Read Akha Loˇmaˆ sahˬ boꞈ 2 Bible Online

Loˇmaˆ sahˬ boꞈ 2 - Akha bible

Loˇmaˆ sahˬ boꞈ 2

¹Cawˬ deuˬ-oˇ, naw maꞈ aˬ cawˬ-ahˇ yaw lehˬ poˆ te loˇ. Nawˇ aˬ joˆ-ehˇ gʼeh-eu tsawˇ haˬ ma lehˇ yawˬ haˇ yawˬ ha noeˬ kʼawꞈ, yaw lehˬ maˬ ahˇ-eu tsawˇ haˬ maˬ ngeuˇ-a. Yawˬ ha aˬ cawˬ kʼaˇ dehꞈ-eu loꞈ-ehˇ dehꞈ-awˇ, aˬ cawˬ-ahˇ yaw lehˬ poˆ te lehˇ ngeuˇ naˇ, yawˬ haˇ yawˬ ha yaw lehˬ poˆ gaˇ duˇ-eu tehꞈ meh.

²Kʼoeˇ loꞈ-ehˇ dehꞈ-eu tsawˇ haˬ deuˬ-ahˇ Miˬyehˇ yaˇ kʼaˬ daˇ nehˬ-eu-aˬ, tsaˬ-eu meh lehˇ aˬ dui siˬ nya ma.

³Ehˇ kʼawꞈ, aˬ cawˬ mˇ-euˬ yaw lehˬ nga lehˇ nawˇ noeˬ-eu jeˬ-ahˇ yawˬ ha paˇ mˇ luꞈ-eu meh. Miˬyehˇ yaˇ kʼaˬ daˇ-eu jeˬ-ahˇ buˬ-iˇ nya ma lehˇ duˇ te loˇ.

⁴Maˬ ngeuˇ naˇ, aˬ yawꞈ-euˬ huiˬ dui dui-eu gʼawˬ shaˬ gaˬ-eu jeˬ, oˇ coeˇ-eu jeˬ, nui ma mahˇ-eu jeˬ, heu deuˬ-ahˇ nawˇ yehˬ bawˬ sehˇ lu-ehˇ gʼeh te loˇ. Miˬyehˇ gʼawˬ shaˬ gaˬ-eu jeˬ ahˇ meh lehˇ nawˇ siˬ duˬ meh. Aˬ jeˬ miˇ neh ehˇ naˇ, nawˇ iˬ baˇ noeˬ poˆ laˇ ni aˬ yawꞈ leh jeh luꞈ-eu meh.

⁵Ehˇ kʼawꞈ, nawˇ nui ma gʼahˇ dui dui-awˇ, naˬ bawˇ tuˇ-eu miˇ neh, Miˬyehˇ nui ma pehˇ-eu jeˬ hawˇ-eu dawˇ coe ni yaˇ kʼaˬ daˇ-eu jeˬ pah mehˬ le ngeh Nah, kʼoeˇ naˆ maˬ tseˇ gʼeh-eu kʼehˬ-eu kʼaˆ-eu jeˬ nawˬ-euˬ kʼoeˇ taˆ keuˆ le ni yawˬ haˇ yawˬ ha mˇ luꞈ gaˇ duˇ-eu meh.

⁶Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ yawˬ gʼaˬ na luꞈ-ahˇ yawˬ ha neh kʼaˇ mˇ taˬ-euˬ loꞈ-ehˇ geuˇ ni daˇ tehꞈ-a.

⁷Tsawˇ haˬ tiˬ paˆ na deuˬ-aˬ, yaw muiˬ jeˬ-ahˇ maˬ tsehˆ leˇ ni mˇ-eu laꞈ kʼoeˇ, yaw shehꞈ kʼahˬ sehˇ hawˇ-eu taˬ huiˬ taˬ mahˇ nehˬ-eu jeˬ-ahˇ maˬ ehˇ, mˬ maˬ maˬ byaˆ zaˇ ziˇ maˬ shiˇ ni ya dehꞈ-eu jeˬ-ahˇ maˬ ehˇ, poˆ luꞈ-eu meh. Kʼoeˇ loꞈ-ehˇ gʼeh-eu tsawˇ haˬ deuˬ-ahˇ mˬ maˬ maˬ byaˆ zaˇ ziˇ dehꞈ-eu jeˬ Miˬyehˇ biꞈ nehˬ tehꞈ-a.

⁸Tsawˇ haˬ tiˬ paˆ na deuˬ-aˬ, smˇ kʼaˆ kʼaˆ-awˇ, yaw tsaˬ yaw dawˇ jeˬ-ahˇ maˬ geuꞈ-ehˇ, maˬ tsaˬ maˬ dawˇ-eu jeˬ-euˬ mehˬ nah iˇ-eu meh. Kʼoeˇ loꞈ-ehˇ gʼeh-eu tsawˇ haˬ deuˬ kʼoeˇ taˆ Miˬyehˇ nui ma pehˇ-eu jeˬ tahˬ daˆ nehˬ tehꞈ-a.

