Read Akha Loˇmaˆ sahˬ boꞈ 15 Bible Online

Loˇmaˆ sahˬ boꞈ 15 - Akha bible

Loˇmaˆ sahˬ boꞈ 15

¹Aˬ dui jah-eu gʼaˬ kʼaˆ-eu tsawˇ haˬ deuˬ-aˬ, gʼaˬ baˬ-eu deuˬ-euˬ kʼaˆ behˆ caw pi nehˬ-eu tsaˬ meh. Aˬ dui gʼaˇ duˬ muiˬ ni mˇ-eu maˬ tsaˬ-a.

²Aˬ dui-euˬ cawˬ Ka li zaˬ deuˬ jah-eu laꞈ kʼoeˇ huiˬ laˇ mahˇ laˇ nya ni, aˬ dui yawˬ gʼaˬ na luꞈ aˬ yawꞈ maꞈ gʼaˇ duˬ muiˬ ni mˇ-eu tsaˬ meh.

³Aˬ jeˬ miˇ neh ehˇ naˇ, Ka li-aˬ, aˬ yawꞈ gʼaˇ duˬ muiˬ ni dehꞈ-euˬ maˬ ngeuˇ-a. “Naw maꞈ-ahˇ ja bu ja doeˇ-eu deuˬ-euˬ dawˬ doeˇ ngaˇ daˬ-euˬ ma” lehˇ Jaˇliꞈ laꞈ kʼoeˇ boꞈ taˬ-euˬ meh.

⁴Jaˇliꞈ laꞈ kʼoeˇ kʼaˇ boꞈ taˬ-euˬ yawˬ jeˬ na luꞈ, aˬ dui-ahˇ bi mehˬ bi tsoˆ-eu gʼaˇ duˬ boꞈ taˬ-euˬ meh. Aˬ dui nui ma gʼawˬ mahˇ ni taˬ nya laˇ-eu gʼaˇ duˬ mehˬ nehˬ tsoˆ nehˬ laꞈ-awˇ, aˬ dui-euˬ nui ma-ahˇ gʼaˬ biꞈ lahˬ nehˬ laꞈ-eu laꞈ kʼoeˇ noeˬ tmˬ kʼaˇ za laˇ ni boꞈ taˬ-euˬ jeˬ pyeuꞈ-eu meh.

⁵Yeˬsuˇ Ka li-ahˇ dzaw geuꞈ-eu laꞈ kʼoeˇ naw maꞈ nui ma tiˬ siˬ tehꞈ-ehˇ taˬ-awˇ dehꞈ nya ni, nui ma gʼawˬ mahˇ ni taˬ-eu jeˬ biꞈ laꞈ-awˇ nui ma-ahˇ gʼaˬ biꞈ lahˬ nehˬ laꞈ-eu gʼaˬ pyeuꞈ-eu Miˬyehˇ naw maꞈ-ahˇ caw ba luꞈ-uˇ.

⁶Kʼoeˇ miˇ neh, naw maꞈ dawˬ tawˆ luꞈ teˇ saˇ tiˬ saˇ tehꞈ-ehˇ aˬ dui-euˬ Sahˬpaˬ Yeˬsuˇ ka liˬ-euˬ Aˬda Miˬyehˇ-ahˇ ja ceuˬ nya luꞈ-uˇ.

⁷Ka li naw maꞈ-ahˇ ha geuꞈ-euˬ loꞈ-ehˇ, Miˬyehˇ-euˬ yaw shehꞈ kʼahˬ sehˇ-ahˇ aˬ cawˬ ya mawˇ ni naw maꞈ tiˬ gʼaˬ tiˇ gʼaˬ ha geuꞈ-awˬ.

