Read Akha 1 Gawˇliˬtu 5 Bible Online

1 Gawˇliˬtu 5 - Akha bible

1 Gawˇliˬtu 5

¹Zaˬ miˬ zaˬ hawˇ-eu kʼaˬ dzeˇ zaˬ yuꞈ taꞈ jawˇ taꞈ-eu gaˇ kawˆ-ahˇ taꞈ leˇ-awˇ, lawˇ ciꞈ zaˬ deuˬ maˬ mˇ peuˬ gaˇ keuˆ ni naw maꞈ mˇ keuˆ luꞈ meh lehˇ ngaˇ ya gaˬ duˬ taˬ-euˬ ma. Tsawˇ haˬ tiˬ gʼaˬ yawˬ ha-euˬ aˬ ma ma nyiˇ nehˬ-ehˇ joe-euˬ gaˇ kawˆ ngaˇ ya gaˬ-euˬ ma.

²Ehˇ kʼawꞈ naw maꞈ nui ma paˇ huiˬ-eu la. Noeˬ shaˬ dui dui paˬ-ehˇ gʼeh-awˇ, kʼoeˇ loꞈ-ehˇ mˇ-euˬ tsawˇ haˬ-ahˇ Ka li zaˬ aˇ muˇ laꞈ kʼoeˇ neh teh doˆ-eu tsaˬ meh.

³Ngaˬ-euˬ gʼawˇ mawˇ naw maꞈ nehˬ-ehˇ maˬ jawˇ kʼawꞈ, ngaˬ-euˬ nui ma naw maꞈ nehˬ-ehˇ jawˇ luꞈ ma. Ngaˇ naw maꞈ nehˬ-ehˇ jawˇ luꞈ gaˇ duˇ-eu loꞈ-ehˇ, kʼoeˇ loꞈ-ehˇ gʼeh-eu jeˬ mˇ-euˬ gʼaˬ-ahˇ aˬ dui-euˬ Sahˬpaˬ Yeˬsuˇ-euˬ tsawˇ myahˇ uˬ moˆ ngaˇ yaˇ kʼaˬ daˇ gʼaˬ-euˬ ma. Naw maꞈ tiˬ gaˇ uiˬ leˇ dzoeˇ leˇ ngeh, ngaˬ-euˬ nui ma kʼawꞈ naw maꞈ nehˬ-ehˇ jawˇ ma. Kʼoeˇ loꞈ-ehˇ uiˬ lehˇ ngeh, aˬ dui nehˬ-ehˇ jawˇ luꞈ-eu aˬ dui-euˬ Sahˬpaˬ Yeˬsuˇ-euˬ baoˬ-ahˇ gʼoe-awˇ heu loꞈ-ehˇ jahˇ-awˬ.

⁵Sahˬpaˬ Miˬyehˇ yaˇ kʼaˬ daˇ-eu Aˇ nah keuˆ le ngeh, tsawˇ haˬ kʼoeˇ gʼaˬ-euˬ saꞈ laˇ ka kʼoꞈ-eu jeˬ za nya-eu gʼaˇ duˬ, aˬ yawꞈ-euˬ gʼawˇ mawˇ-ahˇ nehꞈ Saˬdaˬ-euˬ aˬ laꞈ laꞈ kʼoeˇ a nehˬ-awˇ bi laˆ cawˆ-awˬ.

⁶Naw maꞈ nui ma huiˬ-eu maˬ tsaˬ-a. “Dehˬ tseˬ ui cuiˆ tehꞈ kʼawꞈ, kaˬ muˇ tiˬ tsmˇ tsmˇ lah ni bi poˬ laˇ nya meh” lehˇ ehˇ taˬ-euˬ jaˆ-eu naw maꞈ siˬ nya meh.

⁷Naw maꞈ mawˇ lah ni bi shawˇ laˇ-eu gʼaˇ duˬ, iˬ baˇ pyeuꞈ-eu dehˬ tseˬ yaw oeˇ kʼoeˇ laˆ shawˇ dzeh jiˇ-awˬ. Kʼoeˇ ngeh jawˇ, naw maꞈ dehˬ tseˬ tiˬ pawꞈ-iˬ maˬ ahˇ-eu kaˬ muˇ yaw shuiꞈ tiˬ siˬ pyeuꞈ laˇ tehꞈ-a. Naw maꞈ-aˬ, maˇ maˇ ni dehˬ tseˬ maˬ ahˇ-eu kaˬ muˇ-ahˇ duˇ meh lehˇ ngaˇ siˬ nya ma. Aˬ jeˬ miˇ neh ehˇ naˇ, aˬ dui Baˬsaˬkaˬ Bawˬ-iˬ gʼeh yamˬ tsaˬ laˇ taˬ-euˬ meh. Baˬsaˬkaˬ Bawˬ-iˬ gʼeh ngeh ya lawˇ-eu yawˇ zaˬ pyeuꞈ-eu Ka li-ahˇ lawˇ gʼaˬ-euˬ meh.