⁹Yuˇdaˆ tsawˇ haˬ deuˬ-ahˇ neh aˇ dahˬ beh-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ keuˆ ni, maˬ muiˬ-eu jeˬ kʼaˇ mˇ-eu tsawˇ haˬ dawˬ tawˆ luꞈ, kʼehˬ-eu kʼaˆ-eu jeˬ hawˇ-eu shaˬ zahˬ naꞈ dui dui-eu jeˬ-ahˇ ya daˬ tehꞈ-a.

¹⁰Ehˇ kʼawꞈ, Yuˇdaˆ tsawˇ haˬ deuˬ-ahˇ neh aˇ dahˬ beh-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ keuˆ ni, yaw muiˬ jeˬ kʼaˇ mˇ-eu tsawˇ haˬ dawˬ tawˆ luꞈ-ahˇ, yaw shehꞈ kʼahˬ sehˇ hawˇ-eu taˬ huiˬ taˬ mahˇ nehˬ-eu jeˬ maˬ ehˇ, nui saˇ oꞈ-eu jeˬ maˬ ehˇ, Miˬyehˇ biꞈ nehˬ tehꞈ-a.

¹¹Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ yawˬ gʼaˬ na luꞈ-ahˇ myaˆ pyawˬ huiˬ nyiˇ maˬ tseˇ ni yaˇ kʼaˬ daˇ tehꞈ-a.

¹²Yuˇdaˆ tsawˇ haˬ maˬ ngeuˇ-eu deuˬ-aˬ, Moˇseˬ neh biꞈ-euˬ Zahˇ dawˬ kʼoꞈ dawˬ maˬ jaˆ-a. Aˬ yawꞈ maꞈ Zahˇ dawˬ kʼoꞈ dawˬ-ahˇ maˬ taꞈ-ehˇ iˬ baˇ mˇ naˇ, Zahˇ dawˬ kʼoꞈ dawˬ-ahˇ maˬ taꞈ-ehˇ ya luˬ ya seˇ-iˇ tehꞈ-a. Yuˇdaˆ tsawˇ haˬ deuˬ-aˬ, Zahˇ dawˬ kʼoꞈ dawˬ jaˆ-eu miˇ neh, iˬ baˇ mˇ naˇ, Zahˇ dawˬ kʼoꞈ dawˬ laꞈ kʼoeˇ kʼaˇ ehˇ taˬ-euˬ loꞈ-ehˇ yaˇ kʼaˬ daˇ nehˬ gaˇ ya daˬ tehꞈ-a.

¹³Aˬ jeˬ miˇ neh ehˇ naˇ, tsawˇ haˬ zaˬ-aˬ, Zahˇ dawˬ kʼoꞈ dawˬ-ahˇ ya gaˬ-euˬ baˬ da neh tehꞈ-ehˇ Miˬyehˇ-ahˇ tsaˬ leˇ tsahˇ leˇ-eu maˬ ngeuˇ-a. Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ mˇ-awˇ neh tehꞈ-ehˇ Miˬyehˇ-ahˇ tsaˬ leˇ tsahˇ leˇ nya-eu meh.

¹⁴Yuˇdaˆ tsawˇ haˬ maˬ ngeuˇ-eu deuˬ-aˬ, Moˇseˬ neh biꞈ-euˬ Zahˇ dawˬ kʼoꞈ dawˬ maˬ jaˆ-a. Ehˇ kʼawꞈ, aˬ yawꞈ maꞈ noeˬ siˬ nya-awˇ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ dehꞈ tsaˬ nya naˇ, aˬ yawꞈ maꞈ-euˬ noeˬ siˬ nya-eu nui ma-aˬ, aˬ yawꞈ maꞈ-euˬ zahˇ dawˬ kʼoꞈ dawˬ pyeuꞈ-eu meh.

¹⁵Aˬ yawꞈ maꞈ dehꞈ-euˬ jawˇ-euˬ kʼoeˇ-aˬ, aˬ yawꞈ maꞈ-euˬ nui ma laꞈ kʼoeˇ Zahˇ dawˬ kʼoꞈ dawˬ boꞈ ahˇ taˬ-euˬ gaˇ duˇ-eu gaˇ kawˆ saˇ kiˇ kamˬ luꞈ-eu meh. Aˬ yawꞈ maꞈ-euˬ nui ma laꞈ kʼoeˇ Zahˇ dawˬ kʼo dawˬ boꞈ ahˇ taˬ-euˬ gaˇ duˇ-eu gaˇ kawˆ, aˬ yawꞈ maꞈ-euˬ noeˬ siˬ nya-eu nui ma kʼoeˇ siˬ kʼawꞈ, saˇ kiˇ kamˬ luꞈ-eu meh. Aˬ jeˬ miˇ neh ehˇ naˇ, tiˬ poˆ na aˬ yawꞈ maꞈ neh mˇ-euˬ tsaˬ meh lehˇ aˬ yawꞈ maꞈ-euˬ nui noeˬ kʼoeˇ aˬ yawꞈ maꞈ-ahˇ ehˇ nehˬ-awˇ, tiˬ poˆ na maˬ tsaˬ-a lehˇ aˬ yawꞈ maꞈ-ahˇ pyehˇ luꞈ meh.

