Read Akha 1 Gawˇliˬtu 13 Bible Online

1 Gawˇliˬtu 13 - Akha bible

1 Gawˇliˬtu 13

¹Ngaˇ-aˬ, tsawˇ haˬ zaˬ-euˬ dawˬ deuˬ hawˇ-eu mˬ taˆ gʼaˬ kʼehˇ-euˬ dawˬ-ahˇ keuˆ ni ngehˬ nya jiˇ-eu kʼawꞈ, gʼoeˇ-eu gaˬ-eu jeˬ maˬ ahˇ naˇ, boe loe diˬ-eu teˇ saˇ hawˇ-eu cehˇ lehˇ ciˆ-eu teˇ saˇ loꞈ-ehˇ tehꞈ meh.

²Ngaˇ-aˬ, Miˬyehˇ gʼaˇ duˬ ngehˬ dah nya-eu baoˬ za-euˬ tsawˇ haˬ pyeuꞈ-awˇ, zaˬ siˬ tsawˇ gahˇ dawˬ tawˆ luꞈ hawˇ-eu zaꞈ taˬ-euˬ jeˬ-ahˇ siˬ nya-eu tsawˇ gahˇ ahˇ-eu uˬ taꞈ, gawˬ jawˬ teh jiˆ nya gaˇ keuˆ ni jah-eu jeˬ ahˇ kʼawꞈ, gʼoeˇ-eu gaˬ-eu jeˬ maˬ ahˇ naˇ, tiˬ jeˬ-iˬ gaˇ dahˇ maˬ tsoeˬ-a.

³Ngaˇ kʼaˇ jaˆ-eu jeˬ aˬ cawˬ-ahˇ biꞈ jiˇ-awˇ, ngaˬ-euˬ gʼawˇ mawˇ-ahˇ miˬ dzaˬ bi dzah puiˆ gaˇ keuˆ ni lawˇ nehˬ peuˬ kʼawꞈ, gʼoeˇ-eu gaˬ-eu jeˬ maˬ ahˇ naˇ, ngaˬ-euˬ gʼaˇ duˬ tiˬ jeˬ-iˬ gaˇ dahˇ maˬ tsoeˬ-a.

⁴Gʼoeˇ-eu gaˬ-eu jeˬ-aˬ, nui ma gʼawˬ mahˇ ni taˬ-awˇ, aˬ cawˬ-ahˇ gʼawˬ shaˬ gaˬ nya-eu meh. Myaˆ maˬ naˆ-a. Maˬ jahˇ gʼeh-a. Huiˬ mawꞈ mahˇ mawꞈ-eu nui ma maˬ ahˇ-a.

⁵Gʼoeˇ-eu gaˬ-eu jeˬ-aˬ, aˬ cawˬ-ahˇ yehˬ bawˬ sehˇ lu-ehˇ maˬ gʼeh-a. Yawˬ ha-euˬ nui kʼahˇ maˬ poˆ-a. Nui ma pehˇ laˇ-eu maˬ kawˇ-a.

⁶Gʼoeˇ-eu gaˬ-eu jeˬ-aˬ, maˬ tsaˬ maˬ dawˇ-eu jeˬ-ahˇ laˬ kʼaˬ maˬ cehˇ-a. Yaw tsaˬ yaw dawˇ jeˬ-ahˇ laˬ kʼaˬ cehˇ-eu meh.

⁷Gʼoeˇ-eu gaˬ-eu jeˬ-aˬ, dawˬ tawˆ luꞈ-ahˇ daˬ coeˇ-eu meh. Dawˬ tawˆ luꞈ-ahˇ jah coeˇ-eu meh. Dawˬ tawˆ luꞈ-ahˇ noeˬ tmˬ coeˇ-eu meh. Dawˬ tawˆ luꞈ-ahˇ oˇ coeˇ-eu meh.

⁸Gʼoeˇ-eu gaˬ-eu jeˬ-aˬ, mˬ maˬ maˬ byaˆ zaˇ ziˇ gmˬ-eu meh. Miˬyehˇ gʼaˇ duˬ ngehˬ dah-eu jeˬ jaˆ luꞈ meh. Ehˇ kʼawꞈ, tiˬ kʼehˬ tiˬ yamˬ gmˬ-eu tehꞈ meh. Dawˬ gʼawˬ mya jeˬ ngehˬ nya-eu tsawˇ gahˇ jaˆ luꞈ meh. Ehˇ kʼawꞈ, gʼawˬ myahˇ ni maˬ kamˬ-a. Zaˬ siˬ tsawˇ gahˇ kʼawꞈ jaˆ luꞈ meh. Ehˇ kʼawꞈ, gʼawˬ myahˇ ni maˬ ziꞈ-a.

⁹Aˬ jeˬ miˇ neh ehˇ naˇ, aˬ dui za taˬ-euˬ zaˬ siˬ tsawˇ gahˇ hawˇ-eu Miˬyehˇ gʼaˇ duˬ ngehˬ dah nya-eu jeˬ-aˬ, maˬ byah maˬ loꞈ-a.

¹⁰Byah-eu loꞈ-eu jeˬ keuˆ le ngeh, maˬ byah maˬ loꞈ-eu jeˬ byoˆ-iˇ jiˇ tehꞈ-a.

¹¹Ngaˇ zaˬ yaw nyiˇ pyeuꞈ ngeh, zaˬ yaw nyiˇ loꞈ-ehˇ ngehˬ-awˇ tmˇ-awˇ, zaˬ yaw nyiˇ loꞈ-ehˇ nui ma taˬ-awˇ, zaˬ yaw nyiˇ loꞈ-ehˇ shaˇ noeˬ shaˇ sawˇ-euˬ ma. Nymˬ-mˇ ngaˇ tsawˇ kʼaˆ kʼaˆ laˇ-euˬ miˇ neh, zaˬ yaw nyiˇ-euˬ nui noeˬ byehˇ dzeh jiˇ-euˬ ma.

¹²Nymˬ-mˇ aˬ dui ya mawˇ luꞈ-eu heu-aˬ, pyawˬ haw-ahˇ haw-eu loꞈ-ehˇ duˇ-awˇ, maˬ mawˇ shawˇ laˇ-a. Aˇ yamˬ kʼoeˇ keuˆ le ngeh, myaˆ pyawˬ ciˬ daˬ-awˇ ya mawˇ duˬ tehꞈ-a. Nymˬ-mˇ ngaˇ siˬ nya-eu heu-aˬ, maˬ byah maˬ loꞈ-a siˬ. Ehˇ kʼawꞈ, aˇ yamˬ kʼoeˇ keuˆ le ngeh, byah laˇ loꞈ laˇ tehꞈ-a. Miˬyehˇ ngaˬ-ahˇ tiˬ byah tiˬ loꞈ siˬ nya-eu loꞈ-ehˇ byah laˇ loꞈ laˇ tehꞈ-a.

¹³Nymˬ-mˇ-aˬ, jah-eu jeˬ, noeˬ tmˬ-eu jeˬ, gʼoeˇ-eu gaˬ-eu jeˬ, heu smˇ jeˬ jaˆ-eu meh. Heu smˇ jeˬ laꞈ kʼoeˇ aˬ cawˬ naˆ maˬ tseˇ huiˬ dzehˬ-eu jeˬ-aˬ, gʼoeˇ-eu gaˬ-eu jeˬ meh.