Read Akha Loˇmaˆ sahˬ boꞈ 11 Bible Online

Loˇmaˆ sahˬ boꞈ 11 - Akha bible

Loˇmaˆ sahˬ boꞈ 11

¹“Miˬyehˇ aˬ yawꞈ-euˬ tsawˇ haˬ deuˬ-ahˇ byehˇ dzeh taˬ loˇ” lehˇ ngaˇ naˇ haˬ mawꞈ-eu ma. Maˬ ngeuˇ-a. Ngaˇ kʼawꞈ, Iˇsaˬleˬlaˇ tsawˇ haˬ ma. Aˬbyaˬhaˬ-euˬ zaˬ deuˬ uˆ deuˬ pyeuꞈ-eu Beˬyaˬmiˬ tsawˇ jeuˬ ma.

²Aˇ dahˬ beh ngeh neh aˬ yawꞈ neh tseˇ doˆ taˬ-euˬ tsawˇ jeuˬ-ahˇ aˬ yawꞈ maˬ byehˇ dzeh-a. Eˇliˇyaˆ neh Iˇsaˬleˬlaˇ tsawˇ haˬ deuˬ-euˬ yaw lehˬ Miˬyehˇ-ahˇ ehˇ nehˬ-euˬ gaˇ kawˆ Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ naw maꞈ siˬ nya meh.

³“Sahˬpaˬ Miˬyehˇ-oˇ, nawˬ-euˬ gʼaˇ duˬ ngehˬ dah-eu tsawˇ haˬ deuˬ-ahˇ aˬ yawꞈ maꞈ sehꞈ-awˇ, nawˬ-euˬ lawˇ duˬ deuˬ-ahˇ aˬ yawꞈ maꞈ deh pyaˆ-euˬ meh. Ngaˇ tiˬ gʼaˬ tehꞈ-ehˇ dzeuˇ-iˇ-awˇ, ngaˬ-ahˇ kʼawꞈ aˬ yawꞈ maꞈ sehꞈ-eu lehˇ leh jeh luꞈ meh”

⁴Miˬyehˇ aˬ yawꞈ-ahˇ aˬ joˆ-ehˇ ehˇ kʼoꞈ nehˬ-euˬ ta. “Maˬ ngeuˇ-eu miˬyehˇ pyeuꞈ-eu Baˬlaˇ miˬ yehˇ-ahˇ pawˬ tsuiꞈ pawˬ dmˬ dmˬ-awˇ uˬ duˬ maˬ tahˬ-euˬ tsawˇ haˬ shiꞈ heˇ gʼaˬ ngaˬ-euˬ gʼaˇ duˬ bi dzeˇ-euˬ ma” lehˇ ehˇ kʼoꞈ nehˬ-euˬ meh.

⁵Nymˬ-mˇ kʼawꞈ, kʼoeˇ gaˇ duˇ-eu meh. Miˬyehˇ gʼawˬ shaˬ gaˬ-awˇ tseˇ doˆ taˬ-euˬ tsawˇ haˬ ui cuiˆ dzeˇ-eu meh.

⁶Tseˇ doˆ-euˬ kʼoeˇ-aˬ, aˬ yawꞈ gʼawˬ shaˬ gaˬ-eu baˬ da neh meh. Aˬ yawꞈ maꞈ neh mˇ-euˬ gaˇ baˬ da neh maˬ ngeuˇ-a. Tsawˇ haˬ zaˬ neh mˇ-euˬ gaˇ baˬ da neh tseˇ doˆ-euˬ ngeuˇ naˇ, aˬ yawꞈ gʼawˬ shaˬ gaˬ-eu jeˬ-aˬ, maˇ maˇ ni gʼeh-eu gʼawˬ shaˬ gaˬ-eu jeˬ maˬ ngeuˇ-a.

