Read Akha 2 Gawˇliˬtu 1 Bible Online

2 Gawˇliˬtu 1 - Akha bible

2 Gawˇliˬtu 1

¹Miˬyehˇ nui kʼahˇ shiˇ-eu laꞈ kʼoeˇ Yeˬsuˇ ka li-euˬ gʼaˬ kʼehˇ pyeuꞈ laˇ-euˬ ngaˇ Pawˇluˆ hawˇ-eu, aˬ dui-euˬ aˬ yuiꞈ aˬ nyiˇ Tiˆmoˇseˬ nga nyaꞈ, Gawˇliˬtu meuˬ-ahˇ jawˇ-eu Miˬyehˇ-euˬ Ka li zaˬ aˇ muˇ hawˇ-eu Aˬgaˬyaˇ miˇ kʼahˬ doe ni jawˇ-eu Miˬyehˇ-euˬ tsawˇ haˬ deuˬ jawˇ gaˇ sahˬ boꞈ boꞈ ahˇ leꞈ-eu ma.

²Aˬ dui-euˬ Aˬda Miˬyehˇ hawˇ-eu, Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ naw maꞈ kʼoeˇ taˆ jaˆ luꞈ-uˇ.

³Aˬ dui-euˬ Sahˬpaˬ Yeˬsuˇ Ka li-euˬ Aˬda pyeuꞈ-eu Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Aˬ yawꞈ-aˬ, gʼawˬ shaˬ gaˬ nya-eu Aˬda pyeuꞈ-awˇ, yawˬ jeˬ na luꞈ ngehˬ gʼeh dah teˬ nehˬ laꞈ-eu Miˬyehˇ pyeuꞈ-eu meh.

⁴Aˬ yawꞈ neh biꞈ leꞈ-euˬ ngehˬ gʼeh dah teˬ-eu jeˬ-ahˇ aˬ dui gʼoe-awˇ, shaˬ-eu zahˬ-eu yawˬ jeˬ na luꞈ-ahˇ ya tahˬ puˬ-eu tsawˇ haˬ deuˬ-ahˇ aˬ dui ngehˬ gʼeh dah teˬ nehˬ nya ni, aˬ dui ya tahˬ puˬ-eu shaˬ zahˬ dawˬ tawˆ luꞈ laꞈ kʼoeˇ Miˬyehˇ aˬ dui-ahˇ ngehˬ gʼeh dah teˬ nehˬ laꞈ-euˬ meh.

⁵Ka li ya daˬ-euˬ shaˬ zahˬ gʼawˬ mya jeˬ-ahˇ aˬ dui caw daˬ-eu loꞈ-ehˇ, Miˬyehˇ-euˬ huiˬ dui dui-eu ngehˬ gʼeh dah teˬ nehˬ laꞈ-eu jeˬ-ahˇ Ka li laꞈ kʼoeˇ aˬ dui za-euˬ ma.

⁶Shaˬ-eu zahˬ-eu jeˬ-ahˇ nga maꞈ ya daˬ naˇ, naw maꞈ-ahˇ ngehˬ gʼeh dah teˬ-eu gʼaˇ duˬ hawˇ-eu naw maꞈ ka kʼoꞈ-eu jeˬ bi za-eu gʼaˇ duˬ daˬ-eu ma. Ngehˬ gʼeh dah teˬ nehˬ laꞈ-eu jeˬ-ahˇ nga maꞈ za naˇ, nga maꞈ daˬ dzeuˇ oˇ dzeuˇ-euˬ shaˬ zahˬ-ahˇ naw maꞈ daˬ dzeuˇ oˇ dzeuˇ coeˇ ni, gʼaˬ za lahˬ laˇ tehꞈ-a.

⁷Kʼoeˇ miˇ neh, naw maꞈ-ahˇ nga maꞈ noeˬ tmˬ taˬ-euˬ jeˬ ziꞈ dah ni jaˆ luꞈ ma. Nga maꞈ ya daˬ luꞈ-eu shaˬ zahˬ-ahˇ naw maꞈ daˬ caw-eu loꞈ-ehˇ, nga maꞈ za-euˬ ngehˬ gʼeh dah teˬ nehˬ laꞈ-eu jeˬ-ahˇ naw maꞈ kʼawꞈ za meh lehˇ nga maꞈ siˬ nya ma.

⁸Aˬ yuiꞈ aˬ nyiˇ ka li zaˬ deuˬ-oˇ, Aˬshaˆ miˇ kʼahˬ-ahˇ nga maꞈ ya daˬ-euˬ shaˬ zahˬ naw maꞈ-ahˇ bi siˬ mawꞈ miˇ-a. Nga maꞈ kʼoeˇ taˆ keuˆ le teuˇ le-euˬ jeˬ aˇ dzehˬ dzeuˇ-eu miˇ neh, maˬ paˇ ya dehꞈ-eu miˇ-a lehˇ noeˬ jiˇ-euˬ ma.

