Read Akha 1 Gawˇliˬtu 11 Bible Online

1 Gawˇliˬtu 11 - Akha bible

1 Gawˇliˬtu 11

¹Ngaˇ Ka li-ahˇ dzaw geuꞈ-eu loꞈ-ehˇ, naw maꞈ ngaˬ-ahˇ dzaw geuꞈ-awˬ.

²Naw maꞈ ngaˬ-ahˇ aˬ myah luꞈ noeˬ keuˆ-awˇ, ngaˬ neh mehˬ taˬ tsoˆ taˬ yaꞈ-euˬ dawˬ deuˬ-ahˇ caw teh-eu miˇ neh, naw maꞈ-ahˇ ngaˇ ja ceuˬ-eu ma.

³Ehˇ kʼawꞈ, Ka li-aˬ, tsawˇ haˬ yawˬ gʼaˬ na luꞈ-euˬ uˬ duˬ pyeuꞈ-eu gaˇ kawˆ maˬ ehˇ, kʼaˬ dzeˇ zaˬ-aˬ miˬ zaˬ-euˬ uˬ duˬ pyeuꞈ-eu gaˇ kawˆ maˬ ehˇ, Miˬyehˇ-aˬ Ka li-euˬ uˬ duˬ pyeuꞈ-eu gaˇ kawˆ maˬ ehˇ, naw maꞈ bi gʼoˆ shaw mawꞈ miˇ-a.

⁴Kʼaˬ dzeˇ zaˬ tiˬ gʼaˬ tsawˇ haˬ gʼawˬ mya ni uiˬ leˇ-awˇ uˬ duˬ tahˬ gaˇ guiˬ lahˬ shaˇ-awˇ sheuˬ gʼeh-eu maˬ kaˬ, dawˬ mehˬ mehˬ-eu maˬ kaˬ, uˬ dzahˬ dzahˬ naˇ, yawˬ ha-euˬ uˬ duˬ pyeuꞈ-eu Ka li-ahˇ yaw zeu maˬ baw gaˇ duˇ-eu meh.

⁵Ehˇ kʼawꞈ, zaˬ miˬ zaˬ tiˬ gʼaˬ tsawˇ haˬ gʼawˬ mya ni uiˬ leˇ-awˇ uˬ duˬ tahˬ gaˇ guiˬ lahˬ shaˇ-awˇ sheuˬ gʼeh-eu maˬ kaˬ, dawˬ mehˬ mehˬ-eu maˬ kaˬ, uˬ boeˬ maˬ boeˬ taˬ naˇ, yawˬ ha-euˬ uˬ duˬ pyeuꞈ-eu yawˬ ha-euˬ kʼaˬ dzeˇ zaˬ-ahˇ yaw zeu maˬ baw gaˇ duˇ-eu meh. Aˬ yawꞈ-aˬ, uˬ jehˆ jehˆ dzeh-euˬ zaˬ miˬ zaˬ tiˬ gʼaˬ-ahˇ duˇ tsehˆ tsehˆ-euˬ meh.

⁶Zaˬ miˬ zaˬ-aˬ, uˬ boeˬ maˬ boeˬ ma lehˇ ngeuˇ naˇ, tsehˇ kahˇ tehˬ tsehˆ dzeh paˬ-ehˇ gʼeh-eu meh. Ehˇ kʼawꞈ, uˬ jehˆ jehˆ-eu hawˇ-eu uˬ duˬ tsehˇ kahˇ tehˬ tsehˆ dzeh-eu jeˬ-aˬ, zaˬ miˬ zaˬ gʼaˇ duˬ shaꞈ dawˇ dui dui paˬ-ehˇ gʼeh-eu tiˬ jeˬ pyeuꞈ-eu miˇ neh, uˬ boeˬ boeˬ-eu tsaˬ dzehˬ meh.

⁷Kʼaˬ dzeˇ zaˬ-aˬ, uˬ dzahˬ dzahˬ-eu maˬ loˬ-a. Aˬ jeˬ miˇ neh ehˇ naˇ, aˬ yawꞈ-aˬ Miˬyehˇ-euˬ myaˆ pyawˬ naˇ mehˇ pyeuꞈ-eu meh. Ehˇ kʼawꞈ, zaˬ miˬ zaˬ-aˬ kʼaˬ dzeˇ zaˬ-euˬ myaˇ pyawˬ naˇ mehˇ pyeuꞈ-eu meh.

⁸Aˬ jeˬ miˇ neh ehˇ naˇ, zaˬ miˬ zaˬ-euˬ laꞈ kʼoeˇ neh kʼaˬ dzeˇ zaˬ-ahˇ beh doˆ taˬ-euˬ maˬ ngeuˇ-a. Kʼaˬ dzeˇzaˬ-euˬ laꞈ kʼoeˇ neh zaˬ miˬ zaˬ-ahˇ beh doˆ taˬ-euˬ meh.