⁷Toˆ-ehˇ ngeuˇ naˇ, aˬ joˆ-ehˇ ehˇ nmˇ. Iˇsaˬleˬlaˇ tsawˇ haˬ deuˬ-aˬ, yawˬ ha poˆ luꞈ-eu jeˬ-ahˇ maˬ poˆ mawˇ-aˬ. Miˬyehˇ neh tseˇ doˆ-euˬ deuˬ pyeuꞈ-eu tsawˇ haˬ ui cuiˆ tehꞈ-ehˇ kʼoeˇ-ahˇ poˆ mawˇ-euˬ meh. Kʼoeˇ deuˬ-ahˇ dzeuˇ naˇ, tsawˇ haˬ dawˬ tawˆ luꞈ Miˬyehˇ kuˇ gaˇ maˬ gaˬ leˇ ni naˬ bawˬ bawˬ jiˇ-euˬ meh.

⁸Jaˇliꞈ laꞈ kʼoeˇ heu loꞈehˇ ehˇ taˬ-euˬ meh. “Aˬ yawꞈ maꞈ-euˬ nui ma gʼahˇ-awˇ, naˬ bawˬ bawˬ-awˇ myaˆ behꞈ behꞈ ni, Miˬyehˇ neh jahˇ nehˬ-euˬ miˇ neh, iˬ nah keuˆ ni maˬ mawˇ nya-a.”

⁹Daˬbiˇ neh ehˇ taˬ-euˬ heu loꞈ-ehˇ jaˆ-eu meh. “Aˬ yawꞈ maꞈ yaw bui bui luꞈ ngeh, lahˇ ju neh bi kʼmˇ paꞈ luꞈ-uˇ. Aˬ yawꞈ maꞈ coˬ-iˇ-eu laꞈ kʼoeˇ, aˬ cawˬ kʼehˬ gaˇ ya daˬ luꞈ-uˇ.

¹⁰Aꞈ yawꞈ maꞈ myaˆ behꞈ behꞈ-iˇ-awˇ, maˬ mawˇ nya ni pyeuꞈ-iˇ luꞈ-uˇ. Shaˬ zahˬ pi-eu maˬ gʼaˬ leˇ-ehˇ, daˇ tsuiꞈ kʼoꞈ-iˇ-awˇ shaˬ luꞈ-uˇ.”

¹¹“Yuˇdaˆ tsawˇ haˬ deuˬ sahˬ tiꞈ tiꞈ ngeh, coˬ dzeh-iˇ-awˇ maˬ paˇ tuˇ laˇ nya ni pyeuꞈ-iˇ taˬ loˇ” lehˇ ngaˇ naˇ haˬ mawꞈ-eu ma. Maˬ ngeuˇ-a. Aˬ yawꞈ maꞈ iˬ baˇ mˇ-euˬ baˬ da neh, aˬ yawꞈ maꞈ myaˆ bi naˆ-eu gʼaˇ duˬ Yuˇdaˆ tsawˇ haˬ maˬ ngeuˇ-eu deuˬ kʼoeˇ taˆ ka kʼoꞈ-eu jeˬ bi keuˆ le-euˬ meh.

¹²Yuˇdaˆ tsawˇ haˬ deuˬ iˬ baˇ mˇ-euˬ miˇ neh miˇ tsaˬ zaˬ deuˬ yaw muiˬ gʼawˬ mya jeˬ siˬ nya laˇ-awˇ, aˬ yawꞈ maꞈ guiˬ lahˬ saꞈ laˇ paw iˇ shaˬ shaˬ-euˬ kʼoeˇ-aˬ, aˬ cawˬ tsawˇ jeuˬ guiˬ lahˬ gʼawˬ mya ni za-euˬ meh.

¹³Nymˬ-mˇ poˆ jawˇ-aˬ, naw maꞈ Yuˇdaˆ tsawˇ haˬ maˬ ngeuˇ-eu deuˬ-ahˇ ngaˇ ehˇ luꞈ-eu ma. Ngaˇ-aˬ, Yuˇdaˆ tsawˇ haˬ maˬ ngeuˇ-eu deuˬ gʼaˇ duˬ gaˇ mˇ-eu gʼaˬ kʼehˇ kʼaˇ geuꞈ luꞈ kʼoeˇ keuˆ ni, ngaˬ-euˬ gaˇ-ahˇ ngaˇ taˬ huiˬ dui dui-eu ma.

