Read Akha 1 Gawˇliˬtu 6 Bible Online

1 Gawˇliˬtu 6 - Akha bible

1 Gawˇliˬtu 6

¹Naw maꞈ laꞈ kʼoeˇ Ka li zaˬ cawˬ cawˬ ja dzaˬ-eu jeˬ doˆ laˇ naˇ, Miˬyehˇ-euˬ tsawˇ haˬ deuˬ neh maˬ bi laˆ tsaˬ geuꞈ ni, aˬ jeˬ miˇ neh lawˇ ciꞈ zaˬ pyeuꞈ-eu yaˇ kʼaˬ daˇ-eu deuˬ mehˬ shi bi keuˆ leˇ te.

²Miˬyehˇ-euˬ tsawˇ haˬ deuˬ miˇ tsaˬ heu-ahˇ yaˇ kʼaˬ ya daˇ tehꞈ-a lehˇ naw maꞈ maˬ siˬ nya te loˇ. Naw maꞈ miˇ tsaˬ heu-ahˇ yaˇ kʼaˬ ya daˇ-eu jeˬ ngeuˇ naˇ, nyiˇ dui dui-eu gaˇ teu deuˬ-ahˇ maˬ jahˇ jiˇ nya te loˇ.

³Mˬ taˆ gʼaˬ kʼehˇ deuˬ-ahˇ aˬ dui yaˇ kʼaˬ ya daˇ meh lehˇ naw maꞈ maˬ siˬ nya te loˇ. Nymˬ-mˇ ya puˬ ya mawˇ luꞈ-eu gaˇ kawˆ heu deuˬ jahˇ tsaˬ nehˬ-eu-aˬ, aˬ jeˬ ehˇ nyaꞈ nyeuˆ ta.

⁴Gaˇ kawˆ heu loꞈ-ehˇ gʼeh-eu deuˬ doˆ laˇ ngeh, Ka li zaˬ aˇ muˇ neh maˬ taˬ huiˬ-euˬ tsawˇ haˬ jawˇ gaˇ aˬ jeˬ miˇ neh bi keuˆ leˇ te.

⁵Naw maꞈ shaꞈ dawˇ dui dui paˬ-ehˇ gʼeh-eu meh. Ka li zaˬ yaw kaˬ ja dzaˬ-eu jeˬ doˆ laˇ ngeh, jahˇ tsaˬ nehˬ nya-eu noeˬ dahˇ doe-eu tsawˇ haˬ naw maꞈ laꞈ kʼoeˇ maˬ jawˇ-ehˇ gʼeh tehꞈ-a loˇ.

⁶Ehˇ kʼawꞈ, naw maꞈ Ka li zaˬ yaw kaˬ tiˬ gʼaˬ tiˇ gʼaˬ yaˇ kʼaˬ daˇ-eu nymˇ-ahˇ daˬ keuˆ leˇ-awˇ, Ka li-ahˇ maˬ jah-eu tsawˇ haˬ deuˬ neh yaˇ kʼaˬ bi daˇ-eu la.

⁷Naw maꞈ yaw kaˬ yaˇ kʼaˬ mehˬ dzaˬ laˆ doˆ-eu lehˇ ehˇ-eu teu-aˬ, naw maꞈ gʼaˇ duˬ smˬ dui dui-eu jeˬ pyeuꞈ-eu meh. Aˬ cawˬ neh yaw doeˇ bi jahˇ-eu-aˬ, kʼoeˇ naˆ maˬ tseˇ maˬ gaˇ dzehˬ tehꞈ-a. Aˬ cawˬ neh tahˇ joe bi joe-eu kʼawꞈ, kʼoeˇ naˆ maˬ tseˇ maˬ gaˇ dzehˬ tehꞈ-a.

⁸Kʼoeˇ loꞈ-ehˇ maˬ ngeuˇ ni, naw maꞈ yaw kaˬ tiˬ gʼaˬ tiˇ gʼaˬ yaw doeˇ jahˇ-awˇ, tiˬ gʼaˬ tiˇ gʼaˬ tahˇ joe joe-eu meh. Ka li zaˬ cawˬ cawˬ teu naˆ ni dehꞈ pyeuꞈ taˬ-euˬ meh.

