Read Akha 1 Gawˇliˬtu 16 Bible Online

1 Gawˇliˬtu 16 - Akha bible

1 Gawˇliˬtu 16

¹Nymˬ-mˇ poˆ jawˇ-aˬ, Yuˇdaˆ miˇ kʼahˬ-ahˇ jawˇ-eu aˬ yuiꞈ aˬ nyiˇ Ka li zaˬ deuˬ-ahˇ caw ba nehˬ-eu gʼaˇ duˬ pyuˇ daˬ gʼoˆ uiˬ-eu gaˇ kawˆ naw maꞈ neh ngaˇ jawˇ gaˇ boꞈ ahˇ laꞈ-euˬ gaˇ kawˆ-ahˇ taꞈ leˇ-awˇ, ngaˇ heu loꞈ-ehˇ ehˇ-eu ma. Gaˬlaˬtiˆ miˇ kʼahˬ-ahˇ jawˇ-eu Ka li zaˬ aˇ muˇ deuˬ-ahˇ ngaˬ neh ehˇ nehˬ-euˬ loꞈ-ehˇ naw maꞈ mˇ-awˬ.

²Tiˬ jaw laꞈ kʼoeˇ aˇ dahˬ beh-eu nah[1] aˬ yawꞈ nah yawꞈ, naw maꞈ yawˬ gʼaˬ na luꞈ yawˬ ha neh kʼaˇ poˆ za-euˬ loꞈ-ehˇ geuˇ ni pyuˇ daˬ ui cuiˆ yuˇ doˆ-awˇ jeˬ hmˬ taˬ-awˬ. Kʼoeˇ loꞈ-ehˇ jahˇ naˇ, ngaˇ oe ngeh naw maꞈ pyuˇ taꞈ uiˬ-eu maˬ loˬ-aˇ.

³Ngaˇ oe keuˆ naˇ, nawˬ maꞈ nui ma tsaˬ-awˇ kʼehˇ doˆ-euˬ tsawˇ haˬ-ahˇ ngaˇ sahˬ boꞈ boꞈ ahˇ nehˬ-awˇ, naw maꞈ neh damˬ-euˬ pyuˇ kʼoeˇ Yeˬluˇsaˬlehˬ meuˬ-ahˇ bi sha ha-iˇ ma.

⁴Ngaˬ-euˬ gʼawˇ mawˇ iˇ paˬ-ehˇ gʼeh naˇ kʼawꞈ, aˬ yawꞈ maꞈ ngaˬ nehˬ-ehˇ oe caw nya tehꞈ-a.

⁵Ngaˇ Maˬgeˬdawˇniˆˆ miˇ kʼahˬ-ahˇ cah gʼaˬ naˇ, naw maꞈ jawˇ gaˇ oe ma. Aˬ jeˬ miˇ neh ehˇ naˇ, Maˬgeˬdawˇniˆˆ miˇ kʼahˬ-ahˇ ngaˇ le paˬ-ehˇ gʼeh-eu meh.

⁶Naw maꞈ nehˬ-ehˇ ngaˇ tiˬ kʼehˬ ya jawˇ-eu duˇ lehˇ noeˬ-euˬ ma. Tsahˬ gaˆ yamˬ tiˬ yamˬ yamˬ lah ni ya jawˇ-eu maˬ siˬ. Kʼoeˇ dzeuˇ naˇ, ngaˇ aˬ geuˬ paw paˇ iˇ-eu maˬ kaˬ, naw maꞈ caw ba nehˬ laꞈ gaˇ noeˬ tmˬ-eu ma.

⁷Ngaˇ iˇ tsehˆ laˇ tsehˆ-eu laꞈ kʼoeˇ, naw maꞈ-ahˇ tiˬ kʼehˬ tiˬ yamˬ tehꞈ-ehˇ tahˬ puˬ-eu jeˬ maˬ geuꞈ mawꞈ nya. Sahˬpaˬ Yeˬsuˇ nui ma tsaˬ naˇ, naw maꞈ jawˇ gaˇ ui cuiˆ gʼawˬ myahˇ ni jawˇ ma lehˇ noeˬ tmˬ taˬ-euˬ ma.