¹⁴Ngaˇ kʼoeˇ loꞈ-ehˇ mˇ-eu miˇ neh ngaˬ-euˬ tsawˇ jeuˬ ngaˬ-ahˇ myaˆ naˆ-eu laꞈ kʼoeˇ, aˬ yawꞈ maꞈ tiˬ paˆ na deuˬ-ahˇ Miˬyehˇ ka kʼoꞈ nehˬ-eu duˇ.

¹⁵Aˬ yawꞈ maꞈ-ahˇ Miˬyehˇ byehˇ dzeh nehˬ ngeh, Miˬyehˇ-ahˇ muiˇ-euˬ aˬ cawˬ tsawˇ jeuˬ kʼoeˇ deuˬ Miˬyehˇ-ahˇ cawˬ cawˬ taꞈ nya-eu tsawˇ haˬ bi pyeuꞈ laˇ-euˬ-aˬ, aˬ yawꞈ maꞈ-ahˇ ha geuꞈ nehˬ ngeh jawˇ aˬ joˆ-ehˇ paˇ pyeuꞈ laˇ nmˇ. Shiˇ-euˬ tsawˇ haˬ paˇ bi gʼoꞈ dehꞈ laˇ-euˬ gaˇ duˇ tehꞈ-a.

¹⁶Kaˬ muˇ jahˇ beh beh-euˬ siˬ Miˬyehˇ-ahˇ biꞈ naˇ, kaˬ muˇ tiˬ tsmˇ tsmˇ lah-ehˇ Miˬyehˇ-ahˇ damˬ nehˬ-euˬ jeˬ pyeuꞈ-eu meh. Aˇ bawˇ tiˬ bawˇ-euˬ duˬ ciˇ Miˬyehˇ-ahˇ damˬ nehˬ naˇ, uˬ laꞈ deuˬ kʼawꞈ Miˬyehˇ-euˬ pyeuꞈ-eu meh.

¹⁷Tsawˇ haˬ zaˬ neh ka taˬ-euˬ saˬ loˬ aˇ bawˇ-euˬ uˬ laꞈ tiˬ paˆ na deuˬ deuˆ tsehˆ dzeh-awˇ, bawˇ tsahˬ-ahˇ dehꞈ-eu saˬ loˬ aˇ bawˇ-euˬ uˬ laꞈ yuˇ-awˇ paˇ tsaꞈ nehˬ-euˬ meh. Naw maꞈ Yuˇdaˆ tsawˇ haˬ maˬ ngeuˇ-eu deuˬ-aˬ, bawˇ tsahˬ-ahˇ dehꞈ-eu saˬ loˬ aˇ bawˇ-ahˇ duˇ-eu meh. Ehˇ kʼawꞈ, Yuˇdaˆ tsawˇ haˬ-euˬ guiˬ lahˬ saꞈ laˇ paw gʼaˬ kʼaˆ dui dui-eu jeˬ-ahˇ nymˬ-mˇ naw maꞈ za luꞈ-eu meh.

¹⁸Kʼoeˇ loꞈ-ehˇ ngeuˇ naˇ, bi deuˆ tsehˆ dzeh-euˬ uˬ laꞈ-ahˇ duˇ-eu tsawˇ haˬ deuˬ-ahˇ naw maꞈ yehˬ bawˬ sehˇ lu-ehˇ maˬ ya ehˇ-a. Naw maꞈ a jeˬ kʼahˬ sehˇ jehˆ kʼaˇ paˇ za ta. Naw maꞈ-aˬ, uˬ laꞈ tehꞈ meh. Duˬ ciˇ kʼoeˇ naw maꞈ-ahˇ gʼoe-eu maˬ ngeuˇ-a. Naw maꞈ duˬ ciˇ-ahˇ gʼoe luꞈ-eu meh.