⁸Aˬ dui Baˬsaˬkaˬ Bawˬ-iˬ gʼeh kaˇ-euˇ. Iˬ baˇ hawˇ-eu maˬ muiˬ maˬ jaˬ-eu jeˬ pyeuꞈ-eu dehˬ tseˬ ahˇ-eu kaˬ muˇ-ahˇ maˬ gʼoe-ehˇ, yaw muiˬ yaw shawˇ hawˇ-eu yaw tsaˬ yaw dawˇ kaˬ muˇ pyeuꞈ-eu dehˬ tseˬ maˬ ahˇ-eu kaˬ muˇ-ahˇ gʼoe-awˇ bawˬ-iˬ gʼeh kaˇ-euˇ.

⁹Ngaˇ naw maꞈ-ahˇ boꞈ nehˬ-euˬ sahˬ boꞈ kʼoeˇ taꞈ laꞈ kʼoeˇ, maˬ mˇ kʼmˬ-eu jeˬ mˇ-eu tsawˇ haˬ deuˬ-ahˇ cawˬ taˬ cawˬ lehˇ ehˇ taˬ-euˬ ma.

¹⁰Aˬ cawˬ nehˬ-ehˇ joe-eu, nui kʼahˇ huiˬ-eu, smˇ kʼoeˬ kʼoeˬ-eu, tahˬ pahˬ aˬ ma mawˇ kawˇ-ahˇ uˬ duˬ tahˬ-eu, heu loꞈ-ehˇ gʼeh-eu deuˬ-ahˇ mˇ luꞈ-eu lawˇ ciꞈ zaˬ deuˬ-ahˇ cawˬ taˬ cawˬ lehˇ ngaˇ ehˇ mawꞈ-eu maˬ ngeuˇ. Miˇ tsaˬ heu kʼoeˇ taˆ kʼaˇ dehꞈ kʼoeˇ keuˆ ni kʼoeˇ loꞈ-ehˇ gʼeh-eu deuˬ-ahˇ naw maꞈ maˬ dehꞈ taꞈ-ehˇ maˬ gʼeh nya-aˇ.

¹¹Ngaˇ ehˇ mawꞈ-eu-aˬ, heu loꞈ-ehˇ ma. Yawˬ haˇ yawˬ ha jah-eu tsawˇ haˬ ma lehˇ ehˇ kʼawꞈ, aˬ cawˬ nehˬ-ehˇ joe-eu, nui kʼahˇ huiˬ-eu, tahˬ pahˬ aˬ ma mawˇ kawˇ-ahˇ uˬ duˬ tahˬ-eu, aˬ cawˬ-ahˇ ja bu ja doeˇ-eu, jiˇ baˬ dawˇ yehꞈ-eu, smˇ kʼoeˬ kʼoeˬ-eu, heu deuˬ-ahˇ mˇ-eu tsawˇ haˬ-ahˇ cawˬ taˬ cawˬ lehˇ ehˇ mawꞈ-eu ma. Kʼoeˇ loꞈ-ehˇ gʼeh-eu tsawˇ haˬ deuˬ nehˬ-ehˇ hawˬ jawˬ jawˬ taꞈ gaˇ keuˆ ni yahˇ-awˬ lehˇ ngaˇ nawꞈ maꞈ-ahˇ boꞈ nehˬ taˬ-euˬ ma.

¹²Laꞈ nyiˇ paw-euˬ tsawˇ haˬ-ahˇ ngaˇ yaˇ kʼaˬ daˇ-eu maˬ loˬ. Ehˇ kʼawꞈ, Ka li zaˬ aˇ muˇ laꞈ kʼoeˇ uˇ-eu deuˬ-ahˇ naw maꞈ yaˇ kʼaˬ maˬ daˇ-ehˇ aˬ joˆ-ehˇ byehˇ nya ta.

¹³Laꞈ nyiˇ paw-euˬ tsawˇ haˬ deuˬ-ahˇ Miˬyehˇ yaˇ kʼaˬ daˇ tehꞈ-a. Jaˇliꞈ laꞈ kʼoeˇ ehˇ taˬ-euˬ loꞈ-ehˇ, “Haiˬ-eu tsawˇ haˬ deuˬ-ahˇ naw maꞈ laꞈ kʼoeˇ maˬ bi jawˇ ni teh doˆ-awˬ.”