Read Akha 1 Gawˇliˬtu 12 Bible Online

1 Gawˇliˬtu 12 - Akha bible

1 Gawˇliˬtu 12

¹Muiˬ-eu Shawˇ-eu Yaw sahˇ Miˬyehˇ neh biꞈ leꞈ-euˬ laꞈ sawˬ gaˇ kawˆ naw maꞈ neh boꞈ laꞈ-euˬ jeˬ-ahˇ taꞈ leˇ-awˇ, ngaˇ heu loꞈ-ehˇ ehˇ-eu ma. Aˬ yuiꞈ aˬ nyiˇ Ka li zaˬ deuˬ-oˇ, gaˇ kawˆ kʼoeˇ-ahˇ naw maꞈ yaw tsaˬ yaw dawˇ dawˇ-ehˇ bi siˬ nya mawꞈ miˇ-a.

²Naw maꞈ lawˇ ciꞈ zaˬ pyeuꞈ luꞈ ngeh, yaw dehꞈ maˬ dehꞈ-eu tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ tahˬ-ehˇ gʼawˬ mya jeˬ gʼawˬ mya kawˆ bahˬ-iˇ-euˬ gaˇ kawˆ naw maꞈ siˬ nya meh.

³Miˬyehˇ-euˬ Yaw sahˇ sheuˬ gʼeh-eu uˬ moˆ jawˇ-eu tsawˇ haˬ tiˬ gʼaˬ-iˬ “Yeˬsuˇ-ahˇ yaˬ kʼehˇ yaˬ luꞈ-uˇ” lehˇ maˬ ehˇ-aˇ lehˇ naw maꞈ bi siˬ duˬ mawꞈ miˇ-a. Kʼoeˇ loꞈ-ehˇ duˇ ni, Muiˬ-eu Shawˇ-eu Yaw sahˇ Miˬyehˇ sheuˬ gʼeh-eu uˬ moˆ maˬ jawˇ naˇ, tsawˇ haˬ tiˬ gʼaˬ-iˬ “Yeˬsuˇ-aˬ Sahˬpaˬ meh” lehˇ maˬ ehˇ nya-aˇ.

⁴Saꞈ laˇ paw za-euˬ laꞈ sawˬ gʼawˬ mya jeˬ jaˆ-eu meh. Ehˇ kʼawꞈ, dawˬ tawˆ luꞈ Yaw sahˇ Miˬyehˇ neh biꞈ leꞈ-euˬ tehꞈ meh.

⁵Sahˬpaˬ Miˬyehˇ-euˬ gaˇ gʼawˬ mya jeˬ beu gaˇ-eu jaˆ meh. Ehˇ kʼawꞈ, Sahˬpaˬ Miˬyehˇ tiˬ gʼaˬ gʼaˇ duˬ mˇ-eu tehꞈ meh.

⁶Miˬyehˇ gaˇ mˇ ngeh, tiˬ gʼaˬ tiˇ gʼaˬ mˇ nya-eu jeˬ maˬ duˇ leˇ-a. Ehˇ kʼawꞈ, aˬ yawꞈ gʼaˬ yawꞈ-ahˇ geuˇ-eu bym-eu nya-eu jeˬ, Miˬyehˇ tiˬ gʼaˬ neh tehꞈ-ehˇ biꞈ taˬ-euˬ meh

⁷Tsawˇ haˬ dawˬ tawˆ luꞈ-ahˇ gaˇ dahˇ bi tsoeˬ leˇ-eu gʼaˇ duˬ, tsawˇ haˬ aˬ yawꞈ gʼaˬ yawꞈ laꞈ kʼoeˇ Yaw sahˇ Miˬyehˇ tiˬ jeˬ-ehˇ jawˇ luꞈ-eu gaˇ kawˆ siˬ laˇ mawˇ laˇ-eu meh.

⁸Tiˬ gʼaˬ-ahˇ yaw muiˬ yaw doeˇ tseˇ paˆ geuꞈ-eu nui gahˇ ahˇ-eu dawˬ mehˬ nya-eu jeˬ biꞈ-awˇ, tiˬ gʼaˬ-ahˇ zaˬ siˬ tsawˇ gahˇ ahˇ-eu dawˬ mehˬ nya-eu jeˬ biꞈ taˬ-euˬ meh. Kʼoeˇ nyiˬ jeˬ luꞈ-ahˇ Yaw sahˇ Miˬyehˇ tiˬ gʼaˬ neh tehꞈ-ehˇ biꞈ taˬ-euˬ meh.