¹⁹“Ngeuˇ tehꞈ-a. Ehˇ kʼawꞈ, nga maꞈ tsaꞈ leˇ kʼaˇ za ni uˬ laꞈ tiˬ paˆ na deuˬ bi deuˆ tsehˆ dzeh-euˬ maˬ ngeuˇ-a loˇ” lehˇ naw maꞈ ehˇ mawꞈ tehꞈ-a.

²⁰Naw maꞈ ehˇ-eu tsaˬ meh. Aˬ yawꞈ maꞈ-aˬ, maˬ jah-eu miˇ neh bi deuˆ tsehˆ dzeh-euˬ meh. Naw maꞈ-aˬ, jah-eu miˇ neh ziꞈ luꞈ meh. Ehˇ kʼawꞈ, nui ma taˬ huiˬ. Yahˇ yahˇ-ehˇ dehꞈ-awˬ.

²¹Aˇ bawˇ aˬ yawꞈ-ahˇ tsoꞈ doˆ laˇ-euˬ uˬ laꞈ-ahˇ duˇ-eu Yuˇdaˆ tsawˇ haˬ deuˬ-ahˇ keuˆ ni aˬ yawꞈ maˬ taˬ nehˬ-eu-aˬ, naw maꞈ-ahˇ taˬ nehˬ laꞈ tehꞈ-a lehˇ duˇ te loˇ.

²²Miˬyehˇ gʼawˬ shaˬ gaˬ-eu jeˬ hawˇ-eu zuiˆ-eu jeˬ heu nyiˬ hmˬ-ahˇ, heu gaˇ aˬ dui ya mawˇ-euˬ ma. Iˬ baˇ mˇ-eu tsawˇ haˬ deuˬ-ahˇ aˬ yawꞈ zuiˆ-awˇ, aˬ yawꞈ gʼawˬ shaˬ haw gaˬ paˬ-ehˇ kʼaˇ dehꞈ kʼoeˇ keuˆ ni naw maꞈ-ahˇ aˬ yawꞈ gʼawˬ shaˬ gaˬ tehꞈ-a. Ehˇ kʼawꞈ, aˬ yawꞈ gʼawˬ shaˬ gaˬ paˬ-ehˇ maˬ dehꞈ naˇ, naw maꞈ-ahˇ kʼawꞈ deuˆ tsehˆ dzeh tehꞈ-a.

²³Yuˇdaˆ tsawˇ haˬ deuˬ maˬ jah-eu nui ma kʼoeˇ siˬ-ahˇ byehˇ dzeh naˇ, aˬ yawꞈ maꞈ-euˬ jawˇ duˬ-ahˇ paˇ laˆ tsaꞈ kʼoꞈ nehˬ tehꞈ-a. Aˬ jeˬ miˇ neh ehˇ naˇ, Miˬyehˇ kʼoeˇ loꞈ-ehˇ jahˇ nya-eu baoˬ jaˆ-eu meh.

²⁴Bawˇ tsahˬ-ahˇ dehꞈ-eu saˬ loˬ aˇ bawˇ-euˬ uˬ laꞈ pyeuꞈ-eu Yuˇdaˆ tsawˇ haˬ maˬ ngeuˇ-eu naw maꞈ-ahˇ deuˆ tsehˆ laꞈ-awˇ, tsawˇ haˬ neh ka taˬ-euˬ saˬ loˬ aˇ bawˇ-ahˇ tsaꞈ nehˬ-eu jeˬ pyeuꞈ-eu, tiˬ jawˇ-iˬ maˬ gaˬ haw-euˬ jeˬ-ahˇ Miˬyehˇ mˇ nya-eu-aˬ, ka taˬ-euˬ saˬ loˬ aˇ bawˇ-euˬ uˬ laꞈ pyeuꞈ-eu Yuˇdaˆ tsawˇ haˬ deuˬ-ahˇ aˬ yawꞈ yaw oeˇ kʼoeˇ bawˇ-ahˇ paˇ tsaꞈ kʼoꞈ nehˬ-eu kʼoeˇ-aˬ, Miˬyehˇ gʼaˇ duˬ awˬ dui dui tehꞈ-a.