⁹Zaˬ miˬ zaˬ-euˬ gʼaˇ duˬ kʼaˬ dzeˇ zaˬ-ahˇ beh taˬ-euˬ kʼawꞈ maˬ ngeuˇ-a. Kʼaˬ dzeˇ zaˬ-euˬ gʼaˇ duˬ zaˬ miˬ zaˬ-ahˇ beh taˬ-euˬ meh.

¹⁰Zaˬ miˬ zaˬ deuˬ mˬ taˆ gʼaˬ kʼehˇ baˬ da neh yawˬ ha-euˬ kʼaˬ dzeˇ zaˬ uˆ lahˇ-eu uˬ moˆ jawˇ luꞈ-eu gaˇ kawˆ bya cehˆ ni bi siˬ bi mawˇ-eu gʼaˇ duˬ, uˬ boeˬ boeˬ-eu tsaˬ meh.

¹¹Ehˇ kʼawꞈ, Sahˬpaˬ Miˬyehˇ laꞈ kʼoeˇ aˬ dui yaw dehꞈ dehꞈ-eu jeˬ-aˬ, zaˬ miˬ zaˬ gʼaˬ kʼaˬ dzeˇ zaˬ-ahˇ maˬ gʼoe-ehˇ maˬ dehꞈ nya-eu loꞈ-ehˇ, kʼaˬ dzeˇ zaˬ gʼaˬ kʼawꞈ zaˬ miˬ zaˬ-ahˇ maˬ gʼoe-ehˇ maˬ dehꞈ nya-a.

¹²Aˬ jeˬ miˇ neh ehˇ naˇ, kʼaˬ dzeˇ zaˬ-euˬ laꞈ kʼoeˇ neh zaˬ miˬ zaˬ-ahˇ beh doˆ taˬ-euˬ loꞈ-ehˇ, zaˬ miˬ zaˬ-euˬ laꞈ kʼoeˇ neh kʼaˬ dzeˇ zaˬ dehꞈ doˆ le-euˬ meh. Yawˬ jeˬ na luꞈ Miˬyehˇ-euˬ laꞈ kʼoeˇ doˆ le-euˬ tehꞈ meh.

¹³Zaˬ miˬ zaˬ tiˬ gʼaˬ tsawˇ haˬ gʼawˬ mya ni uiˬ leˇ-awˇ uˬ duˬ tahˬ luꞈ gaˇ guiˬ lahˬ shaˇ-awˇ sheuˬ gʼeh ngeh, uˬ boeˬ maˬ boeˬ-ehˇ sheuˬ gʼeh-eu jeˬ tsaˬ-eu maˬ tsaˬ-eu naw maꞈ tseˇ paˆ geuꞈ-awˬ.

¹⁴Kʼaˬ dzeˇ zaˬ uˬ duˬ tsehˇ kahˇ gʼawˬ mahˇ ni taˬ naˇ, shaꞈ dawˇ paˬ-ehˇ gʼeh-eu jeˬ pyeuꞈ-eu gaˇ kawˆ, tsawˇ haˬ-euˬ zahˇ sahˇ kʼoꞈ-ahˇ naw maꞈ siˬ nya luꞈ meh.

¹⁵Ehˇ kʼawꞈ, zaˬ miˬ zaˬ uˬ duˬ tsehˇ kahˇ yaw mahˇ naˇ, aˬ yawꞈ-euˬ kʼahˬ sehˇ meh. Aˬ yawꞈ-euˬ uˬ duˬ tsehˇ kahˇ yaw mahˇ kʼoeˇ aˬ yawꞈ-ahˇ bi dehˬ kaˬ-eu gʼaˇ duˬ biꞈ taˬ-euˬ jeˬ pyeuꞈ-eu meh.

¹⁶Gaˇ kawˆ heu-ahˇ taꞈ leˇ-awˇ tsawˇ haˬ tiˬ gʼaˬ na dawˬ ja myaˬ mawꞈ naˇ, aˬ dui maꞈ maˬ ehˇ, Miˬyehˇ-euˬ Ka li zaˬ aˇ muˇ deuˬ maˬ ehˇ, uˬ duˬ tahˬ ngeh ya caw teh-eu zahˇ sahˇ kʼoꞈ yawˬ-awˇ yawˬ maˬ paˇ jaˆ ma lehˇ ngaˇ ehˇ mawꞈ-eu ma.

