Read Akha Loˇmaˆ sahˬ boꞈ 16 Bible Online

Loˇmaˆ sahˬ boꞈ 16 - Akha bible

Loˇmaˆ sahˬ boꞈ 16

¹Geˬjeˬ meuˬ-ahˇ jawˇ-eu Ka li zaˬ aˇ muˇ-ahˇ caw mˇ caw shaˇ luꞈ-eu gʼaˬ pyeuꞈ-eu aˬ dui-euˬ dmˇ ma Piˇbeˬ-aˬ, muiˬ-eu tsawˇ haˬ tiˬ gʼaˬ meh lehˇ naw maꞈ-ahˇ ngaˇ tsaꞈ ahˇ laꞈ-eu ma.

²Miˬyehˇ-euˬ tsawˇ haˬ deuˬ ya mˇ-eu loꞈ-ehˇ Sahˬpaˬ Miˬyehˇ-euˬ tsawˇ myahˇ uˬ moˆ aˬ yawꞈ-ahˇ ha geuꞈ-awˇ, aˬ yawꞈ kʼaˇ loˬ-eu jeˬ tiˬ poˆ caw ba nehˬ-awˬ. Aˬ jeˬ miˇ neh ehˇ naˇ, aˬ yawꞈ-aˬ, aˬ cawˬ-ahˇ caw ba nehˬ nya dui dui-awˇ, ngaˬ-ahˇ kʼawꞈ caw ba nehˬ laꞈ-euˬ meh.

³Yeˬsuˇ Ka li-euˬ gaˇ laꞈ kʼoeˇ mˇ cawˬ shaˇ cawˬ pyeuꞈ-eu Biˇgiˇla hawˇ-eu Aˬguˇla aˬ nyaꞈ dzeˇ zaˬ-ahˇ noeˬ mawˇ luꞈ ma lehˇ ngaˇ dawˬ cawˬ puˬ ahˇ laꞈ-eu ma.

⁴Aˬ yawꞈ nyaꞈ dzeˇ zaˬ ngaˬ-euˬ gʼaˇ duˬ gʼawˇ mawˇ shiˇ dah tsaˇ-i caw ba nehˬ laꞈ-euˬ meh. Ngaˇ aˬ yawꞈ nyaꞈ dzeˇ zaˬ-ahˇ guiˬ lahˬ huiˬ dui dui-eu ma. Ngaˇ tehꞈ-ehˇ maˬ ngeuˇ ni, Yuˇdaˆ tsawˇ haˬ maˬ ngeuˇ-eu Ka li zaˬ aˇ muˇ dawˬ tawˆ luꞈ kʼawꞈ, aˬ nyaꞈ dzeˇ zaˬ-ahˇ guiˬ lahˬ huiˬ luꞈ meh.

⁵Aˬ nyaꞈ dzeˇ zaˬ-euˬ nymˇ-ahˇ tahˬ dzoeˇ luꞈ-eu Ka li zaˬ aˇ muˇ-ahˇ kʼawꞈ noeˬ mawˇ luꞈ ma.

⁶Aˬshaˆ miˇ kʼahˬ laꞈ kʼoeˇ Ka li zaˬ pyeuꞈ beh beh laˇ-euˬ gʼaˬ pyeuꞈ-eu, ngaˇ gʼoeˇ dui dui-eu Eˇbehˇnehˇ-ahˇ kʼawꞈ noeˬ mawˇ luꞈ ma.

⁷Naw maꞈ gʼaˇ duˬ leh jeh dui dui-eu laꞈ kʼoeˇ gaˇ mˇ luꞈ-eu Maˬliˇ-ahˇ kʼawꞈ noeˬ mawˇ luꞈ ma. Ngaˬ nehˬ-ehˇ tiˬ kawˆ loꞈ-ehˇ tawˬ-ahˇ uˇ-euˬ aˬ yuiꞈ aˬ nyiˇ Yuˇdaˆ tsawˇ haˬ pyeuꞈ-eu Aˬdawˇniˆ hawˇ-eu Yuˇniˆ aˬ nyaꞈ-ahˇ kʼawꞈ noeˬ mawˇ luꞈ ma. Aˬ yawꞈ nyaꞈ-aˬ, tsawˇ myahˇ doˆ-eu gʼaˬ kʼehˇ pyeuꞈ-awˇ, ngaˬ-euˬ mehˬ hu neh Ka li zaˬ pyeuꞈ laˇ-euˬ meh.

