Read Akha Gʼaˬkʼehˇ 9 Bible Online

Gʼaˬkʼehˇ 9 - Akha bible

Gʼaˬkʼehˇ 9

¹Kʼoeˇ ngeh, Sawˇluˆ-aˬ, Sahˬpaˬ Yeˬsuˇ-euˬ mehˬ nah kʼaˇ caw teh-eu tsawˇ haˬ deuˬ-ahˇ sehꞈ ma lehˇ lmˬ lmˬ-ehˇ kʼaˬ-euˬ meh. Piˇ ma Yaw huiˬ gʼaˬ jawˇ gaˇ aˬ yawꞈ le-awˇ,

²Daˬmaˬsehˇ meuˬ-ahˇ jaˆ-eu Yuˇdaˆ tsawˇ haˬ-euˬ uˬ duˬ tahˬ nymˇ deuˬ-ahˇ sahˬ boꞈ bi boꞈ nehˬ-eu gʼaˇ duˬ shaˇ leˇ-euˬ meh. Sahˬpaˬ Yeˬsuˇ-euˬ Gaˇma[9] -ahˇ cah-eu deuˬ-ahˇ kʼoeˇ gaˇ ya mawˇ lawˬ naˇ, kʼaˬ dzeˇ zaˬ maˬ ehˇ, zaˬ miˬ zaˬ maˬ ehˇ, Yeˬluˇsaˬlehˬ meuˬ-ahˇ nyehꞈ ka leꞈ nya ni sahˬ boꞈ bi boꞈ nehˬ-eu lehˇ shaˇ leˇ-euˬ meh.

³Aˬ yawꞈ Daˬmaˬsehˇ meuˬ dawˬ peh le keuˆ ngeh, ja pyuˬ ni mˬ kʼoeˇ taˆ neh aˬ yawꞈ-euˬ tiˬ jawˬ yaw shehꞈ bya le-euˬ meh.

⁴Aˬ yawꞈ miˇ tsa coˬ dzeh-awˇ, heu loꞈ-ehˇ ehˇ-eu teˇ saˇ-ahˇ ya gaˬ-euˬ meh. “Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ kʼehˬ te.”

⁵Aˬ yawꞈ ehˇ-eu, “Sahˬpaˬ-oˇ, nawˇ aˬ suˇ gʼaˬ te.”

⁶Teˇ saˇ kʼoeˇ saˇ aˬ yawꞈ-ahˇ ehˇ-eu, “Ngaˇ-aˬ, nawˇ kʼehˬ luꞈ-eu Yeˬsuˇ ma. Tuˇ-awˇ meuˬ-ahˇ le uˇ-awˬ. Nawˇ aˬ joˆ-ehˇ ya jahˇ-eu gaˇ kawˆ kʼoeˇ gaˇ ehˇ nehˬ laꞈ tehꞈ-a.”

⁷Sawˇluˆ nehˬ-ehˇ le luꞈ-eu tsawˇ haˬ kʼoeˇ deuˬ, dawˬ maˬ ngehˬ ni tsoˆ leˇ jiˇ-euˬ meh. Aˬ yawꞈ maꞈ teˇ saˇ ya gaˬ-euˬ kʼawꞈ, tsawˇ haˬ maˬ ya mawˇ-a.

⁸Sawˇluˆ miˇ tsa coˬ dzeh-euˬ tuˇ laˇ-awˇ, myaˆ nuiˆ byeh haw-euˬ meh. Ehˇ kʼawꞈ, myaˆ nuiˆ maˬ mawˇ nya-a. Kʼoeˇ miˇ neh, aˬ yawꞈ maꞈ aˬ yawꞈ-euˬ aˬ laꞈ-ahˇ tsahˇ-awˇ, Daˬmaˬsehˇ meuˬ-ahˇ sheuˬ keuˆ gʼeh-euˬ meh.

⁹Smˬ nah keuˆ ni aˬ yawꞈ myaˆ nuiˆ maˬ mawˇ nya-a. Kʼoeˇ smˬ nah laꞈ kʼoeˇ, aˬ yawꞈ maˬ dzaˬ maˬ dawˇ ni jawˇ-euˬ meh.