⁸Beˬdeˬgoˇdeˬ Bawˬ-iˬ gʼeh ngeh nah keuˆ ni, heu gaˇ Eˇpeˇsu meuˬ-ahˇ ngaˇ jawˇ ma.

⁹Heu gaˇ tsawˇ haˬ gʼawˬ mya ni ngaˬ-ahˇ laˆ tsoeˬ-eu jaˆ kʼawꞈ, gaˇ dahˇ tsoeˬ-eu huiˬ-eu gaˇ deuˬ mˇ-eu gʼaˇ duˬ aˇ yamˬ yaw muiˬ meh.

¹⁰Tiˆmoˇseˬ naw maꞈ jawˇ gaˇ oe doˆ lawˬ naˇ, yaw muiˬ paˬ-ehˇ ha nehˬ-awˬ. Aˬ jeˬ miˇ neh ehˇ naˇ, aˬ yawꞈ kʼawꞈ ngaˬ loꞈ-ehˇ Sahˬpaˬ Yeˬsuˇ-euˬ gaˇ mˇ luꞈ-eu tsawˇ haˬ meh.

¹¹Tsawˇ haˬ tiˬ gʼaˬ-iˬ aˬ yawꞈ-ahˇ yaw zeu maˬ baw ni taˬ gʼeh. Ehˇ kʼawꞈ, aˬ yawꞈ ngaˇ jawˇ gaˇ gʼoꞈ keuˆ laˇ nya ni, nui ma saˇ lehˆ ni gaˇ ma doˆ-iˇ nya ni caw ba nehˬ-awˬ. Aˬ yuiꞈ aˬ nyiˇ gaˇ mˇ cawˬ deuˬ nehˬ-ehˇ tiˬ kawˆ loꞈ-ehˇ aˬ yawꞈ gʼoꞈ keuˆ laˇ gaˇ ngaˇ noeˬ tmˬ luꞈ-eu ma.

¹²Gaˇ mˇ cawˬ Aˬpawˇluˆ-ahˇ taꞈ leˇ-awˇ heu loꞈ-ehˇ ehˇ mawꞈ miˇ-a. Gaˇ mˇ cawˬ nui deuˬ nehˬ-ehˇ tiˬ kawˆ loꞈ-ehˇ naw maꞈ jawˇ gaˇ dawˬ deh gʼa le-eu gʼaˇ duˬ, aˬ yawꞈ-ahˇ tiˬ kʼehˬ maˬ taˬ ni gʼaˬ biꞈ luꞈ ma. Nymˬ-mˇ mi naˆ-ehˇ oe ma lehˇ aˬ yawꞈ maˬ noeˬ tsehˆ-aˬ siˬ. Ehˇ kʼawꞈ, aˇ yamˬ tsaˬ laˇ naˇ aˬ yawꞈ oe-eu duˇ.

¹³Yaw beuˇ beuˇ-ehˇ jawˇ-awˬ. Jah-eu jeˬ laꞈ kʼoeˇ ziꞈ dah ni yawꞈ tehˬ taˬ-awˬ. Nui ma kʼaˬ duˬ ni taˬ-awˬ. Gʼaˬ tiˬ byah ni bi ahˇ-awˬ.

¹⁴Kʼaˇ mˇ kʼaˇ shaˇ-eu yawˬ jeˬ na luꞈ-ahˇ, gʼoeˇ-eu gaˬ-eu laꞈ kʼoeˇ mˇ-awˬ.

¹⁵Saˬteˬpaˬ hawˇ-eu aˬ yawꞈ-euˬ miˬ sawˇ zaˬ deuˬ gaˇ kawˆ naw maꞈ siˬ nya meh. Aˬ yawꞈ pehˬ-aˬ, Aˬˬgaˬyaˇ miˇ kʼahˬ laꞈ kʼoeˇ Ka li zaˬ pyeuꞈ beh beh laˇ-awˇ, Miˬyehˇ-euˬ tsawˇ haˬ deuˬ gʼaˇ duˬ gaˇ mˇ-eu lehˇ gʼawˇ mawˇ damˬ taˬ-euˬ tsawˇ haˬ meh. Ngaˇ naw maꞈ-ahˇ heu loꞈ-ehˇ shaˇ-eu ma.