⁸Sahˬpaˬ Miˬyehˇ laꞈ kʼoeˇ ngaˇ gʼoeˇ dui dui-eu Aˬbaˬliˇ-ahˇ kʼawꞈ noeˬ mawˇ luꞈ ma.

⁹Ka li-euˬ gaˇ laꞈ kʼoeˇ mˇ cawˬ shaˇ cawˬ pyeuꞈ-eu Uˇlaˬbaˬ hawˇ-eu, ngaˇ gʼoeˇ dui dui-eu Saˬdaˬkuˇ-ahˇ kʼawꞈ noeˬ mawˇ luꞈ ma.

¹⁰Ka li-ahˇ saˇ jaˇ ziꞈ-eu gaˇ kawˆ kʼaˬ duˬ ni mˇ mehˬ-euˬ gʼaˬ pyeuꞈ-eu Aˬbeˇleˇ-ahˇ kʼawꞈ noeˬ mawˇ luꞈ ma. Aˬliˇtawˇbuˆ-euˬ nymˇ kʼahˬ zaˬ deuˬ-ahˇ kʼawꞈ noeˬ mawˇ luꞈ ma.

¹¹Aˬ yuiꞈ aˬ nyiˇ Yuˇdaˆ tsawˇ haˬ pyeuꞈ-eu Heˬloˇdiˇoˬ hawˇ-eu Naˬgiˬsuˇ-euˬ nymˇ jiˇ-ahˇ taꞈ-eu aˬ yuiꞈ aˬ nyiˇ Ka li zaˬ deuˬ-ahˇ kʼawꞈ noeˬ mawˇ luꞈ ma.

¹²Sahˬpaˬ Miˬyehˇ-euˬ gaˇ mˇ luꞈ-eu Daˬluˇpehˇnaˆ hawˇ-eu Daˬluˇpawˇsaˆ aˬ nyaꞈ-ahˇ maˬ ehˇ, Sahˬpaˬ Miˬyehˇ-euˬ gaˇ mˇ dui dui-euˬ gʼaˬ pyeuꞈ-eu ngaˇ gʼoeˇ dui dui-eu cawˬ Beˬlaˬsiˇ-ahˇ maˬ ehˇ, noeˬ mawˇ luꞈ ma.

¹³Sahˬpaˬ Miˬyehˇ-euˬ gaˇ mˇ-eu ja ceuˬ dui dui paˬ-ehˇ gʼeh-eu Luˇpuˇ hawˇ-eu, aˬ myah luꞈ ngaˬ-ahˇ aˬ yawꞈ-euˬ aˬ li tiˬ gʼaˬ loꞈ-ehˇ caw ba nehˬ laꞈ-euˬ aˬ yawꞈ-euˬ aˬ ma-ahˇ kʼawꞈ noeˬ mawˇ luꞈ ma.

¹⁴Aˬsoˬgaˬleˇ, Paˬleˬgoˬ, Heˬlaˬmeuˬ, Baˇlawˇdaˇ, Heˬlaˬmaˇ aˬ ha maꞈ hawˇ-eu aˬ yawꞈ maꞈ nehˬ-ehˇ kʼaˇ jawˇ-eu aˬ yuiꞈ aˬ nyiˇ Ka li zaˬ deuˬ-ahˇ kʼawꞈ noeˬ mawˇ luꞈ ma.

¹⁵Piˇlawˇluˇ hawˇ-eu Yuˇliˆ aˬ nyaꞈ-ahˇ maˬ ehˇ, Neˬluˇ hawˇ-eu a yawꞈ-euˬ dmˇ ma-ahˇ maˬ ehˇ, Awˇloˬpaˇ-ahˇ maˬ ehˇ, aˬ yawꞈ maꞈ nehˬ-ehˇ kʼaˇ jawˇ-eu Miˬyehˇ-euˬ tsawˇ haˬ deuˬ-ahˇ maˬ ehˇ, noeˬ mawˇ luꞈ ma.