⁸Miˬyehˇ saˇ jaˇ ziꞈ-eu gaˇ kawˆ bi siˬ bi mawˇ-eu gʼaˇ duˬ hawˇ-eu, aˬ yawꞈ neh aˬ poeˬ aˬ bawˇ deuˬ-ahˇ saˇ jaˇ dzaˬ taˬ-euˬ bi byah laˇ-eu lehˇ, Yuˇdaˆ tsawˇ haˬ deuˬ gʼaˇ duˬ Ka li mˇ le-euˬ meh.

⁹Kʼoeˇ tehꞈ-ehˇ maˬ ngeuˇ ni, Miˬyehˇ gʼawˬ shaˬ gaˬ-eu jeˬ baˬ da neh Yuˇdaˆ tsawˇ haˬ maˬ ngeuˇ-eu deuˬ kʼawꞈ Miˬyehˇ-ahˇ ja ceuˬ nya laˇ ni mˇ le-euˬ jeˬ kʼawꞈ pyeuꞈ-eu meh. Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Kʼoeˇ miˇ neh nawˬ-euˬ tsawˇ myahˇ-ahˇ, aˬ cawˬ tsawˇ jeuˬ tsahˬ-ahˇ jawˇ-awˇ, ja ceuˬ-eu caˇ dawˬ ngaˇ caˇ ma.”

¹⁰Heu loꞈ-ehˇ paˇ ehˇ taˬ-euˬ jaˆ-eu meh. “Miˬyehˇ-euˬ tsawˇ haˬ deuˬ nehˬ-ehˇ, aˬ cawˬ tsawˇ jeuˬ laˬ kʼaˬ cehˇ-awˬ.”

¹¹Heu loꞈ-ehˇ kʼawꞈ paˇ ehˇ taˬ-euˬ meh. “Aˬ cawˬ tsawˇ jeuˬ tsawˇ ca deuˬ kʼawꞈ, Sahˬpaˬ Miˬyehˇ-ahˇ ja ceuˬ-awˬ. Tsawˇ jeuˬ dawˬ tawˆ luꞈ ja ceuˬ-awˬ.”

¹²Iˇsaˬyaˇ neh paˇ ehˇ taˬ-euˬ, “Yeˬshehˇ-euˬ tsuiꞈ toeˬ oe leꞈ gaˇ, aˬ cawˬ tsawˇ jeuˬ-ahˇ uˆ lahˇ-eu, tsawˇ haˬ tiˬ gʼaˬ doˆ le tehꞈ-a. Aˬ yawꞈ laꞈ kʼoeˇ aˬ cawˬ tsawˇ jeuˬ, noeˬ tmˬ kʼaˇ bi za laˇ tehꞈ-a.”

¹³Muiˬ-eu Shawˇ-eu Yaw sahˇ Miˬyehˇ-euˬ baoˬ baˬ da neh naw maꞈ-euˬ noeˬ tmˬ-eu jeˬ huiˬ laˇ mahˇ laˇ nya ni, naw maꞈ Miˬyehˇ-ahˇ jah-eu jeˬ-ahˇ gʼoe-awˇ, noeˬ tmˬ-eu jeˬ-euˬ dawˬ pehˬ duˬ puˇ pyeuꞈ-eu Miˬyehˇ naw maꞈ-ahˇ laˬ kʼaˬ cehˇ nui saˇ za-eu jeˬ bi byah laˇ luꞈ-uˇ.

¹⁴Aˬ yuiꞈ aˬ nyiˇ Ka li zaˬ deuˬ-oˇ, naw maꞈ yaw muiˬ jeˬ tiˬ byah ni ahˇ-awˇ, aˬ joˆ-ehˇ ya mˇ ya shaˇ-eu dawˬ tawˆ luꞈ siˬ nya-eu uˬ taꞈ, tiˬ gʼaˬ tiˇ gʼaˬ mehˬ nehˬ tsoˆ nehˬ nya meh lehˇ ngaˇ siˬ duˬ-awˇ nui kʼahˇ shiˇ-eu ma.

