Read Akha 1 Gawˇliˬtu 8 Bible Online

1 Gawˇliˬtu 8 - Akha bible

1 Gawˇliˬtu 8

¹Naw maꞈ neh ngaˬ-ahˇ boꞈ naˇ haˬ laꞈ-euˬ tahˬ pahˬ aˬ ma mawˇ kawˇ-ahˇ lawˇ-euˬ dzaˇ gaˇ kawˆ-ahˇ taꞈ leˇ-awˇ, ngaˇ heu loꞈ-ehˇ ehˇ-eu ma. “Aˬ dui yawˬ gʼaˬ na luꞈ zaˬ siˬ tsawˇ gahˇ ahˇ ma” leˇ siˬ nya ma. Ehˇ kʼawꞈ, zaˬ siˬ tsawˇ gahˇ-aˬ tsawˇ haˬ zaˬ-ahˇ nui ma bi huiˬ laˇ-awˇ, gʼoeˇ-eu gaˬ-eu jeˬ-aˬ, tsawˇ haˬ zaˬ-ahˇ bi huiˬ bi mahˇ laˇ-eu meh.

²Yawˬ haˇ yawˬ ha zaˬ siˬ tsawˇ gahˇ ahˇ ma lehˇ noeˬ-eu tsawˇ haˬ-aˬ, yawˬ ha siˬ geuˇ nya geuˇ-eu loꞈ-ehˇ maˬ siˬ maˬ nya keuˆ-eu tsawˇ haˬ pyeuꞈ-eu meh.

³Ehˇ kʼawꞈ, Miˬyehˇ-ahˇ gaˬ-eu tsawˇ haˬ-ahˇ Miˬyehˇ siˬ nya-eu meh.

⁴Kʼoeˇ miˇ neh, tahˬ paˬ aˬ ma mawˇ kawˇ-ahˇ lawˇ-euˬ dzaˇ-ahˇ dzaˬ-eu gaˇ kawˆ ngaˇ heu loꞈ-ehˇ ehˇ-eu ma. Tahˬ paˬ aˬ ma mawˇ kawˇ-aˬ, aˬ diˇ aˬ maˇ maˬ jaˆ maˬ jawˇ-eu jeˬ-euˬ dah zaˇ tehˆ taˬ-euˬ mawˇ kawˇ meh lehˇ aˬ dui siˬ nya ma. Miˬyehˇ tiˬ gʼaˬ tehꞈ-ehˇ jawˇ-eu gaˇ kawˆ kʼawꞈ, aˬ dui siˬ nya ma.

⁵Mˬ kʼoeˇ taˆ miˇ tsaˬ kʼoeˇ taˆ “miˬyehˇ” lehˇ kuˇ-euˬ gʼawˬ mya ni jawˇ-awˇ, “miˬyehˇ” hawˇ-eu “yaw sahˇ sahˬ paˬ” gʼawˬ mya gʼaˬ jawˇ-eu meh.

⁶Ehˇ kʼawꞈ, aˬ dui-euˬ gʼaˇ duˬ-aˬ, Miˬyehˇ tiˬ gʼaˬ jawˇ-eu tehꞈ ma. Aˬ yawꞈ-aˬ, dawˬ tawˆ luꞈ-ahˇ Beh-euˬ yaw sahˇ Aˬda pyeuꞈ-awˇ, aˬ yawꞈ gʼaˇ duˬ aˬ dui dehꞈ luꞈ-eu ma.