¹⁰Daˬmaˬsehˇ meuˬ laꞈ kʼoeˇ, Aˬnaˬniˇ lehˇ myahˇ-euˬ jah-eu tsawˇ haˬ tiˬ gʼaˬ jawˇ-eu meh. Yaw sahˇ laꞈ kʼoeˇ bi siˬ bi mawˇ-eu jeˬ laꞈ kʼoeˇ, “Aˬnaˬniˇ-oˇ” lehˇ Sahˬpaˬ Yeˬsuˇ kuˇ ngeh, “Sahˬpaˬ-oˇ, ngaˇ heu gaˇ jawˇ ma” lehˇ, Aˬnaˬniˇ oˬ toˬ nehˬ-euˬ meh.

¹¹Sahˬpaˬ Yeˬsuˇ ehˇ-eu, “Lehˬ hmˬ-awˇ, Gaˇdawˇ lehˇ kuˇ-eu gaˇ ma kʼoeˇ kahˇ-ahˇ iˇ-awˇ, Yuˇdaˆ-euˬ nymˇ-ahˇ Daˬsuˆ meuˬ-ahˇ jawˇ-eu Sawˇluˆ lehˇ myahˇ-euˬ tsawˇ haˬ tiˬ gʼaˬ maˬ jawˇ nga loˇ lehˇ haw-iˇ-awˬ. Aˬ yawꞈ guiˬ lahˬ shaˇ shaˇ-ehˇ jawˇ meh.

¹²Aˬnaˬniˇ lehˇ myahˇ-euˬ tsawˇ haˬ tiˬ gʼaˬ uˇ le-awˇ, aˬ yawꞈ kʼoeˇ taˆ aˬ laꞈ baꞈ daˆ-awˇ, aˬ yawꞈ-euˬ myaˆ nuiˆ mawˇ laˇ nya ni guiˬ lahˬ shaˇ nehˬ le-euˬ gaˇ, yaw sahˇ laꞈ kʼoeˇ aˬ yawꞈ ya mawˇ-euˬ meh.”

¹³Aˬnaˬniˇ ehˇ-eu, “Sahˬpaˬ-oˇ, tsawˇ haˬ heu gʼaˬ gaˇ kawˆ hawˇ-eu, Yeˬluˇsaˬlehˬ meuˬ-ahˇ jawˇ-eu nawˬ-euˬ tsawˇ haˬ deuˬ-ahˇ aˬ yawꞈ neh kʼehˬ-euˬ kʼaˆ-euˬ gaˇ kawˆ, tsawˇ haˬ gʼawˬ mya gʼaˬ ngaˬ-ahˇ ja mehˬ laꞈ-euˬ meh.

¹⁴Piˇ ma aˬ yuiꞈ deuˬ neh aˬ yawꞈ-ahˇ baoˬ biꞈ taˬ-euˬ loꞈ-ehˇ, nawˬ-ahˇ uˬ duˬ kʼaˇ tahˬ-eu tsawˇ haˬ deuˬ-ahˇ nyehꞈ-eu gʼaˇ duˬ, Daˬmaˬsehˇ meuˬ-ahˇ aˬ yawꞈ laˇ-euˬ meh.”

¹⁵Sahˬpaˬ Yeˬsuˇ ehˇ-eu, “Iˇ-awˬ. Aˬ jeˬ miˇ neh ehˇ naˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, miˇ kʼahˬ sahˬ paˬ deuˬ maˬ ehˇ, Iˇsaˬleˬlaˇ tsawˇ haˬ deuˬ maˬ ehˇ, ngaˬ-euˬ tsawˇ myahˇ-ahˇ siˬ nya laˇ ni bi mˇ-eu gʼaˇ duˬ, aˬ yawꞈ-ahˇ ngaˇ tseˇ doˆ taˬ-euˬ ma.

¹⁶Ngaˬ-euˬ tsawˇ myahˇ gʼaˇ duˬ kʼehˬ-eu kʼaˆ-eu jeˬ-ahˇ aˬ yawꞈ aˇ naˆ ni ya daˬ paˬ-ehˇ jaˆ-eu gaˇ kawˆ, aˬ yawꞈ-ahˇ ngaˇ bi mawˇ ma.”