¹⁶Ka li zaˬ-euˬ gʼoeˇ-eu gaˬ-eu jeˬ laꞈ kʼoeˇ tiˬ gʼaˬ tiˇ gʼaˬ mehˬ cuˇ cuˇ-awˇ ha geuꞈ-awˬ. Ka li-euˬ aˇ muˇ dawˬ tawˆ luꞈ, naw maꞈ-ahˇ noeˬ mawˇ-eu dawˬ tsaꞈ ahˇ laꞈ-eu ma.

¹⁷Aˬ yuiꞈ aˬ nyiˇ Ka li zaˬ deuˬ-oˇ, ngaˇ naw maꞈ-ahˇ heu loꞈ-ehˇ shaˇ-eu ma. Aˇ maꞈ aˇ muˇ paˆ-iˇ ni jahˇ-awˇ, jah-eu tsawˇ haˬ deuˬ-ahˇ gaˇ ma sheuˬ bahˬ-eu laꞈ kʼoeˇ, naw maꞈ-ahˇ mehˬ taˬ tsoˆ taˬ-euˬ jeˬ-ahˇ maˬ duˇ-eu yawˬ jeˬ yawˬ mehˬ-eu tsoˆ-eu tsawˇ haˬ deuˬ-ahˇ yahˇ-awˬ.

¹⁸Aˬ jeˬ miˇ neh ehˇ naˇ, kʼoeˇ loꞈ-ehˇ mˇ-eu tsawˇ haˬ deuˬ-aˬ, aˬ dui-euˬ Sahˬpaˬ Yeˬsuˇ Ka li-euˬ gaˇ mˇ-eu maˬ ngeuˇ-a. Yawˬ ha-euˬ uˬ maˆ gʼaˇ duˬ shaˇ noeˬ-awˇ mehˇ shuiˇ shuiˇ-eu laꞈ kʼoeˇ iˬ baˇ maˬ ahˇ-eu tsawˇ haˬ deuˬ-ahˇ sheuˬ bahˬ-eu meh.

¹⁹Naw maꞈ Laˬ kʼaˬ cehˇ-eu Guiˬ lahˬ dawˬ-ahˇ ziꞈ dah ni tuˆ tehˬ taˬ-euˬ gaˇ kawˆ aˬ cawˬ siˬ nya jiˇ meh. Kʼoeˇ miˇ neh, naw maꞈ gʼaˇ duˬ ngaˇ laˬ kʼaˬ cehˇ dui dui-eu ma. Naw maꞈ laꞈ kʼoeˇ yaw muiˬ jeˬ-ahˇ tseˇ paˆ geuꞈ nya-eu nui gahˇ bi ahˇ mawꞈ-awˇ, maˬ muiˬ-eu jeˬ-ahˇ maˬ mˇ-eu shawˇ jehˆ ni gʼeh-eu tsawˇ haˬ bi pyeuꞈ mawꞈ miˇ-a.

²⁰Aˬ dui nui saˇ oꞈ duˬ pyeuꞈ-eu Miˬyehˇ-aˬ, gʼawˬ myahˇ maˬ gʼeh-ehˇ nehꞈ Saˬdaˬ-ahˇ laˆ cawˆ-awˇ naw maꞈ-euˬ aˬ kuiˇ pehˬ zaˬ uˬ moˆ bi jawˇ tehꞈ-a. Aˬ dui-euˬ Sahˬpaˬ Yeˬsuˇ-euˬ guiˬ lahˬ yaw dzahˇ naw maꞈ kʼoeˇ taˆ jaˆ luꞈ-uˇ.[2]

²¹Ngaˬ-euˬ gaˇ mˇ cawˬ pyeuꞈ-eu Tiˆmoˇseˬ gʼeh, naw maꞈ-ahˇ noeˬ mawˇ luꞈ miˇ-a lehˇ tsaꞈ ahˇ laꞈ-euˬ meh. Kʼoeˇ loꞈ-ehˇ duˇ ni, ngaˬ-eu cawˬ Yuˇdaˆ tsawˇ haˬ deuˬ pyeuꞈ-eu Luˇgiˇ, Yaˬsoˬ, Sawˇsiˇpaˬtaˆ aˬ ha smˇ gʼaˬ kʼawꞈ, naw maꞈ-ahˇ noeˬ mawˇ miˇ-a lehˇ tsaꞈ ahˇ laꞈ-euˬ meh.