⁹Maˬ tsaˬ maˬ dawˇ-eu tsawˇ haˬ Miˬyehˇ Miˇkʼahˬ laꞈ kʼoeˇ maˬ ya uˇ leˇ-a lehˇ naw maꞈ siˬ duˬ luꞈ meh. Naw maꞈ taˬ noeˬ lehˬ. Aˬ cawˬ nehˬ-ehˇ joe-eu tsawˇ haˬ, tahˬ pahˬ aˬ ma mawˇ kawˇ-ahˇ uˬ duˬ tahˬ-eu tsawˇ haˬ, aˬ cawˬ-euˬ miˬ zaˬ yo zaˬ-ahˇ bahˬ-eu tsawˇ haˬ, kʼaˬ dzeˇ zaˬ cawˬ cawˬ kʼaˬ miˬ sheu-eu tsawˇ haˬ,

¹⁰smˇ kʼoeˬ kʼoeˬ-eu tsawˇ haˬ, nui kʼahˇ huiˬ-eu tsawˇ haˬ, jiˇ baˬ dawˇ yehꞈ-eu tsawˇ haˬ, aˬ cawˬ-ahˇ yehˬ bawˬ sehˇ lu-ehˇ ehˇ-eu tsawˇ haˬ, tahˇ joe joe-eu tsawˇ haˬ, heu deuˬ-aˬ, Miˬyehˇ Miˇkʼahˬ laꞈ kʼoeˇ tiˬ gʼaˬ-iˬ maˬ ya uˇ leˇ-a.

¹¹Naw maꞈ laꞈ kʼoeˇ tiˬ paˆ na deuˬ kʼoeˇ loꞈ-ehˇ dehꞈ dzeuˇ yaꞈ-euˬ meh. Ehˇ kʼawꞈ, naw maꞈ-ahˇ iˬ baˇ tsiˬ shawˇ nehˬ gʼaˬ-euˬ meh. Naw maꞈ-ahˇ Miˬyehˇ-euˬ aˬ laꞈ laꞈ kʼoeˇ a nehˬ gʼaˬ-euˬ meh. Naw maꞈ Miˬyehˇ-ahˇ tsaˬ leˇ tsahˇ leˇ ni, Sahˬpaˬ Yeˬsuˇ ka li hawˇ-eu Miˬyehˇ-euˬ Yaw sahˇ neh mˇ gʼaˬ-euˬ meh.

¹²“Ngaˇ maˬ mˇ kʼmˬ-eu jeˬ maˬ jaˆ.” Ehˇ kʼawꞈ, yawˬ jeˬ na luꞈ gaˇ dahˇ tsoeˬ-eu maˬ ngeuˇ-a. “Ngaˇ maˬ mˇ kʼmˬ-eu jeˬ maˬ jaˆ.” Ehˇ kʼawꞈ, aˬ geu jeˬ-euˬ laꞈ oˆ maˬ kaˬ, ngaˇ zaˬ kʼaˆ maˬ geuꞈ.

¹³“Dzaˬ-eu jeˬ-aˬ, uˬ maˆ gʼaˇ duˬ pyeuꞈ-awˇ, uˬ maˆ-aˬ, dzaˬ-eu jeˬ-euˬ gʼaˇ duˬ meh.” Ehˇ kʼawꞈ, nyiˬ jeˬ luꞈ-ahˇ Miˬyehˇ laˆ cawˆ tehꞈ-a. Gʼawˇ mawˇ-aˬ, aˬ cawˬ nehˬ-ehˇ joe-eu gʼaˇ duˬ maˬ ngeuˇ-a. Sahˬpaˬ Yeˬsuˇ-euˬ gaˇ mˇ-eu gʼaˇ duˬ meh. Gʼawˇ mawˇ-ahˇ bi dzaˬ bi dawˇ-eu gʼaˬ-aˬ, Sahˬpaˬ Yeˬsuˇ meh.