⁹Nga maꞈ-ahˇ bi shiˇ-eu gʼaˇ duˬ yaˇ kʼaˬ daˇ tsehˆ gʼaˬ-euˬ nga lehˇ nga maꞈ noeˬ-euˬ ma. Ehˇ kʼawꞈ, kʼoeˇ loꞈ-ehˇ pyeuꞈ laˇ-euˬ kʼoeˇ-aˬ, nga maꞈ yawˬ haˇ yawˬ ha maˬ gʼoe-ehˇ, shiˇ-euˬ tsawˇ haˬ-ahˇ bi gʼoꞈ dehꞈ laˇ nya-eu Miˬyehˇ-ahˇ tehꞈ-ehˇ gʼoe nya laˇ-eu gʼaˇ duˬ pyeuꞈ-eu meh.

¹⁰Kʼoeˇ naˆ naˆ-ehˇ gʼeh-eu shiˇ gaˇ keuˆ leˇ taˬ-euˬ aˇ tiˆ-ahˇ, nga maꞈ-ahˇ ka kʼoꞈ nehˬ laꞈ-euˬ meh. Mehˬ hu paw kʼawꞈ, aˬ yawꞈ nga maꞈ-ahˇ ka kʼoꞈ nehˬ laꞈ tehꞈ-a. Naw maꞈ guiˬ lahˬ shaˇ nehˬ laꞈ-euˬ baˬ da neh, aˬ yawꞈ nga maꞈ-ahˇ paˇ ka kʼoꞈ nehˬ laꞈ tehꞈ-a lehˇ nga maꞈ jah duˬ taˬ-euˬ ma. Tsawˇ haˬ gʼawˬ mya ni guiˬ lahˬ shaˇ-euˬ dawˬ Miˬyehˇ-ahˇ gaˬ leˇ-awˇ, nga maꞈ-ahˇ Miˬyehˇ guiˬ lahˬ biꞈ laꞈ tehꞈ-a. Tsawˇ haˬ gʼawˬ mya ni nga maꞈ-euˬ gʼaˇ duˬ Miˬyehˇ-euˬ guiˬ lahˬ-ahˇ ja ceuˬ tehꞈ-a.

¹²Miˇ tsaˬ heu kʼoeˇ taˆ nga maꞈ yaw dehꞈ dehꞈ luꞈ-eu heu hawˇ-eu, kʼaˆ kʼaˆ ni naw maꞈ nehˬ-ehˇ cawˬ ya cawˬ taꞈ luꞈ-eu heu-aˬ, Miˬyehˇ neh biꞈ leꞈ-euˬ myaˆ pyawˬ bya cehˆ ni taˬ nya-eu jeˬ hawˇ-eu, nui ma dawˇ coe ni gʼeh-eu jeˬ laꞈ kʼoeˇ ya dehꞈ luꞈ-eu baˬ da neh maˬ ehˇ, tsawˇ haˬ zaˬ-euˬ zaˬ siˬ tsawˇ gahˇ-ahˇ maˬ gʼoe-ehˇ Miˬyehˇ-euˬ guiˬ lahˬ yaw dzahˇ-euˬ baoˬ-ahˇ gʼoe-awˇ ya dehꞈ luꞈ-eu baˬ da neh maˬ ehˇ, nga maꞈ kʼahˬ sehˇ jehˆ kʼaˇ za-eu ma.

¹³Naw maꞈ gui haw-awˇ gʼoˆ shaw nya paˬ-ehˇ gʼeh-eu gaˇ kawˆ deuˬ tehꞈ-ehˇ nga maꞈ boꞈ ahˇ leꞈ-euˬ ma. Naw maꞈ yaw muiˬ paˬ-ehˇ gʼoˆ shaw nya tehꞈ-a lehˇ noeˬ tmˬ-eu ma.

¹⁴Nga maꞈ-euˬ gaˇ kawˆ naw maꞈ tsaˬ tsaˬ ni gʼoˆ shaw gʼaˬ taˬ-euˬ meh. Kʼoeˇ miˇ neh, aˬ dui-euˬ Sahˬpaˬ Yeˬsuˇ zaꞈ le ngeh nah naw maꞈ gʼaˇ duˬ nga maꞈ kʼahˬ sehˇ jehˆ kʼaˇ za-eu loꞈ-ehˇ, nga maꞈ gʼaˇ duˬ kʼawꞈ naw maꞈ kʼahˬ sehˇ jehˆ kʼaˇ za tehꞈ-a.

¹⁵Nga maꞈ gʼaˇ duˬ naw maꞈ kʼahˬ sehˇ jehˆ kʼaˇ za meh lehˇ ngaˇ siˬ duˬ-eu miˇ neh, naw maꞈ laˬ kʼaˬ nyiˬ poˆ bi cehˇ-eu gʼaˇ duˬ, naw maꞈ jawˇ gaˇ oe ma lehˇ yaw beh ngaˇ lehˬ hmˬ taˬ-euˬ ma.