¹⁶Kʼoeˇ miˇ neh, ngaˇ mehˬ luꞈ-eu Laˬ kʼaˬ cehˇ-eu Guiˬ lahˬ dawˬ heu ehˇ mawꞈ-eu-aˬ, tsawˇ haˬ zaˬ-euˬ nui ma laꞈ kʼoeˇ zaꞈ taˬ-euˬ nui noeˬ kʼoeˇ-ahˇ, Yeˬsuˇ Ka li-ahˇ gʼoe-awˇ Miˬyehˇ yaˇ kʼaˬ daˇ ngeh Nah, kʼoeˇ loꞈ-ehˇ daˇ tehꞈ-a.

¹⁷Nawˬ-euˬ gaˇ kawˆ aˬ joˆ-ehˇ ehˇ paˬ nga. Nawˇ Yuˇdaˆ tsawˇ haˬ ma lehˇ nawˇ yawˬ haˇ yawˬ ha ehˇ-eu meh. Zahˇ dawˬ kʼoꞈ dawˬ-ahˇ gʼoe luꞈ-awˇ, Miˬyehˇ-euˬ tsawˇ haˬ ma lehˇ kʼahˬ sehˇ jehˆ-eu meh.

¹⁸Miˬyehˇ bi mˇ mawꞈ-eu jeˬ-ahˇ nawˇ siˬ nya-awˇ, yaw muiˬ jeˬ-ahˇ aˬ joˆ-ehˇ ya tseˇ geuꞈ-eu gaˇ kawˆ Zahˇ dawˬ kʼoꞈ dawˬ laꞈ kʼoeˇ mehˬ taˬ-euˬ nawˇ siˬ nya meh.

¹⁹Nawˇ-aˬ, myaˆ behꞈ-ahˇ gaˇ ma sheuˬ mehˬ-eu tsawˇ haˬ pyeuꞈ-awˇ, yaw zahˇ laꞈ kʼoeˇ jawˇ-eu tsawˇ haˬ deuˬ gʼaˇ duˬ yaw shehꞈ pyeuꞈ-eu ma lehˇ, yawˬ haˇ yawˬ ha sawˇ taˬ-euˬ meh.

²⁰Aˬ dzawˬ aˇ gah deuˬ-ahˇ mehˬ paˇ tsoˆ paˇ-eu tsawˇ haˬ pyeuꞈ-awˇ, maˬ siˬ maˬ nya-eu tsawˇ haˬ deuˬ-ahˇ mehˬ nehˬ tsoˆ nehˬ-eu tsawˇ haˬ ma lehˇ nawˇ sawˇ taˬ-euˬ meh. Zaˬ siˬ tsawˇ gahˇ hawˇ-eu yaw tsaˬ yaw dawˇ dawˬ tawˆ luꞈ Zahˇ dawˬ kʼoꞈ dawˬ laꞈ kʼoeˇ ahˇ jiˇ ma lehˇ nawˇ jah duˬ taˬ-euˬ meh.

²¹Nawˇ aˬ cawˬ-ahˇ mehˬ-eu tsoˆ-eu jeˬ maˇ-iˬ, aˬ jeˬ miˇ neh yawˬ haˇ yawˬ ha maˬ mehˬ maˬ tsoˆ te. Smˇ kʼoeˬ taˬ kʼoeˬ lehˇ aˬ cawˬ-ahˇ dawˬ mehˬ mehˬ-awˇ, yawˬ ha gʼaˬ smˇ kʼoeˬ kʼoeˬ luꞈ te loˇ.

²²Aˬ cawˬ-euˬ miˬ zaˬ yo zaˬ-ahˇ taˬ byahˬ taˬ muˆ lehˇ nawˇ ehˇ-awˇ, yawˬ ha gʼaˬ bahˬ luꞈ muˆ luꞈ te loˇ. Nawˇ tahˬ pahˬ aˬ ma mawˇ kawˇ-ahˇ nui daˆ daˆ kʼawꞈ, tahˬ paˬ aˬ ma nymˇ laꞈ kʼoeˇ jaˆ-eu myawˬ gahˬ deuˬ kʼoeˬ luꞈ te loˇ.