¹⁵Ehˇ kʼawꞈ, yaw beh ngaˇ naw maꞈ-ahˇ ehˇ-euˬ gaˇ kawˆ deuˬ-ahˇ sahˬ boꞈ heu taꞈ laꞈ kʼoeˇ kʼaˬ duˬ ni boꞈ-eu ma. Miˬyehˇ neh ngaˬ-ahˇ aˬ yawꞈ-euˬ zaˬ kʼaˆ bi geuꞈ-eu gʼaˇ duˬ taˬ huiˬ nehˬ laꞈ-euˬ baˬ da neh, ngaˇ heu loꞈ-ehˇ kʼaˬ duˬ ni boꞈ-euˬ ma.

¹⁶Yuˇdaˆ tsawˇ haˬ maˬ ngeuˇ-eu deuˬ-euˬ gʼaˇ duˬ gaˇ bi mˇ-eu lehˇ, ngaˬ-ahˇ Yeˬsuˇ Ka li-euˬ zaˬ kʼaˆ bi geuꞈ laꞈ-euˬ meh. Miˬyehˇ-euˬ Laˬ kʼa cehˇ-eu Guiˬ lahˬ dawˬ mehˬ-eu gaˇ-ahˇ taꞈ leˇ-awˇ, piˇ ma tiˬ gʼaˬ loꞈ-ehˇ ngaˇ gaˇ mˇ luꞈ-eu ma. Yuˇdaˆ tsawˇ haˬ maˬ ngeuˇ-eu deuˬ-ahˇ Miˬyehˇ-ahˇ lawˇ nehˬ-euˬ jeˬ loꞈ-ehˇ Miˬyehˇ ha geuꞈ nya ni, Muiˬ-eu Shawˇ-eu Yaw sahˇ Miˬyehˇ neh Miˬyehˇ-ahˇ damˬ nehˬ-euˬ jeˬ loꞈ-ehˇ bi pyeuꞈ-eu gʼaˇ duˬ, piˇ ma tiˬ gʼaˬ loꞈ-ehˇ ngaˇ mˇ luꞈ-eu ma.

¹⁷Ngaˇ Yeˬsuˇ Ka li-ahˇ nui ma taꞈ-eu miˇ neh, Miˬyehˇ-euˬ gaˇ mˇ luꞈ-eu heu kʼahˬ sehˇ jehˆ kʼaˇ za ma.

¹⁸Yuˇdaˆ tsawˇ haˬ maˬ ngeuˇ-eu deuˬ Miˬyehˇ-euˬ ehˇ dawˬ naˇ haˬ laˇ ni sheuˬ gʼeh-eu gʼaˇ duˬ, Ka li neh ngaˬ-ahˇ gʼoe-awˇ mˇ taˬ-euˬ gaˇ kawˆ heu-ahˇ tehꞈ-ehˇ kʼaˬ duˬ ni ngehˬ-eu tmˇ-eu ma. Aˬ yawꞈ kʼoeˇ loꞈ-ehˇ mˇ-euˬ kʼoeˇ-aˬ, ngehˬ-eu hawˇ-eu mˇ-eu nyiˬ jeˬ luꞈ-ahˇ gʼoe-awˇ mˇ-euˬ meh.

¹⁹Zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ mˇ nya-eu baoˬ hawˇ-eu, Muiˬ-eu Shawˇ-eu Yaw sahˇ Miˬyehˇ-euˬ baoˬ-ahˇ gʼoe-awˇ mˇ-euˬ jeˬ pyeuꞈ-eu meh. Yeˬluˇsaˬlehˬ meuˬ-ahˇ neh Iˇluˇliˆ miˇ kʼahˬ-ahˇ keuˆ ni iˇ-euˬ gaˇ pehˇ kahˇ li, Ka li-euˬ gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ doe-euˬ ma.