¹⁷Kʼoeˇ naˇ, Aˬnaˬniˇ iˇ-awˇ, nymˇ kʼoeˇ nymˇ-ahˇ uˇ-iˇ-awˇ, Sawˇluˆ kʼoeˇ taˆ aˬ laꞈ baꞈ daˆ-awˇ, heu loꞈ-ehˇ ehˇ nehˬ-euˬ meh. “Aˬ nyiˇ Sawˇluˆ-oˇ, nawˇ heu gaˇ laˇ luꞈ ngeh gaˇ pehˇ-ahˇ nawˬ-ahˇ bi mawˇ le-euˬ Sahˬpaˬ Yeˬsuˇ kʼoeˇ gʼaˬ ngaˬ-ahˇ nawˇ jawˇ gaˇ kʼehˇ gʼeh leꞈ-euˬ meh. Nawˇ myaˆ nuiˆ paˇ mawˇ laˇ-awˇ, Muiˬ-eu shawˇ-eu Yaw sahˇ Miˬyehˇ za nya ni, aˬ yawꞈ ngaˬ-ahˇ kʼehˇ gʼeh leꞈ-euˬ meh.”

¹⁸Kʼoeˇ ngeh, ngaˬ shaˬ ngaˬ gʼaw loꞈ-ehˇ gʼeh-eu jeˬ Sawˇluˆ-euˬ myaˆ nuiˆ-ahˇ neh tiˬ poˆ tehꞈ-ehˇ ga doˆ le-awˇ, myaˆ nuiˆ mawˇ laˇ-euˬ meh. Aˬ yawꞈ tuˇ-awˇ, iˇ cuꞈ shawˇ-euˬ meh.

¹⁹Kʼoeˇ naˇ, aˬ yawꞈ hawˬ dzaˬ-awˇ, gʼaˬ kʼoꞈ laˇ-euˬ meh. Sawˇluˆ-aˬ, Daˬmaˬsehˇ meuˬ-ahˇ jawˇ-eu jah-eu tsawˇ haˬ deuˬ nehˬ-ehˇ ui cuiˆ yaw myaˬ nah jawˇ-euˬ meh.

²⁰Aˬ yawꞈ tiˬ poˆ tehꞈ-ehˇ Yuˇdaˆ tsawˇ haˬ-euˬ uˬ duˬ tahˬ nymˇ kʼaˇ jaˆ gaˇ le-awˇ, Yeˬsuˇ-aˬ Miˬyehˇ-euˬ Zaˬ maˇ pyeuꞈ-eu gaˇ kawˆ dawˬ mehˬ mehˬ-euˬ meh.

²¹Aˬ yawꞈ dawˬ mehˬ mehˬ gaˇ kʼaˇ ya gaˬ-euˬ tsawˇ haˬ dawˬ tawˆ luꞈ zahˬ leˇ-awˇ ehˇ-eu, “Tsawˇ haˬ teu gʼaˬ Yeˬluˇsaˬlehˬ meuˬ laꞈ kʼoeˇ Yeˬsuˇ lehˇ kuˇ-eu gʼaˬ-ahˇ uˬ duˬ tahˬ-eu tsawˇ haˬ deuˬ-ahˇ sehꞈ-euˬ kʼoeˇ gʼaˬ maˬ ngeuˇ nga loˇ. Heu gaˇ kʼawꞈ ni, kʼoeˇ loꞈ-ehˇ gʼeh-eu tsawˇ haˬ deuˬ-ahˇ nyehꞈ-awˇ, piˇ ma aˬ yuiꞈ deuˬ jawˇ gaˇ sheuˬ kʼoꞈ gʼeh-eu lehˇ aˬ yawꞈ laˇ-euˬ maˬ ngeuˇ-a loˇ.”

²²Ehˇ kʼawꞈ, Sawˇluˆ dawˬ mehˬ mehˬ-eu baoˬ ahˇ dzehˬ laˇ-awˇ, Yeˬsuˇ-aˬ, Ka li pyeuꞈ-eu gaˇ kawˆ aˬ yawꞈ saˇ kiˇ kamˬ-eu tsaˬ dui byah dui dui-eu miˇ neh, Daˬmaˬsehˇ meuˬ-ahˇ jawˇ-eu Yuˇdaˆ tsawˇ haˬ deuˬ tiˬ jeˬ-iˬ maˬ ehˇ nya-a.