²⁵Aˬ yuiꞈ aˬ nyiˇ Ka li zaˬ deuˬ-oˇ, naw maꞈ yawˬ haˇ yawˬ ha zaˬ siˬ tsawˇ gahˇ ahˇ ma lehˇ maˬ ya noeˬ ni, zaꞈ taˬ-euˬ yaw tsaˬ yaw dawˇ tiˬ jeˬ naw maꞈ-ahˇ ngaˇ ehˇ nehˬ mawꞈ miˇ-a. Iˇsaˬleˬlaˇ tsawˇ haˬ deuˬ nui ma gʼahˇ-eu kʼoeˇ-aˬ, gʼawˬ myahˇ ni maˬ gmˬ-aˇ. Aˬ cawˬ tsawˇ jeuˬ aˇ myaˆ gʼaˬ bi laˇ byah-eu lehˇ Miˬyehˇ neh noeˬ taˬ-euˬ loꞈ-ehˇ laˇ byah ngeh keuˆ ni gmˬ-eu tehꞈ meh.

²⁶Kʼoeˇ ngeh jawˇ, Iˇsaˬleˬlaˇ tsawˇ haˬ dawˬ tawˆ luꞈ ka kʼoꞈ-eu jeˬ za tehꞈ-a. Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jaˆ-eu meh. “Ka kʼoꞈ le-eu yaw sahˇ kʼoeˇ gʼaˬ, Ziˇoˬ gawˬ jawˬ-ahˇ neh oe-awˇ, Yaˬkoˆ-euˬ zaˬ deuˬ uˆ deuˬ-euˬ, maˬ muiˬ maˬ jaˬ-eu yaw haiˬ jeˬ, dawˬ tawˆ luꞈ yuˇ dzeh nehˬ tehꞈ-a.

²⁷Aˬ yawꞈ maꞈ-euˬ iˬ baˇ-ahˇ ngaˇ, yuˇ dzeh nehˬ gʼaˬ jiˇ ngeh tiˬ jawˇ, ngaˬ-euˬ dawˬ ma saˇ jaˇ heu hmˬ, aˬ yawꞈ maꞈ nehˬ-ehˇ ngaˇ dzaˬ ma.”

²⁸Yuˇdaˆ tsawˇ haˬ deuˬ-aˬ, Laˬ kʼaˬ cehˇ-eu Guiˬ lahˬ dawˬ heu-ahˇ maˬ ha geuꞈ-eu paw dzeˇ neh ehˇ leꞈ naˇ, naw maꞈ Yuˇdaˆ tsawˇ haˬ maˬ ngeuˇ-eu deuˬ-euˬ dah zaˇ Miˬyehˇ-ahˇ muiˇ-eu tsawˇ haˬ pyeuꞈ laˇ-euˬ meh. Ehˇ kʼawꞈ, Miˬyehˇ neh tseˇ doˆ-euˬ paw dzeˇ neh paˇ ehˇ leꞈ naˇ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ myaˆ pyawˬ naˇ mehˇ baˬ da neh Miˬyehˇ-euˬ nui gaˬ-ahˇ za taˬ-euˬ tsawˇ haˬ pyeuꞈ-eu meh.

²⁹Aˬ jeˬ miˇ neh ehˇ naˇ, Miˬyehˇ-aˬ, yawˬ ha neh tseˇ doˆ-awˇ guiˬ lahˬ biꞈ taˬ-euˬ tsawˇ haˬ deuˬ kʼoeˇ taˆ nui ma maˬ poˆ maˬ paˇ laˇ-a.