⁹Yaw sahˇ Miˬyehˇ aˬ yawꞈ tiˬ gʼaˬ neh tehꞈ-ehˇ, tiˬ gʼaˬ-ahˇ jah-eu jeˬ biꞈ-awˇ, tiˬ gʼaˬ-ahˇ naˇ gawˇ laˆ taˬ nehˬ nya-eu baoˬ biꞈ taˬ-euˬ meh.

¹⁰Tiˬ gʼaˬ-ahˇ zahˬ leˇ paˬ-ehˇ gʼeh-eu jeˬ mˇ nya-eu baoˬ biꞈ taˬ-awˇ, tiˬ gʼaˬ-ahˇ Miˬyehˇ dawˬ kawˬ mehˬ nya-eu laꞈ sawˬ biꞈ taˬ-euˬ meh. Tiˬ gʼaˬ-ahˇ Yaw sahˇ Miˬyehˇ neh biꞈ-euˬ laꞈ sawˬ ngeuˇ-eu maˬ ngeuˇ-eu tseˇ paˆ duˬ nya-eu nui gahˇ biꞈ taˬ-euˬ meh. Tiˬ gʼaˬ-ahˇ dawˬ gʼawˬ mya jeˬ ngehˬ nya-eu laꞈ sawˬ biꞈ taˬ-awˇ, tiˬ gʼaˬ-ahˇ dawˬ gʼawˬ mya jeˬ ngehˬ-eu kʼoeˇ-euˬ dawˬ tsuiꞈ yuˇ doˆ nya-eu laꞈ sawˬ biꞈ taˬ-euˬ meh.

¹¹Ehˇ kʼawꞈ, kʼoeˇ deuˬ dawˬ tawˆ luꞈ-ahˇ mˇ nya ni jahˇ-eu gʼaˬ-aˬ, Yaw sahˇ Miˬyehˇ meh. Aˬ yawꞈ neh nui ma kʼaˇ tsaˬ-euˬ loꞈ-ehˇ, tsawˇ haˬ aˬ yawꞈ gʼaˬ yawꞈ-ahˇ beu gaˇ-eu laꞈ sawˬ aˬ yawꞈ biꞈ-euˬ meh.

¹²Ka li-aˬ, aˇ sehˇ gʼawˬ mya sehˇ tsoꞈ-eu gʼawˇ mawˇ tiˬ mawˇ-ahˇ duˇ-eu meh. Maˬ duˇ leˇ-eu aˇ sehˇ deuˬ tsoꞈ luꞈ kʼawꞈ, gʼawˇ mawˇ tiˬ mawˇ tehꞈ meh.

¹³Kʼoeˇ loꞈ-ehˇ duˇ ni, aˬ dui dawˬ tawˆ luꞈ, Yuˇdaˆ tsawˇ haˬ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, zaˬ kʼaˆ maˬ ehˇ, zaˬ kʼaˆ maˬ ngeuˇ-eu deuˬ maˬ ehˇ, Yaw sahˇ Miˬyehˇ neh gʼawˇ mawˇ tiˬ mawˇ laꞈ kʼoeˇ iˇ cuꞈ bi shawˇ gʼaˬ-awˇ, aˬ dui dawˬ tawˆ luꞈ Yaw sahˇ Miˬyehˇ tiˬ gʼaˬ-ahˇ tehꞈ-ehˇ dawˇ luꞈ-eu ma.

¹⁴Gʼawˇ mawˇ tiˬ mawˇ-ahˇ aˇ sehˇ tiˬ sehˇ tehꞈ-ehˇ tsoꞈ-eu maˬ ngeuˇ-a. Aˇ sehˇ gʼawˬ mya sehˇ tsoꞈ-eu meh.

¹⁵Aˬ kuiˇ-aˬ, “Ngaˇ aˬ laꞈ maˬ ngeuˇ-eu miˇ neh gʼawˇ mawˇ-ahˇ maꞈ taꞈ” lehˇ ehˇ naˇ, gʼawˇ mawˇ-ahˇ maˬ taꞈ-eu aˇ sehˇ pyeuꞈ-iˇ nya meh loˇ.