²⁰Ngaˬ-euˬ nui kʼahˇ-aˬ, a cawˬ neh dawˬ pehˬ gawˬ gʼaˬ taˬ-euˬ gaˇ gawˬ tsaꞈ daˆ leꞈ-eu jeˬ maˬ mˇ ni, Ka li gaˇ kawˆ maˬ gaˬ haw-euˬ jawˇ duˬ-ahˇ iˇ-awˇ Laˬ kʼaˬ cehˇ-eu Guiˬ lahˬ dawˬ mehˬ-eu jeˬ-ahˇ nui ma keuˆ dzehˬ-eu ma.

²¹Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Aˬ yawꞈ gaˇ kawˆ maˬ gaˬ-euˬ deuˬ, aˬ yawꞈ-ahˇ ya mawˇ haw tehꞈ-a. Aˬ yawꞈ-euˬ dawˬ maˬ gaˬ-euˬ deuˬ, ya gaˬ-awˇ gʼoˆ shaw geuꞈ tehꞈ-a.”

²²Ngaˇ naw maꞈ jawˇ gaˇ laˇ-eu lehˇ gʼawˬ mya poˆ gʼeh-euˬ kʼawꞈ, maˬ laˇ doˆ nya-aˬ.

²³Nymˬ-mˇ poˆ jawˇ-aˬ, miˇ kʼahˬ heu kʼahˬ-ahˇ ngaˇ gaˇ mˇ luiˆ gʼaˬ-euˬ ma. Ngaˇ naw maꞈ jawˇ gaˇ laˇ mawꞈ-eu gʼawˬ mya kʼoꞈ gʼawˬ mya la keuˆ laˇ-euˬ ma.

²⁴Nymˬ-mˇ poˆ-aˬ, naw maꞈ jawˇ gaˇ laˇ keuˆ ma lehˇ noeˬ tmˬ taˬ-euˬ ma. Saˬbeˬ miˇ kʼahˬ-ahˇ le ba jawˬ-ehˇ naw maꞈ jawˇ gaˇ laˇ naˬ-awˇ, naw maꞈ nehˬ-ehˇ tiˬ kʼehˬ jawˇ gʼaˬ naˇ, naw maꞈ neh bi caw ba-awˇ Saˬbeˬ miˇ kʼahˬ-ahˇ le ma lehˇ noeˬ taˬ-euˬ ma.

²⁵Ehˇ kʼawꞈ, nymˬ-mˇ kʼa tseuˆ ni-aˬ, Miˬyehˇ-euˬ tsawˇ haˬ deuˬ-ahˇ caw mˇ caw shaˇ nehˬ-eu gʼaˇ duˬ Yeˬluˇsaˬlehˬ meuˬ-ahˇ iˇ-eu lehˇ gʼeh-eu ma.

²⁶Aˬ jeˬ miˇ neh ehˇ naˇ, Yeˬluˇsaˬlehˬ meuˬ-ahˇjawˇ-eu Miˬyehˇ-euˬ tsawˇ haˬ deuˬ laꞈ kʼoeˇ shaˬ-eu zahˬ-eu deuˬ-ahˇ caw ba nehˬ-eu gʼaˇ duˬ, Maˬgeˬdawˇniˆˆ miˇ kʼahˬ hawˇ-eu Aˬgaˬyaˇ miˇ kʼahˬ-ahˇ jawˇ-eu Ka li zaˬ aˇ muˇ deuˬ pyuˇ daˬ biꞈ nehˬ-eu lehˇ noeˬ tsehˆ taˬ-euˬ meh.