³⁰Yuˇdaˆ tsawˇ haˬ maˬ ngeuˇ-eu naw maꞈ deuˬ-aˬ, dzeuˇ laˇ ngeh Miˬyehˇ-euˬ ehˇ dawˬ maˬ naˇ haˬ-aˬ. Ehˇ kʼawꞈ, nymˬ-mˇ-aˬ, Yuˇdaˆ tsawˇ haˬ deuˬ Miˬyehˇ-euˬ ehˇ dawˬ maˬ naˇ haˬ-eu miˇ neh, Miˬyehˇ-euˬ gʼawˬ shaˬ gaˬ-eu jeˬ-ahˇ naw maꞈ za-euˬ meh.

³¹Kʼoeˇ gaˇ duˇ ni, naw maꞈ Miˬyehˇ-euˬ gʼawˬ shaˬ gaˬ-eu jeˬ-ahˇ za-euˬ loꞈ-ehˇ, aˬ yawꞈ maꞈ kʼawꞈ Miˬyehˇ-euˬ gʼawˬ shaˬ gaˬ-eu jeˬ-ahˇ za nya-eu gʼaˇ duˬ, nymˬ-mˇ aˬ yaw maꞈ Miˬyehˇ-euˬ ehˇ dawˬ-ahˇ maˬ naˇ haˬ-eu jeˬ pyeuꞈ-eu meh.

³²Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ zaˬ dawˬ tawˆ luꞈ-ahˇ aˬ yawꞈ-euˬ gʼawˬ shaˬ gaˬ-eu jeˬ biꞈ nehˬ mawꞈ-eu miˇ neh aˬ yawꞈ maꞈ dawˬ tawˆ luꞈ-ahˇ ehˇ dawˬ maˬ naˇ haˬ geuꞈ-eu jeˬ-euˬ uˬ moˆ paꞈ tawꞈ-awˇ bi jawˇ-euˬ meh.

³³Miˬyehˇ-euˬ guiˬ lahˬ aˇ naˆ ni huiˬ-eu nga. Aˬ yawꞈ-euˬ zaˬ siˬ nui gahˇ aˇ naˆ ni naꞈ-eu nga. Aˬ yawꞈ neh noeˬ tsehˆ-euˬ jeˬ-ahˇ tsawˇ haˬ tiˬ gʼaˬ-iˬ maˬ siˬ nya-ehˇ, aˬ yawꞈ aˬ jeˬ miˇ neh kʼoeˇ loꞈ-ehˇ mˇ-eu gaˇ kawˆ-ahˇ tsawˇ haˬ tiˬ gʼaˬ-iˬ maˬ gʼoˆ shaw nya-a.

³⁴Jaˇliꞈ laꞈ kʼoeˇ ehˇ taˬ-euˬ, “Sahˬpaˬ Miˬyehˇ-euˬ nui noeˬ-ahˇ, aˬ suˇ gʼaˬ siˬ nya-eu jawˇ ta. Aˬ yawꞈ-ahˇ ja noeˬ ja duˇ-eu, aˬ suˇ gʼaˬ mˇ nya-eu jawˇ ta.

³⁵Miˬyehˇ dziˇ dzoˆ bi tsoeˬ paˬ-ehˇ, aˬ suˇ gʼaˬ paˇ nehˬ-euˬ jaˆ ta.”

³⁶Kʼaˇ jawˇ kʼaˇ jaˆ-eu jeˬ dawˬ tawˆ luꞈ aˬ yawꞈ neh beh taˬ-euˬ meh. Dawˬ tawˆ luꞈ aˬ yawꞈ baˬ da neh jaˆ luꞈ jawˇ luꞈ-awˇ, aˬ yawꞈ-euˬ gʼaˇ duˬ jaˆ luꞈ jawˇ luꞈ-eu tehꞈ meh. Mˬ maˬ maˬ byaˆ zaˇ ziˇ Miˬyehˇ-ahˇ ciˬ huiˬ ciˬ mahˇ kaˇ-euˇ. Aˬ miˬ.