˬ tsahˇ-ahˇ iˇ keuˆ ngeh, yaw huiˬ yaw mahˇ kʼoeˇ gʼaˬ ehˇ-eu, “Heu gaˇ iˇ cuꞈ jaˆ ngaˇ. Ngaˇ iˇ cuꞈ shawˇ gaˇ aˬ jeˬ laˆ tsoeˬ-eu jaˆ ta.”[8]

³⁷Piˇliˇpuˆ ehˇ-eu, “Nawˬ-euˬ nui ma laꞈ kʼoeˇ keuˆ ni jah naˇ, iˇ cuꞈ shawˇ nya tehꞈ-a.” Aˬ yawꞈ ehˇ-eu, “Ngaˇ jah ma. Yeˬsuˇ Ka li-aˬ, Miˬyehˇ-euˬ Zaˬmaˇ meh lehˇ ngaˇ jah ma.”*

³⁸Mahˬ laˆ lawˬ bi naˬ leˇ-eu gʼaˇ duˬ, yaw huiˬ yaw mahˇ kʼoeˇ gʼaˬ dawˬ biꞈ-awˇ, Piˇliˇpuˆ aˬ yawꞈ nyaꞈ iˇ cuꞈ-ahˇ uˇ-iˇ-awˇ, Piˇliˇpuˆ neh iˇ cuꞈ shawˇ nehˬ-euˬ meh.

³⁹Aˬ yawꞈ nyaꞈ iˇ cuꞈ laꞈ kʼoeˇ neh doˆ laˇ ngeh, Sahˬpaˬ Miˬyehˇ-euˬ Yaw sahˇ neh Piˇliˇpuˆ-ahˇ ciˬ kʼoꞈ gʼeh-euˬ meh. Yaw huiˬ yaw mahˇ kʼoeˇ gʼaˬ Piˇliˇpuˆ-ahˇ maˬ paˇ ya mawˇ-euˬ kʼawꞈ, laˬ kʼaˬ cehˇ dui dui-eu laꞈ kʼoeˇ gʼoꞈ-iˇ-euˬ meh.

⁴⁰Piˇliˇpuˆ-aˬ, Aˬzoˇtuˆ meuˬ-ahˇ bi ciˬ kʼoꞈ keuˆ gʼeh-euˬ meh. Kʼoeˇ naˇ, Geˇsaˬliˇ miˇ kʼahˬ-ahˇ aˬ yawꞈ le-euˬ meh. Gaˇ pehˇ kʼaˇ jaˆ-eu meuˬ yawˬ meuˬ na luꞈ-ahˇ aˬ yawꞈ Laˬ kʼaˬ cehˇ-eu Guiˬ lahˬ dawˬ mehˬ-euˬ meh.