²²Pawˇluˆ neh kʼaˇ ehˇ-euˬ loꞈ-ehˇ sahˬ boꞈ heu taꞈ boꞈ doˆ nehˬ-euˬ gʼaˬ pyeuꞈ-eu ngaˇ Deˬlaˬtiˇ kʼawꞈ, naw maꞈ-ahˇ noeˬ mawˇ miˇ-a lehˇ dawˬ cawˬ puˬ ahˇ laꞈ-eu ma.

²³Ka li zaˬ aˇ muˇ tahˬ dzoeˇ duˬ pyeuꞈ-eu ngaˇ jawˇ naˬ luꞈ-eu nymˇ heu nymˇ-euˬ nymˇ sahˇ Gaˬyuˇ kʼawꞈ, naw maꞈ-ahˇ noeˬ mawˇ luꞈ ma lehˇ tsaꞈ ahˇ laꞈ-euˬ meh. Meuˬ-euˬ pyuˇ jeˬ hmˬ-eu gaˇ mˇ-eu gʼaˬ pyeuꞈ-eu Eˇlaˬduˇ hawˇ-eu aˬ dui-euˬ aˬ yuiꞈ aˬ nyiˇ Gawˬtu kʼawꞈ, naw maꞈ-ahˇ noeˬ mawˇ luꞈ-eu gaˇ kawˆ tsaꞈ ahˇ laꞈ-euˬ meh.[3]

²⁵Miˬyehˇ-euˬ yaw shehꞈ kʼahˬ sehˇ huiˬ dui dui gaˇ ja ceuˬ kaˇ-euˇ. Aˬ jeˬ miˇ neh ehˇ naˇ, ngaˬ neh Yeˬsuˇ Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ-euˬ loꞈ-ehˇ maˬ ehˇ, aˇ hu-euˬ ziˇ-ahˇ neh zaꞈ taˬ-euˬ yaw tsaˬ yaw dawˇ jeˬ pah mehˬ nehˬ laꞈ-euˬ loꞈ-ehˇ maˬ ehˇ, jah-eu laꞈ kʼoeˇ naw maꞈ ziꞈ dah ni yawꞈ nya ni aˬ yawꞈ jahˇ-euˬ meh.

²⁶Ehˇ kʼawꞈ, nymˬ-mˇ poˆ jawˇ-aˬ, Miˬyehˇ gʼaˇ duˬ ngehˬ dah-eu deuˬ neh boꞈ-euˬ sahˬ boꞈ deuˬ laꞈ kʼoeˇ, zaꞈ taˬ-euˬ yaw tsaˬ yaw dawˇ kʼoeˇ bya cehˆ ni pah dzeh taˬ-euˬ meh. Kʼoeˇ uˬ taꞈ, tsawˇ haˬ zaˬ dawˬ tawˆ luꞈ jah-awˇ naˇ haˬ geuꞈ nya ni, mˬ maˬ maˬ byaˆ zaˇ ziˇ dehꞈ-eu Miˬyehˇ neh biꞈ-euˬ dawˬ laꞈ kʼoeˇ, tsawˇ jeuˬ dawˬ tawˆ luꞈ-ahˇ yaw tsaˬ yaw dawˇ kʼoeˇ bi siˬ bi mawˇ-euˬ meh.

²⁷Yeˬsuˇ Ka li laꞈ kʼoeˇ Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ kaˇ-euˇ. Aˬ yawꞈ tiˬ gʼaˬ tehꞈ-ehˇ zaˬ siˬ tsawˇ gahˇ dawˬ tawˆ luꞈ ahˇ-awˇ, yaw shehꞈ kʼahˬ sehˇ huiˬ dui dui-eu meh. Aˬ miˬ.