²³Gʼawˬ mya nah byah laˇ-awˇ, Sawˇluˆ-ahˇ sehꞈ-eu gʼaˇ duˬ Yuˇdaˆ tsawˇ haˬ deuˬ bawˬ kʼoeˬ-euˬ meh.

²⁴Ehˇ kʼawꞈ, aˬ yawꞈ maꞈ kʼoeˇ loꞈ-ehˇ bawˬ kʼoeˬ-euˬ gaˇ kawˆ Sawˇluˆ ya siˬ-euˬ meh. Aˬ yawꞈ-ahˇ sehꞈ-eu gʼaˇ duˬ, uˬ ciꞈ nah gʼahˇ maˬ ehˇ meuˬ-euˬ lahˇ kʼehˬ deuˬ-ahˇ aˬ yawꞈ maꞈ loꞈ luꞈ-eu meh.

²⁵Ehˇ kʼawꞈ, aˬ yawꞈ-euˬ mehˬ nah caw teh-eu tsawˇ haˬ deuˬ, uˬ ciꞈ paw aˬ yawꞈ-ahˇ kʼaˆ kaˇ-ahˇ bi uˇ-iˇ-awˇ, meuˬ lahˇ kʼoeˇ taˆ neh laꞈ nyiˇ paw aˬ za za-ehˇ pyehˬ ka nehˬ-euˬ meh.

²⁶Sawˇluˆ Yeˬluˇsaˬlehˬ meuˬ-ahˇ gʼoꞈ-iˇ-awˇ, zaˬ lahˇ deuˬ nehˬ-ehˇ tiˬ kawˆ loꞈ-ehˇ jawˇ-eu lehˇ gʼeh-euˬ meh. Ehˇ kʼawꞈ, aˬ yawꞈ zaˬ lahˇ pyeuꞈ laˇ-euˬ gaˇ aˬ yawꞈ maꞈ maˬ jah-ehˇ, dawˬ tawˆ luꞈ aˬ yawꞈ-ahˇ guˆ-eu meh.

²⁷Kʼoeˇ ngeh, Baˬnaˬbaˇ oe-awˇ, aˬ yawꞈ-ahˇ gʼaˬ kʼehˇ deuˬ jawˇ gaˇ sheuˬ gʼeh-euˬ meh. Sawˇluˆ gaˇ pehˇ-ahˇ Sahˬpaˬ Yeˬsuˇ-ahˇ aˬ joˆ-ehˇ ya tahˬ puˬ-awˇ, Sahˬpaˬ Yeˬsuˇ aˬ yawꞈ-ahˇ aˬ joˆ-ehˇ dawˬ ngehˬ cawˬ nehˬ-euˬ gaˇ kawˆ, Baˬnaˬbaˇ neh aˬ yawꞈ maꞈ-ahˇ dzawˇ nehˬ-euˬ meh. Daˬmaˬsehˇ meuˬ laꞈ kʼoeˇ, Yeˬsuˇ-euˬ tsawˇ myahˇ uˬ moˆ Sawˇluˆ kʼaˬ duˬ ni dawˬ mehˬ mehˬ-euˬ gaˇ kawˆ kʼawꞈ, aˬ yawꞈ dzawˇ nehˬ-euˬ meh.

²⁸Kʼoeˇ ngeh jawˇ, Sawˇluˆ aˬ yawꞈ maꞈ nehˬ-ehˇ ya jawˇ-awˇ, Yeˬluˇsaˬlehˬ meuˬ doe ni aˬ yawꞈ maꞈ nehˬ-ehˇ cah cah-ehˇ Sahˬpaˬ Yeˬsuˇ-euˬ tsawˇ myahˇ uˬ moˆ kʼaˬ duˬ ni dawˬ mehˬ mehˬ-euˬ meh.

²⁹Heˬlaˬsaˇ dawˬ ngehˬ-eu Yuˇdaˆ tsawˇ haˬ deuˬ nehˬ-ehˇ kʼawꞈ, aˬ yawꞈ dawˬ ja ja-awˇ tsawˇ pyehˇ pyehˇ-euˬ meh. Ehˇ kʼawꞈ, aˬ yawꞈ maꞈ aˬ yawꞈ-ahˇ sehꞈ-eu lehˇ gʼeh-eu meh.