⁷Ehˇ kʼawꞈ, yawˬ gʼaˬ na luꞈ kʼoeˇ loꞈ-ehˇ siˬ nya-eu zaˬ siˬ tsawˇ gahˇ ahˇ-eu maˬ ngeuˇ-a. Tsawˇ haˬ tiˬ paˆ na deuˬ-aˬ, tahˬ pahˬ aˬ ma mawˇ kawˇ-ahˇ jah sheuˆ taˬ-euˬ miˇ neh, kʼoeˇ loꞈ-ehˇ gʼeh-eu lawˇ dzaˇ-ahˇ dzaˬ ngeh, tahˬ pahˬ aˬ ma mawˇ kawˇ-euˬ dzaˇ meh lehˇ noeˬ luꞈ-eu meh. Aˬ yawꞈ maꞈ-euˬ siˬ nya-eu nui ma gʼaˬ baˬ-eu miˇ neh, dzaˇ kʼoeˇ tsawˇ haˬ-ahˇ laˆ jawꞈ-eu meh lehˇ noeˬ-eu meh.

⁸Dzaˇ ehˇ-eu jeˬ-aˬ, aˬ dui hawˇ-eu Miˬyehˇ yaw kaˬ cawˬ cawˬ taꞈ gaˇ bi muiˬ laˇ-eu jeˬ maˬ ngeuˇ-a. Maˬ dzaˬ-euˬ baˬ da neh smˬ-iˇ-eu maˬ baw-ehˇ, dzaˬ-euˬ baˬ da neh lahˬ laˇ duˬ kʼawꞈ maˬ jaˆ-a.

⁹Ehˇ kʼawꞈ, naw maꞈ mˇ mawꞈ-eu jeˬ mˇ nya-eu aˬ kawˬ-aˬ jaˆ-eu baˬ da neh, jah-eu gʼaˬ byehˆ byehˆ-eu tsawˇ haˬ deuˬ iˬ baˇ maˬ ya bi mˇ ni yahˇ-eu tsaˬ meh.

¹⁰“Zaˬ siˬ tsawˇ gahˇ” ahˇ-eu deuˬ lehˇ kuˇ-eu naw maꞈ tahˬ pahˬ aˬ ma mawˇ kawˇ jaˆ-eu uˬ duˬ tahˬ nymˇ laꞈ kʼoeˇ dzaˬ luꞈ dawˇ luꞈ gaˇ, siˬ nya-eu nui ma gʼaˬ baˬ-eu tsawˇ haˬ tiˬ gʼaˬ ya mawˇ naˇ, tahˬ pahˬ aˬ ma mawˇ kawˇ-ahˇ lawˇ-euˬ dzaˇ-ahˇ dzaˬ ni gʼaˬ biꞈ nehˬ gaˇ maˬ duˇ-aˇ loˇ.

¹¹Kʼoeˇ loꞈ-ehˇ ngeuˇ naˇ, naw maꞈ-euˬ “zaˬ siˬ tsawˇ gahˇ” baˬ da neh gʼaˬ baˬ-eu Ka li zaˬ kʼoeˇ gʼaˬ cawˆ-iˇ tehꞈ-a. Aˬ yawꞈ-euˬ gʼaˇ duˬ Ka li shiˇ dah taˬ-euˬ maˬ ngeuˇ-a loˇ.

¹²Naw maꞈ kʼoeˇ loꞈ-ehˇ mˇ ngeh, aˬ yuiꞈ aˬ nyiˇ Ka li zaˬ deuˬ-ahˇ mˇ lehˬ-awˇ, gʼaˬ baˬ-eu aˬ yawꞈ maꞈ-euˬ siˬ nya-eu nui ma-ahˇ laˆ naˇ nehˬ-eu laꞈ kʼoeˇ, Ka li-ahˇ mˇ lehˬ gaˇ duˇ-eu meh.

¹³Kʼoeˇ miˇ neh, dzaˬ-eu dawˇ-eu jeˬ baˬ da neh aˬ yuiꞈ aˬ nyiˇ Ka li zaˬ iˬ baˇ mˇ doˆ laꞈ-eu ngeuˇ lawˬ naˇ, Ka li zaˬ tiˬ gʼaˬ iˬ baˇ laꞈ kʼoeˇ maˬ bi coˬ ahˇ-eu gʼaˇ duˬ, ngaˇ shaˬ jiˇ tiˬ jawˇ-iˬ maˬ paˇ dzaˬ ma.