¹⁶Aˬ yawꞈ maꞈ loꞈ-ehˇ gʼeh-eu tsawˇ haˬ deuˬ hawˇ-eu, aˬ yawꞈ maꞈ-euˬ gaˇ mˇ cawˬ deuˬ sheuˬ gʼeh-eu mehˬ nah yaw muiˬ paˬ-ehˇ caw teh-awˬ.

¹⁷Saˬteˬpaˬ, Pawˬduˇnaˆ, Aˬgaˬyaˬguˇ aˬ ha maꞈ ngaˇ jawˇ gaˇ laˇ keuˆ-euˬ miˇ neh laˬ kʼaˬ cehˇ dui dui nya. Naw maꞈ-euˬ dah zaˇ aˬ yawꞈ maꞈ ngaˬ-ahˇ caw ba nehˬ laꞈ-euˬ meh.

¹⁸Aˬ yawꞈ maꞈ naw maꞈ-euˬ nui ma-ahˇ laˆ saˆ nehˬ-euˬ loꞈ-ehˇ, ngaˬ-euˬ nui ma-ahˇ kʼawꞈ laˆ saˆ nehˬ laꞈ-euˬ meh. Heu loꞈ-ehˇ gʼeh-eu tsawˇ haˬ deuˬ-ahˇ taˬ huiˬ-eu tsaˬ meh.

¹⁹Aˬshaˆ miˇ kʼahˬ-ahˇ jawˇ-eu Ka li zaˬ aˇ muˇ deuˬ naw maꞈ-ahˇ dawˬ cawˬ puˬ ahˇ leꞈ-euˬ meh. Aˬguˇla hawˇ-eu Biˇgiˇla aˬ nyaꞈ dzeˇ zaˬ maˬ ehˇ, aˬ yawꞈ nyaꞈ dzeˇ zaˬ-euˬ nymˇ-ahˇ tahˬ dzoeˇ luꞈ-eu Ka li zaˬ aˇ muˇ kʼoeˇ muˇ maˬ ehˇ, Ka li zaˬ-euˬ nui gaˬ nui gʼoeˇ laꞈ kʼoeˇ naw maꞈ-ahˇ dawˬ cawˬ puˬ ahˇ leꞈ-euˬ meh.

²⁰Heu gaˇ kʼaˇ jawˇ-eu aˬ yuiꞈ aˬ nyiˇ Ka li zaˬ dawˬ tawˆ luꞈ, naw maꞈ-ahˇ dawˬ cawˬ puˬ ahˇ leꞈ-euˬ meh. Ka li zaˬ-euˬ nui gaˬ nui gʼoeˇ laꞈ kʼoeˇ tiˬ gʼaˬ tiˇ gʼaˬ dawˬ cawˬ puˬ-awˬ.

²¹Ngaˬ-euˬ aˬ laꞈ neh ngaˇ heu loꞈ-ehˇ boꞈ-eu ma. “Pawˇluˆ naw maꞈ-ahˇ dawˬ cawˬ puˬ ahˇ leꞈ-eu ma.”

²²Sahˬpaˬ Yeˬsuˇ-ahˇ maˬ kʼaˇ gaˬ-eu tsawˇ haˬ kʼoeˇ taˆ yaˬ kʼehˇ yaˬ-eu jeˬ keuˆ le luꞈ-uˇ. Maˬ laˬ naˬ daˬ--Aˬ dui-euˬ Sahˬpaˬ Yeˬsuˇ oe luꞈ-uˇ.

²³Sahˬpaˬ Yeˬsuˇ-euˬ guiˬ lahˬ yaw dzahˇ naw maꞈ kʼoeˇ taˆ keuˆ le luꞈ-uˇ.

²⁴Yeˬsuˇ Ka li laꞈ kʼoeˇ ngaˬ-euˬ gʼoeˇ-eu gaˬ-eu jeˬ naw maꞈ dawˬ tawˆ luꞈ kʼoeˇ taˆ jaˆ luꞈ-uˇ.