³⁰Jah-eu tsawˇ haˬ deuˬ gaˇ kawˆ kʼoeˇ-ahˇ ya siˬ ngeh, Sawˇluˆ-ahˇ Geˇsaˬliˇ meuˬ-ahˇ sheuˬ gʼeh-awˇ, Daˬsuˆ meuˬ-ahˇ bi gʼoꞈ leˇ-euˬ meh.

³¹Kʼoeˇ ngeh, Yuˇdaˆ miˇ kʼahˬ, Gaˬliˬlehˇ miˇ kʼahˬ hawˇ-eu, Saˬmaˬliˆ miˇ kʼahˬ doe ni jaˆ-eu Ka li zaˬ aˇ muˇ deuˬ, nui saˇ oꞈ-eu laꞈ kʼoeˇ coꞈ ngehˇ ni tiˬ kʼehˬ ya dehꞈ-euˬ meh. SahˬpaˬMiˬyehˇ-ahˇ yaw zeu baw-awˇ dehꞈ-eu loꞈ-ehˇ, Muiˬ-eu shawˇ-eu Yaw sahˇ Miˬyehˇ caw ba-eu laꞈ kʼoeˇ myaˬ laˇ behˇ laˇ luꞈ-eu meh.

³²Beˬtuˆluˆ-aˬ, doe doe-ehˇ cah cah-ehˇ jawˇ-euˬ meh. Tiˬ poˆ-aˬ, Luˇda meuˬ-ahˇ jawˇ-eu Miˬyehˇ-euˬ tsawˇ haˬ deuˬ jawˇ gaˇ dawˬ deh gʼa-iˇ-euˬ meh.

³³Kʼoeˇ gaˇ, kuiˇ shiˇ laꞈ shiˇ shiˇ-eu miˇ neh yehꞈ kʼoꞈ keuˆ ni yuꞈ zaˇ laꞈ nyiˇ maˬ doˆ le nya-ehˇ jawˇ-eu Ehˇneˬ lehˇ myahˇ-euˬ tsawˇ haˬ tiˬ gʼaˬ-ahˇ aˬ yawꞈ mawˇ-euˬ meh.

³⁴Beˬtuˆluˆ aꞈ yawꞈ-ahˇ ehˇ nehˬ-eu, “Ehˇneˬ-oˇ, Yeˬsuˇ Ka li nawˬ-ahˇ bi muiˬ laˇ-euˬ meh. Tuˇ-awˇ nawˬ-euˬ yuꞈ zaˇ laˆ luiˆ-awˬ.” Kʼoeˇ ngeh, Ehˇneˬ ja pyuˬ ni tuˇ laˇ-euˬ meh.

³⁵Luˇda meuˬ hawˇ-eu Shaˬloˬ miˇ kʼahˬ-ahˇ jawˇ-eu tsawˇ haˬ dawˬ tawˆ luꞈ tsawˇ haˬ kʼoeˇ gʼaˬ-ahˇ ya mawˇ ngeh, Sahˬpaˬ Yeˬsuˇ jawˇ paw pyawˇ laˇ jiˇ-euˬ meh.

³⁶Yuˇbeˬ meuˬ-ahˇ Daˬbiˇtaˆ lehˇ myahˇ-euˬ jah-eu tsawˇ haˬ tiˬ gʼaˬ jawˇ-eu meh. (Aˬ yawꞈ-euˬ tsawˇ myahˇ kʼoeˇ-aˬ, Heˬlaˬsaˇ dawˬ-ahˇ neh Dawˬkaꞈ lehˇ kuˇ-awˇ, dawˬ tsuiꞈ-aˬ, “Kʼaˬ tsehˆ” lehˇ ehˇ mawꞈ-eu meh.) Aˬ yawꞈ-aˬ, aˬ myah luꞈ yaw muiˬ jeˬ mˇ-awˇ, shaˬ-eu zahˬ-eu tsawˇ haˬ deuˬ-ahˇ maˬ tsehˆ leˇ ni caw na nehˬ-eu meh.