²⁷Kʼoeˇ loꞈ-ehˇ noeˬ tsehˆ-euˬ kʼoeˇ-aˬ, aˬ yawꞈ maꞈ yawˬ haˇ yawˬ ha noeˬ siˬ-awˇ noeˬ tsehˆ-euˬ jeˬ pyeuꞈ-eu meh. Ehˇ kʼawꞈ, maˇ maˇ ni ehˇ leꞈ naˇ, aˬ yawꞈ maꞈ kʼoeˇ deuˬ-ahˇ ya caw ba-eu kʼaˆ behˆ jaˆ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ neh Yuˇdaˆ tsawˇ haˬ maˬ ngeuˇ-eu deuˬ-ahˇ saꞈ laˇ paw-euˬ guiˬ lah caw ba nehˬ-euˬ-aˬ, Yuˇdaˆ tsawˇ haˬ maˬ ngeuˇ-eu deuˬ kʼawꞈ Yuˇdaˆ tsawˇ haˬ deuˬ-ahˇ shiˬ shaˬ jiˇ paw-euˬ guiˬ lahˬ caw ba nehˬ paˬ-ehˇ gʼeh-eu meh.

²⁸Ngaˇ gaˇ heu hmˬ mˇ luiˆ gʼaˬ-awˇ aˬ yawꞈ maꞈ gʼaˇ duˬ kʼaˇ laˆ uiˬ taˬ-euˬ pyuˇ daˬ dawˬ tawˆ luꞈ aˬ yawꞈ maꞈ-euˬ aˬ laꞈ laꞈ kʼoeˇ a nehˬ yaꞈ gʼaˬ naˇ, Saˬbeˬ miˇkʼahˬ-ahˇ le ba jawˬ-ehˇ naw maꞈ jawˇ gaˇ laˇ ma.

²⁹Ngaˇ naw maꞈ jawˇ gaˇ laˇ ngeh, Ka li-euˬ guiˬ lahˬ yaw dzahˇ tiˬ byah ni ahˇ-eu laꞈ kʼoeˇ laˇ ma.

³⁰Aˬ yuiꞈ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li hawˇ-eu Yaw sahˇ Miˬyehˇ neh biꞈ leꞈ-euˬ gʼoeˇ-eu gaˬ-eu jeˬ baˬ da neh ngaˇ naw maꞈ-ahˇ heu loꞈ-ehˇ shaˇ-eu ma. Ngaˬ-euˬ gʼaˇ duˬ ngaˬ nehˬ-ehˇ Miˬyehˇ-ahˇ guiˬ lahˬ caw shaˇ nehˬ laꞈ-awˬ.

³¹Yuˇdaˆ miˇ kʼahˬ laꞈ kʼoeˇ jawˇ-eu Ka li-ahˇ maˬ jah-eu tsawˇ haˬ kʼoeˇ deuˬ ngaˬ-ahˇ maˬ ya laˆ coeˬ laˆ ciˆ ni maˬ ehˇ, Yeˬluˇsaˬlehˬ meuˬ laꞈ kʼoeˇ ngaˬ neh mˇ nehˬ shaˇ nehˬ-euˬ jeˬ-ahˇ Miˬyehˇ-euˬ tsawˇ haˬ deuˬ laˬ kʼaˬ tiˬ cehˇ ha geuꞈ nehˬ laꞈ ni maˬ ehˇ, guiˬ lahˬ caw shaˇ nehˬ laꞈ-awˬ.

³²Miˬyehˇ nui ma tsaˬ naˇ, ngaˇ naw maꞈ jawˇ gaˇ laˬ kʼaˬ tiˬ cehˇ ya laˇ keuˆ-awˇ, naw maꞈ nehˬ-ehˇ jawˇ-awˇ laˬ kʼaˬ cehˇ-eu laꞈ kʼoeˇ gʼaˬ doeˇ naˬ dah nya ni guiˬ lahˬ caw shaˇ nehˬ laꞈ-awˬ.

³³Aˬ dui-ahˇ nui saˇ oꞈ-eu jeˬ biꞈ nehˬ laꞈ-eu Miˬyehˇ naw maꞈ yawˬ gʼaˬ na luꞈ nehˬ-ehˇ jawˇ luꞈ-uˇ. Aˬ miˬ.