¹⁶Naˬ bawˇ gʼeh, “Ngaˇ myaˆ nuiˆ maˬ ngeuˇ-eu miˇ neh gʼawˇ mawˇ-ahˇ maˬ taꞈ” lehˇ ehˇ naˇ, gʼawˇ mawˇ-ahˇ maˬ taꞈ-eu aˇ sehˇ pyeuꞈ-iˇ nya meh loˇ.

¹⁷Gʼawˇ mawˇ mawˇ lah-ehˇ myaˆ nuiˆ tiˬ nuiˆ tehꞈ-ehˇ tsoꞈ naˇ, teˇ saˇ gaˬ nya tehꞈ-a loˇ. Naˬ bawˇ tehꞈ-ehˇ tsoꞈ naˇ, yaw saꞈ behꞈ laꞈ nya tehꞈ-a loˇ.

¹⁸Ehˇ kʼawꞈ, Miˬyehˇ nui ma tsaˬ-eu loꞈ-ehˇ, maˬ duˇ leˇ-eu aˇ sehˇ yawˬ sehˇ na luꞈ-ahˇ nymˬ-mˇ kʼaˇ tsoꞈ luꞈ-eu loꞈ-ehˇ gʼawˇ mawˇ-ahˇ bi tsoꞈ-euˬ meh.

¹⁹Aˇ sehˇ tiˬ sehˇ tehꞈ naˇ, gʼawˇ mawˇ tiˬ mawˇ maˬ pyeuꞈ laˇ nya-a.

²⁰Nymˬ-mˇ mawˇ luꞈ-eu loꞈ-ehˇ, aˇ sehˇ gʼawˬ mya sehˇ tsoꞈ kʼawꞈ gʼawˇ mawˇ tiˬ mawˇ tehꞈ meh.

²¹Kʼoeˇ miˇ neh, myaˆ nuiˆ-aˬ, “Ngaˇ nawˬ-ahˇ maˬ loˬ” lehˇ aˬ laꞈ-ahˇ maˬ ehˇ nya-a. Kʼoeˇ loꞈ-ehˇ duˇ ni, uˬ duˬ kʼawꞈ, “Ngaˇ nawˬ-ahˇ maˬ loˬ” lehˇ aˬ kuiˇ-ahˇ maˬ ehˇ nya-a.

²²Kʼoeˇ naˆ tehꞈ-ehˇ maˬ ngeuˇ-a siˬ. Nahˬ dui nyiˇ dui dui-eu lehˇ sawˇ taˬ-euˬ aˇ sehˇ tiˬ hmˬ-ahˇ keuˆ ni maˬ gʼoe-ehˇ maˬ dehꞈ nya-a.

²³Gaˇ dahˇ yaw kʼaˆ-ehˇ maˬ tsoeˬ-aˇ lehˇ aˬ dui sawˇ taˬ-euˬ aˇ sehˇ deuˬ-ahˇ-aˬ, aˬ cawˬ naˆ maˬ tseˇ aˬ dui bo saˆ-awˇ, maˬ bi mawˇ kʼmˬ-eu aˇ sehˇ deuˬ-ahˇ-aˬ, aˬ cawˬ naˆ maˬ tseˇ kʼahˇ ya kʼoꞈ-eu meh.

²⁴Ehˇ kʼawꞈ, haw muiˬ-eu aˇ sehˇ deuˬ-ahˇ-aˬ, kʼoeˇ naˆ naˆ-ehˇ ngehˬ gʼeh-eu maˬ loˬ-a. Yaw kʼaˆ-ehˇ maˬ taˬ huiˬ nehˬ-euˬ aˇ sehˇ deuˬ-ahˇ bi taˬ huiˬ dzehˬ-eu gʼaˇ duˬ, Miˬyehˇ neh gʼawˇ mawˇ aˇ sehˇ deuˬ-ahˇ aˬ yawꞈ gaˇ yawꞈ tsaˬ leˇ ni kʼoeˇ loꞈ-ehˇ laˆ tsoꞈ taˬ-euˬ meh.