²³Nawˇ Miˬyehˇ-euˬ zahˇ dawˬ kʼoꞈ dawˬ jaˆ ma lehˇ kʼahˬ sehˇ jehˆ-eu kʼawꞈ, zahˇ dawˬ kʼoꞈ dawˬ-ahˇ mˇ bahˬ mˇ bahˬ-ehˇ, Miˬyehˇ-euˬ myaˆ pyawˬ naˇ mehˇ cawˆ ni jahˇ luꞈ te loˇ.

²⁴“Naw maꞈ Yuˇdaˆ tsawˇ haˬ deuˬ baˬ da neh, Yuˇdaˆ tsawˇ haˬ maˬ ngeuˇ-eu deuˬ Miˬyehˇ-euˬ tsawˇ myahˇ cawˆ ni ngehˬ luꞈ tmˇ luꞈ meh” lehˇ, Jaˇliꞈ laꞈ kʼoeˇ ehˇ taˬ-euˬ meh.

²⁵Zahˇ dawˬ kʼoꞈ dawˬ-ahˇ naw maꞈ naˇ haˬ geuꞈ naˇ, baˆ kʼoˆ mehˬ dzaˬ yehˬ-euˬ gaˇ dahˇ tsoeˬ tehꞈ-a. Ehˇ kʼawꞈ, Zahˇ dawˬ kʼoꞈ dawˬ-ahˇ naw maꞈ maˬ naˇ haˬ geuꞈ naˇ, baˆ kʼoˆ mehˬ dzaˬ yehˬ-euˬ kʼawꞈ, maˬ yehˬ-euˬ gaˇ duˇ tehꞈ-a.

²⁶Baˆ kʼoˆ mehˬ dzaˬ maˬ yehˬ-euˬ aˬ cawˬ tsawˇ jeuˬ kʼawꞈ Zahˇ dawˬ kʼoꞈ dawˬ-ahˇ naˇ haˬ geuꞈ naˇ, maˬ yehˬ-euˬ kʼawꞈ, yehˬ-euˬ loꞈ-ehˇ Miˬyehˇ maˬ sawˇ nehˬ-aˇ loˇ.

²⁷Naw maꞈ Yuˇdaˆ tsawˇ haˬ deuˬ-ahˇ aˬ cawˬ iˬ baˇ taˬ tehꞈ-a. Aˬ jeˬ miˇ neh ehˇ naˇ, naw maꞈ Zahˇ dawˬ kʼoꞈ dawˬ boꞈ doˆ taˬ-euˬ jaˆ-awˇ baˆ kʼoˆ mehˬ dzaˬ yehˬ-euˬ kʼawꞈ, Zahˇ dawˬ kʼoꞈ dawˬ mehˬ nah maˬ caw teh-a. Aˬ cawˬ tsawˇ jeuˬ kʼoeˇ deuˬ-aˬ, shiˬ shaˬ jiˇ baˆ kʼoˆ mehˬ dzaˬ maˬ yehˬ-euˬ kʼawꞈ, Zahˇ dawˬ kʼoꞈ dawˬ-ahˇ naˇ haˬ geuꞈ-eu meh.

²⁸Shiˬ shaˬ jiˇ baˆ kʼoˆ mehˬ dzaˬ tehꞈ-ehˇ yehˬ-awˇ, maˇ maˇ ni gʼeh-eu baˆ kʼoˆ mehˬ dzaˬ maˬ yehˬ-euˬ tsawˇ haˬ-aˬ, Yuˇdaˆ tsawˇ haˬ maˇ maˇ ni maˬ ngeuˇ-a. Laꞈ nyiˇ paw tehꞈ-ehˇ Yuˇdaˆ tsawˇ haˬ pyeuꞈ-eu meh.

²⁹Laꞈ kʼoeˇ paw keuˆ ni Yuˇdaˆ tsawˇ haˬ pyeuꞈ-eu gʼaˬ-aˬ, Yuˇdaˆ tsawˇ haˬ maˇ maˇ ni meh. Aˬ yawꞈ-aˬ, nui ma laꞈ kʼoeˇ baˆ kʼoˆ mehˬ dzaˬ yehˬ-euˬ tsawˇ haˬ meh. Kʼoeˇ-aˬ Miˬyehˇ-euˬ Yaw sahˇ neh mˇ-euˬ jeˬ pyeuꞈ-eu meh. Boꞈ doˆ taˬ-euˬ Zahˇ dawˬ kʼoꞈ dawˬ neh mˇ-euˬ jeˬ maˬ ngeuˇ-a. Kʼoeˇ loꞈ-ehˇgʼeh-eu tsawˇ haˬ-ahˇ ja ceuˬ-eu gʼaˬ-aˬ, Miˬyehˇ meh. Tsawˇ haˬ zaˬ maˬ ja ceuˬ-a.