¹⁷Ehˇ kʼawꞈ, laꞈ oˆ paw mehˬ taˬ tsoˆ taˬ-euˬ gaˇ kawˆ-ahˇ taꞈ leˇ-awˇ, naw maꞈ-ahˇ ngaˇ maˬ ja ceuˬ. Aˬ jeˬ miˇ neh ehˇ naˇ, naw maꞈ tiˬ gaˇ uiˬleˇ-awˇ uˬ duˬ tahˬ-eu kʼoeˇ-aˬ, yaw muiˬ jeˬ naˆ maˬ tseˇ yaw cawˆ jeˬ myaˬ-eu meh.

¹⁸Yaw beh tiˬ jeˬ ya ehˇ naˇ, naw maꞈ maˬ tsaˬ leˇ-ehˇ aˇ muˇ muˇ paˆ-euˬ gaˇ kawˆ ngaˇ ya gaˬ taˬ-euˬ ma. Ngaˬ neh kʼaˇ ya gaˬ-euˬ loꞈ-ehˇ tiˬ paˆ paˆ tsaˬ-eu duˇ lehˇ ngaˇ jah-eu ma.

¹⁹Naw maꞈ-euˬ laꞈ kʼoeˇ muiˬ dzehˬ-eu tsawˇ haˬ deuˬ-ahˇ siˬ duˬ mawˇ duˬ laˇ ni, aˇ muˇ muˇ paˆ-eu jeˬ jaˆ laˇ-eu baw tehꞈ-a.

²⁰Naw maꞈ tiˬ kawˆ loꞈ-ehˇ uiˬ leˇ-awˇ dzaˬ-eu kʼoeˇ-aˬ, Sahˬpaˬ Yeˬsuˇ-ahˇ noeˬ keuˆ-eu Bawˬ-iˬ dzaˬ-eu maˬ ngeuˇ-a.

²¹Aˬ jeˬ miˇ neh ehˇ naˇ, naw maꞈ kʼoeˇ loꞈ-ehˇ dzaˬ ngeh, yawˬ gʼaˬ na luꞈ yawˬ ha neh kʼaˇ hehˇ laꞈ-euˬ jeˬ dzaˬ tehˇ tehˬ-eu meh. Kʼoeˇ miˇ neh, tiˬ paˆ na deuˬ maˬ ya dzaˬ dehˆ-ehˇ, tiˬ paˆ na deuˬ aˇ dzehˬ dzaˬ dzeuˇ-awˇ dzaˬ yehꞈ dawˇ yehꞈ-eu meh.

²²Naw maꞈ kʼoeˇ loꞈ-ehˇ dzaˬ-eu dawˇ-eu gʼaˇ duˬ yawˬ ha-euˬ nymˇ maˬ baw te loˇ. Maˬ ngeuˇ naˇ, naw maꞈ Miˬyehˇ-euˬ Ka li zaˬ aˇ muˇ-ahˇ yehˬ bawˬ sehˇ lu-ehˇ gʼeh-awˇ, shaˬ zaˬ zahˬ zaˬ deuˬ bi shaꞈ dawˇ-eu gʼaˇ duˬ jahˇ te loˇ. Gaˇ kawˆ heu hmˬ-ahˇ taꞈ leˇ-awˇ, ngaˇ aˬ joˆ-ehˇ ehˇ laˇ gaˇ naw maꞈ gaˬ mawꞈ-eu nya. Ja ceuˬ nehˬ laꞈ-eu dawˬ-ahˇ gaˬ mawꞈ-eu nya loˇ. Maˬ ja ceuˬ.

²³Ngaˬ neh naw maꞈ-ahˇ mehˬ-euˬ tsoˆ-euˬ dawˬ kʼoeˇ deuˬ Sahˬpaˬ Yeˬsuˇ jawˇ gaˇ ngaˇ za taˬ-euˬ ma. Sahˬ paˬ Yeˬsuˇ-aˬ, aˬ yawꞈ-ahˇ bi ahˬ dzaˬ ngeh miˇ, kaˬ muˇ yuˇ-awˇ,

²⁴Miˬyehˇ-euˬ guiˬ lahˬ-ahˇ ja ceuˬ-euˬ meh. Kʼoeˇ naˇ, kaˬ muˇ kʼoeˇ ngawˬ pyehˬ-awˇ, “Heu-aˬ, naw maꞈ-euˬ gʼaˇ duˬ pyeuꞈ-eu ngaˬ-euˬ gʼawˇ mawˇ ma. Ngaˬ-ahˇ noeˬ keuˆ-eu laꞈ kʼoeˇ heu loꞈ-ehˇ mˇ-awˬ” lehˇ ehˇ-euˬ meh.