²⁵Kʼoeˇ miˇ neh, gʼawˇ mawˇ laꞈ kʼoeˇ gʼawˬ-iˇ gʼehˇ-iˇ-eu jeˬ maˬ jaˆ-ehˇ, maˬ duˇ leˇ-eu aˇ sehˇ kʼoeˇ deuˬ dawˬ tawˆ luꞈ tiˬ sehˇ tiˇ sehˇ ya bo saˆ-eu meh.

²⁶Aˇ sehˇ tiˬ sehˇ naˇ laˇ naˇ, aˇ sehˇ dawˬ tawˆ luꞈ ya caw naˇ-eu meh. Aˇ sehˇ tiˬ sehˇ-ahˇ aˬ cawˬ ja ceuˬ kʼaˇ za naˇ, aˇ sehˇ dawˬ tawˆ luꞈ laˬ kʼaˬ ya caw cehˇ-eu meh.

²⁷Naw maꞈ dawˬ tawˆ luꞈ Ka li-euˬ gʼawˇ mawˇ pyeuꞈ-awˇ, aˬ yawꞈ gʼaˬ yawꞈ aˇ sehˇ tiˬ sehˇ-ahˇ duˇ-eu meh.

²⁸Ka li zaˬ aˇ muˇ laꞈ kʼoeˇ, Miˬyehˇ neh jawˇ duˬ biˇ tsaˬ taˬ-euˬ meh. Gʼaˬ kʼehˇ deuˬ-ahˇ jeˬ hu hu saˬ bi jawˇ-awˇ, kʼoeˇ-euˬ jeˬ nah Miˬyehˇ gʼaˇ duˬ ngeh dah-eu deuˬ-ahˇ bi jawˇ-euˬ meh. Kʼoeˇ-euˬ jeˬ nah mehˬ-eu tsoˆ-eu saˬ laˬ deuˬ-ahˇ bi jawˇ-euˬ meh. Kʼoeˇ naˇ, zahˬ leˇ paˬ-ehˇ gʼeh-eu jeˬ mˇ nya-eu baoˬ biꞈ taˬ-euˬ deuˬ, naˇ gawˇ laˆ taˬ nya-eu baoˬ biꞈ taˬ-euˬ deuˬ, aˬ cawˬ-ahˇ caw ba nehˬ nya-eu deuˬ, Ka li zaˬ aˇ muˇ-euˬ gaˇ-ahˇ haw-eu pyaˆ-eu deuˬ hawˇ-eu, dawˬ gʼawˬ mya jeˬ ngehˬ nya-eu deuˬ-ahˇ tiˬ tiˆ saˇ-iˬ tiˬ tiˆ bi jawˇ ka leꞈ-euˬ meh.

²⁹Aˬ yawꞈ maꞈ yawˬ gʼaˬ na luꞈ gʼaˬ kʼehˇ maˬ ngeuˇ-a. Yawˬ gʼaˬ na luꞈ Miˬyehˇ gʼaˇ duˬ ngehˬ dah-eu tsawˇ haˬ maˬ ngeuˇ-a. Yawˬ gʼaˬ na luꞈ mehˬ-eu tsoˆ-eu saˬ laˬ maˬ ngeuˇ-a. Yawˬ gʼaˬ na luꞈ zahˬ leˇ paˬ-ehˇ gʼeh-eu jeˬ mˇ mehˬ nya-eu baoˬ za-euˬ maˬ ngeuˇ-a.

³⁰Yawˬ gʼaˬ na luꞈ naˇ gawˇ laˆ saˆ taˬ nya-eu maˬ ngeuˇ-a. Yawˬ gʼaˬ na luꞈ dawˬ gʼawˬ mya jeˬ ngehˬ nya-eu maˬ ngeuˇ-a. Yawˬ gʼaˬ na luꞈ dawˬ gʼawˬ mya jeˬ ngehˬ-euˬ dawˬ tsuiꞈ yuˇ doˆ mehˬ nya-eu maˬ ngeuˇ-a.

³¹Huiˬ dzehˬ byah dzehˬ-eu laꞈ sawˬ-ahˇ naw maꞈ nui kʼahˇ jaˆ-awˬ. Ehˇ kʼawꞈ, dawˬ tawˆ luꞈ naˆ maˬ tseˇ muiˬ dzehˬ-eu laꞈ sawˬ-aˬ, laꞈ oˆ paw ngaˬ neh ehˇ taˬ-euˬ gaˇ kawˆ heu hmˬ meh.