³⁷Aˇ yamˬ kʼoeˇ yamˬ-ahˇ aˬ yawꞈ naˇ-awˇ shiˇ-euˬ meh. Aˬ yawꞈ-euˬ gʼawˇ mawˇ-ahˇ iˇ cuꞈ dzuiꞈ nehˬ-awˇ, nymˇ laꞈ taˆ tiˆ-ahˇ jaˆ-eu kuˆ lawˆ tiˬ lawˆ laꞈ kʼoeˇ baꞈ taˬ-euˬ meh.

³⁸Yuˇbeˬ meuˬ-aˬ, Luˇda meuˬ-ahˇ yaw kʼaˆ-ehˇ maˬ kaˬ-a. Yuˇbeˬ meuˬ-ahˇ jawˇ-eu jah-eu tsawˇ haˬ deuˬ, Luˇdaˆ meuˬ-ahˇ Beˬtuˆluˆ jawˇ luꞈ-eu gaˇ kawˆ ya gaˬ ngeh, tsawˇ haˬ nyiˬ gʼaˬ pyehˬ gʼeh-awˇ, “Nga maꞈ jawˇ Gaˇ yaw kawˇ-ehˇ tiˬ poˆ oe nehˬ laꞈ sheˇ” lehˇ bi ehˇ gaˬ leˇ-euˬ meh.

³⁹Beˬtuˆluˆ lehˬ hmˬ-awˇ, aˬ yawꞈ nyaꞈ nehˬ-ehˇ iˇ-euˬ meh. Aˬ yawꞈ iˇ keuˆ ngeh, aˬ yawꞈ-ahˇ nymˇ laꞈ taˆ tiˆ-ahˇ sheuˬ daˆ leꞈ-euˬ meh. Miˬ coeˬ miˬ ma dawˬ tawˆ luꞈ aˬ yawꞈ-euˬ tiˬ jawˬ uiˬ le-awˇ, Dawˬkaꞈ yaw dehꞈ dehꞈ ngeh guꞈ nehˬ yaꞈ-euˬ mehˬ tsoeˬ deuˬ aˬ yawꞈ-ahˇ sheu haw sheu haw-ehˇ ngoeˇ-eu meh.

⁴⁰Beˬtuˆluˆ-aˬ, aˬ yawꞈ maꞈ dawˬ tawˆ luꞈ-ahˇ laꞈ nyiˇ bi doˆ-iˇ jiˇ-awˇ, pawˬ tsuiꞈ pawˬ dmˬ dmˬ-awˇ guiˬ lahˬ shaˇ-euˬ meh. Kʼoeˇ naˇ, shiˇ taˬ-euˬ gʼawˇ mawˇ jaˆ gaˇ ciˬ pyawˇ-awˇ, “Daˬbiˇtaˆ-oˇ, tuˇ-awˬ”lehˇ ehˇ nehˬ-euˬ meh. Aˬ yawꞈ myaˆ nuiˆ byeh haw laˇ-awˇ, Beˬtuˆluˆ-ahˇ mawˇ ngeh, tuˇ-awˇ nuiˇ-euˬ meh.

⁴¹Kʼoeˇ naˇ, Beˬtuˆluˆ aˬ laꞈ cawˬ nehˬ-awˇ, aˬ yawꞈ-ahˇ gʼeu tuˇ nehˬ-euˬ meh. Kʼoeˇ ngeh, jah-eu tsawˇ haˬ deuˬ hawˇ-eu miˬ coeˬ miˬ ma kʼoeˇ deuˬ-ahˇ Beˬtuˆluˆ kuˇ-awˇ, zaˬ miˬ zaˬ kʼoeˇ gʼaˬ-ahˇ, yaw dehꞈ-ehˇ aˬ yawꞈ maꞈ-ahˇ a kʼoꞈ nehˬ-euˬ meh.

⁴²Gaˇ kawˆ kʼoeˇ Yuˇbeˬ meuˬ meuˬ lah-ehˇ gaˬ doe-iˇ-awˇ, tsawˇ haˬ gʼawˬ mya ni Sahˬpaˬ Yeˬsuˇ-ahˇ jah laˇ-euˬ mehl.

⁴³Beˬtuˆluˆ-aˬ, Yuˇbeˬ meuˬ laꞈ kʼoeˇ Siˇmoˬ lehˇ myahˇ-euˬ shaˬ kʼoˆ jahˇ-eu gʼaˬ nehˬ-ehˇ gʼawˬ mya nah jawˇ-euˬ meh.