¹⁴Sahˬpaˬ Yeˬsuˇ-ahˇ Miˬyehˇ neh bi gʼoꞈ dehꞈ laˇ-euˬ meh. Aˬ dui-ahˇ kʼawꞈ, aˬ yawꞈ-euˬ baoˬ-ahˇ gʼoe-awˇ bi gʼoꞈ dehꞈ laˇ tehꞈ-a.

¹⁵Naw maꞈ-euˬ gʼawˇ mawˇ-aˬ, Ka li-euˬ gʼawˇ mawˇ-ahˇ tsoꞈ-eu aˇ sehˇ deuˬ pyeuꞈ-eu meh lehˇ maˬ siˬ nya te loˇ. Ka li-euˬ gʼawˇ mawˇ-ahˇ tsoꞈ-eu aˇ sehˇ tiˬ sehˇ ngaˇ yuˇ-awˇ, meh maˬlaˇ-euˬ gʼawˇ mawˇ-ahˇ taꞈ-eu aˇ sehˇ bi pyeuꞈ-iˇ kʼmˬ ta loˇ. Tiˬ jeˬ gʼeh-awˇ neh-iˬ maˬ bi pyeuꞈ-iˇ kʼmˬ-aˇ.

¹⁶Meh maˬ laˇ nehˬ-ehˇ yuꞈ taꞈ-eu tsawˇ haˬ-aˬ, meh maˬ laˇ kʼoeˇ gʼaˬ nehˬ-ehˇ tiˬ shiˬ tiˬ shaˬ tehꞈ-ehˇ pyeuꞈ-iˇ-euˬ meh lehˇ naw maꞈ maˬ siˬ nya te loˇ. “Nyiˬ gʼaˬ-euˬ tiˬ shiˬ tiˬ shaˬ tehꞈ-ehˇ pyeuꞈ laˇ-euˬ meh” lehˇ, Jaˇliꞈ laꞈ kʼoeˇ bya cehˆ ni ehˇ taˬ-euˬ meh.

¹⁷Ehˇ kʼawꞈ, Sahˬpaˬ Yeˬsuˇ nehˬ-ehˇ nui ma gm-eu tsawˇ haˬ-aˬ, saꞈ laˇ paw aˬ yawꞈ nehˬ-ehˇ tiˬ shiˬ tiˬ shaˬ tehꞈ-ehˇ pyeuꞈ-eu meh.

¹⁸Aˬ cawˬ nehˬ-ehˇ joe-eu jeˬ-ahˇ gʼawˬ tsehˆ tsehˆ-awˬ. Tsawˇ haˬ zaˬ neh mˇ-euˬ iˬ baˇ nui deuˬ dawˬ tawˆ luꞈ gʼawˇ mawˇ-ahˇ coeˬ-eu ciˆ-eu maˬ ngeuˇ-a. Ehˇ kʼawꞈ, aˬ cawˬ nehˬ-ehˇ joe-eu jeˬ mˇ-euˬ tsawˇ haˬ-aˬ, yawˬ ha-euˬ gʼawˇ mawˇ-ahˇ coeˬ ni ciˆ ni iˬ baˇ mˇ gaˇ duˇ-eu meh.

¹⁹Naw maꞈ-euˬ gʼawˇ mawˇ-aˬ, Miˬyehˇ neh biꞈ leꞈ-awˇ naw maꞈ-euˬ laꞈ kʼoeˇ jawˇ luꞈ-eu Muiˬ-eu Shawˇ-eu Yaw sahˇ Miˬyehˇ-euˬ uˬ duˬ tahˬ nymˇ pyeuꞈ-eu meh lehˇ maˬ siˬ nya te loˇ. Kʼoeˇ uˬ taꞈ, naw maꞈ-aˬ, naw maꞈ-euˬ maˬ ngeuˇ-a. Miˬyehˇ-euˬ meh.

²⁰Miˬyehˇ neh aˇ poeˬ biꞈ-awˇ zeuˇ tsehˆ gʼaˬ-euˬ meh. Kʼoeˇ miˇ neh, naw maꞈ-euˬ gʼawˇ mawˇ laꞈ kʼoeˇ Miˬyehˇ-euˬ yaw shehꞈ kʼahˬ sehˇ bi doˆ laˇ-awˬ.