¹⁶Ngaˇ Yuˇdaˆ miˇ kʼahˬ-ahˇ iˇ ngeh naw maꞈ neh bi caw ba-eu gʼaˇ duˬ, Maˬgeˬdawˇniˆ miˇ kʼahˬ-ahˇ le paw jaw naw maꞈ jawˇ gaˇ uˇ le-awˇ, gʼoꞈ le paw jaw kʼawꞈ naw maꞈ jawˇ gaˇ paˇ uˇ le-eu lehˇ lehˬ hmˬ taˬ-euˬ ma.

¹⁷Ngaˇ naw maꞈ jawˇ gaˇ oe-eu lehˇ lehˬ hmˬ ngeh, ngaˬ-euˬ nui ma poˆ poˆ laˆ laˆ-ehˇ gʼeh taˬ loˇ. Ngaˇ tiˬ jeˬ paˬ mˇ-eu lehˇ gʼeh ngeh, miˇ tsaˬ zaˬ-euˬ nui noeˬ pi-awˇ, “Oe ma,” “Maˬ oe” lehˇ, nyiˬ jeˬ luꞈ tiˬ poˆ tehꞈ-ehˇ ehˇ-euˬ ta loˇ.

¹⁸Miˬyehˇ saˇ jaˇ ziꞈ-eu yaw duˬ baw-eu loꞈ-ehˇ, “Oe-eu” hawˇ-eu “Maˬ oe-eu” nyiˬ jeˬ luꞈ tiˬ poˆ tehꞈ-ehˇ nga maꞈ maˬ ehˇ-aˬ lehˇ ehˇ tsehˆ peuˬ ma.

¹⁹Siˬlaˆ hawˇ-eu Tiˆmoˇseˬ ngaˬ ha smˇ gʼaˬ naw maꞈ-ahˇ mehˬ luꞈ-eu Miˬyehˇ-euˬ Zaˬmaˇ Yeˬsuˇ Ka liˬ-aˬ, “Ngeuˇ-eu” hawˇ-eu “Maˬ ngeuˇ-eu” nui ma nyiˬ jeˬ pi luꞈ-eu maˬ ngeuˇ-a. Aˬ yawꞈ laꞈ kʼoeˇ aˬ myah luꞈ “Ngeuˇ-eu” jeˬ tehꞈ-ehˇ ahˇ-eu meh.

²⁰Aˬ jeˬ miˇ neh ehˇ naˇ, Miˬyehˇ neh saˇ jaˇ kʼaˇ dzaˬ taˬ-euˬ jeˬ dawˬ tawˆ luꞈ, aˬ yawꞈ-euˬ laꞈ kʼoeˇ “Ngeuˇ meh” lehˇ ya mawˇ-eu meh. Kʼoeˇ miˇ neh, Miˬyehˇ-euˬ yaw shehꞈ kʼahˬ sehˇ-ahˇ taˬ huiˬ-eu laꞈ kʼoeˇ “Aˬ miˬ” lehˇ aˬ dui ehˇ ngeh, Yeˬsuˇ Ka li laꞈ kʼoeˇ aˬ dui ehˇ-eu ma.

²¹Nga maꞈ hawˇ-eu naw maꞈ-ahˇ Ka li laꞈ kʼoeˇ ziꞈ dah ni dehꞈ nya ni jahˇ nehˬ laꞈ-euˬ gʼaˬ-aˬ, Miˬyehˇ meh. Aˬ dui-ahˇ tseˇ doˆ-awˇ kʼehˇ gʼeh-euˬ gʼaˬ kʼawꞈ, Miˬyehˇ aˬ yawꞈ meh.

²²Aˬ dui-ahˇ aˬ yawꞈ-euˬ tsawˇ haˬ bi pyeuꞈ-eu gʼaˇ duˬ jmˬ diˬ nehˬ laꞈ-awˇ, aˬ duiˬ-euˬ nui ma laꞈ kʼoeˇ Muiˬ-eu Shawˇ-eu Yaw sahˇ Miˬyehˇ bi jawˇ le-eu laꞈ kʼoeˇ, aˬ yawꞈ-euˬ tsawˇ haˬ ma lehˇ kamˬ tsehˆ taˬ-euˬ meh.

²³Miˬyehˇ-ahˇ tsawˇ kaˬ bi geuꞈ ma. Ngaˬ-euˬ nui ma-ahˇ aˬ yawꞈ siˬ nya meh. Ngaˇ Gawˇliˬtu meuˬ-ahˇ maˬ oe lehˇ ehˇ-eu-aˬ, naw maꞈ-ahˇ maˬ bi naˇ leˇ ni shaˇ noeˬ-awˇ ehˇ-eu ma.

²⁴Naw maꞈ-euˬ jah-eu jeˬ-ahˇ nga maꞈ tuˆ tehˬ-awˇ uˆ lahˇ-eu lehˇ maˬ ngeuˇ. Jah-eu jeˬ laꞈ kʼoeˇ naw maꞈ ziꞈ dah ni yawꞈ luꞈ meh lehˇ nga maꞈ siˬ nya ma. Nga maꞈ-aˬ, naw maꞈ laˬ kʼaˬ cehˇ ni mˇ luꞈ-eu naw maꞈ-euˬ gaˇ mˇ cawˬ deuˬ pyeuꞈ-eu ma.