²⁵Kʼoeˇ loꞈ-ehˇ duˇ ni, ciꞈ hawˬ kʼoeˇ byawˇ dzaˬ gʼaˬ ngeh, kʼmˬ maˬ ciˬ-awˇ, “Kʼmˬ maˬ heu-aˬ, ngaˬ-euˬ shiˬ-ahˇ gʼoe-awˇ dzaˬ-eu Miˬyehˇ-euˬ dawˬ ma saˇ jaˇ yaw shuiꞈ pyeuꞈ-eu meh. Naw maꞈ kʼaˇ dawˇ-eu yawˬ poˆ na luꞈ, ngaˬ-ahˇ noeˬ keuˆ-awˇ dawˇ-awˬ” lehˇ ehˇ-euˬ meh.

²⁶Naw maꞈ kaˬ muˇ kʼoeˇ dzaˬ-awˇ kʼmˬ maˬ kʼoeˇ kʼaˇ dawˇ ngeh, Sahˬpaˬ Yeˬsuˇ zaˬ le ngeh keuˆ ni aˬ yawꞈ shiˇ-euˬ gaˇ kawˆ saˇ kiˇ kamˬ luꞈ gaˇ duˇ-eu meh.

²⁷Sahˬpaˬ Yeˬsuˇ-ahˇ yaw zeu maˬ baw-eu laꞈ kʼoeˇ aˬ yawꞈ-euˬ kaˬ muˇ dzaˬ-awˇ aˬ yawꞈ-euˬ kʼmˬ maˬ kʼaˇ ciˬ dawˇ-eu tsawˇ haˬ-aˬ, Sahˬpaˬ Yeˬsuˇ-euˬ gʼawˇ mawˇ hawˇ-eu shiˬ-ahˇ yehˬ bawˬ sehˇ lu-ehˇ gʼeh-eu iˬ baˇ ahˇ-eu meh.

²⁸Kʼoeˇ miˇ neh, tsawˇ haˬ yawˬ gʼaˬ na luꞈ yawˬ haˇ yawˬ ha jeˬ huˬ shaˇ sawˇ gʼaˬ miˇ tsa, kaˬ muˇ dzaˬ-awˇ kʼmˬ maˬ ciˬ dawˇ-eu tsaˬ meh.

²⁹Aˬ jeˬ miˇ neh ehˇ naˇ, heu-aˬ, Sahˬpaˬ Yeˬsuˇ-euˬ gʼawˇ mawˇ meh lehˇ maˬ noeˬ siˬ-ehˇ kaˬ muˇ dzaˬ-awˇ kʼmˬ maˬ ciˬ dawˇ naˇ, kʼoeˇ loꞈ-ehˇ dzaˬ-euˬ dawˇ-euˬ baˬ da neh yawˬ ha kʼoeˇ taˆ iˬ baˇ keuˆ le ni mˇ gaˇ duˇ-eu meh.

³⁰Kʼoeˇ loꞈ-ehˇ gʼeh-eu baˬ da neh, naw maꞈ gʼawˬ mya ni gʼaˬ baˬ-awˇ naˇ-eu laꞈ kʼoeˇ, tiˬ paˆ na deuˬ shiˇ-eu meh.

³¹Aˬ dui yawˬ haˇ yawˬ ha jeˬ huˬ shaˇ sawˇ naˇ, Miˬyehˇ neh yaˇ kʼaˬ daˇ-euˬ jeˬ-ahˇ maˬ ya daˬ-aˇ.

³²Ehˇ kʼawꞈ, Sahˬpaˬ Yeˬsuˇ aˬ dui-ahˇ yaˇ kʼaˬ daˇ-awˇ kʼehˬ nehˬ laꞈ-eu kʼoeˇ-aˬ, miˇ tsaˬ zaˬ deuˬ nehˬ-ehˇ tiˬ kawˆ loꞈ-ehˇ yaˇ kʼaˬ daˇ nehˬ-eu jeˬ-ahˇ maˬ bi daˬ-eu gʼaˇ duˬ pyeuꞈ-eu meh.

³³Kʼoeˇ miˇ neh, aˬ yuiꞈ aˬ nyiˇ Ka li zaˬ deuˬ-oˇ, naw maꞈ Sahˬpaˬ Yeˬsuˇ-ahˇ noeˬ keuˆ-eu Bawˬ-iˬ dzaˬ-eu lehˇ uiˬ leˇ ngeh, tiˬ gʼaˬ tiˇ gʼaˬ dawˬ gm-awˬ.

³⁴Naw maꞈ kʼoeˇ loꞈ-ehˇ uiˬ leˇ ngeh Miˬyehˇ yaˇ kʼaˬ daˇ gaˇ maˬ ya daˬ-eu gʼaˇ duˬ, tsawˇ haˬ tiˬ gʼaˬ na hawˬ mehꞈ mehꞈ naˇ, iˇ kahˇ-ahˇ dzaˬ-eu tsaˬ meh. Gaˇ kawˆ nui deuˬ-aˬ, ngaˇ naw maꞈ jawˇ gaˇ oe keuˆ ngeh jahˇ jiˇ nehˬ ma.